ధర్మవీరులు

షహీద్ రాణా బేణి మధో (Shaheed Rana Beni Madho)… శంకర్ పూర్ ఎస్టేట్ (ప్రస్తుత రాయ్ బరేలీ) పాలకుడు. భారత వృద్ధ సింహం షహీద్ కున్వర్ సింగ్ మనవడు. అవధ్ (Avadh) ప్రాంతంలో బ్రిటీష్ ప్రభుత్వానికి వ్యతిరేకంగా తిరుగుబాటు చేసిన గొప్ప పోరాట యోధుడు. బ్రిటీష్ సామ్రాజ్య పునాదులను నాశనం చేసి వారిని దేశం నుంచి వెళ్లగొట్టడమే తన ఏకైక లక్ష్యమని ప్రకటించిన గొప్ప యోధుడు.

1857 సిపాయిల తిరుగుబాటు కాలంలో అవద్‌ ప్రాంతంలోని గొప్ప వీరుల్లో ఆయన ఒకరు. రాజపుత్రుల్లోని బైస్ వంశానికి చెందిన వారు. ఆయన ధైర్య సాహసాలకు మెచ్చిన అవద్ నవాబ్ అలీషా బేణి మధోను జాన్ పూర్, అజమ్ ఘర్ ప్రాంతాలకు పాలకునిగా నియమించారు. దీంతో పాటు బేణి మధోకు సిర్మౌ రాణా బహదూర్ దిలేర్ జంగ్ అనే బిరుదు ఇచ్చి సత్కరించారు.

సిపాయిల తిరుగుబాటులో భాగంగా 25 వేల మంది సైనికులతో కలిసి వలస ప్రభుత్వానికి వ్యతిరేకంగా పోరాటం చేశారు. ఆంగ్లేయులతో జరిగిన పోరాటంలో బ్రిటీష్ అధికారి మేజర్ గాల్‌ను బేణి మధో హత మార్చారు. కొన్ని రోజుల్లోనే బేణి మధో బ్రిటీష్ పాలకులకు కంటిలో నలుసులా మారారు. దీంతో ఆయన్ని ఎలాగైనా పట్టుకుని ఉద్యమాన్ని అణచి వేయాలని బ్రిటీష్ పాలకులు నిర్ణయించారు.

మధోను పట్టుకునేందుకు లార్డ్ క్లైడ్, హోప్ గ్రాంట్, బ్రిగేడియర్ వెలెగ్, ఆల్ఫ్రెడ్ హార్స్‌ఫోర్డ్ ల నాయకత్వంలో సేనలను పంపించారు. ఈ సేనలు మధోను అష్ట దిగ్బందం చేయగా చాకచక్యంగా అక్కడి నుంచి తప్పించుకున్నారు. ఆ తర్వాత నెమ్మదిగా ఆయన సైన్యం క్షీణించింది. ఈ క్రమంలో బ్రిటీష్ వారితో జరిగిన యుద్దంలో ఆయన వీర మరణం పొందారు.

వాసుదేవ్ బలవంత ఫడ్కే (Vasudev Balwant Phadke) ఓ గొప్ప స్వాతంత్ర సమర యోధుడు. దేశం ఎదుర్కొంటున్న పరిస్థితులన్నింటికీ స్వరాజ్య సాధన ఒకటే మార్గమని భావించిన యోధుడు. కోలీలు, భిల్లులు, దంగారు తెగలను కూడగట్టి బ్రిటీష్ (British) వాళ్లకు వ్యతిరేకంగా సైన్యాన్ని తయారు చేసిన దేశ భక్తుడు. భారతదేశంలో తీవ్రవాద జాతీయవాదానికి పితామహునిగా పేరు పొందిన వ్యక్తి ఆయన.

1876 -77 సంవత్సరంలో మహారాష్ట్రలో కరువు విలయ తాండవం చేసింది. వేలాది మంది కరువు రక్కసి కోరల్లో చిక్కుకుని మరణించారు. ఎటు చూసినా దరిద్రం తాండవించింది. ఆపద సమయంలో ఆదుకోవాల్సిన పాలకులు పన్నుల భారం వేసి సామాన్యులను మరింత ఇబ్బందులకు గురి చేశారు. ఓ వైపు కరువు, మరోవైపు పన్నులతో పేదవాడి పరిస్థితి మరింత ఘోరంగా మారింది.

భారతీయులపై బ్రిటీష్ పాలకుల హింసాకాండను చూసి వాసుదేవ బలవంత ఫడ్కే ఆగ్రహంతో రగిలి పోయారు. తోటి భారతీయులంతా ఆకలితో అలమటిస్తుంటే తాను మాత్రమే ఆనందంగా బతకలేనని వెల్లడించారు. కోలీలు, బిల్లులు, దంగారులను కూడ గట్టి సైన్యాన్ని తయారు చేశాడు. వారందరి సహాయంతో ఆంగ్లేయులపై సమర శంఖం పూరించారు. తన పోరాటంతో ఆంగ్లేయులకు నిద్ర లేకుండా చేశారు.

ఫడ్కేను ఎలాగైనా పట్టుకోవాలని, ఉద్యమానికి ముగింపు పలకాలని బ్రిటీష్ ప్రభుత్వం ప్రయత్నాలు మొదలు పెట్టింది. అటు నిజాం ప్రభుత్వం, ఇటు బ్రిటీష్ ప్రభుత్వం ఫడ్కేను పట్టుకునేందుకు ప్రయత్నాలు చేశాయి. ఈ నేపథ్యంలోనే ఫడ్కేను పట్టించిన వారికి లక్ష రూపాయల నగదు బహుమతి ఇస్తామని ప్రకటించింది. కొంత మంది ఆయన ఆచూకీని బ్రిటీష్ వారికి తెలిపారు. దీంతో ఫడ్కేను బ్రిటీష్ ప్రభుత్వం అరెస్టు చేయగా జైలులో మరణించారు.

నందలాల్ బోస్ (Nandalal Bose).. భారత్‌లోని గొప్ప చిత్ర కారుల్లో ఒకరు. ఆయన పెయింటింగ్‌ (Painting)లో భారతీయ సంస్కృతి, దేశ విషయాలను అందంగా ప్రదర్శిస్తుండే వారు. సుమారు 7వేలకు పైగా అత్యద్భుతమై చిత్రాలను ఆయన గీశారు. భారత రాజ్యాంగంలోని ప్రతి పేజీని తన చిత్రాలతో అత్యద్భుతంగా తీర్చి దిద్దిన గొప్ప ఆర్టిస్ట్. ఆయనలోని కళాత్మకతను గమనించిన భారత ప్రభుత్వం భారత్ రత్న, పద్మ భూషణ్, పద్మ విభూషణ్ ‘ఎంబ్లమ్’డిజైన్ చేసే బాధ్యతను ఆయనకు అప్పగించింది.

1882 డిసెంబ‌ర్ 3న బీహార్‌లోని ముంగేర్ జిల్లాలో నందన్ లాల్ బోస్ జన్మించారు. తల్లి క్షేత్రమోని దేవి, తండ్రి పూర్ణచంద్రబోస్. చిన్నప్పటి నుంచి పెయింటింగ్‌పై నందలాల్ బోసుకు మంచి ఆసక్తి ఉండేది. చిన్న తనంలో తన తల్లి క్షేత్రమణి దేవీ చేసిన మట్టి బొమ్మలతో ఆడుకుంటున్న సమయంలో వాటిని చూస్తు చిత్ర కళపై ఆసక్తి పెంచుకున్నాడు.

1905 నుంచి 1910 వరకు కలకత్తా ప్రభుత్వ కళా కళాశాలలో అబనినాథ్ ఠాగూర్ దగ్గర శిష్యునిగా పాఠాలు నేర్చుకున్నారు. అనంతరం 1922 నుండి 1951 వరకు శాంతినికేతన్‌లో కళా భవన్‌కు ప్రిన్సిపాల్‌గా పని చేశారు. గవర్నమెంట్ ఆర్ట్ స్కూల్‌లో ప్రభుత్వ ఉద్యోగం వచ్చినప్పటికీ దాన్ని వదలుకుని అబనినాథ్ ఠాకూర్ దగ్గర సహాయకునిగా ఉన్నారు.

శాంతినికేతన్‌లో పని చేస్తున్న సమయంలో నందన్ లాల్ ను ప్రధాని జవహార్ లాల్ నెహ్రూ కలిశారు. అప్పుడే రాజ్యాంగాన్ని అందమైన పెయింటింగ్స్ తో అద్బుతంగా తయారు చేయాలని నందలాల్ బోస్ ను ప్రధాని కోరారు. ఈ మేరకు భారత రాజ్యాంగాన్ని తన అద్బుతమైన చిత్రాలతో అందంగా మలిచారు. ఆ తర్వాత 1976లో బోసు పెయింటింగ్స్ ను ఆర్కియోలాజికల్ సర్వే ఆఫ్ ఇండియా ప్ర‌చురించింది. వాటిని కేవలం పురాత‌న వ‌స్తువులుగా కాకుండా ఒక గొప్ప క‌ళా సంప‌ద‌గా ప‌రిగ‌ణించాల‌ని సూచించింది.

నారాయణ గురూజీ (Narayana Guruji).. గొప్ప సంఘ సంస్కర్త. మూఢ విశ్వాసాలు, కులతత్వంపై నిరసన గళం వినిపించిన పోరాట యోధుడు. ఒకే కులం, ఒకే మతం, ఒకే దేవుడు అని నినదించారు. దేశంలోనే మొదటగా సర్వ మత సమ్మేళనాన్ని నిర్వహించారు. చదువుతోనే స్వేచ్ఛ, సమానత్వం సిద్ధిస్తాయని చెప్పిన మహనీయుడు నారాయణ గురూజీ.

1856 అగస్టు 20న కేరళ (Kerala) లోని తిరువనంతపురంలో జన్మించారు. తండ్రి మదన్ అసన్, తల్లి కుట్టియమ్మ. ఎజవా కులస్తులు కేవలం ఆయుర్వేదం చదవుకునేందుకు మాత్రమే సంస్కృతాన్ని ఉపయోగించే వారు. కానీ, వారందరికీ భిన్నంగా నారాయణ గురూజీ ఆయుర్వేదం, తత్వ శాస్త్రం, హిందూ మత గ్రంథాలను చదివారు.

ఎజవా కులస్తులను అవర్ణులుగా భావించే వారు. అందుకే, వారిని పాఠశాలలు, ఆలయాల్లోకి అనుమతించే వారు కాదు. ఈ నేపథ్యంలో తాను నేర్చుకున్న విద్య, జ్ఞానాన్ని అవర్ణుల పిల్లలకు బోధించేవారు. దీంతో ఎజవా కులస్తులతో పాటు ఆయన తల్లిదండ్రులు కూడా ఆయనపై ఆగ్రహం వ్యక్తం చేశారు. ఈ క్రమంలో ఇళ్లు విడిచి వెళ్లిపోయారు నారాయణ గురూజీ.

వివక్షను రూపుమాపేందుకు మార్గాలను అన్వేషించారు. 1888లో తిరువనంతపురంలో అరవిప్పురం ప్రాంతంలో శివాలయాన్ని నిర్మించారు. ఆలయంలోకి దళితులు, అణగారిన వర్గాలకు ప్రవేశం కల్పించారు. అలా కేరళ, తమిళనాడు, కర్ణాటక, శ్రీలంకల్లో అనేక ఆలయాలను కట్టించారు. మనుషులందరిదీ ఒకే కులం.. అందరికీ ఒకే దేవుడు అని ఆలయ గోడలపై రాయించారు.

సాధారణ జీవనం, ఉన్నత ఆలోచనలు, దృఢ సంకల్పం కలిగిన వ్యక్తి పండిట్ దీన్ దయాళ్ (Pandit Deendayal Upadhyay). ఆయన ఒక మంచి రచయిత, ఉత్తమ పాత్రికేయుడు, గొప్ప తాత్వికుడు. శ్యామ్ ప్రసాద్ ముఖర్జీ తర్వాత జన సంఘ్ భాద్యతలు చేపట్టి పార్టీని విజయపథంలో నడిపించారు. ఏకత్మాత మానవతా వాదంతో జనసంఘ్( Jan Sangh)కు సిద్దాంతపరమైన బాటలు వేసిన గొప్ప వ్యక్తి ఆయన.

25 సెప్టెంబర్ 1916లో ఉత్తర ప్రదేశ్‌ మధురలో ‘నగ్ల చంద్రభాన్’ అనే గ్రామంలో దీన్ దయాళ్ జన్మించారు. 1937లో డిగ్రీ చదువుతున్న సమయంలో ఆర్ఎస్ఎస్‌లో చేరారు. ఐదేండ్ల తర్వాత ప్రచారక్ అయ్యారు. అనంతరం 1952లో భారతీయ జన సంఘ్ పార్టీలో చేరారు. ఇది ఆయన జీవితంలో కీలక ఘట్టం.

ఆ తర్వాత జనసంఘ్ ప్రధాన కార్యదర్శిగా భాద్యతలు చేపట్టారు. 1967లో జన సంఘ్ కు అధ్యక్షుడయ్యారు. మన జాతీయ విలువలు. సాంస్కృతిక, నాగరికతల ఆధారంగా స్వదేశీ ఆర్థిక విధానాలను అవలంబించాల్సిన అవసరం గురించి ఆయన చెప్పారు. భారత ఆర్థిక వ్యవస్థకు ఏకత్మ మానవవాదం అనుకూలమైనదన్నారు.

1951 అక్టోబరు 21న జనసంఘ్‌ పార్టీని శ్యామ్ ప్రసాద్ ముఖర్జీ ఏర్పాటు చేశారు. పార్టీ స్థాపించిన మూడు నెలల్లోనే జాతీయ పార్టీగా గుర్తింపు పొందింది. అందులో దీన్ దయాళ్ పాత్ర చాలా కీలకమైంది. ముఖ్యంగా శ్యామ్ ప్రసాద్ ముఖర్జీ మరణం తర్వాత జన సంఘ్ కనుమరుగవుతుందని అంతా భావించారు. కానీ తన కౌశలంతో పార్టీని పటిష్ట స్థితికి తీసుకు వచ్చి అందరి అంచనాలను తలకిందులు చేసిన వ్యక్తి దీన్ దయాళ్.

అరవింద్ ఘోష్ (Aravind Ghosh).. రాజకీయ స్వాతంత్య్రం దేశానికి ఆయువు పట్టు అని ప్రకటించిన నేత. న్యూ లాంప్స్ ఫర్ ఓల్డ్ (New Lamp For Old) అనే శీర్షికన బ్రిటీష్ వారి విధానాలపై నిప్పులు చెరిగారు. బెంగాల్ ప్రెసిడెన్సీలో ఎంతో మంది రహస్య విప్లవ కారులను తయారు చేసి స్వతంత్ర్య పోరాటంలో కీలక పాత్ర పోషించారు. తర్వాత తత్వవేత్తగా మారి తత్వ శాస్త్రంలోని ప్రాపంచిక దృక్ఫథాలను నిర్మించేందుకు ప్రయత్నం చేశారు.

15 ఆగష్టు 1872న కోల్‌కతాలో జన్మించారు. తండ్రి కృష్ణ ధన్ ఘోష్, తల్లి స్వర్ణ లతా దేవి. కృష్ణ ధన్ ఘోష్ తన పిల్లలను చిన్నతనంలోనే ఇంగ్లాండ్ కు పంపించి ఆంగ్ల విద్యాభ్యాసం చేయించారు. అరవింద్ ఘోష్ ఇండియన్ సివిల్ సర్వీసెస్ కోర్సులో చేరాడు. అందులో గుర్రపు స్వారీ పరీక్షకు ఆలస్యంగా హాజరు కావడంతో ఐసీఎస్ పరీక్షలో ఉత్తీర్ణులు కాలేకపోయారు.

అనంతరం ఘోష్ భారత్ కు చేరుకున్నారు. 1906లో నేషనల్ కాలేజ్ ఆఫ్ కలకత్తాలో ప్రిన్సిపల్ గా చేరారు. ఆ సమయంలో బ్రిటీష్ సామాజ్రవాదం గురించి, వలస వాదానికి వ్యతిరేకంగా జరిగిన తిరుగుబాట్ల గురించి విస్తృతంగా పరిశోధనలు చేశారు. అప్పుడే ఆయన కరుడు కట్టిన విప్లవ వాదిగా మారారు.

చాలా మందిని తన ప్రసంగాలు, బోధనలతో విప్లవం వైపు మళ్లించారు. వందే మాతరం పత్రికా సంపాదకునిగా ప్రజల్లో చైతన్యం కలిగించారు. ఎంతో మందిని స్వాతంత్య్ర పోరాటం వైపు మళ్లించాడు. ఈ క్రమంలో అలీపూర్ కుట్ర కేసులో ఆయన్ని అరెస్టు చేశారు ఈ కేసులో సరైన సాక్ష్యం లేకపోవడంతో తర్వాత ఆయన్ని విడుదల చేశారు.

జైళ్లో ఉన్న సమయంలో ఆయన ఆలోచనలు అద్యాత్మిక వైపు మళ్లింది. విడుదలైన తర్వాత ధ్యాన యోగం వైపు అడుగులు వేశారు. పాండిచ్చేరికి వెళ్లి అక్కడ ఆశ్రమాన్ని స్థాపించారు. ఆ తర్వాత కర్మ యోగీ అనే ఇంగ్లీష్, ధర్మ అనే బెంగాలీ పుస్తకాలను రచించారు. తర్వాత కాలంలో దేశ విభజనను ఆయన వ్యతిరేకించారు. చివరకు 1950లో ఆయన మరణించారు.

చక్రవర్తుల రాజగోపాల చారి (Chakravarthula Raja Gopala Chary)… గొప్ప స్వతంత్ర సమర యోధుడు. గొప్ప రాజనీతి వేత్త. గవర్నర్ జనరల్‌ (Governer general)గా నియమితులైన తొలి, ఏకైక భారతీయుడు. దేశ అత్యున్నత పురస్కారమైన భారత రత్న అందుకున్న తొలి వ్యక్తి. గాంధీజీకి అంతరాత్మ రక్షకుడిగా గుర్తింపు పొందిన వ్యక్తి.

10 డిసెంబర్ 1878న తమిళనాడులోని సేలం జిల్లా దొరపల్లి అగ్రహారంలో సాంప్రదాయ బ్రహ్మణ కుటుంబంలో రాజాజీ జన్మించారు. తండ్రి చక్రవర్తి అయ్యంగార్, తల్లి సింగారమ్మ. ప్రాథమిక విద్య హోసూరు, ఉన్నత విద్య చెన్నై, బెంగళూరులో పూర్తి చేశారు. అనంతరం బెంగళూరు సెంట్రల్ కళాశాల నుంచి ఆర్ట్స్‌లో పట్టా, 1899లో మద్రాసులో ప్రెసిడెన్సీ కళాశాలలో న్యాయ శాస్త్రాన్ని అభ్యసించారు.

న్యాయవాదిగా పని చేస్తున్న సమయంలో దేశ రాజకీయ, సామాజిక పరిస్థితుల గురించి అధ్యయనం చేశారు. బాలగంగాధర్ తిలక్ నుంచి ప్రేరణ పొంది జాతీయ వాదిగా మారారు. 1919లో రౌలట్ చట్టాల వ్యతిరేక పోరాటంలో ఆయన పాల్గొన్నారు. ఆ తర్వాత సహాయ నిరాకరణ ఉద్యమంలో గాంధీజీతో పాటు పాల్గొన్నారు.

ఆ తర్వాత కాలంలో గాంధీజీకి అత్యంత సన్నిహితుడిగా మారారు. దీంతో ఆయన్ని గాంధీజీ అంతరాత్మ రక్షకుడు అనేవారు. ఆయన ఎన్నో గొప్ప పదవులు అలంకరించారు. భారత్ కు తొలి భారతీయ గవర్నర్ జనరల్ గా ఆయన పని చేశారు. మద్రాస్ రాష్ట్రానికి తొలి సీఎంగా కూడా పని చేసిన ఘనత ఆయనది.

డాక్టర్ హోమీ జహంగీర్ బాబా (Homi Jahangir Baba)… భారత అణు శక్తి పితా మహుడు. అణుశక్తి రంగంలో అగ్రరాజ్యాలకు ధీటుగా భారత్ (India) నేడు నిల్చుందంటే దానికి ఆయన ఆలోచనల పుణ్యమే. అణుశక్తిని వద్దంటూ ప్రపంచ దేశాలు వారిస్తున్న సమయంలో భవిష్యత్ అవసరాలను దృష్టిలో పెట్టుకుని భారత్‌ను అణు శక్తి దేశంగా తీర్చిదిద్దే ప్రయత్నాలు చేసిన గొప్ప శాస్త్రవేత్త ఆయన.

30 అక్టోబర్ 1909న డాక్టర్ హోమీ జహంగీర్ బాబా ముంబైలోని ఒక పార్సీ కుటుంబంలో జన్మించారు. ఆయన తండ్రి జహంగీర్ హోర్ముస్జీ బాబా, తల్లి మెహెర్బాయి టాటా. బాబా తన ప్రాథమిక విద్యను ముంబైలో పూర్తి చేశారు. అనంతరం ఉన్నత విద్య కోసం లండన్ వెళ్లారు. 1930లో కేంబ్రిడ్జ్ విశ్వవిద్యాలయం నుంచి మెకానికల్ ఇంజనీరింగ్‌లో పట్టభద్రుడయ్యాడు.

ఇంజనీరింగ్ అనంతరం ఆయనకు భౌతిక శాస్త్రంపై ఆసక్తి పెరిగింది. అనంతరం కాలిఫోర్నియా ఇన్‌స్టిట్యూట్ ఆఫ్ టెక్నాలజీలో భౌతిక శాస్త్రాన్ని అభ్యసించడానికి అమెరికా వెళ్ళే ముందు. ఇంజినీరింగ్‌ తర్వాత భౌతికశాస్త్రంపై ఆసక్తి పెరిగింది. 1935లో కేంబ్రిడ్జ్ విశ్వవిద్యాలయం నుండి న్యూక్లియర్ ఫిజిక్స్‌లో.పీహెచ్‌డీ పూర్తి చేశారు.

1939లో భారత్ కు తిరిగి వచ్చాడు. అప్పుడే రెండో ప్రపంచ యుద్ధం మొదలు కావడంతో భారత్ లోనే ఉండాలని నిర్ణయించుకున్నారు. అప్పుడే అణుశక్తి అవసరాలను గుర్తించి భారత్‌లో అణుశక్తి కమిషన్ ఏర్పాటు కోసం అప్పటి ప్రధాని జవహార్ లాల్ నెహ్రూను ఒప్పించారు. ఆ తర్వాత దేశంలో తొలి అణుశక్తి రియాక్టర్ ‘అప్సర’ఆయన నేతృత్వంలోనే రూపు దిద్దుకుంది.

ఆయన సేవలను గుర్తించి భారత ప్రభుత్వం 1954లో ఆయన్ని పద్మ భూషణ్ అవార్డుతో సత్కరించింది. ఆ తర్వాత 1959లో భారత రెండో అత్యున్నత పురస్కారమైన పద్మ విభూషణ్ అవార్డును ఆయనకు ప్రధానం చేసింది. 24 నవంబర్ 1966లో స్విస్ లో జరిగిన విమాన ప్రమాదంలో ఆయన మరణించారు.

శ్రీనివాస రామానుజన్ (Srinivasa Ramanujan)…. గణిత ప్రపంచంలో భారత కీర్తిని అత్యున్నత స్థాయికి తీసుకు వెళ్లిన గొప్ప గణిత శాస్త్రవేత్త (Mathematician).15 ఏండ్ల వయసులోనే అతి కఠినమైన జార్జ్ స్కూచ్‌సిడ్జ్‌కార్ రాసిన ‘సినాప్సిస్’పుసక్తంలోని పలు సిద్దాంతాలు, సూత్రాలకు తనదైన రీతిలో సాధనలు చూపించారు. ఆయన జయంతిని జాతీయ గణిత దినోత్సవంగా ప్రకటించారంటేనే ఆయన మేధస్సు గురించి మనకు తెలిసిపోతుంది.

1887 డిసెంబర్ 22న తమిళనాడులోని ఈరోడ్‌లో జన్మించారు. తండ్రి కే శ్రీనివాస అయ్యంగార్, తల్లి కోమలటమ్మాళ్. చిన్నతనం నుంచే గణితంలో ఆయన ఆసక్తి కనబరిచే వారు. చిన్నతనంలోనే ఆయిలర్ సూత్రాలు, త్రికోణమితికి సంబంధించిన అనే చిక్కు ప్రశ్నలను అవలీలగా సాధించి అందరిని ఆశ్చర్యానికి గురయ్యేలా చేసేవారు. కాలేజీ స్థాయికి వచ్చే వరకు గణితం పట్ల ఆయనకు మక్కువ పెరిగింది.

కళాశాలలో చదువుతున్న సమయంలో గణితంపై శ్రద్ద చూపుతూ మిగిలిన సబ్జెక్టులను నిర్లక్ష్యం చేశారు. దీంతో పరీక్ష తప్పారు. జార్జ్ స్కూచ్‌సిడ్జ్‌కార్ రాసిన ‘సినాప్సిస్’పుస్తకంలోని పలు సిద్దాంతాలను ఆయన సాధంచి చూపించారు. మహా, మహా మేధావులు, ప్రొఫెసర్లకు కూడా సరిగా అర్థం కాని సిద్దాంతాలు, సూత్రాలను ఆయన సాధించి చూపించారు.

రామానుజానికి ఎలాంటి డిగ్రీ లేకున్నప్పటికీ అప్పట్లో మద్రాసు విశ్వ విద్యాలయం ఆయనకు రూ. 75 ఫెలోషిప్ గా ఇచ్చింది. ఆ తర్వాత రామానుజం పరిశోధనల గురించి వాకర్ అనే గణిత శాస్త్రవేత్త కేంబ్రిడ్జికి పంపించారు. రామానుజం ప్రతిభను గుర్తించిన కేంబ్రిడ్జి వర్శిటీ ప్రొఫెసర్లు ఆయన్ని అక్కడకు ఆహ్వానించారు. పరిశోధనల్లో మునిగిపోయి ఆరోగ్యాన్ని నిర్లక్ష్యం చేశారు. దీంతో 33 ఏండ్లకే మరణించారు. తన చివరి రోజుల్లో 1729 సంఖ్య విశిష్టతను వివరించాడు. దీంతో దాన్ని రామానుజం సంఖ్య గుర్తించారు.

సర్ సీవీ రామన్ (CV Raman)….సైన్స్ రంగంలో భారత్ కీర్తి ప్రతిష్టలను అంతర్జాతీయ స్థాయిలో ఇనుమడింప చేసిన గొప్ప శాస్త్రవేత్త. భారత్ గర్వించదగ్గ విద్యా వేత్త. కేవలం భారత్‌లోనే కాదు అటు ఆసియాలో సైన్స్ విభాగంలో నోబెల్ బహుమతి (Nobel Prize) పొందిన మొదటి వ్యక్తి.గా ఘనత సాధించారు. భారత్ రత్న అందుకున్న మొదటి శాస్త్రవేత్తగా ఆయన కీర్తి పొందారు.

7 నవంబర్ 1888న మద్రాస్ ప్రెసిడెన్సీలోని తిరుచిరపల్లిలో జన్మించారు. పూర్తి పేరు చంద్రశేఖర వెంకట రాఘవన్. తల్లదండ్రులు రామనాథన్ అయ్యర్, పార్వతి అమ్మాళ్. సీవీ రామన్ ప్రాథమిక విద్యను విశాఖలో, ఆ తర్వాత మద్రాస్ ప్రెసిడెన్సీ కళాశాలలో ఫిజిక్స్ విభాగంలో మాస్టర్స్ డిగ్రీని రామన్ పూర్తి చేశారు. అనంతరం ఐసీఎల్ లో ఉత్తీర్ణత సాధించి డిప్యూటీ అకౌంటెంట్ గా ఉద్యోగంలో చేరారు.

ఉద్యోగం చేస్తున్న సమయంలోనే ఆయన మనసు పరిశోధనల వైపు మళ్లింది. దీంతో అధికారుల నుంచి అనుమతి తీసుకుని పరిశోధనలు మొదలు పెట్టారు. చిన్ననాటి నుంచి తన తల్లి వీణ వాయించడం చూస్తు పెరిగిన కారణమో ఏమో తెలియదు కానీ మొదట సంగీత వాయిద్యాలపై పరిశోధనలు ప్రారంభించారు. ఆ తర్వాత అకౌంటెంట్ ఉద్యోగాన్ని వదిలికి కలకత్తా వర్శిటీలో ఫిజిక్స్ లెక్చరర్ గా జాయిన్ అయ్యారు.

ఆ తర్వాత కాంతిపై ప్రయోగాలు చేశాడు. ముఖ్యంగా పడవలో ప్రయాణిస్తున్న సమయంలో సముద్ర నీరు, ఆకాశం రెండు కూడా నీలి రంగులో ఉండటం గమనించారు. కాంతి అనేది సముద్రం నీటి గుండా ప్రయాణించినప్పుడు పరిక్షేపణం చెందుతుందని, అందువల్లే సముద్ర నీళ్లు మనకు నీలి రంగులో కనిపిస్తాయని చెప్పారు. ఇందులో భాగంగా రామన్ ఎఫెక్ట్ ను ఆయన ప్రచురించారు. దీనికి 1930లో ఆయనకు నోబెల్ బహుమతి వచ్చింది. ఆ తర్వాత సైన్స్ రంగంలో ఆయన చేసిన సేవలను గుర్తించి భారత ప్రభుత్వం ఆయనకు 1954లో భారత రత్న అవార్డు ప్రకటించింది.