Ramu

ఐదేండ్ల పాటు కాంగ్రెస్ (Congress) సర్కార్ పని చేయాలని బీఆర్ఎస్ కోరుకుంటోందని ఎమ్మెల్యే పాడి కౌశిక్ రెడ్డి (Padi Kaushik Reddy) అన్నారు. కాంగ్రెస్‌లో మంత్రులు, ఎమ్మేల్యేలు సీఎం రేవంత్‌ రెడ్డి (Revanth Reddy)కి రివర్స్ అయ్యే అవకాశం ఉందని తెలిపారు.

మీడియా పాయింట్‌ వద్ద శుక్రవారం ఎమ్మెల్యే పాడి కౌశిక్ రెడ్డి మాట్లా డుతూ…..ముఖ్యమంత్రి హోదాలో ఉండి రేవంత్ రెడ్డి ప్రతిపక్షాలపై నోటికి వచ్చినట్లు మాట్లాడటం దురదృష్టకరమని పేర్కొన్నారు. కేసీఆర్ ఇచ్చిన ఉద్యోగాలను తామే ఇచ్చినట్లు కాంగ్రెస్ ప్రభుత్వం చెప్పుకుంటోందని ఫైర్ అయ్యారు.

కాంగ్రెస్ సర్కార్ ఎప్పుడు నోటిఫికేషన్ ఇచ్చారని ప్రశ్నించారు. అసలు ఉద్యోగాల భర్తీ ఎప్పుడు జరిగిందో చెప్పాలని డిమాండ్ చేశారు. రేవంత్ రెడ్డి పాథలాజికల్ లయర్, ప్రతి నిత్యం అబద్దాలు ఆడడమే పనిగా పెట్టుకున్నారంటూ తీవ్ర స్థాయిలో ధ్వజమెత్తారు. పాథలాజికల్ లయర్ అంటే రోగ లక్షణ అబద్దాల కోరు అని అర్థమన్నారు.

కాంగ్రెస్‌లో ఏక్‌నాథ్ షిండే అయ్యేదే రేవంత్ రెడ్డి అని తెలిపారు. ఓటుకు నోటు కేసు ట్రయల్స్ పూర్తి అయ్యాయని వివరించారు. మరో ఆరు నెలల్లో రేవంత్ రెడ్డికి శిక్ష పడటం ఖాయమన్నారు. హరీశ్ రావుపై చేసిన వ్యాఖ్యలను తాము పూర్తిగా ఖండిస్తున్నామని చెప్పారు. అధికారం శాశ్వతం కాదని రేవంత్ రెడ్డి గుర్తు పెట్టుకోవాలని సూచించారు.

కేసీఆర్ (KCR) వచ్చాక కరాబు అయ్యిందని కొంతమంది చెత్త నాయాళ్లు మాట్లాడుతున్నారని మాజీ మంత్రి జగదీశ్ రెడ్డి (Jagadeesh Reddy)అన్నారు. మేం వచ్చి మారుస్తామని అంటున్నారని తీవ్రంగా మండిపడ్డారు. వీళ్లు వచ్చాక చాలా మార్చారని.. కేసీఆర్ ఇచ్చిన 24 గంటల కరెంట్‌ను మాయం చేశారని అన్నారు.

కేసీఆర్ మాట్లాడితే ఊరకుక్కల్లా దాడి చేస్తామనే వెదవలకి ఏం అర్ధం కాదని ఫైర్ అయ్యారు. బీఆర్ఎస్ తలపెట్టిన ఛలో నల్గొండ సభలో ఆయన మాట్లాడుతూ.. కాంగ్రెస్ నాయకులు మాట్లాడిన భాష మనం మాట్లాడవద్దని కేసీఆర్ ఆదేశించారని అంటూనే.. కాంగ్రెస్ లీడర్లపై తీవ్ర పదజాలంతో దూషించారు.

కేసీఆర్ ఉమ్మడి జిల్లాలో 10 లక్షల ఎకరాలకు ఇచ్చిన నీటిని మార్చి, 7 లక్షల ఎకరాలకు ఇస్తున్నారని ఆరోపించారు. కేసీఆర్ ఏం చేశారో చూడాలని ఉంటే కనబడతదని, వినాలని ఉంటే వినబడతది, మేం ఏం వినం, చూడం కేవలం అబద్దాలే మాట్లాడతామని, హక్కుల గురించి కేసీఆర్ మాట్లాడితే ఊరకుక్కల్లా దాడి చేస్తామనే వెదవలకి అర్ధం కాదని తీవ్ర స్థాయిలో విమర్శించారు.

కేసీఆర్ నల్గొండకు వచ్చి ఏం చేసిండు అని చెప్పే వెదవలకు నేను చెప్పే సమాధానం, 50 సంవత్సరాలు మీరు పెంచి పోషించి, 2 లక్షల మందిని బలి తీసుకున్న ఫ్లోరైడ్ మహమ్మారిని 6 ఏళ్లలో తరిమికొట్టాడని అన్నారు. తెలంగాణ వచ్చే నాటికి కేవలం 3 లక్షల వరి దాన్యం అందించే నల్గొండను 4 ఏళ్లలో 40 లక్షల టన్నులు వరి దాన్యం పండించే స్థితికి తీసుకువచ్చారని అన్నారు.

అసలు తెలంగాణ ఆత్మ ఉంటేనే కదా అర్ధం అయ్యేదని, తెలంగాణ ఉద్యమంలో పాల్గొంటే కదా అర్ధం అయ్యేదని అన్నారు. రెండు నెలలుగా నాగార్జున సాగర్ ఏపీ చేతికి వెళ్లిపోతే ఒక్కరు మాట్లాడలేదని, కేసీఆర్ ఆదేశాలతో మాజీ మంత్రి మాట్లాడితే అప్పుడు దాడి మొదలు పెట్టారని అన్నారు.

కేసీఆర్ సభ పెడుతున్నడు అంటే వనుకుడు మొదలైందని, అబద్దాలు చెప్పి చెప్పి ఏం పీకలేక అసెంబ్లీలో చర్చ పెట్టారని ఫైర్ అయ్యారు. వారికి హరీష్ రావు మోహం మీదనే అన్ని విషయాలు చెప్పారని అన్నారు. ఈ పదేళ్లలో ఏం జరిగింది, అనంతరం ఏం చేయ్యాలి అనే దాన్ని వివరించడానికి కేసీఆర్ సభ పెట్టారని అన్నారు.

మేడిగడ్డ బ్యారేజీ సందర్శనకు మంగళవారం సీఎంతో పాటు పలువురు మంత్రులు, ప్రజా ప్రతినిధులు బయలుదేరారు. ఈ క్రమంలో జాతీయ బీజేపీ (BJP) ప్రధాన కార్యదర్శి, ఎంపీ బండి సంజయ్ (Bandi sanjay) ఆసక్తికర వ్యాఖ్యలు చేశారు. చూసిన బ్యారేజీనే మళ్లీ ఎన్ని సార్లు చూస్తారంటూ వ్యాఖ్యలు చేశారు.

ఇప్పటికే మేడిగడ్డ బ్యారేజీపై అధికారులు సమగ్ర నివేదికను అందజేశారని గుర్తు చేశారు. సీఎం రేవంత్ రెడ్డికి దమ్ము, ధైర్యం ఉంటే మాజీ సీఎం కేసీఆర్‌పై సీబీఐతో విచారణ జరిపించాలని సవాల్ విసిరారు. కృష్ణా జలాల విషయంలో అధికార పక్షం, ప్రధాన ప్రతిపక్షం ఆటలాడుతున్నాయని ఆరోపించారు.

ప్రజలు అన్ని గమనిస్తున్నారని పేర్కొన్నారు. ఇచ్చిన హామీలను నెరవేర్చకుండా, పరిపాలనను గాలికొదిలి అధికారులు ఇచ్చిన మేడిగడ్డ రిపోర్టు ఆధారంగా కేసీఆర్‌పై ఎలాంటి చర్యలు తీసుకోకుండా కాంగ్రెస్ కాలయాపన చేస్తుందని నిప్పులు చెరిగారు.

ఇక్కడే బీఆర్ఎస్, కాంగ్రెస్ దోస్తీ తెలిసిపోతోందని ఎద్దేవా చేశారు. అసెంబ్లీ సమావేశాలు సక్రమంగా అటు బీఆర్ఎస్ నాయకులు నల్లగొండ సభకు, కాంగ్రెస్ నాయకులు మేడిగడ్డకు వెళ్లారని అన్నారు.

బీఆర్ఎస్ చేపట్టిన ‘ఛలో నల్లగొండ’లో ఉద్రిక్తత చోటు చేసుకుంది. నల్గొండ సభలో పాల్గొనేందుకు మాజీ సీఎం కేసీఆర్ పట్టణంలో ని గుత్తా సుఖేందర్ రెడ్డి నివాసానికి వచారు. హరీశ్ రావు అలాగే మాజీ మంత్రులకు. ఇతర ప్రజాప్రతినిధులకు భోజనం ఏర్పాటు చేశారు.

అనంతరం సభా స్థలికి బస్సులో వెళ్తున్న సమయంలో ఎన్ఎస్ యూఐ కార్యకర్తలు బస్సును అడ్డుకునే యత్నం చేశారు. హోటల్ మనోరమ ముందు శ్రీ లక్ష్మీ కాలనీ వద్దకు రాగా ఎన్ఎస్ యూఐ నాయకులు ఒక్కసారిగా బస్సుకు అడ్డంగా దూసుకు వచ్చారు.

కేసీఆర్ గో బ్యాక్ అంటూ పెద్ద ఎత్తున నినాదాలు చేశారు. నల్లటి దుస్తులు ధరించి నిరసన తెలిపారు. కోడిగుడ్లతో బస్సుపై దాడి చేశారు. దీంతో పోలీసులు వారిని అదుపులోకి తీసుకొని స్టేషన్‌కు తరలించారు. అంతకు ముందు క్లాక్ టవర్ సెంటర్‌లో కుర్చీ వేసి దానిపై కేసీఆర్ ఫోటో పెట్టి ఎల్ఈడీ స్క్రీన్‌ వేశారు.

గత పదేండ్లలో నల్లగొండకు జరిగిన అన్యాయాలపై ప్రసారం చేశారు. అలాగే కేసీఆర్ కు వ్యతిరేకంగా నినాదాలు చేశారు. నల్గొండ ప్రజలకు క్షమాపణలు చెప్పిన తర్వాతే బీఆర్ఎస్ సభ నిర్వహించాలని డిమాండ్ చేశారు.

-వెంటాడుతాం… వేటాడుతాం
-బదనాం చేస్తే పెద్దోళ్లవుతారా
-కరెంట్ కు రోగం వచ్చిందా
-అధికారం శాశ్వతం కాదు
-దద్దమ్మల రాజ్యం గిట్లనే ఉంటది
-నదుల మీద రేవంత్ కు అవగాహన లేదు
-నన్నడిగితే చెప్పేవాడిని
-అడిగే సంస్కారం ఉండొద్దా
-కాంగ్రెస్ పై కేసీఆర్ ఫైర్

అసెంబ్లీ ఎన్నికల ఫలితాల తర్వాత మొదటి సారిగా బీఆర్ఎస్ (BRS) అధినేత, మాజీ సీఎం కేసీఆర్ (KCR) బహిరంగ సభలో పాల్గొన్నారు. చాలా రోజుల తర్వాత కాంగ్రెస్ పై మరోసారి నిప్పులు చెరిగారు. తెలివిలేక.. ప్రభుత్వాన్ని నడిపే చేతగాక మందిమీద బద్నాంపెట్టి బతుకుదామనుకుంటున్నారా? అంటూ రేవంత్ రెడ్డి ప్రశ్నించారు. అట్లగాదు బిడ్డా జాగ్రత్తా..! బతుకనివ్వం.. వెంటపడుతం.. వేటాడుతాం అంటూ కాంగ్రెస్‌కు తీవ్రహెచ్చరికలు చేశారు.

ఛలో నల్లగొండ సభలో కాంగ్రెస్‌ సర్కార్ పనితీరుపై ఆగ్రహం వ్యక్తం చేశారు. ఈ సందర్భంగా ఆయన మాట్లాడుతూ…..కేసీఆర్‌ను తిడితే మీరు పెద్దొళ్లు అవుతరా? అని ప్రశ్నించారు. కేసీఆర్‌ మీద బదనాం పెడితే పెద్దోళ్లు అవుతరా? ప్రజల హక్కులు గాలికొదిలేసి ఏ విధంగా అసెంబ్లీలో మాట్లాడుతున్నరో.. దుర్భాషలాడుతున్నరో.. దుర్మార్గమైన పద్ధతిలో మాట్లాడుతున్నరో టీవీల సాక్షిగా చూస్తున్నరని చెప్పారు.

రాష్ట్రం వచ్చాక కరెంటు తెచ్చామన్నారు. ఏడెనిమిది నెలల్లో కరెంటు బాగు చేసి ఏడాదిన్నర నుంచి 24గంటల కరెంటు రైతాంగానికి ఇచ్చామని చెప్పారు. మీరంతా సంతోషంగా నడింట్లో పండుకొని పంటలు పండించారని గుర్తు చేశారు. పాములు, తేళ్లు కరువంగా బాయిలకాడికి పోలే. కేసీఆర్‌ గవర్నమెంట్‌ పోంగనే కట్కేసినట్టే బంద్‌ అవుతుందా కరెంట్? నేను తొమ్మిదేళ్లు ఇచ్చిన కరెంటు దానికి ఏం రోగం వచ్చిందన్నారు.. మాయ రోగం వచ్చిందా? యాడపోయే కరెంటు అంటూ తీవ్ర ఆగ్రహం వ్యక్తం చేశారు.

అధికారం ఎవరికీ శాశ్వతం కాదన్నారు. కానీ తెలంగాణ ప్రజల హక్కులు శాశ్వతమని చెప్పారు. మన వాటా శాశ్వతమని…. మన బతుకులు నిజమని… మన పిల్లల భవిష్యత్‌ నిజం. దాని కోసం అధికారం ఉన్నా లేకున్నా తెలంగాణ ప్రజల పక్షాన కొట్లాడి రాష్ట్రం తెచ్చినం కాబట్టి.. బీఆర్‌ఎస్ సైనికులు కూడా అప్రమత్తంగా ఉండాలన్నారు.. మన పోరాటం కొనసాగుతూ ఉండాలని సూచించారు.

దద్దమ్మల రాజ్యం ఉంటే గట్లనే ఉంటది…. చాతగాని చవటల రాజ్యం ఉంటే గట్లనే ఉంటది….. వాళ్లు ఉన్నంత మాత్రాన మనం నర్వస్‌ కావొద్దని సూచనలు చేశారు. ఎక్కడికక్కడ కాంగ్రెస్‌ను నిలదీయాలన్నారు. ఏమైందిరా బిడ్డ నా కరెంటు అని అడగాలన్నారు. మొన్నటిదాకా నడిచిన కరెంట్ కాకుండా.. ఇదే మిర్యాలగూడ నియోజకవర్గంలో దామరచర్ల మండలంలో 4వేల మెగాపవర్‌ ప్లాంట్‌ కట్టినం జగదీశ్‌రెడ్డి నాయకత్వంలో. 90శాతం పనులు పూర్తయ్యాయని వివరించారు. రెండుమూడు నెలలు తిప్పలుపడితే 4వేల మెగావాట్ల పవర్‌ వస్తుందన్నారు.

అటు కేంద్రాన్ని కానీ.. అధికారులను గానీ.. కృష్ణా ట్రిబ్యునల్‌ గానీ, రాష్ట్ర ప్రభుత్వాన్ని భద్రప్ప పని చేయకుండా అప్రమత్తంగా ఉంచేటట్టు గానీ నడవాలంటే మనం ఎప్పటికప్పుడు జాగ్రత్తగా పులుల్లాగా కొట్లాడాలన్నారు. ఈ మాట చెప్పేందుకే తాను ఇంత దూరం వచ్చానని చెప్పుకొచ్చారు. మిమ్మల్ని సమీకరించిన. ఇప్పుడు గవర్నమెంట్ వచ్చిందన్నారు. కొత్త గవర్నమెంట్‌ వస్తే ఏం చేయాలి. పోయిన గవర్నమెంట్‌ కంటే నాలుగు మంచి పనులు చేయాలన్నారు. కానీ ఒక్కటన్నా మంచి మాట ఉన్నదా? పొద్దున లేస్తే సొల్లుపురాణం.. కేసీఆర్‌ను తిట్టాలే అన్నారు.

ప్రజలను కరెంట్‌కు తిప్పలు పెట్టినా.. నీళ్లకు తిప్పలుపెట్టినా.. మంచినీళ్లకు తిప్పలుపెట్టినా ఎక్కడికక్కడ కాంగ్రెస్ నేతలను నిలదీస్తామన్నారు. ‘మీకు గవర్నమెంట్‌ ఇచ్చారు. మాకు ప్రతిపక్షం బాధ్యత ఇచ్చారు. మిమ్మల్ని నిలదీసే బాధ్యత ఇచ్చారు తప్పా.. ఎక్కడికక్కడ మిమ్మల్ని నిలదీస్తం తప్పా.. వదిలిపెడతాం అనేదాంట్లో ఉండొద్దు’అని హెచ్చరించారు. ఏ విధంగా బీఆర్‌ఎస్‌ గవర్నమెంట్‌ ఇచ్చిందో.. ఆ విధంగా కరెంటును పునరుద్ధరించాలని డిమాండ్ చేశారు.

రాజ‌కీయాల్లో ఒక‌రు ఓడొచ్చు.. ఒక‌రు గెల‌వొచ్చని చెప్పారు. అధికారం ఎవ‌రికీ శాశ్వ‌తం కాదన్నారు. మ‌ళ్లీ తాము డ‌బుల్ స్పీడ్‌తో అధికారంలోకి వ‌స్తామని స్పష్టం చేశారు. అప్పుడు మేం గిట్ల‌నే మాట్లాడాలా..? ఈ ప‌ద్ధ‌తిని అనుస‌రించాలా..? అని ప్ర‌శ్నించారు. న‌దుల నీళ్ల మీద నీకు అవగాహ‌న లేదని ఎద్దేవా చేశారు. తనను అడిగితే తాను చెప్పేవాడినన్నారు. అడిగే సంస్కారం, తెలివి ఉండొద్దా..? నిప్పులు చెరిగారు. కేఆర్ఎంబీకి అప్ప‌జెప్ప‌మంటున్నారు.. మ‌మ్మ‌ల్ని ఎవ‌రిని అడిగినా చెప్పేటోళ్లం క‌దా.. అప్ప‌జెప్ప‌డం, ఆగ‌మావ‌డం.. బ‌డ్జెట్ ఆపి తీర్మానం పెట్టుడు ఇదేనా మీ తెలివి అని నిల‌దీశారు.

తెలంగాణకు అన్యాయం జరిగితే తన చివరి వరకు, తన కట్టె కాలే వరకు పులిలాగా లేచి కొట్టాడుతానన్నారు. మంత్రి ఉత్తమ్‌కుమార్‌రెడ్డి మొన్న అసెంబ్లీలో మాట్లాడితే మీరూ విన్నారని… ఉమ్మడి రాష్ట్రమే నయం ఉండేనట ఆయనకు. ఉమ్మడి రాష్ట్రమే మంచిగుండే.. ఇప్పుడు మంచిగలేదట. శ్రీకాంత చారి ఎందుకు చనిపోయిండు. ఇదే జిల్లాలో ఉన్న బిడ్డ. ఉద్యమకారులు ఎందుకు చనిపోయారు ? అంతపెద్ద ఉద్యమం ఎందుకు జరిగింది ? లక్షలు, కోట్ల మంది ఎందుకు పాల్గొన్నరు ? ఇంత సోయితప్పి మంత్రులు మాట్లాడుతున్నారంటూ ఫైర్ అయ్యారు.

-2020లో బయటపడిన సమస్యలు
-మూడేండ్లుగా ఎల్ అండ్ టీకి నోటీసులు
-కోటి ఎకరాల మాగాణి పచ్చి అబద్దం
-కాళేశ్వరం బీఆర్ఎస్ కు ఏటిఎం
-లక్ష ఎకరాలకు కూడా నీళ్లు ఇవ్వలేదు
-లెక్కలు తేల్చేందుకే పవర్ పాయింట్
-సభకు వచ్చేందుకు భయమా
-కేసీఆర్ గౌరవాన్ని తగ్గించబోం
-అసెంబ్లీకి వచ్చి సూచనలు చేయండి
-కేసీఆర్ పై రేవంత్ రెడ్డి ఫైర్

కృష్ణా జలాలా విషయంలో కాంగ్రెస్ (Congress),బీఆర్ఎస్ (BRS) మధ్య వాటర్ వార్ నడుస్తోంది. ఇప్పటికే ఇరు పార్టీల మధ్య మాటల తూటాలు పేలుతున్నాయి. తాజాగా కాళేశ్వరం ప్రాజెక్టు సందర్శనతో ఆ వార్ ఇప్పుడు తారా స్థాయికి చేరుకుంది. ప్రాజెక్టు సందర్శనతో సీఎం రేవంత్ రెడ్డి (Revanth Reddy) బీఆర్ఎస్ గాడ్పు తీసేశారు. ఈ ప్రాజెక్టు ఇప్పటి వరకు లక్ష ఎకరాలకు కూడా నీళ్లు ఇవ్వలేదంటూ అసహనం వ్యక్తం చేశారు.

కేవలం కేసీఆర్ దోపిడీకి కాళేశ్వరం బలైపోయిందని విమర్శలు గుప్పించారు. తాము అడిగితే సలహాలు ఇస్తానని చెబుతున్నారని అన్నారు. మరి అలాంటప్పుడు సభకు రావడానికి ఎందుకు భయపడుతున్నారని సెటైర్ వేశారు. సక్కగ లేని తీర్మాణానికి అసెంబ్లీలో హరీశ్ రావు ఎలా మద్దతు ఇచ్చారని నిలదీశారు. హరీశ్ రావు మాటలకు విలువ లేదా? అని అడిగారు.

మేడిగడ్డ బ్యారేజీని ప్రజాప్రతినిధుల బృందం మంగళవారం పరిశీలించింది. సీఎం రేవంత్‌రెడ్డితో పాటు మంత్రులు ఉత్తమ్‌కుమార్‌ రెడ్డి, పొన్నం ప్రభాకర్‌, తుమ్మల నాగేశ్వరారవు, ఇతర మంత్రులు, ఎమ్మెల్యేలు, ఎమ్మెల్సీలు, సీపీఐ ఎమ్మెల్యే కూనంనేని సాంబశివరావు, ఎంఐఎం పార్టీకు సంబంధించి ఇతర నేతలు ప్రాజెక్టును పరిశీలించారు.

ఈ సందర్బంగా కేసీఆర్ పై సీఎం రేవంత్ రెడ్డి నిప్పులు చెరిగారు. మేడిగడ్డ, సుందిళ్ల, అన్నారం గురించి ఎందుకు ప్రస్తావించలేదని నిలదీశారు. సీఎం కుర్చీ పోగానే నల్లగొండ నీళ్లు, ఫ్లోరైడ్ బాధితుల బాధలు ఎందుకు గుర్తొచ్చాయని ప్రశ్నించారు. ప్రధాన ప్రతిపక్ష నాయకుడు అయిన కేసీఆర్ గౌరవాన్ని తాము తగ్గించబోమన్నారు. కానీ, చేసే సూచనలు అసెంబ్లీకి వచ్చి చేయాలన్నారు.

రెండేండ్ల క్రితం మేలో ప్రాజెక్టులో సమస్యలు బయటపడ్డాయన్నారు. అప్పుడే వరుసగా మూడేండ్లు అధికారులు ఎల్​అండ్​టీకి నోటీసులు పంపారన్నారు. 2019 లోనే పూర్తయిన ప్రాజెక్ట్​కు 2020 లో పూర్తిగా సమస్యలు బయటపడ్డాయని వవరించారు. అయినప్పటికీ రూ.15,900 కోట్ల బిల్లులు చెల్లించారని తెలిపారు. అధికారులు లెటర్స్​ రాసినా, ప్రభుత్వం పట్టించుకోకపోవడం వల్లే ఈరోజు మొత్తం కుంగిపోయి, కూలిపోయే స్థితికి వచ్చిందని ధ్వజమెత్తారు.

కాళేశ్వరం ప్రాజెక్టుతో కోటి ఎకరాల మాగాణి అంటూ బీఆర్ఎస్ చెబుతున్నవి పచ్చి అబద్ధమని మండిపడ్డారు. గత ప్రభత్వ లెక్కలు తేల్చేందుకే పవర్ పాయింట్ ప్రెజెంటేషన్ ఏర్పాటు చేశామన్నారు. కాళేశ్వరం ప్రాజెక్టు పూర్తి ఆయకట్టు 19.53 లక్షల ఎకరాలేనని తెలిపారు. కానీ కొత్తగా కేవలం 95 వేల ఎకరాలకు ఆయకట్టుకు మాత్రమే నీళ్లిచ్చారని అన్నారు.

కేసీఆర్‌ మాత్రం కోటి ఎకరాలకు నీరు ఇచ్చామని చెప్పారని ఫైర్ అయ్యారు. అక్టోబర్‌ 21న మేడిగడ్డ పిల్లర్లు కుంగాయని ఇంజినీర్లు తెలిపారని అన్నారు. నిర్మాణంలో నాణ్యతాలోపం ఉందని డ్యామ్‌ సేఫ్టీ అథారిటీ వివరించిందని చెప్పారు. కానీ సమస్యను చక్కదిద్దే పని చేపట్టకుండా నిర్లక్ష్యం వహించారని ఆరోపించారు.

తాము దిగిపోయాము కాబట్టి తమకేం సంబంధం లేదని కేసీఆర్ చెబుతున్నారని ఆరోపించారు. ప్రాజెక్ట్ పూర్తవటంతో తమ బాధ్యత తీరిపోయిందని ఎల్​అండ్​టీ చెబుతోందన్నారు. మేడిగడ్డ పిల్లర్లు కుంగిన ఘటన అనంతరం ప్రాజెక్టు వద్ద వాఘా బార్డర్​ను మించిన పోలీస్​ ఫోర్స్​ను గత ప్రభుత్వం మోహరించిందన్నారు. అక్కడి వాస్తవాలు చూపేందుకు, సభ్యులందరికీ మేడిగడ్డలో ఏం జరిగిందో తెలియజేయడం కోసమే ఈపర్యటన ఏర్పాటు చేశామన్నారు.

కాళేశ్వరం ప్రాజెక్టుకు ఏటా విద్యుత్ బిల్లులే రూ.10,500 కోట్లు అని అన్నారు. కాళేశ్వరం రుణాలు, ఇతర ఖర్చులు కలిపి ఏటా రూ.25 వేల కోట్లు అవసరమని వివరించారు. ఈ ప్రాజెక్టులో భాగంగా కట్టిన ఏ బ్యారేజీలోనూ ఇప్పుడు నీరు లేదని పేర్కొన్నారు. మేడిగడ్డ, సుందిళ్ల, అన్నారం బ్యారేజీల్లో ఒకే తరహా సమస్య ఉందన్నారు.

ప్రస్తుతం సీపేజీ చేసి అన్నారం, సుందిళ్లలో సమస్యను కప్పిపుచ్చారని ఆరోపణలు చేశారు. వానాకాలం నీరు వస్తే, సుందిళ్ల, అన్నారంలో కూడా సమస్యలు బయటడపడతాయని వెల్లడించారు. ప్రాజెక్టు పూర్తయ్యిందని చెప్పిన మరుసటి సంవత్సరమే సమస్యలు బయటడ్డాయన్నారు. కానీ గత బీఆర్ఎస్ ప్రభుత్వం కనీసం పట్టించుకోలేదని తీవ్ర ఆగ్రహం వ్యక్తం చేశారు.

కాళేశ్వరం ప్రాజెక్టు ఎంతో అద్భుతమని అమెరికాలోనూ ప్రచారం చేశాని ఫైర్ అయ్యారు. కాళేశ్వరం బీఆర్ఎస్‌కు ఏటీఎంలా మారిందన్నారు. మీ ఇళ్లలో కనకవర్షం కురిసిందని తాము అనడం లేదన్నారు. ప్రజాధనం దుర్వినియోగానికి కారకులెవరు? దీనిపై ఎటువంటి చర్యలు తీసుకోవాలి వంటి అంశాలను చర్చించడానికి ఆహ్వానిస్తున్నాము.

గోదావరిపై రూ.35 వేల కోట్ల అంచనాతో ప్రారంభించిన ప్రాజెక్టును, రూ.లక్షా 47 వేల కోట్లకు పెంచారని అన్నారు. ఇరిగేషన్ శాఖలో ఫైళ్లన్ని మాయం కావడంతోనే విజిలెన్స్ ఎంక్వైరీ చేయించామన్నారు. విజిలెన్స్ రిపోర్టు​లో చాలా అంశాలు వెలుగులోకి వచ్చాయని వివరించారు. . మేడిగడ్డ పర్యటన అనంతరం సాగు నీటి శాఖ మంత్రి అసెంబ్లీలో త్వరలో శ్వేతపత్రం విడుదల చేస్తారు.

కేసీఆర్ చేసిన అభివృద్ధి రేవంత్ రెడ్డి (Revanth Reddy) సర్కార్‌కు కనిపించడం లేదని బీఆర్ఎస్ నేత, ఎమ్మెల్యే కడియం శ్రీ హరి (kadium srihari) అన్నారు. బీఆర్‌ఎస్‌పై కాంగ్రెస్ ప్రభుత్వం బురద జల్లే ప్రయత్నం చేస్తోందని మండిపడ్డారు. తెలంగాణ నదీ జలాలపై కేంద్రం పెత్తనాన్ని బీఆర్‌ఎస్‌ ప్రభుత్వం గత పదేండ్లుగా అడ్డుకున్నదని ఆరోపించారు.

తెలంగాణ భవన్ నుంచి ‘చలో నల్లగొండ’ బహిరంగ సభకు బయలుదేరే ముందు ఆయన మీడియాతో మాట్లాడారు. నూతనంగా అధికారంలోకి వచ్చిన కాంగ్రెస్ సర్కార్‌ మాత్రం కేవలం రెండు నెలల్లోనే కృష్ణ, గోదావరి నది జలాల బోర్డులకు నదుల నిర్వహణను అప్పజెప్పిందని నిప్పులు చెరిగారు. తెలంగాణ నదీ జలాలపై కేంద్రం పెత్తనాన్ని ఎట్టి పరిస్థితులలో ఒప్పుకునేది లేదని తేల్చి చెప్పారు.

ఈ రోజు ప్రారంభమైన జల ఉద్యమం మొదటి అడుగు మాత్రమేనన్నారు. భవిష్యత్తులో దీన్ని మరింత ఉధృతం చేస్తామన్నారు. తెలంగాణ రైతాంగం భవిష్యత్తును అంధకారం చేసే ఈ నిర్ణయానికి వ్యతిరేకంగా తమ పార్టీ గళమెత్తిందని వివరించారు. బీఆర్ఎస్ బహిరంగ సభకు భయపడిన కాంగ్రెస్ ప్రభుత్వం తోకముడిచిందన్నారు. అసెంబ్లీలో అబద్ధాలను ప్రచారం చేసిందని ధ్వజమెత్తారు.

తెలంగాణ ప్రజలకు వాస్తవాలు తెలియ చెప్పాల్సిన అవసరం తమపై ఉందని అన్నారు. కృష్ణా నది కింద ఉన్న ప్రాజెక్టులు కేఆర్‌ఎంబీకి అప్పగించడం మంచిది కాదని చెప్పారు. దానివల్ల తెలంగాణ ఎడారిగా మారుతుందన్నారు. కరెంట్‌కు కూడా ఇబ్బందులు ఎదురవుతాయని చెప్పారు.

బీఆర్ఎస్ (BRS), కాంగ్రెస్ (Congress) ఒక్కటే అని కేంద్ర మంత్రి, తెలంగాణ బీజేపీ చీఫ్ కిషన్ రెడ్డి (Kishan Reddy) అన్నారు. ప్రజలను మభ్యపెట్టి రాజకీయాలు చేస్తున్నాయని తీవ్ర స్థాయిలో ఫైర్ అయ్యారు. హైదరాబాద్‌లోని నాంపల్లి పార్టీ ఆఫీస్‌లో కిషన్ రెడ్డి మీడియాతో మాట్లాడుతూ… కాంగ్రెస్ ఎమ్మెల్యేల మేడిగడ్డ సందర్శన పొలిటికల్ విజిట్ అని విమర్శించారు.

ఇప్పటికే మేడిగడ్డ ప్రాజెక్టుకును కాంగ్రెస్ అగ్రనేత రాహుల్ గాంధీ, సీఎం రేవంత్ రెడ్డి సహా మంత్రులంతా చూసి వచ్చారని తెలిపారు. ఇప్పుడు మళ్లీ ఎందుకు వెళ్తున్నారో ప్రజలకు చెప్పాలని డిమాండ్ చేశారు. కేవలం రాజకీయంగా లబ్ధి పొందేందుకే కాంగ్రెస్ ప్రయత్నం చేస్తోందని తీవ్ర స్థాయిలో ధ్వజమెత్తారు. మేడిగడ్డ లోపభూయిష్టంగా ఉందని ప్రాజెక్టు అథారిటీ ఇప్పటికే తేల్చి చెప్పిందని వెల్లడించారు.

డ్యామ్ సేఫ్టీ అథారిటీ అధికారులకు కాంగ్రెస్ ప్రభుత్వం వివరాలు ఇవ్వలేదన్నారు. డ్యామ్ సేఫ్టీ అథారిటీ అధికారుల సందర్శనకు కూడా కాంగ్రెస్ అనుమతి ఇవ్వడం లేదని అసహనం వ్యక్తం చేశారు. అసెంబ్లీకి రాని కేసీఆర్.. పార్టీ అభివృద్ధి కోసం బహిరంగ సభలకు వెళ్తాడని ఫైర్ అయ్యారు. మేడిగడ్డపై డ్యామ్ సేఫ్టీ అథారిటీ ఇచ్చిన నివేదికనే రాష్ట్ర విజిలెన్స్ ఇచ్చిందని గుర్తుచేశారు.

ఇప్పుడు అదే నివేదికను మరోసారి రీ టైప్ చేసి పంపారు తప్ప.. కొత్తగా ఏమీ లేదని చెప్పారు. తెలంగాణ ప్రాజెక్టులను కేంద్రం తీసుకుంటుందని తప్పుడు ప్రచారం చేస్తున్నారని తీవ్ర ఆగ్రహం వ్యక్తం చేశారు. పోలీసులను పెట్టి నీటిని ఏపీకి తీసుకెళ్తుంటే కేసీఆర్ ప్రభుత్వం ఏం చేసిందని నిలదీశారు.