Andhra Pradesh

అసెంబ్లీ ఎన్నికల (Assembly elections)వేళ ఏపీ (AP)లో హడావుడి కనిపిస్తున్నట్టు లేదని అనుకొంటున్నారు. ప్రస్తుత పరిస్థితుల్లో వైసీపీ (YCP) కి ఎదురులేదని జగన్ (Jagan) అభిమానులు జోష్ లో ఉన్నారు. మరోవైపు తెలంగాణలో ఎన్నికల ప్రచారం జోరందుకొన్న నేపథ్యంలో ఏపీలో అసలు ఎన్నికలు ఉన్నాయా? అని కొందరు సందేహ పడుతున్నారు. ఎందుకంటే ప్రస్తుతం వైసీపీకి ఘాటు విమర్శల అస్త్రాలు తగలడం లేదంటున్నారు. ఇక జనసేన (Janasena)అప్పుడప్పుడు ఓ రాయి వేస్తుందని అభిప్రాయపడుతున్నారు ఏపీ ప్రజలు. కాగా ప్రస్తుతం జగన్ సర్కారుపై జనసేన నేత నాదెండ్ల మనోహర్ (Nadendla Manohar) విమర్శలు గుప్పించారు.

అమ్మఒడి పేరుతో జగన్ ప్రభుత్వం 743 కోట్లు దోచుకుందని, విద్యాశాఖలో అనేక అవకతవకలు జరుగున్నాయని నాదెండ్ల మనోహర్ ఆరోపించారు. ప్రజల డబ్బును ఇష్టం వచ్చినట్లు దుర్వినియోగం చేస్తున్నారని విమర్శించారు. వైసీపీ ప్రభుత్వం సమయానికి టీచర్లకు జీతాలు ఇవ్వకుండా ఇబ్బందులకు గురి చేస్తోందని నాదెండ్ల వెల్లడించారు. మూడో తరగతి నుంచి పదో తరగతి విద్యార్దుల వరకు టోఫెల్ పరీక్షపై ఒప్పందాలు చేసుకున్నారని ఆరోపించారు. విద్యాశాఖ మంత్రి ఏదో చెబుతారు. ఫీజులు కట్టి టెస్ట్ లు రాశాక ఇచ్చే టోఫెల్ సర్టిఫికేట్ల వల్ల ప్రయోజనం ఏమిటని నాదెండ్ల మనోహర్ ప్రశ్నించారు.

సీఎం ఈ విధానాన్ని రుద్దటానికి కారణం ఏమిటన్న నాదెండ్ల.. ఇంగ్లీష్ మీడియం మాత్రమే కరెక్టు కాదని జాతీయ విద్యా విధానం చెప్పిన తర్వాత కూడా జగన్ ముందుకు సాగడం వింతగా ఉందని  దుయ్యబట్టారు. ఎవరి కోసం ఇలా ప్రజా సొమ్ము దుర్వినియోగం చేస్తున్నారో చెప్పాలని డిమాండ్ చేశారు. ఇంగ్లీష్ విద్య అగ్రిమెంట్ల గురించి మంత్రికి తెలుసా? ప్రభుత్వంపైనా, మీ శాఖపైనా మీకు పట్టు లేదు కాబట్టే ఈ పరిస్థితి వచ్చిందని అన్నారు నాదెండ్ల..

సెప్టెంబర్ 22 నుంచి అక్టోబర్ 2023 వరకు 4,48,136 మంది విద్యార్దులు ప్రభుత్వ పాఠశాలల నుంచి తప్పుకున్నట్టు సర్వే లెక్కలు చెప్పిందన్న నాదెండ్ల అమ్మఒడి, విద్యాకానుకలు ఎవరికిచ్చారని ప్రశ్నించారు. విద్యా కానుకలు 39,95,992 లక్షల మందికి, అమ్మఒడి 42, 61,965 మందికి ఇచ్చామని చెప్పారు. ఈ రెండింటిలో ఇంత వ్యత్యాసం ఎలా వచ్చిందో చెప్పాలని నాదెండ్ల మనోహర్ డిమాండ్ చేశారు. ఏదో హడావుడిగా ప్రెస్ మీట్ పెట్టి ప్రతిపక్షాలను విమర్శించడం తప్పితే మీరు చేసిన అభివృద్ధి ఏదని నాదెండ్ల అన్నారు. అమ్మఒడిలో పెద్ద స్కాం జరిగిందనేది వాస్తవం.. అమ్మఒడి పేరుతో జగన్ ప్రభుత్వం రూ. 743 కోట్లు దోచుకుంది నిజం అని నాదెండ్ల మనోహర్ ఆరోపణలు చేశారు..

టీడీపీ నేతలు ఏపీ ప్రభుత్వం వైఫల్యాలను ప్రజలకు తెలిపేందుకు సర్వ ప్రయత్నాలు చేస్తున్నారు. తాజాగా ‘ఏపీ హేట్స్‌ జగన్’ అనే పేరుతో ఓ పుస్తకాన్ని ఆవిష్కరించారు. ఈ పుస్తకంలో జగన్ ప్రభుత్వంలో చోటుచేసుకున్న పరిణామాలు, పెరిగిన ధరలు, పన్నుల భారం వంటి పలు అంశాలను ఇందులో రూపొందించారు.

ఈసందర్భంగా టీడీపీ ఏపీ అధ్యక్షుడు అచ్చెన్నాయుడు మాట్లాడుతూ.. సీఎం జగన్‌పై కీలక వ్యాఖ్యలు చేశారు. శ్రీకాకుళం నుంచి చిత్తూరు వరకు అన్ని ప్రాంతాలు, అన్ని వర్గాల ప్రజలు ముక్తకంఠంతో ‘ఏపీ హేట్స్‌ జగన్’ అంటున్నారని చెప్పారు. రైతులు, మహిళలు, ఉద్యోగులు, వృద్ధులు, ఉపాధ్యాయులు, యువత, వికలాంగులు సహా అన్ని వర్గాల వరకు జగన్ బాధితులే అని విమర్శించారు.

సీఎం జగన్ తన దోపిడీ, అవినీతిపై ప్రజల్లో చైతన్యం వస్తే తనకు, తన ప్రభుత్వానికి సమాధి కడతారన్న భయంతోనే చేయని నేరానికి చంద్రబాబుని అన్యాయంగా జైలుకు పంపాడని మండిపడ్డారు. ప్రజల బిడ్డను అని చెప్పుకుంటున్న జగన్ బిడ్డ.. నమ్మిన వారిని నట్టేట ముంచడమే 4ఏళ్లలో చేసిన నిర్వాకమని ఆరోపించారు. టీడీపీ ప్రభుత్వం అమలు చేసిన ఉచిత ఇసుక విధానాన్ని రద్దు చేసి, ఇసుక దోపిడీతో రూ.40వేల కోట్లు కొట్టేయడమే జగన్ బిడ్డ చేసిన మంచి పని అని ఎద్దేవా చేశారు అచ్చెన్నాయుడు.

అదేవిధంగా సంపూర్ణ మద్యపాన నిషేధం ఏమైందో సీఎం జగన్ మహిళలకు సమాధానం చెప్పాలని డిమాండ్ చేశారు. 2.30లక్షల ప్రభుత్వ ఉద్యోగాల భర్తీ, జాబ్‌క్యాలెండర్ హామీలు తుంగలో తొక్కి యువత భవిష్యత్తును జగన్ చిదిమేశాడని ఆరోపించారు. అదేవిధంగా సీపీఎస్ రద్దుపై జగన్ ఉద్యోగులకు వివరణ ఇవ్వాలన్నారు. సరైన సమయంలో ఈ ప్రభుత్వానికి కర్రుకాల్చి వాతపెడుతామని అచ్చెన్నాయుడు ప్రభుత్వ వైఫల్యాలను లేవనెత్తారు.

విజయవాడలో దసరా శరన్నవాత్రి ఉత్సవాలు (Dussehra Sharannawatri Festivals) ఘనంగా జరుపుకొంటున్నారు భక్తులు.. దేవి శరన్నవరాత్రి మహోత్సవములో భాగంగా ఈరోజు అమ్మ‌వారు సరస్వతీదేవి అవ‌తారంలో భ‌క్తుల‌కు ద‌ర్శ‌న‌మివ్వ‌నున్నారు. కాగా విజయవాడ (Vijayawada)ఎంపీ (MP) కేశినేని నాని (Kesineni Nani) దుర్గ‌మ్మను ద‌ర్శించుకున్నారు.

మూలా నక్షత్రం సంద‌ర్భంగా కేశినేని నాని కుటుంబ సమేతంగా అమ్మవారిని దర్శించుకుని పట్టు వస్త్రాలు, సారె సమర్పించారు. దర్శన అనంతరం వేదపండితులు వేదాశీర్వచనం అందించగా.. ఆలయ అధికారులు అమ్మవారి తీర్థప్రసాదాలు వారికి అందజేశారు. ఈ సందర్భంగా ఎంపీ కేశినేని నాని మాట్లాడుతూ.. అమ్మ వారి ఆశీస్సులతో దర్శనం బాగా జరిగిందన్నారు.

అమ్మవారి కృపా కటాక్షాలు, ఆశీస్సులు ప్రజలందరిపై ఉండాలని ఆకాంక్షించినట్టు తెలిపారు కేశినేని. దేశం, రాష్ట్రం సుభిక్షంగా ఉండాలని అమ్మ‌వారిని కోరుకున్నట్టు వెల్లడించారు. మరోవైపు 45 సంవత్సరాలుగా తెలుగు రాష్ట్రాల అభివృద్ధికి కృషి చేసిన గొప్ప వ్యక్తి చంద్రబాబు నాయుడు(Chandrababu) అని కొనియాడారు. ఆయ‌న సంపూర్ణ ఆయురారోగ్యాలతో క్షేమంగా బయటకురావాలని కోరుకున్నట్టు కేశినేని నాని వెల్ల‌డించారు.

ఏపీ సీఎం జగన్‌మోహన్‌‌రెడ్డి ఎమ్మిగనూరు పర్యటనతో ప్రయాణికులకు తిప్పలు తప్పడంలేదు. సీఎం పర్యటనకు ప్రభుత్వ పథకాల లబ్ధిదారులను, మహిళలను పెద్దఎత్తున తరలించేందుకు రాయలసీమ జోన్ నుంచి 300కు పైగా బస్సులను తీసుకువెళ్తున్నారు. బస్సుల సంఖ్యను కుదించడంతో పండగకు ఊరెళ్లే ప్రయాణికులు ఇబ్బంది పడ్డారు.

ఒక్కో డిపో నుంచి పదుల సంఖ్యలో బస్సులను సభకు తరలించారు. దసరా నేపథ్యంలో ప్రజారవాణా సంస్థలు బుధ, గురువారాల్లో 100 బస్సులు ఏర్పాటు చేసింది. వాటిలో రిజర్వేషన్ సౌకర్యం కల్పించడంతో ప్రయాణికులు టికెట్లను కొని బస్టాండ్ వచ్చి చూస్తే ఒక్క బస్సు కనిపించడంలేదు. దీనికి కారణం కర్నూల్‌లో సీఎం పర్యటన కోసం బస్సులు సిద్ధం చేయడమే.

దీంతో రాయలసీమ జోన్ నుంచి బుధవారం మధ్యాహ్నం 200 బస్సులు ఏర్పాటు చేసిన అధికారులు, సాయంత్రానికి 300 వరకు బస్సులు అటువైపు తిప్పారు. ఉమ్మడి జిల్లాలోని 12డిపోల్లో ఒక్కో డిపో నుంచి 10 బస్సులు తీసుకోవడానికి సిద్ధమయ్యారు.కర్నూలు జిల్లాలో 54 మండలాలు, వెయ్యికి పైగా గ్రామాలున్నాయి. కర్నూలు, నంద్యాల జిల్లా నుంచిగ్రామీణ ప్రాంతాలకు పండగకు వెళ్లే ప్రయాణికుల అధికంగా ఉంటారు.

నిత్యం గ్రామీణ ప్రాంతాలకు నాలుగు నుంచి ఐదు ట్రిప్పులు తిరగాల్సిన బస్సులు కేవలం మూడు ట్రిప్పులకే పరిమితం చేశారు. దీంతో గ్రామాలకు వెళ్లాలనుకునే ప్రయాణికులకు గంటల కొద్దీ నిరీక్షణ తప్పలేదు. చిన్నారులు, వృద్ధులు తీవ్ర ఇబ్బందులు పడ్డారు. అరకొర బస్సుల్లో 50మంది కూర్చోవాల్సినచోట కుక్కికుక్కి వందకు పైగా ప్రయాణికులను ఎక్కించాల్సి వచ్చింది. జనం నిలదీస్తారని అధికారులు బస్టాండ్ వైపుల వెళ్లడంలేదని సమాచారం.