umakanth rao

Mumbai : ముంబై-రాంచీ ఇండిగో విమానంలో ప్రయాణిస్తున్న ఓ వ్యక్తి విమానంలోనే రక్తం కక్కుకోవడంతో అత్యవసరంగా విమానాన్ని నాగపూర్ లో ని అంబేద్కర్ అంతర్జాతీయ విమానాశ్రయంలోనిన్న రాత్రి దింపారు. 62 ఏళ్ళ డి. తివారీ అనే ఈ వ్యక్తి క్షయ వ్యాధితో బాధపడుతున్నాడని, అతడిని మెడికల్ ఎమర్జెన్సీ కింద నాగపూర్ లోని ప్రభుత్వ ఆసుపత్రికి తరలించామని విమాన సిబ్బంది ఒకరు తెలిపారు.

అయితే ఇతడిని ఆసుపత్రికి చేర్చేలోగా మరణించినట్టు నాగపూర్ లోని కిమ్స్ ఆసుపత్రి డాక్టర్ ఐజాజ్ షమీ చెప్పారు. తివారీ మృతికి ముంబై-రాంచీ విమాన సిబ్బంది సంతాపం తెలిపారు. అతడిని రక్షించడానికి ప్రాథమికంగా తాము చేసిన యత్నాలు విఫలమయ్యాయన్నారు.

ఇండిగో పైలట్ ఒకరు ఇదే విమానాశ్రయంలో విమానాన్ని నడిపేందుకు వెళ్ళబోతూ ఎయిర్ పోర్ట్ గేట్ వద్ద కుప్ప కూలిపోయిన ఘటన మరువకముందే ఈ ఘటన జరిగింది.

ఆ పైలట్ ను ఆసుపత్రికి తరలిస్తుండగానే మృతి చెందాడు. మనోజ్ సుబ్రమన్యం అనే ఈ పైలట్ నాగపూర్-పూణే విమానాన్ని నడపవలసి ఉంది. అయితే 40 ఏళ్ళ ఆయన గుండెపోటుతో మరణించడం విమాన సిబ్బందిని కలచివేసింది. ఢిల్లీ-దోహా విమానంలో ప్రయాణిస్తున్న ఖతార్ ఎయిర్ వేస్ పైలట్ ఒకరు కూడా గుండెపోటుతో మృతి చెందిన ఉదంతాన్ని విమాన సిబ్బంది గుర్తు చేశారు.

Modi : దక్షిణాఫ్రికా లోని జోహాన్నెస్ బెర్గ్ లో జరగనున్న బ్రిక్స్ సదస్సుకు హాజరయ్యేందుకు ప్రధాని మోడీ (Modi)మంగళవారం బయల్దేరి వెళ్లారు.. ఈ 15 వ సదస్సు మూడు రోజులపాటు .. ఈ నెల 24 వరకు జరగనుంది. ఈ సదస్సులో మోడీ.. చైనా అధ్యక్షుడు జీ జిన్ పింగ్ తో భేటీ కానున్నారు. భారత, చైనా సరిహద్దు సమస్యపై వీరిద్దరూ ఈ సమావేశంలో చర్చించే అవకాశాలున్నాయి. బ్రెజిల్, చైనా, రష్యా, ఇండియాలతో కూడిన బ్రిక్స్ శిఖరాగ్ర సదస్సు పలు అంతర్జాతీయ సమస్యల పరిష్కారానికి వేదికగా నిలుస్తోంది.

జీ జిన్ పింగ్ తో మోడీ చివరిసారి జీ 20 సమ్మిట్ సందర్భంగా గత ఏడాది నవంబరులో బాలి లో భేటీ అయ్యారు. రష్యా అధ్యక్షుడు వ్లాదిమిర్ పుతిన్ వర్చ్యువల్ గా బ్రిక్స్ సదస్సులో పాల్గొంటారని, అయితే ఆయన తరఫున విదేశాంగ మంత్రి సెర్గీ లవ్రోవ్ ఈ కార్యక్రమానికి తన ప్రతినిధి బృందంతో బాటు హాజరవుతారని తెలుస్తోంది.

బ్రిక్స్ లో సభ్యత్వం కోసం సుమారు 23 దేశాలు తమ దరఖాస్తులను సమర్పించినట్టు తెలిసింది. . ఈ కూటమిని మరింత విస్తరించడానికి ప్రయత్నాలు జరుగుతున్నాయి. భారత, చైనా సరిహద్దు సమస్య చాలా కాలంగా కొనసాగుతున్న నేపథ్యంలో మోడీ, జిన్ పింగ్ భేటీకి అత్యంత ప్రాధాన్యం ఏర్పడింది. కాగా మంగళవారం మోడీ బ్రిక్స్ నేతలతో కలిసి విందులో పాల్గొంటారని విదేశాంగ కార్యదర్శి వినయ్ క్వాత్రా తెలిపారు.

భారత, చైనా సైనికాధికారుల మధ్య సుమారు 16 దఫాలుగా చర్చలు జరిగినప్పటికీ బోర్డర్ వివాదం ఇంకా నలుగుతూనే ఉంది. 2020లో గాల్వన్ లోయలో ఇరు దేశాల సైనికుల మధ్య జరిగిన ఘర్షణలో 20 మంది భారత జవాన్లు అమరులయ్యారు.

Chandraayaan3: చంద్రయాన్ -3 మిషన్ ల్యాండర్ చంద్రుని ఉపరితలానికి మరింత చేరువైంది. ఇందుకు సంబంధించి చివరిదైన రెండో బూస్టింగ్ ఆపరేషన్ విజయవంతయిందని ఇస్రో ప్రకటించింది. దీంతో జాబిల్లి అతి దగ్గరి కక్ష్యలోకి విక్రమ్ మాడ్యూల్ చేరింది. ఇక ఈ మాడ్యూల్ అంతర్గత చెక్స్ ని పూర్తి చేసుకుంటుందని, నిర్దేశిత ల్యాండింగ్ సైట్ వద్ద సూర్యోదయం కోసం ఎదురు చూస్తోందని ఇస్రో వెల్లడించింది. జాబిల్లి నుంచి విక్రమ్ ల్యాండర్ అత్యల్పంగా 25 కి.మీ… గరిష్టంగా 134 కి.మీ. దూరంలో ఉన్న కక్ష్యలో పరిభ్రమిస్తోంది.

ఈ నెల 23 న ఇది చంద్రుని ఉపరితలాన్ని తాకడానికి ఆట్టే సమయం లేదని ఈ సంస్థ వర్గాలు పేర్కొన్నాయి. అయితే చివరి 30 కిలోమీటర్ల మిషన్ చాలా కీలకమైనదని ఇండియన్ ఇన్స్టిట్యూట్ ఆఫ్ యేస్ట్రోఫిజిక్స్ డైరెక్టర్ ప్రొఫెసర్ అన్నపూర్ణి సుబ్రమన్యన్ అన్నారు. ఈ నెల 23 న సాయంత్రం సుమారు 6 గంటల 4 నిముషాలకు ఈ వ్యోమనౌక చంద్రుని ఉపరితలాన్ని తాకవలసి ఉందన్నారు

. కాగా చంద్రయాన్-3 సాఫ్ట్ ల్యాండింగ్ ని లైవ్ టెలికాస్ట్ చేయవలసిందిగా ఇస్రో అన్ని విద్యాసంస్థలను కోరింది. దేశ వ్యాప్తంగా స్కూళ్ళు, కాలేజీలు అన్నీ లైవ్ స్ట్రీమింగ్ చేయాలని సూచించింది. మన యువజనుల మేధాశక్తిని ఇది ఇనుమడింపజేయగలదని ఆశిస్తున్నట్టు పేర్కొంది.

మన భారతీయ టెక్నాలజీకి గల అపార శక్తిని ఈ ప్రయోగం చూపుతుందని వివరించింది. సెన్సర్ల తో సహా అన్నీ విఫలమైనప్పటికీ విక్రమ్ ల్యాండర్ ఈ వ్యోమనౌకను సురక్షితంగా చంద్రుని ఉపరితలం మీదికి చేర్చగలదని ఇస్రో చైర్మన్ ఎస్. సోమనాథ్ తెలిపారు. అలా దీన్ని డిజైన్ చేసినట్టు చెప్పారు.

Rahul Gandhi : భారత భూభాగాన్ని చైనా ఆక్రమించిందని కాంగ్రెస్ (Congress } అగ్ర నేత రాహుల్ గాంధీ (Rahul Gandhi} మరోసారి అన్నారు. చైనా మన భూమిని లాక్కుందని ఇక్కడి ప్రజలు చెబుతున్నారని, కానీ ఒక్క అంగుళం కూడా పోలేదని ప్రధాని మోడీ (Modi) అంటున్నారని ఆయన ఆరోపించారు. . ఆదివారం లడఖ్ పర్యటనలో ఉన్న రాహుల్.. ఇక్కడి ప్రజలతో మాట్లాడారు. తమకు కల్పించిన స్టేటస్ పట్ల వీరు అసంతృప్తితో ఉన్నారని, వీరి వద్ద పలు ఫిర్యాదులు ఉన్నాయని ఆయన తెలిపారు.’ చైనా ఆర్మీ మేము మేకలు, గొర్రెలను మేపుకుంటున్న ప్రాంతం లోకి ప్రవేశించి ఆ భూమిని స్వాధీనం చేసుకుంది అని ఇక్కడి ప్రజలు చెబుతున్నారు.. కానీ మోడీ మాత్రం ఒక్క ఇంచ్ కూడా పోలేదని అంటున్నారు.. ఇది నిజం కాదు. ఇక్కడ మీరు ఎవరినైనా అడగండి’ అని ఆయన ప్రధానిని ఉద్దేశించి పేర్కొన్నారు.

గత మూడేళ్ళుగా భారత-చైనా మధ్య బోర్డర్ కు సంబంధించి ఘర్షణ వాతావరణం కొనసాగుతోంది. 2020 జూన్ లో తూర్పు లడఖ్ లోని గాల్వన్ లోయలో రెండు దేశాల సైనికుల మధ్య ఘర్షణ జరిగినప్పటి నుంచి ఇది మరింత తీవ్రమైంది. కాగా ఇక్కడ నిరుద్యోగ సమస్య ఉందని, కేంద్ర పాలిత ప్రాంతంగా దీన్ని ప్రకటించినప్పటికీ ఇక్కడివారికి సరైన ప్రయోజనాలు లభించడం లేదని రాహుల్ అన్నారు . మాకు ప్రాతినిధ్యం కల్పించండి .. బ్యూరోక్రసీ పాలనను మేం కోరుకోవడం లేదు అని వీరు చెబుతున్నారని ఆయన వెల్లడించారు. ప్రజావాణి తోనే ఈ ప్రాంతం కొనసాగాలన్నారు.

నిన్న రాహుల్ ఇక్కడి పాంగాంగ్ సరస్సు వద్ద బైక్ నడిపి అందరి దృష్టిని ఆకర్షించారు.
పైగా తన తండ్రి.. దివంగత మాజీ ప్రధాని రాజీవ్ గాంధీ జయంతిని పురస్కరించుకుని పాంగాంగ్ సో తీరాన ఆయనకు నివాళులర్పించారు. లడఖ్ లో తాను బైక్ నడుపుతున్న ఫోటోలు పదింటిని ఆయన తన ఇన్స్ టా గ్రామ్ లో పోస్ట్ చేశారు.

హిందీ-చీనీ భాయీ భాయీ మాటేమిటి ?

లడఖ్ లోని భారత భూభాగాన్ని చైనా లాగేసుకుందని రాహుల్ గాంధీ ఆరోపిస్తున్నారని.. మరి ‘హిందీ-చీనీ భాయి భాయి ‘ అని మొదట ఎవరు నినాదం చేశారో గుర్తుకు తెచ్చుకోవాలని బీజేపీ ఎంపీ, కేంద్ర మంత్రి జ్యోతిరాదిత్య సింధియా ఎత్తిపొడిచారు. అలాగే మన భూభాగం లోని 45 వేల చదరపు కిలోమీటర్ల ప్రాంతాన్ని ఆ దేశానికి ధారాదత్తం చేశారన్నారు. మరో మంత్రి రవిశంకర్ ప్రసాద్ కూడా రాహుల్ పై ధ్వజమెత్తారు. రాహుల్ ఎక్కడికి వెళ్లినా దేశ వ్యతిరేక ప్రచారాలు చేస్తుంటారన్నారు.

Kailash : మహాదేవుడు, పరమశివుని నివాసంగా భావించే కైలాస పర్వతానికి భారత దేశంవైపు నుంచి కొత్త మార్గాన్ని నిర్మిస్తున్నారు. అభేద్యమైన కొండ ప్రాంతాల నుంచి కైలాస పర్వతాన్ని చేరుకోవడం సులభమేమీ కాదు. బౌధ్ధులు , హిందువులకు పరమ ఆరాధ్య దేవుడైన శివుడు టిబెట్ పరిధిలోని ఈ ప్రాంతంలో నివసిస్తున్నాడని భావించే ఈ మహోన్నత శిఖరానికి చేరుకోవడమంటే స్వర్గధామాన్ని చేరుకున్నట్టేనని భావిస్తారు. హిమాలయాల సమీపంలో.. సముద్ర మట్టానికి సుమారు 22 వేల అడుగుల ఎత్తున ఉన్న కైలాస పర్వతాన్ని కొద్దిమంది మాత్రమే చేరుకోగలుగుతారు.

ఎందుకంటే తీవ్ర వ్యయ ప్రయాసలకోర్చి ప్రయాణించడం అతి కష్టమైన పని. నడక మార్గంలో వెళ్లినా మూడు రోజులపాటు ట్రెక్కింగ్ చేయవలసి ఉంటుంది . అయితే లక్షలాది భక్తుల కోర్కె మేరకు కైలాస యాత్రకు కొత్త మార్గం అందుబాటులోకి రానుంది. సెప్టెంబరు నుంచి ఈ మార్గంలో భక్తులు యాత్ర చేయవచ్చు. ఇందుకు ఉత్తరాఖండ్ లోని పితోర్ గఢ్ జిల్లా నుంచి చైనా బోర్డర్ వరకు మార్గాన్ని నిర్మిస్తున్నారు. ఈ మొత్తం రూట్ అంతా అభేద్యంగా ఉంటుంది.

నడక మార్గం ఏ మాత్రం అనువుగా ఉండదు గనుక గుర్రాలపైన వెళ్ళవలసి ఉంటుంది. ఈ మార్గాన్ని మూడు భాగాలుగా చేపడుతున్నారు. పితోర్ గఢ్ నుంచి తవాఘాట్ వరకు, అక్కడి నుంచి ఘటియాబ్ గఢ్ వరకు రెండు వరుసల దారితో బాటు ఘటియాబ్ గఢ్ నుంచి లిపు లేఖ్ కనుమ వరకు మరో రోడ్డు మార్గాన్ని నిర్మిస్తున్నారు.

కైలాస పర్వతంలో మానవుడు ఊహించని అద్భుతమైన గుహలు కూడా ఉన్నాయని చెబుతారు. ఇక ఈ మార్గంలో మానస సరోవర్ సరస్సును కూడా చూడవచ్చు. స్వచ్ఛమైన నీటితో కూడిన ఈ సరస్సు ప్రపంచ సరస్సులలోకెల్లా అత్యుత్తమయినదని భావిస్తారు. జీవితంలో ఒక్కసారైనా కైలాస పర్వతాన్ని సందర్శించ గోరే భక్తులకు .. ఈ కొత్త మార్గం ఎంతో అనువైనదిగా ఉంటుంది. సెప్టెంబరు నుంచి వారు తమ యాత్రకు సంబంధించి ప్లాన్ చేసుకోవచ్చు.

AkhileshYadav :ప్రభుత్వానికి దమ్ముంటే జీ 20 ఈవెంట్ ను మణిపూర్ లో నిర్వహించాలని సమాజ్ వాదీ పార్టీ చీఫ్ అఖిలేష్ యాదవ్ (Akhilesh Yadav ) సవాల్ విసిరారు. ఆ రాష్ట్రంలో ఇలాంటి కార్యక్రమాలను ఎందుకు నిర్వహించడం లేదన్నారు. రాష్ట్రంలో మళ్ళీ సాధారణ పరిస్థితులు నెలకొంటున్నాయని కేంద్రం చెబుతోందని, మరి ఎందుకు వెనుకాడుతున్నారని ఆయన ప్రశ్నించారు.’ జీ 20 కా చునావ్ కనెక్షన్’ పేరిట శనివారం ఢిల్లీలో జరిగిన కార్యక్రమంలో ఆయన మాట్లాడారు. యూపీ లోను, దేశంలోని వివిధ ప్రాంతాల్లోనూ జీ 20 సదస్సులను నిర్వహించారని, కానీ ఈ రాష్ట్రాన్ని ఎందుకు ఎంచుకోవడం లేదన్నారు.

ఈ ఈవెంట్ల ద్వారా ప్రయోజనం పొందాలని బీజేపీ కోరుకుంటున్నప్పుడు ఆ పార్టీ వీటిని స్పాన్సర్ చేయాలని, కానీ ప్రభుత్వం, పన్ను చెల్లింపుదారులు ఎందుకు స్పాన్సర్ చేస్తున్నారని ఆయన అన్నారు. మీకు ధైర్యముంటే జీ20 సదస్సును మణిపూర్ లో నిర్వహించండి అని వ్యాఖ్యానించారు. ఇలా ఈ కార్యక్రమాన్ని నిర్వహించడం ద్వారా మణిపూర్ లో పరిస్థితి బాగానే ఉందని ప్రపంచానికి చాటాలని అన్నారు.

విపక్ష కూటమి ‘ఇండియా’ను ప్రధాని మోడీ ఘమండియా అని ఆరోపిస్తున్నారని అయితే ఈ కూటమిని ఇలా విమర్శిస్తున్నవారే అహంకారులని అఖిలేష్ యాదవ్ దుయ్యబట్టారు.

కుటుంబ రాజకీయాల గురించి మోదీపదే ఆరోపణలు చేస్తున్నారని, కానీ జ్యోతిరాదిత్య సింధియా, యోగి ఆదిత్యనాథ్ వంటి వారి విషయమేమిటని ఆయన ప్రశ్నించారు. ఇంకా చాలామంది పేర్లు చెప్పగలుగుతానన్నారు. దేశంలో ఈ రోజు పెద్ద పరివార్ వాద్ పార్టీ బీజేపీయేనని అన్నారు. ఒకరిని విమర్శించే ముందు ఆ పార్టీ తన పొరబాట్లను తెలుసుకోవాలని అఖిలేష్ యాదవ్ పేర్కొన్నారు.