నేటి సమాజంలో మనిషి ప్రాణం.. బ్యాట్ పట్టుకొని దోమలను చంపినంత సులువుగా మారిపోయిందని తెలుస్తోంది. అయినా ప్రాణం పోయడం కష్టం కానీ ప్రాణం తీయడం అదేమంత కష్టం కాదని తరచుగా జరుగుతున్న హత్యలు నిరూపిస్తున్నాయి.. కారణాలు ఏవైనా మనుషులు ఒకరినొకరు చంపుకోవడాలు మాత్రం రోజు రోజుకు పెరిగిపోతుండటం ఆందోళన చెందవలసిన విషయంగా పేర్కొంటున్నారు..
తాజాగా కామారెడ్డి (Kamareddy) జిల్లాలో దారుణం చోటు చేసుకొంది.. పాల్వంచ (Palvancha) మండలం ఆరేపల్లి (Arepalli) గ్రామ శివారులో పట్టపగలే ఓ యువకుడు దారుణ హత్యకు గురైయ్యాడు.. గ్రామానికి చెందిన బోయ నవీన్ (25) అనే యువకుడు ఆటో డ్రైవర్‌గా జీవనం సాగిస్తున్నాడు. కాగా నేటి ఉదయం ఆయన తల్లిదండ్రులను పొలం వద్ద వదిలి ఆటోలో ఇంటికి వెళ్తున్న క్రమంలో హెల్మెట్ ధరించిన ఆగంతకులు ఇద్దరు బైక్‌పై వచ్చి విచక్షణా రహితంగా నవీన్‌పై కత్తులతో దాడి చేసి హతమార్చారు..
కాగా ఈ హత్యను రోడ్డుపై వెళ్తున్న వారు, స్థానికంగా పొలం పనులు చేస్తున్న వారు చూసినట్లుగా తెలుస్తోంది. స్థానికుల నుంచి సమాచారం అందుకొన్న పోలీసులు ఘటనా స్థలానికి చేరుకొని.. హత్యకు గల కారణాలు ఆరా తీస్తున్నారు. ఘటన స్థలంలో ఆధారాలు సేకరించి, కేసు నమోదు చేసుకొని హంతకుల ఆచూకీ కోసం గాలింపు చర్యలు చేపట్టారు.. మరోవైపు ఈ హత్యకు అక్రమ సంబంధం కారణం అనే అనుమానాలు వ్యక్తం అవుతున్నాయి..
