Ramu

గవర్నర్ (Governor) వ్యవహరిస్తున్న పక్షపాత వైఖరిని తెలంగాణ (Telangana) ప్రజలు గమనిస్తున్నారని బీఆర్ఎస్ (BRS) వర్కింగ్ ప్రెసిడింట్ కేటీఆర్ (KTR) అన్నారు. సీఎం రేవంత్ రెడ్డికి గవర్నర్‌ బాధ్యులు కాదని, కేవలం ప్రజలకు బాధ్యులనే విషయాన్ని గుర్తుంచుకోవాలని హితవు పలికారు. రాష్ట్ర ప్రజలు ఇచ్చే జీతంతో గవర్నర్ పనిచేస్తున్నారని, రాజ్‌భవన్ నడుస్తోందన్న విషయాన్ని గుర్తుంచుకోవాలన్నారు.

75వ గణతంత్ర దినోత్సవ వేడుకల్లో భాగంగా తెలంగాణ భవన్‌లో జాతీయ జెండాను కేటీఆర్ ఎగురువేశారు. అనంతరం కేటీఆర్ మాట్లాడుతూ….
తెలంగాణ కోసం పోరాడిన దాసోజు శ్రావణ్, ఎరుకల సామాజిక వర్గానికి చెందిన సత్యనారాయణను గతంలో తమ ప్రభుత్వం నామినేట్ చేసిందన్నారు. కానీ రాజకీయపరమైన సంబంధాలు ఉన్నాయని చెబుతూ వారి అభ్యర్థిత్వాలను గవర్నర్ తిరస్కరించారని చెప్పారు. మరి ఇప్పుడు ఒక పార్టీ అధ్యక్షులుగా ఉన్న కోదండరాం అభ్యర్థిత్వాన్ని ఎలా ఆమోదించారని ప్రశ్నించారు.

తెలంగాణ ఉద్యమంలో పాల్గొన్న శ్రవణ్, సామాజిక ఉద్యమంలో పాల్గొన్న సత్యనారాయణకు రాజకీయ నేపథ్యం అడ్డంకి అనుకుంటే మరి కోదండరాంను ఎలా ఆమోదించాలో గవర్నర్ వివరించాలని డిమాండ్ చేశారు. నాడు కనిపించిన రాజకీయ నేపథ్య అడ్డంకులు కనిపించాయని మరి ఇప్పుడు ఎందుకు కనిపించడం లేదని ఆయన ప్రశ్నల వర్షం కురిపించారు.

కాంగ్రెస్, బీజేపీకి మధ్య ఉన్న ఫెవికాల్ బంధం మేరకు ఈ నిర్ణయం తీసుకున్నారా అనే విషయాన్ని వివరించాలన్నారు. ఈ నామినేషన్ల అంగీకారం కాంగ్రెస్, బీజేపీ కుమ్మక్కును తెలియజేస్తోందన్నారు. ప్రభుత్వం నుంచి లెటర్ రాగానే ఆగమేఘాల మీద ఎలా సంతకం చేశారో గవర్నర్ చెప్పాలని డిమాండ్‌ చేశారు. కాంగ్రెస్, బీజేపీ కుమ్మక్కైన విషయం ప్రజలందరికీ తెలుస్తోందన్నారు.

ఒకటే రోజు రాజీనామా చేసిన ఎమ్మెల్సీలకు ఒకటే బులిటిన్ ద్వారా రాజీనామా ఆమోదించారని చెప్పారు. ఒకటే కోటా కింద ఉన్న ఎమ్మెల్సీలకు వేరువేరుగా ఎన్నికలు నిర్వహించారని విమర్శలు గుప్పించారు. ఢిల్లీలో అమిత్ షాను రేవంత్ రెడ్డి కలవగానే ఒకే ఎన్నిక కాకుండా వేరువేరుగా ఎన్నికలు జరిగేటట్టు నిర్వహించారని పేర్కొన్నారు. ఒకేసారి ఎన్నిక జరిగితే వాటిలో ఒకటి బీఆర్ఎస్‌కు, మరొకటి కాంగ్రెస్‌కు వచ్చేదన్నారు.

జాకీలు పెట్టి మరి కాంగ్రెస్‌కు బీజేపీ మద్దతుగా నిలుస్తోందని ఆరోపించారు. బండి సంజయ్ కూడా మొన్న కాంగ్రెస్ బీజేపీ కొట్లాడుకోవద్దని… బీఆర్ఎస్‌ను అంతం చేద్దామని పిలుపునిచ్చారని… నిన్న గుంపు మేస్త్రి కూడా అదే మాట అన్నారని గుర్తుచేశారు. మరోవైపు సీఎం రేవంత్ రెడ్డిపై కేటీఆర్ తీవ్ర స్థాయిలో విరుచుకుపడ్డారు.
మంచి పదవిలో కూర్చోబెట్టినంత మాత్రాన నీచ మానవులు తమ బుద్ధి మార్చుకోరని పెద్దలు ఎప్పుడో చెప్పారన్నారు.

రేవంత్ రెడ్డి అహంకారం, వెకిలి వ్యవహారం చూస్తుంటే వాళ్లు ఇంకా ప్రతిపక్షంలో ఉన్నామనుకుంటున్నట్టుగా ఉందని ఎద్దేవా చేశారు. బీఆర్‌ఎస్సే ఇప్పటికీ అధికారంలో ఉందనుకుని తమను ఆడిపోసుకుంటున్నారని విమర్శించారు. చేతనైతే ఎన్నికల్లో ఇచ్చిన 420 హామీలను అమలుపర్చాలని సూచించారు. రాజకీయాల్లో ఇలాంటి కుసంస్కారం ఉన్న వ్యక్తులు ఉన్నప్పుడు ఇలాంటి విమర్శలు తప్పవన్నారు.

ప్రజల తరఫున ఎన్నికైన సర్పంచుల పదవీకాలాన్ని పొడగించాలని కోరారు. అంతే కానీ ప్రత్యేక ఇంచార్జీలను పెట్టవద్దని సూచించారు. ప్రజాపాలన అంటే ఎన్నికైన ప్రజాప్రతినిధులు మాత్రమే పాలించాలని, ప్రభుత్వం నియమించిన ప్రత్యేక ఇంచార్జీలు కాదన్నారు. ఈ విషయాన్ని కాంగ్రెస్ ప్రభుత్వం తెలుసుకోవాలని సూచించారు. కరోనా సమయంలో సర్పంచ్‌లో రెండేండ్ల పాలనా సమయం పోయిందన్నారు. అందువల్ల పదవీ కాలాన్ని ఆరు నెలలు లేదా సంవత్సరం వరకు పొడిగించాలని లేదా ఎన్నికలు నిర్వహించే వరకు వారి కాలాన్ని పొడిగించాలని సూచనలు చేశారు.

రాజేంద్ర నగర్ వర్శిటీలో ఏబీవీపీ (ABVP)మహిళా నాయకురాలి పట్ల మహిళా పోలీసులు అమానుషంగా ప్రవర్తించిన ఘటనపై రాష్ట్ర మహిళా కమిషన్ (women’s commission) సీరియస్ అయింది. ఈ ఘటనను మహిళా కమిషన్ సుమోటోగా స్వీకరించింది. ఇది అమానుష ఘటన అంటూ పోలీసులపై తీవ్ర ఆగ్రహం వ్యక్తం చేసింది.

విద్యార్థిని అలా రోడ్డుపై ఈడ్చుకు వెళ్లడం ఏంటని ప్రశ్నించింది. ఈ ఘటనపై సమగ్ర విచారణకు ఆదేశించింది. ఘటనపై తమకు నివేదిక అందించాలని ఆదేశాలు జారీ చేసింది. ఘటనకు కారణమైన వారిపై కఠిన చర్యలు తీసుకోవాలని పేర్కొంది. ఘటనకు కారణమైన పోలీసులు వెంటనే భేషరతుగా క్షమాపణలు చెప్పాలని కోరింది.

రాజేంద్రనగర్ అగ్రికల్చర్ వర్శిటీ భూమిని హైకోర్టు నూతన భనవానికి కేటాయించడాన్ని వ్యతిరేకిస్తూ ఏబీవీపీ ఆందోళనకు దిగింది. ప్రభుత్వ నిర్ణయాన్ని వ్యతిరేకిస్తూ వర్శిటీని ముట్టడించేందుకు ఏబీవీపీ ప్రయత్నించింది. వర్శిటీలో హైకోర్టుకు కేటాయించిన స్థలాన్ని పరిశీలించేందుకు ఏబీవీపీ కార్యకర్తలు వెళ్లారు. దీంతో వారిని పోలీసులు అడ్డుకున్నారు.

ఈ క్రమంలో ఉద్రిక్త వాతావరణం నెలకొంది. ఆందోళన చేస్తున్న ఏబీవీపీ నాయకులను పోలీసులు అరెస్టు చేశారు. ఈ క్రమంలో ఏబీవీపీ రాష్ట్ర కార్యదర్శి ఝాన్సీ పోలీసులను తప్పించుకుని పరుగెత్తారు. దీంతో ఆమెను మహిళా పోలీసులు వెంబడించారు. ఈ క్రమంలో ఝాన్సీని కింద పడిపోగా మహిళా పోలీసులు ఝాన్సీ జుట్టు పట్టుకుని లాక్కెళ్లేందుకు ప్రయత్నించారు. దీనికి సంబంధించిన వీడియోలు వైరల్ కావడంతో పోలీసుల తీరుపై పలువురు ఆగ్రహం వ్యక్తం చేస్తున్నారు.

తపపై బీజేపీ నేత, మాజీ ఎంపీ కొండా విశ్వేశ్వర్ రెడ్డి ( Konda Vishweshwar Reddy) పెట్టిన కేసుపై బీఆర్ఎస్ ఎంపీ (BRS MP) రంజిత్ రెడ్డి (Ranjith Reddy) స్పందించారు. అదో అనవసరమైన కేసు అని వ్యాఖ్యానించారు. ప్రతి దాన్ని రాజకీయం చేయాలని చూస్తున్నారని మండిపడ్డారు. కేవలం పొలిటికల్ మైలేజ్ కోసమే తాపత్రయ పడుతున్నారంటూ వ్యాఖ్యలు చేశారు.

అసలు కేసు ఎందుకు పెట్టారనే విషయం కొండా విశ్వేశ్వర్ రెడ్దికే తెలియాలని అన్నారు. ఆ కేసు పై తానేమీ మాట్లాడనని స్పష్టం చేశారు. తన 60 ఏండ్ల జీవితంలో తనపై ఎలాంటి ఒక్క ఎఫ్ఐఆర్ కూడా లేదని వెల్లడించారు. కొంత మంది ప్రతి అంశాన్ని రాజకీయం చేస్తున్నారంటూ తీవ్ర స్థాయిలో మండిపడ్డారు.

రేపు బీఆర్ఎస్ పార్లమెంటరీ సమావేశాన్ని నిర్వహించనున్నారని చెప్పారు. బడ్జెట్ సమావేశాల్లో అనుసరించాల్సిన వ్యూహాలపై కేసీఆర్ దిశా నిర్దేశం చేసే అవకాశం ఉందని పేర్కొన్నారు. తెలంగాణకు సంబంధించిన అంశాలపై పార్లమెంట్‌లో ప్రస్తావిస్తామన్నారు. విభజన సమస్యలను లేవనెత్తుతామని వెల్లడించారు.

అంతకు ముందు ఈ నెల 20న ఎంపీ రంజిత్ రెడ్డిపై కొండా విశ్వేశ్వర్ రెడ్డి బంజారాహిల్స్ పోలీసులకు ఫిర్యాదు చేశారు. ఎంపీ రంజిత్ రెడ్డి తనకు ఫోన్ చేశారని, తనను దూషిస్తూ బెదిరింపులకు దిగారని చెప్పారు. అయితే బెదిరించింది ఎవరనే విషయాన్ని మీడియా ముందు ప్రస్తావించని విశ్వేశ్వర్ రెడ్డి పోలీసులకు ఇచ్చిన ఫిర్యాదులో రంజిత్ రెడ్డి పేరు చెప్పారు.

మాజీ మంత్రి, బీఆర్ఎస్ వర్కింగ్ ప్రెసిడెంట్ కేటీఆర్ (KTR) భ్రమల్లో బతకడం మానేసి.. వాస్తవంలోకి రావాలని మంత్రి ఉత్తమ్ కుమార్ రెడ్డి (Uttam Kumar Reddy) అన్నారు. లోక్‌సభ ఎన్నికల తర్వాత రాష్ట్రంలో బీఆర్ఎస్ (BRS) ఉనికి ప్రశ్నార్థకం అవుతుందని తెలిపారు. పార్లమెంట్ ఎన్నికల్లో బీజేపీ, కాంగ్రెస్ మధ్యే పోటీ ఉందని వ్యాఖ్యానించారు. తెలంగాణలో గత బీఆర్ఎస్ ప్రభుత్వం ఆర్థిక విధ్వంసానికి పాల్పడిందని ఆరోపించారు.

మీడియాతో గురువారం మంత్రి ఉత్తమ్ కుమార్ రెడ్డి మాట్లాడుతూ….. లోక్‌సభ ఎన్నికల్లో కాంగ్రెస్‌కు 13 సీట్లు వస్తాయని జోస్యం చెప్పారు. పార్లమెంట్ ఎన్నికల్లో బీజేపీ, కాంగ్రెస్ మధ్యే పోటీ ఉంటుందన్నారు. బీఆర్ఎస్ చర్చలో కూడా ఉండదని తెలిపారు. అసలు బీఆర్ఎస్‌కు ఎందుకు ఓటు వేయాలనే విషయాన్ని ప్రజలు కనీసం పట్టించుకోబోరన్నారు. కానీ కేటీఆర్ మాత్రం శ్రేణులకు చాలా పెద్దపెద్ద లెక్చర్లు ఇస్తున్నారన్నారు.

మేడిగడ్డ విషయంలో డ్యామేజ్‌కు గల కారణాలు అతి త్వరలోనే తేలుతాయని చెప్పారు. ప్రాథమిక విచారణకు సంబంధించిన నివేదిక తనకు ఇంకా అందలేదని అన్నారు. అతి త్వరలోనే అసెంబ్లీ సమావేశాల తేదీలు ప్రకటిస్తామని వెల్లడించారు. అసెంబ్లీ సమావేశాల వరకు మేడిగడ్డపై విజిలెన్స్ నివేదిక వస్తుందని పేర్కొన్నారు. ఇంజనీరింగ్ డిజైన్, ప్లానింగ్ మొదలు మెయింటెనెన్స్ దాకా ఏ స్థాయిలో, ఎక్కడ లోపాలు ఉన్నాయనే విషయం బయటకు వస్తుందన్నారు.

మేడిగడ్డ బ్యారేజీకి జరిగిన డ్యామేజీ విషయంలో ఇప్పటి దాకా చాలానే వార్తలు వచ్చాయని అన్నారు. త్వరలోనే నివేదిక ద్వారా సమగ్రమైన సమాచారం అందుతుందని చెప్పారు. డ్యామేజీకి నిర్దిష్టమైన కారణాలు త్వరలోనే వెలుగులోకి వస్తాయన్నారు. నివేదికలో విజిలెన్స్ అధికారులు ఎలాంటి సిఫారసులు చేస్తారన్నది కూడా ఇప్పుడే చెప్పలేమని వివరించారు.

గత వారం రోజులుగా కేటీఆర్ (KTR) వ్యాఖ్యలు వింటుంటే భయమేస్తోందని కాంగ్రెస్ నేత, సినీ నిర్మాత బండ్ల గణేశ్ (Bandla Ganesh) అన్నారు. త్వరలో ప్రభుత్వం పడిపోతుందని… త్వరలో కేసీఆర్ సీఎం అవుతారని కేటీఆర్ అంటున్నారని చెప్పారు. బహుశా ఆ వ్యాఖ్యలు నిజం కావచ్చన్నారు. ఎందుకంటే రేపు ఏపీలో, ఆ తర్వాత మహారాష్ట్రలో అనంతరం ఇతర రాష్ట్రాల్లో ఎన్నికలు జరుగుతాయన్నారు. ఆయా చోట్ల కేసీఆర్‌ను సీఎంగా చేయవచ్చని ఎద్దేవా చేశారు.

ఏ రాష్ట్రం నుంచైనా సీఎం అయ్యేందుకు కేసీఆర్‌కు అర్హత ఉందన్నారు. కానీ తెలంగాణలో మాత్రం కాంగ్రెస్ సర్కార్ ఉందని అందువల్ల ఇక్కడ ఆ అవకాశం లేదని చెప్పారు. కేసీఆర్‌కు అంతలా సీఎం కావాలని ఉంటే వేరే రాష్ట్రానికి వెళ్లాలని హితవు పలికారు. కేసీఆర్ పేరు చెడగొట్టవద్దని కేటీఆర్‌కు బండ్ల గణేశ్ హితవు పలికారు. ముందు ముందు కాంగ్రెస్ చేసే పనులు చూసి మీరు అసూయపడే పరిస్థితులు వస్తాయన్నారు.

ఆ పరిస్థితులు చూసి మీరు ఆగం కావొద్దని… మీ ఆరోగ్యం జాగ్రత్తగా ఉండాలని ఆ భగవంతుడిని ప్రార్థిస్తున్నానని పేర్కొన్నారు. నలుగురు బీఆర్ఎస్ ఎమ్మెల్యేలు వచ్చి సీఎం రేవంత్ రెడ్డిని కలిస్తే కేటీఆర్ ఉలిక్కి పడి నిద్ర పోకుండా ఆగమాగం అయిపోతున్నాడని అన్నారు. ఏదో కొంపలు మునిగిపోయినట్లు కేటీఆర్ భయపడుతున్నారని వెల్లడించారు.

ఎందుకు సార్.. ఎమ్మెల్యేలను మానసికంగా హింసిస్తున్నారని ప్రశ్నించారు. ప్రెస్ మీట్ పెట్టించి.. మీ స్క్రీప్ట్ రాసిచ్చి చదవండని చెబుతున్నారని విమర్శలు గుప్పించారు. వారు ప్రజలు ఎన్నుకున్న నాయకులు కాబట్టి వారి సమస్యలు సీఎంకు చెప్పుకోవద్దా సార్ అని అడిగారు. మనది ప్రజాస్వామ్యం కాదా? అని ప్రశ్నించారు. అంతగా బందించి మరి బర్రెను కట్టేసినట్లు కట్టేసి.. మీ చెప్పు చేతల్లోనే రాష్ట్ర ప్రజలు ఉండాలని అనుకుంటున్నారా అని ప్రశ్నలు సంధించారు.

బీఆర్ఎస్ (BRS) ప్రభుత్వం కొత్త సచివాలయం కడితే గగ్గోలు పెట్టిన కాంగ్రెస్ (Congress) మరి ఇప్పుడు కొత్తగా సీఎం క్యాంపు ఆఫీసు, కొత్త హైకోర్టు ఎట్లా కడుతోందని బీఆర్ఎస్ వర్కింగ్ ప్రెసిడెంట్ కేటీఆర్ (KTR) ప్రశ్నించారు. సీఎం మారినప్పుడల్లా కొత్త క్యాంపు ఆఫీసులు వస్తాయా? అని ప్రశ్నించారు. తాము కట్టిన ప్రగతి భవన్‌ను ఇగోతోనే డిప్యూటీ సీఎం భట్టికి రేవంత్ రెడ్డి ఇచ్చారని ఆరోపించారు.

తెలంగాణ భవన్‌లో మీడియా సమావేశంలో కేటీఆర్ మాట్లాడుతూ…… అసెంబ్లీ ఎన్నికల్లో కేసీఆర్‌ను ఓడించి తప్పు చేశామని ఇప్పటికే ప్రజలు బాధపడుతున్నారని అన్నారు. లోక్‌సభ ఎన్నికల్లో కాంగ్రెస్, బీజేపీల సత్తా ఏంటో ప్రజలు చెబుతారని అన్నారు. కాంగ్రెస్‌ ప్రజా పాలనలో ప్రజాప్రతినిధులకు అవమానం జరుగుతోందని చెప్పారు. ఎన్నికలు నిర్వహించకపోతే సర్పంచుల పదవీ కాలం పొడిగించాలన్నారు.

కాంగ్రెస్, బీజేపీలు డీప్ మ్యాచ్ ఫిక్సింగ్‌లో ఉన్నాయని తీవ్ర ఆరోపణలు చేశారు. బీఆర్ఎస్ నేతలు ఏం మాట్లాడినా గవర్నర్‌కు తప్పు కనిపించిందన్నారు. కానీ, కాంగ్రెస్‌ విషయంలో ఆమె పూర్తి సానుకూలంగా ఉందన విమర్శించారు. రెండు ఎమ్మెల్యే కోటా ఎమ్మెల్సీ స్థానాలకు వేర్వేరుగా నోటిఫికేషన్లు ఇచ్చారని, ఎమ్మెల్సీ స్థానాలు కాంగ్రెస్‌కు దక్కేలా చేశారని పేర్కొన్నారు.

తాము అనుభవం ఉన్న వారిని సలహాదారులుగా నియమించుకుంటే గగ్గోలు పెట్టిన రేవంత్ రెడ్డి.. ఇప్పుడెలా రాజకీయ నాయకులను సలహాదారులుగా నియమించుకున్నారని ప్రశ్నించారు. నిబంధనలకు విరుద్ధంగా కొడంగల్ నియోజకవర్గంలో సీఎం రేవంత్ రెడ్డి తమ్ముడు మండల సర్వసభ్య సమావేశంలో పాల్గొన్నారని ఫైర్ అయ్యారు.

ఎలాంటి హోదా లేకుండా అసెంబ్లీ సమావేశంలోనూ రేవంత్ రెడ్డి తమ్ముడు పాల్గొన్నారని చెప్పారు. ఇదంతా కాంగ్రెస్ కీలక నేతలు గుర్తుంచుకోవాలన్నారు. సీఎం రేవంత్ రెడ్డికి వేం నరేందర్ రెడ్డి ఏం సలహాలు ఇస్తారని ఎద్దేవా చేశారు. కేబినెట్‌లో చర్చించకుండానే రేవంత్ రెడ్డి నిర్ణయాలు తీసుకుంటున్నారని ధ్వజమెత్తారు. అధికారంలోకి వచ్చిన 45 రోజుల్లో సీఎం రేవంత్ రెడ్డి సాధించిందేమీ లేదన్నారు.

కాంగ్రెస్ పాలన ఢిల్లీ నుండే జరుగుతోందన్నారు. రైతు భరోసా స్టార్ట్ చేశామని దావోస్ పర్యటనలో రేవంత్ అబద్ధం చెప్పారని ఆరోపించరు. తెలంగాణ రైతులకు సీఎం రేవంత్ రెడ్డి బహిరంగ క్షమాపణ చెప్పాలని డిమాండ్ చేశారు. కాంగ్రెస్ సర్కార్ ఐదేండ్లు వుంటుందా? అనే అనుమానం ప్రజల్లో వుందన్నారు. రేవంత్ రెడ్డి రూ.50 కోట్లు ఇచ్చి పీసీసీ తెచ్చుకున్నారని కోమటిరెడ్డి అనలేదా? అని ప్రశ్నించారు.

కాంగ్రెస్‌కు ఒక సీఎంను ఐదేండ్ల పాటు కొనసాగించే చరిత్ర లేదని ఎద్దేవా చేశారు. తమ పోరాటం కాంగ్రెస్ ప్రభుత్వం వంద రోజుల్లో 420 హామీలు అమలు చేస్తారా? లేదా? అనే అంశం మీద అని చెప్పారు. కాంగ్రెస్, బీజేపీ కోఆర్డినేషన్ పర్ఫెక్ట్‌గా నడుస్తోందని విమర్శలు గుప్పించారు. కాంగ్రెస్‌కు చిత్తశుద్ధి ఉంటే వంద రోజుల్లో హామీలను అమలు చేయాలని సవాల్ విసిరారు.

సీఎం రేవంత్ రెడ్డి (CM Revanth Reddy) కీలక వ్యాఖ్యలు చేశారు. అవును తాను ఒక గుంపు మేస్త్రీనని చెప్పారు. మీరు విధ్వంసం చేసిన తెలంగాణ (Telangana)ను పునర్నిర్మాణం చేస్తున్న మేస్త్రీనని అన్నారు. మీకు ఘోరీ కట్టే మేస్త్రీని కూడా తానేనని చెప్పారు. ఈ నెలలోనే తాను ఇంద్రవెల్లికి రాబోతున్నానని, కాస్కోండంటూ సవాల్ విసిరారు.

హైదరాబాద్‌లోని ఎల్బీ స్టేడియంలో నిర్వహించిన కాంగ్రెస్ కార్యకర్తల బూత్ లెవల్ సమావేశ సభ నిర్వహించారు. ఈ సమావేశంలో రేవంత్ రెడ్డి మాట్లాడుతూ…. కాంగ్రెస్ కార్యకర్తల శ్రమతోనే తెలంగాణలో కాంగ్రెస్ అధికారంలోకి వచ్చిందని అన్నారు. రాహుల్ గాంధీ పాదయాత్రతోనే కర్ణాటక, తెలంగాణలో కాంగ్రెస్ విజయం సాధించిందని తెలిపారు.

తెలంగాణ సంపదను దోచుకున్న వాళ్లను రాజ్యసభ ఎంపీలుగా కేసీఆర్ చేశారని విమర్శించారు. రూ. 50 వేలు కూడా లేకున్నా 52 వేల మెజార్టీతో గెలుపొందిన మందుల శామ్యూల్‌కి తాము టికెట్ ఇచ్చామని గుర్తు చేశారు. తనకు పదవి, హోదా కాంగ్రెస్ కార్యకర్తలు ఇచ్చినవే అని చెప్పారు. మరో రెండు హామీల అమలుకు తమ ప్రభుత్వం రెడీ అయిందన్నారు. ఫిబ్రవరి చివరి వరకు రైతు భరోసాలో భాగంగా రైతుల ఖాతాల్లో నగదు వేస్తామని హామీ ఇచ్చారు.

గతంలో మార్చి వరకు రైతు బంధు ఆపిన సన్నాసులే ఇప్పుడు మాట్లాడుతున్నారంటూ తీవ్ర ఆగ్రహం వ్యక్తం చేశారు. తమ ప్రభుత్వం ఏర్పడి 50 రోజులు కాలేదన్నారు. వాళ్ల ప్రభుత్వ హయాంలో ఏమీ చేయలేని సన్నాసులు.. బిల్లా రంగాలు ప్రభుత్వంపై దుష్ప్రచారానికి బయల్దేరారని తీవ్ర స్థాయిలో ధ్వజమెత్తారు. ఉద్యోగులకు జీతాలు ఇవ్వలేని పరిస్థితికి రాష్ట్రాన్ని గత పాలకులు తీసుకొచ్చారని ఆరోపణలు గుప్పించారు.

సంక్షోభంలో ఉన్న దేశానికి సోనియా గాంధీ స్థిరత్వాన్ని తీసుకొచ్చారని పేర్కొన్నారు. ప్రధాని, రాష్ట్రపతి పదవులు చేపట్టే అవకాశం వచ్చినా.. సోనియా గాంధీ తీసుకోలేదని వెల్లడించారు. ఎన్నో పదవులను ఆమె త్యాగం చేశారన్నారు. గాంధీ కుటుంబానికి సొంత ఇళ్లు కూడా లేదన్నారు. 18ఏండ్ల యవతకు ఓటు హక్కు వచ్చిందంటే దానికి రాజీవ్ గాంధీ కారణమని వివరించారు.

ఆయన వీరమరణం పొందినప్పటికీ ప్రజల కోసం సోనియా గాంధీ ముందుకొచ్చారని అన్నారు. గాంధీ కుటుంబం త్యాగాలు చేసినప్పుడు ప్రధాని మోడీ ఎక్కుడున్నారని ప్రశ్నించారు. సోనియాగాంధీ, రాహుల్‌ను వేధించేందుకే ప్రధాని మోడీ ఈడీ, సీబీఐ కేసులు పెడుతున్నారని ఆరోపణలు చేశారు. రాష్ట్రంలో ఎలాగైతే కష్టపడి పార్టీని గెలిపించామో.. లోక్ సభ ఎన్నికల్లోనూ కాంగ్రెస్ ను గెలిపించుకుందామని పిలుపునిచ్చారు. మోడీని ఓడించి.. రాహుల్ గాంధీని ప్రధానమంత్రిని చేయాలని కార్యకర్తలను కోరారు.