National

క్రికెట్ లెజెండ్ కపిల్ దేవ్‌ (Kapil Dev) కిడ్నాప్ నకు సంబంధించిన వార్త వైరల్ అవుతోంది. ఇద్దరు  వ్యక్తులు కపిల్ నోటికి కర్చీఫ్, చేతులకు తాళ్లు కట్టి బలవంతంగా ఓ గదిలోకి తీసుకు వెళ్లారు. దీనికి సంబంధించిన వీడియోను భారత మాజీ క్రికెటర్, ఎంపీ గౌతం గంభీర్ (Ghambir) పోస్టు చేశారు. ఇప్పుడు ఈ వీడియో సోషల్ మీడియాలో వైరల్ అవుతోంది.

ఇంతకు ఏం జరిగిందంటే…. టీమ్ ఇండియా మాజీ కెప్టెన్, హర్యానా హరికేన్‌ను కిడ్నాప్ చేశారా? అంటూ గౌతం గంభీర్ ఓ వీడియో షేర్ చేశారు. అందులో కపిల్ దేవ్ ను ఇద్దరు గుర్తు తెలియని వ్యక్తులు కిడ్నాప్ చేస్తున్నట్టు కనిపిస్తోంది. ఈ వీడియో తనకు వచ్చిందని వచ్చిందని, మీకు కూడా ఇలాంటి వీడియో వచ్చిందా అని గంభీర్ తన అభిమానులను ప్రశ్నించారు.

వీడియోలోని వున్న వ్యక్తి కపిల్ దేవ్ కాకూడదని తాను కోరుకుంటున్నట్టు చెప్పారు. ఆయనకు ఏమీ కాకూడదని, దేవుని దయ వల్ల ఆయన క్షేమంగా వుండాలని కోరుకుంటున్నట్టు ఆయన కామెంట్ చేశారు. దీంతో కపిల్ కు ఏమైందని నెటిజన్లు, ఆయన అభిమానులు అంతా కంగారు పడ్డారు.

కానీ కాసేపటి తర్వాత అసలు విషయం బయట పడింది. ఆ వీడియో కపిల్ దేవ్ నటించిన ఓ యాడ్ కు సంబంధించిన క్లిప్ అని తెలిసింది. దీంతో విషయం తెలుసుకుని జనాలు పడి పడి నవ్వుకున్నారు. మొదట్లో అభిమానులు కాస్త కంగారు పడ్డా ఆ తర్వాత అసలు విషయం తెలుసుకుని ఎంజాయ్ చేశారు.

కర్ణాటక కాంగ్రెస్ ఎమ్మెల్యే బీఆర్ పాటిల్ (BR Patil) సంచలన వ్యాఖ్యలు చేశారు. రాబోయే లోక్ సభ ఎన్నికల్లో హిందూ ఓట్ల కోసం బీజేపీ (BJP) మత ఘర్షణలు రెచ్చే గొట్టే అవకాశం ఉందంటూ ఆయన ఆరోపణలు చేశారు. ఆయన వ్యాఖ్యలకు సంబంధించిన వీడియోను షేర్ చేస్తూ కాంగ్రెస్ ఎమ్మెల్యేపై కాషాయ పార్టీ తీవ్ర స్థాయిలో ధ్వజమెత్తింది.

ఆ వీడియోలో బీజేపీపై బీఆర్ పాటిల్ తీవ్ర వ్యాఖ్యలు చేశారు. రాబోయే లోక్ సభ ఎన్నికల్లో ప్రధాని మోడీ గెలవాలని బీజేపీ అనుకుంటున్నట్టు చెప్పారు. ఈ నేపథ్యంలో రామ్ మందిర్ పై బాంబు దాడి చేసి దాన్ని ముస్లిం వర్గాలపై నెట్టే అవకాశం ఉందంటూ ఆయన వ్యాఖ్యానించడం ఆ వీడియోలో కనిపిస్తోంది. ఆ వ్యాఖ్యలు ఎప్పుడు చేశారనే దానిపై బీజేపీ స్పష్టత ఇవ్వలేదు.

బీఆర్ పాటిల్ వ్యాఖ్యలపై బీజేపీ తీవ్ర స్థాయిలో విరుచుకు పడుతోంది. హిందు- ముస్లింల మధ్య విద్వేషాలను రెచ్చగొట్టేలా కాంగ్రెస్ వ్యాఖ్యలు చేస్తోందని పేర్కొంది. హిందూయిజం పునాదులను ప్రశ్నించేందుకు బయలు దేరిన హస్తం పార్టీ ఇప్పుడు రామ మందిరాన్ని దుష్ట బుద్దితో చూస్తోందని మండిపడింది.

రామ మందిరాన్ని అస్థిర పరిచేందుకు ప్రయత్నించడం ద్వారా హిందూ, ముస్లింల మధ్య విద్వేషాన్ని పెంచేందుకు కాంగ్రెస్ ప్రయత్నిస్తోందని బీజేపీ ఆగ్రహం వ్యక్తం చేసింది. ఈ విషయాన్ని ఇప్పుడు ముందుగానే ఆ పార్టీ ఎమ్మెల్యే బీఆర్ పాటిల్ పొరబాటున బయట పెట్టేశారంటూ వ్యాఖ్యలు చేసింది.

కెనడా -భారత్ మధ్య దౌత్య పరమైన వివాదం కొనసాగుతోంది. ఈ నేపథ్యంలో కెనడా రక్షణ శాఖ మంత్రి (Defence Minister) బిల్ బ్లేయిర్ కీలక వ్యాఖ్యలు చేశారు. భారత్ (India) తో సంబంధాలు తమకు అత్యంత ముఖ్యమైన (Important) వని పేర్కొన్నారు. భారత్ తో సంబంధాలకు సంబంధించి ఇది అత్యంత సవాలుతో కూడుకున్న సమస్య అని ఆయన వెల్లడించారు.

అదే సమయంలో ఈ విషయంపై తాము సమగ్ర దర్యాప్తు కొనసాగిస్తామని చెప్పారు. ఈ అంశంలో వాస్తవాలను వెలికి తీసేలా చూసుకోవాల్సిన బాధ్యత తమపై వుందని తెలిపారు. ఒక వేళ భారత్ పై వచ్చిన ఆరోపణలు నిజమని తేలితే అది చాలా ఆందోళనకర అంశంగా మారుతుందన్నారు. తమ గడ్డపై తమ పౌరున్ని హత్య చేయడం ఖచ్చితంగా తమ సార్వభౌమత్వాన్ని ఉల్లంఘించడమే అవుతుందన్నారు.

మరోవైపు ఖలిస్తాన్ ఉగ్రవాది హర్ దీప్ సింగ్ నిజ్జర్ హత్య విషయంలో కెనడా ప్రధాని ట్రూడో వ్యాఖ్యలకు భారత విదేశాంగ మంత్రి ఎస్. జైశంకర్ స్ట్రాంగ్ కౌంటర్ ఇచ్చారు. ట్రూడోపై ఆయన పరోక్ష విమర్శలు గుప్పించారు. స్వేచ్ఛ పేరుతో ఎలానైతే చాలా పనులు జరుగుతున్నాయో అదే విధంగా మార్కెట్ పేరుతోనూ చాలా పనులు జరుగుతాయని అన్నారు.

ఇటీవల కెనడాలోని సర్రే ప్రాంతంలో ఖలిస్తాన్ టైగర్ ఫోర్స్ చీఫ్ హర్దీప్ సింగ్ నిజ్జర్ హత్యకు గురయ్యారు. ఈ హత్య వెనుక భారత ప్రమేయం ఉందంటూ కెనడా ప్రధాని ట్రూడో తీవ్ర వ్యాఖ్యలు చేశారు. ఈ మేరకు భారత దౌత్యవేత్తను బహిష్కరిస్తున్నట్టు వెల్లడించారు. దీంతో భారత్ దానికి స్ట్రాంగ్ కౌంటర్ ఇచ్చింది. కెనడా వ్యాఖ్యలను ఖండిస్తున్నట్టు పేర్కొంది. కెనడా దౌత్య వేత్తను బహిష్కరిస్తున్నట్టు స్పష్టం చేసింది. ఐదు రోజుల్లోగా భారత్ ను విడిచి వెళ్లి పోవాలని కెనడా దౌత్య వేత్తకు కేంద్రం సూచించింది.

కాంగ్రెస్ ( Congress) , దాని గమాండియా కూటమి కలిసి మన సంస్కృతిని, సనాతన ధర్మాన్ని నాశనం చేయాలని అనుకుంటున్నాయని ప్రధాని మోడీ (PM Modi) విరుచుకుపడ్డారు. అభివృద్ధి కోసం దేశం ప్రయత్నాలు చేస్తుంటే కాంగ్రెస్ మాత్రం దేశాన్ని వెనక్కి తీసుకు వెళ్లాలని చూస్తోందని మండిపడ్డారు. గతంలో డిజిటల్ ఇండియా ( Digital India) ను కాంగ్రెస్ వ్యతిరేకించిందన్నారు. కానీ ఇప్పడు మన యూపీఐని చూసి ఇండియా ఆశ్చర్యపోతోందన్నారు.

మధ్యప్రదేశ్ లోని భోపాల్ జంబోరీ మైదానంలో నిర్వహించిన ‘కార్యకర్తల మహా కుంభ్’లో ఆయన పాల్గొన్నారు. ఈ సందర్బంగా ఆయన మాట్లాడుతూ….. కాంగ్రెస్ అధికారంలోకి వస్తే రాష్ట్రాన్ని బిమారు (పేద రాష్ట్రం)గా మారుస్తుందన్నారు. దేశంలో ఆదివాసీ మహిళ ద్రౌపది ముర్మును రాష్ట్రపతి కాకుండా అడ్డుకోవాలని కాంగ్రెస్ ప్రయత్నాలు చేసిందని తీవ్రంగా మండిపడ్డారు.

ప్రజల నుంచి వచ్చిన ఒత్తిడి మేరకే కాంగ్రెస్ నేతలు మహిళా రిజర్వేషన్ బిల్లుకు మద్దతు ఇచ్చారని పేర్కొన్నారు. కాంగ్రెస్ వాళ్లంతా సంపన్నుల కుటుంబాల్లో పుట్టిన వాళ్లేనన్నారు. వాళ్లకు పేదవాళ్ల జీవితాలు ఒక పిక్నిక్ లాంటిదన్నారు. పేద, వెనుకబడిన, అణగారిన, బీసీ,ఎస్టీ, ఓబీసీలకు అభివృద్ధి ఫలాలు అందేలా బీజేపీ చేసిందన్నారు. కాంగ్రెస్ తన ప్రయోజనాల కోసం ప్రజలను పేదరికంలో మగ్గిపోయేలా చేశారన్నారు.

గడిచిన ఐదేండ్లలో బీజేపీ పాలనలో 13.5 కోట్ల మంది ప్రజలు పేదరికం నుంచి బయటపడ్డారన్నారు. నారీ శక్తి వందన్ అదినీయమ్ దేశంలో కొత్త చరిత్రను సృష్టించిందన్నారు. ఇది మేక్ ఇన్ ఇండియా, మధ్య ప్రదేశ్ ను అభివృద్ధి చేసే సమయమని పేర్కొన్నారు. ఇలాంటి కీలకమైన సమయంలో కాంగ్రెస్ లాంటి కుటుంబ పార్టీలకు అవకాశం ఇస్తే రాష్ట్రానికి భారీ నష్టం జరుగుతుందన్నారు. కాంగ్రెస్ తుప్పు పట్టిన ఇనుము లాంటిదన్నారు. వర్షం పడితే పూర్తిగా నాశనం అవుతుందని ఎద్దేవా చేశారు.

బాలీవుడ్ బ్యూటీ పరిణితి చోప్రా (Parinti Chopra) , ఆప్ ఎంపీ రాఘవ్ చద్దా (Raghav Chadha) వివాహ బంధంలోకి అడుగు పెట్టారు. పెద్దల సమక్షంలో మూడు ముళ్ల బంధంతో వారిద్దరూ ఒక్కటయ్యారు. తాజాగా తమ అభిమానుల కోసం రాఘవ్-పరణితిలు తమ వివాహ ఫోటోలను ఇన్ స్టాలో షేర్ చేశారు. దానికి అదిరిపోయే క్యాప్షన్ పెట్టారు. తాజాగా ఈ ఫోటోలు సోషల్ మీడియాలో వైరల్ అవుతున్నాయి.

బ్రేక్ ఫాస్ట్ టేబుల్ వద్ద మొదటి సంభాషణల నుంచి తమ హృదయాలకు తెలుసని క్యాప్షన్ లో పేర్కొన్నారు. అప్పటి నుంచి చాలా కాలంగా తాము ఈ రోజు కోసం ఎదురు చూస్తున్నామని అన్నారు.

చివరికి ఆ రోజు రానే వచ్చిందన్నారు. చివరకు తాము ఇద్దరం మిస్టర్ అండ్ మిసెస్ గా మారిపోయామన్నారు. తాము ఒకరు లేకుండా మరొకరు వుండలేమన్నారు. తమ దాంపత్య జీవితం ఈ రోజు నుంచి మొదలు అని రాసుకొచ్చారు.

రాజస్థాన్ లోని ఉదయ్ పూర్ లోని లీలా ప్యాలెస్ లో వీరి వివాహం అత్యంత ఘనంగా జరిగింది. వీరి వివాహానికి సీఎం కేజ్రీవాల్, పంజాబ్ సీఎం భగవంత్ సింగ్ మాన్, టెన్నిస్ క్రీడాకారిణి సానియా మిర్జాతో పాటు ఇతర రాజకీయ నాయకులు హాజరయ్యారు. వీరితో పాటు బాలీవుడ్ తారలు కూడా హాజరయ్యారు. వీరి జంటను ఇప్పుడు అంతా రాఘ్ నీతి అని పిలుస్తున్నారు.

ఈ వివాహానికి కరణ్ జోహార్ హాజరు కావాల్సి వుండగా చివరి నిమిషంలో గైర్హాజరయ్యారు. ఇక పరిణితి వివాహానికి ఆమె కజిన్ బాలీవుడ్ నటి ప్రియాంక చోప్రా హాజరవుతారని అంతా అనుకున్నారు.

కానీ బిజీ షెడ్యూల్ వల్ల ప్రియాంక చోప్రా ఈ వివాహానికి హాజరు కాలేకపోయారని ప్రియాంక తల్లి వెల్లడించారు. తాజాగా పరిణితి వివాహ ఫోటోలపై ఆమె కామెంట్ చేశారు. ఆ జంటకు తన ఆశీర్వాదాలు వుంటాయని రాసుకొచ్చారు.

మధ్య ప్రదేశ్‌ (Madhya Pradesh) లో ఘోర రోడ్డు ప్రమాదం చోటు చేసుకుంది. ఉమారియా జిల్లాలో కారు (Car) ఒకటి చెట్టును ఢీ కొట్టింది. ఈ ఘటనలో ఐదుగురు మృతి చెందారు. మజగావా గ్రామంలోని జాతీయ రహదారి 43పై ఉదయం 3 గంటల సమయంలో ప్రమాదం చోటు చేసుకున్నట్టు పోలీసులు వెల్లడించారు. ప్రయాణికులు ఉమారియా నుంచి షహడోల్ కు వెళుతుండగా ప్రమాదం చోటు చేసుకున్నట్టు పోలీసులు వెల్లడించారు.

ఉమారియా నుంచి వేగంగా వస్తున్న కారు మజగావా గ్రామానికి చేరుకోగానే చెట్టును ఢీ కొట్టిందని ఏఎస్ఐ శైలేంద్ర చతుర్వేది తెలిపారు. ఘటనలో ముగ్గురు అక్కడికక్కడే మరణించినట్టు పేర్కొన్నారు. మరో ఇద్దరికి తీవ్రగాయాలయ్యాయన్నారు. దీంతో వారిని ఆస్పత్రికి తరలించగా చికిత్స పొందుతూ మృతి చెందారని చెప్పారు. మృతులంతా 30 నుంచి 35 మధ్య వయస్సు వారేనన్నారు.

మరోవైపు ఖర్గోనే జిల్లాలో ఘోర రోడ్డు ప్రమాదం చోటు చేసుకుంది. కాసర్ వాడ్ ప్రాంతంలో ఆగి వున్న ట్రక్కును బీజేపీ కార్యకర్తలు ప్రయాణిస్తున్న బస్సు ఢీ కొట్టింది. ఈ ఘటనలో 39 మంది బీజేపీ కార్యకర్తలకు తీవ్ర గాయాలయ్యాయి. భోపాల్ లో జరుగుతున్న ‘కార్యకర్త మహకుంభ’ కార్యక్రమానికి వెళుతుండగా ఈ ప్రమాదం చోటు చేసుకుందని పోలీసులు తెలిపారు.

క్షతగాత్రులను సమీపంలోని ఆస్పత్రికి తరలించినట్టు చెప్పారు. కార్యకర్తలంతా రూప్ ఘర్, కాప్రాజ్ మలి, రాయ్ సాగర్ ప్రాంతాలకు చెందిన వారిగా పోలీసులు వెల్లడించారు. రాష్ట్రవ్యాప్తంగా నిర్వహించిన జన్ ఆశీర్వాద్ యాత్ర అధికారిక ముగింపు, జన సంఘ్ సహ వ్యవస్థాపకుడు దీన్ దయాళ్ ఉపాధ్యాయ జయంతి సందర్బంగా కార్యకర్త మహాకుంభ్ నిర్వహిస్తున్నట్లు పార్టీ నేతలు చెప్పారు.

చత్తీస్ గఢ్‌ (Chattisgadh) లో మరో ప్రతిష్టాత్మక పథకాన్ని కాంగ్రెస్ (Congress) ప్రారంభించనుంది. బిలాస్ పూర్‌ జిల్లాలో ముఖ్యమంత్రి గ్రామీణ్ ఆవాస్ న్యాయ యోజనా ను కాంగ్రెస్ అగ్రనేత రాహుల్ గాంధీ (Rahul Gandhi) ప్రారంభించనున్నారు. ఈ పథకం కింద గ్రామీణ ప్రాంతాల్లో ఇళ్లు లేని నిరుపేద ప్రజలకు ఆర్థిక సహాయాన్ని అందించనున్నారు.

ఈ పథకం కింద లబ్దిదారులకు మొదటి విడత ఆర్థిక సహాయాన్ని రాష్ట్ర ముఖ్యమంత్రి భూపేశ్ బాఘేల్ పంపిణీ చేయనున్నారు. మొదటి విడత కింద లబ్దిదారులకు రూ. 25000లను ముఖ్యమంత్రి పంపిణీ చేయనున్నారు. మొత్తం 1,30,000 మంది లబ్దిదారులను ఈ పథకం కింద ఎంపిక చేశారు. బిలాస్ పూర్ జిల్లాలోని సాక్రి గ్రామంలో తక్త్ పూర్ గ్రామంలో ఈ కార్యక్రమాన్ని నిర్వహించనున్నట్టు అధికారులు వెల్లడించారు.

మొత్తం 1.30 లక్షల మంది లబ్దిదారుల్లో 1 లక్ష మందిని ప్రధాన మంత్రి ఆవాస్ యోజన కింద పర్మినెంట్ వెయిటింగ్ లిస్టులో పెట్టారు. మరోవైపు ముఖ్యమంత్రి నిర్మాణ్ శ్రామిక్ ఆవాస్ సఖ్యత యోజనా కింద 500 మంది లబ్దిదారుల అకౌంట్లలో రూ. 5 కోట్లు జమచేయనున్నారు. ఈ ఏడాది మే నెలలో ఈ పథకాన్ని ప్రభుత్వం ప్రారంభించింది.

ఈ పథకం కింద నమోదు చేసుకున్న చత్తీస్ గఢ్ బిల్డింగ్, నిర్మాణ కార్మికుల సంక్షేమ సంఘం కార్మికులకు ఇళ్ల నిర్మాణం కోసం రూ. 1 లక్ష చొప్పున ఆర్థిక సహాయాన్ని అందించనున్నారు. దీంతో పాటు బిలాస్ పూర్ జిల్లాలో రూ. 524.33 కోట్లు విలువ చేసే పలు అభివృద్ది పనులను రాహుల్ గాంధీ, భూపేశ్ బాఘేల్ శంకుస్థాపన చేయనున్నారు. జిల్లాలో నూతనంగా నియమితులైన 2594 మంది ఉపాధ్యాయులకు అపాయింట్ మెంట్ లెటర్లు అందించనున్నారు.