admin

తెలంగాణ భవన్‌ (Telangana Bhavan) లో మాజీ మంత్రి, బీఆర్‌ఎస్‌ వర్కింగ్ ప్రెసిడెంట్‌ కేటీఆర్ (KTR) పార్టీకి చెందిన ఎమ్మెల్యేలు, ముఖ్య నేతలతో సమావేశం నిర్వహించారు. కొత్తగా గెలిచిన ఎమ్మెల్యేలు, ఓడిన అభ్యర్థులు, పార్టీ ముఖ్య నేతలు ఈ సమావేశానికి హాజరయ్యారు. అసెంబ్లీ ఎన్నికల్లో బీఆర్ఎస్ (BRS) ఓటమిపాలు కావడంపై చర్చించారు. తదుపరి భవిష్యత్ కార్యచరణపై ఎలా ముందుకెళ్లాలా అని నేతలు మాట్లాడుకున్నారు.

కేటీఆర్ భేటీ తర్వాత గెలిచిన ఎమ్మెల్యేలు పార్టీ అధినేత కేసీఆర్‌ (KCR) ను కలిచేందుకు ఫాంహౌస్‌ కు వెళ్లారు. ఓ పక్క కాంగ్రెస్ ప్రభుత్వ పనుల్లో బిజీ అవుతుండగా… బీఆర్ఎస్ ఎమ్మెల్యేలతో కేటీఆర్, కేసీఆర్ వరుసగా భేటీ కావడం, భవిష్యత్ కార్యాచరణపై చర్చించడం హాట్ టాపిక్ గా మారింది.

తెలంగాణ (Telangana) అసెంబ్లీ ఎన్నికల్లో కాంగ్రెస్‌ పార్టీ విజయం సాధించింది. హ్యాట్రిక్ విజయం సాధిస్తామనుకున్న బీఆర్‌ఎస్‌ కి పరాజయం ఎదురైంది. మొత్తం 119 స్థానాలకుగాను 39 నియోజకవర్గాల్లో మాత్రమే గెలిచి అధికారానికి దూరమైంది. ఈ నేపథ్యంలో పార్టీ నాయకుల్లో నిరాశ రాకుండా ఉండేందుకు వరుసగా కేటీఆర్, కేసీఆర్ వారిని కలిసి ధైర్యం చెబుతున్నారు.

కాంగ్రెస్ విజయం కన్ఫామ్ అయిన తర్వాత కేసీఆర్ తన పదవికి రాజీనామా చేశారు. రాజీనామా లేఖను గవర్నర్ కు పంపారు. ఆ తర్వాత ఫాంహౌస్ కు వెళ్లిపోయారు.

తెలంగాణ (Telangana) అసెంబ్లీ ఎన్నికల్లో కాంగ్రెస్ (Congress) విజయం సాధించడంతో.. ఆపార్టీ నేతలు సీఎం అభ్యర్థిపై ఫోకస్ పెట్టారు. సీఎల్పీ సమావేశం ప్రారంభమైంది. కాంగ్రెస్ తరఫున గెలిచిన 64 మంది ఎమ్మెల్యేలు హాజరయ్యారు. అలాగే, కర్ణాటక డిప్యూటీ సీఎం డీకే శివకుమార్, ఏఐసీసీ ప్రతినిధులు పాల్గొన్నారు. ఏకగ్రీవంగా సీఎం ఎవరనేది నిర్ణయించనున్నారు ఎమ్మెల్యేలు. సీఎల్పీ నేత ఎన్నికపై స్పష్టత వస్తే రాత్రికి ప్రమాణ స్వీకారం ఉంటుంది.

ఇటు రాజ్ భవన్ వద్ద భారీ బందోబస్తు ఏర్పాటు చేశారు. ప్రమాణ స్వీకారానికి ఏర్పాట్లు కూడా జరుగుతున్నాయి. కార్యక్రమానికి ముందస్తుగానే అన్నీ సిద్ధం చేస్తున్నారు. ఇప్పటికే టెంట్లు, ఫర్నీచర్ అక్కడకు చేరిపోయాయి. సీఎం ఎవరనేది కాసేపట్లో క్లారిటీ వచ్చే ఛాన్స్ ఉంది.

సీఎం ఎవరు కాబోతున్నారనే అంశం ఉత్కంఠను రేపుతోంది. ఈ ఎంపికకు సంబంధించి ఎమ్మెల్యేల అభిప్రాయాలను తీసుకోవడానికి హైదరాబాద్ లోని హోటల్ ఎల్లాలో సీఎల్పీ సమావేశం జరుగుతోంది. అంతకుముందు, పార్క్ హయత్ హోటల్ లో డీకే శివకుమార్ తో కాంగ్రెస్ సీనియర్లు మల్లు భట్టి విక్రమార్క, కోమటిరెడ్డి రాజగోపాల్, ఉత్తమ్ కుమార్ రెడ్డి భేటీ అయ్యారు. వీళ్ల ముగ్గురు సీఎం రేసులో ఉన్నవారే కావడంతో ఆసక్తికరంగా మారింది.

సీఎల్పీ సమావేశంలో సీఎం కోసం ఏకవాక్య తీర్మానం చేయబోతున్నారు. పదవి విషయంలో రేవంత్ రెడ్డికి హైకమాండ్ మాట ఇచ్చిందనే వార్తలు వస్తున్నాయి.

– తెలంగాణలో జనసేనకు ఘోర పరాభవం
– రాష్ట్రంలో మొదటిసారి పోటీ
– బీజేపీతో కలిసి పొత్తు
– 8 చోట్ల నుంచి పోటీ
– పోటీ చేసిన అన్ని చోట్లా డిపాజిట్ గల్లంతు

జనసేన (Janasena) పార్టీ తెలంగాణ గడ్డపైనే పుట్టినా.. ఆంధ్రాపైనే మొదట్నుంచి ఫోకస్ చేసింది. 2019 ఎన్నికల్లో తెలంగాణను వదిలేసి ఏపీలోనే పోటీ చేసింది. ఈసారి కూడా పోటీ అక్కడి వరకే పరిమితం అవుతుందని అంతా అనుకోగా.. అనూహ్యంగా బీజేపీ (BJP) తో కలిసి బరిలోకి దిగింది. సీట్ల కేటాయింపులో భాగంగా 8 సీట్లను దక్కించుకుంది. ఖమ్మం, కొత్తగూడెం, వైరా, అశ్వారావుపేట, కూకట్‌ పల్లి, తాండూరు, కోదాడ, నాగర్‌ కర్నూల్ నియోజకవర్గాల్లో పోటీ చేసింది. అయితే.. అన్నిచోట్లా డిపాజిట్లు కోల్పోయింది.

ఎన్నికల ప్రచారంలో భాగంగా వరంగల్, సూర్యాపేట, కొత్తగూడెం సభల్లో కూకట్ పల్లిలో రోడ్ షో నిర్వహించారు పవన్ కళ్యాణ్ (Pawan Kalyan). ఆ సమయంలో ఊహించినట్టే భారీగా జనం తరలివచ్చారు. అనూహ్య స్పందన లభించింది. ఇటు ప్రధాని మోడీతో కలిసి బహిరంగసభలో కూడా పాల్గొన్నారు. అయినా జనసేన ఏ మాత్రం ప్రభావం చూపించలేకపోయింది. కనీసం పోటీలో నిలవలేకపోయింది. పోటీ చేసిన 8 స్థానాల్లో ఓటమి చవిచూసింది.

ఖమ్మం, అశ్వారావుపేట వంటి చోట్ల అయితే.. జనసేనను అసలు ఓటర్లు పట్టించుకోలేదు. మొత్తం 8 చోట్ల కూకట్ పల్లిలో మాత్రం కాస్త ఓట్లు వచ్చాయి. అవికూడా గౌరవప్రదమైనవి కావు. జనసేన పోటీ చేసిన సీట్లలో ఆ పార్టీతోపాటు బీజేపీకి కూడా పెద్దగా బలం లేదు. జనసేన పార్టీకి క్యాడర్ లేకపోవడంతో.. పోటీ చేసిన చోట్ల గట్టిగా ప్రచారం చేయడానికి కూడా ఇబ్బందులు పడింది. అదీగాక, బీజేపీ వైపు నుంచి కూడా సరైన సహకారం అందలేదనే ప్రచారం ఉంది.

తెలంగాణలో జనసేనకు ఘోర అవమానం ఎదురవగా.. ఈ ప్రభావం ఏపీలో కనపడే ఛాన్స్ ఉందంటున్నారు రాజకీయ పండితులు. ఇంకో 4 నెలల్లో ఆంధ్రాలో కూడా ఎన్నికలు ఉన్నాయి. ఇలాంటి కీలక సమయంలో తెలంగాణలో జనసేన చూసిన ఈ ఓటమి వైసీపీకి అస్త్రంగా మారే అవకాశం ఉందని అంచనా వేస్తున్నారు.

– ఎన్నికల ప్రధాన అధికారితో కాంగ్రెస్ నేతల భేటీ
– నిధుల విడుదల విషయంలో అభ్యంతరం
– కేసీఆర్ అంతా దారి మళ్లిస్తున్నారని ఫిర్యాదు
– 4 అంశాలపై ప్రధానంగా చర్చ
– ప్రభుత్వ లావాదేవీలపై నిఘా పెట్టాలని వినతి

ఎన్నికల వేళ రైతు బంధు అంశం అనేక వివాదాలకు కారణమైంది. ఎలక్షన్ కు చాలారోజుల ముందే నిధులు విడుదల చేయాలని కాంగ్రెస్ (Congress) ఈసీని కోరింది. అయితే.. రైతు ద్రోహులు అంటూ బీఆర్ఎస్ ఎటాక్ చేసింది. ఎన్నికలకు కొద్ది రోజుల ముందు ఈసీ పర్మిషన్ ఇవ్వగా.. దీనిపై హస్తం పార్టీ తీవ్ర ఆరోపణలు చేసింది. అనూహ్యంగా ఎన్నికల సంఘం నిధుల విడుదలకు బ్రేక్ వేసింది. ఇప్పుడు ఎలక్షన్ అయిపోయింది. రైతు బంధు కోసం రైతులు ఎదురుచూస్తున్నారు. ఇలాంటి సమయంలో మరోసారి తెలంగాణ రాష్ట్ర ఎన్నికల ప్రధాన అధికారి వికాస్‌ రాజ్‌ (Vikas Raj)‌ తో కాంగ్రెస్ నేతలు భేటీ కావడం చర్చనీయాంశమైంది.

రైతు బంధు నిధులు దారి మళ్లిస్తున్నారని వికాస్ రాజ్ కు హస్తం నేతలు ఫిర్యాదు చేశారు. ప్రభుత్వ లావాదేవీలపై నిఘా పెట్టాలని కోరారు. సీఈవోతో భేటీ అనంతరం ఎంపీ ఉత్తమ్ కుమార్ రెడ్డి మీడియాతో మాట్లాడారు. రైతుబంధు నిధుల దారి మళ్లింపుపై ఢిల్లీలో సీఈసీ దృష్టికి కూడా తీసుకెళ్లామన్నారు. నాలుగు అంశాలపై వికాస్‌ రాజ్‌ ‌కు ఫిర్యాదు చేసినట్లు తెలిపారు.

బీఆర్ఎస్ ప్రభుత్వానికి, సీఎం కేసీఆర్ కు ఎలాంటి అధికారం లేకపోయినా.. నిబంధనలకు విరుద్ధంగా, ఎలక్షన్ కమిషన్ అనుమతి లేకుండా.. కాంట్రాక్టర్లకు చెల్లింపులు చేస్తున్నారని అన్నారు. రెండు, మూడు రోజులుగా అసైన్డ్ ల్యాండ్ రికార్డులు మారుస్తున్నారని ఫిర్యాదు చేసినట్టుగా వివరించారు. భూ రికార్డులు మారుస్తున్నట్లు తమకు సమాచారం వచ్చిందన్నారు.

లావాదేవీలపై నిఘా పెట్టాలని సీఈసీకి ఫిర్యాదు చేశామని ఉత్తమ్‌ వెల్లడించారు. వికాస్ రాజ్ ను కలిసిన వారిలో టీపీసీసీ చీఫ్ రేవంత్‌ రెడ్డి, మధుయాష్కీ, పొంగులేటి సహా పలువురు నేతలు ఉన్నారు. బీఆర్కే భవన్ లో ఈ సమావేశం జరిగింది.

– కేసీఆర్ షాకింగ్ నిర్ణయం
– ఈనెల 4న కేబినెట్ భేటీ
– 3న ఎన్నికల ఫలితాలు
– రిజల్ట్స్ తర్వాతి రోజే మంత్రివర్గ సమావేశం
– ఇది గెలుస్తామని విశ్వాసమా?
– లేక, ఓడిపోతామని అపనమ్మకమా?

సీఎం కేసీఆర్ (CM KCR) చర్యలు ఒక్కోసారి ఊహాతీతంగా ఉంటాయి. తాజాగా కేబినెట్ సమావేశంపై తీసుకున్న నిర్ణయం అంతే. తెలంగాణ అంతటా గురువారం ఎన్నికలు జరిగాయి. ఈనెల 3న (ఆదివారం) కౌంటింగ్ జరగనుంది. దీనికోసం ఎలక్షన్ కమిషన్ (Election Commission) ఓవైపు ఏర్పాట్లు చేస్తుండగా.. ఇంకోవైపు కేసీఆర్ కీలక నిర్ణయం తీసుకున్నారు. తెలంగాణ కేబినెట్ భేటీకి ముహూర్తం ఖరారు చేశారు. అదికూడా, ఎన్నికల ఫలితాల తర్వాతి రోజే. దీంతో ఈ అంశం హాట్ టాపిక్ గా మారింది.

ఈనెల 4న అంబేద్కర్ సచివాలయంలో కేబినెట్ సమావేశం ఉంటుందని సీఎంవో (CMO) ఓ ప్రకటన విడుదల చేసింది. ఫలితాలు వెల్లడి అయ్యే ఒకరోజు తర్వాత కేసీఆర్ కేబినెట్ భేటీ ఏర్పాటు చేయాలన్న నిర్ణయంపై అందరూ ఆశ్చర్యం వ్యక్తం చేస్తున్నారు. ఇది గెలుస్తామని విశ్వాసమా.. లేక, ఓడిపోతామని అపనమ్మకమా? అంటూ రాజకీయ వర్గాల్లో చర్చ జరుగుతోంది.

ఎగ్జిట్ పోల్స్ చూస్తే బీఆర్ఎస్ కంటే కాంగ్రెస్ కే సీట్లు ఎక్కువ వస్తాయని తేలింది. ఇదే సమయంలో హంగ్ వార్తలు కూడా వస్తున్నాయి. గులాబీ నేతల్లో చాలామందికి ఓటమి తప్పదని తేలిపోయింది. పైగా, కేబినెట్ లో ఉన్న మంత్రుల్లో ఎంతమంది గెలుస్తారో అనే డౌట్ ఉంది. ఇలాంటి సమయంలో ఫలితాల తర్వాతి రోజే.. కేసీఆర్ కేబినెట్ భేటీకి నిర్ణయం తీసుకోవడం చర్చనీయాంశంగా మారింది.

మరోవైపు, ప్రగతి భవన్ లో బీఆర్ఎస్ సీనియర్ నేతలతో సమావేశం అయ్యారు కేసీఆర్. పోలింగ్ సరళి, గెలుపు అవకాశాలపై చర్చించి.. నేతలకు భరోసా ఇచ్చారు. తెలంగాణలో మరోసారి బీఆర్ఎస్ అధికారం చేపట్టబోతుందని.. ధైర్యంగా ఉండాలని వారికి చెప్పినట్లు తెలుస్తోంది. అంతకుముందు, పోలింగ్ సరళి, ఎగ్జిట్‌ పోల్స్‌ పై ప్రాథమిక స్థాయిలో మంత్రులు కేటీఆర్, హరీశ్‌ రావు కలిసి చర్చించుకున్నారు. ఆ తర్వాత కేసీఆర్ ను కలిసి మాట్లాడారు.