ఢిల్లీలో దారుణ ఘటన చోటు చేసుకుంది. కొందరు దుండగులు కారు (Car) దొంగలించడానికి వచ్చి ఆ కారు డ్రైవర్ (Driver) ను ఢీ కొట్టారు. కారుతో పాటు డ్రైవర్ ను 200 మీటర్ల వరకు డ్రైవర్ ను కారుతో పాటు ఈడ్చుకు వెళ్లారు. దీనికి సంబంధించిన వీడియోలు సీసీ టీవీలో రికార్డయ్యాయి. ఈ ఘటన వసంత్ కుంజ్ ప్రాంతంలో చోటు చేసుకుంది.
పోలీసులు తెలిపిన వివరాల ప్రకారం….. ఫరీదాబాద్‌కు చెందిన బిజేంద్ర (45) క్యాబ్ నడుపుతూ జీవనం సాగిస్తున్నాడు. మంగళవారం అతను మహిపాల్ పూర్ ప్రాంతంలో కారులో వెళ్లాడు. ఆ సమయంలో కొందరు దుండగులు ఆ కారును అడ్డుకున్నారు. వెంటనే కారుపై దాడి చేసి డ్రైవర్ ను కారు నుంచి బయటకు లాగేశారు.
ఈ క్రమంలో దుండగులను అడ్డుకునేందుకు డ్రైవర్ ప్రయత్నం చేశాడు. దీంతో దుండగులు అతనిపై దాడి చేశారు. అనంతరం కారుతో డ్రైవర్ ను ఢీ కొట్టారు. కారుతో పాటు సుమారు 200 మీటర్ల వరకు ఈడ్చుకు వెళ్లారు. ఈ ఘటనలో క్యాబ్ డ్రైవర్ తలకు తీవ్రగాయాలయ్యాయి. దీంతో డ్రైవర్ అక్కడికక్కడే మృతి చెందారు.
అనంతరం స్థానికులు పోలీసులకు సమాచారం అందించారు. ఘటనా స్థలానికి చేరుకున్న పోలీసులు కేసు నమోదు చేశారు. సీసీ టీవీ దృశ్యాల ఆధారంగా నిందితుల కోసం పోలీసులు గాలిస్తున్నారు. త్వరలోనే నిందితులను పట్టుకుంటామని పోలీసులు తెలిపారు.
