ధర్మవీరులు

మనదేశంలో స్వాతంత్య్రానికి ముందు ఆ తర్వాత ఎన్నో ఉద్యమాలు (MOVEMENTS) జరిగాయి. మనల్ని 200 ఏళ్ల పాటు పాలించిన బ్రిటీష్ వారు మన దేశంలో వర్తకం కోసం వచ్చి.. ఆ తర్వాత డివైడ్ అండ్ రూల్ తీసుకొచ్చారు.కులం, మతం పేరుతో మనుషుల మధ్య వైషమ్యాలు సృష్టించి తమలో తామే కొట్టుకునేలా చేసి అప్పుడు నెమ్మదిగా రాజ్యాధికారం చేయడం మొదలెట్టారు. అలా దేశం మొత్తం వారి పాలన అమలయ్యేలా చేశారు. ఆ తర్వాత రాజ్యాలు, సంస్థానాలకు ఆక్రమించుకుని, వారి సామంతులుగా మార్చేశారు. పన్నుల పేరుతో శ్రమదోపిడీ, వెట్టిచాకిరీ చేయించేవారు.

వ్యాపారం కోసం వచ్చి భారతీయులను దోపిడీ చేస్తున్న బ్రిటీష్ వారి నిరంకుశత్వాన్ని సహించని ఓ వ్యక్తి ఆదివాసీల సాయంతో ఒక పెద్ద ఉద్యమాన్నే నడిపి తెల్లవారి గుండెల్లో రైళ్లు పరిగెత్తించాడు.ఆయనే మోతీలాల్ తేజావత్ (MOTILAL TEJAVATH).. అతనొక విప్లవ శక్తిగా మారాడు. అనతికాలంలోనే పెద్ద సైన్యాన్ని తయారు చేశాడు. అది సహించని బ్రిటీష్ వాళ్లు సృష్టించిన మారణహోమంలో మోతీలాల్ సహా ఏకంగా 3వేలకు పైగా ఆదివాసీలు అమరులయ్యారు.ఈ మారణహోమానికి సంబంధించిన గుర్తులను మన చరిత్ర పుటల్లో లేకుండా చేశారు ఆనాటి పాలకులు.ఈ ఘటన గురించి తెలిసిన వారు కూడా పెద్దగా ప్రశ్నించకుండా మిన్నకుండిపోయారు. అయితే, 73వ గణతంత్ర దినోత్సవం 2022లో వందేళ్లు పూర్తయిన సందర్భంగా ‘పల్చిటారియా మారణకాండ’పై గుజరాత్ టాబ్లాయిడ్ ఓ వ్యాసం ప్రచురించింది. అందులో ఏముందంటే..

మోతీలాల్ తేజావత్ 1886లో రాజస్థాన్‌లోని కొలియారిలో జన్మించాడు. అప్పట్లోనే 5వ తరగతి వరకు చదువుకున్న మోతీలాల్.. ఝదోల్ తహసీల్‌లో పనిచేశాడు. ఆ కాలంలోనే బ్రిటిష్ వారు ప్రజల నుంచి అధికంగా ట్యాక్సులు కలెక్ట్ చేయడాన్ని చూసి తన పదవికి రాజీనామా చేశారు. అప్పటికే ఊపిరిపోసుకుంటున్న ‘బిజోలియా’(BIJOLIA MOVEMENT) ఉద్యమం మోతీలాల్‌పై ప్రభావం చూపింది. దీంతో ఆ ఉద్యమానికి మద్దతుగా కరపత్రాలను పంపిణీ చేయడం మోతీలాల్ ప్రారంభించాడు.

బ్రిటీష్ వారు రైతులు, ప్రజల నుంచి అన్యాయంగా పన్నులు వసూలు చేయడాన్ని అందరికీ వివరిస్తూ వారిలో చైతన్యం కలిగించాడు. ముఖ్యంగా ఆదివాసీల అణచివేతకు వ్యతిరేకంగా నిలబడ్డాడు.దీంతో ఆదివాసీలంతా మోతీవాల్ వెనుక నిలబడ్డారు. ఏకి పేరుతో ప్రారంభమైన ఉద్యమం తీవ్రరూపం దాలుస్తుందని తెలుసుకున్న బ్రిటీషర్స్..1922 మార్చి 07న మేజర్ హెచ్‌‌‌‌జీ సుట్టన్ నేతృత్వంలోని బలగాలు మోతీలాల్ తేజావత్ ఉన్న పల్చిటారియా గ్రామంలో (ప్రస్తుతం సబర్‌కాంత జిల్లా దధ్వావ్ విలేజ్‌గా పేరు మార్చబడింది) గుమిగూడిన ఆదివాసీలపై విచక్షణారహితంగా కాల్పులు జరిపారు. ఈ ఘటనలో 1200 మంది మరణించారు.

సరిగ్గా నెల తర్వాత 08 మే 1922న భులా, బలోహియా గ్రామాలను మరోసారి చుట్టిముట్టిన బ్రిటీష్ బలగాలు అక్కడ ఉన్న ఇళ్ళకు నిప్పంటించాయి. బయటకు పరుగులు తీసిన జనాలపై విచక్షణారహితంగా కాల్పులు జరిపాయి.ఈ మారణకాండలో 1800 మంది అమాయక ఆదివాసీలు మరణించారు. 640ఇళ్ళు దగ్ధమయ్యాయి. ఈ రెండు మారణహోమాలతో మోతీలాల్ తేజావత్ ప్రారంభించిన ‘ఏకీ’ ఉద్యమానికి (EKI MOVEMENT) తెరపడింది.

అయితే, మోతీలాల్ మరణానికి ముందు మహత్మా గాంధీ(MAHATMA GANDHI) మాట్లాడిన మాటలు యంగ్ ఇండియాలో ఒక వ్యాసం రూపంలో వచ్చింది. అందులో గాంధీ ఏమన్నారంటే..
‘ఉదయ్‌పూర్‌కు చెందిన మోతీలాల్ పంచోలీ అనే వ్యక్తి నా శిష్యుడిగా చెప్పుకుంటున్నట్లు తెలిసింది. అతను రాజపుతానా రాష్ట్రాల్లోని గ్రామీణ ప్రాంతాల్లో లేని సంయమనం గురించి బోధిస్తాడని నేను వింటున్నాను. అతని చుట్టూ ఆయుధాలతో కూడిన గుంపు ఉన్నదని విన్నాను. వారితో కలిసి అతనో ఒక రాజ్యాన్ని స్థాపించినట్లు తెలిసింది.అతని అభిమానులు విధ్వంసక పనులు చేసినట్లు విన్నాను. నాకు ఇలాంటి శిష్యులు లేరని ప్రజలు అర్థం చేసుకుంటారని అనుకుంటున్నాను’ భారతీయప్రజలకు మెసేజ్ ఇచ్చినట్లు తెలిసింది.

మనదేశంలో బ్రిటీష్ వారు సృష్టించిన మారణహోమాల్లో ‘జలియన్‌వాలా బాగ్’ కంటే భయంకరమైన ఈ ఊచకోత గురించి గుజరాత్ లేదా రాజస్థాన్ చరిత్రపుటల్లో రికార్డులు లేవు. అయితే, గుజరాత్ సీఎంగా ఉన్న టైంలో ప్రస్తుత ప్రధాని మోడీ(PM MODI) ఈ మారణకాండను వెలుగులోకి తీసుకొచ్చారు. ఈ క్రమంలోనే ‘సబర్‌కాంత’ ఈ భయానక ఊచకోత జరిగిన ప్రదేశంలోనే ‘మోతీలాల్ తేజావత్’ స్మారక చిహ్నాన్ని గుజరాత్ ప్రభుత్వం నిర్మించింది. ప్రస్తుతం ఆ ప్రాంతాన్ని ‘వీరభూమి’ అని పిలుస్తున్నారు.

చిన్నతనంలో మనందరం భారతదేశ చరిత్ర చదువుకునే ఉంటాం. అందులో ఎక్కడ చూసినా మొగలుల చరిత్ర, విదేశీ చొరబాటు దారుల గొప్పతనం మనకు ఎక్కువగా కనిపిస్తుంటుంది. అక్బర్, బాబర్, ఘజినీ, టిప్పు సుల్తాన్, అలెగ్జాండర్ ఇలాంటి వ్యక్తుల వీరత్వాలతో మన చరిత్రను నింపేశారు. నిజానికి వీరంతా భారతీయులు కాదు.విదేశాల నుంచి భారత భూమిపై అడుగుపెట్టి ఇక్కడి అసలు సిసలైన సంపదను, సంప్రదాయాలు, సంస్కృతి, వారసత్వ కట్టడాలను, వేల ఆలయాలను ధ్వంసం చేసిన క్రూరులు. భవిష్యత్ తరాలకు మన పురాతన మార్గదర్శకుల మూలాలను లేకుండా చేసిన వారు. కానీ మన పాలకులు అసలైన చరిత్రను కాలరాసి వీరు చేసిన విధ్వంసాన్ని మన చరిత్ర పుటల్లో నింపేసింది.

ఫలితంగా నేటితరం పిల్లలకు ఆలయాలు, వాటి వెనుక దాగి ఉన్న సైన్స్, మన సంస్కృతి, భారతదేశ మార్గదర్శకులు మనకు ఏం చెప్పారో వాటి గురించి తెలుసుకోలేకపోతున్నారు. ఎంతసేపు విదేశీయుల గొప్పతనాన్ని పొగుడుతూ వారికి బానిసత్వం చేస్తుంటారు. అయోధ్యలో రామాలయాన్ని కూల్చిన 500 సంవత్సరాల తర్వాత ప్రస్తుతం మళ్లీ అక్కడ 2023 జనవరిలో రాముడి జన్మస్థలంలో కొత్త రామాలయం నిర్మించి ప్రారంభించారు. నేటితరం వారికి అది కేవలం ఆలయంగానే కనిపిస్తుంది. కానీ, ఆలయం కూల్చినప్పటి నుంచి అక్కడ కొత్త మందిరం నిర్మాణానికి ఎందుకు 500 ఏళ్లు పట్టింది. ఎంత మంది దానికోసం ప్రాణాలు అర్పించారు అనేది నేటితరానికి పెద్దగా తెలియకపోవచ్చు.

అయోధ్యలో రామాలయం విధ్వంసానికి గురైనట్లే యూపీలోని కాశీలో విశ్వనాథ్ మందిరం కూడా ఒకటి కాదు రెండు కాదు ఏకంగా 3 సార్లు విధ్వంసానికి గురైంది. మన చరిత్రలో గొప్పగా చెప్పుకొచ్చిన మొగలులు, సుల్తానులే దానికి కారణం. ఇక్కడి సంపదను దోచుకుని పోవడంతో పాటు వేల సంఖ్యలో ఆలయాలను కూల్చి అందులోని విలువైన సంపదను కొల్లగొట్టారు. అయితే, కాశీవిశ్వనాథ్ ఆలయాన్ని సంరక్షించుకోవడానికి సనాతన ధర్మాన్ని పాటించే 40వేల మంది నాగసాధువులు చేతుల్లో ఎలాంటి ఫిరంగులు, తుపాకులు, కత్తులు లేకుండా మొగల్ సైనాన్ని మట్టికరిపించారని ఎవరైనా తెలుసా? తెలీదు.. ఎందుకంటే చరిత్రలో వీరికంటూ ఒక పేజీ లేకుండా చేసేసారు ఆనాటి పాలకులు. (1664 నుంచి 1669) మధ్యకాలంలో కాశీ మందిరం మూడు సార్లు విధ్వంసానికి గురైంది.

అప్పట్లో మనదేశానికి వలసొచ్చిన చొరబాటు దారులు ముందుగా ఇక్కడి సంపదపై, ఆలయాలపై విధ్వంసంపై కన్నేశారు. ఈక్రమంలోనే క్రీ.శ.1194లో మొహమ్మద్ ఘోరీ జనరల్ అయిన కుతుబ్ ఉద్దీన్ ఐబాక్ తొలిసారి కాశీ మందిరాన్ని కూల్చాడు.అనంతరం ఆలయాన్ని మళ్లీ పునర్మించాక జౌన్‌పూర్ సుల్తాన్, సికందర్ లోధి టర్కీ పాలకులు మళ్లీ నాశనం చేశారు. కాగా, 1500సంవత్సరం చివరలో రాజా తోడర్ మల్ కాశీ ఆలయాన్ని మరల పునరుద్ధరించారు.

అనంతరం క్రూరుడైన ఔరంగజేబు 1664లో ఆలయాన్ని విధ్వంసం చేశాడు. ఆ సమయంలో మహానిర్వాణి అఖారాకు చెందిన నాగ సాధువులు ఔరంగజేబు సైనాన్ని దీటుగా ఎదుర్కొని వారిని ఓడించారు. మళ్లీ 1669లో మొఘల్ సైన్యం రెండోసారి దండయాత్ర చేసింది. ఈసారి 40 వేల మంది నాగసాధువులు తమ ప్రాణాలను అర్పించి ఆలయ పవిత్రతను కాపాడారు. కానీ ఆలయంలో సగభాగాన్ని ఆక్రమించారు.

1780లో ప్రస్తుతం పూజలు అందుకుంటున్న కాశీ విశ్వనాథ్ మందిరాన్ని అహల్యాబాయి హోల్కర్ నిర్మించారు. ఇది నేటికీ మసీదు ఉన్న అసలు కాశీ విశ్వనాథ ఆలయం పక్కనే ఉంది. కాశీ ఆలయ అసలైన స్థలాన్ని తిరిగి స్వాధీనం చేసుకునేందుకు ప్రస్తుతం న్యాయపోరాటం జరుగుతోంది. ఒకవేళ ఆ స్థలం కాశీ మందిరానికి చెందుతుందని కోర్టు తీర్పు ఇస్తే ఆనాడు మందిరం కోసం ప్రాణాలు అర్పించిన 40వేల మంది నాగసాధువులకు నిజమైన నివాళి అర్పించినట్లు అవుతుంది. అయితే, క్రూరులైన మొగల్ సైన్యంతో త్రిశూలం, కర్రలు, శంఖంలతో పోరాడిన నిజమైన వీరులకు మన చరిత్రలో ఒక పేజీ అంటూ లేకపోవడం నేటితరం ఆలోచించాల్సిన విషయం. దేశానికి స్వాతంత్రం వచ్చాక కొత్తగా ఏర్పాటైన ప్రభుత్వంలోని మన పాలకులే అసలైన చరిత్రను భవిష్యత్ తరాలకు అందకుండా చేశారంటే వారి ఆలోచన విధానం, విదేశీ దుష్టశక్తుల మీద వారికున్న గౌరవాన్ని బట్టి ఇట్టే అర్థం అయిపోతుంది వారు దేశాన్ని ప్రేమించే వారా? లేక విధ్వంసం చేసేవారా? అని.. దీనిపై నేటితరం, భవిష్యత్ తరాల వారు ప్రశ్నించాల్సిన అవసరం ఎంతైనా ఉంది.

అబాదీ భానో బేగం (Abadi Bano Begum) … భారత స్వతంత్ర్య ఉద్యమంలో చురుగ్గా పాల్గొన్న ముస్లిం మహిళ. ఖిలాఫత్ ఉద్యమాన్ని ప్రారంభించిన అలీ సోదరుల (Ali Borthers)ల మాతృమూర్తి. బురఖా ధరించి రాజకీయ సమావేశంలో ప్రసంగించిన తొలి మహిళ ఆమె. స్వతంత్ర్య ఉద్యమంలో మహిళల మద్దతు కోసం మహాత్మ గాంధీ ఆమె సహాయాన్ని కోరారంటే ఆమె నాయకత్వం గురించి ప్రత్యేకం చెప్పాల్సిన పనిలేదు.

1850లో యూపీలో అబాదీ భానో బేగం జన్మించారు. రాంపూర్ సంస్థానంలోని సీనియర్ అధికారిగా ఉన్న అబ్దుల్ అలీఖాన్ ను వివాహం చేసుకున్నారు. వారికి ఆరుగురు సంతానం. ఆమె కుమారుల్లో మౌలానా షౌకత్ అలీ, మౌలానా మహమ్మద్ అలీ జవహర్‌లు చరిత్రలో అలీ సోదరులుగా ప్రసిద్ది చెందారు. అలీ సోదరులిద్దరూ కలిసి బ్రిటీష్ వారికి వ్యతిరేకంగా ఖిలాఫత్ ఉద్యమాన్ని ప్రారంభించారు.

చిన్నతనంలోనే భర్తను కోల్పోయినప్పటికీ కష్టపడి పని చేసి తన పిల్లలకు మంచి విద్యను అందించారు. 1917లో బ్రిటీష్ వ్యతిరేక కార్యకలాపాలకు పాల్పడి జైలు శిక్ష అనుభవిస్తున్న అలీ బ్రదర్స్ ను విడుదల చేయాలని కోరుతూ ఆమె నిరసన ప్రదర్శనలో పాల్గొన్నారు. ఆ సమయంలోనే అబాదీ భానో బేగంతో గాంధీ సమావేశమై స్వాతంత్య్ర ఉద్యమానికి మహిళల మద్దతును కోరేందుకు ఆమె సహాయాన్ని కోరారు. ఆ సమయంలో ఆమెను తన తల్లి అని సంబోధించాడు.

కోల్‌కతాలో జరిగిన భారత జాతీయ కాంగ్రెస్, ఆల్ ఇండియా ముస్లిం లీగ్ సమావేశాల సందర్భంగా ఆమె ప్రసంగిస్తూ… అన్ని మతాలకు చెందిన భారతీయులు ఐక్యంగా ఉంటేనే సంపూర్ణ స్వాతంత్ర్యం లభిస్తుందన్నారు.. అనేక సమావేశాలలో, ఆమె తన దేశంలోని కుక్కలు మరియు పిల్లులు కూడా బ్రిటిష్ వారి బానిసత్వంలో ఉండకూడదనేది తన ఆశయమని బహిరంగంగా ప్రకటించేవారు.

1924లో ఆమె మరణించారు. ఆమె మరణించిన అరవై ఆరు సంవత్సరాల తరువాత పాకిస్తాన్ ఆమె గౌరవార్థం స్మారక పోస్టల్ స్టాంపును విడుదల చేసింది. 28 సెప్టెంబర్ 2012న న్యూ ఢిల్లీలోని జామియా మిలియా ఇస్లామియా ఇన్‌స్టిట్యూట్‌లో అబాదీ బానో బేగం జ్ఞాపకార్థం ఒక బాలిక హాస్టల్‌కు ఆమె పేరు పెట్టారు.

రాజా వెంకటప్ప నాయక…. షోరాపూర్ వంశానికి చెందిన గొప్ప పాలకుడు. బ్రిటిష్ ఈస్ట్ ఇండియా కంపెనీ సార్వభౌమత్వాన్ని అంగీకరించేందుకు నిరాకరించిన గొప్ప అభిమాన ధనుడు. బ్రిటీష్ సేనలపై వీరోచితంగా పోరాటం చేసిన గొప్ప యోధుడు. తనకు మరణశిక్ష విధించాలంటే ఓ నేరస్థుడిలా ఉరితీయకూడదని, ఓ వీరున్ని చంపినట్టుగా ఫిరంగితో కాల్చి చంపాలని కోరిన గొప్ప వీరుడు.

1858లో నేటి కర్ణాటకలోని యాద్గిరి జిల్లాలోని షోరాపూర్ గ్రామంలో జన్మించారు. ఈ జిల్లాను వాల్మీకి నాయక వంశానికి చెందిన పాలకులు పరిపాలిస్తు ఉండే వారు. వెంకటప్ప నాయక చిన్నతనంలోనే ఆయన తండ్రి మరణించారు. వెంకటప్ప నాయక్ మైనర్ కావడంతో ఆ జిల్లాకు పిలిప్ మీడోస్ టేలర్ అనే వ్యక్తిని రెసిడెంట్ అధికారిగా బ్రిటీష్ ప్రభుత్వం నియమించింది.

టేలర్ ను వెంకటప్పయ్య ప్రేమగా అప్పా అని పిలిచేవారు. విద్యాభ్యాసం పూర్తయిన తర్వాత రాజ్య పాలన చేపట్టారు. ప్రతి విషయంలో జోక్యం చేసుకోవడం చూసి ఆయన విసుగు చెందారు. దీంతో వారి అధికారాన్ని వెంకటప్పయ్య తిరస్కరించారు. డిసెంబర్ 1857లో నానా సాహెబ్ వద్దకు తన ఏజెంట్ ను వెంకటప్పయ్య పంపించారు. విషయం తెలుసుకున్న బ్రిటీష్ ప్రభుత్వం సురాపూర్ గ్రామానికి క్యాంప్ బెల్ అనే అధికారిని పంపింది.

కానీ మార్గ మధ్యలోనే క్యాంప్ బెల్ సేనలపై వెంకటప్పయ్య దళాలు దాడి చేసి ఊచకోత కోశాయి. దీంతో పెద్ద ఎత్తున బ్రిటీష్ సైన్యం షోరాపూర్ పై దాడి చేయగా వెంకటప్పయ్య హైదరాబాద్ కు వెళ్లిపోయారు. అక్కడ సాలార్ జంగ్ ఆయన్ని బ్రిటీష్ ప్రభుత్వానికి పట్టించారు. దీంతో ఆయనకు జీవిత శిక్షవిధించగా టేలర్ అభ్యర్థన మేరకు ఆ శిక్షను నాలుగేండ్లకు తగ్గించారు.

అతన్ని కర్నూలు కోటకు తీసుకువెళ్తుండగా తెల్లవారుజామున తన సాయుధ గార్డు దగ్గర తుపాకీ తీసుకుని తనను కాల్చుకుని మరణించారు. ఆయన మరణంపై భిన్నాభిప్రాయాలు ఉన్నాయి. ఆయన్ని బ్రిటిష్ అధికారి ఒకరు వెనుక నుండి కత్తితో పొడిచి చంపారని…. హైదరాబాద్‌లోని అంబర్‌పేట సమీపంలో ఆయన మృత దేహాన్ని పాతిపెట్టారని చెబుతారు.

భట్‌కేశ్వర్ దత్ (Batukeshwar Dutt)…..భగత్‌సింగ్ (Bhagat Singh)తో కలిసి కేంద్ర శాసన సభపై బాంబు విసిరిన విప్లవ వీరుడు. జైళ్లో ఉంటూనే మానవ హక్కుల రక్షణ కోసం పోరాడిన గొప్ప నేత. ఖైదీలకు మెరుగైన సౌకర్యాలు కల్పించాలంటూ భగత్ సింగ్‌తో కలిసి 114 రోజుల నిరాహార దీక్ష చేసిన గొప్ప పోరాట యోధుడు. ఓ వైపు టీబీతో బాధపడుతూనే క్విట్ ఇండియా ఉద్యమంలో పాల్గొన్న స్వతంత్ర్య సమరయోధుడు.

18 నవంబర్ 1910న బెంగాల్ ప్రెసిడెన్సీలోని ఖండఘోష్ గ్రామంలో జన్మించారు. థియోసాఫికల్ హైస్కూల్‌లో విద్యాభ్యాసం చేశారు. కాన్పూర్‌లోని పృథ్వీనాథ్ కళాశాల నుండి పట్టభద్రుడయ్యాడు. కాలేజీ రోజుల్లో భగత్ సింగ్‌తో ఆయనకు పరిచయం ఏర్పడింది. భగత్ సింగ్ నుంచి ప్రేరణ పొంది హిందుస్థాన్ సోషలిస్ట్ రిపబ్లికన్ అసోసియేషన్‌లో చేరాడు.

అప్పటి నుంచి విప్లవ కార్యక్రమాల్లో చురుగ్గా పాల్గొన్నాడు. 8 ఏప్రిల్ 1929న భగత్ సింగ్‌తో కేంద్ర శాసన సభపై బాంబుదాడి చేశాడు. అనంతరం వారిద్దరినీ బ్రిటీష్ అధికారులు అరెస్టు చేశారు. అక్కడ జైలులో ఖైదీలకు మెరుగైన సౌకర్యాలు కల్పించాలని భగత్ సింగ్‌తో కలిసి నిరాహార దీక్ష చేశారు. ఆ తర్వాత ఆయన్ని అండమాన్ జైలుకు పంపించారు. జైళ్లో ఉండగా ఆయన అనారోగ్యానికి గురయ్యాడు.

ఈ క్రమంలో ఆయన్ని పాట్నా జైలుకు తరలించారు. 1938లో జైలు నుంచి విడుదలై బయటకు వచ్చాడు. టీబీ వ్యాధి ఇబ్బంది పెడుతూ ఉన్నా క్విట్ ఇండియా ఉద్యమంలో పాల్గొన్నాడు. దీంతో ఆయన్ని అరెస్టు చేసి నాలుగేండ్ల జైలు శిక్ష విధించారు. స్వతంత్ర్య అనంతరం ఆయన విడుదలయ్యారు. 1965లో అనారోగ్యంతో ఆయన మరణించారు.

వల్లియప్పన్ ఒలగనాథన్ చిదంబరం పిళ్లై (V.O.Chidambaram Pillai)…. తమిళ్ హెల్మ్స్ మ్యాన్ (Helms Man)గా ప్రసిద్ది చెందిన గొప్ప స్వాతంత్ర్య సమరయోధుడు. దేశంలో స్వదేశీ స్టీమ్ నావిగేషన్ ను స్థాపించిన మొదటి వ్యక్తి. ట్యూటీకోరన్‌లో ముత్యపు పరిశ్రమలో పని చేసే కార్మికుల కోసం దీక్ష చేసిన గొప్ప నేత. దేశ ద్రోహం ఆరోపణలు ఎదుర్కొని జీవిత ఖైదు అనుభవించిన గొప్ప దేశ భక్తుడు.

5 సెప్టెంబర్ 1872న తమిళనాడు తిరున్యవేలీలోని ఒట్టపిడారంలో జన్మించారు. తల్లిదండ్రులు ఉలగనాథన్ పిళ్లై, పరమయి అమ్మాళ్. తండ్రి బాటలో పయనించి తాను బారిష్టర్ అయ్యాడు. న్యాయవాదిగా పేదల దగ్గర ఎలాంటి ఫీజు తీసుకోకుండా కేసులు వాదించేవారు. 1905లో వచ్చిన స్వదేశీ ఉద్యమానికి ఆకర్షితుడైన స్వాతంత్ర్య పోరాటంలో పాల్గొన్నాడు.

బాల గంగాధర తిలక్‌ను తన గురువుగా భావించాడు. భారత-శ్రీలంక జలాల్లో బ్రిటీష్ స్టీమ్ నావిగేషన్ కంపెనీ గుత్తాధిపత్యానికి చరమగీతం పాడాలనుకున్నారు. అనుకున్నట్టుగానే దేశంలో మొదటి స్వదేశీ స్టీమ్ నావిగేషన్ కంపెనీని స్థాపించారు. దీంతో ఆయనపై బ్రిటీష్ అధికారుల్లో ఆగ్రహం కట్టలు తెంచుకుంది. 27 ఫిబ్రవరి 1908న ట్యూటికోరిన్‌లోని బ్రిటిష్ యాజమాన్యంలోని కోరల్ మిల్స్‌లో కార్మికుల దుర్బర పరిస్థితులకు నిరసగా పిళ్లై దీక్ష చేశారు.

ఈ సందర్బంగా తీసిన ర్యాలీలో అల్లర్లు చెలరేగాయి. ఈ నేపథ్యంలో సిళ్లైతో పాటు ఆయన స్నేహితులను బ్రిటీష్ అధికారులు అరెస్టు చేశారు. అనంతరం ఆయనపై దేశ ద్రోహం కేసు నమోదు చేసి 20 ఏండ్ల దేశ బహిష్కరణ శిక్ష విధించారు. ఆ తర్వాత దాన్ని ఆరేండ్లకు తగ్గించారు. 1912లో ఆయన షిప్పింగ్ కంపెనీని బ్రిటీష్ వారు స్వాధీనం చేసుకున్నారు. ఈ క్రమంలో 18 నవంబర్ 1936న ట్యూటికోరిన్‌లోని భారత జాతీయ కాంగ్రెస్ కార్యాలయంలో మరణించారు.

షహీద్ ఫజల్-ఎ-హక్ ఖైరాబాదీ (SHAHEED FAZL -e- HAQ KHARABADI)….ఉర్దూ, పార్శీ సాహిత్యాల్లో గొప్ప పండితుడు. ఖాజా విభాగంలో ముఫ్తి (గా పని చేశారు. యుద్దంలో బ్రిటీష్ వారికి వ్యతిరేకంగా పోరాటం చేసేలా ప్రజల్లో తన ఉపన్యాసాలతో స్పూర్తి నింపిన గొప్ప నాయకుడు. యుద్దంలో బ్రిటీష్ వారికి వ్యతిరేకంగా జిహాద్ చేయాలని ఫత్వా (Fatwa)జారీ చేసి చివరకు మరణ శిక్ష అనుభవించిన దేశ భక్తుడు.

1796లో యూపీ సీతాపూర్‌లోని ఖైరాబాద్ లో జన్మించారు. తండ్రి సదర్-ఉల్-సదర్. మత పరమైన విషయాల్లో మొఘల్స్ కు సదర్ ఉల్ సదర్ సలహాదారునిగా పని చేశారు. 13 సంవత్సరాల వయస్సులోనే ఖైరాబాదీ ఉపాధ్యాయ వృత్తిని చేపట్టారు. 1828లో ఖాజా విభాగంలో ముఫ్తీగా నియమితుడయ్యారు. 1857 తిరుగుబాటు సమయంలో మొఘల్ చక్రవర్తి బహదూర్ షా జఫర్‌తో షహీద్ ఖైరాబాదీ అనేక సార్లు సమావేశాలు అయ్యారు.

జూన్ 26, 1857న జనరల్ బఖ్త్ ఖాన్ తన 14000 సైన్యంతో కలిసి బరేలీ నుండి ఢిల్లీకి చేరుకున్నారు. ఆ సమయంలో షహీద్ ఖైరాబాది శుక్రవారం గొప్ప ఉపన్యాసం ఇచ్చారు. వలస ప్రభుత్వానికి వ్యతిరేకంగా జిహాద్‌కు పిలుపునిస్తూ ఫత్వాను ఖైరాబాదీ జారీ చేశారు. ఢిల్లీని చుట్టు ముట్టిన బ్రిటీష్‌పై బలగాలపై యుద్దానికి ప్రజలను తన ఉపన్యాసాలతో ప్రేరేపించారు.

హింసను ప్రేరేపించారనే ఆరోపణలపై 30 జనవరి 1859న షహీద్ హక్ ను ఖైరాబాద్‌లో బ్రిటీష్ పోలీసులు అరెస్టు చేశారు. జిహాద్‌ కోసం ఫత్వా జారీ చేశారని, బ్రిటీష్ పై ప్రజలను తిరుగుబాటు వెనుకు ప్రధాన పాత్ర పోషించారని బ్రిటీష్ అధికారులు తేల్చారు. 8 అక్టోబర్ 1859న ఆయన్ని అండమాన్ జైలుకు తరలించారు. అక్కడ శిక్ష అనుభవిస్తూ 1861 మరణించారు.

కల్నల్ వీర్ నిజాముద్దీన్ (COLONEL VEER NIZAMUDDIN)…. బ్రిటీష్ సైన్యంలో పని చేస్తూ సైనికాధికారిని కాల్చి చంపిన భారతీయ సిపాయి. నేతాజీ సుభాష్ చంద్రబోసు (Netaji Subash Chandra Bose)కి అత్యంత నమ్మకస్తుడు. నేతాజీ దగ్గర డ్రైవర్, అంగరక్షకునిగా పని చేసిన వ్యక్తి. నేతాజీతో కలిసి బర్మా అడవుల్లో బ్రిటిష్ సైన్యానికి వ్యతిరేకంగా పోరాడిన గొప్ప వీరుడు. తన ప్రాణాన్ని సైతం లెక్క చేయకుండా నేతాజీని కాపాడిన గొప్ప దేశ భక్తుడు.

యూపీలోని అజమ్ ఘర్ ప్రాంతంలో సైఫుద్దీన్ జన్మించారు. బ్రిటీష్ సైన్యంలో చేరాలనే కోరికతో 20 ఏండ్ల వయసులోనే ఇంటి నుంచి పారిపోయారు. అనుకున్నట్టుగానే బ్రిటీష్ సైన్యంలో చేరారు. అక్కడ భారతీయ సైనికులను కించ పరుస్తూ బ్రిటీష్ సైనికాధికారి చేసిన వ్యాఖ్యలు సైఫుద్దిన్ చెవిన పడ్డాయి. దీంతో ఆ అధికారిని కాల్చి చంపి అక్కడి నుంచి సింగపూర్ పారి పోయారు.

ఆ తర్వాత నిజాముద్దీన్ గా పేరు మార్చుకుని అజాద్ హిందు ఫౌజ్‌లో చేరారు. అతి తక్కువ కాలంలోనే నేతాజీకి నమ్మిన బంటుగా మారారు. నేతాజీ కారు డ్రైవర్ గా పని చేస్తూ ఎప్పటికప్పుడు ఆయనకు అంగ రక్షకునిగా పని చేశారు. 1943-1944లో బర్మాలో నేతాజీతో కలిసి బ్రిటీష్ సైన్యానికి వ్యతిరేకంగా యుద్దం చేశారు. 1943లో ఓ సారి అడవిలో బ్రిటీష్ సైనికులు రహస్యంగా తుపాకీ గురి పెట్టి నేతాజీని కాల్చి చంపే ప్రయత్నం చేశారు.

ఈ విషయాన్ని గమనించిన నిజాముద్దీన్ వెంటనే నేతాజీ ప్రాణానికి తన ప్రాణం అడ్డు వేశాడు. ఆ సమయంలో నాలుగు బులెట్లు ఆయన ఛాతీలోకి దూసుకు పోయాయి. ఆ తర్వాత నిజాముద్దీన్ ను కాపాడి ఆయన శరీరంలోని బుల్లెట్లను కెప్టెన్ లక్ష్మీ సెహగల్ తొలగించారు. నిజాముద్దీన్ ధైర్యాన్ని, అంకిత భావాన్ని చూసి సంతోష పడిన నేతాజీ అప్పటి నుంచి నిజాముద్దీన్ ను తన వెంట తీసుకు వెళ్లేవారు. స్వతంత్ర్య అనంతరం 1969లో తన స్వగ్రామంలో ఆయన సెటిల్ అయ్యారు. 2017లో ఆయన మరణించారు.

షహీద్ జై దేవీ తోమర్ ((Shaheed Jai Devi Tomar)… వీర బాలిక శివ దేవీ తోమర్ (Shiva Devi Tomar) సోదరి. బ్రిటీష్ వాళ్లపై విరుచుకు పడిన శివ దేవీ ధైర్య సాహసాలను పునికి పుచ్చుకున్నా గొప్ప ధైర్యశాలి. సోదరి మరణానికి ప్రతీకారం తీర్చుకున్న సివంగి. 14 ఏండ్ల వయసులో బ్రిటీష్ అధికారిని మట్టు పెట్టిన పోరాట యోధురాలు.

17 మందిని ఊచ కోత కోసిన తర్వాత శివ దేవీ తోమర్ బ్రిటీష్ సైన్యం చేతిలో మరణించారు. సోదరి మరణ వార్త విని జై దేవీ ఆగ్రహంతో ఊగి పోయారు. తన సోదరి మరణానికి కారణమైన బ్రిటీష్ వాళ్లపై ప్రతీకారం తీర్చుకుంటానని ప్రతిజ్ఞ చేశారు.

ఈ మేరకు చుట్టు పక్కల గ్రామాల్లో ఉన్న యువకులను విప్లవ పోరాటం వైపు ప్రేరేపించి ఓ దళాన్ని ఏర్పాటు చేశారు. లక్నోకు వెళ్తున్న బ్రిటీష్ సైన్యం కదలికలపై నిఘా పెట్టారు. లక్నోలోని ఓ ప్రాంతానికి వెళ్లిన తర్వాత బ్రిటీష్ సైన్యం జై దేవీ దళాలకు కనిపించకుండా పోయింది. దీంతో ఆమె నేతృత్వంలోని దళాలు నిద్రాహారాలు మాని మరీ వెతికాయి.

ఈ క్రమంలో బ్రిటీష్ వాళ్ల సైన్యం కంట పడింది. వెంటనే ఓ ఆంగ్లేయ అధికారిని హత్య చేశారు జై దేవీ. ఆమెతో వచ్చిన దళాలు బ్రిటీష్ సైన్యంపై దాడికి దిగాయి. అక్కడి బంగ్లాకు నిప్పంటించాయి. చివరకు ఈ యుద్ధంలో జై దేవీ తోమర్ వీర మరణం పొందారు. స్కూల్ కు వెళ్తూ తల్లి దండ్రుల సంరక్షణలో ప్రశాంతంగా ఉండాల్సిన వయసులో కత్తి పట్టి బ్రిటీష్ వాళ్లకి ఎదురు తిరిగిన ఈ ఇద్దరు తోమర్ సోదరీమణుల ధైర్య సాహసాలు ఎందరికో స్ఫూర్తిని కలిగించాయి.

షహీద్ శివ దేవీ తోమర్ (Shaheed Shiv Devi Tomar)….బ్రిటీష్ దురాగతాలకు ఎదురు తిరిగిన వీర బాలిక. బ్రిటీష్ సైన్యంపై కత్తి దూసిన సివంగి. 16 ఏండ్ల వయసులోనే బ్రిటీష్ సేనల (British Army)ను ఊచకోత కోసిన వీర బాలిక. ఒంటి నిండ గాయాలతో రక్తం చిందుతున్నా బ్రిటీష్ దళాలపై విరుచుకు పడిన పోరాట యోధురాలు.

10 మే 1857న సిపాయిల తిరుగుబాటు ప్రారంభమైనప్పుడు యూపీలోని బిజ్రౌల్ నివాసి బాబా షహ్మల్ సింగ్ తోమర్ బరౌత్ తహసీల్‌‌ను ఆక్రమించాడు. బరౌత్ స్వాతంత్య్రానికి గుర్తుగా అక్కడ జెండా ఎగుర వేశాడు. అక్కడ ప్రభుత్వ ఖజానాను దోచుకుని ఆ ధనాన్ని ఢిల్లీ చివరి మొఘల్ చక్రవర్తి బహదూర్ షా జాఫర్‌కు బాబా షహ్మల్ సింగ్ పంపించాడు.

విషయం తెలుసుకున్న బ్రిటీష్ అధికారులు 18 జూలై 1857 న బాబా షహ్మల్ సింగ్‌ను కాల్చి వేశారు. ఆయనకు సహకరించిన వాళ్ల ఇండ్లను కూల్చి వేసి, 32 మంది జాట్ తిరుగుబాటుదారులను చెట్టుకు ఉరి తీసి చంపారు. ఈ ఘటనను కండ్లారా చూసిన పదహారేండ్ల శివ దేవీ తోమర్ రక్తం మరిగి పోయింది. బ్రిటీష్ సేనలపై దూకి తన కత్తితో 17 మంది బ్రిటీష్ సైనికులను ఊచకోత కోసింది.

ఈ పరిణామంతో భయాందోళనకు గురైన బ్రిటీష్ సైనికులు కొంత మంది పారిపోయారు. ఈ క్రమంలో తన గాయాలకు కట్టు కడుతుండగా బ్రిటీష్ సేనలు ఆమె పైకి మరోసారి దూసుకు వచ్చాయి. ఓ వైపు రక్తం ధారగా కారుతున్నా బ్రిటీష్ సేనలతో పోరాడింది. చివరకు వీర మరణం పొందింది. 16 ఏండ్ల బాలిక చూపిన సాహనం ఎంతో మందికి స్పూర్తిగా నిలిచింది.