umakanth rao

No Confidence Motion : విపక్షాలు ప్రధాని మోడీ ప్రభుత్వంపై అవిశ్వాస తీర్మానం తెచ్చినంత మాత్రాన తాము భయపడేది లేదని హోమ్ మంత్రి అమిత్ షా అన్నారు. అవిశ్వాసం పెడితే తమకెలాంటి అభ్యంతరం లేదన్నారు. మోడీ సర్కార్ పై విపక్షాలు ప్రవేశపెట్టిన ఈ తీర్మానం మీద బుధవారం బీజేపీ తరఫున చర్చలో పాల్గొంటూ ఆయన.. ఇది రాజకీయ దురుద్దేశంతో కూడినదని, ప్రజల్లో అయోమయాన్ని సృష్టించేందుకే దీన్ని తెచ్చారని ఆరోపించారు. మణిపూర్ ఘటనలను ఎట్టి పరిస్థితుల్లోనూ సమర్థించబోమని, అక్కడి హింసాత్మక ఘటనలు బాధాకరమన్నారు. మణిపూర్ అంశాన్ని విపక్షాలు నీచ రాజకీయాలకు ఉపయోగించుకుంటున్నాయని ఆయన ఆరోపించారు.

గత తొమ్మిదేళ్లలో మోడీ ప్రభుత్వం 50 కి పైగా చరిత్రాత్మక నిర్ణయాలు తీసుకున్నదని, మోడీ సర్కార్ కు ఎదురే లేదని పేర్కొన్నారు. ఈశాన్య రాష్ట్రాలను మోడీ లోగడ ఎన్నో సార్లు సందర్శించారన్నారు, మణిపూర్ పై చర్చ కోసం స్పీకర్ కు లేఖ రాశానని, కానీ ప్రతిపక్షాలకే దీనిపై చర్చించడానికి ఇష్టం లేదని విమర్శించారు. చర్చకు సిద్ధమని తాము మొదటి నుంచీ చెబుతూనే ఉన్నామన్నారు. కానీ కేంద్రం చర్చలకు అంగీకరించడం లేదని ప్రచారం చేశారన్నారు. ఆరున్నరేళ్లుగా బీజేపీ మణిపూర్ లో అధికారంలో ఉందని, ఈ ఆరున్నర ఏళ్లలో అక్కడ కర్ఫ్యూ విధించలేదని చెప్పిన అమిత్ షా., మే వరకు ఆ రాష్ట్రంలో ఎలాంటి హింసాత్మక ఘటనలు జరగలేదన్నారు. హైకోర్టు ఇచ్చిన ఆదేశాలు ఆ తరువాత ఆ రాష్ట్రంలో హింసకు కారణమయ్యాయన్నారు.

మైతీ తెగవారిని గిరిజనులుగా ప్రకటించాకే మణిపూర్ లో హింస పెరిగిందని ఆయన పేర్కొన్నారు. మే 3 న ప్రారంభమైన ఘర్షణలు, అల్లర్లు ఇంకా కొనసాగుతున్నాయన్నారు. ఆ రాష్ట్ర ముఖ్యమంత్రిని మార్చవలసిన అవసరం లేదని అమిష్ షా స్పష్టం చేశారు. కుకీల గ్రామాల్లో హింసాత్మక ఘటనలు జరుగుతున్నాయని, ఇందుకు వదంతులే కారణమయ్యాయని ఆయన చెప్పారు.

మణిపూర్ కోలుకొంటోందని, ఇప్పడు ఆజ్యం పోయకండని అన్నారు. మణిపూర్ కు సంబంధించి వైరల్ అయిన వీడియోను పోలీసులకు ఇచ్చి ఉండాల్సిందని అన్నారు. త్వరలోనే ఆ రాష్ట్రంలో పరిస్థితులను సాధారణ స్థాయికి తెస్తామని చెప్పారు. తాను స్వయంగా మూడు రోజులు ఆ రాష్ట్రంలో ఉన్నానని అన్నారు. మణిపూర్ హింసలో మరణించినవారి సంఖ్యను కూడా అమిత్ షా ప్రస్తావించారు.

ప్రధాని మోడీ ప్రభుత్వంపై విపక్షాలు ప్రవేశ పెట్టిన అవిశ్వాస తీర్మానాన్ని తాము వ్యతిరేకిస్తున్నట్టు వైసీపీ లోక్ సభా పక్ష నేత మిథున్ రెడ్డి (Mithun Reddy) తెలిపారు. పాలక ఎన్డీయే కూటమికి పూర్తి స్థాయిలో మెజారిటీ ఉందని, అలాంటప్పుడు అవిశ్వాసం ఎందుకన్నారు. మణిపూర్ లో జరిగిన హింసాత్మక ఘటనలు బాధాకరమని, వీలైనంత త్వరగా ఆ రాష్ట్రంలో లా అండ్ ఆర్థర్ పునరుద్ధరణకు చర్యలు తీసుకోవాలన్నారు. ఇక ఈ అవిశ్వాస తీర్మానానికి తాము మద్దతునిస్తున్నట్టు భారత్ రాష్ట్ర సమితి (BRS) ప్రకటించింది.

చర్చలో భాగంగా ఈ పార్టీ నేత నామా నాగేశ్వర రావు..(Nama Nageswara Rao) కేంద్రంపై విరుచుకపడ్డారు. విభజన చట్టంలో ఎన్నో హామీలిచ్చారని, కానీ తెలంగాణ (Telangana) విషయంలో ఒక్క హామీని కూడా అమలు చేయలేదని ఆయన ఆరోపించారు. తెలంగాణ ఏర్పడే నాటికి తాగడానికి, వ్యవసాయానికి నీళ్లు లేవని, కానీ తాము భగీరథ మిషన్ ను తెచ్చామన్నారు. దీన్నే కేంద్రం కాపీ చేసి హర్ ఘర్ జల్ అంటోందన్నారు. అన్ని రాష్ట్రాలకు నిధులిస్తారు గానీ మిషన్ భగీరథకు మాత్రం కేంద్రం నుంచి నిధులు అందలేదన్నారు. దీనికి నిధులివ్వాలని నీతి ఆయోగ్ సిఫారసు చేసిందని, కానీ కేంద్రం మొండి చెయ్యి చూపిందని అన్నారు. ఆదాయంలో తెలంగాణ దేశంలోనే నెంబర్ వన్ గా ఉందని ఆయన చెప్పారు,. మేం ఎన్డీయే కాదు.. అలా అని ఇండియా కూటమి కూడా కాదు అని చెప్పిన నామా నాగేశ్వర రావు.. మణిపూర్ కు అఖిల పక్ష బృందాన్ని తీసుకువెళ్లాలని కోరుతున్నామన్నారు.

ప్రధాని వచ్చి ఎందుకు మాట్లాడరు ?

మణిపూర్ లో ఘోరమైన హింసాత్మక ఘటనలు జరిగినా ప్రధాని మోడీ సభకు వచ్చి ఎందుకు మాట్లాడరని కాంగ్రెస్ తరఫున రేవంత్ రెడ్డి (Revant Reddy) ప్రశ్నించారు. ఈ రోజు ఆదివాసీల అంతర్జాతీయ దినోత్సవమని, ఈ సందర్భంగా వారిపై గౌరవంతో మోడీ ఇక్కడకు వచ్చి.. ముఖ్యంగా మణిపూర్ లో జరిగిన అఘాయిత్యాలకు క్షమాపణ చెప్పి ఉంటే ఆయనపట్ల ప్రజలకు గౌరవం ఎంతో పెరిగి ఉండేదన్నారు. ఎన్డీఎ అంటే నేషన్ డివైడ్ అలయెన్స్ అని ఆయన వ్యాఖ్యానించారు. గిరిజనులు, ఆదివాసీలంటే ఈ ప్రధానికి చులకన అని ఆరోపించిన ఆయన. తమ పార్టీ తరఫున అవిశ్వాస తీర్మానాన్ని సమర్థిస్తున్నామని చెప్పారు. మోడీ ప్రభుత్వంపై ప్రజలకు విశ్వాసం పోయిందని పేర్కొన్నారు. విభజించు-పాలించు అన్న బ్రిటిష్ విధానాన్ని ఈ సర్కార్ పాటిస్తోందని,, దీన్ని తాము తీవ్రంగా వ్యతిరేకిస్తున్నామని చెప్పారు.

రాజ్యసభలో విపక్షాల వాకౌట్

మణిపూర్ అంశంపై 267 నిబంధన కింద చర్చ చేబట్టాలన్న తమ డిమాండును చైర్మన్ జగదీప్ ధన్కర్ నిరాకరించినందుకు నిరసనగా కాంగ్రెస్ చీఫ్ మల్లిఖార్జున్ ఖర్గే ఆధ్వర్యాన విపక్షాలు సభ నుంచి వాకౌట్ చేశాయి. మాట్లాడేందుకు తమను అనుమతించడం లేదని, సభకు వచ్చేందుకు ప్రధాని మోడీ కూడా సిద్ధంగా లేరని ఖర్గే ఆరోపించారు.

Rahul Gandhi : కాంగ్రెస్ (Congress) నేత రాహుల్ గాంధీ (Rahul Gandhi) మరో వివాదంలో చిక్కుకున్నారు. లోక్ సభలో ఆయన కేంద్ర మంత్రి స్మృతి ఇరానీ (Smriti Irani) కి ఫ్లయింగ్ కిస్ ఇచ్చారన్న వార్త సంచలనం రేపింది. తన పట్ల ఆయన ఇలా అనుచితంగా వ్యవహరిస్తూ సభ నుంచి వెళ్లిపోయారని స్మృతి ఇరానీ ఆరోపించారు. మహిళల పట్ల ఆయనకు ఏ మాత్రం గౌరవం ఉందో ఈ ఉదంతం తెలియజేస్తోందన్నారు. పార్లమెంట్ ను ప్రతివారూ గౌరవించవలసి ఉందన్నారు. గాంధీ కుటుంబం స్త్రీ ద్వేషి అన్న రీతిలో ఆమె మాట్లాడారు.

పార్లమెంటులో ఎంతోమంది మహిళలు ఉన్నారని, రాహుల్ అనుచిత ప్రవర్తన తననే గాక ఎంతోమంది మహిళలను కూడా బాధించి ఉంటుందని అన్నారు. భారత పార్లమెంట్ చరిత్రలో ఇలాంటి ఘటన ఏనాడూ జరగలేదని ఆమె చెప్పారు. మరో కేంద్ర మంత్రి శోభా కరంద్ లాజే కూడా రాహుల్ గాంధీని దుయ్యబట్టారు. తాము వెంటనే దీనిపై స్పీకర్ కు ఫిర్యాదు చేస్తున్నామన్నారు. అనంతరం బీజేపీకి చెందిన మహిళా ఎంపీలు రాహుల్ గాంధీపై స్పీకర్ ఓంబిర్లాకు ఫిర్యాదు చేశారు. మహిళా సాధికారత గురించి కాంగ్రెస్ నేతలు మాట్లాడుతుంటారని, మహిళలకు వారిచ్చే గౌరవం ఇదేనా అని ఆ తరువాత వారు ప్రశ్నించారు.

రాహుల్ ప్రవర్తన సిగ్గుచేటు అని బీజేపీ జాతీయ అధికారప్రతినిధి షెహజాద్ పూనావాలా ఖండించారు. లోగడ ఆయన కన్ను గీటారని, ఇప్పుడు గాల్లోకి ఫ్లైయింగ్ కిస్ ఇచ్చారని .. ఇదేనా ఆయన సభ్యత అని పూనావాలా అన్నారు. కాగా రాహుల్ నిజంగా అలా ప్రవర్తించారా అన్న దానిపై సీసీకెమెరా ఫుటేజీని అధికారులు పరిశీలిస్తున్నారు. కాంగ్రెస్ ఎంపీలు మాత్రం .. రాహుల్ ని చూసి బీజేపీ భయపడుతోందని, అందుకే ఆ పార్టీ వారు ఇలాంటి ఆరోపణలు చేస్తున్నారని విమర్శించారు.

మణిపూర్ ఈ దేశంలోని భాగమే

అంతకు ముందు అవిశ్వాస తీర్మానంపై జరిగిన చర్చలో.. రాహుల్ గాంధీ ప్రసంగించిన తరువాత స్మృతి ఇరానీ .. ఆయన వ్యాఖ్యలను తీవ్రంగా ఖండించారు. మణిపూర్ లో భరత మాతను చంపేశారన్న రాహుల్ కామెంట్ ని ఆమె దుయ్యబడుతూ.. మణిపూర్ ఈ దేశంలోని భాగమేనని, మీరే ఆ రాష్ట్రాన్ని వేరుగా చూస్తున్నారని అన్నారు. మీరు ‘ఇండియా’ కాదని, అవినీతికి ప్రతిరూపమని మండిపడ్డారు. భరత మాతను హత్య చేశారన్న మీ వ్యాఖ్యలను ఇండియా క్షమించదు.. జమ్మూ కశ్మీర్ లో కశ్మీరీ పండిట్లపై జరిగిన దారుణాలు మీకు కనిపించలేదా ? రాజస్థాన్ లో ఓ మైనర్ బాలికపై దారుణంగా అత్యాచారం జరిగింది. బెంగాల్, రాజస్థాన్ రాష్ట్రాల్లో జరిగిన అఘాయిత్యాలపై మీరెందుకు స్పందించడం లేదు అని ఆమె ప్రశ్నించారు. మణిపూర్ రెండుగా చీలలేదని .. అది దేశంలో అంతర్భాగమన్నారు . భారత్ అంటే నార్త్ మాత్రమేనని విపక్ష కూటమి సభ్యుడొకరు తమిళనాడులో వ్యాఖ్యానించారని, మీకు ధైర్యం ఉంటే దీనిపై స్పందించాలన్నారు. జమ్మూ కశ్మీర్ కి 370 అధికరణాన్ని పునరుద్దరించాలనుకుంటున్నారా అని ఆమె ప్రశ్నించారు.

cNews Click : వెబ్ పోర్టల్ న్యూస్ క్లిక్ కి చైనా నుంచి అందుతున్న నిధులపై న్యూయార్క్ టైమ్స్ (Newyork Times) ప్రచురించిన వార్త సంచలనం రేపింది. ఇది కేవలం సముద్రంలో ఓ నీటి చుక్కవంటిదేనని బీజేపీ రాజ్యసభ ఎంపీ, సీనియర్ అడ్వొకేట్ మహేష్ జెఠ్మలానీ వ్యాఖ్యానించారు. ఈ పోర్టల్ చైనా నుంచి రూ.. 38 కోట్ల నిధులను అందుకున్నదని, భారత వ్యతిరేక ప్రచారానికి ఈ నిధులను ఉద్దేశించారని నిన్న బీజేపీ ఎంపీ నిషికాంత్ దూబే లోక్ సభలో పేర్కొనగానే దీనిపై దుమారం రేగింది. న్యూస్ క్లిక్ అన్నది ‘టుక్డే టుక్డే గ్యాంగ్’ లో భాగమని, ఈ నిదులద్వారా ఎవరికి ప్రయోజనం కలిగిందో ప్రభుత్వం ఇన్వెస్టిగేట్ చేయించాలని ఆయన డిమాండ్ చేశారు.

కాంగ్రెస్, చైనా, ఈ పోర్టల్ ఒకే జాతికి చెందినవని కేంద్ర మంత్రి అనురాగ్ ఠాకూర్ కూడా ఆరోపించారు. నెవిల్లే రాయ్ సింగం, ఆయనకు చెందిన న్యూస్ క్లిక్ కమ్యూనిస్ట్ పార్టీ ఆఫ్ చైనాకు చెందిన ప్రమాదకరమైన సాధనాలని న్యూయార్క్ టైమ్స్ పేర్కొన్నదన్నారు. ఇప్పుడు తాజాగా మహేష్ జెఠ్మలానీ కూడా ఈ సందర్భంగా కాంగ్రెస్ నేతలు రాహుల్ గాంధీని, జైరాంరమేష్ ని టార్గెట్ చేశారు.

2001-2008 మధ్య గానీ, ఆ తరువాత గానీ నెవిల్లే రాయ్ సింగం హ్యూవీ టెక్నికల్ ఆఫీసరుగా ఉండగా మీరు ఆయనను కలిశారా లేదా అని ఆయన ప్రశ్నించారు. 2006 లో ‘చిండియా’ పేరిట జైరాంరమేష్ ఓ పుస్తకాన్ని ప్రచురించారని, అందులో హ్యూవి గురించి ప్రస్తావించారని మహేష్ జెఠ్మలానీ గుర్తు చేశారు. ఈ సంస్థతో మీ ప్రయోజనాలు మీరు యూపీఏ-2 హయాంలో పర్యావరణ శాఖ మంత్రిగా ఉండేంతవరకు కొనసాగాయన్నారు. 2008 లో సోనియా గాంధీ సమక్షంలో రాహుల్ గాంధీ కూడా కాంగ్రెస్ పార్టీ తరఫున ఓ ఎంఓయుపై సంతకాలు చేశారన్నారు. హ్యూవీతో నెవిల్లే కి సంబంధాలున్న కాలంలోనే ఇదంతా జరిగిందన్నారు. మీరు ఒక్కరు గానీ, మీ ఇద్దరు గానీ నాడు నెవిల్లేని కలిశారా లేదా అని ప్రశ్నించిన ఆయన.. దీనిపై జాతీయ దర్యాప్తు సంస్థ.. ఎన్ఐఏ చేత దర్యాప్తు జరిపించవలసి ఉందన్నారు.

చైనీస్ టెలికాం సంస్థ అయిన హ్యూవీకి నెవిల్లే రాయ్ సింగం 2001-2008 మధ్య కాలంలో చీఫ్ టెక్నికల్ ఆఫీసరుగా వ్యవహరించారు. ప్రపంచ వ్యాప్తంగా చైనా తరఫున ప్రచారం చేస్తున్న వ్యక్తిగా ఇతడిని న్యూయార్క్ టైమ్స్ తన పత్రికలో పేర్కొంది. పలు న్యూస్ సైట్స్ లో న్యూస్ క్లిక్ కూడా ఓ సైట్ అని, ఈ వ్యవహారమంతా మంగళవారం పార్లమెంటును కుదిపివేసిందని వార్తలు వచ్చాయి.

Rahul Gandhi :ప్రధాని మోడీ ప్రభుత్వంపై విపక్షాలు ఇచ్చిన అవిశ్వాస తీర్మానం మీద బుధవారం కాంగ్రెస్ (Congress) అగ్రనేత రాహుల్ గాంధీ (Rahul Gandhi) లోక్ సభలో చర్చను ప్రారంభించారు. మొదట తన భారత్ జోడో యాత్ర సందర్భంగా తనకు కలిగిన అనుభవాలను ఆయన వివరించారు. ఆ తరువాత మణిపూర్ అంశంపై మోడీ ప్రభుత్వాన్ని దుయ్యబట్టారు. తాను ఆ రాష్ట్రానికి వెళ్లి అక్కడి పునరావాస శిబిరాల్లో తలదాచుకున్న బాధితులతో మాట్లాడానని, తమ బాధలను వారు కన్నీటితో చెప్పారని అన్నారు. ప్రధాని ఇప్పటివరకు మణిపూర్ ను ఎందుకు సందర్శించలేదన్నారు.

ఆయన దృష్టిలో మణిపూర్ ఈ రాష్ట్రం కాదా అని ప్రశ్నించారు. మణిపూర్ కు సైన్యాన్ని ఎందుకు పంపించడం లేదన్నారు. మణిపూర్ లో మీరు భరత మాతను హత్య చేశారు.. ఆ రాష్ట్ర ప్రజలను చంపి భరత మాతను కూడా చంపారు అని ఆవేశంగా వ్యాఖ్యానించారు. మీరు దేశ భక్తులు కారని, దేశ ద్రోహులని ఆరోపించారు.

ఈ దశలో బీజేపీ ఎంపీలు ఆయన ప్రసంగానికి అడ్డు తగులుతూ నినాదాలు చేశారు. దీంతో సభలో కొద్దిసేపు గందరగోళం నెలకొంది. రాహుల్ తన ప్రసంగాన్ని కొనసాగిస్తూ ..మోడీని రావణుడితో పోల్చారు. అహంకారి గనుకే రావణుడు ప్రజల వాణిని వినలేదన్నారు. లంకను కాల్చింది హనుమంతుడు కాదని, రావణుడి అహంకారమే కాల్చివేసిందన్నారు.

ఆ అహంకారమే అతడిని పొట్టన బెట్టుకుందన్నారు. మణిపూర్ కి సైన్యాన్ని పంపిన పక్షంలో ఒక్క రోజులో అక్కడ పరిస్థితి చక్కబడవచ్చునని రాహుల్ అభిప్రాయపడ్డారు. కాగా రాహుల్ ప్రసంగంపై కేంద్ర మంత్రి స్మృతి ఇరానీ మండిపడ్డారు.

ప్రధాని మోడీ (Modi) ప్రభుత్వంపై విపక్షాలు పెట్టిన అవిశ్వాస తీర్మానంపై రెండో రోజైన బుధవారం చర్చ జరగనుంది. ప్రతిపక్షాల తరఫున కాంగ్రెస్ (Congress) అగ్ర నేత రాహుల్ గాంధీ (Rahul Gandhi) లోక్ సభలో చర్చను ప్రారంభించనున్నారు. నిన్న చర్చను ప్రారంభించిన పార్టీ ఎంపీ గౌరవ్ గొగోయ్.. మణిపూర్ అంశంపై పాలక బీజేపీమీద విరుచుకపడ్డారు. ఇక ఈ తీర్మానంపై రెండో రోజున రాహుల్ చర్చను ప్రారంభిస్తారని పార్టీ నేత అధిర్ రంజన్ చౌదరి తెలిపారు.

పార్లమెంటులో తమకు మెజారిటీ తక్కువగా ఉన్నప్పటికీ.. మణిపూర్ పరిస్థితిపై మోడీ తప్పనిసరిగా సభకు వచ్చి ప్రకటన చేయాలన్నదే తమ లక్ష్యమని ఆయన చెప్పారు. బీజేపీ తరఫున హోమ్ మంత్రి అమిత్ షా ఈ చర్చలో పాల్గొననున్నారు. కాంగ్రెస్ నుంచి రేవంత్ రెడ్డి, హెబీ ఎడెన్ కూడా మాట్లాడనున్నట్టు తెలుస్తోంది.

. మణిపూర్ అంశంపై 267 నిబంధన కింద చర్చ చేబట్టాలంటూ వరుసగా కాంగ్రెస్ నుంచి రాజీవ్ శుక్లా, ఆర్జేడీ తరఫున మనోజ్ ఝా, ఆప్ నుంచి రాఘవ్ చద్దా వాయిదా తీర్మాన నోటీసులిచ్చారు.

అలాగే మణిపూర్, హర్యానా అంశాలపై రాజ్యసభలో చర్చ జరపాలని ఆప్ ఎంపీ సుశీల్ గుప్తా వాయిదా తీర్మాన నోటీసును అందజేశారు. మంగళవారం మాదిరే బుధవారం కూడా పార్లమెంట్ లో వాడిగా, వేడిగా చర్చ కొనసాగవచ్చు.

Karnataka : కర్ణాటకలో అవినీతి, కమీషన్ల దందా కొనసాగుతోంది. ప్రభుత్వ పనులు, ప్రాజెక్టుల్లో 40 శాతం కమీషన్ల యవ్వారం గత బీజేపీ ప్రభుత్వ హయాంలో సాగితే.. ఇప్పుడు అధికారంలో ఉన్న కాంగ్రెస్ ప్రభుత్వానికీ అదే మకిలి పట్టుకుంది. కాకపోతే అప్పుడు 40 శాతమైతే ఇప్పుడు 10 నుంచి 15 శాతం.. అంతే తేడా! లెక్క మాత్రం కాస్త తగ్గినా సేమ్ సీన్ ! సీఎం సిద్దరామయ్య నేతృత్వంలోని రెండు నెలల ప్రభుత్వంలో అవినీతి గురించి బెంగళూరు లోని ప్రజా పనుల శాఖకు చెందిన కొంతమంది కాంట్రాక్టర్లు ఈ షాకింగ్ నిజాన్ని బయటపెట్టారు. రెండేళ్లకు పైగా తాము చేబట్టిన పనులకు సంబంధించి బిల్లులు ఇప్పటివరకు క్లియర్ కాలేదని బృహత్ బెంగళూరు మహానగర పాలికే కాంట్రాక్టర్ల సంఘం రాష్ట్ర గవర్నర్ థావర్ చంద్ గెహ్లాట్ వద్ద మొర పెట్టుకుంది.

750 మంది సభ్యులున్న ఈ సంఘం ఈ మేరకు ఓ లేఖను ఆయనకు సమర్పించింది. వ్యవసాయ శాఖ మంత్రి చెలువరాయస్వామి (Cheluvaraya Swami) తనకు ప్రతి నెలా తమ శాఖకు చెందిన జాయింట్ డైరెక్టర్ల ద్వారా 8 లక్షలను లంచంగా ఇవ్వాలని ఒత్తిడి తెస్తున్నట్టు ఆరోపణలు వచ్చిన నేపథ్యంలో వీరి లేఖ ప్రాధాన్యం సంతరించుకుంది. మాండ్యా జిల్లా వ్యవసాయశాఖకు చెందిన కొందరు అసిస్టెంట్ డైరెక్టర్లు గవర్నర్ కు రాసినట్టు ఉన్న లేఖ కూడా ఇదే సమయంలో సోషల్ మీడియాలో వైరల్ అయింది.

గవర్నర్ వెంటనే చర్యలు తీసుకోకపోతే తాము తమ కుటుంబాలతో కలిసి సామూహిక ఆత్మహత్యలకు పాల్పడతామని వారు హెచ్చరించినట్టు కూడా తెలిసింది. తాజాగా.. పెండింగులో ఉన్న తమ బిల్లులను క్లియర్ చేసే విషయంలో సంబంధిత అధికారులకు ఆదేశాలు జారీ చేసి తమకు న్యాయం చేయాలని ఈ కాంట్రాక్టర్లు గవర్నర్ ను కోరారు. ‘వివిధ అసాధారణ ప్రయోజనాల’ నిమిత్తం తమ బిల్లులను ఆపుతున్నారని , 10 నుంచి 15 శాతం కమీషన్ ఇవ్వాలని వేధిస్తున్నారని వారు ఆరోపించారు.

డిప్యూటీ సీఎం, బెంగళూరు నగర అభివృద్ధి శాఖను కూడా నిర్వహిస్తున్న డీకే. శివకుమార్ (DK. Shivakumar) తరఫున ఈ కమీషన్ ను డిమాండ్ చేస్తున్నారన్నారు. కమీషన్ చెల్లించకపోతే మీ బిల్లులు పెండింగులోనే ఉంటాయని మహానగర పాలికే లోని అధికారులు హెచ్చరిస్తున్నారని వారు పేర్కొన్నారు. అయితే శివకుమార్ ఈ ఆరోపణలను తోసిపుచ్చారు. ఇది రాజకీయ కుట్ర అని, కాంట్రాక్టర్ల సమస్యతో తనకెలాంటి సంబంధం లేదని, ఏ బిల్లుల గురించి తనకు తెలియదన్నారు. ‘ఏ కాంట్రాక్టర్ తో కూడా నేను మాట్లాడలేదు. వీరి వెనుక ఎవరున్నారో నాకు తెలుసు… వారిని ఏమైనా చేసుకోనివ్వండి’ అని ఆయన వ్యాఖ్యానించారు.

లోగడ కర్ణాటకలో బీజేపీ ప్రభుత్వం అధికారంలో ఉండగా.. ‘పే సీఎం’, ’40 శాతం సర్కార్’ అన్న ఆరోపణలతో కూడిన ప్రచారాలతో విరుచుకుపడిన కాంగ్రెస్ ఇప్పుడు తాను కూడా అవినీతికి అతీతమేమీ కాదని నిరూపించుకుంటోందా అన్న అభిప్రాయాలు తలెత్తుతున్నాయి. ఆ ప్రభుత్వంలో.. నాటి పంచాయతీ రాజ్ శాఖ మంత్రి కె.ఎస్.ఈశ్వరప్ప లంచం కోసం చేసిన వేధింపుల కారణంగా సంతోష్ పాటిల్ అనే కాంట్రాక్టర్ ఆత్మహత్య చేసుకున్న ఉదంతాన్ని కొందరు గుర్తు చేస్తున్నారు.

TMC : రాజ్యసభ నుంచి తృణమూల్ కాంగ్రెస్ సభ్యుడు డెరెక్ ఓబ్రీన్ (Derek Obrien) ను ఈ వర్షాకాల సమావేశాలు ముగిసేవరకు సస్పెండ్ చేశారు. సభా కార్యకలాపాలకు పదేపదే అడ్డు తగులుతున్నారని, చైర్మన్ సూచనలను ఖాతరు చేయడంలేదని, సభలో కావాలనే రభస సృష్టిస్తున్నారని కేంద్ర మంత్రి, సభా నేత పీయూష్ గోయెల్ తీర్మానాన్ని ప్రతిపాదించిన అనంతరం చైర్మన్ జగదీప్ ధన్కర్ (Jagdeep Dhankhar) ఈ నిర్ణయం తీసుకున్నారు. మంగళవారం పలు సందర్భాల్లో డెరెక్ సహనాన్ని కోల్పోయారు.

పాయింట్ ఆఫ్ ఆర్థర్ లేవనెత్తడమే గాక .. జగదీప్ ధన్కర్ పట్ల వేలెత్తి చూపుతూ, మణిపూర్ అంశంపై వెంటనే చర్చ జరగాలని డిమాండ్ చేశారు. సీటులో కూర్చోవలసిందిగా చైర్మన్ చేసిన సూచనలను ఆయన ఏ మాత్రం పట్టించుకోలేదు. తన పేరు పెట్టి ధన్కర్ ప్రస్తావించినప్పటికీ..డెరెక్ ఖాతరు చేయకుండా 267 రూల్ కింద తక్షణమే మణిపూర్ (Manipur) పరిస్థితిపై చర్చ చేపట్టాలన్నారు.

దీంతో ఆగ్రహించిన ధన్కర్ .. తన సీటు లోనుంచి లేచి.. మీరు నిన్న కూడా ఇలాగే అనుచితంగా ప్రవర్తించారని, సభా కార్యకలాపాలకు భంగం కలిగించారని అన్నారు. ఈ రోజు కూడా మీరు మీ ప్రవర్తనను మార్చుకోలేదని అంటూ ఈ పార్లమెంట్ వర్షాకాల సమావేశాలు ముగిసేవరకు సస్పెండ్ చేస్తున్నానని అన్నారు.

ప్రధానిని, హోమ్ మంత్రిని మీరు ‘వాషింగ్ మెషిన్’ అని ఎద్దేవా చేశారని… ఇలాంటి డ్రామాలు సరికాదని పేర్కొన్నారు. సభ నుంచి తక్షణమే నిష్క్రమించవలసిందిగా ఆదేశిస్తున్నానన్నారు.