Ramu

జ్ఞానవాపి మసీదు (Gyanvapi Mosque) వివాదంపై ఏఐఎంఐఎం చీఫ్, హైదరాబాద్ ఎంపీ అసదుద్దీన్ ఓవైసీ (Asaduddin Owaisi) సంచలన వ్యాఖ్యలు చేశారు. ఇక నుంచి హిందువుల కోసం ముస్లిం పక్షం ఏ ఒక్క మసీదును కూడా వదులుకోరని స్పష్టం చేశారు. ఆ వివాదాలపై న్యాయస్థానాలలో ముస్లింలు న్యాయ పోరాటం చేస్తారని వెల్లడించారు.

ఒక వేళ అవతలి పక్షం వాళ్లు డిసెంబర్ 6 తరఫు ఘటనను పునరావృతం చేస్తామంటే ఏం జరుగుతుందో చూడాలన్నారు. తాము ఇప్పటికే ఒక సారి మోస పోయామని చెప్పారు. మరోసారి మోసపోయేందుకు తాము రెడీగా లేమని స్పష్టం చేశారు. జ్ఞాన్‌వాపీ కేసులో సెటిల్‌మెంట్‌కు వచ్చే అవకాశాల గురించి మీడియా ప్రశ్నకు సమాధానం ఇస్తూ…..

అది అంతం కాదని తాము ఖచ్చితంగా చెబుతున్నామని అన్నారు. తాము దానిపై న్యాయపరంగా పోరాటం చేస్తామని వివరించారు. తమ వద్ద ఉన్న పత్రాలు, టైటిల్ సూట్‌లను న్యాయస్థానాలకు చూపిస్తామని వెల్లడించారు. జ్ఞానవాపిలో తాము నమాజ్ చేస్తున్నామన్నారు. బాబ్రీ మసీదు కేసులో ముస్లింలు అక్కడ నమాజు చేయడం లేదని వాదన ఉందన్నారు.

కానీ జ్ఞానవాపిలో తాము చాలా దశాబ్దాలుగా ప్రార్థనలు చేస్తున్నామని వివరించారు. వాస్తవానికి 1993 నుండి పూజలు చేయలేదన్నారు. జ్ఞాన్‌ వాపీ కాంప్లెక్స్‌ కింద హిందూ కట్టడాలు ఉన్నట్లు ఏఎస్‌ఐ నివేదిక చెప్తోందన్న మీడియా ప్రశ్నకు బదులిస్తూ…. రేపు రాష్ట్రపతి భవన్‌ను తవ్వడం ప్రారంభిస్తే, అక్కడ కూడా ఏదైనా బయపడ వచ్చన్నారు. తాము వందల సంవత్సరాలుగా ఆ స్థలంలో నమాజ్ చేస్తున్నామన్నారు.

కేంద్ర సహాయ మంత్రి ఎల్.మురుగన్ (L.Murgan) పై డీఎంకే ఎంపీ టీఆర్ బాలు (TR Balu) చేసిన వ్యాఖ్యలపై లోక్ సభ దుమారం రేగింది. కేంద్ర మంత్రిగా ఉండటానికి మురుగన్ అనర్హుడంటూ టీఆర్ బాలు చేసిన వ్యాఖ్యలను ఎన్డీఏ సభ్యులు తీవ్రంగా ఖండించారు. ఎంపీ వ్యాఖ్యలు దళితులను అవమానించేలా ఉన్నాయని కేంద్ర మంత్రి ప్రహ్లద్ జోషి, అర్జున్ రాం మేఘవాల్‌లు మండిపడ్డారు.

అంతకు ముందు ప్రకృతి వైపరీత్యాల కారణంగా జరిగిన నష్టాలపై లోక్ సభలో ప్రశ్నోత్తరాల సమయం నడిచింది. గతేడాది డిసెంబరులో చెన్నై, దాని శివారు ప్రాంతాలు, దక్షిణ తమిళనాడులో వచ్చిన వరదలపై సహాయ చర్యల గురించి డీఎంకే ఎంపీలు ఏ. రాజా, గణేష్‌మూర్తి ప్రభుత్వాన్ని ప్రశ్నించారు. అనంతరం టీఆర్ బాలు మాట్లాడుతుండగా కేంద్ర మంత్రి మురుగన్ కల్పించుకున్నారు.

ఈ క్రమంలో మురుగన్ పై టీఆర్ బాలు తీవ్ర స్థాయిలో విరుచుకు పడ్డారు. ఈ విషయంలో మీరు ఎందుకు ఎంటర్ అవుతున్నారంటూ ఫైర్ అయ్యారు. దయచేసి కూర్చోంది… మీకు ఏం కావాలంటూ కేంద్ర మంత్రిని ప్రశ్నించారు. అసలు పార్లమెంట్ సభ్యుని పదవికి అనర్హులంటూ మండిపడ్డారు. అసలు మీరు కేంద్ర మంత్రి పదవికి అనర్హులంటూ తీవ్ర వ్యాఖ్యలు చేశారు.

టీఆర్ బాలు వ్యాఖ్యలను కేంద్ర మంత్రులు ప్రహ్లాద్ జోషి, అర్జున్ మేఘవాల్ లు ఖండించారు. తన సహచరుడిని ఎంపీ అలా అనడం సరికాదని సూచించారు. ఒక దళిత మంత్రిని అసమర్థుడని ఎలా అంటారని ఆగ్రహం వ్యక్తం చేశారు. ఇది దళితులను అవమానించడమేనన్నారు. ఈ వ్యాఖ్యలను ఖండిస్తున్నామని చెప్పారు. ఈ వ్యాఖ్యలపై దళితులకు టీఆర్ బాలు క్షమాపణలు చెప్పాల్సిందేనని డిమాండ్ చేశారు.

భారత ఆర్థిక వ్యవస్థ 7.5 శాతం కంటే ఎక్కువగా వృద్ధి చెందుతోందని ప్రధాని మోడీ (PM Modi) అన్నారు. దేశం త్వరలో ప్రపంచంలో మూడవ అతిపెద్ద ఆర్థిక వ్యవస్థ (largest economy)గా అవతరించనుందని వెల్లడించారు. 2024 నాటికి భారత్‌లో ప్రాథమిక ఇంధన డిమాండ్‌ రెట్టింపు అవుతుందని తెలిపారు. రాబోయే ఐదేండ్లలో ఇంధన రంగంలో 67 బిలియన్‌ డాలర్ల పెట్టుబడులను భారత్‌ చూడనుందని పేర్కొన్నారు.

గోవాలో జరుగుతున్న ఇండియా ఎనర్జీ వీక్‌ రెండో ఎడిషన్‌ ప్రారంభోత్సవంలో ప్రధాని మోడీ పాల్గొన్నారు. ఈ సమావేశంలో మోడీ మాట్లాడుతూ….. 2030 నాటికి దేశం తన రిఫైనింగ్ సామర్థ్యాన్ని సంవత్సరానికి 254 మిలియన్ మెట్రిక్ టన్నుల నుంచి 450 ఎంఎంపీటీఏకి పెంచాలని భావిస్తోందని వెల్లడించారు. భారత ఇంధన రంగ వృద్ధిలో పాలుపంచుకోవాలని ఇన్వెస్టర్లను కోరారు.

2025 ఆర్థిక సంవత్సరంలో బడ్జెట్ మౌలిక సదుపాయాల కోసం కేటాయిస్తున్న రూ. 11 లక్షల కోట్లలో ఎక్కువ భాగం ఇంధన రంగానికి వెళ్తుందని స్పష్టం చేశారు. ఈ మొత్తం రైల్వేలు, రోడ్‌వేలు, జలమార్గాలు, వాయుమార్గాలు లేదా గృహాల్లో ఆస్తులను సృష్టిస్తుందని తెలిపారు. అభివృద్ధి క్రమంలో శక్తి అవసరం ఉంటుందన్నారు. అందువల్ల శక్తి సామర్థ్యాన్ని విస్తరించే దిశగా ప్రయత్నాలను భారత్ ప్రోత్సహిస్తుందని వివరించారు.

గత పదేళ్లలో ఇథనాల్‌ కలిపిన పెట్రోల్‌ 1.5 శాతం నుంచి 12 శాతానికి పెరిగిందన్నారు. రాబోయే ఏడాదిలో ఇథనాల్‌ కలిపిన పెట్రోల్‌, 25 శాతానికి చేరనుందని చెప్పుకొచ్చారు. ప్రభుత్వ సంస్కరణల కారణంగా దేశీయ గ్యాస్ ఉత్పత్తి పెరగుతోందన్నారు. దేశ ప్రైమరీ ఎనర్జీ మిక్స్ లో గ్యాస్ శాతాన్ని 6 నుంచి 15 శాతానికి తీసుకు రావడానికి ప్రయత్నాలు చేస్తున్నామన్నారు.

ఆప్ కీలక నేతల ఇండ్లపై ఈడీ (ED) మంగళవారం దాడులు చేసింది. సీఎం అరవింద్ కేజ్రీవాల్ (Aravind Kejriwal) వ్యక్తిగత కార్యదర్శి బిబవ్ కుమార్ నివాసంలో ఈడీ తనిఖీలు నిర్వహించింది. మనీలాండరింగ్ కేసుకు సంబంధించి ఆప్ రాజ్య సభ ఎంపీ ఎన్‌డీ గుప్తా నివాసంతో పాటు ఇతర నేతల నివాసాల్లో ఈడీ సోదాలు చేసింది.

వాటర్ బోర్డు మాజీ సభ్యుడు శలభ్ కుమార్ నివాసంలో కూడా ఈడీ దాడులు కలకలం రేపుతున్నాయి. ఢిల్లీ జల్ బోర్డులో అక్రమాలకు సంబంధించి ఈ దాడులు చేసినట్టు తెలుస్తోంది. దేశ రాజధాని ఢిల్లీలో మొత్తం 12 ప్రాంతాల్లో ఈడీ దాడులు చేసింది. ఇటీవల ఢిల్లీ లిక్కర్ స్కామ్‌లో విచారణకు హాజరు కావాలని సీఎం కేజ్రీవాల్‌కు ఐదవ సారి ఈడీ సమన్లు పంపింది.

కానీ సీఎం కేజ్రీవాల్ విచారణకు గైర్హాజరు కాలేదు. ఈ క్రమంలో దాడులు జరగడం ప్రాధాన్యత సంతరించుకుంది. ఢిల్లీ జల్ బోర్డులో టెండర్ ప్రక్రియలో జరిగిన ప్రక్రియకు సంబంధించి ఈడీ మనీలాండరింగ్ కేసు నమోదు చేసింది. ఈ కేసులో సీబీఐ ఎఫ్ఐఆర్ ఆధారంగా ఒక కేసు… ఢిల్లీ అవినీతి నిరోధక శాఖ పోలీసులు నమోదు చేసిన ఎఫ్ఐఆర్ ఆధారంగా మరో కేసు నమోదు చేసింది.

ఢిల్లీ జల బోర్డు అధికారులు ఎలక్ట్రో మ్యాగ్నటిక్ ఫ్లో మీటర్ల సరఫరా, ఇన్ స్టాలేషన్, టెస్టింగ్, కమీషన్ కోసం టెండర్లను ఓ సంస్థకు కేటాయించే సమయంలో అనవసర ప్రయోజనాలు కల్పించారని సీబీఐ ఎఫ్ఐర్‌లో అభియోగాలు మోపింది. టెక్నికల్ అర్హత ప్రమాణాలు లేక పోయినప్పటికీ సదరు కంపెనీకి రూ.38 కోట్ల అక్రమ కాంట్రాక్టులు కట్టబెట్టారని సీబీఐ ఆరోపించింది.

కాంగ్రెస్ అగ్రనేత రాహుల్ గాంధీ (Rahul Gandhi)పై అసోం సీఎం హిమంత బిస్వ శర్మ (Himanta Biswa Sarma) మరోసారి తీవ్ర స్థాయిలో ఫైర్ అయ్యారు. తాజాగా కుక్క పిల్లకు రాహుల్ గాంధీ బిస్కెట్ తినిపిస్తున్న వీడియో ఒకటి వైరల్ అవుతోంది. ఈ వీడియోను భారత్ జోడో న్యాయ్ యాత్ర షేర్ చేయగా దానిపై బీజేపీ నేతలు తీవ్ర స్థాయిలో ఫైర్ అవుతున్నారు. రాహుల్ గాంధీపై నిప్పులు చెరుగుతున్నారు.

జార్ఖండ్‌లో రాహుల్ గాంధీ న్యాయ జోడో యాత్ర సందర్బంగా ఈ వీడియోను తీశారు. యాత్ర సమయంలో రాహుల్ గాంధీ దగ్గర ఓ కుక్క పిల్ల కనిపించింది. ఆ కుక్క పిల్లకు బిస్కెట్ ప్యాకెట్ ఉందా అని తన సహాయకులను రాహుల్ గాంధీ అడిగారు. దీంతో ఓ బిస్కెట్ ప్యాకెట్ ఇవ్వగా అందులో ఓ బిస్కెట్ తీసుకుని కుక్కు పిల్లకు తినిపించేందుకు రాహుల్ గాంధీ ప్రయత్నం చేశారు.

కానీ ఆ కుక్క పిల్ల తినలేదు. అదే సమయంలో కొంత మంది కార్యకర్తలు రాహుల్ గాంధీతో సెల్ఫీ తీసుకున్నారు. ఆ సమయంలో ఓ వ్యక్తి రాహుల్ గాంధీకి షేక్ హ్యాండ్ ఇచ్చే సమయంలో ఆ బిస్కెట్ ను అతనికి ఇచ్చినట్టుగా బీజేపీ షేర్ చేసిన వీడియోలో కనిపిస్తోంది. దీంతో కాంగ్రెస్ నాయకులతో రాహుల్ గాంధీ అనుచితంగా ప్రవర్తించారంటూ బీజేపీ నేతలు మండిపడుతున్నారు.

మరోవైపు కాంగ్రెస్ షేర్ చేసిన వీడియోలో వ్యక్తికి బిస్కెట్ ఇచ్చే దృశ్యాలు కనిపించడం లేదు. దీంతో బీజేపీ, కాంగ్రెస్ నేతలు ఒకరిపై ఒకరు విమర్శలు చేసుకుంటున్నారు. ఈ వీడియోను షేర్ చేస్తూ అసోం సీఎం హిమంత బిస్వ శర్మ కీలక వ్యాఖ్యలు చేశారు. తనతో రాహుల్ గాంధీ, ఆయన కుటుంబ సభ్యులు బిస్కెట్లు తినిపించలేకపోయారని అన్నారు. తాను బిస్కెట్ తినేందుకు నిరాకరించానని, అందుకే పార్టీకి రాజీనామా చేసి బయటకు వచ్చేశానని చెప్పారు. తాను అస్సామీ, భారతీయుడినైనందుకు గర్వపడుతున్నట్టు వెల్లడించారు.

లోక్‌సభ ఎన్నికలకు ముందు రాజకీయ పార్టీల (Political Parties)కు భారత ఎన్నికల సంఘం (Election Commission Of India) కీలక సూచనలు చేసింది. ఎన్నికల ప్రచారంలో చిన్న పిల్లను ఉపయోగించుకో కూడదని సూచించింది.

పోస్టర్లు, కరపత్రాలతో సహా ఎటువంటి ప్రచార సామాగ్రిలో పిల్లలను ఏ విధంగానూ ఉపయోగించకూడదని పార్టీలను ఎన్నికల సంఘం ఆదేశించింది. పార్టీలు, అభ్యర్థులు రాజకీయ ప్రచారాల సమయంలో నైతిక ప్రమాణాలను పాటించాల్సిన అవసరం ఉందని పేర్కొంది.

అభ్యర్థులు తమ ప్రచారం కోసం పిల్లలను ఎత్తుకోవడం, వాహనాలు, ర్యాలీల్లోనూ పిల్లలను ఏ విధంగానూ ఉపయోగించుకోకూడదని ఆదేశాలు జారీ చేసింది. కవిత్వం, పాటలు, మాట్లాడే పదాలు, రాజకీయ పార్టీ లేదా అభ్యర్థుల చిహ్నాల ప్రదర్శనతో సహా ఏ రూపంలోనైనా రాజకీయ ప్రచారానికి పిల్లలను ఉపయోగించకూడదని స్పష్టం చేసింది.

జిల్లా ఎన్నికల అధికారులు, రిటర్నింగ్ అధికారులు బాల కార్మికులకు సంబంధించిన అన్ని సంబంధిత చట్టాలు, చట్టాలకు అనుగుణంగా ఉండేలా వ్యక్తిగత బాధ్యత వహించాలని పేర్కొంది. తమ పరిధిలోని ఎన్నికల యంత్రాంగం ఈ నిబంధనలను ఉల్లంఘిస్తే తీవ్రమైన క్రమశిక్షణా చర్యలు తీసుకుంటామని వెల్లడించింది.