Venu

అధికారంలో ఉన్న నేతలు ఎప్పుడు ఎలా ప్రవర్తిస్తారో తెలుసుకోవడం కాస్త కష్టం అన్న విషయం తెలిసిందే. ఇక వారి దగ్గర పనిచేసే వారి పరిస్థితి చూస్తే ఒక్కోసారి జాలివేస్తుంది. అయినా ఉద్యోగం అన్నాక తిప్పలు, మంత్రులు అన్నాక కోపాలు ఉండకుండా ఉంటాయా..

ఇకపోతే ఎప్పుడు సౌమ్యంగా, శాంతంగా కనిపించే తెలంగాణ రాష్ట్ర హోంమంత్రి మహమూద్‌ అలీ, తలసాని పుట్టినరోజు సందర్భంగా కాస్త అసహనాన్ని ప్రదర్శించారు. తన వ్యక్తిగత గన్‌మ్యాన్‌ చెంప చెళ్లుమనిపించాడు.

హైదరాబాద్‌ అమీర్‌పేట డివిజన్‌ డీకే రోడ్డులోని ప్రభుత్వ పాఠశాలలో ముఖ్యమంత్రి అల్పాహార పథకం కార్యక్రమాన్ని నిర్వహించారు. ఈ పథకం ప్రారంభోత్సవాన్ని మంత్రి తలసాని శ్రీనివాస్ యాదవ్, హోంమంత్రి మహమూద్ అలీ ప్రారంభించారు. ఈ రోజు మంత్రి తలసాని పుట్టిన రోజు కావడంతో మహమూద్ అలీ ఆయన్ని ఆలింగనం చేసుకొని పుష్పగుచ్చం అందించి శుభాకాంక్షలు తెలిపారు.

కాగా హోంమంత్రి, తలసానికి శుభాకాంక్షలు చెబుతున్న సమయంలో బోకే ఎక్కడ అంటూ పక్కనే ఉన్న తన సెక్యూరిటీ సిబ్బందిని అడిగారు. బోకే గురించి తెలియదని గన్‌ చెప్పడంతో సహనం కోల్పోయిన హోంమంత్రి కానిస్టేబుల్‌ను చెంప దెబ్బ కొట్టారు. ప్రస్తుతం ఇందుకు సంబంధించిన వీడియో సోషల్ మీడియాలో హల్చల్ చేస్తోంది.

కేంద్ర ప్రభుత్వం పై తెలంగాణ ఆర్థిక శాఖ మంత్రి హరీశ్ రావు (Harish Rao) విమర్శల బాణాలు సంధించారు. రాష్ట్ర ప్రభుత్వం కొత్తగా ప్రవేశ పెట్టిన ఎరుకల ఎంపవర్​మెంట్​ స్కీమ్​ను మహిళా, శిశు, గిరిజన సంక్షేమ మంత్రి సత్యవతి రాథోడ్ (Satyavathi Rathod) తో కలిసి ప్రారంభించిన ఆయన బీజేపీ (BJP) నీచ రాజకీయాలు చేస్తోందని, అందుకు గవర్నర్​ను అడ్డుపెట్టుకొంటుందని అన్నారు.

ఎరుకల కులానికి చెందిన వ్యక్తికి ఎమ్మెల్సీ (MLC) పదవి వస్తే బీఆర్ఎస్​కు అనుకూలంగా వారందరూ ఉంటారనే భయం మొదలైందని విమర్శించారు. అందుకే ఎరుకల జాతికి చెందిన కుర్ర సత్య నారాయణ ఎమ్మెల్సీగా ఎన్నిక కాకుండా అడ్డుకున్నారని ధ్వజమెత్తారు. ఎరుకలు, విశ్వ బ్రాహ్మణులు బీజేపీకి తగిన గుణపాఠం చెప్పే సమయం ఆసన్నమైందని అన్నారు.

హైదరాబాద్​ నుంచి కోతల గ్యాంగ్,​ మహిళా ​ఎమ్మెల్యే పద్మాదేవేందర్​ రెడ్డి మీద పోటీకి సిద్దం అవుతోందని ఇలాంటి తోడేళ్లకు తగిన బుద్ధి చెప్పి పద్మా దేవేందర్ రెడ్డిని మళ్లీ ఎమ్మెల్యేగా గెలిపించాలని కోరారు.

ఇక సిద్దిపేట పట్టణంలో 7.50 కోట్ల తో నిర్మించిన ముదిరాజ్ కన్వేన్షన్ సెంటర్ ను కూడా మంత్రి హరీశ్​ రావు ప్రారంభించారు. మరో రూ. 50 లక్షలు పనులను పూర్తి చేసేందుకు కేటాయిస్తానన్నారు. కాగా 18 సంవత్సరాలు నిండిన ప్రతీ ముదిరాజ్ బిడ్డకు సొసైటీల్లో సభ్యత్వం కల్పించినట్టు తెలిపారు. అంతేగాకుండా రాష్ట్రంలో కొత్తగా రెండు వేల సొసైటీల ను ఏర్పాటు చేసి 2 లక్షల మందికి కొత్తగా సభ్యత్వాలు ఇస్తామని హరీశ్ రావు హామీ ఇచ్చారు.

సింగరేణి (Singareni) ఎన్నికల నిర్వహణ పై సర్వత్రా ఉత్కంఠ నెలకొంది. ఎన్నికలను వాయిదా వేయాలంటూ యాజమాన్యం హైకోర్టు ఫుల్‌బెంచ్‌ను ఆశ్రయించడంతో వాదనలు విన్న న్యాయస్థానం విచారణను ఈ నెల 11వ తేదీకి వాయిదా వేసింది.

గత నెల 27న విడుదలైన షెడ్యూల్ ప్రకారం ఈ నెల 6,7 వ తేదీల్లో నామినేషషన్లు స్వీకరించాల్సి ఉంది. 9వ తేదీ నాటికి నామినేషన్ల ఉపసంహరణకు గడువు విధించగా, 10న పోటీలో ఉండే అభ్యర్థులకు గుర్తులను కేటాయించవలసి ఉంది. కాగా 28న ఉదయం 7 నుంచి సాయంత్రం 5 గంటల వరకు పోలింగ్‌ నిర్వహించాలనుకున్న సమయంలో సంస్థ తరపున సుప్రీంకోర్టు న్యాయవాది అరవింద్‌ సూద్‌ ఎన్నికలు వాయిదా వేయాలని వాదనలు వినిపించారు.

రాష్ట్ర ప్రభుత్వ ఉద్యోగులంతా శాసనసభ ఎన్నికల విధుల్లో తలమునకలయ్యారని, ఈ పరిస్థితుల్లో అక్టోబర్‌ నాటికి ఎన్నికలను నిర్వహించడం కష్టమని, అదీగాక సింగరేణి ప్రాంతం మావోయిస్టుల ప్రభావిత ప్రాంతం కాబట్టి శాంతిభద్రతల సమస్యలు ఉత్పన్నం అయ్యే అవకాశం ఉందని వివరించారు. ఇదే సమయంలో ఎన్నికల సంఘం నియమావళి ప్రకారం నామినేషన్లు సమర్పించాలని కార్మిక సంఘాలకు మెయిల్స్ పంపింది కేంద్ర కార్మిక శాఖ.

ఈ క్రమంలో ఏఐటీయూసీ, (AITUC), బీఎంఎస్‌ (BMS), హెచ్ఎంఏస్(HMS), ఐఎఫ్ టీయు (IFTU) కార్మిక సంఘాలు షెడ్యూల్‌ ప్రకారం ఎన్నికల ప్రక్రియ కొనసాగుతోందని, కోర్టు తీర్పును అనుసరించి తర్వాత ప్రక్రియ ఉంటుందని, తాము నామినేషన్లు దాఖలు చేస్తామని చెబుతున్నారు.

ముఖ్యమంత్రి అల్పాహార పథకం తెలంగాణ (Telangana) రాష్ట్ర వ్యాప్తంగా ఘనంగా ప్రారంభమైంది. ప్రభుత్వ పాఠశాల్లో (Govt Schools), మంత్రులు, ఎమ్మెల్యేలు (MLA), స్థానిక ప్రజా ప్రతినిధులు ఈ కార్యక్రమాన్ని ప్రారంభించారు. విద్యార్థులకు వడ్డించే అల్పాహారాన్ని పరిశీలించిన మంత్రులు వారికి స్వయంగా వడ్డించారు.

రాష్ట్ర వ్యాప్తంగా విద్యావ్యవస్థ బలోపేతానికి చర్యలు చేపట్టిన ప్రభుత్వం కొత్తగా గురుకుల పాఠశాలలు, కాలేజీలు ఏర్పాటు చేసింది. సుమారు రూ.7000 కోట్లతో మన ఊరు మనబడి ద్వారా మౌలిక సదుపాయాలు కల్పిస్తోంది. ఇప్పటికే తెలంగాణ ప్రభుత్వం మధ్యాహ్నం భోజనం ద్వారా చిన్నారుల కడుపు నింపుతున్న విషయం తెలిసిందే. తాజాగా ఈ అల్పాహార పథకానికి శ్రీకారం చుట్టింది కేసీఆర్‌ (KCR), ప్రభుత్వం.

ఈ పథకం ద్వారా రాష్ట్ర వ్యాప్తంగా సుమారు 23 లక్షల మంది విద్యార్థులకు అల్పాహారం అందనుందని అధికారులు అంటున్నారు. ఇకపోతే రంగారెడ్డి జిల్లా ర్యావిలాల పాఠశాలలో మంత్రి హరీశ్‌రావుతో కలిసి సబితా ఇంద్రారెడ్డి ఈ పథకాన్ని ప్రారంభించారు. మరోవైపు వెస్ట్​మారేడ్​పల్లిలో బ్రేక్​ఫాస్ట్ స్కీమ్ ప్రారంభించిన మంత్రి కేటీఆర్ విద్యార్థులతో కలిసి టిఫిన్ చేశారు.

ఈ పథకం దసరా సెలవుల తర్వాత పూర్తిస్థాయిలో అందుబాటులోకి తీసుకొస్తామని తెలంగాణ ప్రభుత్వం తెలిపింది. ఇకపోతే అల్పాహారం పథకంలో ఎలాంటి ఇబ్బందులు ఏర్పడకుండా పట్టణ ప్రాంతాల్లో పర్యవేక్షణ బాధ్యతలను మున్సిపల్‌ కమిషనర్లకు, గ్రామీణ ప్రాంతాల్లో జిల్లా అదనపు కలెక్టర్లకు అప్పగించింది ప్రభుత్వం.

అల్పాహారంలో ఉన్న మేను పరిశీలిస్తే సోమవారం ఇడ్లీ సాంబరు లేదా గోధుమరవ్వ, మంగళవారం పూరి, ఆలు కుర్మ లేదా టామటా బాత్, బుధవారం ఉప్మా సాంబారు లేదా బియ్యం కిచిడి, గురువారం చిరు ధాన్యాలతో చేసే ఇడ్లీ సాంబరు లేదా పొంగల్ సాంబరు, శుక్రవారం ఉగ్గాని లేదా చిరు ధాన్యాల ఇడ్లీ, శనివారం పొంగల్ సాంబరు లేదా కూరగాయలతో చేసిన పులావ్ అందించేలా ప్లాన్ చేసినట్టుగా అధికారులు వెల్లడించారు.

అసెంబ్లీ ఎన్నికలకు సమయం దగ్గర పడుతుండటంతో తెలంగాణ(Telangana) సీఎం కేసీఆర్‌(CM KCR) అసంతృప్తులు, ఆశావహుల పై దృష్టి సారించారు. ఈ ఎన్నికల్లో పోరు పోటాపోటీగా ఉంటున్న నేపధ్యంలో ఆయా సామాజిక వర్గాలను ప్రసన్నం చేసుకునే ప్రయత్నం మొదలు పెట్టారు. ఇందులో భాగంగా మూడు కార్పొరేషన్లకు ఛైర్మన్లను నియమిస్తూ గురువారం ఉత్తర్వులు జారీ చేసారు.

తెలంగాణ రాష్ట్ర ఆర్థిక సంఘం చైర్మన్‌గా మాజీ ఎమ్మెల్సీ (MLC) వీ భూపాల్‌రెడ్డిని నియమించగా డైరెక్టర్లుగా గోసుల శ్రీనివాస్ యాదవ్, మహ్మద్ సలీం పదవులు దక్కించుకొన్నారు. అలాగే తెలంగాణ స్టేట్ ట్రేడ్ ప్రమోషన్ కార్పొరేషన్ చైర్మన్‌గా మటం బిక్షపతిని, తెలంగాణ రాష్ట్ర పారిశ్రామిక అభివృద్ధి సంస్థ చైర్మన్‌గా మహ్మద్ తన్వీర్ నియమితులయ్యారు.

ఈ మేరకు తెలంగాణ ప్రభుత్వం ఉత్తర్వులు జారీ చేసింది. ఆయా కార్పొరేషన్‌ పదవులకు ఎంపికైన వారు రెండేళ్ల పాటు పదవిలో కొనసాగనున్నారు. ఇకపోతే ఆర్టీసీ (RTC) ఛైర్మన్‌గా జనగామ ఎమ్మెల్యే ముత్తిరెడ్డి యాదగిరిరెడ్డి, రైతుబంధు సమితి ఛైర్మన్‌గా స్టేషన్‌ఘన్‌పూర్‌ ఎమ్మెల్యే తాటికొండ రాజయ్య, ఎంబీసీ (MBC) ఛైర్మన్‌గా నందికంటి శ్రీధర్‌, మిషన్‌ భగీరథ వైస్‌ఛైర్మన్‌గా ఉప్పల వెంకటేశ్‌గుప్తా నియమితులయ్యారు.

పదవులు రాకుంటే భారాస వీడాలనే ఆలోచనలో ఉన్న అభ్యర్థులను మచ్చిక చేసుకొనేందుకే ముఖ్యమంత్రి కేసీఆర్‌ ఈ నిర్ణయాలు తీసుకున్నట్టు తెలుస్తోంది.