National

మాదక ద్రవ్యాల కేసులో కాంగ్రెస్ ఎమ్మెల్యేను సుఖ్ పాల్ సింగ్ ఖైరా (Sukhpal Singh Khaira)ను పోలీసులు అరెస్టు చేశారు. చండీగఢ్ లోని నివాసంలో ఆయన్ని పోలీసు (Police) లు అదుపులోకి తీసుకున్నారు. అరెస్టు సమయంలో పోలీసులతో ఆయన వాగ్వాదానికి దిగారు. దీనికి సంబంధించిన వీడియో ఇప్పుడు సోషల్ మీడియాలో వైరల్ అవుతోంది.

ఖైరా సెక్టార్‌-5 లోని ఆయన నివాసంలో జలాలా బాద్ పోలీసులు ఈ రోజు ఉదయం దాడులు చేశారు. గతంలో ఆయనపై నమోదైన మాదక ద్రవ్యాల కేసుకు సంబంధించి ఈ దాడులు చేశారు. పోలీసులు తనిఖీలు చేస్తుంగా సుఖ్ పాల్ సింగ్ కుటుంబ సభ్యులు వీడియో తీశారు. వారంట్ లేకుండా ఎలా తనిఖీలు చేస్తారంటూ పోలీసులతో సుఖ్ పాల్ సింగ్ వాగ్వాదానికి దిగడం వీడియోలో కనిపిస్తోంది.

అనంతరం ఆయన్ని జలాలాబాద్ డీఎస్పీ అచ్చు రామ్ శర్మ అరెస్టు చేశారు. గతంలో నమోదైన మాదక ద్రవ్యాల కేసుకు సంబంధించి ఆయన్ని అరెస్టు చేస్తున్నట్టు డీఎస్పీ వెల్లడించారు. గతంలోనే ఆ కేసును సుప్రీం కోర్టు కొట్టి వేసిందని సుఖ్ పాల్ సింగ్ పోలీసులతో వాదించారు. కేవలం రాజకీయ కుట్రలో భాగంగా తనని అరెస్టు చేస్తున్నట్టు ఆరోపించారు.

సుఖ్ పాల్ సింగ్ ఖైరా ప్రస్తుతం బలోత్ నియోజక వర్గంలో కాంగ్రెస్ తరఫున ఎమ్మెల్యేగా విజయం సాధించారు. ప్రస్తుతం ఆయన ఆల్ ఇండియా కిసాన్ కాంగ్రెస్ చైర్మన్ గా పని చేస్తున్నారు. ఆయన అరెస్టును కాంగ్రెస్, శిరోమణి అకాళీ దళ్ పార్టీలు తీవ్రంగా ఖండించాయి. ఆప్ ప్రభుత్వం కుట్ర పూరిత రాజకీయాలకు పాల్పడుతోందని ఆరోపించాయి.

భారత విదేశాంగ మంత్రి (External Affairs Minister) ఎస్. జైశంకర్ (S.Jai Shankar) యూఎస్ సెక్రటరీ ఆఫ్ స్టేట్స్ అంటోని బ్లింకన్‌ (Antony Blinken)తో ఈ రోజు సమావేశం కానున్నారు. దీంతో పాటు పలువురు అమెరికా ప్రతినిధులతో ఆయన భేటీ కానున్నారు. ఇటీవల కెనడాతో దౌత్య సంబంధాల ప్రతిష్టంభన నేపథ్యంలో అమెరికా సెక్రటరీ ఆఫ్ స్టేట్స్ అంటోని బ్లింకన్ తో జైశంకర్ సమావేశం ప్రాధాన్యత సంతరించుకుంది.

ఇరువురి నేతల మధ్య సమావేశ ఎజెండా గురించి ఇప్పటి వరకు ఇరు దేశాలు ఎలాంటి ప్రకటన చేయలేదు. కానీ కెనడాతో దౌత్య ప్రతిష్టంభన గురించి ఈ సమావేశంలో చర్చకు వచ్చే అవకాశం ఉందని అధికార వర్గాల ద్వారా తెలుస్తోంది. గత వారం యూఎన్ సాధారణ సభ సెషన్ లో భాగంగా యూఎస్ స్టేట్స్ డిపార్ట్ మెంట్ ప్రతినిధి మాథ్యూ మిల్లర్ తో జైశంకర్ సమావేశం అయ్యారు.

ఈ సమావేశంలో వారితో పాటు ఆస్ట్రేలియా విదేశాంగ మంత్రి పెన్ని వోంగ్, జపాన్ విదేశాంగ మంత్రి యోకో కమికవాలు కూడా పాల్గొన్నారు. ఆ సమావేశంలో కెనడా దౌత్య వివాదం గురించి ఎలాంటి చర్చ జరగలేదని తెలుస్తోంది. విదేశాంగ మంత్రులు సమావేశంలో కెనడా దౌత్య వివాదం గురించి ఎలాంటి చర్చ జరగలేదని మాథ్యూ మిల్లర్ వెల్లడించారు.

అది ద్వైపాక్షిక సమావేశం కాదని అందుకే కెనడా గురించి ఎలాంటి చర్చలు జరపలేదని ఆయన స్పష్టం చేశారు. ఈ విషయంలో తాము స్పష్టంగా వున్నామని చెప్పారు. దర్యాప్తు విషయంలో కెనడాకు సహకరించాలని భారత్ ను కోరామని వెల్లడించారు.

ఢిల్లీ సీఎం అధికార నివాసం నిర్మాణ విషయంలో టెండర్ (Tender) నిబంధనలను ఉల్లంఘించారన్న ఆరోపణలపై సీబీఐ (CBI) దర్యాప్తు ప్రారంభించింది. ఢిల్లీలోని పేరు తెలియని ప్రభుత్వ అధికారులపై సీబీఐ విచారణ మొదలు పెట్టింది. మొదటగా దీనిపై సీబీఐ ప్రాథమిక విచారణ చేపట్టనుంది. విచారణ సమయంలో ఏవైనా వివరాలు వెలుగులోకి వస్తే దాని ఆధారంగా సీబీఐ రెగ్యులర్ కేసును నమోదు చేయనుంది.

ఈ కేసులో భాగంగా పలువురు ఢిల్లీ ప్రభుత్వ అధికారులను ప్రశ్నించనున్నారు. ఇప్పటికే సీఎం అధికార నివాస నిర్మాణానికి సంబంధించిన టెండర్ పత్రాలు, మార్బుల్​ ఫ్లోరింగ్, మాడ్యులర్ కిచెన్​ పనుల వివరాలు, కాంట్రాక్టర్లు సమర్పించిన బిడ్లు సమర్పించాలని ఢిల్లీ ప్రజాపనుల శాఖను సీబీఐ అధికారులు ఆదేశించారు. వాటితో పాటు కాంట్రాక్టర్లకు చెల్లించిన బిల్లు పూర్తి వివరాలను అందజేయాలని తెలిపారు.

సీబీఐ కేసు నేపథ్యంలో ఆమ్ ఆద్మీ పార్టీ (ఆప్) పై బీజేపీ తీవ్ర స్థాయిలో విరుచుకు పడింది. ముఖ్య మంత్రి అధికార నివాసంలో ఈ నిర్మాణాలన్నింటికీ ఈ అనుమతులు ఎవరు ఇచ్చారనే వివరాలను కేజ్రీవాల్ వెల్లడించాల్సి వుంటుందని బీజేపీ ఢిల్లీ చీఫ్ వీరేంద్ర సచ్ దేవ్ అన్నారు. అన్ని నిబంధనలను ఉల్లంఘించి ఈ భవనాన్ని నిర్మించారని, ఇందులో భారీగా అవినీతి చోటు చేసుకుందని తాము మొదటి నుంచి చెబుతున్నామన్నారు.

బీజేపీ ఆరోపణలను ఆప్ తీవ్రంగా ఖండించింది. ఆప్ ను పూర్తిగా అంతం చేసేందుకు బీజేపీ ప్రయత్నాలు చేస్తోందని ఆరోపించింది. దీని కోసం బీజేపీ అన్ని అధికారాలను ఉపయోగిస్తుందని వెల్లడించింది. ఇప్పుడు జరుగుతున్న పరిణామాలు దానికి నిదర్శనమని చెప్పింది. దేశంలోనే అత్యుత్తమ విద్య, వైద్యం అందించిన ఆప్ మంత్రులను జైలులో వేశారన్నారు. ఎన్ని దర్యాప్తులు చేసినా సామాన్య ప్రజల కోసం ఆప్ చేసే పోరాటం ఆగదని తేల్చి చెప్పింది.

కెనడా (Canada) వివాదంపై విదేశాంగ మంత్రి జై శంకర్ (Jai Shankar) స్ట్రాంగ్ రిప్లై ఇచ్చారు. తాజాగా హర్దీప్ సింగ్ నిజ్జర్ (Hardeep Singh Nijjar) హత్య విషయంలో కెనడా వ్యాఖ్యలను ఆయన మరోసారి ఖండించారు. భారత్ ఎప్పుడూ అలాంటి చర్యలకు పాల్పడదని మరోసారి స్పష్టం చేశారు. కెనడాలో పెరిగిపోతున్న వేర్పాటు వాద గ్రూపులు, హింస, తీవ్రవాదంతో ముడిపడి ఉన్న వ్యవస్థీకృత నేరాలపై ఆయన ఆందోళన వ్యక్తం చేశారు.

కౌన్సిల్ ఆఫ్ ఫారిన్ రిలేషన్స్‌లో ఆయన మాట్లాడుతూ….. గత కొన్నేండ్లుగా కెనడాలో హింస, తీవ్రవాద ఘటనలతో పాటు వేర్పాటు వాద వ్యవస్థీకృత నేరాలు పెరిగి పోయాయని అన్నారు. ఇదంతా కేవలం రాజకీయాల ప్రయోజనాల కోసమే జరుగుతోందన్నారు. ఈ నేరాలపై కొన్ని ప్రభుత్వాలు ఎలాంటి చర్యలు తీసుకోవడం లేదంటూ ట్రూడో సర్కార్ కు చురకలంటించారు.

ఈ అంశాలన్నీ ఒక దానితో ఒకటి ముడి పడి వున్నాయని చెప్పారు. నిజ్జర్ హత్య విషయంలో ఫైవ్ ఐస్ గ్రూపు పాత్ర, సిక్కు నాయకులకు ఎఫ్ బీఐ హెచ్చరికల గురించి మీడియా అడిగిన ప్రశ్నలకు ఆయన సమాధానమిస్తూ…. తాము ఫైవ్ ఐస్ లో సభ్యులం కాదన్నారు. ఖచ్చితంగా ఎఫ్ బీఐలో భాగం కాదని చెప్పారు. అందుకే మీరు సరైన వ్యక్తిని ఈ ప్రశ్న అడగలేదని తాను భావిస్తున్నానన్నారు.

కెనడా ప్రధాని ట్రూడో వ్యాఖ్యలపై ఆయన స్పందించారు. హర్దీప్ సింగ్ నిజ్జర్ హత్య గురించి కెనడా ఏదైనా స్పష్టమైన సాక్ష్యాలను సమర్పించి వుంటే భారత్ చర్య తీసుకుని ఉండేదన్నారు. నిజ్జర్ హత్య వెనుక భారత్ హస్తం వుందన్న వ్యాఖ్యలను ఆయన ఖండించారు. భారత్ తన విధానాల ప్రకారం ఇలాంటి చర్యలకు పాల్పడదని ఆయన స్పష్టం చేశారు.

వైబ్రెంట్ గుజరాత్ గ్లోబల్ సమ్మిట్ 20వ వార్షికోత్సవం సందర్బంగా నిర్వహించిన కార్యక్రమంలో ప్రధాని మోడీ (PM Modi) పాల్గొన్నారు. ఈ కార్యక్రమంలో భాగంగా అహ్మదాబాద్ లోని సైన్స్ సిటీని (Science City) ప్రధాని మోడీ సందర్శించారు. ఈ సందర్బంగా ప్రధానికి రోబో (Robo) లు ఘన స్వాగతం పలికాయి. అనంతరం సైన్స్ సిటీలోని పలు ఇన్నోవేటివ్ ప్రాజెక్టులను ప్రధాని మోడీ పరిశీలించారు.

రోబోటిక్ ఎగ్జ్ బిషన్ ను తిలకించిన మోడీ అక్కడ గ్యాలరీలో వున్న డీఆర్​డీఓ రోబోలు, మైక్రోబాట్​ల గురించి అధికారులను అడిగి పూర్తి వివరాలు తెలుసుకున్నారు. వ్యవసాయంతో పాటు పలు రంగాల్లో ఉపయోగించే రోబోల గురించి అధికారులు ఆయనకు వివరించారు. ఈ సందర్బంగా గ్యాలరీలోని ఓ కేఫ్ ను సందర్శించారు. ఆ సమయంలో అక్కడి రోబోలు ఆయనకు టీని అందించాయి.

కేఫ్ లో ప్రధాని మోడీ ఓ టేబుల్ పై కూర్చోగా రోబో ఒకటి వచ్చి ప్రధానికి బిస్కెట్లు అందించం అందరినీ ఆకట్టుకుంది. దీనికి సంబంధించిన వీడియోలు ఇప్పుడు తెగ వైరల్ అవుతున్నాయి. ఇది ఇలా వుంటే రాష్ట్రంలోని చోటా ఉదయ్ పూర్ లో రూ. 5206 కోట్ల విలువైన అభివృద్ధి పనులను మోడీ ప్రారంభించారు. దీంతో పాటు 22 జిల్లాల్లో వైఫై సౌకర్యాలను ప్రారంభించారు.

అనంతరం వైబ్రంట్ గుజరాత్ సదస్సులో ప్రధాని మాట్లాడారు. భారత్ ఇప్పుడు ప్రపంచ ఆర్థిక శక్తిగా ఎదుగుతోందన్నారు. త్వరలోనే ప్రపంచ మూడవ అతి పెద్ద ఆర్థిక శక్తిగా భారత్ ఎదుగుతుందన్నారు. భారత్​ను ప్రపంచ వృద్ధి ఇంజిన్​గా మార్చడమే తన లక్ష్యమన్నారు. 20 ఏండ్ల క్రితం వైబ్రంట్ గుజరాత్ అనే ఒక చిన్న విత్తనాన్ని నాటామని చెప్పారు. ఇప్పుడు అది మహా వృక్షంగా మారిందన్నారు.

భారత అంతరిక్ష పరిశోధన సంస్థ (ISRO) మరో ప్రతిష్టాత్మక పరిశోధనకు రెడీ అయింది. తాజాగా శుక్రుని (Venus)పై పరిశోధనలకు గాను వీనస్ మిషన్‌కు ఏర్పాట్లు సాగుతున్నాయని తెలిపారు. వీనస్ మిషన్ కు సంబంధించి రెండు పేలోడ్స్ ను అభివృద్ధి చేసినట్టు ఇస్రో వెల్లడించింది. అయితే శుక్రయాన్ ఎప్పుడు లాంఛింగ్ చేస్తారనే విషయాన్ని ఇస్రో వెల్లడించలేదు.

ఢిల్లీలోని ఇండియన్ నేషనల్ సైన్స్ అకాడమీలో నిర్వహించిన కార్యక్రమంలో ఇస్రో చైర్మన్ సోమనాథ్ పాల్గొన్నారు. ఈ సందర్భంగా ఆయన మాట్లాడుతూ…. ప్రస్తుతం తమ ముందు చాలా మిషన్లు వున్నాయని చెప్పారు. వీనస్‌ మిషన్ ను ఇప్పటికే కాన్ఫిగర్ చేసినట్టు వెల్లడించారు. వీనస్ మిషన్ కోసం తాజాగా రెండు పెలోడ్స్ ను అభివృద్ధి చేసినట్టు తెలిపారు.

వచ్చే ఏడాది డిసెంబర్‌లో వీనస్ మిషన్ ను లాంఛ్ చేయనున్నట్టు చెప్పారు. కానీ స్పష్టమైన తేదీని మాత్రం ఆయన ప్రకటించలేదు. శుక్ర గ్రహం అనేది చాలా ఆసక్తికరమైన గ్రహమని తెలిపారు. దానిపై వాతావరణం కూడా ఉందన్నారు. భూమిపై ఉన్న వాతావరణం కంటే వంద రెట్లు పీడనం ఉంటుందన్నారు. అందులో పూర్తి ఆమ్లాలతో నిండి వుందన్నారు.

వీనస్ ఉపరితలంపైకి మనం ప్రవేశించలేమన్నారు. దాని ఉపరితలం గట్టిగా ఉందో లేదో మనకు తెలియదన్నారు. ఈ విషయాలన్నింటినీ తాము ఎందుకు అర్థం చేసుకోవాలని అనుకుంటున్నారో తెలిపారు. కొన్ని వేల సంవత్సరాల తర్వాత ఒక రోజు భూమి కూడా శుక్రగ్రహంలా మారి పోవచ్చన్నారు. ఒక పదివేల ఏండ్ల తర్వాత భూమి లక్షణాలు మారిపోవచ్చన్నారు.

ఇక చంద్రయాన్-3లోని ల్యాండర్, రోవర్లు యాక్టివ్ మోడ్ లోకి వస్తాయన్న ఆశలు పూర్తిగా సన్నగిల్లు తున్నాయి. లూనార్ డే నేపథ్యంలో రోవర్, ల్యాండర్లు ఇటీవల స్లీప్ మోడ్ లోకి వెళ్లిపోయాయి. తర్వాత ఈ నెల 22న చంద్రుని దక్షిణ భూభాగంపై సూర్యోదయం అయింది. దీంతో ల్యాండర్, రోవర్ లతో మరోసారి అనుసంధానం అయ్యేందుకు చేస్తున్న ప్రయత్నాలు ఫలించడం లేదు.

వివేక్ అగ్నిహోత్రి (Vivek Agnihotri) తీసిన ‘వ్యాక్సిన్ వార్’ (Vaccine War) చిత్రంపై కాంగ్రెస్ ఎంపీ శశిథరూర్ తీవ్ర స్థాయిలో విరుచుకు పడ్డారు. ఇది పబ్లిసిటి కోసం చేస్తున్న చౌకబారు ప్రయత్నాలుగా ఆయన అభివర్ణించారు. ఆయన వ్యాఖ్యలపై న్యాయ సలహా తీసుకుంటానని వెల్లడించారు. ఒకే అబద్దాన్ని పదే పదే చెబితే దాన్ని నిజమని జనాలు నమ్మే అవకాశం ఉందని ఆయన ఆందోళన వ్యక్తం చేశారు.

ఇటీవల ఓ మీడియా సంస్థకు ఇచ్చిన ఇంటర్వ్యూలో వివేక్ అగ్నిహోత్రి శశథరూర్ గురించి పలు వ్యాఖ్యలు చేశారు. ఇంటర్వ్యూలో ఆయన మాట్లాడుతూ…. తాము వ్యాక్సిన్ వార్ ప్రమోషన్ కోసం వచ్చామని తెలిపారు. కాంగ్రెస్ ఎంపీ శశిథరూర్, ఢిల్లీ సీఎం కేజ్రీవాల్ విదేశీ వ్యాక్సిన్ ప్రమోషన్ కోసం డబ్బులు తీసుకున్నారంటూ ఆయన ఆరోపణలు చేశారు.

ఒక వేళ రైట్ వింగ్ వ్యక్తులు డబ్బుల కోసం జవాన్ సినిమాను ప్రమోట్ చేస్తే అది సమస్య కాదన్నారు. దాని వల్ల ఆ వ్యక్తులకు కేవలం కొంత డబ్బు మాత్రమే వస్తుందన్నారు. అమితాబ్ బచ్చన్, షారుఖ్ ఖాన్, అమీర్ ఖాన్, విరాట్ కోహ్లీ లాంటి ఇతర సెలబ్రిటీలు తాము వాడని వస్తువులను కూడా ప్రమోట్ చేస్తారన్నారు. అది ఒక రకమైన వ్యాపారమన్నారు.

కానీ రాజ్యాంగ బద్దమైన పదవుల్లో వున్న వాళ్లు దేశ ప్రయోజనాలకు వ్యతిరేకంగా ఏదైనా ప్రచారం చేయడానికి డబ్బు తీసుకోవడం చాలా ఆందోళనకరమన్నారు. సీఎం కేజ్రీవాల్, శశిథరూర్ లపై తాను కేవలం ఆరోపణలు చేయడం లేదన్నారు. తాను వాస్తవాలను మాత్రమే చెబుతున్నానన్నారు. సినిమాలో అన్ని విషయాలను చూపించామన్నారు. ఇండియన్ వెర్షన్‌లో కొన్ని విషయాలు అస్పష్టంగా ఉన్నాయనని కాబట్టి వాటిని చూపించలేదన్నారు, కానీ విదేశాల్లో విడుదలైన వెర్షన్‌లో అది స్పష్టంగా వుందన్నారు.

ఇంటర్నేషనల్ సొసైటీ ఫర్ కృష్ణ కాన్షియస్ నెస్ (Iskcon)పై బీజేపీ ఎంపీ మేనకా గాంధీ (Menaka Gandhi) సంచలన ఆరోపణలు చేశారు. దేశంలో ఇప్పుడు అతి పెద్ద మోసమంటే ఇస్కాన్ అంటూ ఆమె తీవ్ర స్థాయిలో మండిపడ్డారు. ఇస్కాన్ తన గోశాల్లోని పశువులను కసాయి వాళ్లకు అమ్ముకుంటోందని ఆరోపించారు. ఈ వ్యాఖ్యలపై ఇస్కాన్ తీవ్ర స్థాయిలో మండిపడుతోంది.

ఇస్కాన్ వాళ్లు గోశాలను ఏర్పాటు చేశారని చెప్పారు. వాటిని నడిపేందుకు ప్రభుత్వం నుంచి అపరిమితమైన ప్రయోజనాలను ఇస్కాన్ పొందుతోందన్నారు. ఈ గోశాల కోసం అపారమైన భూములను ప్రభుత్వం ఇస్తోందన్నారు. తాను ఇటీవల అనంతపుట్ గోశాలను సందర్శించానన్నారు. కానీ అక్కడ పాలు ఇచ్చే ఆవు ఒకటి కూడా లేదని ఆమె వెల్లడించారు.

అక్కడ దూడలు కూడా లేవన్నారు. అన్ని ఆవులను కసాయిలకు అమ్మి వేస్తున్నట్టు తెలిసిందన్నారు. తమ జీవితమంతా పాల పైనే ఆధారపడి ఉందని వారు చెబుతారు… బహుశా వారు కసాయిలకు విక్రయించినంతగా పశువులను మరొకరు విక్రయించి వుండరని ఆమె అన్నారు. ఆమె వ్యాఖ్యలకు సంబంధించిన వీడియో ఇప్పుడు వైరల్ అవుతోంది.

ఈ వ్యాఖ్యలపై తాజాగా ఇస్కాన్ స్పందించింది. మేనకా గాంధీ వ్యాఖ్యలు నిరాధారమైనవని అని పేర్కొంది. తాము గోవులు, ఆవుల సంరక్షణకు అధిక ప్రాధాన్యత ఇస్తామని ఇస్కాన్ యుదిష్టర్ గోవింద్ దాస్ తెలిపారు. తాము కేవలం భారత్ లోనే కాదు ప్రపంచ వ్యాప్తంగా పలు దేశాల్లో గోవులను, పశువులను ఆదరిస్తున్నట్టు ఆయన ట్వీట్ చేశారు.