తన నియోజకవర్గంలో మంత్రి హరీష్ రావు (Harish Rao) చేసిన వ్యాఖ్యలకు కౌంటర్ ఇచ్చారు దుబ్బాక ఎమ్మెల్యే రఘునందన్ రావు (Raghunandan Rao). మంగళవారం సిద్దిపేట జిల్లా దుబ్బాక క్యాంపు కార్యాలయంలో ఆయన మీడియాతో మాట్లాడారు. ఈ సందర్భంగా హరీష్ రావు నోరు అదుపులో పెట్టుకోవాలని హెచ్చరించారు. మంత్రిపై తీవ్ర స్థాయిలో మండిపడ్డారు. ఉప ఎన్నికలలో హరీష్ రావు ఇచ్చిన హామీలు ఏమయ్యాయని ప్రశ్నించారు.
దివంగత రామలింగారెడ్డి (Ramalinga Reddy) కుటుంబానికి అన్యాయం చేసింది హరీష్ రావేనని.. ఆ కుటుంబం దగ్గర డబ్బులు లేవని అన్నారు. డబ్బులు ఉన్న ఎంపీ కొత్త ప్రభాకర్ రెడ్డికి అమ్ముకున్నారని ఆరోపించారు. దుబ్బాకపై హరీష్ రావుది సవతి ప్రేమ అంటూ విరుచుకుపడ్డారు. పైగా, తమపై అసత్య ఆరోపణలు చేస్తున్నారని మండిపడ్డారు. రానున్న ఎన్నికల్లో మరోసారి దుబ్బాక ప్రజలు బీఆర్ఎస్ కు బుద్ధి చెబుతారని హెచ్చరించారు రఘునందన్.
సోమవావారం దుబ్బాకలో రామలింగారెడ్డి విగ్రహాన్ని ఎంపీ కొత్త ప్రభాకర్ రెడ్డితో క‌లిసి మంత్రి హరీష్ రావు ఆవిష్క‌రించారు. ఈ సందర్భంగా మాట్లాడుతూ.. రామలింగారెడ్డి ఆత్మకు శాంతి చేకూరాలంటే దుబ్బాక గడ్డమీద గులాబీ జెండా ఎగరాలన్నారు. తెలంగాణలో బీజేపీ లేచేది లేదు.. కాంగ్రెస్ గెలిచేది లేదు అని విమర్శించారు. అలాగే, రామలింగారెడ్డి శంకుస్థాపన చేసిన పనులకే బీజేపీ ఎమ్మెల్యే రఘునందన్ రిబ్బన్ కట్ చేస్తున్నారని ఎద్దేవ చేశారు.
ఎమ్మెల్యేగా రఘునందన్ గెలిచాక మూడేళ్లలో చేసిందేమీ లేదన్నారు హరీష్ రావు. కానీ, చీరలు, సారెలు ఇస్తున్నారని.. ఆయన మాయ మాటలు నమ్మి సోలిపేట సుజాత అక్కకు అన్యాయం చేశారని అన్నారు. రఘునందన్ అరచేతిలో వైకుంఠం చూపితే దుబ్బాక ప్రజలుగా నమ్మి మోసపోయామని చెప్పారు. ఈ ఎన్నికల్లో మాయ మాటలు నమ్మి మోసపోవద్దని… సోలిపేట కుటుంబానికి అండగా ఉంటాం.. రాజకీయంగా నిలబెడతామని స్ప‌ష్టం చేశారు. ఈ నేపథ్యంలో హరీష్ రావు కామెంట్స్ కు కౌంటర్ ఇచ్చారు రఘునందన్.
