Telangana

తెలంగాణ (Telangana) లో అభివృద్ధి జరిగిందని నమ్మితేనే ఓట్లు వేయండని అన్నారు మంత్రి కేటీఆర్ (KTR). నిర్మ‌ల్ (Nirmal) నియోజ‌క‌వ‌ర్గంలో రూ.714 కోట్ల‌తో చేపట్టిన కాళేశ్వరం (Kaleswaram) ప్యాకేజీ-27ని ప్రారంభించారు. అలాగే, పోచంపాడ్ వ‌ద్ద రూ.300 కోట్ల‌తో నిర్మించే పామాయిల్ ప‌రిశ్ర‌మకు శంకుస్థాప‌న చేశారు. ఈ సంద‌ర్భంగా అక్క‌డ ఏర్పాటు చేసిన బ‌హిరంగ స‌భ‌లో మంత్రి కేటీఆర్ పాల్గొని ప్ర‌సంగించారు. అభివృద్ధి అంటే తెలంగాణ రాష్ట్రాన్ని చూసి నేర్చుకోవాలని తెలిపారు.

కాంగ్రెస్ వాళ్ళకి ఒక్కసారి కాదు 11 సార్లు ఛాన్స్ ఇచ్చినా ఏం చేశారని కేటీఆర్ ప్రశ్నించారు. వారి హయాంలో తాగు, సాగు నీరు అందలేదని అన్నారు. అదే, కేసీఆర్ పాలనలో ఒక్క సంవత్సరం కూడా కరువు కాటకాలు లేవని వివరించారు. రాష్ట్రం సుభిక్షంగా, సస్యశ్యామలంగా ఉందని అన్నారు. తెలంగాణలో 17 ప్రాజెక్టులు నిర్మించామని తెలిపారు కేటీఆర్. తొమ్మిదిన్నరేళ్లలో ఏం చేశామో చెప్పగలిగే స్థితిలో ఉన్నామని.. అదే కాంగ్రెస్​ చరిత్రలో ఏం చేశారో చెప్పే స్థితిలో ఉందా అని ప్రశ్నించారు. కాంగ్రెస్ సచ్చిన పాము అంటూ విమర్శించారు.

జిల్లాకొక మెడికల్​ కాలేజీ వస్తుందని ఎప్పుడైనా అనుకున్నామా.. కానీ ఇప్పుడు సుమారు 23 మెడికల్​ కళాశాలలు వచ్చాయని తెలిపారు కేటీఆర్. ఎంత పెద్ద జబ్బు అయినా.. జిల్లా ఆస్పత్రుల్లోనే చికిత్స అందుతోందని చెప్పారు. ఆరున్నర లక్షల మంది విద్యార్థులకు గురుకులాల్లో విద్య అందిస్తున్నామని వివరించారు. ఒక‌ప్పుడు ఎస్సారెస్పీ ఎండిపోయి ఆగ‌మ‌య్యేదని.. రివ‌ర్స్ పంపింగ్ చేప‌ట్టిన త‌ర్వాత నిండుకుండ‌లా మారిందన్నారు. ఇది కేసీఆర్ వ‌ల్లే సాధ్య‌మైందని చెప్పారు.

‘‘సాగునీటి విష‌యంలో క‌ష్టాలు త‌ప్పాయి.. కాబ‌ట్టి ఓటు వేసే ముందు రైతులు ఆలోచించాలి. 24 గంట‌ల‌ క‌రెంట్ వ‌స్తుందంటే.. రైతుబంధు తీసుకొని ధైర్యంగా వ్య‌వ‌సాయం చేస్తున్నాడంటే అందుకు కేసీఆర్. రైతు బీమాతో రైతుల కుటంబాల‌ను ఆదుకుంటున్నాం. న‌రేంద్ర మోడీ కొన్నా కొన‌క‌పోయినా.. న‌ష్ట‌మొచ్చినా కేసీఆర్ భ‌రిస్తాడ‌నే విశ్వాసం, న‌మ్మ‌కం రైతుల‌కు ఏర్ప‌డింది’’ అని అన్నారు కేటీఆర్.

ఇక, బీజేపీపై తీవ్రస్థాయిలో మండిపడ్డారు. గాలి మోటారు మీద వచ్చిన మోడీ గాలి మాటలు మాట్లాడి వెళ్లారని మండిపడ్డారు. తాము ఢిల్లీ గులాంలం కాదన్నారు. ‘‘సిలిండర్ ధర 12 వందలు చేసి ఇక్కడ చెప్పితే ఎట్లా?. బండి సంజయ్ మోడీ దేవుడు అంటారు. ఎవ్వరికి దేవుడో చెప్పడం లేదు. పిచ్చోళ్లకు ఓట్లు వేద్దామా? 15 లక్షలు వచ్చినవాళ్లు బీజేపీకి ఓటు వేయండి. రైతు బంధు వచ్చిన వాళ్లు మాకు ఓటు వేయండి. ఒక్క రైలుకు అన్నిచోట్లా జెండాలు ఉపడం ఏంటి? నేను సీఎం కావాలంటే మోడీ ఎన్ఓసీ అవసరం లేదు’’ అని వ్యాఖ్యానించారు కేటీఆర్.

కాంగ్రెస్ (Congress) హయాంలో కొడంగల్ వెనుకబడిందన్నారు మంత్రి హరీశ్ రావు (Harish Rao). కోస్గిలో 50 ప‌డ‌క‌ల ఆస్ప‌త్రిని ప్రారంభించారు. ఈ సంద‌ర్భంగా అక్క‌డ ఏర్పాటు చేసిన బ‌హిరంగ స‌భ‌లో హ‌రీశ్‌ రావు పాల్గొని ప్ర‌సంగించారు. రేవంత్ రెడ్డి (Revanth Reddy) ఉంటే ఇంకా పదేళ్లయినా మంచినీళ్లు రాకపోయేవన్నారు. గతంలో మూడు రోజులకోసారి నల్లా వచ్చేదని.. ఇపుడు ప్రతి రోజు నీళ్లు వస్తున్నాయని చెప్పారు. పట్నం నరేందర్ రెడ్డి (Narender Reddy) వచ్చాకే కొడంగల్ (Kodangal) అభివృద్ధి జరిగిందని చెప్పారు.

కొడంగల్ కు రేవంత్ రెడ్డి ఏం చేశారో చెప్పాలని ప్రశ్నించారు హరీశ్ రావు. మల్కాజ్ గిరికి పారిపోయిన ఆయన.. అక్కడ కూడా ఏం చేయలేదన్నారు. కొడంగ‌ల్ నియోజ‌క‌వ‌ర్గానికి కృష్ణా జ‌లాలు తీసుకొచ్చి, ఇక్క‌డి రైతుల పాదాల‌ను క‌డుగుతామ‌ని స్ప‌ష్టం చేశారు. ల‌క్షా 50 వేల ఎక‌రాల‌కు సాగునీరు అందిస్తామ‌ని పేర్కొన్నారు. 3 గంటల కరెంట్ కావాలనుకున్న వాళ్లు.. కాంగ్రెస్ కు, 24 గంటల కరెంట్ కావాలంటే బీఆర్ఎస్ కు ఓటేయాలని సూచించారు.

కర్ణాటకలో రైతుబంధు, 4 వేల పెన్షన్ ఇవ్వని కాంగ్రెస్ తెలంగాణలో ఎలా ఇస్తుందని ప్రశ్నించారు మంత్రి. కాంగ్రెస్ చెప్పే మోసపూరిత హామీలను నమ్మి మోసపోవద్దన్నారు. మాటలు కావాలనుకునే వాళ్లు రేవంత్ వైపు.. పనులు కావాలానుకునే వాళ్లు నరేందర్ రెడ్డి వైపు ఉండాలని చెప్పారు. ఎవ‌రెన్ని జిమ్మిక్కులు, ట్రిక్కులు చేసినా.. బీజేపీ లేచేది లేదు.. కాంగ్రెస్ గెలిచేది లేదని సెటైర్లు వేశారు. హ్యాట్రిక్ సీఎం మ‌న కేసీఆరే అని స్ప‌ష్టం చేశారు.

‘‘రేవంత్ రెడ్డి టీడీపీ డ‌బ్బుల‌తో ఎమ్మెల్యేల‌ను కొనుగోలు చేసేందుకు య‌త్నించి, ఓటుకు నోటు కేసులో జైలుకు పోయి వ‌చ్చిండు. రేవంత్ మీద చ‌ర్య తీసుకోవాల‌ని, విచార‌ణ జ‌ర‌పాల‌ని సుప్రీంకోర్టు తీర్పు ఇచ్చింది. న్యాయం గెలుస్త‌ది.. ధ‌ర్మం నిల‌బ‌డ‌త‌ది. రేవంత్ త‌ప్పు చేశాడు.. కోర్టులో విచారించాల్సిందేన‌ని సుప్రీంకోర్టు తీర్పు ఇచ్చింది. ఆయ‌న‌పై విచార‌ణ అయ్యేది ఖాయం. జైలుకు పోయేది కూడా ఖాయం. కాంగ్రెసోళ్ల మాయ‌మాట‌లు న‌మ్మి ఆగం కావొద్దు’’ అని ప్రజలను కోరారు హ‌రీశ్‌ రావు.

ప్రగతి భవన్ లో అలజడి మొదలైందని.. బీఆర్ఎస్ నిట్టనిలువునా చీలడం ఖాయమని అన్నారు బీజేపీ జాతీయ కార్యదర్శి బండి సంజయ్ (Bandi Sanjay). మంత్రిగా ఉంటేనే భరించలేకపోతున్నామని.. ఇంకా సీఎం అయితే భరించగలమా అని ఎమ్మెల్యేలు ఆలోచిస్తున్నారని పేర్కొన్నారు. కేటీఆర్ (KTR) అహంకారం, భాష తీరుతో ప్రజల్లో వ్యతిరేకత ఏర్పడిందని చెప్పారు. మోడీ (Modi) ని టూరిస్ట్ అని ఎలా విమర్శిస్తారని ప్రశ్నించిన ఆయన.. బీఆర్ఎస్ అభివృద్ధికి వ్యతిరేకమని మండిపడ్డారు.

తెలంగాణ (Telangana) సెంటిమెంట్ ను మళ్లీ రెచ్చగొడుతున్నారని ప్రజలు అలాంటి వారితో జాగ్రత్తగా ఉండాలని సూచించారు. కేసీఆర్ కనిపించి 15 రోజులైంది.. కేటీఆర్ పై అనుమానంగా ఉందని కీలక వ్యాఖ్యలు చేశారు బండి సంజయ్. బీఆర్ఎస్ నేతలు మోడీపై చిల్లర మాటలు మాట్లాడుతున్నారని.. 4 కోట్ల మంది కోసం తెలంగాణ తెచ్చుకుంటే నలుగురి పాలయిందని ఆవేదన వ్యక్తం చేశారు. మోడీ పర్యటన తర్వాత బీఆర్ఎస్ లో ప్రకంపనలు స్టార్ట్ అయ్యాయని, కేసీఆర్ కుటుంబంలో లొల్లి మొదలైందని సంచలన వ్యాఖ్యలు చేశారు.

కేసీఆర్ కుటుంబ ఆస్తులు ప్రకటించే దమ్ము ఉందా? వ్యాపారాలు లేనప్పుడు ఆస్తులు ఎలా వచ్చాయి? అని ప్రశ్నించారు. రాష్ట్ర అభివృద్ధికి సహకరించమని కోరడం కూడా విషం చిమ్మడం అవుతుందా అని నిలదీశారు బండి. ‘‘ప్రధాని మోడీనే చీటర్ అని అంటావా.. మీ తండ్రి పదవి కోసం నీ పేరునే అజయ్​ రావు నుంచి తారక రామారావుగా మార్చాడు. మీ తండ్రిని మించిన చీటర్ ఎవరూ లేరు’’ అని ధ్వజమెత్తారు. కేసీఆర్​ ను ఏ కూటమి నమ్మే పరిస్థితి లేదని పేర్కొన్నారు.

ప్రజలు బికారులు అవుతున్నారని, కేసీఆర్ కుటుంబం ఆస్తులు మాత్రం పెరుగుతున్నాయని అన్నారు బండి సంజయ్. దోచుకున్న సొమ్మును దేశవ్యాప్తంగా బీజేపీని దెబ్బతీసేందుకు వాడుతున్నారని విమర్శించారు. బీసీ ప్రధాని అయితే ఓర్చుకోలేకపోతున్నారని.. తెలంగాణ ఉద్యమ సమయంలో ఉద్యమాన్ని వ్యతిరేకించిన చీటర్ కేటీఆర్ అని సంచలన వ్యాఖ్యలు చేశారు. కేసీఆర్ కుటుంబం అవినీతిని ప్రశ్నిస్తే తెలంగాణ మీద బురద చల్లినట్టేనా? అని ప్రశ్నించారు. రబ్బర్ చెప్పుల కేటీఆర్ కి వేల కోట్లు ఎలా వచ్చాయి అంటూ నిలదీశారు.

బీజేపీ (BJP) లో కుటుంబ పార్టీ నుంచి వచ్చినవారు ఎవరూ లేరా అని తెలంగాణ శాసనమండలి చైర్మన్‌ గుత్తా సుఖేందర్‌ రెడ్డి (Gutta Sukhender Reddy) ప్రశ్నించారు. నిజామాబాద్ (Nizamabad) లో ప్రధాని మోడీ (PM Modi) చేసిన వ్యాఖ్యలపై స్పందించిన ఆయన.. విద్యావంతుడు, మంచి అడ్మినిస్ట్రేటివ్ అయిన కేటీఆర్ ఎదో ఒకరోజు తెలంగాణకు సీఎం అవుతారని చెప్పారు. అయినా, కేటీఆర్ సీఎం కావాలంటే.. మోడీ సహకారం అక్కర్లేదని, బీఆర్ఎస్ శాసనసభాపక్షం, కేసీఆర్ ఉంటే చాలన్నారు.

తెలంగాణపై మోడీ విషం కక్కుతున్నారని ఫైరయ్యారు. రాష్ట్ర ఏర్పాటులో బీజేపీ పాత్రే లేదన్న ఆయన.. ఆపార్టీ చేసిన అన్యాయాలు, అక్రమాలు అన్నీఇన్ని కావన్నారు. వారసత్వపు రాజకీయాలకు అంకురార్పణ చేసిందే బీజేపీ అని విమర్శించారు. తొమ్మిదిన్నరేళ్ళల్లో అన్ని రంగాల్లో తెలంగాణను మొదటి స్థానంలో నిలిపిన ఘనత కేసీఆర్ కే దక్కుతుందని తెలిపారు.

ప్రధాని హోదాలో ఉండి.. ఒక రాష్ట్ర ముఖ్యమంత్రిపై, ఆయన కుటుంబసభ్యులపై అసత్య ఆరోపణలు చేయడం సిగ్గుచేటు అని అభిప్రాయపడ్డారు సుఖేందర్ రెడ్డి. గత తొమ్మిదేండ్లలో రాష్ట్రానికి ఒక్క పైసా ఇవ్వని ప్రధానికి తెలంగాణ గడ్డపై మాట్లాడే అర్హత లేదని విమర్శించారు. విభజన హామీలను తుంగలో తొక్కారని.. పార్లమెంటు లోపల, బయట తెలంగాణ రాష్ట్రాన్ని మోడీ హేళన చేస్తూ మాట్లాడారని గుర్తు చేశారు.

అవినీతిపరులు తన పక్కన కూర్చోవడానికి భయపడతారని మోడీ అనడం హాస్యాస్పదంగా ఉందన్నారు గుత్తా. ఈడీ, సీబీఐ ఆరోపణలు ఎదుర్కొంటున్న వారిని బీజేపీ తమ పార్టీలో ఎందుకు చేర్చుకుంటోందని ఈ సందర్భంగా ప్రశ్నించారు. తాము అవినీతి చేస్తే.. ఎందుకు విచారణ జరిపించలేదని నిలదీశారు. కేవలం రాజకీయ లబ్ది కోసమే తప్పుడు ఆరోపణలు చేయడం సబబు కాదని హితవు పలికారు. తెలంగాణ ఏర్పాటులో రక్తం ఎరులైపారిందని అంటున్న మోడీ.. ఎక్కడ జరిగిందో చూపించాలని డిమాండ్ చేశారు గుత్తా సుఖేందర్‌ రెడ్డి.

సీఎం కేసీఆర్ (CM KCR) జ్వరం బారిన పడడంతో అన్నీ తానై బీఆర్ఎస్ (BRS) పార్టీని, ప్రభుత్వాన్ని నడిపిస్తున్నారు మంత్రి కేటీఆర్ (KTR). వరుసగా జిల్లాల పర్యటనలు చేస్తున్నారు. తాజాగా నిర్మల్ (Nirmal) జిల్లాకు వెళ్లారు. అయితే.. ఎక్కడికక్కడే ప్రతిపక్ష నేతలను అరెస్ట్ చేశారు. ఖానాపూర్ పట్టణానికి చెందిన పలువురు బీజేపీ నాయకులను పోలీసులు అరెస్టు చేసి స్థానిక పోలీస్ స్టేషన్ కు తరలించారు.

భైంసాలో బీజేపీ జిల్లా అధ్యక్షురాలు రమాదేవీ, రాష్ట కార్యవర్గ సభ్యులు మోహన్ రావు పటేల్, బీజేపీ నాయకులను అదుపులోకి తీసుకుని పోలీస్ స్టేషన్లకు తరలించారు. ఇవి అక్రమ అరెస్టులు అని బీజేపీ నేతలు ఖండించారు.

మరోవైపు, నిర్మల్ జిల్లా దిలావర్ పూర్ మండలం గుండంపల్లి గ్రామంలో కేటీఆర్ కోసం ఏర్పాటు చేసిన హెలీప్యాడ్ దగ్గర ఉద్రిక్తత నెలకొంది. ఎత్తిపోతల ప్రాజెక్టులో భాగంగా 27వ ప్యాకేజీ ప్రారంభోత్సవం కోసం కేటీఆర్ రాగా.. అదే సమయంలో అక్కడికి డీసీసీ అధ్యక్షులు శ్రీహరి రావు, కాంగ్రెస్ నేతలు వచ్చారు. దీంతో టెన్షన్ వాతావరణం ఏర్పడింది.

శ్రీహరి రావుతో పాటు కాంగ్రెస్ నేతలను అడ్డుకుని అరెస్ట్ చేసి పోలీస్ స్టేషన్ కు తరలించారు పోలీసులు. పూర్తికాని ఎత్తిపోతల ప్రాజెక్టును ఎలా ప్రారంభిస్తారని ఆగ్రహం వ్యక్తం చేశారు కాంగ్రెస్ శ్రేణులు. ఇటు కేటీఆర్ పర్యటన నేపథ్యంలో సీఐటీయూ నాయకులను, అంగన్వాడీ టీచర్లను, ఆశా వర్కర్లను పోలీసులు ముందస్తుగా అరెస్టు చేసి పోలీస్ స్టేషన్లకు తరలించారు. కనీస వేతనాలు ఇవ్వాలని సమ్మె చేస్తుంటే అరెస్టు చేయడం సరికాదన్నారు అంగన్వాడీ టీచర్లు, ఆశా వర్కర్లు.