Politics

కేంద్ర హోంశాఖ మంత్రి అమిత్ షా (Amit Shah) ఫేక్ వీడియోలపై మాటల వేడి ఇంకా తగ్గడం లేదు.. ఇప్పటికే ఈ వ్యవహారంలో తెలంగాణ (Telangana) సీఎం రేవంత్ రెడ్డి (Revanth Reddy)కి ఢిల్లీ (Delhi) పోలీసులు నోటీసులు ఇచ్చిన సంగతి తెలిసిందే.. దీనిపై ఘాటుగా స్పందించిన ఆయన.. సంచలన వ్యాఖ్యలు చేశారు.. కేసీఆర్‌ అమిత్‌ షాను ఆవహించినట్లున్నారని ఎద్దేవా చేశారు..

అందువల్లే ఢిల్లీ పోలీసులను గాంధీ భవన్‌కు పంపి, నన్ను అరెస్ట్‌ చేయాలని ఆదేశించినట్లు పేర్కొన్నారు.. పార్లమెంట్ ఎన్నికల ప్రచారంలో భాగంగా మంగళవారం రేవంత్ రెడ్డి భూపాలపల్లి జనజాతర సభలో పాల్గొన్నారు. ఈ సందర్భంగా మాట్లాడిన ఆయన.. ఢిల్లీ పోలీసులను కాదు, సరిహద్దులోని సైనికులను తెచ్చుకున్న భయపడేది లేదని సవాల్ విసిరారు..

హామీల గురించి అడిగితే నాపై అక్రమ కేసులు పెట్టాలని చూస్తున్నట్లు ఆరోపించారు.. గుజరాత్ పెత్తనమా..? తెలంగాణ పౌరుషమా..? తేల్చుకుందామని ధ్వజమెత్తారు.. ఈ ఎన్నికలు గుజరాత్ పెత్తనానికి.. తెలంగాణ పౌరుషానికి మధ్య జరుగుతున్నాయని పేర్కొన్నారు.. బీజేపీ, బీఆర్ఎస్ రెండు ఒక్కటేనని ఆరోపించిన రేవంత్.. ఆ పార్టీతో కేసీఆర్ చీకటి ఒప్పందం చేసుకొన్నారని దుయ్యబట్టారు..

పార్లమెంట్ ఎన్నికల అయ్యాక బీజేపీతో కేసీఆర్ నడిపే భాగోతం బయట పడుతుందని సంచలన వ్యాఖ్యలు చేశారు.. నిండా మునిగి ఉన్న బీఆర్ఎస్‌కు ఒక్క ఓటు వేసిన అది వృధా అవుతుందని విమర్శించారు.. కారు కార్ఖానకి పోయింది.. బజార్‌లో తూకానికి అమ్మమాల్సిందే అంటూ సెటైర్ వేశారు. జనం ఛీ కొడుతున్నా బీఆర్ఎస్ పెద్దలు ఇంకా గుర్తించడం లేదని.. చీప్ పాలిటిక్స్ చేస్తున్నారని మండిపడ్డారు..

పార్లమెంట్ ఎన్నికలు సమీపిస్తున్న కొద్ది ప్రత్యర్థి పార్టీలపై నేతలు విరుచుకుపడటం కనిపిస్తోంది.. నేరుగా మాటల దాడితో పాటు సోషల్ మీడియా వేదికగా విమర్శలు గుప్పిస్తున్నారు.. ఎప్పటికప్పుడు పార్టీల విధానాలపై కౌంటర్లు వేస్తున్నారు. మరోవైపు బీఆర్ఎస్ (BRS) ట్విట్టర్ వేదికగా బీజేపీ (BJP), కాంగ్రెస్ (Congress) పార్టీలపై ఫైర్ అయింది. అధికారంలోకి వచ్చిన 7 రాష్ట్రాల్లో తమ ప్రభుత్వాన్ని బీజేపీ నుంచి కాపాడుకోలేక పోయిందని ఎద్దేవా చేసింది.

గత పదేళ్లలో కాంగ్రెస్, బీజేపీని ఎదుర్కోవడంలో ఘోరంగా విఫలమైందని ఆరోపించింది. ఒకరకంగా బీజేపీ బలపడటానికి కాంగ్రెస్ కారణం అయ్యిందని పేర్కొంది. కాంగ్రెస్ బలహీనమైన సిద్దాంతాల వల్ల ఆ పార్టీ పూర్తిగా వ్యతిరేకతను ఎదుర్కొనే దశకు చేరుకొందని విమర్శలు చేసింది. ఈ నేపథ్యంలో బీజేపీని నిలువరించే సత్తా కేవలం బలమైన ప్రాంతీయ శక్తులకు మాత్రమే ఉందని బీఆర్ఎస్ ట్వీట్ చేసింది.

మరోవైపు కాంగ్రెస్ చేతగాని తనం.. బీజేపీకి వరంగా మారిందని సెటైర్లు వేసింది. ఆ పార్టీ నుంచి తమ ప్రభుత్వాన్ని కాపాడలేకపోయిన కాంగ్రెస్.. బీఆర్ఎస్, టీఎంసీ, ఆమ్ ఆద్మీ వంటి పార్టీలపై బీజేపీకి బీ టీమ్ అని ముద్ర వేసిందని ట్వీట్ చేసింది. ఇదిలా ఉండగా పార్లమెంట్ ఎన్నికలకు సరిగ్గా రెండు వారాల గడువు ఉంది. ఈ క్రమంలో బీఆర్ఎస్ కనీసం తమ ఉనికి కాపాడుకోవాలనే ప్రయత్నంలో జోరుగా విమర్శలు గుప్పిస్తున్న విషయం తెలిసిందే..

కాంగ్రెస్ నేతలు సైతం.. అందుకు ధీటుగా సమాధానాలు ఇవ్వడం కనిపిస్తోంది. అయితే లోక్ సభ ఎన్నికల (Lok Sabha Elections) రిజల్ట్ తర్వాత రాష్ట్ర, దేశ రాజకీయాల్లో కీలక మార్పులు జరగడం ఖాయం అనే టాక్ వినిపిస్తోంది. ఒక వేల అనుకొన్న డిపాజిట్ కాంగ్రెస్ దక్కించుకొంటే ఒకరకంగా.. లేదా బీజేపీ అధికారంలోకి వస్తే మరో రకమైన రాజకీయాలు తెరపైకి వచ్చే అవకాశాలున్నాయని అనుకొంటున్నారు..