Featured

– త్వరలో బీఆర్ఎస్ మేనిఫెస్టో
– కాంగ్రెస్ గ్యారెంటీలను మించేలా ఉండబోతోందా?
– బీజేపీకి షాకిచ్చేలా ఉంటుందా?
– అన్ని వర్గాలూ సంతోషపడేలా..
– ప్లాన్ చేశామంటున్న గులాబీ నేతలు
– గత హామీలకే దిక్కులేదంటున్న ప్రతిపక్షాలు
– నిరుద్యో భృతి ఏమైందని ప్రశ్న
– ఇంకా ఇతర పథకాలపై నిలదీత

సీఎం కేసీఆర్ (CM KCR) త్వరలోనే బీఆర్ఎస్ (BRS) మేనిఫెస్టో విడుదల చేయబోతున్నారని, అన్ని వర్గాలు సంతోషపడేలా శుభవార్త ఉంటుందని మంత్రి హరీష్ రావు (Harish Rao) తాజాగా ప్రకటించారు. ఈ ప్రకటన నేపథ్యంలో బీఆర్ఎస్ మేనిఫెస్టో ఎలా ఉండబోతోందనే చర్చ జోరందుకుంది. బీజేపీ (BJP) హామీలు ఇంకా బయటకు రాలేదు. కాంగ్రెస్ (Congress) ఆరు గ్యారెంటీలు అంటూ హడావుడి చేస్తోంది. ఈ నేపథ్యంలో బీఆర్ఎస్ మేనిఫెస్టోని కేసీఆర్ ఎలా రూపొందిస్తున్నారో అని రాజకీయ వర్గాల్లో హాట్ టాపిక్ గా మారింది. కాంగ్రెస్, బీజేపీకి షాకిచ్చేలా హామీల్లో ‘అంతకుమించి’ అనేలా వరాలు ఉండబోతున్నాయనేది విశ్లేషకుల నుంచి కూడా వినిపిస్తోంది.

కేసీఆర్ కు ఈసారి ఎన్నికలు ఎంతో కీలకం. రెండు పర్యాయాల పాలనను చూసిన ప్రజలు.. వరుసగా మూడోసారి ఛాన్స్ ఇస్తారా? లేక, షాకిస్తారా? అనేది ఆసక్తికరంగా మారింది. ప్రతిపక్షాలు మాత్రం ఈసారి బీఆర్ఎస్ ఓటమి పక్కా అని ధీమాగా చెబుతున్నాయి. గెలిచేది తామేనని కాంగ్రెస్, బీజేపీ గట్టిగా వాదిస్తున్నాయి. ఈ తరుణంలో గెలుపు పక్కా కావాలంటే.. అన్ని వర్గాల ప్రజలను ఆకర్షించేలా మేనిఫెస్టోను కేసీఆర్ రూపొందిస్తున్నట్టుగా చెబుతున్నారు విశ్లేషకులు. ముఖ్యంగా కర్ణాటక స్ట్రాటజీని అమలు చేస్తున్న కాంగ్రెస్ గ్యారెంటీలకు ధీటుగా బీఆర్ఎస్ మేనిఫెస్టో ఉండబోతోందని అంచనా వేస్తున్నారు.

2018లో ముందస్తు ఎన్నికలకు వెళ్లారు కేసీఆర్. ఆ సమయంలో ప్రకటించిన వరాల నేపథ్యంలో పింఛన్‌ దారులు, రైతులు ఆయన్ను గెలుపుబాట పట్టించారు. ఈసారి కూడా వీరిపైనే ఆశలు పెట్టుకున్న కేసీఆర్.. ఆసరా పెన్షన్లు, రైతు బంధు ఆర్థిక సాయం పెంపు తదితర అంశాలపై దృష్టి సారించారని చెబుతున్నారు. అలాగే, ఉద్యోగుల డీఏ పెంపు, వారికి సంబంధించిన ఇతర ప్రధానాంశాలు ఎన్నికల ప్రణాళికలో పెడుతున్నారని అంచనా వేస్తున్నారు. ఇప్పటికే ఆర్టీసీ కార్మికులను ప్రభుత్వంలో విలీనం చేసిన కేసీఆర్.. వారికి సంబంధించిన ఓట్లను సేఫ్ సైడ్ గా పెట్టుకున్నట్టు ఉదహరిస్తున్నారు. ఇక, దళిత బంధు, బీసీ, మైనారిటీ బంధు పథకాలు లబ్ధి చేకూరుస్తాయని భావిస్తున్న సీఎం.. వాటి తరహాలోనే మహిళా బంధు పథకానికి శ్రీకారం చుట్టే ప్లాన్ లో ఉన్నట్టుగా అంచనా వేస్తున్నారు విశ్లేషకులు.

తెలంగాణ కేబినెట్ శుక్రవారం సమావేశం అవుతోంది. ఈ క్రమంలోనే కొత్త పథకాలను ఆమోదించే అవకాశం ఉందని ప్రచారం సాగుతోంది. అయితే.. కేసీఆర్ ను ఈసారి నమ్మి మోసపోవడానికి జనం సిద్ధంగా లేరని అంటున్నాయి విపక్షాలు. 2018లో ముందస్తు ఎన్నికల సందర్భంగా నిరుద్యోగ భృతి ఇస్తామని ప్రకటించారు కేసీఆర్. కానీ, ఇది ఇంతరకూ అమలు చేయలేదు. అయితే.. ఈసారి నిరుద్యోగుల కోసం కూడా ఒక పథకాన్ని ప్రవేశపెట్టాలని ఆయన భావిస్తున్నట్టుగా వార్తలు వస్తున్నాయి. ఈ నేపథ్యంలో ఇంతవరకు ఒక్క నోటిఫికేషన్ ను కూడా పూర్తి చేయలేదని.. ఇంకోసారి కేసీఆర్ ట్రాప్ లో పడి నిరుద్యోగులు మోసపోవద్దని అవగాహన కల్పిస్తున్నాయి ప్రతిపక్షాలు. మొత్తంగా బీఆర్ఎస్ మేనిఫెస్టో ఎలా ఉండబోతుందో అనే ఉత్కంఠ నెలకొనగా.. కేసీఆర్ ను నమ్మి మళ్లీ మళ్లీ మోసపోవద్దని ప్రతిపక్షాలు ప్రజలకు సూచిస్తున్నాయి.

– అక్టోబర్ 1న రాష్ట్రానికి మోడీ
– స్వాగతం అంశంపై మరోసారి చర్చ
– ఇంకోసారి కేసీఆర్ స్కిప్ చేసే ఛాన్స్
– ఇప్పటికే ఫీవర్ తో..
– బాధపడుతున్నారని కేటీఆర్ ప్రకటన
– ఇది మోడీ ప్రోగ్రాం డుమ్మా కొట్టేందుకేనా?
– రాజకీయ వర్గాల్లో జోరుగా చర్చ

ఎన్నికల టైమ్ దగ్గరపడుతోంది. అభ్యర్థుల్ని ప్రకటించినా.. కీలకమైన ప్రచారాన్ని ఇంకా స్టార్ట్ చేయలేదు బీఆర్ఎస్ (BRS). దానికి కారణం సీఎం కేసీఆర్ (CM KCR) వైరల్ ఫీవర్ తో బాధపడుతున్నారు. మంత్రి కేటీఆర్ (KTR) ఈ విషయాన్ని సోషల్ మీడియా ద్వారా ప్రకటించారు. కొద్ది రోజుల క్రితం దగ్గు, జ్వరం బారినపడ్డారు కేసీఆర్. రెండు, మూడు రోజుల్లో తగ్గుతుందిలే అని ఇంట్లోనే ట్రీట్ మెంట్ తీసుకున్నారు. అయితే.. ఫీవర్ తగ్గకపోవడంతో యశోదా ఆస్పత్రి నుంచి ఐదుగురు ప్రత్యేక వైద్యుల బృందం ప్రగతి భవన్ కు వెళ్లింది. సీఎంకు చకిత్స అందిస్తోందని తెలిపారు కేటీఆర్.

కేసీఆర్ కు వచ్చిన ఈ జ్వరం మామూలుగా వచ్చిందా? లేక, ప్రధాని మోడీ (PM Modi) కి స్వాగతం చెప్పడం ఇష్టంలేక కావాలని తెప్పించుకున్నదా? అనే చర్చ రాజకీయవర్గాల్లో జరుగుతోంది. మూడు రోజుల్లో రెండుసార్లు తెలంగాణలో పర్యటించనున్నారు ప్రధాని మోడీ. అక్టోబరు 1న మహబూబ్‌ నగర్, అక్టోబర్ 3న నిజామాబాద్‌ కు వస్తున్నారు. అభివృద్ధికి సంబంధించిన ప్రభుత్వ కార్యక్రమాల్లోనే పాల్గొంటున్నా.. ఈ వేదికల నుంచే ఆయన బీజేపీ ఎన్నికల శంఖారావాన్ని పూరిస్తారని కమలనాథులు అంటున్నారు.

ప్రధాని రాష్ట్రానికి వస్తున్నారంటే గౌరవ సూచికగా సీఎం స్వాగతం చెప్పడం ఆనవాయితీ. అయితే.. దీన్ని ఎప్పుడో కేసీఆర్ పక్కనపెట్టేశారు. జాతీయ రాజకీయాల ప్రకటన చేసినప్పటి నుంచి బీజేపీతో కయ్యానికి కాలుదువ్వారు కేసీఆర్. ఈ క్రమంలోనే రాష్ట్రానికి మోడీ ఎప్పుడు వచ్చినా ఏదో ఒక సాకుతో ఆయన వెళ్లకుండా మంత్రి తలసానిని పంపుతున్నారు. గతంలో సమతామూర్తి విగ్రహావిష్కరణ సమయంలో కూడా జ్వరం కారణంగానే పీఎంకు వెల్ కమ్ చెప్పలేదు. ఇప్పుడు మరోసారి ఆయనకు ఫీవర్ అని అంటున్నారు కేటీఆర్.

సరిగ్గా మోడీ రాష్ట్రానికి వస్తున్న ఈ సమయంలోనే కేసీఆర్ కు జ్వరం రావడంపై పలు అనుమానాలు వ్యక్తం అవుతున్నాయి. ప్రత్యేకంగా ప్రకటన చేయాల్సిన పని లేకుండా కేసీఆర్ జ్వరంతో బాధపడుతున్నారని కేటీఆర్ ముందుగానే సమాచారం ఇచ్చారని రాజకీయ పండితులు విశ్లేషణ చేస్తున్నారు. ఇంకోవైపు కేసీఆర్ జ్వరంతో ఇబ్బంది పడుతుండడంతో.. పార్టీ కార్యక్రమాలు కేటీఆరే చూసుకుంటున్నారు.

– అసంతృప్తిలో కొందరు నేతలు
– అధ్యక్షుడి మార్పు తర్వాత గందరగోళం
– సైలెంట్ అయిన కొందరు సీనియర్లు
– రాజగోపాల్ రెడ్డి కాంగ్రెస్ లోకి వెళ్తున్నారని ప్రచారం
– వెళ్తూ వెళ్తూ కొందరు నేతల్ని పట్టుకెళ్తారని వార్తలు

తెలంగాణ (Telangana)లో మరో రెండు నెలల్లో ఎన్నికలు ఉన్నాయి. అధికార బీఆర్ఎస్ 115 మందితో ఫస్ట్ లిస్ట్ ప్రకటించేసి యుద్ధ రంగంలోకి దిగింది. అయితే.. బీఆర్ఎస్ (BRS) కు తామే ప్రత్యామ్నాయం అని చెబుతున్న బీజేపీ (BJP)లో గందరగోళం నెలకొందనే ప్రచారం జోరందుకుంది. ఓవైపు చేరికలతో కాంగ్రెస్ పార్టీలో జోష్ కనిపిస్తుంటే.. బీజేపీలో సీనియర్లు అలకపాన్పు ఎక్కారని.. పార్టీ మార్పుపై చర్చలు జరుగుతున్నాయని వార్తలు వస్తున్నాయి. ఇదే క్రమంలో రాజగోపాల్ రెడ్డి చేసిన వ్యాఖ్యలు చర్చనీయాంశంగా మారాయి.

బీజేపీ సీనియర్ నేతలు విజయశాంతి, విశ్వేశ్వర్ రెడ్డి, వివేక్, రాజగోపాల్ రెడ్డి లక్ష్యం.. కేసీఆర్ ను గద్దె దించడమే. ఈ విషయాన్నే వాళ్లు ప్రకటిస్తూ గతంలో బీజేపీ గూటికి చేరారు. అయితే.. బండి సంజయ్ ను అధ్యక్షుడిగా తొలగించిన దగ్గర నుంచి వీరు తీవ్ర అసంతృప్తిలో ఉన్నారని.. పైగా, బీఆర్ఎస్ పై చర్యల విషయంలో బీజేపీ మెతక వైఖరి వ్యవహరిస్తోందనే భావనలో ఉన్నారని అంతా చర్చించుకుంటున్నారు. ఇదే సమయంలో కేసీఆర్ ను ఓడించడానికి కాంగ్రెస్ లో చేరడంతో సహా ప్రతి అవకాశాన్ని ఉపయోగించుకుంటామని రాజగోపాల్ రెడ్డి వ్యాఖ్యానించడం హాట్ టాపిక్ గా మారింది.

నాయకత్వ లేమి, కేసీఆర్ ను ఓడించాలన్న లక్ష్యం పూర్తిగా లేకపోవడంపై విసిగిపోయామ‌ని, గత కొంతకాలంగా దీన్ని తమ మధ్యే మాట్లాడుకుంటున్నామని, కేసీఆర్ ను ఓడించేందుకు ఏం చేయడానికైనా సిద్ధంగా ఉన్నామని రాజగోపాల్ రెడ్డి చెప్పిన‌ట్టు ఓ ఇంగ్లీష్ పత్రికలో కథనం వచ్చింది. అధ్యక్షుడి మార్పు విషయంలో ఓ నేత అధిష్టానాన్ని బ్లాక్ మెయిల్ చేశారని అన్నారని తెలిపింది. ఈ కథనం ఇప్పుడు బీజేపీ క్యాంప్ లో కలకలం రేపుతోంది. పైగా, దీన్ని రాజగోపాల్ రెడ్డి సహా సీనియర్ల బృందం ఖండించకపోవడం పలు అనుమానాలకు తావిస్తోంది.

ప్రస్తుత పరిస్థితుల్లో పార్టీని కాపాడుకోవాలంటే ప్రధాని నరేంద్ర మోడీ, కేంద్ర హోంమంత్రి అమిత్ షా జోక్యం చేసుకుని దిద్దుబాటు చర్యలు తీసుకోవడమే ఏకైక మార్గంగా భావిస్తున్నారు నేతలు. త్వరలో మోడీ, అమిత్ షా రాష్ట్రానికి రానున్నారు. వారితో చర్చలు జరిపి పరిస్థితుల్లో ఏమాత్రం తేడా లేకపోతే సీనియర్ నాయకుల బృందం జంప్ అయ్యే ఛాన్స్ ఉందని రాజకీయ పండితులు అంచనా వేస్తున్నారు.

– కవిత పిటిషన్ పై సుప్రీం విచారణ
– ఈడీకి కీలక ఆదేశాలు
– మద్యంతర ఉత్తర్వుల కొనసాగింపు
– నవంబర్ 20 దాకా కవితకు ఊరట

ఢిల్లీ (Delhi) లిక్కర్ స్కాం కేసు రెండు అడుగులు ముందుకు.. నాలుగు అడుగులు వెనక్కి అనేలా సాగుతోంది. దర్యాప్తు సంస్థల ప్లాన్స్ వర్కవుట్ కావడం లేదు. బీఆర్ఎస్ ఎమ్మెల్సీ కవిత (Kavitha) ను మరోసారి విచారిద్దామని అనుకుంటే.. సుప్రీంకోర్టు నుంచి కీలక ఆదేశాలు వెలువడ్డాయి. కవిత వేసిన పిటిషన్ పై విచారణ జరిపిన న్యాయస్థానం.. గతంలో ఇచ్చిన మధ్యంతర ఉత్తర్వులు కొనసాగిస్తున్నట్టు స్పష్టం చేసింది.

ఈడీ (ED) దర్యాప్తు తీరును తప్పుబడుతూ కవిత సుప్రీంలో పిటిషన్ దాఖలు చేశారు. గతంలో దాఖలైన అభిషేక్ బెనర్జీ, నళిని చిదంబరం కేసుతో ట్యాగ్ చేసి విచారణ కొనసాగించాలని కోరారు. గత విచారణలో ఈడీ సమన్లను కూడా కవిత తప్పుబట్టారు. సుప్రీంకోర్టులో కేసు విచారణలో ఉండగా సమన్లు జారీ చేయడం తగదన్నారు. నళిని చిదంబరానికి ఇచ్చినట్టే తనకు కూడా వెసులుబాటు ఇవ్వాలని కోరారు. అయితే.. మహిళను విచారణకే పిలవకూడదంటే ఎలా అని సుప్రీం ప్రశ్నించింది. అన్నిటికీ ఒకే ఆర్డర్‌ ను అప్లై చేయలేమని.. 10 రోజుల పాటు సమన్లు వాయిదా వేసింది. దీనికి ఈడీ కూడా అంగీకరించింది. కవితకు సమన్లు ఇవ్వొద్దని ఈడీకి ఈనెల 15న ధర్మాసనం మధ్యంతర ఉత్తర్వులు ఇచ్చింది.

మంగళవారం విచారణను కొనసాగించిన సుప్రీం ధర్మాసనం.. కవితకు ఊరటనిచ్చే ఆదేశాలిచ్చింది. నవంబర్ 20వ తేదీన విచారణ చేపడతామని.. అక్టోబర్‌ 18వ తేదీన పీఎంఎల్‌ఏ కేసులకు సంబంధించి ప్రత్యేక విచారణ జరగనున్న నేపథ్యంలో.. అది పూర్తైన తర్వాతే ఢిల్లీ లిక్కర్ స్కాంను పరిశీలిస్తామని స్పష్టం చేసింది. అప్పటి వరకు ప్రస్తుతం అమల్లో ఉన్న మధ్యంతర ఉత్తర్వులు కొనసాగుతాయని తెలిపింది. దీంతో నవంబర్ 20వ తేదీ వరకు కవితను విచారణకు పిలవబోమని ఈడీ అధికారులు తెలిపారు.

మార్చి నెలలో కవితను ఈడీ అధికారులు విచారించారు. ఢిల్లీలోని ఈడీ ఆఫీసులో విచారణ కొనసాగింది. అయితే.. మహిళల విచారణ సీఆర్సీసీకి విరుద్ధం అంటూ అప్పటి నుంచి కవిత చెబుతూ వస్తున్నారు. దీనిపై అప్పుడే సుప్రీంకోర్టును ఆశ్రయించారు. ఇటీవల మళ్లీ ఈడీ ఆఫీసులో విచారణకు రావాలని నోటీసులు జారీ అవడంతో మరోసారి సుప్రీంలో పిటిషన్ వేశారు కవిత. దీనిపై తాజాగా విచారణ జరగగా.. ఆమెకు నవంబర్ 20 వరకు ఊరట లభించింది.

– రాజ్ భవన్ వర్సెస్ ప్రగతి భవన్
– తెరపైకి మరో వివాదం
– గవర్నర్ కోటా ఎమ్మెల్సీ..
– అభ్యర్థిత్వాల తిరస్కరణ
– రాజ్ భవన్ నుంచి సీఎస్ కు లేఖ

ప్రగతి భవన్ (Pragati Bhavan), రాజ్ భవన్ (Raj Bhavan) మధ్య ఏదో ఒక వివాదం రావడం.. తర్వాత సైలెంట్ అయిపోవడం కామన్ గా జరుగుతోంది. ఈమధ్యే ఆర్టీసీ బిల్లు విషయంలో పెద్ద రచ్చ జరిగి.. చివరకు పలు సవరణలతో ఆమోద ముద్ర వేశారు గవర్నర్ తమిళిసై (Tamilisai). తాజాగా మరో వివాదం రాజుకుంది. గవర్నర్ కోటా ఎమ్మెల్సీ అభ్యర్థిత్వాల సిఫార్సులను తిరస్కరించారు గవర్నర్. ఈ మేరకు సీఎస్ (CS) కు రాజ్ భవన్ నుంచి లేఖ వెళ్లింది.

గవర్నర్ కోటాలో ఎమ్మెల్సీ అభ్యర్థులుగా దాసోజు శ్రవణ్ (Dasoju Sravan), కుర్రా సత్యనారాయణ (Kurra Satyanarayana) లను కేసీఆర్ (KCR) ప్రభుత్వం ఎంపిక చేసింది. దీనిని ఆమోదించాలని తమిళిసైకి సిఫార్సు చేసింది. అయితే.. ఈ అభ్యర్థిత్వాలను తిరస్కరించారు తమిళిసై. ఈ సందర్భంగా పలు ప్రశ్నలను లేవనెత్తారు. అభ్యర్థులిద్దరూ ఎక్కడా సామాజిక సేవా కార్యక్రమాలు.. సేవా విభాగాల్లో పాల్గొన్నట్లు కనిపించలేదంటూ లేఖ ద్వారా తెలియజేశారు.

రాజకీయ నాయకులను గవర్నర్ కోటాలో ఎమ్మెల్సీలుగా సిఫార్సు చేయొద్దని రాజ్యాంగంలోని ఆర్టికల్ 171(5) చెబుతోందని గుర్తు చేశారు గవర్నర్. ఈ ఇద్దరిని ఎంపిక చేయడానికి కావాల్సిన సమాచారం తన వద్దకు రాలేదని తెలిపారు. కుర్రా సత్యనారాయణ రాజకీయంగా యాక్టివ్‌ గా ఉన్నారని.. సామాజిక సేవా కార్యక్రమాల్లో ఉన్నట్లు ఎక్కడా ఆధారాలు సమర్పించలేదని పేర్కొన్నారు. మన రాష్ట్రంలో చాలా మంది వివిధ రంగాల్లో ప్రముఖలు ఉన్నా.. వారిని పరిగణనలోకి తీసుకోలేదన్నారు.

దాసోజు శ్రవణ్ కూడా రాజకీయాల్లో యాక్టివ్‌ గా ఉన్న విషయాన్ని గుర్తు చేశారు తమిళిసై. ఏ రంగంలోనూ ఆయన అచివ్‌ మెంట్స్‌ కు సంబంధించిన డాక్యుమెంట్లు సమర్పించలేదని పేర్కొన్నారు. అర్హత ఉన్న వ్యక్తులను కేబినెట్ సిఫార్సు చేస్తే నియమిస్తానని తెలిపారు. ఇటీవల సచివాలయంలో ప్రార్థనా మందిరాల ప్రారంభం సందర్భంగా గవర్నర్‌, సీఎం నవ్వుతూ మాట్లాడుకుంటూ కనిపించారు. దీంతో సయోధ్య కుదిరినట్టేనా అనే చర్చ జరిగింది. ఇప్పుడు ప్రభుత్వం పంపిన అభ్యర్థిత్వాలను తిరస్కరించడంతో వార్ ఆగేలా లేదనే టాక్ నడుస్తోంది.

– అప్పుడు ఇంటర్ విద్యార్థులు బలి
– ఇప్పుడు నిరుద్యోగుల్లో టెన్షన్
– టెన్త్ ఫరీక్షల సమయంలోనూ అంతే!
– ఏ పరీక్ష చూసినా నిర్లక్ష్యమే!
– పరీక్షలు జరపడం రాదు..
– పేపర్లు దిద్దడం రాదు..
– కేసీఆర్ సర్కార్ పై ప్రతిపక్షాల ఆగ్రహం

నీళ్లు, నిధులు, నియామకాలు.. తెలంగాణ (Telangana) ఉద్యమ నినాదం. వీటి కోసం అన్ని వర్గాల ప్రజలు పోరాటం చేశారు. ముఖ్యంగా ఉద్యమంలో విద్యార్థులు, నిరుద్యోగులది ప్రధాన పాత్ర. రాష్ట్ర ఏర్పాటు ఆలస్యం అవుతున్న కొద్దీ అనేక మంది విద్యార్థులు చనిపోయారు. వారి అమరత్వం ప్రజలను తట్టి లేపింది. ప్రత్యేక రాష్ట్రం వస్తే మన ఉద్యోగాలు మనకు వస్తాయని కలలు కన్నారు విద్యార్థులు, నిరుద్యోగులు. రాష్ట్రమైతే వచ్చిందిగానీ వారు నిలువునా మోసపోయారనే ఆరోపణలు ఉన్నాయి. పరీక్షలు సరిగ్గా జరపడం లేదు, పేపర్లు దిద్దడం రావడం లేదు అంటూ కేసీఆర్ (KCR) సర్కార్ పై ప్రతిపక్షాలు తీవ్ర ఆగ్రహం వ్యక్తం చేస్తున్న పరిస్థితి నెలకొంది.

గ్రూప్-1 (Group-1) పరీక్ష రద్దు నేపథ్యంలో కేసీఆర్ ప్రభుత్వ నిర్లక్ష్యాన్ని గుర్తు చేస్తున్నారు ప్రతిపక్ష నేతలు, నిరుద్యోగులు. గత ఏడాది అక్టోబర్ 16న గ్రూప్‌-1 ప్రిలిమ్స్‌ నిర్వహించాక.. టీఎస్పీఎస్సీ (TSPSC) పేరు దేశవ్యాప్తంగా మార్మోగిపోయింది. పరీక్షను పకడ్బందీగా నిర్వహించిందని ప్రశంసలు వెల్లువెత్తాయి. కానీ, చివరకు పేపర్ లీకేజ్ వ్యవహారం వెలుగుచూసింది. దీని వెనుక ప్రభుత్వ పెద్దల పాత్ర ఉందని ప్రతిపక్షాలు గట్టిగా వాదిస్తున్నాయి. ఉద్యోగాల భర్తీ ఇష్టం లేకే.. కావాలని కాలయాపన చేసేందుకు డ్రామా క్రియేట్ చేశారని విపక్ష నేతలు ఇప్పటికీ విమర్శలు చేస్తున్నారు.

లీకేజ్ వ్యవహారం వివాదాస్పదం కాగా.. మరోసారి పక్కాగా పరీక్ష జరుపుతామని టీఎస్పీఎస్సీ ప్రకటించింది. ఈ ఏడాది జూన్‌ 11న పరీక్ష నిర్వహించింది. అయితే.. ఈ పరీక్ష విషయంలో అభ్యర్థులు ముందు నుంచి అభ్యంతరాలు తెలిపారు. కొంత సమయం ఇవ్వాలని అడిగారు. కానీ, టీఎస్పీఎస్సీ వెనుకడుగు వేయలేదు. వారి అభ్యర్థనను పట్టించుకోలేదు. నిర్ణయించిన తేదీకి పరీక్ష జరిపించింది. చాలా కండిషన్స్ ను తెరపైకి తెచ్చింది. కానీ, బయోమెట్రిక్ విస్మరించింది.. ఇంకా పలు తప్పిదాలతో విమర్శల పాలైంది. చివరకు రెండోసారి కూడా పరీక్ష రద్దయింది. ఈ నేపథ్యంలో టీఎస్పీఎస్సీనే రద్దు చేయాలనే డిమాండ్ ఊపందుకుంటోంది. పరీక్షలు జరపడం చేతగాని ప్రభుత్వం గతంలో కూడా ఇంటర్ విద్యార్థులను బలి తీసుకుందని గుర్తు చేస్తున్నారు ప్రతిపక్ష నేతలు.

2019లో ఇంటర్ ఫలితాల్లో అవకతవకల కారణంగా 23 మంది విద్యార్థులు ప్రాణాలు తీసుకున్నారని.. ఇది ప్రభుత్వ పాపమేనని అంటున్నారు. ఎన్ని ఘటనలు జరుగుతున్నా.. ప్రభుత్వ వైఖరిలో మార్పు ఉండడం లేదని.. విద్యార్థులు, నిరుద్యోగులకు ఇది శాపంగా మారిందని చెబుతున్నారు. ఆమధ్య టెన్త్ పరీక్షల సమయంలోనూ కొన్ని పేపర్లు బయటకు రావడం వెనుక నిర్వహణా నిర్లక్ష్యం ఉందని మండిపడుతున్నారు. అసలు, పరీక్షలు సరిగ్గా జరపలేని ప్రభుత్వం ఎందుకని ప్రశ్నిస్తున్నారు.

మరోవైపు, తెలంగాణ వస్తే ఇంటికో ఉద్యోగం వస్తుందని చెప్పిన కేసీఆర్.. ఇన్ని సంవత్సరాలవుతున్నా ఏ ఒక్క నోటిఫికేషన్ కూడా పూర్తి చేయలేదని ఆగ్రహం వ్యక్తం చేస్తున్నారు నిరుద్యోగులు. అమాస, పున్నానికి వేసిన నోటిఫికేషన్ కూడా రద్దు చేస్తూ.. తమ జీవితాలను ఆగం చేస్తున్నారని మండిపడుతున్నారు. ఏళ్ల తరబడి ఉస్మానియా యూనివర్సీటీలో ఉంటూ.. అమ్మానాన్నలు అప్పులు చేసి పంపించిన డబ్బులతో చదువుకుంటుంటే, ఉద్యోగాలు భర్తీ చేయకుండా కేసీఆర్ తమను మోసం చేస్తున్నారని అంటున్నారు. వెంటనే టీఎస్పీఎస్సీని రద్దు చేసి.. కొత్త బోర్డ్ ద్వారా పరీక్షలు నిర్వహించాలని డిమాండ్ చేస్తున్నారు.

ఇటు సీఎం కేసీఆర్​ ను గద్దె దించడమే లక్ష్యంగా ఉద్యమిస్తామని ఓయూ విద్యార్థి సంఘాల నాయకులు.. విద్యార్థి నిరుద్యోగ ప్రజా కోర్టును నిర్వహించేందుకు ప్లాన్ చేస్తున్నారు. అక్టోబర్ మొదటి వారంలో ఇది జరగనుంది. కేసీఆర్ ప్రభుత్వం విద్యార్థులు, నిరుద్యోగుల వ్యతిరేక విధానాలను అవలంబిస్తోందని.. ఉన్నత విద్య, ఉద్యోగ ఉపాధి కల్పనలో వైఫల్యం చెందినట్లు ఆరోపిస్తున్నారు. నియామకాల నోటిఫికేషన్లు వేసి లీకులతో పరీక్షలు నిర్వహించి నిరుద్యోగులను మోసం చేసిందని.. ఓయూ నుంచే విద్యార్థి నిరుద్యోగ ఉద్యమం ప్రారంభిస్తామని అంటున్నారు నిరుద్యోగులు.

– జమిలి ఎన్నికలపై క్లారిటీ
– తెలంగాణలో స్పీడ్ పెంచిన పార్టీలు
– అసంతృప్తులను బుజ్జగిస్తున్న బీఆర్ఎస్
– కొత్త పథకాలపై కేసీఆర్ ఫోకస్
– అభ్యర్థుల ఎంపికతోపాటు..
– 6 గ్యారెంటీల ప్రచారంపై కాంగ్రెస్ దృష్టి
– జాతీయ నేతలను దింపుతున్న బీజేపీ
– అక్టోబర్ 2న రాష్ట్రానికి మోడీ
– ఆ వెంటనే అమిత్ షా, నడ్డా రాక
– రాష్ట్రంలో జోరందుకుంటున్న ఎన్నికల సందడి

పార్లమెంట్ ప్రత్యేక సమావేశాలకు ముందు అజెండా ఏంటో తెలియక విపక్ష పార్టీలు తలలు పట్టుకున్నాయి. ఈ క్రమంలోనే అనేక ఊహాగానాలు తెరపైకొచ్చాయి. ఇండియా పేరును భారత్‌ (Bharat) గా మారుస్తున్నారని, దేశమంతా అన్ని రాష్ట్రాలకు ఒకేసారి ఎన్నికలు (Jamili Elections) నిర్వహించాలని చూస్తున్నారని.. వీటికి సంబంధించిన బిల్లులను కేంద్రం ప్రవేశపెట్టే ఛాన్స్ ఉందని అనేక అనుమానాలు, చర్చలు తెరపైకి వచ్చాయి. కానీ, కేంద్రం అనూహ్యంగా చట్ట సభల్లో మహిళలకు 33 శాతం రిజర్వేషన్లు కల్పించే బిల్లును పార్లమెంటు ముందుకు తీసుకొచ్చింది. ఉభయ సభలు ఈ బిల్లుకు ఆమోదం తెలిపాయి. ఇంకే బిల్లుపై ప్రస్తావన లేకుండానే పార్లమెంట్ (Parliament) ఒకరోజు ముందుగానే నిరవధిక వాయిదా పడింది. అయితే.. జమిలి ప్రచారం నేపథ్యంలో తెలంగాణలోని పార్టీలు కాస్త నెమ్మదించగా.. ఇప్పుడు స్పీడందుకుంటున్నాయి.

షెడ్యూల్ ప్రకారం తెలంగాణ (Telangana) లో ఈ ఏడాది డిసెంబర్ కు ప్రస్తుత ప్రభుత్వ టైమ్ అయిపోతుంది. ఆలోపు ఎన్నికలు జరగాల్సి ఉంటుంది. అయితే.. ఇంకో మూడు నెలల తర్వాత సార్వత్రిక ఎన్నికలు ఉన్నాయి. పార్లమెంట్ ప్రత్యేక సమావేశాల సందర్భంగా జమిలి బిల్లు పార్లమెంట్ ముందుకు వస్తుంది.. తెలంగాణలో ఎన్నికలు ఆలస్యమే.. లోక్ సభ ఎన్నికలతో కలిసే జరుగుతాయి.. ఇలా ఎన్నో ప్రచారాలు జరిగాయి. కానీ, జమిలి బిల్లు ప్రస్తావనే లేకుండా సమావేశాలు ముగిశాయి. అంటే, తెలంగాణలో షెడ్యూల్ ప్రకారమే ఎన్నికలు ఉంటాయనే క్లారిటీ వచ్చేసింది. ఈ నేపథ్యంలో ప్రధాన పార్టీలైన బీఆర్ఎస్ (BRS), బీజేపీ (BJP), కాంగ్రెస్ (Congress) అభ్యర్థుల ఎంపిక, పథకాల రూపకల్పన, పార్టీ బలోపేతం, ప్రచారంలో జోరు పెంచాయి.

జమిలి ఎన్నిక కేవలం ప్రచారం మాత్రమే అని తేలిపోవడంతో బీఆర్ఎస్ దూకుడు పెంచింది. పార్టీ వర్కింగ్ ప్రెసిడెంట్ కేటీఆర్ రంగంలోకి దిగారు. ఓవైపు అసంతృప్త నేతలతో వరుసగా భేటీలు అవుతున్నారు. విభేదాలు, గొడవలు జరుగుతున్న నియోజకవర్గాలపై ఫుల్ ఫోకస్ పెట్టిన ఆయన.. అన్నీ సెట్ రైట్ చేసుకునే పనిలో పడ్డారు. ఇప్పటికే రాజయ్య, కడియం మధ్య సయోధ్య కుదిర్చారు. అలాగే, పల్లాకు లైన్ క్లియర్ చేస్తూ.. జనగామ ఎమ్మెల్యే ముత్తిరెడ్డిని చల్లబర్చారు. అలాగే, మిగిలిన నియోజకర్గాల్లో అసంతృప్త నేతలతో చర్చలు జరుపుతున్నారు. ఇటు, కొత్త పథకాలు, ప్రజాకర్షక అంశాలపై సీఎం కేసీఆర్ దృష్టి సారించారు. త్వరలో పేదలకు గుడ్ న్యూస్ ఉంటుందని కేటీఆర్ ఇప్పటికే ప్రకటించారు. అంటే, మరిన్ని పథకాలను తెరపైకి తెస్తున్నారని అర్థం అవుతోంది.

ఇక, కాంగ్రెస్ పార్టీ అభ్యర్థుల ఎంపికలో తలమునకలైంది. ఢిల్లీలో పలు దఫాలు భేటీ అయిన స్క్రీనింగ్ కమిటీ.. సగం సీట్లపై ఓ క్లారిటీకి వచ్చింది. మిగిలిన సీట్ల అంశాన్ని పార్టీ కేంద్ర ఎన్నికల కమిటీకి అప్పగించింది. అక్కడి ఫైనల్ లిస్ట్ ప్రిపేర్ అవుతుంది. కర్ణాటకలో మాదిరిగా 6 గ్యారెంటీ హామీలను ప్రకటించిన కాంగ్రెస్ వాటిని జనంలోకి తీసుకెళ్లే అంశాలపై దృష్టి పెట్టింది. ఇప్పటికే ఇంటింటి ప్రచారం చేస్తోంది. గ్రామగ్రామాన ప్రతీ ఇంటి తలుపు తడుతున్నారు కాంగ్రెస్ నేతలు. 6 గ్యారెంటీల గురించి ప్రజలకు వివరిస్తున్నారు. అలాగే, త్వరలో బస్సు యాత్ర కూడా చేపట్టనుంది కాంగ్రెస్. అక్టోబర్ 2 నుంచి ఈ యాత్ర ఉంటుందని ఆపార్టీ వర్గాలు చెబుతున్నాయి. ప్రతీ జిల్లాకో సభ ఉండేలా ప్లాన్ చేస్తోంది.

మరోవైపు, బీజేపీ కూడా స్పీడ్ పెంచింది. ఏకంగా ప్రధాని మోడీనే రంగంలోకి దించుతోంది. అక్టోబర్ 2న మోడీ మహబూబ్ నగర్ కు రానున్నారు. దీనికి సంబంధించిన సమాచారం రాష్ట్ర నాయకత్వానికి అందింది. భారీ బహిరంగ సభలో పాల్గొని మోడీ ఎన్నికల శంఖారావాన్ని మోగించనున్నారు. ఇప్పటికే పోటీ చేయాలనుకుంటున్న ఆశావహుల నుంచి అప్లికేషన్లు తీసుకున్న బీజేపీ.. వాటి వడబోతలో బిజీగా ఉంది. మోడీతోపాటు ఇంకొందరు జాతీయ నేతలను రాష్ట్రానికి పిలిపించి.. బహిరంగ సభలతో పాటు అభ్యర్థులను కూడా ప్రకటించడానికి రంగం సిద్ధం చేస్తోంది. మోడీ సభ తర్వాత రాష్ట్రంలో మరో రెండు ఉమ్మడి జిల్లాల్లో నడ్డా, అమిత్ షా సభలకు ఏర్పాటు చేస్తున్నారు రాష్ట్ర నేతలు. తెలంగాణ అభివృద్ధి కోసం కేంద్రం ఇచ్చిన నిధులను వివరిస్తూనే.. కీలక హామీలను ప్రకటించే అవకాశాలు ఉన్నాయి. మొత్తంగా ఈసారికి జమిలి ఎన్నికలు ఉండవని క్లారిటీ రావడంతో పార్టీలన్నీ దూకుడు మీదున్నాయి.