umakanth rao

Chandrayaan-3 : ఇస్రో (Isro) ప్రతిష్టాత్మకంగా ప్రయోగించిన చంద్రయాన్-3 చంద్రుడికి చేరువవుతోంది. ఈ నెల 1 న భూ కక్ష్యను వీడి 5 న చంద్రుని కక్ష్యలోకి చేరిన చంద్రయాన్-3 మెల్లగా జాబిల్లికి చేరువవుతోంది. ఈ వ్యోమనౌక కక్ష్య తగ్గింపు విన్యాసాన్ని(Maneuver) విజయవంతంగా నిర్వహించినట్టు ఇస్రో వెల్లడించింది. సోమవారం నిర్వహించిన విన్యాసంతో దీని కక్ష్యను 150 కి.మీ. x 177 కి.మీ. లకు తగ్గించినట్టు పేర్కొంది. అంటే జాబిల్లి ఉపరితలానికి ఇది కేవలం 177 కిలోమీటర్ల దూరంలోనే ఉందని స్పష్టం చేసింది.

తదుపరి కక్ష్య తగ్గింపు విన్యాసాన్ని ఈ నెల 16న ఉదయం ఎనిమిదిన్నర గంటలకు చేపడతామని శాస్త్రజ్ఞులు తెలిపారు. దీంతో చంద్రయాన్-3 చంద్రునిపై 100 కి.మీ. ఎత్తున ఉన్న కక్ష్యలోకి చేరుతుందని, అనంతరం ప్రొపల్షన్ మాడ్యూల్ నుంచి ల్యాండింగ్ మాడ్యూల్ విడిపోతుందని వారు చెప్పారు.

అన్నీ సజావుగా జరిగితే ఈ నెల 23 సాయంత్రానికి ల్యాండర్ చంద్రుని ఉపరితలాన్ని తాకనుంది. ఈ వ్యోమనౌక దశలవారీగా తన ఆర్బిట్ సర్క్యులేషన్ ని పూర్తి చేసి తన చివరి గమ్యాన్ని చేరుకోబోతోంది.

చంద్ర ఉపరితలం మీద ఇది సురక్షితంగా దిగడానికి ఇస్రో శాస్త్రవేత్తలు నిర్విరామంగా కృషి చేస్తున్నారు. జాబిల్లిపైగల పరిసరాలు, మినరాలజీ, హైడ్రాక్సిల్, నీరు,ఐస్ వంటివాటిపై చంద్రయాన్-3 పరిశోధనలు చేస్తుందని ఇస్రో వర్గాలు తెలిపాయి. ఈ మిషన్ ని విజయవంతంగా పూర్తి చేసేందుకు \తాము అహర్నిశలు యత్నిస్తున్నామని ఈ వర్గాలు పేర్కొన్నాయి.

Himachal Pradesh : భారీ వర్షాలు, వరదలతో హిమాచల్ ప్రదేశ్ అతలాకుతలమవుతోంది. అనేక జిల్లాల్లో కొండచరియలు విరిగిపడుతున్నాయి. ఆకస్మిక వరదలు పలు పల్లపు ప్రాంతాలను ముంచెత్తుతున్నాయి. బియాస్, రంజిత్ సాగర్ వంటి నదులు ఉప్పొంగి ప్రవహిస్తున్న కారణంగా చాంబా, మండి, సిమ్లా, కులూ, కాంగ్రా వంటి పలు జిల్లాల్లో వేలమంది ప్రజలు నిరాశ్రయులయ్యారు. అనేక చోట్ల రోడ్లు దెబ్బతిన్నాయి. ఈ సీజన్ లో కురిసిన భారీ వర్షాలు, సంభవించిన వరదల కారణంగా రూ. 7020.28 కోట్ల మేర నష్టం వాటిల్లినట్టు అధికారులు తెలిపారు.

జూన్ 24 న రాష్ట్రంలోకి రుతుపవనాలు ప్రవేశించినప్పటి నుంచి రాష్ట్ర వ్యాప్తంగా జడివాన కురుస్తోందని వారు చెప్పారు. వాహనాలు, ఇళ్ళు, రోడ్లు నీటిలో కొట్టుకుపోవడంతో పలు చోట్ల జాతీయ రహదారులను మూసివేశారు. జూన్ 24 నుంచి ఇప్పటివరకు 257 మంది మరణించారని అధికారులు పేర్కొన్నారు. సుమారు 300 మంది గాయపడ్డారని, పెద్ద సంఖ్యలో గల్లంతరయ్యారని తెలిపారు.

కొండచరియలు విరిగిపడడంవల్లో, రోడ్డు ప్రమాదాల్లోనో 66 మంది ప్రాణాలు కోల్పోయారన్నారు. దాదాపు వెయ్యికి పైగా ఇళ్ళు పూర్తిగా దెబ్బ తినగా 7 వేలకుపైగా ఇళ్ళు పాక్షికంగా ధ్వంసమయ్యాయని చెప్పారు.

270 కి పైగా షాపులు, రెండువేలకు పైగా గోశాలలు కూడా దెబ్బ తిన్నాయి. రాష్ట్రంలో 8 జిల్లాలకు ఆరెంజ్ అలెర్ట్ ను వాతావరణశాఖ ప్రకటించింది. ప్రకృతి విపత్తు కారణంగా 200 రోడ్లు కొట్టుకుపోయినట్టు అధికారులు తాజాగా వెల్లడించారు. రాష్ట్రంలో అన్ని విద్యాసంస్థలను సోమవారం మూసివేశారు. ఇక ఉత్తరాఖండ్ లోనూ భారీ వర్షాల వల్ల 52 మంది మృతి చెందగా 37 మంది గాయపడ్డారు.

Independence Day : దేశ 77 వ స్వాతంత్య్ర దినోత్సవాలు ఢిల్లీ ఎర్రకోట (Red Fort) వద్ద మంగళవారం అత్యంత ఘనంగా జరగనున్నాయి. ప్రధాని మోడీ (Modi) రెడ్ ఫోర్ట్ నుంచి దేశ ప్రజలనుద్దేశించి చేయనున్న ప్రసంగానికి ఏర్పాట్లు పూర్తయ్యాయి. సెలబ్రేషన్స్ లో భాగంగా దేశంలోని వివిధ ప్రాంతాల నుంచి 1800 మంది కపుల్స్ ని ప్రత్యేక అతిథులుగా ఆహ్వానించారు. వీరిలో 660 గ్రామాల నుంచి 400 మంది సర్పంచులు, 250 మంది రైతులు, ప్రధాన మంత్రి కిసాన్ సమ్మాన్ నిధి స్కీం కింద, ప్రధాన మంత్రి కౌశల్ వికాస్ యోజన కింద 100 మంది రైతులు , సెంట్రల్ విస్టా ప్రాజెక్టు నుంచి 50 మంది ‘శ్రమయోగీ’ లు ఉన్నారు.

అలాగే ఖాదీ వర్కర్లు, సరిహద్దు రోడ్డు నిర్మాణ కార్మికులు, ప్రైమరీ స్కూలు టీచర్లు, నర్సులు, మత్స్యకారులు కూడా ఇండిపెండెన్స్ డే సంబరాల్లో పాలు పంచుకోనున్నారు. ‘జన్ భగీదరి’ విజన్ కింద రక్షణ మంత్రిత్వ శాఖ ఇందుకు చొరవ తీసుకుంది. ప్రతి రాష్ట్రం నుంచి, లేదా కేంద్ర పాలిత ప్రాంతం నుంచి సంప్రదాయ దుస్తుల్లో 75 మందికి పైగా జంటలు ఈ వేడుకలకు హాజరు కానున్నారు.

నేషనల్ వార్ మెమోరియల్, ఇండియా గేట్, విజయ్ చౌక్, న్యూ ఢిల్లీ రైల్వే స్టేషన్, ప్రగతి మైదాన్ వంటి 12 చోట్ల సెల్ఫీ పాయింట్లను ఏర్పాటు చేశారు. మోడీ ప్రభుత్వం చేబట్టిన వివిధ పథకాలను ఈ పాయింట్ల వద్ద వివరించే విధంగా వీటిని నిర్దేశించారు. గ్లోబల్ హోప్, వ్యాక్సిన్ అండ్ యోగా, ఉజ్వల యోజన, స్కిల్ ఇండియా, నయా భారత్, ప్రధాన మంత్రి ఆవాస్ యోజన లాంటి పథకాలను ఇందులో చేర్చారు.

ఈ నెల 15 నుంచి 20 వరకు మై గవర్నమెంట్ పోర్టల్ ద్వారా ఆన్ లైన్ సెల్ఫీ పోటీలను కూడా నిర్వహిస్తున్నారు. ఈ పోటీల్లో పాల్గొనేవారు 12 సెల్ఫీ పాయింట్ల వద్ద సెల్ఫీలు తీసుకుని వాటిని ఈ పోర్టల్ పై అప్ లోడ్ చేయాల్సి ఉంటుంది. ఒక్కో విజేతకు రూ. 10 వేల చొప్పున ప్రైజ్ మనీ ఇస్తారని సంబంధిత వర్గాలు తెలిపాయి.

Kharge : ప్రధాని మోడీ, (Modi), హోమ్ మంత్రి అమిత్ షా (Amit Shah) తమ పార్టీ పెట్టిన ప్రభుత్వ స్కూళ్లలో చదివినవారేనని కాంగ్రెస్ (Congress) చీఫ్ మల్లిఖార్జున్ ఖర్గే (Mallikharjun Kharge) సెటైర్ వేశారు. మోడీ అధికారంలోకి వచ్చాకే స్కూళ్ళు వచ్చాయా ? మేం పెట్టిన పాఠశాలల్లోనే వారు చదువుకున్నారు. కానీ గత 70 ఏళ్లలో కాంగ్రెస్ పార్టీ ఏం చేసిందని ప్రశ్నిస్తున్నారు అన్నారు. ఆదివారం ఛత్తీస్ గఢ్ లో జరిగిన ‘భరోసే కా సమ్మేళన్’ పేరిట నిర్వహించిన కార్యక్రమంలో మాట్లాడిన ఖర్గే.. పార్లమెంటులోమణిపూర్ అంశంపై చర్చ సందర్భంగా రాహుల్ గాంధీ (Rahul Gandhi) అడిగిన ప్రశ్నకు మోడీ సమాధానమివ్వకుండా దివంగత మాజీ ప్రధాని జవహర్లాల్ నెహ్రూపట్ల అవమానకరంగా మాట్లాడారని, అపహాస్యం చేశారని ఆరోపించారు.

మణిపూర్ లో జరిగిన జాతి విద్వేష హింసాత్మక ఘటనలపై రాహుల్ మాట్లాడితే.. దానికి మోడీ సమాధానమివ్వలేదన్నారు. అంతా తానే పరిస్థితిని చక్కదిద్దుతున్నట్టు ప్రసంగించారన్నారు. మణిపూర్ పరిస్థితిని ఛత్తీస్ గఢ్ లోని పరిస్థితితో పోల్చడమేమిటని ఖర్గే ప్రశ్నించారు.

ఈ రెండు రాష్ట్రాల మధ్య పోలిక ఏమైనా ఉందా అని అన్నారు. ఇది ఈ రాష్ట్ర ప్రజలను అవమానించడమేనని, మణిపూర్ వెళ్లాలంటే మోడీకి భయమని ఆయన వ్యాఖ్యానించారు. ఎన్నికల ప్రచారాలతో బిజీగా ఉంటున్న మోడీ మణిపూర్ ఎందుకు వెళ్తారని కూడా మల్లిఖార్జున్ ఖర్గే పేర్కొన్నారు.

పార్లమెంట్ లో రెండు గంటలపైగా సాగిన మోడీ ప్రసంగంలో మణిపూర్ అంశాన్ని చాలా తక్కువగా ప్రస్తావించారని, అది ఎలెక్షన్ స్పీచ్ లా ఉంది తప్ప .. ఆ రాష్ట్రంలో సాధారణ పరిస్థితులను పునరుద్ధరించేందుకు ఎలాంటి చర్యలు తీసుకుంటామన్న హామీలేవీ లేవని ఆయన విమర్శించారు.

Rahul Gandhi : గిరిజనులను వనవాసీలని వ్యవహరిస్తూ బీజేపీ (BJP) వారిని అవమానిస్తున్నదని కాంగ్రెస్ (Congress) నేత రాహుల్ గాంధీ (Rahul Gandhi ) ఆరోపించారు. వారు వనవాసీలు కారని, ఆదివాసీలని అన్నారు. వనవాసీలని పిలవడం ద్వారా వారిని అడవులకే పరిమితం చేశారన్నారు. వారి భూమిని లాక్కుని పారిశ్రామికవేత్తలకు ఆ పార్టీ అప్పగిస్తోందన్నారు. ఆదివారం కేరళ వయనాడ్ (Wayanad) జిల్లాలోని మనంతవాడి ప్రాంతంలో డా. అంబేద్కర్ డిస్ట్రిక్ట్ క్యాన్సర్ సెంటర్ వద్ద హెచ్ టీ కనెక్షన్ ని ఆయన ప్రారంభించారు.

వనవాసీలని వ్యవహరించడం వెనుక దురుద్దేశంతో కూడిన ‘లాజిక్’ ఉందని, భూమికి సొంతదారులైన వారిని అడవులకే పరిమితం చేసి వారి హక్కులను కాలరాస్తున్నారని ఆయన దుయ్యబట్టారు. గిరిజనులు అడవులను వదిలిరాదన్నదే బీజేపీ నేతల ఐడియా.. అసలు వనవాసీ అన్న పదాన్నే మా పార్టీ సమర్థించదు . ఇది చరిత్రను, గిరిజన వర్గాల సంప్రదాయాలను వక్రీకరించడమే అని రాహుల్ విమర్శించారు.

దేశంతో వీరికి గల సంబంధాలపై దాడి చేయడమే బీజేపీ ఉద్దేశమన్నారు. గిరిజనులకు తమ అటవీ భూములపై హక్కు కల్పించాలని, విద్య, ఉద్యోగాలు వంటి వాటిలో వారికి అవకాశాలు ఇవ్వాలని ఆయన కోరారు.

ఈ ప్రాంతంలో క్యాన్సర్ ఆసుపత్రి అభివృద్దికి ఎంపీ ల్యాడ్స్ నిధుల నుంచి 50 లక్షలు ఇస్తున్నట్టు రాహుల్ ప్రకటించారు. ఇక్కడ ఛాతీ సంబంధ క్యాన్సర్ తో ఎంతో మంది మహిళలు బాధపడుతున్నారని ఆయన విచారం వ్యక్తం చేశారు.

Bihar : బీహార్ లోని దర్బంగా (Darbhanga ) లో ఎయిమ్స్ ఆసుపత్రికి సంబంధించి ప్రధాని మోడీ (Modi) అబద్దాలు చెప్పారని డిప్యూటీ సీఎం తేజస్వి యాదవ్ (Tejaswi Yadav) చేసిన ఆరోపణను కేంద్ర ఆరోగ్య శాఖ మంత్రి మాన్సుఖ్ మాండవీయ (Mansukh Mandaviya) ఖండించారు. దీనిపై వీరిద్దరి మధ్య తీవ్ర స్థాయిలో ట్వీట్ల వార్ సాగింది. దర్బంగాలో అసలు ఎయిమ్స్ ఆసుపత్రి నిర్మాణమే జరగలేదని, కానీ అక్కడ ఈ హాస్పిటల్ ఉన్నట్టే మోడీ.. బెంగాల్ పంచాయతీరాజ్ పరిషద్ సమావేశాన్ని ఉద్దేశించి వర్చ్యువల్ గా చేసిన ప్రసంగంలో పేర్కొన్నారని బీహార్ ఆరోగ్య శాఖ మంత్రిత్వ శాఖను కూడా చూస్తున్న తేజస్వి అన్నారు. ఈ క్రెడిట్ తమకే దక్కుతుందన్నట్టు మాట్లాడారని, ఆయన ‘పెద్ద’ అబద్ధం చెప్పారని ఆరోపించారు.

ఈ హాస్పిటల్ నిర్మాణానికి తమ ప్రభుత్వం కేంద్రానికి 151 ఎకరాలు ఇచ్చిందని, పైగా భూమిని చదును చేసేందుకు రూ. 250 కోట్లను కేటాయించిందని ఆయన తెలిపారు. కానీ దురదృష్టవశాత్తూ కేంద్రం రాజకీయాలు చేస్తూ ఈ ఆసుపత్రి నిర్మాణానికి అంగీకరించడం లేదన్నారు. ఈ దేశం ప్రధాని నుంచి వాస్తవాలు తెలుసుకోవాలని ఆశిస్తుంది.. అయితే ఆయన పచ్చి అబద్దమే చెప్పారు అని తేజస్వి యాదవ్ విమర్శించారు. దీనిపై స్పందించిన కేంద్ర మంత్రి మాన్సుఖ్ మాండవీయ.. ఆయనకు సుదీర్ఘంగా సమాధానమిచ్చారు.

మోడీ ప్రభుత్వం 2020 సెప్టెంబరు 19 నే అక్కడ ఎయిమ్స్ ఆసుపత్రి నిర్మాణానికి అనుమతినిచ్చిందని, కానీ మీ ప్రభుత్వం 2021 నవంబరు 3 న కొంత భూమిని కేటాయిస్తున్నట్టు పేర్కొందన్నారు, ఇందుకు సంబంధించి.. కేంద్ర ఆరోగ్యశాఖ కార్యదర్శి బీహార్ అదనపు కార్యదర్శికి నాడు పంపిన లేఖ ప్రతులను కూడా మాండవీయ తన ట్వీట్ కి జత చేశారు. ఆ తరువాత మీరే రాజకీయాలు చేస్తూ గత ఏప్రిల్ 30 న ప్రభుత్వం వద్దకు (ఢిల్లీకి) వచ్చి ఈ స్థలాన్ని మారుస్తున్నట్టు తెలిపారన్నారు. మరొక భూమిని చూపించారన్నారు.

రూల్స్ ప్రకారం నిపుణుల కమిటీ ఒకటి ఆ భూమిని తనిఖీ చేసిందన్నారు. కేంద్ర ఆరోగ్య మంత్రిత్వ శాఖ గత మే 26 న మీ ప్రభుత్వానికి ఓ లేఖ రాసిందని, రెండో సారి ఇచ్చిన భూమి ఎయిమ్స్ నిర్మాణానికి అనువైనది కాదని స్పష్టం చేసిందని అన్నారు. ఈ లేఖ కాపీని కూడా మాండవీయ తన ట్వీట్ కి జోడించారు. భూమిని ఎందుకు మార్చారని, ఎవరి ప్రయోజనాలకోసం మార్చారని ప్రశ్నించిన ఆయన, ఎయిమ్స్ నిర్మాణానికి అనువుగా లేని భూమి గురించి బీహార్ అసెంబ్లీలో మీ సొంత ఎమ్మెల్యేనే ఏమన్నారో చెప్పాలని డిమాండ్ చేశారు. రాజకీయాల నుంచి బయటికి వచ్చి దర్బంగా లో ఆసుపత్రి నిర్మాణానికి భూమిని కేటాయించాలని, ఇందుకు తాము కట్టుబడి ఉన్నామని ఆయన పేర్కొన్నారు.

Modi : దేశ 77 వ స్వాతంత్య్ర దినోత్సవం సమీపిస్తున్న సందర్బంగా ప్రధాని మోడీ (Modi) గత ఏడాదిలాగే దేశ ప్రజలకు పిలుపునిచ్చారు. ఆగస్టు 13 నుంచి 15 వరకు ప్రతి ఇంటిపై జాతీయ పతాకాన్ని ఎగురవేయాలని కోరిన ఆయన.. ప్రజలంతా సామాజిక మాధ్యమాల్లో కనిపించే ప్రొఫైల్, డిస్ ప్లే పిక్చర్లల్లో త్రివర్ణ పతాక పోస్టర్ ను ఉంచాలని సూచించారు. అలాగే x లో (ఇదివరకటి ట్విట్టర్ లో) తన డీపీని మార్చేశారు. హర్ ఘర్ తిరంగా (Har Ghar Tiranga) ఉద్యమ స్ఫూర్తితో సోషల్ మీడియా ఖాతాల డీపీని మార్చడం ద్వారా ఈ దేశానికి, మనకు మధ్య గల బంధాన్ని మరింత బలోపేతం చేద్దామన్నారు. స్వేచ్ఛ, జాతీయ ఐక్యతకు జాతీయ పతాకంప్రతీక.. హర్ ఘర్ తిరంగా వెబ్ సైట్ లో తిరంగాతో ఉన్న మీ ఫోటోలను అప్ లోడ్ చేయండి అని ఆయన అన్నారు. ఈ అసాధారణ ప్రయత్నానికి అందరం చేతులు కలుపుదాం అని ట్వీట్ చేశారు.

ఇక అప్పుడే దేశంలో పలు చోట్ల హర్ ఘర్ తిరంగా ర్యాలీలు మొదలయ్యాయి. ఢిల్లీలో కేంద్ర మంత్రి మీనాక్షి లేఖి ఈ ర్యాలీని ప్రారంభించగా ఇతర మంత్రులు అనురాగ్ ఠాకూర్, కిషన్ రెడ్డి, అరుణ్ రామ్ మేఘ్ వాల్ తదితరులు కూడా ఈ ర్యాలీలో పాల్గొన్నారు. ఉపరాష్ట్రపతి జగదీప్ ధన్కర్ ఈ నెల 11 నే తిరంగా ర్యాలీ నిర్వహించారు. జమ్మూ కశ్మీర్ లో లెఫ్టినెంట్ గవర్నర్ మనోజ్ సిన్హా ఆదివారం ఉదయం ఈ ర్యాలీని ప్రారంభించారు.

శ్రీనగర్ లోని షేర్-ఏ-కశ్మీర్ ఇంటర్నేషనల్ కాన్ఫరెన్స్ సెంటర్ నుంచి దాల్ సరస్సు సమీపంలోని బొటానికల్ గార్డెన్ వరకు ర్యాలీ సాగింది. పెద్ద సంఖ్యలో స్కూలు విద్యార్థులు కూడా ఇందులో పాల్గొన్నారు. గుజరాత్ లో కేంద్ర హోమ్ మంత్రి అమిత్ షా తిరంగా ర్యాలీని నిర్వహించారు.ఈ సందర్భంగా భద్రతా సిబ్బంది జాతీయ జెండాతో కవాతు చేశారు. మధ్యప్రదేశ్ లోకని చతార్ పూర్ లో ప్రజలు దేశభక్తి గీతాలు పాడుతూ ర్యాలీలో పాల్గొన్నారు.

హర్ ఘర్ తిరంగా ఉద్యమ ప్రచారాన్ని పురస్కరించుకుని దేశ వ్యాప్తంగా పోస్టాఫీసులకు దాదాపు రెండున్నర కోట్ల జాతీయ పతాకాలను సరఫరా చేసినట్టు కేంద్ర సాంస్కృతిక వ్యవహారాల కార్యదర్శి గోవింద్ మోహన్ తెలిపారు. గత సంవత్సరం మాదిరే ఈ ఏడాది కూడా అన్ని రాష్ట్రాలు, కేంద్ర పాలిత ప్రాంతాల్లో పెద్ద ఎత్తున స్వాతంత్య్ర దినోత్సవ కార్యక్రమాలు జరుగుతాయన్నారు.