Ramu

కాంగ్రెస్ నేత అధిర్ రంజన్ చౌదరి (Adhir Ranjan Chowdhury)పై కేంద్ర ఆర్థిక మంత్రి నిర్మలా సీతారామన్ (Nirmala Sitharaman) ఫైర్ అయ్యారు. బీజేపీయేతర రాష్ట్రాలకు రావాల్సిన బకాయిలు, పన్నుల చెల్లింపు విషయంలో కేంద్రం నిర్లక్ష్యంగా వ్యవహరిస్తోందన్న అధిర్ రంజన్ చౌదరి వ్యాఖ్యలపై ఆమె మండిపడ్డారు.

ఆ ఆరోపణలను స్వార్థ ప్రయోజనాలతో చేసిన రాజకీయ విష ప్రచారాలుగా ఆమె పేర్కొన్నారు. ఆర్థిక సంఘం సిఫార్సుల ఆధారంగానే రాష్ట్రాలకు నిధుల పంపిణీ జరుగుతుందని ఆమె ఉద్ఘాటించారు. ఆ సిఫారసులను ఎలాంటి పక్షపాతం లేదా రాజకీయ ప్రభావం లేకుండా అమలు చేస్తున్నామని పేర్కొన్నారు.

రాష్ట్రానికో ర‌కంగా త‌న ఇష్టానుసారంగా నిబంధ‌న‌ల‌ను మార్చే హ‌క్కు త‌న‌కు లేద‌ని వెల్లడించారు. ఇది త‌మ పార్టీ రాజ‌కీయాల‌కూ విరుద్ధ‌మ‌ని కేంద్ర మంత్రి స్ప‌ష్టం చేశారు. త‌న‌కు నిబంధ‌న‌ల‌ను మార్చే బాధ్య‌త ఉండ‌ద‌ని చెప్పారు. తాము నిబంధ‌న‌ల‌ను నూరు శాతం అనుస‌రించాల్సిందేన‌ని తేల్చి చెప్పారు.

ఫైనాన్స్ క‌మిష‌న్ సిఫార్సుల‌ను తాను అమ‌లు చేయాల్సి ఉంటుంద‌ని అన్నారు. ఆర్థిక మంత్రిగా, వ్యక్తిగత ప్రాధాన్యతలు లేదా పార్టీ రాజకీయాల ఆధారంగా కేటాయింపులను మార్చే అధికారం తనకు లేదన్నారు. ఈ ప్ర‌క్రియ ఇలా సాగుతుంటే కొన్ని రాష్ట్రాలు రాజ‌కీయ రంగు పులుముతూ ఆయా రాష్ట్రాల ప‌ట్ల వివ‌క్ష క‌న‌బ‌రుస్తున్నామ‌ని ఆరోపణలు గుప్పిస్తున్నాయని తీవ్ర అభ్యంతరం వ్యక్తం చేశారు.

కేసీఆర్‌ (KCR) వస్తున్నాడనగానే కాంగ్రెస్ (Congress) నేతల లాగులు తడుస్తున్నాయని మాజీ మంత్రి జగదీశ్ రెడ్డి (Jagadeesh Reddy) అన్నారు. ప్రాజెక్టులను కేఆర్‌ఎంబీకి అప్పజెప్పి కాంగ్రెస్ నేతలు దొంగ నాటకాలు ఆడుతున్నారని తీవ్ర స్థాయిలో ఫైర్ అయ్యారు. కాంగ్రెస్‌ నేతలు దద్దమ్మలని.. అందుకే నాగార్జున సాగర్‌ ప్రాజెక్టును కేంద్రానికి అప్పజెప్పారని తీవ్ర ఆగ్రహం వ్యక్తం చేశారు.

కాంగ్రెస్ నేతలకు అహంకారం పెరిగిందని అన్నారు. కాంగ్రెస్ సీఎం, కేబినెట్‌ అంతా రండనేనని.. కేసీఆర్‌పై ఎదురుదాడి చేసి తప్పించుకోవాలని చూస్తున్నారన్నారని మండి పడ్డారు. రైతు బంధు నిలిపివేశారని, రైతుబంధు అడిగితే చెప్పుతో కొడతామంటున్నారని ఫైర్ అయ్యారు. కోమటిరెడ్డి లాంటోడు మతిస్థిమితం లేకుండా మాట్లాడుతున్నాడని నిప్పులు చెరిగారు.

యాదాద్రి పవర్ ప్లాంట్ అపుతానంటున్న కోమటిరెడ్డిని ప్రజలు చెప్పులతో కొడతారని తీవ్ర వ్యాఖ్యలు చేశారు. తొమ్మిదేండ్లయినా నదీ జలాలు పంపిణీ చేసే తీరిక కేంద్రానికి లేదని అన్నారు. అలాంటిది సాగర్‌ నుంచి మనకు మంచినీరు కావాలంటే త్వరగా ఇస్తుందా ఆలోచన చేయాలని సూచించారు. ఇప్పుడు కాంగ్రెస్‌ చేతకానితనంతో సాగర్ మన చేతుల్లోంచి వెళ్లిపోయిందని ఫైర్ అయ్యారు.

ఆ పార్టీ నిర్వాకం వల్ల ఈ దుస్థితి వచ్చిందన్నారు. కాంగ్రెస్ వాళ్లకు చిత్తశుద్ధి ఉంటే రేపటి వరకు సాగర్ ప్రాజెక్టును మన పరిధిలోకి తీసుకురావాలని సవాల్ విసిరారు. తెలంగాణకు శ్రీ రామ రక్ష కేసీఆర్ మాత్రమేనని పేర్కొన్నారు. సాగర్ నీళ్ల కోసం కేసీఆర్ పోరాటం మొదలుపెడుతున్నారని చెప్పారు. కాంగ్రెస్ వాళ్లను ఉరికించి కొడతామని హెచ్చరించారు. మన కళ్ల ముందే సాగర్ నీళ్లుపోతుంటే రైతుల కడుపు రగులుతోందన్నారు.

ప్రాజెక్టులను కేఆర్‌ఎంబీకి ఇవ్వడమంటే ఆంధ్రాకు నీళ్లు అప్పనంగా రాసి ఇవ్వడమేనని తేల్చి చెప్పారు. అప్పట్లో చంద్రబాబు సాగర్ డ్యామ్‌పై హుషారు చేస్తే కేసీఆర్‌ తరిమికొట్టారని చెప్పారు. రాష్ట్రంలో ఇక యుద్ధం మొదలు పెడదామన్నారు.. కాంగ్రెస్ వాళ్లను తరిమికొడదామని ప్రజలకు పిలుపునిచ్చారు. ఎడమ కాల్వ రైతాంగం మళ్లీ తిరోగమనం అయ్యేలా పరిస్థితి వచ్చిందని పేర్కొన్నారు.

సాగర్ డ్యామ్ కేంద్ర బలగాల చేతికిపోయిందని ఆవేదన వ్యక్తం చేశారు. మనలను అడుగు కూడా పెట్టనియ్యడం లేదన్నారు. ఇది కాంగ్రెస్ చేసిన నిర్వాకమని తీవ్రంగా విరుచుకపడ్డారు. కాంగ్రెస్ తెలివితక్కువ తనంతో కృష్ణా నీళ్లు తరలిపోయాయని ఆరోపించారు. పోలీసులను అడ్డం పెట్టుకొని కాంగ్రెస్ నేతలు పాలన చేస్తున్నారని నిప్పులు చెరిగారు. చంద్రబాబు బూట్లు నాకేటోళ్లు కాంగ్రెస్ వాళ్లని.. రేవంత్ చంద్రబాబు శిష్యుడని.. అందుకే ఈ దుస్థితి వచ్చిందన్నారు.

పదేండ్లలో రాష్ట్రాన్ని కేసీఆర్ (KCR) అడ్డంగా దోచుకున్నాడని మంత్రి కోమటి రెడ్డి వెంకట్ రెడ్డి (Komati Reddy Venkat Reddy) ఆరోపించారు. ఇప్పుడు దోపడి డబ్బును పక్క దారి పట్టిస్తున్నాడని ఆరోపణలు గుప్పించారు. ప్రాజెక్టుల విషయంలో మాజీ సీఎం కేసీఆర్ పెద్ద తప్పు చేసి రాష్ట్ర ప్రజలను నిలువునా ముంచారని మండిపడ్డారు. నల్లగొండతో పాటు మరో మూడు జిల్లాలను సర్వనాశనం చేశాడని ఫైర్ అయ్యారు.

నల్లగొండలో మీడియాతో కోమటి రెడ్డి వెంకట్ రెడ్డి మాట్లాడుతూ…. కేసీఆర్ చేసిన మోసాన్ని తలుచుకుంటే రక్తం మరిగిపోతుందని చెప్పారు. కేసీఆర్ ఇంకా తన ప్రైవేట్ విమానం లీజ్ క్యాన్సిల్ చేసుకోలేదని తెలిపారు. ఎప్పుడంటే అప్పుడు కేసీఆర్ దుబాయ్‌కు పారిపోవచ్చని… అందుకే లీజ్ ఇంకా కొనసాగిస్తున్నారని ఆరోపణలు చేశారు. పనికి రాని వాడికి నల్లగొండ జిల్లాలో మంత్రి పదవి ఇచ్చారని జగదీశ్ రెడ్డిపై విమర్శలు చేశారు.

సూర్యపేటలో తాగేందుకు నీళ్లు లేక పోవడంతో మూసీ నీళ్లు తాగే పరిస్థితి వచ్చిందని ఆవేదన వ్యక్తం చేశారు. రూ. 4 వేల కోట్లు పెట్టి ఏఎమ్ఆర్పీ ప్రాజెక్ట్ కట్టి ఉంటే ఇలాంటి పరిస్థితి వచ్చి ఉండేది కాదని అభిప్రాయాన్ని వ్యక్తం చేశారు. నల్లగొండ జిల్లాలో 90 శాతం పూర్తైన బ్రహ్మణ వెల్లంల ప్రాజెక్ట్‌ను పూర్తి చేయలేదని తీవ్ర ఆగ్రహం వ్యక్తం చేశారు. కాళేశ్వరం కంటే ముందే ప్రారంభించిన డిండి ప్రాజెక్ట్ ఎందుకు పూర్తి కాలేదని ప్రశ్నించారు.

కుర్చీ వేసుకుని కూర్చొని ప్రాజెక్టులు కడతామని చెప్పి… పదేళ్లు పట్టించుకున్న పాపాన పోలేదని ఫైర్ అయ్యారు. ఉత్తర తెలంగాణలో మాత్రం అవసరం లేకపోయినా కాళేశ్వరం ప్రాజెక్ట్ కట్టారని నిప్పులు చెరిగారు. అసెంబ్లీ సమావేశాల్లో కేసీఆర్ బండారం బయటపడుతుందన్నారు. ప్రభుత్వంలో కీలకమైన శాఖలన్నీ తన వద్దే పెట్టుకుని కేసీఆర్ దోపిడికి పాల్పడ్డారని తీవ్ర ఆరోపణలు చేశారు.

కేసీఆర్ దోపిడికి హెచ్ఎండీఏ డైరెక్టర్ బాలకృష్ణ ఒక ఉదహరణ అని ఎద్దేవా చేశారు. తెలంగాణ మాజీ సీఎస్ సోమేశ్ కుమార్‌కు 5 వేల ఎకరాల భూములు ఉన్నాయని చెప్పారు. త్వరలోనే ఆయన బండారం కూడా బయటపడుతుందన్నారు. త్వరలోనే ఆయనపై కేసులు నమోదు అవుతాయని వెల్లడించారు. దక్షిణ తెలంగాణకు కేసీఆర్ అన్యాయం చేశాడని ధ్వజమెత్తారు.

మూడు జిల్లాల ప్రజలకు కేసీఆర్, హరీశ్ రావు, జగదీశ్ రెడ్డి బహిరంగ క్షమాపణ చెప్పాలని డిమాండ్ చేశారు. బీఆర్ఎస్ వాళ్లు చేసిన పాపాలకే ఎన్నికల్లో ఆ పార్టీని ప్రజలు చిత్తు చిత్తుగా ఓడించారని చెప్పారు. ఇప్పుడు మళ్లీ వచ్చి నల్లగొండలో పబ్లిక్ మీటింగ్ పెడతామంటున్నారని ఎద్దేవా చేశారు. ఇక్కడికి వస్తే ప్రజలు తరిమికొడతారని హెచ్చరించారు. మొన్న అసెంబ్లీ ఎన్నికల్లో ఇచ్చిన తీర్పుకు బుద్ధిరాలేదా ఫైర్ అయ్యారు.

ప్రాజెక్ట్‌లను అప్పగించేది లేదని ప్రభుత్వం రంకెలేస్తోందని మాజీ మంత్రి హరీశ్ రావు (Harish Rao) అన్నారు. కానీ ఇటీవల జరిగిన కేఆర్ఎంబీ (KRMB) మీటింగ్‌లోనే ప్రాజెక్ట్‌లను కేంద్రానికి అప్పగిస్తూ ప్రభుత్వం నిర్ణయం తీసుకుందని వెల్లడించారు. తెలంగాణ తొలి సీఎం కేసీఆర్‌పై సీఎం రేవంత్ రెడ్డి వ్యక్తిగత దూషణకు దిగుతున్నారంటూ తీవ్ర స్తాయిలో విరుచుకపడ్డారు.

తెలంగాణ భవన్‌లో హరీశ్ రావు మీడియాతో మాట్లాడుతూ…. సీఎం రేవంత్ రెడ్డి భాష, ధోరణి చూసి ప్రజలు అసహ్యించుకుంటున్నారని తెలిపారు. ప్రాజెక్టులపై మీడియా సమావేశంలో మాట్లాడిన రేవంత్ రెడ్డి కేవలం వితండవాదం చేశారే తప్ప మరేమీ లేదన్నారు. కాంగ్రెస్ అధికారంలోకి వచ్చిన తర్వాత ఢిల్లీలో కేఆర్ఎంబీ సమావేశం జరిగిందని వివరించారు.

ఆ సమావేశంలోనే ప్రాజెక్టులను అప్పగించేందుకు ప్రభుత్వం అంగీకరించిందని ఆరోపణలు చేశారు. నెల రోజుల్లో 15 ఔట్ లెట్స్‌ను కేఆర్ఎంబీకి ప్రాజెక్టులను అప్పగిస్తున్నట్లు కేంద్ర జలశక్తి శాఖ మినిట్స్‌లో కూడా ఉందని వెల్లడించారు. కృష్ణా నదిపై ఉన్న ప్రాజెక్టుల నిర్వహణ బాధ్యత కేఆర్ఎంబీకి అప్పగించేందుకు ఇరు రాష్ట్రాల అధికారులు ఒకే చెప్పారని అన్నారు.

ఇక నుంచి ఇరు రాష్ట్రాల అధికారులు ఎవరైనా డ్యామ్ పైకి వెళ్లాలంటే కేఆర్ఎంబీ అనుమతి తీసుకోవాల్స ఉంటుందన్నారు. పదేండ్లు అధికారంలో ఉన్న కేసీఆర్ ప్రభుత్వం ప్రాజెక్టులను కేంద్రానికి అప్పగించలేదని తెలిపారు..కానీ కాంగ్రెస్ వచ్చిన కేవలం రెండు నెలల్లో రాష్ట్ర ప్రాజెక్టులను కేంద్రం చేతిలో పెట్టిందని ధ్వజమెత్తారు. ప్రాజెక్టులను అప్పగించింది నిజం కాకపోతే ప్రభుత్వం ఎందుకు వివరణ ఇవ్వలేదని నిలదీశారు.

తాను ప్రెస్ మీట్ పెట్టాక రాష్ట్ర ప్రభుత్వం మినిట్స్‌లో తప్పులు ఉన్నాయని కేంద్రానికి లేఖ రాసిందని ఆరోపణలు గుప్పించారు. చేసిన తప్పును కప్పిపుచ్చుకునేందుకు తమపై కాంగ్రెస్ నేతలు దుర్భాషలాడుతున్నారని నిప్పులు చెరిగారు. ప్రభుత్వాలు ఉండేది రాజకీయాల కోసం కాదని… ప్రజల కోసమన్నారు . ప్రభుత్వానికి భేషజాలు ముఖ్యం కాదని.. రాష్ట్ర ప్రయోజనాలు కాపాడాలన్నారు.