National

– ప్రధాని మోడీ టూరిజం ప్రమోషన్
– లక్షద్వీప్ అందాలను వివరిస్తూ ట్వీట్
– సముద్రం అడుగున డైవింగ్
– ఎంతో అద్భుతమైన అనుభవమన్న పీఎం
– ఎవరూ మిస్ కావొద్దని పిలుపు

లక్షద్వీప్‌ (Lakshadweep)లో ప్రధాని మోడీ (PM Modi) ‘స్నార్కెలింగ్’ (Snorkelling)సాహనం చేశారు. దీనికి సంబంధించిన ఫోటోలను గురువారం తన ఎక్స్ ( ట్విట్టర్) ఖాతాలో మోడీ షేర్ చేశారు. ఈ ఫోటోలు సోషల్ మీడియాలో వైరల్ అవుతున్నాయి. రెండు రోజుల పర్యటన నిమిత్తం ప్రధాని మోడీ బుధవారం లక్షద్వీప్ వెళ్లారు. అక్కడ ప్రకృతిని ఆయన ఆస్వాదించారు.

తాజాగా తన లక్షద్వీప్ పర్యటన గురించి కొన్ని విషయాలను ప్రధాని మోడీ ట్విట్టర్ లో ప్రజలతో పంచుకున్నారు. లక్షద్వీప్‌లో తాను స్నార్కెలింగ్ ( సముద్రంలో చేసే ఓ తరహా డైవింగ్) చేశానని పేర్కొన్నారు. ఇది చాలా అద్భుతమైన అనుభవం అని వెల్లడించారు. సాహసాలు చేయాలనుకునే వాళ్లు తమ అడ్వెంచరెస్ ప్లేస్ ల జాబితాలో లక్షద్వీప్ లను చేర్చుకోవాల్సిందేనన్నారు. స్నార్కెలింగ్ సమయంలో నీటి అడుగు భాగంలో తీసిన ఫోటోలను కూడా మోడీ షేర్ చేశారు.

నీటి అడుగు భాగంలో ఉన్న ఇసుక దిబ్బలు, సముద్ర జీవులు ఆ ఫోటోల్లో కనిపిస్తున్నాయి. అగట్టి, బంగారం, కవరట్టి వాసులతో తాను సంభాషించానని మోడీ చెప్పారు. అక్కడ తనకు గొప్ప ఆతిథ్యం లభించిందన్నారు. వారి ఆతిథ్యానికి కృతజ్ఞతలు తెలియజేసినట్లు ప్రధాన మంత్రి తెలిపారు. లక్షద్వీప్ అనేది కేవలం ద్వీపాల సమూహం మాత్రమే కాదని అన్నారు.

ఇది సంప్రదాయాల శాశ్వతమైన వారసత్వమని, అక్కడి ప్రజల స్ఫూర్తికి నిదర్శనమన్నారు. ఈ ప్రాంతంలో అభివృద్దిని ప్రోత్సహించడం, మెరుగైన వైద్య ఆరోగ్య సౌకరర్యాలు కల్పించడం, వేగవంతమైన ఇంటర్నెట్, తాగునీటి అవకాశాలు కల్పించడం, ఇక్కడి సంస్కృతిని సంరక్షించడం ద్వారా లక్ష ద్వీప్ ప్రజల జీవన ప్రమాణాలను పెంచడంపై కేంద్రం దృష్టి పెట్టిందన్నారు.

భారత విదేశాంగ మంత్రి జైశంకర్ (S.Jaishankar) కీలక వ్యాఖ్యలు చేశారు. చైనా విషయంలో దివంగత ప్రధాని జవహర్ లాల్ నెహ్రూ (Jawaharlal Nehru), దివంగత ఉప ప్రధాని సర్ధార్ వల్లభాయ్ పటేల్ ఇద్దరూ భిన్నమైన అభిప్రాయాలు కలిగి ఉన్నారని చెప్పారు. ఇదేదో తన ఫ్యాంటసీ కాదని అన్నారు. ఈ విషయంలో నెహ్రూ, వల్లభాయ్ పటేల్ లేఖలు రాసుకున్నారని జైశంకర్ తెలిపారు. ఆ లేఖల ద్వారా చైనా విషయంలో వారు భిన్న అభిప్రాయలను కలిగి ఉన్నట్టు తెలుస్తోందన్నారు.

ఢిల్లీలో ‘వై భారత్ మాటర్స్’అనే పుస్తకాన్ని ఆవిష్కరించారు. ఈ సందర్భంగా జైశంకర్ మాట్లాడుతూ… ఐక్యరాజ్యసమితికి చెందిన భద్రతా మండలిలో శాశ్వత సభ్యత్వాన్ని భారత్ తీసుకోకపోవడాన్ని ప్రస్తావించారు. భద్రతా మండలిలో ముందుగా చైనా చోటు దక్కించుకోనివ్వండని రాష్ట్రాల ముఖ్యమంత్రులకు నెహ్రూ లేఖలు కూడా ఉన్నాయని వెల్లడించారు.

భారత ప్రయోజనాలకు నెహ్రూ తొలి ప్రాధాన్యం ఇచ్చి ఉంటే ఈ రోజు చైనాతో సంబంధాలపై ఆశలు పెంచుకునే వాళ్లం కాదన్నారు. భద్రతా మండలిలో సభ్యత్వం విషయంలో చైనాకు నెహ్రూ మద్దతు ఇవ్వడాన్ని కూడా ఆయన ప్రస్తావించారు. 1962లో భారత్ తో చైనా యుద్దానికి దిగినప్పుడు అమెరికా సహాయాన్ని కోరేందుకు నెహ్రూ సంకోచించారని పేర్కొన్నారు.

కానీ పటేల్ మాత్రం అందుకు భిన్నంగా ఆలోచించారన్నారు. అమెరికా పట్ల మనం అపనమ్మకం ఎందుకు కలిగి ఉన్నామని ఆయన ప్రశ్నించే వారన్నారు. చైనాతో అమెరికన్లు ఎలా వ్యవహరిస్తున్నారనే విషయం గురించి కాకుండా మన సొంత ప్రయోజనాల కోణం నుండి అమెరికాను చూడాలని పటేల్ వ్యాఖ్యలు చేశారని జైశంకర్ వివరించారు.

ఆధునిక భారత్ నిర్మాణానికి కాంగ్రెస్‌ (Congress) అందించిన సహకారాన్ని మరుగున పడేలా చేసేందుకు ఎప్పటికప్పుడు మోడీ (Modi) సర్కార్ ప్రయత్నిస్తోందని కాంగ్రెస్ జాతీయ అధ్యక్షుడు మల్లికార్జున ఖర్గె ఆరోపించారు. ప్రతి విషయంలోనూ ఉద్దేశపూర్వకంగా కాంగ్రెస్ ను లాగే ప్రయత్నం చేస్తున్నారంటూ మండిపడ్డారు. బీజేపీ తన పదేండ్ల వైఫల్యాలను కప్పిపుచ్చుకునేందుకు ఉద్వేగపూరిత అంశాలను తెరపైకి తెస్తోందన్నారు.

రాబోయే లోక్ సభ సార్వత్రిక ఎన్నికలు, ఇండియా కూటమి పార్టీల మధ్య సీట్ల పంపకం, భారత్‌ జోడో న్యాయ్‌ యాత్ర సన్నాహాలపై చర్చించేందుకు ఢిల్లీలో కాంగ్రెస్ ముఖ్య కార్యకర్తల సమావేశాన్ని నిర్వహించారు. ఈ సమావేశంలో ఖర్గే మాట్లాడుతూ…. కాంగ్రెస్ కార్యకర్తలంతా తమ విభేదాలను పక్కకు పెట్టి 2024 లోక్ సభ ఎన్నికల్లో పార్టీ విజయానికి కృషి చేయాలని పిలుపునిచ్చారు.

పార్టీ అంతర్గత విషయాల గురించి మీడియా ఎదుట మాట్లాడవద్దని కాంగ్రెస్ శ్రేణులకు సూచించారు. పగలు, రాత్రి కష్టపడి పనిచేస్తే లోక్‌సభ ఎన్నికల తర్వాత ప్రత్యామ్నాయ ప్రభుత్వాన్ని అందించగలుగుతామని తెలిపారు. కాంగ్రెస్ కార్యకర్తలంతా ఐక్యంగా ఉండి బీజేపీ అసత్య ప్రచారాలకు తగిన సమాధానం ఇవ్వాలని సూచనలు చేశారు.

భారత్ జోడో యాత్రను చేపట్టినందుకు కాంగ్రెస్ అగ్రనేత రాహుల్ గాంధీని ఖర్గే ప్రశంసించారు. తాజాగా ఆయన చేపట్టబోతున్న భారత న్యాయ యాత్ర పేరును మారుస్తు కాంగ్రెస్ నిర్ణయం తీసుకుంది. ఈ యాత్రకు భారత్ న్యాయ్ జోడో యాత్రగా పేరు మారుస్తున్నట్టు వెల్లడించింది. మణిపుర్ నుంచి మహారాష్ట్ర వరకు రాహుల్ గాంధీ చేపట్టబోయే భారత్ జోడో న్యాయ్ యాత్ర సామాజిక న్యాయ సమస్యలను వెలికితీస్తుందని ఖర్గే విశ్వాసం వ్యక్తం చేశారు.

కాంగ్రెస్​, ఇండియా కూటిలోని పార్టీలపై బీజేపీ దాడులు చేస్తోందని చెప్పారు. ఇండియా కూటమిలో బలమైన క్యాడర్, భావజాలం ఉన్న పార్టీలు ఉన్నాయన్నారు. ఎన్‌డీఏ పేరుకు మాత్రమే మిగిలిందన్నారు. 25 ఏండ్ల పాటు కాంగ్రెస్ అధ్యక్షురాలిగా సోనియాగాంధీ విశేష సేవలందించారన్నారు. ఆమె అందించిన సేవలను తాను గౌరవిస్తానన్నారు. 2004లో కాంగ్రెస్ నేతృత్వంలోని యూపీఏ కూటమి ఎన్డీఏను ఓడించిందని వివరించారు. పదేండ్ల పాటు అధికారంలో ఉండేలా సోనియా చేశారని గుర్తు చేశారు.

శ్రీ రాముడు ‘మాంసాహారి’ అంటూ తాను చేసిన వివాదాస్పద వ్యాఖ్యలపై (Controversial Comments) ఎన్సీపీ నేత జిత్రేంద్ర అవద్ (Jitendra Awhad) క్లారిటీ ఇచ్చారు. తన వ్యాఖ్యలపై ఆయన విచారం (Regret) వ్యక్తం చేశారు. ఎవరి మనోభావాలను దెబ్బ తీయడం తన ఉద్దేశం కాదని తెలిపారు. తన వ్యాఖ్యలు కొంత మంది మనోభావాలను దెబ్బ తీసిందని తెలిసి తాను బాధపడుతున్నట్టు చెప్పారు. తాను అలా మాట్లాడకుండా ఉండాల్సిందన్నారు.

చరిత్రను వక్రీకరించడం తన పని కాదని చెప్పారు. తాను అధ్యయనం చేయకుండా ఎలాంటి వ్యాఖ్యలు చేయలేదన్నారు. ఆ వ్యాఖ్యలు తన సొంత వ్యాఖ్యలు కాదని పేర్కొన్నారు. వాల్మీకి రామాయణంలోనే రాసి ఉందని వివరించారు. 1891 నాటి అధికారిక ప్రతిని కోల్‌కతా ఐఐటీ కాన్పూర్‌లో ప్రింట్ చేశారని అన్నారు. ఈ విషయంలో చాలా అధ్యయనాలు జరిగాయన్నారు.

ఈ రోజుల్లో చదువు కన్నా భావోద్వేగాలకే ఎక్కువ ప్రాధాన్యత ఇస్తారని వెల్లడించారు. అందుకే తన వ్యాఖ్యలతో ఎవరి మనోభావాలైనా దెబ్బతిని ఉంటే దానికి క్షమాపణలు చెబుతున్నానన్నారు. తనపై దాఖలైన ఫిర్యాదుపై ఆయన స్పందించారు. తాను ఎలాంటి ఎఫ్‌ఐఆర్‌కు భయపడబోనని స్పష్టం చేశారు. ఇది ఇలా వుంటే జితేంద్ర అవద్ వ్యాఖ్యలపై హిందూ సంఘాలు, సాదువులు మండిపడ్డారు.

అయోధ్యకు చెందిన సాధువు పరమహంస ఆచార్య తీవ్ర స్థాయిలో ఆగ్రహం వ్యక్తం చేశారు. ఎంపీ వ్యాఖ్యలు అవమానకరమని అన్నారు. ఎంపీ వ్యాఖ్యలు రామ భక్తుల మనోభావాలను ఎంపీ దెబ్బ తీశారని తీవ్ర స్థాయిలో మండిపడ్డారు. ఎన్సీపీ నేత చేసిన వ్యాఖ్యలను తీవ్రంగా ఖండిస్తున్నామని వెల్లడించారు.

ఇలాంటి వ్యాఖ్యలను ఇతర మతాలపై ఎంపీ చేసి ఉంటే ఇప్పటికే ఎంపీ మరణించి ఉండేవాడన్నారు. మర్యాద పురుషోత్తుముడైన శ్రీ రామున్ని అవమానిస్తే ఊరుకోబోమని తేల్చి చెప్పారు. హిందు మత గ్రంధాల గురించి తెలియకుంటే మొదట ఎంపీ ఆ గ్రంధాల గురించి జ్ఞానం పెంచుకోవాలన్నారు. ఎంపీ వ్యాఖ్యలపై మహారాష్ట్ర, కేంద్రం చర్యలు తీసుకోవాలని డిమాండ్ చేశారు.

శ్రీ రాముని గురించి తప్పుగా మాట్లాడే వారిపై కఠిన చర్యలు తీసుకోవాలని కోరారు. జితేంద్ర అవద్‌పై కఠిన చర్యలు తీసుకోకుంటే ఆయన్ని చంపేస్తామని హెచ్చరించారు. అంతకు ముందు ఎంపీ వ్యాఖ్యలపై రామ జన్మభూమి తీర్థ క్షేత్ర ప్రధాన అర్చకుడు ఆచార్య సత్యేంద్ర దాస్‌ తీవ్ర స్థాయిలో ధ్వజమెత్తారు. ఎన్సీపీ నేతలు వ్యాఖ్యలు అసత్యమని స్పష్టం చేశారు.

శ్రీ రాముడు వనవాసానికి వెళ్లిన సమయంలో మాంసాహారం భుజించారని ఏ గ్రంథంలోనూ రాయలేదన్నారు. వనవాస సమయంలో శ్రీ రాముడు కేవలం దుంపలు, పండ్లు తిన్నట్లుగా ప్రతిచోటా రాసి ఉందని చెప్పారు. అందుకు శాస్త్రాలే సాక్ష్యమన్నారు. అంతకు ముందు ఎన్సీపీ నేత జితేంద్ర అవద్ వివాదాస్పద వ్యాఖ్యలు చేశారు. షిర్డీలో ఓ కార్యక్రమంలో ఆయన మాట్లాడుతూ….

శ్రీరాముడు శాకాహారి కాదని, మాంసాహారేనని అన్నారు. 14 ఏండ్లు అడవిలో నివసించే వ్యక్తి శాకాహారం కోసం ఎక్కడకు వెళ్తారని ఆయన ప్రశ్నించారు. ఈ వ్యాఖ్యలపై దుమారం రేగింది. ఆయన వ్యాఖ్యలపై హిందూ సంఘాలు తీవ్ర స్థాయిలో విరుచుకు పడ్డాయి. ఈ క్రమంలో ఎన్సీపీ నేత వెనక్కి తగ్గారు. తాను పలు గ్రంథాలను అధ్యయనం చేసిన తర్వాతే ఈ వ్యాఖ్యలు చేశారన్నారు. కానీ ఈ వ్యాఖ్యలతో ఎవరి మనోభావాలైన దెబ్బతిని ఉంటే తనను క్షమించాలని కోరారు.

లిక్కర్ పాలసీ స్కామ్‌కు సంబంధించి ఈడీ (ED) తనకు తప్పుడు సమన్లు ​​పంపిందని ఢిల్లీ సీఎం అరవింద్ కేజ్రీవాల్ (Aravind Kejriwal) తెలిపారు. లిక్కర్ పాలసీ కుంభకోణంపై రెండేళ్లుగా విచారణ జరుగుతోందన్నారు. ఎనిమిది నెలల క్రితం సీబీఐ తనను విచారణకు పిలిచిందని చెప్పారు. దానికి తాను హాజరయ్యానని అన్నారు. సీబీఐ అడిగిన అన్ని ప్రశ్నలకు తాను సమాధానం చెప్పానని వెల్లడించారు.

ఈడీ ఇచ్చిన సమన్లు లీగల్‌గా చెల్లవని స్పష్టం చేశారు. సమన్ల పేరుతో తనను విచారణకు పిలిచి అరెస్టు చేయాలని చూస్తున్నారని తెలిపారు. ఈడీ సమన్లు ఎందుకు అక్రమమైనవనే విషయంపై తాను ఈడీకి లేఖ రాశానన్నారు. కానీ ఇప్పటి వరకు ఈడీ నుంచి సమాధానం రాలేదన్నారు. తనకు లీగల్ గా నోటీసులు పంపించి ఉంటే తాను విచారణకు సహకరించి ఉండేవాడినన్నారు.

ఈ కేసులో పలువురు ఆప్ నేతలను అక్రమంగా ఇరికించారని, ఎలాంటి సాక్ష్యాధారాలు లేకపోయినా వారిని అరెస్టు చేశారని పేర్కొన్నారు. తనకు ఉన్న బలం తన నిజాయితేనని వివరించారు. అందుకే తప్పుడు ఆరోపణలతో తన ప్రతిష్టను దెబ్బతీసి తనను బలహీనున్ని చేయాలని బీజేపీ భావిస్తోందన్నారు. గత రెండేండ్లుగా ఈ కేసులో విచారణ జరగుతోందన్నారు. చాలా సార్లు సీబీఐ, ఈడీ దాడులు కూడా చేసిందన్నారు.

కానీ ఒక్క రూపాయి కూడా పట్టుబడినట్టు దర్యాప్తు సంస్థలు ఎక్కడా వెల్లడించలేదని చెప్పారు. కుంభకోణం జరిగి ఉంటే ఆ డబ్బంతా ఎక్కడికి వెళ్లిందని ప్రశ్నించారు. ఆ డబ్బంతా కేవలం గాలిలో మాయమైందా అని ఎద్దేవా చేశారు. వాస్తవం ఏంటంటే అసలు అవినీతి జరగలేదన్నారు. రాబోయే ఎన్నికల్లో ప్రచారం చేయకుండా తనను అడ్డుకునేందుకు బీజేపీ తనను అరెస్టు చేయించాలని చూస్తోందని ఆరోపించారు.

కొంత కాలంగా కేంద్రం పెట్రోల్, డిజిల్ ధరలు తగ్గిస్తుందని ప్రచారం జరుగుతోంది. అయితే అలాంటి వార్తలపై కేంద్ర పెట్రోలియం శాఖ మంత్రి(Minister Of Petroleum) హర్దీప్ సింగ్ పూరీ(Hardeep S Puri) స్పందించారు. ప్రస్తుతం పెట్రోల్, డీజిల్ ధరలను తగ్గించే ఆలోచన లేదని ప్రభుత్వం బుధవారం క్లారిటీ ఇచ్చింది. ధరల పరిస్థితిని సమీక్షిస్తూ తాము స్థిరంగా ముందుకు సాగాలని కోరుకుంటున్నామని అన్నారు.

అంతర్జాతీయ మార్కెట్‌లో ముడిచమురు ధరల్లో అస్థిరత ఎక్కువగా ఉన్నందు వల్ల ప్రస్తుతం కేంద్రానికి అలాంటి ప్రతిపాదన లేదని హర్దీప్ సింగ్ పూరీ వెల్లడించారు. ఇంధన ధరల తగ్గింపుపై మీడియాలో వస్తున్న వార్తలన్నీ ఊహాగానాలు మాత్రమేనని స్పష్టం చేశారు. ఇంధన లభ్యత ప్రభుత్వ ప్రధాన ప్రాధాన్యత అని ఆయన అన్నారు.

ఇటీవల క్రూడాయిల్ ధరలు విపరీతంగా పెరగడంతో చమురు మార్కెటింగ్ కంపెనీలు, ఇండియన్ ఆయిల్, బీపీసీఎల్, హెచ్‌సీఎల్ భారీ నష్టాలను చవిచూశాయని, ఇంధన ధరల తగ్గింపుపై చమురు మార్కెటింగ్ కంపెనీలతో ఎలాంటి చర్చలు లేవని చెప్పారు. ఈ మధ్య కాలంలో ఇంధన ధరలు తగ్గిన ఏకైక దేశం భారత్ అని ఆయన చెప్పారు.

దక్షిణాసియా దేశాల్లో పెట్రోల్, డిజిల్ ధరలు దాదాపుగా 40-80 శాతం పెరిగాయని, ఇతర పాశ్చాత్య దేశాల్లో కూడా ఇదే పరిస్థితి ఉందన్నారు. కానీ భారత్‌లో మాత్రం ధరలు తగ్గుముఖం పట్టాయని అన్నారు. నవంబర్ 2021, మే 2022లో రెండు సందర్భాల్లో సెంట్రల్ ఎక్సెజ్ సుంకాన్ని కేంద్రం తగ్గించిందని కేంద్రమంత్రి గుర్తుచేశారు.

అధ్యక్ష పీఠాన్ని రెండో సారి కైవసం చేసుకోవలని అమెరికా మాజీ అధ్యక్షుడు డొనాల్డ్‌ ట్రంప్‌కు(Donald Trump) తహతహలాడుతున్నాడు. ఈ క్రమంలో ఆయనకు యూఎస్‌ క్యాపిట్‌ దాడి వ్యవహారం తలనొప్పిగా మారింది. ఆయనకు వరుసగా ఎదురుదెబ్బలు తగులుతుండడంతో ఏం పాలుపోని స్థితిలో ఉన్నాయి.

గతేడాది డిసెంబర్‌ నెలలో ట్రంప్ అధ్యక్ష ఎన్నికల్లో పోటీచేయడానికి అనర్హుడిగా ప్రకటిస్తూ కొలరాడో(Colorado) సుప్రీం కోర్టు తీర్పునిచ్చింది. ఈ నేపథ్యంలో కొలరాడో కోర్టు తీర్పును యూఎస్‌ సుప్రీం కోర్టును (US Supreme Court) ట్రంప్‌ అభ్యర్థించారు. తాజాగా దానిని రద్దుచేయాలని కోరుతూ మంగళవారం యూఎస్‌ సుప్రీం కోర్టులో ట్రంప్‌ న్యాయవాది పిటిషన్‌ దాఖలు చేశారు.

ఈ సందర్భంగా మాట్లాడుతూ కొలరాడో కోర్టు ఉత్తర్వులను అమలుచేయానికి అనుమతించినట్లయితే అధ్యక్ష పదవి రేసులో ముందంజలో ఉన్న అభ్యర్థికి ప్రజలు ఓట్లేయకుండా చేసినట్లవుతుందని, ఇది అమెరికా చరిత్రలోనే తొలిసారని ఆ పిటిషన్‌లో పేర్కొన్నారు. కాగా, కొలరాడో కోర్టు తీర్పు వెలువరించి పట్టుమని 10 రోజులైనా గడవకముందే మైన్‌ రాష్ట్రం కూడా ఆయనకు షాక్‌ ఇచ్చింది. వచ్చే ఏడాది జరిగే అధ్యక్ష ఎన్నికల్లో పోటీచేసేందుకు ట్రంప్‌ అనర్హుడని స్పష్టం చేసింది.

కొలరాడో సుప్రీంకోర్టు తీర్పు తర్వాత మైన్‌ రాష్ట్రంలో ట్రంప్‌ అభ్యర్థిత్వాన్ని కొందరు సవాలు చేశారు. వారి అప్పీళ్లను పరిగణనలోకి తీసుకున్న ఆ రాష్ట్ర ఎన్నికల ప్రధానాధికారి షెన్నా బెల్లోస్‌.. ప్రెసిడెన్షియల్‌ ప్రైమరీ బ్యాలెట్‌ నుంచి ట్రంప్‌ పేరును తొలగిస్తున్నట్లు గతవారం ప్రకటించారు. దీంతో బెల్లోస్‌ నిర్ణయాన్ని మైన్‌ కోర్టులో సవాలు చేయనున్నట్లు ట్రంప్‌ మద్దతుదారులు తెలిపారు.

2020 అధ్యక్ష ఎన్నికల్లో ట్రంప్‌ ఓటమి అనంతరం ఆయన మద్దతుదారులు నూతన అధ్యక్షుడిగా ఎన్నికైన జో బైడెన్‌ను అడ్డుకునేందుకు 2021 జనవరి 6న యూఎస్‌ క్యాపిటల్‌పై దాడికి దిగిన విషయం విదితమే. వారిని సమర్ధించి, హింసను ప్రేరేపించినట్లు ట్రంప్‌పై అభియోగాలున్నందున వచ్చే ఏడాది జరిగే అధ్యక్ష ఎన్నికల్లో పోటీకి ఆయన అనర్హుడని కొలరాడో సుప్రీంకోర్టు ఇటీవల స్పష్టం చేసింది.