తెలంగాణ (Telangana)లో కాంగ్రెస్ (Congress) ప్రభుత్వం ఏర్పడిన తర్వాత.. బీఆర్ఎస్ (BRS) వర్కింగ్ ప్రెసిడెంట్ కేటీఆర్ (KTR).. ప్రభుత్వ పాలనలోని ప్రతి అంశాన్ని జాగ్రత్తగా పరిశీలిస్తున్నట్లు తెలుస్తోంది. ఒకవైపు విమర్శలు చేస్తూనే.. మరోవైపు సలహాలు, సూచనలు ఇస్తున్నారు.. ఈ నేపథ్యంలో గుజరాత్‌కు కేన్స్ చిప్ యూనిట్ తరలిపోనున్నట్లు వస్తున్న వార్తలపై ట్విట్టర్ వేదికగా స్పందించారు.
కర్ణాటక నుంచి తెలంగాణకు కేన్స్ చిప్ యూనిట్ సంస్థను తరలించేందుకు తాము ఎంతో శ్రమించామని తెలిపారు. ఈ సంస్థ కొంగరకలాన్‌, ఫాక్స్‌కాన్ ప్లాంట్ దగ్గర స్థలం కావాలని కోరింది.. అయినా కంపెనీ తరలిపోకుండా.. పది రోజుల్లో జాగా కేటాయించామని పేర్కొన్నారు. ప్రస్తుతం ఈ సంస్థ గుజరాత్‌కు తరలిపోతుందనే వార్త బాధ కలిగించిందని వెల్లడించారు. కాగా తెలంగాణలోనే ఈ సంస్థ ఉండేలా కాంగ్రెస్ ప్రభుత్వం చొరవ చూపాలని కోరుతున్నట్లు కేటీఆర్ ట్వీట్ చేశారు.
ఇదిలా ఉండగా ఎలక్ట్రానిక్స్ మ్యానుఫ్యాక్చరింగ్ ఎకోసిస్టమ్, సెమీ కండక్టర్ ఇండస్ట్రీకి.. కేన్స్ ఓసాట్ యూనిట్ కీలక పాత్ర పోషించనుంది. మరోవైపు సామాజిక మాధ్యమంలో వచ్చిన ఓ రైతు భావోద్వేగమైన వీడియోపై కేటీఆర్ స్పందించారు. తానును త్వరలోనే ముషంపల్లి (Mushampally) గ్రామాన్ని సందర్శిస్తానని ట్వీట్ చేశారు. అదీగాక ఆ ఊరిలో మల్లయ్యని, బోర్ వెల్ రాంరెడ్డిని వ్యక్తిగతంగా కలుస్తానని వెల్లడించారు.
మరోవైపు నల్గొండ జిల్లా ముషంపల్లి గ్రామానికి చెందిన మల్లయ్య అనే రైతు.. తమ సమస్యలపై ఆవేధన వ్యక్తం చేస్తూ.. వీడియో రికార్డు చేసి కేసీఆర్ గారికి పంపాలని ఓ యువకున్ని కోరాడు. దీంతో అతను ఆ రైతు ఆవేదనని వీడియోలో బంధించి ట్విట్టర్ లో పోస్టు చేశాడు. అది వైరల్ గా మారడంతో ఆ వీడియోని కొందరు నెటిజన్లు కేటీఆర్ ని ట్యాగ్ చేసి షేర్ చేశారు..
