National

హమాస్(Hamas) కీలక నేత సలేహ్ అరౌరీ(Saleh Arouri) హత్య నేపథ్యంలో ఇజ్రాయెల్‌తో కాల్పుల విరమణ చర్చలను ఆ సంస్థ నిలిపివేసింది. ఈ హత్య ఉగ్రవాద చర్యగా అభివర్ణించింది. హెజ్బొల్లా గ్రూప్ సైతం ఇజ్రాయెల్(Israel)కు హెచ్చరికలు పంపింది. తాము యుద్ధానికి భయపడమని తేల్చిచెప్పింది.

ఈ దాడికి ముందు హమాస్, ఇజ్రాయెల్ మధ్య డీల్ కుదిరే అవకాశం ఉందన్న వాదనలు వినిపించాయి. అరౌరీ మరణం ఒక రకంగా ఇరాన్‌కు ఇబ్బందికరమే. 2015లో అరౌరీని అమెరికా అంతర్జాతీయ ఉగ్రవాదిగా ప్రకటించింది. అతడి సమాచారం అందిస్తే 5 మిలియన్ డాలర్ల బహుమతిని ఇస్తామని వెల్లడించింది. బీరుట్లో అరౌరీపై డ్రోన్ దాడి సమాచారాన్ని ఇజ్రాయెల్ గోప్యంగా ఉంచింది. తన మిత్రదేశమైన అమెరికాతోనూ ముందుగా పంచుకోలేదు.

దీనిపై ఇప్పటివరకు ఇజ్రాయెల్ పెదవి విప్పనప్పటికీ ఎలాంటి పరిస్థితినైనా ఎదుర్కొనేందుకు సిద్ధంగా ఉన్నామని ప్రకటించింది. హమాస్ అగ్ర నేత హత్య నేపథ్యంలో పశ్చిమాసియాలో యుద్ధం విస్తరించే ప్రమాదం ఉందనే ఆందోళన వ్యక్తం అవుతోంది. హెజ్బొల్లా సంస్థ సైతం ఇజ్రాయెల్‌కు హెచ్చరికలు పంపింది. యుద్ధానికి తాము భయపడమని చెప్పుకొచ్చింది.

తాము యుద్ధంలోకి దిగితే రూల్స్ ఏవీ ఉండవని హెజ్బొల్లా నేత సయ్యద్ హసన్ నస్రల్లా స్పష్టం చేశారు. అరౌరీ హత్య వెనుక ఇజ్రాయెల్ ఉందని తెలిపారు. ఇరాన్ మాజీ సైనిక జనరల్ ఖాసిం సులేమానీ నాలుగో వర్ధంతి సందర్భంగా బుధవారం వీడియో కాన్ఫరెన్స్‌లో మాట్లాడారు. యుద్ధంలో ఇజ్రాయెల్ గెలవలేదని, లెబనాన్‌పై ఇజ్రాయెల్ యుద్ధానికి దిగితే తమకు రూల్స్ ఉండవని హెచ్చరించారు.

మరోవైపు, హమాస్ నేతలను వదిలేది లేదని ఇజ్రాయెల్ నిఘా సంస్థ మొస్సాద్ స్పష్టం చేసింది. ఇజ్రాయెల్‌పై అక్టోబరు 7న దాడికి కారణమైన ప్రతి ఒక్క నేతనూ వేటాడతామని మొస్సాద్‌ అధిపతి డేవిడ్‌ బర్నియా తేల్చి చెప్పారు. హమాస్ నేతలు ప్రపంచంలో ఎక్కడున్నా అంతమొందిస్తామని హెచ్చరించింది.

పాకిస్థాన్(Pakistan) దశాబ్దాలుగా దేశంలో ఉంటున్న దాదాపు 1.7 మిలియన్ల అక్రమ వలసదారులను బహిష్కరించడమే పనిగా పెట్టుకుంది. ఇప్పటి వరకు 5లక్షల మందికిపైగా అక్రమ వలసదారులను ఆ దేశం నుంచి బహిష్కరించింది. ఈ విషయాన్ని పాక్ హోం మంత్రిత్వ శాఖ (Pak Home Ministry) పార్లమెంటు ఎగువ సభ (సెనేట్)కి తెలిపింది.

స్వదేశానికి రప్పించడం, బహిష్కరణ ప్రచారం యొక్క ప్రస్తుత స్థితికి సంబంధించి సెనేటర్ మొహ్సిన్ అజీజ్ ప్రశ్నలకు మంత్రిత్వ శాఖ సమాధానం ఇచ్చింది. పాక్‌లో దాదాపు 17 లక్షల మంది అక్రమ వలసదారులు నివాసముంటున్నారని, వీరిలో ఎక్కువ మంది ఆఫ్ఘాన్లు ఉన్నారని వెల్లడించింది. దేశంలో ఉండేందుకు ఎలాంటి చట్టపరమైన పత్రాలు లేకుండానే అక్రమంగా జీవిస్తున్నారని పాక్ తెలిపింది.

అక్రమ నివాసితుల బహిష్కరణ ప్రణాళికకు క్యాబినెట్ ఆమోదం తెలిపిన తర్వాత దాదాపు 5 లక్షల 41 వేల 210 మంది బహిష్కరణకు గురయ్యారని పాకిస్థాన్‌ చెప్పుకొచ్చింది. మిగిలిన 1.15 మిలియన్లు ఇప్పటికీ నివాసం ఉంటున్నారు. తమ స్వదేశాలకు పంపబడిన 5 లక్షల మంది అక్రమ వలసదారులలో 95 శాతానికి పైగా ఆఫ్ఘాన్ పౌరులే ఉన్నారని సోర్సెస్ ధృవీకరించాయి.

అక్రమ వలసదారులు ప్రవాహాన్ని తీవ్రవాద గ్రూపులతో పాటు వారి మిలిటెంట్లు దేశంలోకి ప్రవేశించడానికి, దాడులు చేయడానికి ఒక సాధనంగా ఉపయోగించుకున్నారని ఆరోపిస్తున్నారు. అక్రమ వలసదారులకు ఆశ్రయం కల్పించేందుకు తమ జాతీయ భద్రత విషయంలో రాజీపడే పరిస్థితి లేదని పాకిస్థాన్ ప్రకటించింది. ప్రపంచ మానవ హక్కుల సంస్థలు లేదా ఆఫ్ఘన్ ప్రభుత్వం లేవనెత్తిన ఆందోళనలపై స్పందించేందుకు పాకిస్థాన్ ప్రభుత్వం నిరాకరించింది.

మద్యం కుంభకోణం కేసులో ఆరోపణలు ఎదుర్కొంటున్న ఆప్ (AAP) అధినేత అరవింద్ కేజీవాల్‌ను (Arvind Kejriwal) గురువారం ఎన్‌ఫోర్స్‌మెంట్ డైరెక్టరేట్ (ED) అదుపులోకి తీసుకునే అవకాశం ఉన్నట్లు ఆ పార్టీ నేతలు ఆరోపిస్తున్నారు. ఈ మేరకు విశ్వసనీయ వర్గాల నుంచి తమకు పక్కా సమాచారం ఉందని చెబుతున్నారు.

అయితే, మద్యం కుంభకోణం కేసులో ఈడీ విచారణకు కేజ్రీవాల్ బుధవారం మరోసారి గైర్హాజరైన విషయం తెలిసిందే. ఈ క్రమంలో ఆయన అరెస్టుపై జోరుగా ఊహాగానాలు మొదలయ్యాయి. రాజ్యసభ ఎన్నికలు, గణతంత్ర దినోత్సవ కార్యక్రమాల పనుల్లో తాను బిజీగా ఉన్నట్లు బుధవారం ఈడీకి కేజ్రీవాల్ రాతపూర్వక సమాధానాన్ని పంపారు.

ఈ నేపథ్యంలో తలెత్తబోయే ఎలాంటి పరిణామాలనైనా ఎదుర్కొనేందుకు తాము సిద్ధంగా ఉన్నామని చెప్పారు. కేజ్రీవాల్ ఇంట్లో ఈడీ సోదాలు చేయనున్నట్లు విశ్వసనీయ వర్గాలు తనతో ధ్రువీకరించాయని ‘డైలాగ్ అండ్ డెవలప్‌మెంట్ కమిషన్ ఆఫ్ ఢిల్లీ’ ఛైర్‌పర్సన్ జాస్మిన్ షా తెలిపారు. దర్యాప్తు సంస్థ పంపే ఎలాంటి ప్రశ్నావళికైనా జవాబులు తెలపడానికి సిద్ధంగా ఉన్నట్లు లేఖలో తెలిపారు.

ఈ కేసులో తనను విచారించడానికి గల నిజమైన ఉద్దేశాన్ని తెలపాలంటూ ఇప్పటికే పలుమార్లు లేఖలు పంపానని వాటిపై ఈడీ స్పందించాలని కోరారు. ‘కేజ్రీవాల్ ఇంట్లో ఈడీ సోదాలు జరపనున్నట్లు మాకు సమాచారం అందుతోంది. బహుశా ఆయనను అరెస్ట్ చేయొచ్చు అని ఆప్ కీలక నేత ఆతిశీ బుధవారం రాత్రి ‘ఎక్స్’లో పోస్ట్ చేశారు. ఇదే విషయాన్ని ఆప్ జాతీయ అధికార ప్రతినిధి సౌరభ్ భరద్వాజ్ సైతం వెల్లడించారు.

మిత్ర పక్షం జనతాదళ్ యునైటెడ్ (JDU)చీఫ్, సీఎం నితీశ్ కుమార్‌ను బుజ్జగించే పనిలో కాంగ్రెస్ పడింది. ఇప్పటికే నితీశ్ కుమార్ తో కాంగ్రెస్ అగ్రనేత రాహుల్ గాంధీ ఫోన్ లో మాట్లాడి బుజ్జగించే ప్రయత్నం చేశారు. కానీ ఆయన అలక పాన్పు దిగలేదని తెలుస్తోంది. దీంతో ఆయన్ని ఎలాగైనా బుజ్జ గించాలని కాంగ్రెస్ తీవ్రంగా ప్రయత్నిస్తున్నట్టు తెలుస్తోంది.

ఆ ప్రయత్నాల్లో భాగంగానే నితీశ్ కుమార్‌ను ఇండియా కూటమికి కన్వీనర్‌గా ప్రకటించాలనే యోచనలో కాంగ్రెస్ ఉన్నట్టు పొలిటికల్ సర్కిల్‌లో చర్చ జరుగుతోంది. తాజాగా జేడీయూ చీఫ్ నితీశ్ కుమార్, ఆర్జేడీ చీఫ్ లాలూ ప్రసాద్ యాదవ్ తో కాంగ్రెస్ జాతీయ అధ్యక్షుడు మల్లికార్జున ఖర్గే వర్చువల్ గా సమావేశం అయ్యారు. రాబోయే ఎన్నికల్లో సీట్ల సర్దుబాటుతో పాటు పలు అంశాలపై ముగ్గురు నేతలు చర్చించినట్టు జేడీయూ వర్గాలు చెప్పాయి.

మరోవైపు ఇండియా కూటమి కన్వీనర్‌గా నితీశ్ కుమార్ ను నియమిస్తారని, కూటమి చైర్మన్ గా ఖర్గేను ప్రకటించే అవకాశం ఉన్నట్టు తమకు సమాచారం ఉందని పేర్కొన్నాయి. ఓ వైపు లోక్ సభ సార్వత్రిక ఎన్నికలు సమీపిస్తున్నాయి. మరోవైపు నితీశ్ కుమార్ ఇండియా కూటమి తీరు పట్ల కాస్త అసంతృప్తిగా ఉన్నారని, ఆయన మళ్లీ ఎన్డీఏ కూటమిలో చేరేందుకు ఆలోచనలు చేస్తున్నారంటూ వార్తలు వస్తున్నాయి.

ఇక రాహుల్ గాంధీ భారత్ న్యాయ యాత్ర చేపట్టేందుకు రెడీ అవుతున్నారు. ఇలాంటి తరుణంలో మిత్ర పక్షంలో విభేదాలు కూటమికి నష్టం కలిగించే అవకాశం ఉందని కాంగ్రెస్ భయపడుతోందని సమాచారం. మరో వైపు కూటమిలో లుకలుకలు ప్రజల్లోకి తప్పుడు సంకేతాలు తీసుకు వెళ్తాయని కాంగ్రెస్ భావిస్తోందని తెలుస్తోంది. అందుకే నితీశ్ కు ఏదో ఓ పదవి ఇచ్చి ఆయన్ని బుజ్జగించాలని కాంగ్రెస్ ఆలోచన చేస్తోందని రాజకీయ వర్గాల్లో చర్చ నడుస్తోంది.

ఇప్పటికే ఈ విషయంలో మిత్ర పక్షాలను ఒప్పించే పనిలో కాంగ్రెస్ ఉన్నట్టు వార్తలు వినిపిస్తున్నాయి. కూటమి కన్వీనర్ గా నితీశ్ కుమార్ ను నియమించే విషయంలో తనకు ఎలాంటి అభ్యంతరాలు లేవని సీఎం కేజ్రీవాల్ చెప్పినట్టు తెలుస్తోంది. అటు శివసేన నేత ఉద్ధవ్ ఠాక్రే కూడా ఈ నిర్ణయానికి మద్దతు ఇచ్చినట్టు పార్టీ వర్గాలు చెబుతున్నాయి. వచ్చే వారం జరిగే కూటమి సమావేశాల్లో నితీశ్ నియామకం గురించి ప్రకటన చేసే అవకాశం ఉంది.

అదానీ- హిండెన్​బర్గ్ (Adani Hindenburg Case) వివాదంలో సర్వోన్నత న్యాయస్థానం (Supreme Court) కీలక తీర్పు వెల్లడించింది. ఈ కేసులో సిట్ విచారణకు సుప్రీం కోర్టు నో చెప్పింది. రెగ్యులేటరి సంస్థ ఫ్రేమ్ వర్క్‌లో తాము జోక్యం చేసుకోలేమని స్పష్టం చేసింది. ఈ కేసులో సెబి తన ఇన్వెస్టిగేషన్ కొనసాగించాలని సూచించింది. మూడు నెలల్లోగా దర్యాప్తును పూర్తి చేయాలని ఉన్నత న్యాయస్థానం ఆదేశించింది.

థర్డ్​ పార్టీలు సమర్పించే నివేదికలను పూర్తి నిర్ణయాత్మక ఆధారాలుగా పరిగణించలేమని సుప్రీంకోర్టు స్పష్టం చేసింది. అదానీ కంపెనీలపై ఆరోపణలను రుజువు చేసేందుకు పక్కా ఆధారాలు అవసరమని పేర్కొంది. ఇప్పటి వరకు మొత్తం 24 ఆరోపణలు రాగా వాటిపై 22 ఆరోపణలపై సెబీ దర్యాప్తు చేసిందని కోర్టు వెల్లడించింది. అందువల్ల సెబీ దర్యాప్తులో తాము జోక్యం చేసుకోలేమని చెప్పింది.

కోర్టు నియమించిన ప్యానెల్ సిఫార్సుల మేరకు ప్రభుత్వం, సెబీ నడుచుకోవాలని ఆదేశాలు జారీ చేసింది. హిండెన్ బర్గ్ నివేదికలో షార్ట్ సెల్లింగ్ ఉల్లంఘనలను ప్రభుత్వం, సెబీ పరిశీలించాలని ఆదేశించింది. ఏవైనా ఉల్లంఘనలు జరిగితే చట్ట ప్రకారం వాటిపై చర్యలు తీసుకోవాలని ఆదేశించింది. ఇది ఇలా వుంటే సుప్రీం కోర్టు తీర్పుపై కాంగ్రెస్ సీనియర్ నేత మనీశ్ తివారీ స్పందించారు. సుప్రీం కోర్టు తీర్పును చదవలేదని చెప్పారు.

కానీ రెండు నెలల్లోగా దర్యాప్తు పూర్తి చేయాలని సెబీని సర్వోన్నత న్యాయస్థానం ఆదేశించినట్టు తెలిసిందన్నారు. అదానీ కంపెనీలపై హిండెన్ బర్గ్ సంస్థ ఏడాది క్రితం ఆరోపణలు చేసిందని తెలిపారు. ఒక వేళ సెబీ అలర్ట్ గా ఉన్నట్టయితే అప్పుడే స్పందించేదన్నారు. చాలా రోజుల క్రితమే సెబీ తన దర్యాప్తును పూర్తి చేసి ఉండేదని అన్నారు. సుప్రీం కోర్టు తీర్పుపై గౌతమ్ అదానీ స్పందించారు. సత్యమేవ జయతే అని ట్వీట్ చేశారు. సుప్రీంకోర్టు తీర్పు ప్రకారం సత్యం విజయం సాధించిందన్నారు. తన పక్షాన నిలిచిన వారందరికీ ధన్యవాదాలు తెలిపారు.

ఛత్తీస్ గఢ్ ప్రభుత్వం కీలక నిర్ణయం తీసుకుంది. జనవరి 22న అయోధ్యలో ‘రామ్ లల్లా’ (Ram Lalla) విగ్రహ ప్రాణ ప్రతిష్ట సందర్భంగా రాష్ట్రంలో డ్రై డే (Dry Day) పాటించాలని నిర్ణయించింది. శ్రీ రాముడి అమ్మమ్మ తాతయ్యల జన్మస్థలం చత్తీస్ గఢ్ కావడం తమ రాష్ట్ర అదృష్టమని సీఎం విష్ణు సాయి దేవ్ (Vishnu Deo Sai )తెలిపారు.

జనవరి 22న అయోధ్యలో రామమందిర శంకుస్థాపన జరగడం తమ అదృష్టమన్నారు. రాష్ట్రంలో డిసెంబర్ 25 నుంచి జనవరి 2 వరకు సుపరిపాలన వారోత్సవాలను నిర్వహిస్తున్నామని సీఎం విష్ణు దేవ్ సాయి వెల్లడించారు. సుపరిపాలనలో తమకు రామ రాజ్యమే ఆదర్శమని తెలిపారు. ప్రాణ ప్రతిష్ట రోజు రాష్ట్రవ్యాప్తంగా పండుగ వాతావరణం నెలకొంటుందని అన్నారు.

దీపావళి పండుగలాగా ఆ రోజు ఇళ్లలో దీపాలు వెలిగిస్తామని, జనవరి 22ని రాష్ట్రవ్యాప్తంగా డ్రై డేగా ప్రకటిస్తున్నామని పేర్కొన్నారు. ఆ రోజున రాష్ట్ర వ్యాప్తంగా మద్యం విక్రయాలను నిలిపి వేస్తున్నామని తెలిపారు. ప్రాణ ప్రతిష్ట కార్యక్రమానికి రాష్ట్రంలోని రైస్ మిల్లర్స్ అసోసియేషన్ 300 మెట్రిక్ టన్నుల బియ్యాన్ని అయోధ్యకు పంపించిందని వివరించారు. రాష్ట్రానికి చెందిన రైతులు కూరగాయలు కూడా పంపిస్తున్నారని చెప్పారు.

శ్రీ రాముడు వనవాస సమయంలో చత్తీస్ గఢ్ లోని పలు ప్రాంతాల్లో సంచరించారని చరిత్ర కారులు చెబుతున్నారు. చరిత్రకారులు, పరిశోధకుల ప్రకారం శ్రీ రాముని తల్లి కౌలస్య జన్మస్థలం చందకూరి గ్రామం. రాజధానికి రాయ్ పూర్ కు 27 కిలో మీటర్ల దూరంలో ఈ గ్రామం ఉంటుంది. ఇక్కడ ప్రసిద్ద మాతా కౌసల్య ఆలయం ఉంది. ప్రతి యేటా వేలాది మంది భక్తులు వచ్చి ఈ ఆలయాన్ని సందర్శిస్తూ ఉంటారు.

తమిళనాడు తిరుచిరపల్లి ( Tiruchirappalli)లో అభివృద్ధి చేసిన ఎయిర్ పోర్టు టెర్మినల్ ( Airport Terminal Building)ను ప్రధాని మోడీ (PM Modi) మంగళవారం ప్రారంభించారు. రాష్ట్రంలో చెన్నై తర్వాత రెండవ అతి పెద్ద అంతర్జాతీయ విమానాశ్రయం తిరుచ్చి ఎయిర్ పోర్టు కావడం విశేషం.

ఈ విమానాశ్రయంలో అధ్యాత్మికత ఉట్టిపడుతోంది. ప్రయాణికులకు ఆలయ గోపురం ఆహ్వానం పలుకుతున్నట్టుగా ఈ టర్మినల్ భవనాన్ని నిర్మించారు. ఇందులో మొత్తం 60 చెక్ ఇన్ కౌంటర్లు ఉన్నాయి. 5 లగేజీ చెకింగ్ కౌంటర్లు, 60 ఇమిగ్రేషన్ కౌంటర్లు, 44 డిపార్చర్​ ఇమ్మిగ్రేషన్​ కౌంటర్లను ఏర్పాటు చేశారు.

ఈ టెర్మినల్‌లో తాము చాలా పెయింటింగ్ వర్క్స్, మురల్స్ (కుడ్య చిత్రాలు) వేయించినట్టు టెర్మినల్ ఆర్ట్ వర్క్ క్రియేటివ్ డైరెక్టర్ రాజా విఘ్నేశ్ తెలిపారు. మొత్తం 100 మంది కళాకారులు ఈ పెయింటింగ్స్ వేశారన్నారు. తిరుచిరాపల్లికి చెందిన సాంస్కృతిక చైతన్యం నుంచి ప్రేరణ పొంది ఈ నూతన భవనాన్ని డిజైన్ చేసినట్టు అధికారులు వెల్లడించారు.

ఈ నూతన టెర్మినల్ రాష్ట్రంలో ఆర్థిక వృద్ధిని పెంచుతుందని అధికారులు చెబుతున్నారు. మెరుగైన కనెక్టివిటీతో విమాన ప్రయాణాన్ని మెరుగు పరచడంలో దోహదపడుతుందని చెబుతున్నారు. రూ. 1100 కోట్లు ఖర్చు చేసి ఈ విమానాశ్రయాన్ని అభివృద్ధి చేశారు. ఈ టెర్మినల్​ ద్వారా ఏటా 44 లక్షల మంది ప్రయాణికులు తమ గమ్యస్థానాలకు చేరుకోవచ్చని పీఎంవో కార్యాలయం తెలిపింది.