umakanth rao

Delhi : జీ 20 సమ్మిట్ త్వరలో జరగనున్న నేపథ్యంలో ఢిల్లీ లోని పలు మెట్రో స్టేషన్ల గోడలపై ‘ఢిల్లీ బనేగా ఖలిస్తాన్’ అనే రాతలు కనిపించడంతో పోలీసులు ఖంగు తిన్నారు. దీనితో బాటు ‘ఖలిస్తాన్ రెఫరెండం జిందాబాద్’ అనే నినాదాలను కూడా ఖలిస్తాన్ అనుకూల వర్గాలు స్పష్టంగా రాశాయి. పంజాబీ బాగ్, శివాజీ పార్క్, పశ్చిమ్ విహార్, ఉద్యోగ్ నగర్, వంటి అనేక చోట్ల గోడలపై నల్లని రంగుతో అక్షరాలను స్ప్రే చేశారు.

చివరకు ఓ ప్రభుత్వ పాఠశాల గోడలపై కూడా ఈ నినాదాలు కనిపించాయి. ఖలిస్థాన్ అనుకూల నిషిద్ధ సిఖ్స్ ఫర్ జస్టిస్ సంస్థకు చెందిన సభ్యులు ఈ పనికి పాల్పడివుంటారని పోలీసులు భావిస్తున్నారు. తాము చేసిన ఈ ‘ఘన కార్యానికి’ సంబంధించిన ఫుటేజీని ఈ సంస్థ రిలీజ్ చేసిందని వారు తెలిపారు.

సెప్టెంబరు 10 న కెనడా లోని సర్రేలో ఖలిస్థాన్ రెఫరెండం నిర్వహిస్తామని ఈ సంస్థ చీఫ్ గురు పత్వంత్ సింగ్ పన్ను ఈ వీడియోలో ప్రకటించాడన్నారు. సెప్టెంబరు 9, 10 తేదీల్లో ఢిల్లీలో జీ 20 సదస్సు జరగనుంది. కాగా ఈ రాతలను చెరిపేసిన పోలీసులు వీటిని స్కాన్ చేసి.. ఎవరు రాశారో దర్యాప్తు చేయడం ప్రారంభించారు.

ఈ రాతల వ్యవహారం వారికి ఓ సవాలుగా మారింది. రాత్రికి రాత్రే ఇవి పబ్లిగ్గా గోడలపై కనబడడం సంచలనం కలిగించింది. కెనడా, ఆస్ట్రేలియా వంటి దేశాల్లో ఖలిస్థాన్ అనుకూల శక్తులు చాలా చురుకుగా వ్యవహరిస్తున్నాయి.

India : కేంద్రంలో ప్రధాని మోడీ ప్రభుత్వాన్ని గద్దె దింపడమే లక్ష్యంగా ఏర్పడిన ‘ఇండియా’ విపక్ష కూటమి సమావేశం ఆగస్టు 31, సెప్టెంబరు 1 తేదీల్లో ముంబైలో జరగనుంది. ఈ కూటమిలో భాగస్వామి అయిన డీఎంకే అధ్యక్షుడు, తమిళనాడు సీఎం ఎంకే. స్టాలిన్ ఆదివారం ఈ విషయాన్ని వెల్లడించారు. ఈ సమావేశంలో కూటమి పార్టీలన్నీ కలిసి కొన్ని ముఖ్యమైన నిర్ణయాలు తీసుకోనున్నాయని ఆయన చెప్పారు. డీఎంకే తరఫున తానూ ఇందులో పాల్గొనబోతున్నానన్నారు.

కాగా ఇండియా కూటమి మొదటిసారి సమావేశం గత జూన్ 23 న పాట్నాలో జరిగింది. నాటి ఆ సమావేశానికి కాంగ్రెస్, ఆర్జేడీ, జేడీయు, టీఎంసీ సహా మొత్తం 16 పార్టీలు హాజరయ్యాయి. ఆ తరువాత జులై 17, 18 తేదీల్లో బెంగళూరులో రెండో భేటీ జరిగింది. ఆ సమావేశాలకు 26 పార్టీలు హాజరు కావడం విశేషం.

అంటే కేవలం నెల రోజుల్లోనే కూటమి పార్టీల సంఖ్య మరో పదికి పెరిగింది. దీంతో తమ కూటమికి ‘ఇండియా’ గా ఇవి నామకరణం చేశాయి. 2024 లోక్ సభ ఎన్నికల్లో ఎన్డీయేని ఓడించడానికి ఈ విపక్షాలు వరుసగా సమావేశాలు జరుపుతున్నాయి.

ముంబైలో త్వరలో జరగనున్న సమావేశాల్లో.. ఇదివరకటి భేటీలో చర్చించని అంశాలను కూడా చర్చిస్తారని తెలుస్తోంది. 5 రాష్ట్రాల్లో జరగనున్న అసెంబ్లీ ఎన్నికల్లో ఇండియా విజయానికి తీసుకోవాల్సిన చర్యలు, వ్యూహంపై ఇవి కసరత్తు చేస్తున్నాయి.

Bengal : పశ్చిమ బెంగాల్ లోని జగన్నాథ్ పూర్ లో గల బాణాసంచా ఫ్యాక్టరీలో ఆదివారం ఉదయం పేలుడు సంభవించగా ఆరుగురు దుర్మరణం చెందారు. పలువురు గాయపడ్డారు. మరికొందరు శిథిలాల్లో చిక్కుకుపోయారు. క్షతగాత్రులను వెంటనే సమీపంలోని బారసాత్ ఆసుపత్రికి తరలించారు. ఉత్తర 24 పరగణాల జిల్లా లోని దుట్టా పుకూర్ పోలీసు స్టేషన్ పరిధిలోని జగన్నాథ్ పూర్ లో జరిగిన ఈ ఘటనలో చుట్టుపక్కలగల ఇళ్ళు సైతం తీవ్రంగా దెబ్బతిన్నాయి.

పేలుడు కారణంగా పెద్ద ఎత్తున దట్టమైన పొగ ఆ ప్రాంతమంతా ఆవరించింది. పోలీసులు, సహాయక బృందాలు యుద్ధ ప్రాతిపదికన సహాయక చర్యలు చేబట్టారు. మృతుల సంఖ్య పెరగవచ్చునని భయపడుతున్నారు. రాష్ట్రంలో ఇలాంటి ఘటన జరగడం నాలుగు నెలల్లో ఇది రెండో సారి.

లోగడ తూర్పు మిడ్నపూర్ జిల్లాలో అక్రమ బాణాసంచా ఫ్యాక్టరీలో జరిగిన పేలుడులో తొమ్మిది మంది మృతి చెందారు. తాజా ఘటనలోను ఇది అక్రమ బాణాసంచా ఫ్యాక్టరీగా అనుమానిస్తున్నారు.

ఈ ప్రమాదానికి కారణాలు ఇంకా తెలియలేదు. పోలీసులు దర్యాప్తు జరుపుతున్నారు. మృతుల కుటుంబాల రోదనలతో ఆ ప్రాంతమంతా విషాదం అలముకుంది.

Rahul Gandhi : రానున్న లోక్ సభ ఎన్నికల్లో కాంగ్రెస్ తరఫున ప్రధాన మంత్రి అభ్యర్థి రాహుల్ గాంధీయేనని రాజస్తాన్ ముఖ్యమంత్రి అశోక్ గెహ్లాట్ స్పష్టం చేశారు. 26 విపక్షాలతో కూడిన ‘ఇండియా’ కూటమి గురించి ప్రస్తావిస్తూ ఆయన.. చర్చలు, సంప్రదింపుల అనంతరం ఈ నిర్ణయాన్ని తీసుకున్నారని చెప్పారు. ఇదే సమయంలో కాంగ్రెస్ కూడా ఈ నిర్ణయం తీసుకున్నట్టు ఆయన చెప్పారు. ఇండియా కూటమి ఏర్పడవలసిన పరిస్థితి ఈ సమయంలో ఎంతైనా ఉందని, ప్రతి ఎన్నిక సందర్భంలోను స్థానిక సమస్యలు కీలక పాత్ర వహించినప్పటికీ దేశం లోని ప్రస్తుత పరిస్థితి మాత్రం అన్ని పార్టీల పైనా ఎంతో ఒత్తిడిని పెంచిందని అన్నారు.

ఇది ప్రజల నుంచి వచ్చిందని, అందువల్లే అన్ని విపక్షాలూ కలిసి ఓ కూటమిగా ఏర్పడ్డాయని పేర్కొన్నారు. ప్రధాని మోడీ అహంకారిగా వ్యవహరించరాదని, 2014 నుంచి బీజేపీ అధికారంలోకి వచ్చినప్పటి నుంచి కూడా ఆ పార్టీకి 31 శాతం ఓట్లు మాత్రమే వచ్చాయన్నారు. మిగతా 69 శాతం ఓట్లు మోడీకి వ్యతిరేకంగా పడినవేనని గెహ్లాట్ వ్యాఖ్యానించారు.

‘ఇండియా’ కూటమి గతనెలలో బెంగళూరు లో సమావేశమైనప్పుడు ఎన్డీయే భయపడిపోయిందన్నారు. 2024 సార్వత్రిక ఎన్నికల్లో ఎన్డీయే 50 శాతం ఓట్లతో అధికారం లోకి వస్తుందా అన్న ప్రశ్నకు ఆయన.. మోడీ ఆ విజయాన్ని సాధించలేరన్నారు. తన పాపులారిటీ హెచ్చు స్థాయిలో ఉన్నప్పుడు కూడా ఆయన 50 శాతం ఓట్లను సంపాదించలేకపోయారని, ఆయన ఓట్ల షేర్ తగ్గుతూ వస్తోందని, ఎవరు ప్రధాని అవుతారో 2024 ఎన్నికలే నిర్ధారిస్థాయని గెహ్లాట్ చెప్పారు.

కాంగ్రెస్ కారణంగానే మోడీ 2014 లో ప్రధాని కాగలిగారన్నారు. మోడీ వ్యవహరిస్తున్న తీరును కూడా ఆయన తప్పు పట్టారు. చంద్రయాన్-3 విజయానికి కారణం నాడు దివంగత ప్రధానులు జవహర్లాల్ నెహ్రూ , ఇందిరా గాంధీ చేసిన కృషే నని అశోక్ గెహ్లాట్ చెప్పారు.

Modi : ఢిల్లీలో త్వరలో జీ 20 సమ్మిట్ జరగనున్న దృష్ట్యా.. ప్రజలకు ఇబ్బందులు కలిగే అవకాశం ఉందని, ఇందుకు తనను క్షమించాలని ప్రధాని మోడీ (Modi) కోరారు. ఈ ఈవెంట్ కు సంబంధించి జరిపే ఏర్పాట్ల కారణంగా మీకు ఇబ్బందులు కలగవచ్చు.. అందుకు నన్ను క్షమించాలని ముందుగానే కోరుతున్నా అన్నారు. న్యూఢిల్లీ పాలం విమానాశ్రయంలో నిన్న ఢిల్లీవాసులను ఉద్దేశించి ఆయన మాట్లాడారు. ఈ సదస్సులో పాల్గొనేందుకు విదేశాల నుంచి పెద్ద సంఖ్యలో అతిథులు వస్తున్నారని, వారి పట్ల గౌరవసూచకంగా మనం మెలగవలసి ఉందని ఆయన చెప్పారు.

ఈ నేపథ్యంలో సెక్యూరిటీ ఏర్పాట్లు భారీ స్థాయిలో ఉంటున్న కారణంగా ప్రజల రాకపోకలకు అంతరాయం లేదా కొన్ని సమస్యలు ఏర్పడవచ్చునన్నారు. మీరు మన దేశ ప్రతిష్ఠను కాపాడతారని ఆశిస్తున్నా అని చెప్పారు. సెప్టెంబరు 9, 10 తేదీల్లో హస్తినలోని ప్రగతి మైదాన్ లో జీ 20 శిఖరాగ్ర సదస్సును నిర్వహించనున్నారు.

వసుధైక కుటుంబం అన్నదే ఈ సమ్మిట్ థీమ్ అని మోడీ పేర్కొన్నారు. ఈ సందర్భంగా పలు చోట్ల ట్రాఫిక్ ఆంక్షలు ఉంటాయని, ప్రజలు సహృదయంతో అర్థం చేసుకుని ప్రభుత్వానికి సహకరించాలని ఆయన అన్నారు. ఈ తేదీల్లో కొన్ని మెట్రో స్టేషన్లను మూసివేయవలసి రావచ్చు.. అలాగే సెంట్రల్ సెక్రటేరియట్ ను, సుప్రీంకోర్టును మూసివేయనున్నారు. .

సెప్టెంబరు 8 నుంచి 10 తేదీల వరకు బ్యాంకులు కూడా పని చేయవు.. అలాగే నిర్దేశిత ప్రాంతాల్లో స్కూళ్ళు, కాలేజీలు, ప్రభుత్వ,ప్రైవేటు కార్యాలయాలు, సంస్థలు సైతం మూసి ఉంటాయని తెలుస్తోంది. అమెరికా, చైనా అధ్యక్షులు జో బైడెన్, జీ జిన్ పింగ్ సహా పలు దేశాధినేతలు ఈ శిఖరాగ్ర సదస్సులో పాల్గొనడానికి రానున్నారు. ఇంతటి బృహత్ కార్యక్రమం నిర్వహించడం మనకు గర్వ కారణమని మోడీ పేర్కొన్నారు.

Manipur : మణిపూర్ రావణ కాష్టం వెనుక చడీ చప్పుడు చేయని మాదక ద్రవ్య మారణ హోమం దాగుందంటే నమ్మలేం.ఎవరూ ఊహించని ఈ ‘భూతం’ రాష్ట్రానికి శాపంలా మారింది. మణిపూర్ హింస వెనుక మాదకద్రవ్యాల విచ్చలవిడి వినియోగం దాగుంది. గంజాయి, నల్ల మందు, హెరాయిన్ వంటి మాదకద్రవ్యాలు మార్కెట్లో నిత్యావసర వస్తువుల్లా దొరుకుతున్నాయి. చివరకు హైస్కూలు స్టూడెంట్స్ కూడా వీటికి అలవాటు పడిపోతున్నా.. పట్టించుకుంటున్న అధికార యంత్రాగం లేదు. ఎరుపు, తెల్లని రంగుల పౌడర్ మిశ్రమాన్నేఇక్కడ ‘థుమ్ మొరోక్’ అనే వాడుక భాషలో వ్యవహరిస్తున్నారు. ఉప్పు, కారం కలగలిపిన ఈ మిశ్రమాన్ని ‘నెంబర్ 4’ హెరాయిన్ గా పిలుస్తున్నారు.

మత్తు కల్గించే ఈ మిశ్రమం ఉనికి నిజానికి మయన్మార్ లోనిది. పొరుగునున్న ఆ దేశంలో డ్రగ్ లార్డ్ ఖున్ సా అనే వ్యక్తి ఏకంగా ఫ్యాక్టరీల్లోనే ఈ మాదకద్రవ్యాన్ని తయారు చేస్తున్నాడు. షా స్టేట్ ఆర్మీకి చెందిన ఖున్ సా .నిర్వహిస్తున్న ఫ్యాక్టరీల్లో . ప్రపంచంలో హెరాయిన్ ఉత్పత్తి చేసే దేశాల్లో 25 శాతం వీటిలోనే భ్యమవుతోంది. ఈశాన్య ఏసియాలో గోల్డెన్ ట్రయాంగిల్ ప్రాంతం నుంచి వచ్చిన ఇతనికి 10 వేల మందితో కూడిన సాయుధ దళం కూడా ఉంది. ముఖ్యంగా గత రెండు దశాబ్దాల్లో ‘నెంబర్ 4’ హెరాయిన్ మయన్మార్ నుంచి మణిపూర్ లో అడుగు పెట్టింది. ఈ రాష్ట్రంలో లోకల్ గా మొబైల్ ఫ్యాక్టరీల్లోనూ, చిన్నపాటి ఉత్పాదక యూనిట్లలోనూ దీన్నిఉత్పత్తి చేస్తున్నారు. ఒక గ్రాముకు వంద రూపాయల్లోపే దీని ఖరీదు. మాదకద్రవ్యాలకు అలవాటుపడిపోతున్నవారి సంఖ్య రాష్ట్రం లోని పునరావాస కేంద్రాల్లో పెరిగిపోతోంది. సుమారు ఇలాంటి 105 కేంద్రాలు వీరితో కిక్కిరిసిపోతున్నాయి. ఒకప్పుడు 20-21 ఏళ్ళ వయస్సులోనివారు హెరాయిన్ కి అలవాటు పడగా ఇప్పుడు 14-15 సంవత్సరాల నూనూగు మీసాలవారు కూడా మాదకద్రవ్యాలకు బానిసలవుతున్నారు.

తాము మాదకద్రవ్యాలపై యుద్ధం ప్రకటించామని రాష్టం లోని బీజేపీ ప్రభుత్వం చెప్పుకుంటోంది. అయితే ఎక్కడబడితే అక్కడ విచ్చలవిడిగా గంజాయిని, నల్లమందును ‘పంటలు’గా పండిస్తున్న ‘రైతులు’ కూడా పెరిగిపోతున్నారు. కొండ ప్రాంతాల్లోని రైతులు వీటిని పండిస్తున్నా అధికారులు వారిపై చర్యలు తీసుకోవడం లేదని కుకీలు ఆరోపిస్తున్నారు. అయితే ఇదే సమయంలో వీరు కూడా
తామూ ఏం తక్కువ తినలేదన్నట్టు ‘హెరాయిన్, నల్లమందు’ పంటలను పండిస్తుండడంతో.. 15 వేల ఎకరాల్లోని ఈ పంటలను నాశనం చేస్తున్నట్టు ముఖ్యమంత్రి బీరేన్ సింగ్ ప్రభుత్వం ప్రకటించింది.

2017 నుంచి ఇప్పటివరకు మాదక ద్రవ్యాల కేసులకు సంబంధించి రెండున్నరవేలమందికి పైగా అరెస్టయ్యారు. కానీ ఇంత చేస్తున్నా మాదకద్రవ్యాలు ఇంకా లభిస్తూనే ఉన్నాయి. థాయిలాండ్, లావోస్, మయన్మార్ వంటి ప్రాంతాల నుంచి ఇవి మణిపూర్ చేరుతూనే ఉన్నాయి. పటిష్టమైన నిఘా వ్యవస్థ లేకపోవడంతో ఇవి నిరాటంకంగా ఇక్కడికి రవాణా అవుతున్నాయి. కాంగ్ పోక్పి జిల్లాను ఓ జర్నలిస్టుల బృందం సందర్శించినప్పుడు రైతులు ఈ అక్రమ పంటల గురించి బాహాటంగానే చర్చించుకోవడం చూసి ఆశ్చర్యపోయారు. రెండేళ్ల క్రితం తమ వరి పంటలను నష్టపోవడంతో తాము ఇక గంజాయి, ఓపియం పంటలను పండించక తప్పలేదని రైతులు కొందరు నిర్భయంగా చెప్పారు. ఇక నిరుద్యోగ సమస్య కూడా తీవ్రంగానే ఉండడంతో యువత కూడా ఇలాంటి అక్రమ పంటల పట్ల మొగ్గు చూపుతున్నారు. తక్కువ సమయంలో ఎక్కువ లాభం వచ్చే ఈ పంటలను పండించడమే ధ్యేయంగా పెట్టుకున్నారు.

Satyendar Jain : ఢిల్లీ మాజీ మంత్రి, ఆప్ నేత సత్యేందర్ జైన్.. జైల్లో స్విమ్మింగ్ పూల్ కావాలన్నారని ఈడీ దిగ్భ్రాంతికరమైన విషయాన్ని కోర్టుకు తెలిపింది. మనీ లాండరింగ్ కేసులో జైన్ 2022 నుంచి ఈడీ కస్టడీలో ఉన్నారు. తన క్లయింటు ఆరోగ్య కారణాల దృష్ట్యా ఆయన మధ్యంతర బెయిల్ ను పొడిగించాలని జైన్ తరఫు న్యాయవాది అభిషేక్ మను సింగ్వి శుక్రవారం సుప్రీంకోర్టును కోరగా… దీన్ని తాము వ్యతిరేకిస్తున్నట్టు ఈడీ లాయర్ తెలిపారు.

వెన్నెముకకు ఆపరేషన్ తరువాత జైన్.. కొన్ని ముఖ్యమైన వైద్య సంబంధ చికిత్సలు పొందుతున్నారని, అందువల్ల ఆయన మధ్యంతర బెయిల్ ను పొడిగించాలని సింగ్వి కోరారు. అయితే ఆయన బెయిల్ ను పొడిగించడానికి మెడికల్ అడ్వైజ్ ఒక్కటే సరిపోదని, నిజానికి జైల్లో తనకు స్విమ్మింగ్ పూల్ కావాలని ఆయన కోరారని, ప్రతివారూ ఇలా కోరబోరని ఈడీ తరఫు అదనపు సొలిసిటర్ జనరల్ ఎస్వీ .రాజు కోర్టుకు తెలిపారు.

అవసరమైతే జైన్ ను ఫిజియోథెరపీ కోసం స్విమ్మింగ్ పూల్ వద్దకు తీసుకువెళ్ళవచ్చునన్నారు. దీనిపై స్పందించిన కోర్టు.. ఆయన ఫిజియోథెరపీ చేయించుకుంటే మీరు దాన్ని ఫోటోలు తీసుకుని పబ్లిష్ చేస్తారని వ్యాఖ్యానించింది.

అనంతరం జైన్ బెయిల్ ను సెప్టెంబరు 1 వరకు పొడిగించేందుకు కోర్టు అంగీకరించింది. జైన్ రెగ్యులర్ బెయిల్ కోసం పెట్టుకున్న పిటిషన్ కూడా అదే రోజున లిస్ట్ లో ఉంచాలని రిజిస్ట్రీని ఆదేశించింది. తనకు బెయిల్ ను నిరాకరిస్తూ ఢిల్లీ హైకోర్టు గత ఏప్రిల్ 6 న జారీ చేసిన ఉత్తర్వులను జైన్ సవాలు చేశారు.