Breaking News

నూతన కలెక్టర్లను కేసీఆర్ (KCR) రియల్ ఎస్టేట్ బ్రోకర్లుగా మార్చారని రిటైర్డ్ ఐఏఎస్ ఆకునూరి (Akunuri Murali) మురళి ఆరోపించారు. ఎవరు ఎక్కువ అవినీతి చేస్తే వాళ్లకు కేసీఆర్ ప్రమోషన్లు ఇచ్చి హైదరాబాద్‌లో వేశాడని ఆరోపణలు చేశారు. రాష్ట్రాన్ని అనేక విధాలుగా కేసీఆర్ దోచుకున్నాడని మండిపడ్డారు. హైదరాబాద్ బేగంపేట ది హరిత ప్లాజాలో తెలంగాణ తహశీల్దార్స్ అసోసియేషన్ ఆధ్వర్యంలో రెవెన్యూ వ్యవస్థ బలోపేతంపై చర్చా కార్యక్రమాన్ని నిర్వహించారు.

ఈ కార్యక్రమానికి ముఖ్య అతిథులుగా రిటైర్డ్ ఐఏఎస్ అధికారి ఆకునూరి మురళి, ప్రొఫెసర్ కోదండరాం, డిప్యూటీ కలెక్టర్స్ అసోసియేషన్ అధ్యక్షుడు లచ్చిరెడ్డి హాజరయ్యారు. ఈ సందర్బంగా ఆకునూరి మురళి మాట్లాడుతూ…. మాజీ సీఎం కేసీఆర్ పరిపాలకుడు కాదన్నారు. కేసీఆర్ పెద్ద విధ్వంసకారుడని నిప్పులు చెరిగారు. కేసీఆర్ పాలన ముగిసిందని వదిలిపెట్టవద్దన్నారు.

ఆయన్ని ఎలా వదిలిపెడతాం..? అని అన్నారు. రెవెన్యూ, ఆర్థిక, విద్య, టీఎస్పీఎస్సీ, గ్రామ పరిపాలనతో పాటు అన్నింటినీ కేసీఆర్ ధ్వంసం చేశారని ఆరోపణలు గుప్పించారు. రాజకీయాలను కేసీఆర్ అవినీతిమయం చేశాడన్నారు. కేసీఆర్ పాలనలో అవినీతి జరగని శాఖ లేదన్నారు. ఇప్పుడు కొత్త దొంగలు రాకుండా చూసుకోవాలన్నారు.

పాత దొంగలు కొన్ని నేర్పి వెళ్లారని, వాళ్లలాంటి వారి నుంచి తెలంగాణను కాపాడుకోవాలన్నారు. రిటైర్డ్ ఐఏఎస్ అధికారి సోమేశ్ కుమార్ అవినీతి పరుడేనన్నారు. ఆ విషయాన్ని తాను కాదనన్నారు. ఆయన ఎప్పుడో బిహార్ వెళ్లాడన్నారు. కేసీఆర్ కు పరిపాలన అంటే చిరాకన్నారు. కనీసం 90 వేల ఫైళ్లు చూడకుండా వెనక్కి పంపేవాడన్నారు.

సీఎం రేవంత్ రెడ్డి (CM Revanth Reddy) కీలక నిర్ణయం తీసుకున్నారు. గ్రామ సదస్సులకు ‘ప్రజాపాలన’ (Praja Palana) అని పేరు మార్చారు. డిసెంబర్ 28 నుంచి వచ్చే ఏడాది జనవరి 6 వరకు ప్రజాపాలన కార్యక్రమాన్ని నిర్వహించాలని అధికారులను సీఎం ఆదేశించారు. డాక్టర్ బీఆర్ అంబేద్కర్ తెలంగాణ సచివాలయంలో జిల్లాల కలెక్టర్లు, ఎస్పీలతో సమావేశం నిర్వహించారు.

ఈ సమావేశంలో డిప్యూటీ సీఎం భట్టి విక్రమార్క, మంత్రులు, వివిధ శాఖల కార్యదర్శులు, సంబంధిత అధికారులు ఈ సమావేశంలో పాల్గొన్నారు. గత ప్రభుత్వ తప్పిదాలను సరిదిద్దడంతో పాటు తాము ప్రకటించిన ఆరు గ్యారెంటీల అమలు, యంత్రాంగాన్ని గ్రామ స్థాయికి తీసుకెళ్లేందుకు ఈ కార్యక్రమాన్ని నిర్వహిస్తున్నారు.

ఈ నెల 28 నుంచి అన్ని గ్రామాలు, మున్సిపల్‌ వార్డుల్లో ఉదయం 8 గంటల నుంచి 12 గంటల వరకు, మధ్యాహ్నం 2 గంటల నుంచి 6 గంటల వరకు ఈ కార్యక్రమాన్ని చేపడతారని ప్రభుత్వం తెలిపింది. రాష్ట్రంలోని అన్ని గ్రామపంచాయతీలు, మున్సిపల్‌ వార్డుల్లో అధికారులు బృందాలు పర్యటిస్తాయని పేర్కొంది.

రోజుకు రెండు బృందాలు చొప్పున పర్యటన చేస్తాయని వెల్లడించింది. ప్రజాపాలన కార్యక్రమానికి సర్పంచ్‌, స్థానిక కార్పొరేటర్‌, కౌన్సిలర్లను ఆహ్వానించనున్నారు. దీంతో పాటు సంబంధిత ప్రజా ప్రతినిధులందరూ విధిగా పాల్గొనేలా చర్యలు తీసుకోనున్నారు. గ్రామ సభల్లో వచ్చిన ప్రతి దరఖాస్తును ప్రత్యేకంగా పరిశీలించేందుకు ఒక్కోదానికి ప్రత్యేకమైన నెంబర్‌ ఇచ్చి వాటిని కంప్యూటరైజ్‌ చేయనున్నారు.

సమావేశంలో సీఎం రేవంత్ రెడ్డి మాట్లాడుతూ…. ప్రభుత్వాలు తీసుకునే నిర్ణయాలు అట్టడుగు వర్గాల ప్రజలకు అందాలంటే ప్రజాప్రతినిధులు, అధికారులు జోడెద్దుల్లాగా పనిచేయాల్సి ఉంటుందన్నారు. సచివాలయం స్థాయిలో ప్రభుత్వం తీసుకునే నిర్ణయాలు, ఎన్నికల సమయంలో ఇచ్చిన హామీలు, గ్యారంటీలను అమలు చేసేందుకు జిల్లా స్థాయిలో కలెక్టర్లు, గ్రామ స్థాయి వరకు అంతా సమిష్టి కృషి చేయాలన్నారు.

వారిలో ఏ ఒక్కరు వెనుకబడినా ఆ మేరకు తేడాలు కనిపిస్తాయని చెప్పారు. ఆరు గ్యారంటీల అమలు విషయంలో అధికారులు బాధ్యతాయుతంగా పనిచేయాలని ఆదేశించారు. నిస్సహాయులకు సాయం అందాలన్నారు. అభివృద్ధి అంటే కేవలం అద్దాల మేడలు, రాజుల గోడలు మాత్రమే కాదన్నారు. ప్రజలకు ప్రయోజనం కలిగినప్పుడు అట్టడుగు వారికి ప్రభుత్వం నుంచి సంక్షేమం అందినప్పుడే సార్ధకమవుతుందన్న అంబేద్కర్ మాటలను ఆయన గుర్తు చేశారు.

గతంలో ఐఏఎస్ అధికారి ఎస్సార్ శంకరన్ దీన్ని దృష్టిలో పెట్టుకునే ఉదయం 9 గంటలకు సచివాలయానికి వచ్చే వారిని తెలిపారు. ఉదయం నుంచి రాత్రి వరకు ప్రజల బాధలకు సంబంధించిన అంశాలపై దృష్టి సారించి తన వంతు కృషి చేశారని గుర్తుచేశారు. ఆయన బాధ్యతను, కృషిని గుర్తించి కేంద్ర ప్రభుత్వం పద్మభూషణ్ అవార్డును ఇచ్చిందన్నారు.

కానీ దాన్ని ఆయన సున్నితంగా తిరస్కరించారన్నారు. చాలా నమ్మకంతో, విశ్వాసంతో, ధీమాతో ప్రభుత్వం అభయహస్తం కార్యక్రమాన్ని అమలుచేసే బాధ్యత అప్పజెప్తున్నదన్నారు. అందువల్ల లబ్ధిదారుల ఎంపిక ప్రక్రియ పారదర్శకంగా జరగాలన్నారు. గత ప్రభుత్వంలో జరిగిన తప్పులు రిపీట్ కావద్దన్నారు. ప్రజల్లో కలిసిపోయి పనిచేస్తూ శభాష్ అని అనిపించుకోవాలన్నారు.

ఉద్యోగులకు, అధికారులకు ప్రభుత్వం ఫ్రెండ్లీగా ఉంటుందన్నారు. ఒక వేళ ఉద్దేశపూర్వకంగా ఉద్యోగులు నిర్లక్ష్యంగా వ్యవహరిస్తే తప్పకుండా సమీక్షించి తగిన నిర్ణయాలు తీసుకుంటుందని హెచ్చరించారు. తెలంగాణ రాష్ట్ర ఏర్పాటుకు ప్రత్యేక నేపథ్యం ఉన్నదన్నారు. ఎన్నో ఆకాంక్షలతో ప్రాణాలను సైతం పణంగా పెట్టి చాలా మంది ఉద్యమంలోకి దూకారని తెలిపారు. ఆ ఆకాంక్షలను నెరవేర్చడం కోసం అధికారులు మానవీయ కోణంలో వ్యవహరించాలన్నారు. వారి మనసుల్ని గెల్చుకోవాలన్నారు. వారి బాధలను తెలుసుకుని పరిష్కారం చూపాలన్నారు.

-రాష్ట్ర ప్రగతి ప్రస్థానం ఒక సువర్ణ అధ్యాయం
-బీఆర్ఎస్‌ను బద్నాం చేసేందుకు కాంగ్రెస్ ప్రయత్నం
-శ్వేత పత్రం పేరిట అంకెల గారడీ
-అప్పులు అంటూ అభాండాలు
-చివరకు సర్కార్ పారిపోయింది
-ఆ మూడు రకాల అప్పులు ప్రభుత్వానివి కాదు
-విధ్వంసం నుంచి వికాసం వైపు
-సంక్షోభం నుంచి సమృద్ధి వైపు ప్రయాణించాం
-ఈ పదేండ్లలో ఏం జరిగిందో అందరికీ తెలియాలి
– ప్రగతి ప్రస్థానాన్ని వివరించాల్సిన బాధ్యత మాపై ఉంది
-స్వేద పత్రాన్ని విడుదల చేసిన కేటీఆర్

తొమ్మిదిన్నరేళ్ల తెలంగాణ ప్రగతి ప్రస్థానం అనేది దేశ చరిత్రలోనే ఓ సువర్ణ అధ్యాయమని బీఆర్ఎస్ (BRS) వర్కింగ్ ప్రెసిడెంట్, మాజీ మంత్రి కేటీఆర్ (KTR) అన్నారు. కేసీఆర్‌, బీఆర్‌ఎస్‌ పాలనపై కాంగ్రెస్‌ ప్రభుత్వం బురదజల్లేందుకు ప్రయత్నించిందని మండిపడ్డారు. రెక్కల కష్టంతో చెమటోడ్చి నిర్మించిన తెలంగాణ ప్రతిష్టను దెబ్బ తీస్తే సహించబోమని కేటీఆర్ హెచ్చరించారు.

బీఆర్ఎస్ సర్కార్ హయాంలో తెలంగాణలో జరిగిన ప్రగతి ప్రస్థానాన్ని ‘స్వేదపత్రం’ పేరిట తెలంగాణ భవన్‌లో పవర్ పాయింట్ ప్రెజెంటేషన్ ఇచ్చారు. ఈ సందర్భంగా కేటీఆర్ మాట్లాడుతూ….. .తెలంగాణ రాష్ట్రం సృష్టించిన సంపదను ఆవిష్కరించేందుకు స్వేద పత్రం విడుదల చేస్తున్నట్టు తెలిపారు. గణాంకాలతో సహా వాస్తవ తెలంగాణ ముఖచిత్రాన్ని వివరిస్తున్నామన్నారు.

ఈ పదేండ్ల కాలంలో తమ ప్రభుత్వం చమటోడ్చి, రక్తాన్ని రంగరించి వందల గంటలు పనిచేసి, లక్షలాది మంది ఉద్యోగులు, కోట్ల మంది ప్రజలు తమ స్వేదంతో ఈ రాష్ట్ర అభ్యున్నతికి ఏ విధంగా తోడ్పడ్డారనే విషయం స్వేద పత్రం రూపంలో ముందు ఉందన్నారు. రాష్ట్రాన్ని ఏ రకంగా ముందుకు తీసుకెళ్లారో ఈ స్వేద పత్రం ద్వారా చెప్పాల్సిన బాధ్యత తమపై ఉందన్నారు.

రాష్ట్రంలో నూతనంగా ఏర్పాటైన ప్రభుత్వం ఉద్దేశపూర్వకంగా బీఆర్‌ఎస్‌ను, గత పదేండ్ల కేసీఆర్‌ పాలనను బద్నాం చేసే విధంగా ప్రజల్లో అపోహలు, అనుమానాలు కాంగ్రెస్ సర్కార్ సృష్టిస్తోందన్నారు. గత బీఆరఎస్ సర్కార్ పై బురదజల్లే ప్రయత్నం చేసిందన్నారు. చివరకు శ్వేత పత్రాలంటూ హడావుడి చేసి చివరికి వాయిదా వేసుకుని సర్కార్ పారిపోయిందన్నారు.

అప్పుల పేరుతో తమపై అభాండాలు వేసిందని, శ్వేతపత్రం పేరుతో అంకెల గారడీ చేసిందని ఫైర్ అయ్యారు. ప్రభుత్వం లేవనెత్తిన కొన్ని సందేహాలు, చేసిన ఆరోపణలపై బాధ్యత గల పార్టీగా వివరణ ఇవ్వాల్సిన బాధ్యత తమపై ఉందన్నారు. గత పదేండ్లలో ప్రజలు తమకు అధికారం ఇచ్చినప్పుడు ఏం జరిగింది ? ఎట్లా జరిగింది ? అనే విషయాన్ని ప్రజలకు వివరించాల్సిన బాధ్యత తమపై ఉందన్నారు. అందుకే స్వేదపత్రాన్ని విడుదల చేస్తున్నామని పేర్కొన్నారు.

శ్వేతపత్రంలో కాంగ్రెస్ చెప్పిన లెక్కల ప్రకారం ఎఫ్ఆర్బీఎం పరిమితికి లోబడి తెలంగాణ అప్పులు రూ.3,89,673 కోట్లు ఉన్నాయి. అంతకు ముందు కాంగ్రెస్ సర్కార్ తమకు ఇచ్చిన అప్పులు72,658 కోట్లు అని చెప్పారు. స్థూలంగా తమ ప్రభుత్వం 3,17,015 కోట్లు మాత్రమే అప్పుగా తెచ్చిందన్నారు. ఈ అప్పు మొత్తాన్ని వాళ్లు రూ.6.71 లక్షల కోట్లుగా చూపించారన్నారు.

కానీ రాష్ట్రంలో ప్రభుత్వ గ్యారంటీ ఉన్న రూ.1,27,208 కోట్లు ఎస్పీవీ అప్పులు , రూ.1,18,557 కోట్లు ఎస్పీవీ రుణాలు, మరో రూ.59,414 కోట్లు ప్రభుత్వ హామీ లేని రుణాలు ఉన్నాయన్నారు. ఈ మూడు రకాల రుణాలు ప్రభుత్వ అప్పులు కావన్నారు. కానీ, కొత్తగా వచ్చిన కాంగ్రెస్ సర్కార్ రూ.3,17,015 కోట్ల అప్పులకు పైన చెప్పిన మూడు రకాల అప్పులను కూడా జతచేసిందన్నారు. దీంతో కేసీఆర్ ప్రభుత్వం మొత్తం రూ.6,71,757 కోట్ల అప్పులు తీసుకున్నట్టుగా చూపించిందన్నారు. తాము దిగిపోయే నాటికి ఉన్న అప్పు కేవలం రూ.3,17,015 కోట్లు మాత్రమేనని స్పష్టం చేశారు. ప్రభుత్వం రూ.6.71 లక్షల కోట్లుగా చెప్పడం శుద్ధ అబద్ధమని ధ్వజమెత్తారు.

వాస్తవానికి బీఆర్ఎస్‌ హయాంలో రాష్ట్రంలో పేదరికం చాలా వరకు తగ్గిందన్నారు. ఎన్ఎఫ్ హెచ్ఎస్ ప్రకారం…. తెలంగాణ నూతనంగా ఏర్పడే నాటికి రాష్ట్రంలో పేదరికం 21.92 శాతం ఉందన్నారు. తాము దిగిపోయే సమయానికి పేదరికం కేవలం 5.8 శాతానికి చేరిందన్నారు. దేశంలో వేరే ఏ రాష్ట్రంలోనూ ఇంత వేగంగా పేదరికం తగ్గుముఖం పట్టలేదన్నారు.

అన్ని విషయాల్లో దేశానికే తెలంగాణ దిక్సూచిగా మారిందన్నారు. మిషన్‌ భగీరథ, మిషన్‌ కాకతీయ పథకాలకు నిధులు కేటాయించాలని నీతి ఆయోగ్‌ సిఫారసు చేసిందన్నారు. రాష్ట్రంలో విధ్వంసం నుంచి వికాసం వైపు, సంక్షోభం నుంచి సమృద్ధి వైపు ప్రయాణం జరిగిందన్నారు. 60 ఏండ్లలో ఓ వైపు జీవన విధ్వంసం జరిగిందన్నారు.

మరోవైపు ఉద్దేశపూర్వకమైన నిర్లక్ష్యంతో మన రాష్ట్రాన్ని నాశనం చేసే ప్రయత్నం అప్పటి పాలకులు చేశారని నిప్పులు చెరిగారు. అది కాంగ్రెస్‌ పాలకులు కావొచ్చు. ఇతరులు కావొచ్చన్నారు. ఆనాటి ఫ్రీ లాన్స్‌ జర్నలిస్ట్‌ ఆ రోజుల్లో తెలంగాణ ఉద్యమం నుంచి ప్రేరణ పొంది ‘తెలంగాణ స్టిల్‌ సీకింగ్‌ జస్టిస్‌’పేరుతో ఒక డాక్యుమెంటరీని రూపొందించారని చెప్పారు. దాన్ని చూస్తే చూస్తే కళ్లకు కట్టినట్లు అర్థమవుతుందన్నారు. ఆ డాక్యుమంటరీని ఈ సందర్బంగా ప్రదర్శించారు.

లోక్ సభ సార్వత్రిక ఎన్నికలకు సమయం దగ్గర పడుతున్న సమయంలో కాంగ్రెస్ (Congress) అధిష్టానం కీలక నిర్ణయం తీసుకుంది. రాబోయే ఎన్నికలను దృష్టిలో పెట్టుకుని తెలుగు రాష్ట్రాల ఇంఛార్జ్ లను మార్చింది. తాజాగా తెలంగాణ కాంగ్రెస్ ఇంఛార్జ్‌గా ఉన్న మాణిక్ రావు ఠాక్రే (Manikrao Thakare)ను ఆ బాధ్యతల నుంచి తప్పిస్తూ అధిష్టానం నిర్ణయం తీసుకుంది.

తెలంగాణ కాంగ్రెస్ నూతన ఇంఛార్జ్ గా దీపాదాస్ మున్షీని హైకమాండ్ నియమించింది. బెంగాల్ కాంగ్రెస్ సీనియర్ నేత ప్రియరంజన్ దాస్ మున్షీ భార్య దీపాదాస్ మున్షీ. ప్రస్తుతం తెలంగాణ వ్యవహారాల ఇంఛార్జ్ గా ఉన్న మాణిక్ రావు ఠాక్రేకు గోవా-డయ్యూ డామన్ వ్యవహారాల ఇన్ చార్జీగా బాధ్యతలను హైకమాండ్ అప్పగిచించింది.

మరోవైపు ఏపీ కాంగ్రెస్ వ్యవహారాల ఇంఛార్జీగా మాణికం ఠాగూర్‌ను నియమించింది. దీంతో పాటు అండమాన్ నికోబార్ కాంగ్రెస్ వ్యవహారాల ఇంఛార్జ్ గా అదనపు బాధ్యతలను అప్పగించింది. కర్ణాటక వ్యవహారాల ఇంఛార్జ్ గా రణదీప్ సింగ్, తమిళనాడు-పుదుచ్చేరి-ఒడిశా ఇన్చార్జిగా డాక్టర్ అజయ్ కుమార్ లను నియమిస్తూ పార్టీ జాతీయ ప్రధాన కార్యదర్శి కేసీ వేణుగోపాల్ ఉత్తర్వులు జారీ చేశారు.

ఇది ఇలా వుంటే తెలంగాణ అసెంబ్లీ ఎన్నికలకు కొన్ని నెలల ముందు మ‌హారాష్ట్ర మాజీ పీసీసీ చీఫ్ మాణిక్ రావ్ ఠాక్రేను తెలంగాణ ఇంచార్జీగా ఏఐసీసీ నియ‌మించింది. అంతకు ముందు తెలంగాణ వ్యవహారాల ఇంఛార్జీగా పనిచేస్తున్న మాణిక్ రావ్ ఠాకూర్‌ అప్పటి పీసీసీ చీఫ్, ప్రస్తుత సీఎం రేవంత్ రెడ్డికి అనుకూలంగా వ్యవహ‌రిస్తున్నార‌ని సీనియ‌ర్లు ఫిర్యాదు చేశారు.

కాంగ్రెస్ (Congress) సర్కార్ పై విశ్వ హిందూ పరిషత్ (VHP), భజరంగ దళ్ (Bajrang Dal) తీవ్ర స్థాయిలో విరుచుకు పడ్డాయి. రాజ్యాంగ నిబంధనలను విరుద్దంగా ఒక తీవ్ర వాద సంస్థకు రాష్ట్ర ప్రభుత్వ ఖజానా నుంచి నిధులు ఎలా కేటాయిస్తారంటూ రాష్ట్ర ప్రభుత్వాన్ని ప్రశ్నించాయి.

భారతీయ అస్తిత్వంపై విద్వేషం చిమ్మే తబ్లిగీ జమాతే లాంటి సంస్థలకు రాష్ట్ర ప్రభుత్వం నిధులు అందించడం రాజ్యాంగ విరుద్ధమని మండిపడ్డాయి. ఈ విషయంపై తెలంగాణ డీజీపీకి వీహెచ్‌పీ, భజరంగదళ్ లు వినతి పత్రాన్ని అందజేశాయి. వచ్చే ఏడాది జనవరి 6,7,8 తేదీల్లో వికారాబాద్ జిల్లా పరిగి ప్రాంతంలో తబ్లిగీ జమాతే సమావేశాలను జరగనున్నాయని, వాటికి అనుమతి రద్దు చేయాలని డీజీపీని కోరారు.

తబ్లిగీ జమాతే సంస్థపై పలు ముస్లిం దేశాలు నిషేధం విధించిన విషయాన్ని ఈ సందర్బంగా నేతలు గుర్తు చేశారు. ఈ నిషేధం విషయం ప్రభుత్వానికి తెలియదా అని ఫిర్యాదులో ప్రశ్నించారు. హిందూ సంస్కృతిపై విషం చిమ్మే ఇలాంటి సంస్థ వల్ల సమాజానికి చెడు కలగడమే తప్పా ఎలాంటి ప్రయోజనాలు కలగవన్నారు.

ఈ సమావేశాలకు రాష్ట్ర ప్రభుత్వం ఖజానా నుంచి విడుదల చేసిన రూ.2 కోట్ల 45 లక్షలను వెంటనే వెనక్కి తీసుకోవాలని నేతలు డిమాండ్ చేశారు. ఆ నిధులను వెనక్కి తీసుకోని పక్షంలో వీహెచ్‌పీ, భజరంగ్ దళ్ ఆధ్వర్యంలో పెద్ద ఎత్తున ఆందోళనలు చేపడుతామని హెచ్చరించారు.

అవినీతి, అక్రమాలు తావులేకుండా సంక్షేమ పథకాలను ప్రతి ఒక్కరికీ అందిస్తామని మంత్రి ఉత్తమ్ కుమార్ రెడ్డి (Uttam Kumar Reddy)తెలిపారు. ఎన్నికలకు ముందు తాము ఇచ్చిన ఆరు గ్యారెంటీ పథకాల(six guarantee Schemes)కు కట్టుబడి ఉన్నామని మంత్రి స్పష్టం చేశారు. ఆరు గ్యారెంటీలను వంద రోజుల్లో అమలు చేస్తామని వెల్లడించారు.

సూర్యాపేట జిల్లా హుజూర్ నగర్‌లో రామస్వామి గట్టు వద్ద ఇందిరమ్మ మోడల్ కాలనీని మంత్రులు ఉత్తమ్ కుమార్ రెడ్డి, పొంగులేటి శ్రీనివాస్ రెడ్డి సందర్శించారు. ఈ సందర్బంగా మంత్రి ఉత్తమ్ కుమార్ రెడ్డి మాట్లాడుతూ….. తెలంగాణలో అర్హులందరికీ ఇందిరమ్మ ఇండ్లు మంజూరు చేస్తామని తెలిపారు. లబ్ధిదారులను గ్రామ సభల ద్వారా ఎంపిక చేస్తామని పేర్కొన్నారు.

గత బీఆర్ఎస్ సర్కార్ హుజూర్ నగర్ నియోజకవర్గంలో కేవలం 240 ఇండ్లను మాత్రమే మంజూరు చేసిందని మండిపడ్డారు. అవి కూడా పూర్తిగా నిర్మాణం జరగలేదని ఆరోపించారు. త్వరలోనే గృహ నిర్మాణశాఖ మంత్రి పొంగులేటి శ్రీనివాస రెడ్డి ఆధ్వర్యంలో పేదలకు ఇందిరమ్మ ఇండ్లను మంజూరు చేస్తామని హామీ ఇచ్చారు.

రాష్ట్రంలో లిఫ్టు ఇరిగేషన్ ప్రాజెక్టులు, చెక్ డ్యాములు అసంపూర్తిగా ఉన్నాయని చెప్పారు. అనంతరం ఎమ్మెల్యే క్యాంపు కార్యాలయంలో ఉన్నతాధికారులతో మంత్రులు సమీక్షా సమావేశాన్ని నిర్వహించారు. ఈ సమావేశంలో జిల్లా కలెక్టర్ వెంకట్రావు, జిల్లా అధికారులు, ఇతర ముఖ్యనేతలు పాల్గొన్నారు.