కేంద్ర ఎన్నికల సంఘం కీలక నిర్ణయం తీసుకుంది. రాజస్థాన్ (Rajasthan) అసెంబ్లీ ఎన్నికల (Assembly Elections) తేదీలను మారుస్తూ నిర్ణయం తీసుకుంది. రాజస్థాన్ ఎన్నికలను నవంబర్ 23 నుంచి అదే నెల 25కు మారుస్తున్నట్టు ఈసీ వెల్లడించింది.ఈ మేరకు ఓ ప్రకటన విడుదల చేసింది. ఎన్నికల తేదీని మార్చాలంటూ వివిధ వర్గాల నుంచి విజ్ఞప్తి మేరకు ఈ నిర్ణయం తీసుకున్నట్టు సీఈసీ వెల్లడించింది.
నవంబర్ 23న రాజస్థాన్‌లో దేవ్ ఉదాని ఏకాదశిని ప్రజలు జరుపుకుంటారు. ఏకాదశి రోజును రాజస్థానీలు శుభదినంగా భావిస్తారు. అందుకే ఆ రోజుల్లో ఎక్కువగా శుభకార్యాలు జరపుకుంటారు. ఈ ఏడాది దేవ్ ఉదానీ ఏకాదశి రోజున సుమారు 50 వేలకు పైగా వివాహాలు జరిగే అవకాశం ఉన్నట్టు తెలుస్తోంది. దీంతో రాష్ట్రంలో ఎక్కువ మంది వివాహ కార్యక్రమాల్లో పాల్గొనే అవకాశం ఉంది.
ఈ క్రమంలో అత్యధికులు ఓటింగ్ కు దూరంగా ఉండే అవకాశం ఉందని రాజకీయ పార్టీలు భావిస్తున్నాయి. దీంతో ఓటింగ్ పై తీవ్ర ప్రభావం పడే అవకాశం ఉందని చెబుతున్నాయి. దీంతో పాటు భారీగా రవాణా సమస్యలు కూడా వచ్చే అవకాశం ఉందని అంటున్నాయి. ఈ నేపథ్యంలో ఎన్నికలను వాయిదా వేయాలని కేంద్ర ఎన్నికల సంఘాన్ని రాజకీయ పార్టీలు కోరాయి.
విభిన్న వర్గాల నుంచి వచ్చిన విజ్ఞప్తుల నేపథ్యంలో ఎన్నికల సంఘం తాజాగా ఈ నిర్ణయం తీసుకుంది. అంతకు ముందు రాజస్థాన్ తో పాటు మరో నాలుగు రాష్ట్రాల ఎన్నికల షెడ్యూల్ ను ఈసీ ప్రకటించింది. రాజస్థాన్ తో పాటు తెలంగాణ, మధ్య ప్రదేశ్, చత్తీస్ గఢ్, మిజోరాంలలో డిసెంబర్ 3న ఎన్నికల ఫలితాలను ప్రకటించనున్నట్టు పేర్కొంది.
