National

నైరుతి బంగాళాఖాతంలో ఏర్పడిన తీవ్ర వాయు గుండం (Lowpressure) నెల్లూరు, మచిలీపట్నం వద్ద మంగళవారం తీరాన్ని తాకే అవకాశం ఉన్నట్టు భారత వాతావరణ కేంద్రం (IMD)తెలిపింది. ఆ సమయంలో గంటలకు 100 కిలో మీటర్ల వేగంతో గాలులు వీచే అవకాశం ఉన్నట్టు పేర్కొంది. తుఫాన్ ప్రభావం వల్ల అటు తమిళనాడులోనూ భారీ వర్షాలు కురుస్తాయని చెప్పింది.

తమిళనాడులోని నాలుగు జిల్లాల్లో భారీ వర్షాలు కురిసే అవకాశం ఉన్నట్టు ఐఎండీ వెల్లడించింది. ఐఎండీ ప్రకారం… రాగల 24 గంటల్లో చెన్నై, తిరువల్లూరు, కాంచీపురం, చెంగల్పట్టు జిల్లాల్లో వర్షాలు కురిసే అవకాశం ఉంది. దీంతో పాటు తమిళనాడులోని పలు జిల్లాల్లో అక్కడక్కడా ఉరుములు, మెరుపులతో కూడిన వర్షాలు కురుసే అవకాశాలు ఉన్నాయి.

గత 24 గంటల్లో చెన్నైలోని నంగంబాకంలో 5.88సెంమీల వర్షం కురిసింది. అటు మీనంబాకంలో 7.12 సెంమీల వర్షపాతం నమోదైంది. చెన్నైలోని ప్రాంతీయ వాతావరణ కేంద్రం తెలిపిన వివరాల ప్రకారం… శనివారం ఉదయం నుంచి తిరువళ్లూరులోని వివిధ ప్రాంతాల్లో, ముఖ్యంగా పలవెర్కాడు, పొన్నేరి, గుమ్మిడిపూండి, పెరియపాళయం, షోలవరం తదితర తీర ప్రాంతాల్లో భారీ వర్షాలు కురుస్తున్నాయి.

మరోవైపు తుఫాన్ నేపథ్యంలో 144 రైళ్లను దక్షిణ మధ్య రైల్వే రద్దు చేసింది. ఏపీ మీదుగా వెళ్లే 144 రైళ్లను డిసెంబర్ 2 నుంచి 6 వరకు రద్దు చేస్తున్నట్టు ప్రకటించింది. సికింద్రబాద్, విజయవాడ,విశాఖపట్టణం, తిరుపతి గుండా ప్రయాణించే రైళ్లు కూడా ఉన్నట్టు పేర్కొంది. అందువల్ల ప్రయాణికులు సహకరించాలని కోరింది.

దుబాయ్‌లో జరుగుతున్న కాప్-28 (COP-28) వాతావరణ సదస్సులో కీలక పరిణామం చోటు చేసుకుంది. 2030 నాటికి ప్రపంచ పునరుత్పాదక ఇంధన లక్ష్యాన్ని ( global renewable energy) మూడు రెట్లు పెంచుతామని ప్రపంచ దేశాలు ప్రతిజ్ఞ చేశాయి. ఈ మేరకు రూపొందించిన ప్రతిజ్ఞ పై సంతకాలకు భారత్, చైనాలు దూరంగా ఉన్నాయి. మొత్తం 118 దేశాలు ఈ ప్రతిజ్ఞపై సంతకాలు చేశాయి.

ప్రపంచ దేశాలు శక్తి ఉత్పాదన విషయంలో శిలాజ ఇంధనాలపై ఆధారపడటాన్ని తగ్గించి పునరుత్పాదక శక్తి వనరుల వినియోగాన్ని పెంచాలనేది ఈ తీర్మానం లక్ష్యం. దీంతో పాటు 2030 నాటికి ప్రపంచ సగటు వార్షిక ఇంధన సామర్థ్య మెరుగుదల రేటును 4 శాతానికి రెట్టింపు చేయాలని ఈ సమావేశంలో ప్రపంచ దేశాలు నిర్ణయించాయి.

జపాన్, ఆస్ట్రేలియా, కెనడా, చిలీ, బ్రెజిల్, నైజీరియాతో పాటు పలు దేశాలు ఈ ఒప్పందంపై సంతకాలు చేశాయి. ఈ ఒప్పందంపై సంతకానికి దూరంగా ఉన్నప్పటికీ ఒప్పంద లక్ష్యాలను భారత్, చైనాలు సూచన ప్రాయంగా అంగీకారం తెలిపాయి. మొత్తం 198 దేశాలకు సంబంధించిన లక్ష మందికి పైగా ప్రతినిధులు ఈ సమావేశానికి హాజరయ్యారు.

అంతకు ముందు ప్రధాని మోడీ కీలక ప్రతిపాదన చేశారు. 2028లో జరిగే కాప్-33 సదస్సును భారత్‌లో నిర్వహించాలని ప్రధాని మోడీ ప్రతిపాదించారు. అభివృద్ధి, పర్యావరణ పరిరక్షణ మధ్య సమతుల్యతను ప్రపంచానికి భారత్ చూపించిందన్నారు. తక్కువ జనాభా కలిగిన దేశాలతో పోలిస్తే భారత్ లో కర్బన ఉద్గారాల స్థాయి చాలా తక్కువ అని తెలిపారు.

యూపీ (UP)లో ప్రజలను తప్పుడు పద్దతుల్లో మత మార్పిడి (Religious conversion) చేసేందుకు ప్రయత్నించిన వారిపై పోలీసులు కేసు నమోదు చేశారు. సోన్ భద్ర జిల్లాలో తప్పుడు పద్దతుల్లో మత మార్పిడులకు పాల్పడుతున్న తొమ్మిది మందిని పోలీసులు అరెస్టు చేశారు. మొత్తం 42 మందిపై కేసులు నమోదు చేసినట్టు పోలీసులు వెల్లడించారు.

వారి దగ్గర నుంచి పెద్ద ఎత్తున మత గ్రంధాలు, ప్రచార వస్తువులు, ల్యాప్ టాప్స్‌లను స్వాధీనం చేసుకున్నట్టు తెలిపారు. జిల్లాలోని చోపాన్ పోలీస్ స్టేషన్ పరిధిలో మల్హియా తోలా నివాసి నర్సింహా అనే వ్యక్తి గిరిజనులను, పేదలను ప్రలోభాలకు గురి చేసి మోసపూరిత మార్గాల ద్వారా వారిని మతం మార్చేందుకు ప్రయత్నం చేస్తున్నట్టు అదనపు ఎస్పీ కలు సింగ్ తెలిపారు.

ఫిర్యాదు మేరకు ఎఫ్ఐఆర్ నమోదు చేసినట్టు చెప్పారు. మొత్తం 42 మందిపై కేసులు నమోదు చేశామన్నారు. తొమ్మిది మందిని అరెస్టు చేశామన్నారు. అరెస్టైన వారిలో చెన్నైకి చెందిన జైప్రభు, యూపీలోని రాబర్ట్స్‌గంజ్‌కు చెందిన అజయ్‌కుమార్, ఏపీలోని విజయవాడకు చెందిన చెక్కా ఇమ్మాన్యుయేల్ ఉన్నారన్నారు.

వారితో పాటు రాజేంద్ర కోల్‌, చొటు అలియాస్ రంజ‌న్‌, ప‌ర‌మానంద్‌, సోహ‌న్‌, ప్రేమ్‌నాథ్ ప్ర‌జాప‌తి, రామ్ ప్ర‌తాప్‌లు ఉన్నట్టు వివరించారు. కేసు దర్యాప్తు చేస్తున్నామన్నారు. ఇటీవల యూపీలో మత మార్పిడిలను నిషేదిస్తూ యోగీ సర్కార్ ఓ ప్రత్యేకమైన చట్టాన్ని రూపొందించింది. దీంతో అక్రమ పద్దతుల్లో మత మార్పిడిలకు పాల్పడే వారిపై కఠిన చర్యలు తీసుకుంటున్నారు.

పార్లమెంట్ లైబ్రరీ బిల్డింగ్‌ (Library)లో అఖిల పక్ష సమావేశం (All Party Meeting) కాసేపటి క్రితం ముగిసింది. అఖిల పక్ష సమావేశానికి 23 పార్టీలకు చెందిన 30 మంది నేతలు హాజరైనట్టు కేంద్ర మంత్రి ప్రహ్లాద్ జోషి వెల్లడించారు.ఈ నెల 4 నుంచి సమావేశాల ప్రారంభం కానున్నట్టు ఆయన తెలిపారు. మొత్తం 15 సెషన్లు ఉంటాయని పేర్కొన్నారు.

అన్ని అంశాలపై చర్చించేందుకు ప్రభుత్వం సిద్దంగా ఉందన్నారు. ఎప్పటిలాగే జీరో హవర్ కొనసాగుతుందన్నారు. చర్చలకు అనుకూలమైన వాతావరణాన్ని కొనసాగించాలని అన్ని పార్టీలను కోరామన్నారు. చర్చల సమయంలో సభా నియమాలు, విధానాలను అనుసరించాలన్నారు. నిర్మాణాత్మకమైన చర్చలకు ప్రభుత్వం రెడీగా ఉందన్నారు.

ఈ సమావేశాలకు కేంద్రం నుంచి రక్షణ మంత్రి రాజ్ నాథ్ సింగ్, కేంద్ర మంత్రులు ప్రహ్లాద్ జోషి, అర్జున్ రామ్ మేఘవాల్ పాల్గొన్నారు. అటు కాంగ్రెస్ నుంచి సీనియర్ నేత జైరాం రమేశ్, ప్రమోద్ తివారీ, గౌరవ్ గగోయ్ ,టీఎంసీ సుదీప్ బంధోపాద్యాయ్, డరెక్ ఓబ్రెయిన్, జేఎంఎం మహువా మాజీ, ఎస్సీ నుంచి హసన్, బీఎస్పీ నుంచి గిరీశ్ చంద్ర ఇతర పార్టీల నాయకులు పాల్గొన్నట్టు పార్లమెంట్ వర్గాలు తెలిపాయి. వైసీపీ, బీఆర్ఎస్‌లు ఈ పార్టీ సమావేశానికి గైర్హాజరయ్యాయి.

వచ్చే ఏడాది లోక్ సభ సార్వత్రిక ఎన్నికలు జరగనున్నాయి. ఎన్డీఏ ప్రభుత్వానికి ఈ సారి ఇవి చివరి సమావేశాలు. దీంతో ఈ సమావేశాల్లో పలు కీలకమైన బిల్లులను ఆమోదించాలని చూస్తోంది. మొత్తం 18 బిల్లులను ఇప్పటికే కేంద్రం లిస్టు చేసింది. అందులో జమ్ముకశ్మీర్, పుదుచ్చేరిలకు మహిళ రిజర్వేషన్ బిల్లు వర్తింపు, ఐపీసీ, సీఆర్పీసీల స్థానంలో తీసుకు వస్తున్న మూడు నేర శిక్షాస్మృతి, ఇతర బిల్లులు వున్నాయి.