News

రాష్ట్రంలో పొలిటికల్ హీట్ రోజు రోజుకు పెరుగుతోంది. లోక్ సమరంలో ఓటర్లను ఆకట్టుకొనే ప్రయత్నంలో ఎవరికి వారే గెలుస్తామనే ధీమా వ్యక్తం చేయడం కనిపిస్తోంది. మూడు ప్రధాన పార్టీ లీడర్ల మధ్య మాటలు అస్త్రాలుగా మార్చి ఒకరి మీద ఒకరు ప్రయోగించుకోవడం.. అది తాము తప్ప ప్రభుత్వం నడపడానికి మిగతా పార్టీలు పనికి రావనే స్థాయిలో విమర్శలు గుప్పించుకునే దృశ్యాలు కనిపిస్తున్నాయి.

ఈ నేపథ్యంలో మాజీ స్పీక‌ర్, బాన్సువాడ (Banswada) ఎమ్మెల్యే పోచారం శ్రీనివాస్ రెడ్డి (Pocharam Srinivas Reddy).. కాంగ్రెస్ (Congress)పై కీలక వ్యాఖ్యలు చేశారు.. ప్ర‌స్తుత ప‌రిస్థితుల్లో ఆ పార్టీని న‌మ్మే స్థితిలో జ‌నాలు లేరన్నారు.. పార్ల‌మెంట్ ఎన్నిక‌ల్లో ప్ర‌జ‌లు గుణ‌పాఠం చెప్పక తప్పదన్నారు.. జ‌హీరాబాద్ ఎంపీ అభ్య‌ర్థి గాలి అనిల్ కుమార్ నామినేష‌న్ దాఖ‌లు చేసిన అనంత‌రం ఆయన మీడియాతో మాట్లాడారు.

తెలంగాణ ప్రజల ఆకాంక్షలు కేసీఆర్‌ (KCR)కు తెలిసినట్టు ఎవరికి తెలియదన్న పోచారం.. అధికారం కోసం అప్పుడు.. ఓట్ల కోసం ఇప్పుడు కాంగ్రెస్ ప్రజలను నమ్మించి వంచిస్తుందని ఆరోపించారు.. ఇచ్చిన హామీలను గాలికి వదిలేసి, అరచేతిలో వైకుంఠం చూపిస్తుందని విమర్శించారు.. ప్రస్తుతం ప్రభుత్వం చెబుతున్న అబద్ధాలను ప్రజలు నమ్మే పరిస్థితి లేదని తెలిపారు..

మరోవైపు రుణమాఫీపై భ‌ట్టి విక్రమార్క ఒక మాట, సీఎం రేవంత్ రెడ్డి మరోమాట మాట్లాడటం కనిపిస్తుందన్న పోచారం శ్రీనివాస్ రెడ్డి.. అన్ని వర్గాల వారిని మోసం చేసిన ఘనత కాంగ్రెస్ ప్రభుత్వానికే దక్కిందని ఎద్దేవా చేశారు.. అలాగే బీజేపీ వల్ల తెలంగాణకి ఒరిగింది ఏం లేదన్న ఆయన.. పదేళ్లుగా రాష్ట్ర విభజన హామీలను నెరవేర్చడంలో విఫలం అయ్యిందని విమర్శించారు..

పార్లమెంట్ ఎన్నికలు అతి సమీపంలోకి వస్తున్న కొద్ది.. నేతలు మాటల్లో ఘాటు కూడా పెంచుతున్నారు.. ఈ క్రమంలో తాజాగా ఎన్నికల ప్రచారంలో రేవంత్ రెడ్డి చేసిన వ్యాఖ్యలపై డీకే అరుణ (DK Aruna) ధ్వజమెత్తారు.. ఇష్టమొచ్చినట్లు మాట్లాడితే ఖబడ్దార్ అంటూ మండిపడ్డారు.. నేడు మీడియాతో మాట్లాడిన ఆమె.. ఎన్నికల కోడ్ వచ్చాక సీఎం ఐదు సార్లు పాలమూరుకు రావడం చూస్తే తనపై కుట్ర చేస్తున్నారనిపిస్తుందని ఆరోపించారు..

ఈ ప్రాంతం కోసం ఒక పాలమూరు (Palamuru) బిడ్డ కృషి చేస్తే ఓర్వలేక ఓడించేందుకు రాక్షసులుగా, రాబందులగా మారి నోటికి వచ్చినట్లు వాగుతున్నారని ఆగ్రహం వ్యక్తం చేశారు. సంస్కారం లేని సీఎం ఓ మహిళ అని కూడా చూడకుండా తన స్థాయిని మర్చిపోయి దొరసాని, తొక్కుతా అని నోటికి పనిచెప్పడం సిగ్గుచేటని డీకే అరుణ ఫైర్ అయ్యారు. రేవంత్ రెడ్డి (Revanth Reddy), మహబూబ్ నగర్ (Mahbubnagar) అభివృద్ధి కోసం ఏనాడైనా పోరాటం చేశారా? అని ప్రశ్నించారు.

నన్ను తొక్కుతా అంటావా? దమ్ముంటే ఎక్కడికోస్తావో రా? నోటికొచ్చినట్లు మాట్లాడుతావా బిడ్డా ? నీకు తల్లి, చెల్లి లేదా? నీకు బిడ్డా లేదా? ఒక మహిళా నేత గురించి ఎలా మాట్లాడాలి అన్న ఇంగిత జ్ఞానం కూడా లేదా? అని తీవ్ర స్థాయిలో విరుచుకుపడ్డారు.. పేదల కోసం పోరాటం చేసిన చరిత్ర మాకు ఉన్నదని తెలిపిన అరుణ నీ చరిత్ర గురించి ముందు తెలుసుకొని మాట్లాడు అంటూ వార్నింగ్ ఇచ్చారు..

ఓటుకు నోటు కేసులో ఇరుక్కున్న నీ స్థాయి ఏంటి? అని ప్రశ్నించిన డీకే అరుణ.. నా బాగోతం ఎందో మీ బాగోతం ఏందో పాలమూరు చౌరస్తాలో తేల్చుకుందాం రా అంటూ సవాల్ విసిరారు.. ఒక మహిళను ఓడించేందుకు గుంపులు కట్టి నోటికొచ్చినట్లు మాట్లాడితే పాలమూరు ప్రజలు క్షమించరన్నారు.. ఈ ప్రాంత ఎమ్మెల్యేగా, ఎంపీగా ఉండి ఏం చేశారో చెప్పాలని డిమాండ్ చేశారు..

పార్ల మెంట్ ఎన్నికల (Parliament Elections) ఫలితాలు రాష్ట్ర రాజకీయాల్లో కీలక మలుపుగా మారేలా ఉన్నాయని భావిస్తున్నారు.. ఇప్పటికే ఇరవై ఐదు మంది బీఆర్ఎస్ (BRS) ఎమ్మెల్యేలు కాంగ్రెస్ లో చేరుతారని చేస్తున్న ప్రచారం అంతా ఉత్తదే అని అంటున్నారు. ఎన్నికలకు ముందే బీఆర్ఎస్ఎల్పీ విలీనం పూర్తి చేసి.. కేసీఆర్ నైతిక స్థైర్యం దెబ్బతీయాలని ప్లాన్ వేసినట్లు ప్రచారం జరిగింది. కానీ నలుగురు మాత్రమే కాంగ్రెస్ (Congress)లో చేరారు..

వారిలో తెల్లం వెంకట్రావు , దానం నాగేందర్, కడియం శ్రీహరి మాత్రమే ఉన్నారు. అలాగే ప్రకాష్ గౌడ్.. రెండు మూడు రోజుల్లో చేరుతారనే టాక్ వినిపిస్తోంది. అయితే ఇప్పుడున్న పరిస్థితి గమనిస్తే.. పార్లమెంట్ ఎన్నికల్లో వచ్చే ఫలితాలను బట్టే తర్వాత రాజకీయం ఉంటుందని భావిస్తున్నారు. మరోవైపు మహబూబా బాద్ జన జాతర బహిరంగ సభలో సీఎం రేవంత్ రెడ్డి (CM Revanth Reddy) కేసీఆర్ పై ఫైర్ అయ్యారు..

దిగిపో దిగిపో అంటున్నావ్… ఉత్తగ వచ్చామా బిడ్డా అంటూ మండిపడ్డ సీఎం.. మరో పదేళ్లు కాంగ్రెస్ ప్రభుత్వమే ఉంటుందని గట్టిగా చెప్పారు.. అలాగే ఆగష్టు 15లోగా రైతులకు రెండు లక్షల రూపాయల రైతు రుణమాఫీ చేస్తామని.. 500 వందల బోనస్ ఇస్తామని హామీ ఇచ్చారు.. మానుకోట కాంగ్రెస్ కంచుకోట అని తెలిపిన ఆయన.. బీఆర్ఎస్ పదేళ్ల పాలనలో మహబూబాబాద్ ప్రాంతం విధ్వంసమైందని ఆరోపించారు..

మోడీ, ఫామ్ హౌస్ కేడీ ఇద్దరు కలిసి తెలంగాణను దోపిడీ చేశారని ద్వజమెత్తిన రేవంత్.. కేంద్రం తెచ్చిన చట్టాలకు హత్య ప్రభుత్వం మద్దతు తెలిందన్నారు. తండ్రి రెడ్యానాయక్ ను ఇంటికి పంపినట్టే బిడ్డ మాలోతు కవితను కూడా ఇంటికి పంపండని ఓటర్లకు పిలుపునిచ్చారు.. బయ్యారం ఉక్కు కర్మాగారాన్ని పక్కకు పెట్టారు.. కాజీపేట రైల్వే కోచ్ ఫ్యాక్టరీ సోనియా గాంధీ మంజూరు చేస్తే… ప్రధాని లాథూర్ కు తరలించుకుపోయారని ఆరోపించారు.

ములుగు గిరిజన యూనివర్సిటీని సోనియా గాంధీ మంజూరు చేశారని తెలిపిన సీఎం.. ఈ ప్రాంత ప్రజలను ఓటు అడిగే హక్కు బీఆర్ఎస్, బీజేపీకి లేదన్నారు.
ఉత్తర భారత దేశంలోని కుంభమేళాకు వేల కోట్లు ఖర్చు చేసిన కేంద్రం… మేడారం జాతరకు ముష్టి 3 కోట్లు ఇచ్చారని మండిపడ్డారు.. మేడారం మహాజాతరకు జాతీయ గుర్తింపు ఇవ్వబోమని చెప్పిన బీజేపీ కిషన్ రెడ్డి ఓట్లు అడగడానికి సిగ్గు లేదా ? అని ప్రశ్నించారు..

నేడు నిజామాబాద్ (Nizamabad) పాత కలెక్టరేట్ లో పార్లమెంట్ ఎన్నికల ప్రచార సభ నిర్వహించారు.. ఇందులో బీఆర్ఎస్ నేతలు ప్రశాంత్ రెడ్డి, శ్రీనివాస్ గౌడ్, గంగుల కమలాకర్ పాల్గొన్నారు.. ఈ సందర్భంగా మాజీ మంత్రి ప్రశాంత్ రెడ్డి మాట్లాడుతూ రాష్ట్ర రాజకీయాలపై కీలక కామెంట్స్ చేశారు.. బీజేపీ (BJP), కాంగ్రెస్ (Congress) ఒక్కటే అని.. అందుకే ఇక్కడ అరవింద్ ను గెలిపించడానికే జీవన్ రెడ్డి కి టికెట్ ఇచ్చారని ఆరోపించారు..

సిట్టింగ్ ఎంపీ అరవింద్ పసుపు బోర్డు పేరుతో రైతులను నట్టేట ముంచాడని.. ఐదు రోజుల్లో పసుపు బోర్డు అని చెప్పి ఐదు సంవత్సరాలు అయిన బోర్డు తెలేదని పేర్కొన్నారు.. రైతులను మరో సారి మోసం చేయడానికే పసుపు రైతులతో కలిసి నామినేషన్ డ్రామా ఆడుతున్నారని మండిపడ్డారు.. అలాగే అబద్ధపు హామీలు ఇచ్చిన కాంగ్రెస్ కు కర్ర కాల్చి వాత పెట్టాలని ప్రశాంత్ రెడ్డి అన్నారు..

మోసం చేసిన అరవింద్ ను ఓడించాలని పిలుపునిచ్చారు.. మాజీ మంత్రి గంగుల సైతం తీవ్ర విమర్శలు చేశారు.. అరవింద్ తో పసుపు బోర్డు రాదని తెలిపారు.. రాష్ట్రంలో కాంగ్రెస్ గెలిచే పరిస్థితి లేదని జోస్యం చెప్పారు.. కొనుగోలు కేంద్రాల్లో దళారి వ్యవస్థ నడుస్తుందని ఆరోపణలు గుప్పించారు.. ప్రస్తుతం కాంగ్రెస్ పార్టీ ఆగం అయిందని తెలిపిన ఆయన.. బీజేపీ పై ప్రజల్లో నమ్మకం పోయిందన్నారు..

మరోవైపు మాజీ మంత్రి శ్రీనివాస్ గౌడ్ (Srinivas Goud) మాట్లాడుతూ.. పదేళ్లలో చేసిన అభివృద్ధిని వంద రోజుల్లోనే కాంగ్రెస్ నాశనం చేసిందని విమర్శించారు.. రాష్ట్రంలో కరెంట్ కోత ఎందుకు వచ్చిందనే విషయాన్ని ప్రజలు గమనించాలని సూచించారు.. కాంగ్రెస్ పార్టీ అంటేనే అబద్ధాలన్న ఆయన.. కేసీఆర్ ను ఎందుకు ఓడించామని ప్రజలు బాధపడుతున్నట్లు పేర్కొన్నారు.. ఎంపీ గా బాజిరెడ్డి గెలిపించి తెలంగాణ ఇజ్జాత్ కాపాడాలని ఓటర్లను కోరారు..

అధికారంలో ఉన్నన్ని రోజులు తనకు ఎదురు లేదు.. తనకన్న ఎవరు ఎక్కువ కాదని భావించారు.. కానీ కాలం ఒకటి సమాధానం చెబుతోందని గ్రహించ లేకపోయారు.. కాలం కలిసి వస్తే అందరూ హీరోలే.. కానీ అది తిరగబడితే.. హీరోలు అనుకొన్న వారు సైతం జీరోలు అవుతారని ప్రస్తుతం బీఆర్ఎస్ (BRS) బాస్ ని చూస్తే తెలుస్తుందని అనుకొంటున్నారు.. అదీగాక ప్రతిపక్షాలను చీమలుగా నలిపేశారనే ఆరోపణలు మెండుగా మూటగట్టుకొన్నారు..

కాలం కలసి వచ్చింది.. జీరో అనుకొన్న రేవంత్ రెడ్డి (Revanth Reddy) సీఎం అయ్యారు.. ఆవేశపడలేదు.. నిదానంగా బీఆర్‌ఎస్ బలాలను బలహీనంగా మార్చారు.. ఇక అసలు కథ మొదలైంది. కాంగ్రెస్ (Congress)పై శాపనార్థాలు.. ఆరోపణలు.. విమర్శలు.. ప్రభుత్వాన్ని కూల్చాలనే కుట్రలు జరుగుతున్నాయని హస్తం నేతలు నోటికి మైకు కట్టుకొని ప్రచారం చేయడం కనిపిస్తోంది. ఈ క్రమంలో సీఎం కూడా ఘాటు వ్యాఖ్యలు చేయడం తెలిసిందే..

మహబూబ్ నగర్ ఎంపీ అభ్యర్థి చల్లా వంశీ చంద్ రెడ్డి నామినేషన్ ర్యాలీకి ముఖ్య అతిథిగా హాజరైన సీఎం రేవంత్ రెడ్డి, కేసీఆర్‌ (KCR)పై ఫైర్ అయ్యారు. రాష్ట్రం వచ్చాక పాలమూరుకు ఆయన చేసింది ఏంటని ప్రశ్నించారు. పాలమూరుకు కాంగ్రెస్ ప్రభుత్వం వర్సిటీ ఇస్తే తాను నిర్మించారా అని నిలదీశారు. ఏం అభివృద్ధి చేశారని పాలమూరు ప్రజలను ఓటు అడుగుతున్నారని మండిపడ్డారు..

మరోవైపు కారు రిపేర్‌కు వెళ్లిందని కేటీఆర్ అన్న మాటలు గుర్తు చేసిన సీఎం.. కారు షెడ్డు నుంచి బయటకు రాదు.. పాడైపోయిందని ఎద్దేవా చేశారు.. అలాగే కేసీఆర్‌ను 2009లో కరీంనగర్ ప్రజలు తరిమికొట్టిన విషయాన్ని మరచిపోతే ఎలాగని గుర్తు చేశారు.. 20 మంది కాంగ్రెస్ ఎమ్మెల్యేలు టచ్‌లో ఉన్నారని కేసీఆర్ చేసిన వ్యాఖ్యలపై స్పందించిన రేవంత్.. ఇక్కడ కాపలా ఉన్నది రేవంత్ రెడ్డి అని వార్నింగ్ ఇచ్చారు.