Politics

సీఎం కేసీఆర్ (CM KCR) కు జ్వరం తగ్గకపోవడంతో అన్నీ తానై నడిపిస్తున్నారు మంత్రి కేటీఆర్ (KTR). వరుసగా జిల్లా పర్యటలను చేస్తున్నారు. ప్రారంభోత్సవాలు, శంకుస్థాపనలు ఇలా ఏదో ఒక కార్యక్రమంలో పాల్గొంటూనే ఉన్నారు. శనివారం ఖమ్మం (Khammam) జిల్లాలో పర్యటించారు. అయితే.. నిరుద్యోగుల నుంచి ఆయనకు నిరసన సెగ తగిలింది. జీవో నెంబర్ 46 ను వెంటనే రద్దు చేయాలని వారు డిమాండ్ చేశారు. మెరిట్ ప్రకారం ఉద్యోగాలు ఇవ్వాలన్నారు. మంత్రి కాన్వాయ్ ముందు ప్లకార్డులతో నిరసన తెలిపారు.

పోలీసులు నిరసనకారులను చెదరగొట్టారు. తెలంగాణ వస్తే ఇంటికో ఉద్యోగం ఇస్తామని.. ఇన్ని సంవత్సరాలైన ఎవ్వరికీ రాలేదని మండిపడ్డారు నిరుద్యోగులు. ఇక నుంచి అయినా తమ బాధలను ప్రభుత్వం పట్టించుకోవాలని డిమాండ్ చేశారు. ఇక పామాయిల్ ఫ్యాక్టరీ నిర్మాణానికి భూమి పూజ చేసిన కేసీఆర్ తర్వాత లకారం ట్యాంక్ బండ్ ను సందర్శించి ఎన్టీఆర్ (NTR) పార్కును ప్రారంభించారు. అక్కడే అండర్ గ్రౌండ్ డ్రైనేజీ సిస్టమ్ ను స్టార్ట్ చేశారు. రామచంద్రయ్యనగర్ సహా వివిధ ప్రాంతాల్లో ఏర్పాటు చేసిన మున్సిపాలిటీ పార్కులను ప్రారంభించారు.

చరిత్రలోని మహనీయుల స్థానంలో ఎన్టీఆర్ స్థానం పదిలంగా ఉంటుందని, ఆయన విగ్రహాన్ని, ఆయన పేరున ఉన్న పార్కుని ప్రారంభించడం తన అదృష్టమని కేటీఆర్ పేర్కొన్నారు. భారత దేశంలో తెలుగు వారంటూ ఉన్నారంటూ గుర్తించేలా చేసింది ఎన్టీఆరే అని అన్నారు. తారక రామారావు అనే పేరులోనే ఏదో శక్తి ఉందని.. ఆయన శిష్యుడు కేసీఆర్ తెలంగాణ అస్తిత్వాన్ని యావత్ దేశానికి చాటి చెప్పారని వ్యాఖ్యానించారు.

దక్షిణ భారతావనిలో ఎన్టీఆర్ సహా ఎవరూ సీఎంగా హ్యాట్రిక్ కొట్టలేకపోయారని.. కానీ, కేసీఆర్‌ వచ్చే ఎన్నికల్లో గెలిచి రికార్డ్ క్రియేట్ చేస్తారని ధీమా వ్యక్తం చేశారు. తద్వారా గురువు చేయలేని పనిని శిష్యుడు కేసీఆర్ సాధ్యం చేయబోతున్నారని వ్యాఖ్యానించారు. కొందరికి పదవులు వన్నె తెస్తే.. కొందరు పదవులకే వన్నె తెస్తారని అలాంటి వ్యక్తుల్లో ఎన్టీఆర్ చిరస్మరణీయుడని కొనియాడారు కేటీఆర్.

నాపై రాళ్లు వేస్తే వాటితో ఇల్లు కట్టుకుంటా.. నాపై దాడి చేస్తే ఆ రక్తాన్ని సిరాగా వాడుకుంటా.. ఆ సిరాతోనే నా చరిత్ర నేనే రాసుకుంటా అంటూ కీలక వ్యాఖ్యలు చేశారు గవర్నర్ తమిళిసై (Tamilisai). శనివారం మహిళా రిజర్వేషన్‌ బిల్లుపై రాజ్‌ భవన్‌ (Raj Bhavan) లో ధన్యవాదాలు తెలిపే సభ నిర్వహించారు గవర్నర్‌. ఈ సందర్భంగా మాట్లాడుతూ… తమకు 33 శాతం రిజర్వేషన్లు కల్పించినందుకు ప్రధాని మోడీ (PM Modi) కి కృతజ్ఞతలు తెలిపారు.

ఇక, బీఆర్ఎస్ (BRS) సర్కార్‌ పై తమిళిసై మరోసారి పరోక్ష విమర్శలు చేశారు. గవర్నర్‌ గా తెలంగాణలో తాను అడుగుపెట్టిన సమయానికి కేబినెట్‌ లో ఒక్క మహిళా మంత్రి కూడా లేరని వ్యాఖ్యానించారు. తాను వచ్చిన తర్వాత ఇద్దరు మహిళా మంత్రులతో ప్రమాణ స్వీకారం చేయించానని చెప్పారు. తాను రావడంతో ఇద్దరు మహిళలకు మంత్రులుగా అవకాశం రావడం సంతోషంగా అనిపించిందన్నారు.

వివాదాస్పదమైన ప్రోటోకాల్ అంశంపైనా స్పందించారు గవర్నర్. ప్రభుత్వం ప్రొటోకాల్ ఇచ్చినా, ఇవ్వకపోయినా తన పని తాను చేసుకుంటూ పోతానని స్పష్టం చేశారు. ఎన్ని అవమానాలు ఎదురైనా వెనక్కి తగ్గేది లేదన్నారు. మోడీ నాయకత్వంలో మహిళా రిజర్వేషన్ల బిల్లు ఆమోదం పొందిందని సంతోషం వ్యక్తం చేశారు. తన తండ్రి రాజకీయ నాయకుడు అయినా… తాను సాధారణ రాజకీయ కార్యకర్తగా ప్రయాణం ప్రారంభించానని గుర్తుచేశారు.

గవర్నర్ కంటే ముందు తాను రాజకీయ నాయకురాలినని… దాంట్లో రహస్యం దాచి పెట్టడానికి ఏమీలేదన్నారు తమిళిసై. తెలంగాణలో కొందరు తనను రాజకీయ నాయకురాలు అని అంటుంటారని.. అది నిజమే కదా అంటూ వ్యాఖ్యానించారు. రాజకీయాలపై మక్కువతోనే తాను ఎంతగానో ఇష్టమైన వైద్య వృత్తిని పక్కన పెట్టాల్సి వచ్చిందన్నారు. రాజకీయాల్లో పురుషాధిక్యత ఎక్కువని.. అయితే.. భారత్‌ లో 15 లక్షల పంచాయతీలకు ప్రెసిడెంట్‌ లుగా మహిళలు ఉన్నారన్నారు. తాము పురుషులకంటే మెరుగ్గానే పని చేస్తున్నానని వివరించారు.

పాలమూరు-రంగారెడ్డి ప్రాజెక్టుకు జాతీయ హోదా ఇస్తామని.. మాట తప్పిన ప్రధాని మోడీ (PM Modi) కి మహబూబ్‌ నగర్‌ (Mahabubnagar) లో పర్యటించే అర్హత లేదన్నారు మంత్రి శ్రీనివాస్‌ గౌడ్‌ (Srinivas Goud). జాతీయ హోదా హామీ ఇచ్చి నెరవేర్చని ప్రధాని.. మళ్లీ అదే వేదికపై ఏం మాట్లాడేందుకు వస్తున్నారని ప్రశ్నించారు. తెలంగాణ అంటేనే విషం చిమ్మేవాళ్లు రాష్ట్రానికి వచ్చి ఏం చేస్తారని విమర్శించారు. రాష్ట్ర ప్రజలకు క్షమాపణ చెప్పి సభలో మాట్లాడాలన్నారు.

రాష్ట్రంలో బీజేపీ సర్కార్ వస్తే పాలమూరుకు జాతీయ హోదా ఇస్తామని చెబుతున్న మాటలను ప్రజలు విశ్వసించే ప్రసక్తే లేదని.. దేశవ్యాప్తంగా 157 మెడికల్ కాలేజీలు మంజూరు చేసి తెలంగాణకు ఒక్కటి కూడా ఇవ్వలేదని ఆరోపించారు. ‘‘మేం ఈ ప్రాంతానికి అన్యాయం చేస్తూనే ఉంటాం, మీరు మోసపోతూనే ఉండండి’’ అనేలా కేంద్రం తీరు ఉందని ఎద్దేవ చేశారు. సమైక్య రాష్ట్రంలో పెండింగులో ఉన్న కల్వకుర్తి ఎత్తిపోతల పథకాన్ని తెలంగాణ ఏర్పడిన తర్వాత పూర్తి చేసి సాగు, తాగు నీరు అందించిన ఘనత బీఆర్‌ఎస్‌ ప్రభుత్వానిదని చెప్పారు. కానీ ప్రజల సమక్షంలో జాతీయ హోదా హామీ ఇచ్చి మోసం చేసిన చరిత్ర బీజేపీదని విమర్శించారు.

కర్ణాటక ప్రాజెక్టులకు జాతీయ హోదా ఇచ్చిన బీజేపీ సర్కార్‌.. తెలంగాణలోని ఒక్క ప్రాజెక్టుకు కూడా ఇవ్వలేదని మండిపడ్డారు శ్రీనివాస్. రాష్ట్రానికి రావాల్సిన నీటి వాటా తేల్చకుండా నాన్చుతున్నారని.. హైదరాబాద్​ కు దీటుగా మహబూబ్ ​నగర్​ ను అభివృద్ధి చేస్తున్నామని తెలిపారు. మోడీ పాలమూరు అభివృద్ధి చూసిపోవాలని సూచించారు. తెలంగాణను అవమానించిన ఆయనకు ఇక్కడేం పని అంటూ ప్రశ్నించారు.

అడ్డదారుల్లో రాష్ట్రంలో పాగా వేయాలని బీజేపీ చూస్తోందని, ప్రజలు అప్రమత్తంగా ఉండాలని సూచించారు శ్రీనివాస్ గౌడ్. అభివృద్ధి చెందుతున్న తెలంగాణను బీజేపీ నాశనం చేయాలని చూస్తున్నదని విమర్శించారు. బీజేపీ అధికారంలో ఉన్న 19 రాష్ట్రాల్లో తెలంగాణలో అమలు అవుతున్న ఒక్క పథకమన్నా ఉందా అని ప్రశ్నించారు. పార్లమెంట్ సాక్షిగా మిషన్ కాకతీయ, మిషన్ భగీరథ వంటి పథకాలను మెచ్చుకుంటారని.. బయటకు వచ్చి కేసీఆర్‌ ను తిడతారని ఆగ్రహం వ్యక్తం చేశారు శ్రీనివాస్ గౌడ్.

ఎన్నికలు వస్తే.. చోటా లీడర్ నుంచి బడా నాయకుడి దాకా తెగ హడావుడి చేస్తారు. గ్రామ గ్రామానికి వెళ్తారు. ప్రతీ ఇంటి తలుపు తడతారు. మాకే ఓటేయాలని.. ఇప్పటిదాకా ఏం చేశారో ఏకరువు పెడతారు. ఇకపై ఏం చేస్తామో చెప్తూ నైస్ గా బుట్టలో వేసుకునే ప్రయత్నం చేస్తారు. కానీ, ఈసారి ఆ ఛాన్స్ ఇవ్వమని ఓ గ్రామం ఒకే మాట మీద నిలబడింది. ఏకంగా ఎమ్మెల్యేనే బహిష్కరించింది.

నిజామాబాద్ (Nizamabad) జిల్లాలో ఉంటుంది మంచిప్ప గ్రామం. రెండు చెరువుల మధ్య ఉండే ఈ ఊరు.. నిజామాబాద్ రూరల్ నియోజకవర్గం పరిధిలో ఉంటుంది. ప్రస్తుతం అక్కడ బాజిరెడ్డి గోవర్ధన్ (Bajireddy Govardhan) ఎమ్మెల్యేగా ఉన్నారు. ఈయనకు వ్యతిరేకంగానే గ్రామంలోని జనం ఒక్క మాట మీద ఉన్నారు. ఎమ్మెల్యేకు వ్యతిరేకంగా పోస్టర్లు కూడా వేశారు. తమ గ్రామానికి ఎన్నికల ప్రచారానికి రావొద్దంటూ ఇంటింటికీ స్టిక్కర్లు అతికించారు.

మంచిప్ప రిజర్వాయర్ ను రద్దు చేయాలంటూ చాలా ఏళ్లుగా గ్రామస్తులు ఆందోళనలు, నిరసనలు చేస్తున్నారు. రీ డిజైన్ రద్దు చేయాలని పట్టుబడుతున్నారు. అప్పటి వరకు ఎమ్మెల్యే తమ గ్రామంలోకి రావొద్దని.. ముఖ్యంగా ఎన్నికల ప్రచారం చేయవద్దని తేల్చిచెప్పారు. శనివారం పోస్టర్లు అతికించి నిరసన తెలిపి.. ఫ్లకార్డులు పట్టుకుని గ్రామంలో నిరసన తెలిపారు ప్రజలు.

తమ డిమాండ్‌ ‌ను కాదని ఎన్నికల ప్రచారం చేస్తే అడ్డుకుంటామని తెగేసి చెప్పారు. ఎన్నికల్లో పోటీ చేస్తే తప్పకుండా ఓడిస్తామని శపథం చేశారు. మంచిప్ప రిజర్వాయర్ రీ డిజైన్ రద్దు చేయకుంటే అసెంబ్లీ ఎన్నికలను సైతం బహిష్కరిస్తామని గ్రామంలో తీర్మానం చేశారు. ఎన్నికల సమయంలో మంచిప్ప రిజర్వాయర్ అంశం బాజిరెడ్డికి తలనొప్పిగా మారుతుందని అంతా అనుకుంటున్నారు.

ఎన్నికల ముందు మంత్రి హరీశ్ రావు (Harish Rao) చెప్పే పిట్టకథలను ప్రజలు నమ్మే పరిస్థితిలో లేరని దుబ్బాక ఎమ్మెల్యే రఘునందన్ రావు (Raghunandan) విమర్శించారు. భారత రాజ్యాంగం కల్పించిన హక్కులను కాలరాసే విధంగా బీఆర్ఎస్ (BRS) నాయకులు వ్యవహరిస్తున్నారని ఆగ్రహం వ్యక్తం చేశారు. సిద్దిపేట జిల్లా దుబ్బాక ఎమ్మెల్యే క్యాంప్ కార్యాలయంలో ఆయన మీడియాతో మాట్లాడారు. ఈ సందర్భంగా బీఆర్ఎస్ సర్కార్ పై మండిపడ్డారు.

బీఆర్ఎస్ లో ఉన్నవాళ్లను పైస్థాయి లీడర్లు బెదిరిస్తున్నారని అన్నారు రఘునందన్. అక్కడ నచ్చక ఇతర పార్టీలకు వెళ్దామనుకుంటే ప్రభుత్వ సంక్షేమ పథకాలు రావని బెదిరించడం సిగ్గుచేటన్నారు. ములుగు నియోజకవర్గ పర్యటనలో మంత్రి హరీశ్ రావు బీజేపీ (BJP) నాయకులు గెలిస్తే మోటర్లకు మీటర్లు పెడతారని చెప్పడం హాస్యాస్పదంగా ఉందని మండిపడ్డారు.

దుబ్బాక, హుజూరాబాద్, మునుగోడు ఎన్నికల్లో హరీశ్ రావు ఇదే ప్రచారం చేసినప్పటికీ ప్రజలు విశ్వసించలేదని గుర్తు చేశారు. నేటికీ ఏ నియోజకవర్గంలో కూడా మోటార్లకు మీటర్లు పెట్టిన దాఖలాలు లేవని వెల్లడించారు. మాయ మాటలు, పిట్ట కథలతో మంత్రి ప్రజలను మభ్య పెట్టాలని చూస్తే రాబోయే ఎన్నికల్లో ప్రజలే గుణపాఠం చెబుతారని ఆగ్రహం వ్యక్తం చేశారు.

రోజురోజుకీ తన ఉనికిని ప్రజల్లో కోల్పోతున్న హరీశ్ రావు, ఇకనైనా నిజాలను మాట్లాడాలని హితవు పలికారు రఘునందన్. రాబోయే ఎన్నికల్లో బీజేపీ విజయం సాధిస్తుందని ధీమా వ్యక్తం చేశారు. జనంలో కేసీఆర్ పై విశ్వాసం లేదని.. ఈసారి ఓటమి ఖాయమని జోస్యం చెప్పారు.

సిద్దిపేట (Siddipet) నంగునూరు మండలం ముండ్రాయిలో జిల్లా సహకార కేంద్ర బ్యాంక్ ని ప్రారంభించారు మంత్రి హరీశ్ రావు (Harish Rao). ఈ సందర్భంగా మాట్లాడుతూ.. ఇక్కడ బ్యాంక్ ఏర్పాటుతో మంచి సౌకర్యం అందుతుందని తెలిపారు. తాను ఎమ్మెల్యేగా ఉన్న కొత్తలో రోడ్డు లేక అనేక ఇబ్బందులు పడ్డారని.. కానీ, ఇప్పుడు ముండ్రాయిలో నాలుగు వరుసల రోడ్డు రాబోతోందని తెలిపారు.

గతంలో మహిళా సంఘాలు లోన్ల కోసం గంటల తరబడి వేచి ఉండే పరిస్థితి ఉండేదని.. ఇప్పటి నుండి ఆ తిప్పలు లేకుండా డీసీసీబీ బ్యాంక్ ఉపయోగ పడుతుందన్నారు హరీశ్ రావు. ఇప్పుడు అన్ని గ్రామాల్లో ఈ బ్యాంకులు ఏర్పాటు చేసుకుంటున్నామని తెలిపారు. ఎరువుల బస్తా కోసం కాంగ్రెస్ జమానాలో ఎన్నో కష్టాలు పడ్డామని.. చెప్పులు లైన్ లో పెట్టి చూసేవాళ్లమని ఆనాటి విషయాల్ని గుర్తు చేశారు.

కేసీఆర్ (KCR) పాలనలో ఎరువుల కష్టాలు లేవన్న హరీశ్.. రైతు విలువ పెంచామని అన్నారు. అందుకే భూమి విలువ కూడా పెరిగిందని చెప్పారు. నీళ్లు లేక ఇబ్బంది పడ్డ రోజుల నుండి నీళ్ళు ఎక్కువయ్యాయి అనేకాడికి తెలంగాణ చేరిందన్నారు. రైతు బీమా రైతు కుటుంబానికి బాసటగా ఉపయోగపడుతోందన్న ఆయన.. ఆసరా పెన్షన్ తో అవ్వతాతలకు కేసీఆర్ ఆత్మ గౌరవం పెంచారని వ్యాఖ్యానించారు.

పెళ్లి అయితే కళ్యాణలక్ష్మి, గర్భిణీలకు నూట్రిషన్ కిట్, కేసీఆర్ కిట్ ఇస్తున్నామని తెలిపారు సిద్దిపేట మొత్తం తన కుటుంబమేనన్న హరీశ్.. వారికి సేవ చేయడమే తన బాధ్యత అని తెలిపారు. ఎవరికీ ఏ బాధ వచ్చినా తాను చూసుకుంటానని హామీ ఇచ్చారు.