Breaking News

ఇండియా కూటమి (INDIA Alliance) ప్రధాని అభ్యర్థిగా మల్లికార్జున ఖర్గేను ప్రకటించడంపై మిత్రపక్షం జేడీయూ నేత, సీఎం నితీశ్ కుమార్ (CM Nitish Kumar) అసంతృప్తిగా ఉన్నారంటూ వార్తలు గుప్పుమంటున్నాయి. తాజాగా ఆ వార్తలను సీఎం నితీశ్ కుమార్ తోసిపుచ్చారు. విపక్ష కూటమి ప్రధాని అభ్యర్థిగా ఖర్గేను ప్రకటించడంలో తనకు ఎలాంటి అభ్యంతరం లేదని వెల్లడించారు.

ఇండియా కూటమి, జేడీయూ కలిసే ఉన్నాయని తెలిపారు. 2024 లోక్ సభ సార్వత్రిక ఎన్నికల్లో ఇండియా కూటమితో కలిసి ముందుకు వెళ్తామని స్పష్టం చేశారు. ఇండియా కూటమిలో తీసుకున్న నిర్ణయంపై తనకు ఎలాంటి ఇబ్బంది లేదన్నారు. దివంగత ప్రధాని అటల్ బిహారీ వాజ్ పేయి జయంతి సందర్బంగా వాజ్ పేయికి నితీశ్ కుమార్ నివాళులు అర్పించారు.

అనంతరం నితీశ్ కుమార్ మాట్లాడుతూ….. తనకు పదవుల పట్ల ఎలాంటి ఆసక్తి లేదని చెప్పారు. తామంతా కలిసే పని చేస్తున్నామని అన్నారు. మీకు ఎవరిని కావాలంటే వాళ్లను ప్రధాని అభ్యర్థిగా ప్రకటించండని సమావేశంలో తాను చెప్పానన్నారు. సీట్ల సర్దుబాటు గురించి ముందు తేల్చాలని మాత్రమే సూచనలు చేశానన్నారు. సీట్ల సర్దుబాటు ఫార్ములాను త్వరలోనే ప్రకటిస్తామన్నారు.

ఇటీవల ఇండియా కూటమి నాల్గవ సమావేశం ఢిల్లీలో జరిగింది. ఈ సమావేశంలో విపక్ష కూటమి ప్రధాని అభ్యర్థిగా ఖర్గే పేరును విపక్షాలు ప్రకటించాయి. ఈ క్రమంలో నితీశ్ కుమార్ అసంతృప్తిగా ఉన్నారని వార్తలు వచ్చాయి. ఈ నేపథ్యంలో నితీశ్ కుమార్ కు కాంగ్రెస్ నేత రాహుల్ గాంధీ ఫోన్ చేసి బుజ్జగించారని పెద్ద ఎత్తున వార్తలు చెక్కర్లు కొట్టాయి.

బీజేపీ (BJP) డబుల్ ఇంజన్ సర్కార్ హయాంలో ఇండోర్ సమీపంలో వేల కోట్ల రూపాయల పెట్టుబడులు వచ్చాయని ప్రధాని మోడీ (PM Modi) అన్నారు. దీనివల్ల వేలాది మందికి ఉపాధి అవకాశాలు లభిస్తాయని మోడీ తెలిపారు. మధ్యప్రదేశ్‌ ఇండోర్ నగరంలో హుకుమ్‌చంద్ మిల్లు కార్మికులకు సంబంధించిన రూ. 224 కోట్ల బకాయిలను ప్రధాని మోడీ విడుదల చేశారు.

ఈ సందర్బంగా ‘మజ్దూరాన్ కా హిట్, మజ్దూరాన్ కో సమర్పిత్’ కార్యక్రమంలో కార్మికులను ఉద్దేశించి ప్రధాని వర్చువల్ గా ప్రసంగించారు. ఈ నిర్ణయంతో 4,800 మందికి పైగా కూలీలకు ప్రయోజనం కలుగుతుందన్నారు. దీర్ఘకాలికంగా పెండింగ్‌లో ఉన్న కార్మికుల సమస్యను పరిష్కరించినందుకు రాష్ట్ర ప్రభుత్వాన్ని ప్రధాని అభినందించారు.

ఈ గొప్ప కార్యక్రమంలో తాను కూడా భాగస్వామ్యం కావడం తన అదృష్టంగా భావిస్తున్నానని చెప్పారు. పేదలు, మహిళలు, రైతులు, యువత అనే నాలుగు కులాలు తమకు చాలా ముఖ్యమైనవని పేర్కొన్నారు. మాజీ ప్రధాని అటల్ బిహారీ వాజ్‌పేయి జయంతి సందర్భంగా సుపరిపాలన దినోత్సవం రోజు కార్మికుల ఆశీర్వాదం పొందడం “డబుల్ ఇంజన్” ప్రభుత్వానికి, రాష్ట్ర ప్రజలకు ప్రయోజనకరంగా ఉంటుందన్నారు.

1992లో ఇండోర్‌లోని హుకుమ్ చంద్ మిల్లు మూతపడింది. అప్పటి నుంచి మిల్లు కార్మికులు తమ రావాల్సిన బకాయిల గురించి కార్మికులు పోరాటం చేస్తున్నారు.
మధ్యప్రదేశ్ ప్రభుత్వం చొరవతో, రాష్ట్ర హౌసింగ్ & ఇన్‌ఫ్రాస్ట్రక్చర్ డెవలప్‌మెంట్ బోర్డ్, లేబర్ యూనియన్‌లు ఒక ఒప్పందాన్ని కుదుర్చుకున్నాయి. దాని ప్రకారం సెటిల్‌మెంట్ మొత్తాన్ని డిసెంబర్ 20న హైకోర్టులో జమ చేసినట్లు అధికారులు తెలిపారు.

పుణె ‘ఐసిస్’కేసులో ఎన్ఐఏ కీలక ఆధారాలను సేకరించింది. ఉత్తర రైల్వేకు చెందిన క్లర్క్ ఒకరు ఐసిస్‌కు నిధులు సమకూర్చినట్టు ఎన్ఐఏ (NIA) గుర్తించింది. సదరు ఉద్యోగి నకలి మెడికల్ బిల్లులు (Fake Medical Bills) క్లెయిమ్ చేసినట్టు ఎన్ఐఏ దర్యాప్తులో తేలింది. ఆ డబ్బులను ఉగ్రసంస్థకు నిధులు సమకూర్చాడని ఎన్ఐఏ వర్గాలు వెల్లడించాయి. ఈ క్రమంలో ఆ క్లర్క్ కోసం ఎన్ఐఏ వెతుకుతోంది.

వాంటెడ్ టెర్రరిస్టులు షానవాజ్ తో పాటు మరో ముగ్గురు ఐసిస్ ఉగ్రవాదులను ఢిల్లీ స్పెషల్ సెల్ పోలీసులు అరెస్టు చేశారు. ఉగ్రలింకుల నేపథ్యంలో ఎన్ఐఏ దర్యాప్తు ప్రారంభించింది. దీంతో క్లర్క్ బాగోతం బయటకు వచ్చింది. ఎన్ఐఏ విచారణలో ఉగ్రవాదులు కీలక విషయాలు వెల్లడించినట్టు తెలుస్తోంది. వాటి ఆధారంగా ఎన్ఐఏ దర్యాప్తును కొనసాగిస్తోందని సమాచారం. సదరు క్లర్క్ నోయిడా ప్రాంతానికి చెందిన వ్యక్తిగా తెలుస్తోంది.

నార్త్ రైల్వేలోని ఫైనాన్స్ విభాగంలో ఆయన పని చేస్తున్నట్టు ఎన్ఐఏ వర్గాలు చెబుతున్నాయి. ఆయన హిందూ మతం నుంచి ఇస్లాంలోకి మారినట్టు పేర్కొన్నాయి. ఈ ఏడాది అక్టోబర్ 2న ఢిల్లీ స్పెషల్ సెల్ పోలీసులు ముగ్గురు ఐఎసిస్ ఉగ్రవాదులను అరెస్టు చేసింది. వారిలో మహ్మద్ షానవాజ్ ఎన్ఐఏ మోస్ట్ వాంటెడ్ లిస్ట్‌లో ఉన్నాడు. విదేశాల్లోని ఐసిస్ సభ్యుల నుంచి వచ్చే సూచనల ఆధారంగా నార్త్ ఇండియాలో ఉగ్ర ఘటనలకు ప్లాన్ చేస్తున్నట్టు పోలీసులు వెల్లడించారు.

షానవాజ్‌పై ఎన్‌ఐఏ రూ.3 లక్షల రివార్డు ప్రకటించింది. షానవాజ్ ఢిల్లీ ప్రాంతానికి చెందిన వ్యక్తి అని ఢిల్లీ పోలీసు వర్గాలు చెప్పాయి. పూణే పోలీసుల కస్టడీ నుంచి షానవాజ్ తప్పించుకున్నాడని సమాచారం. జూలై 17-18 అర్ధరాత్రి పూణే పోలీసులకు షానవాజ్ పట్టుబడ్డాడు. పూణెలోని కోత్రుడ్ ప్రాంతంలో మోటార్ సైకిల్ దొంగిలించే ప్రయత్నంలో పోలీసులకు పట్టుబడ్డాడు.

దివంగత ప్రధాని అటల్ బిహారీ వాజ్ పేయి (Atal Bihar Vajpayee)కి పలువురు నివాళులు అర్పించారు. వాజ్‌పేయి 99వ జయంతి సందర్భంగా ఢిల్లీలోని ‘సదైవ్ అటల్’ మెమోరియల్ వద్ద వాజ్ పేయికి ప్రధాని నరేంద్ర మోడీ (PM Modi) పుష్పాంజలి ఘటించారు. మొదట రాష్ట్రపతి ద్రౌపది ముర్ము, ఉపరాష్ట్రపతి జగదీప్ ధన్ ఖడ్, కేంద్ర మంత్రులు అటల్ బిహారీ వాజ్ పేయి స్మారకానికి నివాళులర్పించారు.

అంతకు ముందు ప్రధాని మోడీ ట్వీట్ చేశారు. అటల్ జీ జయంతి సందర్భంగా ఈ దేశంలోని కుటుంబ సభ్యులందరి తరఫున తాను నివాళులర్పిస్తున్నానని చెప్పారు. దేశ నిర్మాణాన్ని వేగవంతం చేయడంలో తన జీవితాంతం వాజ్ పేయి కృషి చేశారని ఆయన సేవలను కొనియాడారు. అమృత్​కాల్ సమయంలో వాజ్‌పేయీ అంకితభావం, సేవ దేశానికి స్ఫూర్తిని కలిగిస్తాయన్నారు.

మరోవైపు స్వాతంత్ర్య సమర యోధుడు, విద్యావేత్త మదన్​మోహన్ మాలవీయ జయంతి సందర్భంగా మాలవీయాకు ప్రధాని మోడీ నివాళులర్పించారు. మాలవీయ సాటిలేని వ్యక్తిత్వం, పని దేశంలోని ప్రతి తరానికి స్ఫూర్తినిస్తుందని వెల్లడించారు. అంతకు ముందు యూపీ సీఎం యోగీ ఆదిత్య నాథ్ మాట్లాడుతూ…. సుస్థిర ప్రభుత్వాలు ఏ విధంగా ప్రయోజనకరంగా ఉంటాయో వాజ్‌పేయి ప్రధానిగా ఉన్న సమయంలో నిరూపించారని తెలిపారు.

ఆ సంప్రదాయం నేటికీ కొనసాగుతోందన్నారు. వాజ్ పేయికి బిహార్ సీఎం నితీశ్ కుమార్ పాట్నాలోని అటల్ పార్క్ వద్ద నివాళులర్పించారు. ఈరోజు దివంగత ప్రధాని, భారతరత్న అటల్‌ బిహారీ వాజ్‌పేయీ జయంతి అని అన్నారు. తాను ఎంపీగా పని చేసిన సమయం నుంచి తనకు తెలుసన్నారు. ఆయన ప్రభుత్వంలో తాను కేంద్ర మంత్రిగా పని చేశానన్నారు. అటల్​జీ తనను చాలా గౌరవించేవారన్నారు.

అటు గోవా సీఎం ప్రమోద్ సావంత్ కూడా పనాజీలో వాజ్​పేయీ చిత్రపటానికి నివాళులర్పించారు. సుపరిపాలన దినోత్సవం’ సందర్భంగా గోవా ప్రభుత్వం ఉచిత వైద్య శిబిరాన్ని నిర్వహించిందన్నారు. బీజేపీ నేతలందరికీ వాజ్​పేయీ స్ఫూర్తిదాయకమన్నారు. అటల్ బిహారీ వాజ్ పేయి బీజేపీ వ్యవస్థాపక సభ్యుల్లో ఒకరు. బీజేపీని దేశవ్యాప్తంగా విస్తరించిన వ్యక్తి. 1999 నుంచి 2004 వరకు భారత ప్రధానిగా పని చేశారు. 2018 ఆగస్టు 16న దిల్లీలోని ఎయిమ్స్​లో కన్ను మూశారు.

అయోధ్య (Ayodhya)లో జనవరి 22న రామ్ లల్లా విగ్రహానికి ప్రాణ ప్రతిష్ట (consecration ceremony) చేయనున్నారు. ఈ నేపథ్యంలో ఆలయ నిర్మాణ పనులు శరవేగంగా జరుగుతున్నాయి. ఈ క్రమంలో రామ మందిర నిర్మాణానికి సంబంధించిన ఫోటోలను శ్రీ రామ జన్మభూమి తీర్థ ట్రస్టు విడుదల చేసింది. ఆ ఫోటోలు ఇప్పుడు సోషల్ మీడియాలో తెగ వైరల్ అవుతున్నాయి.

ఇది ఇలా వుంటే ప్రాణ ప్రతిష్టాపనకు జనవరి 22న మధ్యామ్నం 12.30 గంటల సమయంలో మహత్తరమైన ముహూర్తం ఉందని జ్యోతిషులు చెబుతున్నారు. శుభ ముహూర్తం 84 సెకన్ల పాటు ఉంటుందని అంటున్నారు. ఆ రోజు మధ్యాహ్నం 12.29 గంటల 8 సెకన్ల నుంచి 12 గంటల 30 నిమిషాల 32 సెకన్ల మధ్య అత్యంత శుభ గడియలు ఉన్నాయని చెబుతున్నారు.

ముహూర్తం వివరాలను యూపీ వారణాసికి చెందిన సంగ్వేద విద్యాలయ ఆచార్యులు, జ్యోతిషుడు ఆచార్య గణేశ్వర్ శాస్త్రి ద్రవిడ్ తెలిపారు. అయోధ్యలో రామ్ లల్లా విగ్రహ ప్రతిష్ఠాపన చేస్తున్న సమయంలో గురు స్థానం అత్యంత బలంగా ఉంటుందన్నారు. 2024 జనవరి 22న మధ్యాహ్నం 12.30 గంటలకు గురు ఉచ్ఛస్థితిలో ఉంటాడని పేర్కొన్నారు. ఆ సమయంలో గురు రాజయోగం కల్పిస్తాడన్నారు.

వృశ్చిక రాశి నవాంశం ఉన్న సమయంలో మేష లగ్నంలో ప్రతిష్టాపన కార్యక్రమాన్ని నిర్వహిస్తారన్నారు. ఆ సమయంలో గురు ఐదు, ఏడు, తొమ్మిదో స్థానంలో ఉంటాడని వివరించారు. గురువు ఏడవ స్థానంలో ఉంటే అందరి మనసులు చక్కగా ఉంటాయన్నారు. లక్ష సమస్యలను కూడా పరిష్కరించే సామర్థ్యం గురువుకు ఉందని వివరించారు.

సాధారణంగా 5 గ్రహాలు అనుకూల స్థానంలో ఉన్నప్పుడు అది అత్యంత శుభ ముహూర్తం అవుతుందని గణేశ్వర్ శాస్త్రి అన్నారు. ప్రాణప్రతిష్ఠ సమయంలో ఆరు గ్రహాలు అనుకూలంగా ఉన్నాయన్నారు. మూడింట రెండొంతుల గ్రహాలు అనుకూలంగా ఉండటం చాలా మంచిదన్నారు. ఆ సమయంలో విగ్రహ ప్రతిష్ఠాపన కార్యక్రమం నిర్వహిస్తే ప్రపంచంలో దేశ కీర్తి మరింత పెరుగుతుందన్నారు.

మేష లగ్నంలో అభిజిత్ ముహూర్తంలో రామ్ లల్లా విగ్రహానికి ప్రాణ ప్రతిష్ఠ కార్యక్రమాన్ని నిర్వహిస్తున్నారు. జనవరి 22న మధ్యాహ్నం 12.15 గంటల నుంచి 12.45 గంటల మధ్య ప్రధాని నరేంద్ర మోడీ చేతుల మీదుగా ఈ కార్యక్రమాన్ని నిర్వహిస్తామని ఇప్పటికే ట్రస్టు వెల్లడించింది. ఇక ప్రాణప్రతిష్ఠాపన నేపథ్యంలో అయోధ్యలో హోటల్ గదుల రేట్లు ఆకాశాన్ని తాకుతున్నాయి. కొన్ని చోట్ల రేట్లు రూ.లక్షకు చేరాయి. వారణాసిలోనూ ఇదే పరిస్థితి నెలకొందని టూర్ ఆపరేటర్లు అంటున్నారు.