Mano

మొన్నటి వరకు బీఆర్ఎస్‌లో ఉండి కాంగ్రెస్‌పై విమర్శలు చేసిన ఎమ్మెల్యే కడియం శ్రీహరి(Kadiyam Srihari) ఇప్పుడు యూటర్న్ తీసుకున్నారు. ఇటీవల కాంగ్రెస్‌ కండువా కప్పుకున్న ఆయన సోమవారం వరంగల్ జిల్లా కాంగ్రెస్ కార్యాలయంలో మీడియాతో మాట్లాడారు. ఈ సందర్భంగా ఆయన బీఆర్ఎస్(BRS)పార్టీపై సంచలన వ్యాఖ్యలు చేశారు. మరో మూడు నెలల్లో బీఆర్ఎస్ మూతపడుతుందని ఆరోపించారు. రాష్ట్రంలో ఒక్క సీటు కూడా బీఆర్ఎస్ గెలవదని జోస్యం చెప్పారు.

నమ్మించి మోసం చేయడం కేసీఆర్ నైజమని కడియం మండిపడ్డారు. కేసీఆర్ కుటుంబం పైన అవినీతి ఆరోపణలు ఉన్నాయని గుర్తు చేశారు. కవితపై బీజేపీ కుట్రతో కేసులు పెట్టిందంటున్న కేసీఆర్ అంటున్నారని, తప్పు చేయకుండా ఎవరినీ జైలులో పెట్టరనే విషయాన్ని గుర్తుంచుకోవాలని హితవు పలికారు. లిక్కర్ కేసులో కవిత అరెస్టవడం సిగ్గుచేటన్నారు. కవిత వల్లే కేజ్రీవాల్ ఈ కేసులో ఇరుక్కున్నారని కీలక వ్యాఖ్యలు చేశారు. అదేవిధంగా సీఎంకు సంబంధం లేకుండానే ఫోన్ ట్యాపింగ్ జరిగిందా? అని ప్రశ్నించారు.

హైదరాబాద్ చుట్టూ వేల ఎకరాలను కేసీఆర్ కుటుంబం కబ్జా చేసిందని కడియం ఆరోపించారు. ఇక రాష్ట్రంలో బీఆర్ఎస్ మనుగడ కష్టమని అన్నారు. బీఆర్ఎస్ ఓటింగ్ శాతం 20 శాతానికి పడిపోయిందని తెలిపారు. బీఆర్ఎస్ ఇప్పుడు రాష్ట్రంలో మూడోస్థానంలో ఉందన్నారు. బీజేపీ కంటే ఆ పార్టీ వెనుకబడిందంటూ విమర్శించారు. వరంగల్‌ను ఆరు ముక్కలు చేసిన కేసీఆర్ ఏ ముఖం పెట్టుకుని ఇక్కడికి వచ్చారంటూ మండిపడ్డారు.

ఆరూరి రమేష్‌కు వరంగల్ చుట్టూ వందల ఎకరాల భూమి ఎలా వచ్చిందని ప్రశ్నించారు. కబ్జాల వల్లే ఇదంతా సాధ్యమైందని దుయ్యబట్టారు. రాజయ్య మీద ప్రేమ ఉంటే వరంగల్ పార్లమెంట్స్ టికెట్ ఎందుకు ఇవ్వలేదని నిలదీశారు. కేసీఆర్ ఎదురుగా ఒక మాట.. లోపల మరో మాట మాట్లాడే నైజమని ఆగ్రహం వ్యక్తం చేశారు. వరంగల్‌కు కేసీఆర్ చేసిందేమీ లేదన్నారు. వరంగల్‌పై కేసీఆర్‌కు ప్రేమ లేదన్నారు. ఇక్కడ ప్రశ్నించేవారు ఎక్కువగా ఉండటం వల్ల కేసీఆర్‌కు వరంగల్ అంటే భయమని అన్నారు.

బీజేపీ ఎంపీ(BJP MP) ధర్మపురి ‌అర్వింద్(Dharmapuri Arvind) సంచల‌న‌ వ్యాఖ్యలు చేశారు. జగిత్యాలలో ఇవాళ(సోమవారం) ఏర్పాటు చేసిన బీజేవైఎం కార్యకర్తల సమావేశంలో అర్వింద్ మాట్లాడారు. సీఎం రేవంత్ రెడ్డి(CM Revanth Reddy) బీజేపీ(BJP)లో చేరటం ఖాయమన్నారు.

బీజేపీని తట్టుకోవటం కాంగ్రెస్‌(Congress)తో అయ్యే పని కాదని చెప్పుకొచ్చారు. ఏబీవీపీ నుంచి రేవంత్ రెడ్డి రేపో మాపో బీజేపీలో చేరుతారంటూ వ్యాఖ్యానించారు. సీఎం రేవంత్ రెడ్డి (CM Revanth Reddy)పై అర్వింద్ ఇదివరకే ఇలాంటి వ్యాఖ్యలు చేశారు. తాజాగా బీజేవైఎం కార్యకర్తల సమావేశంలో ఈ విషయాన్ని పునరుద్ఘాటించారు. తెలంగాణలో కాంగ్రెస్‌ను ఖాళీ చేసి రేవంత్ రెడ్డి బీజేపీలో చేరుతారని అన్నారు.

కాంగ్రెస్ గెలిస్తే టెర్రరిస్టుల సీరియల్ బాంబ్ బ్లాస్ట్‌లు ఉంటాయని అర్వింద్ కీలక వ్యాఖ్యలు చేశారు. జగిత్యాల పీఎఫ్ఐకి, లవ్ జిహాద్‌కు అడ్డాగా మారుతుందని హెచ్చరించారు. గల్ఫ్ కార్మికుల కష్టాలకు కారణం కాంగ్రెస్సేనన్నారు. కాంగ్రెస్ గెలిస్తే హిందూ అమ్మాయిలను ఎత్తుకెళ్తారని అన్నారు. అదేవిధంగా 40 ఏళ్లుగా జగిత్యాలకు జీవన్ రెడ్డి చేసిందేమీ లేదన్నారు. తాను పసుపు బోర్డును తీసుకొచ్చానని చెప్పుకొచ్చారు.

45ఏళ్ళ తర్వాత కాంగ్రెస్ అభ్యర్థి జీవన్ రెడ్డికి ఎన్నారైల మీద ప్రేమ పుట్టుకొచ్చిందని విమర్శించారు. కనీసం పది వేల మంది ఎన్నారైల‌ు వాపస్ తీసుకురాకుంటే తన పేరు మార్చుకుంటానని అర్వింద్ సవాల్ చేశారు. రాష్ట్రంలో బీజేపీ బలపడకుండా కేసీఆర్ మాత్రమే కంట్రోల్ చేయగలిగాడని విమర్శించారు. ప్రస్తుతం బీజేపీని అడ్డుకోవటం కాంగ్రెస్ వల్ల కావటం లేదని ఎంపీ అర్వింద్ అన్నారు.