Breaking News

ఎన్నికల తేదీలు దగ్గర పడుతున్న కొద్ది రాజకీయ పార్టీలు (Political Parties) తమ ప్రచార వేగాన్ని పెంచుతున్నాయి. ఇప్పటికే కాంగ్రెస్ అగ్రనేత రాహుల్ గాంధీ (Rahul Gandhi) తెలంగాణలో వరుస పర్యటనలు చేస్తున్నారు. ఆయనతో పాటు ప్రియాంక గాంధీ, ఏఐసీసీ చీఫ్ మల్లికార్జున ఖర్గే కూడా ఇటీవల రాష్ట్ర పర్యటనకు వస్తున్నారు.

మరోవైపు బీజేపీ కూడా ప్రచార వేగాన్ని పెంచుతోంది. ఇప్పటికే ప్రధాని మోడీ తన పర్యటనతో రాష్ట్రంలో పొలిటికల్ హీట్ ను ఒక్కసారిగా పెంచారు. తాజాగా కేంద్ర హోం మంత్రి అమిత్ షా (Amit Shah) కూడా తెలంగాణ పర్యటనకు రానున్నారు. వాస్తవానికి షెడ్యూల్ ప్రకారం అమిత్ షా ఈ రోజు తెలంగాణకు రావాల్సి ఉంది. కానీ చివరి నిమిషంలో ఆయన పర్యటనలో మార్పులు చోటు చేసుకున్నాయి.

తాజా షెడ్యూల్ ప్రకారం అమిత్ షా రేపు రాష్ట్రానికి వస్తారని బీజేపీ వర్గాలు తెలిపాయి. రేపు మధ్యాహ్నం 12 గంటలకు ఆయన బేగం పేట విమానాశ్రయానికి చేరుకుంటారని చెప్పాయి. అనంతరం ఆయన గద్వాల్ చేరుకుంటారని పేర్కొన్నాయి. గద్వాల్ లో 12.50 కు నిర్వహించే బహిరంగ సభలో షా పాల్గొంటారని వెల్లడించాయి.

సభ అనంతరం ఆయన నల్గొండకు వెళ్తారని బీజేపీ తెలిపింది. ఆ తర్వాత వరంగల్ లో నిర్వహించే సభల్లో షా పాల్గొంటారని పేర్కొంది. అక్కడి నుంచి సాయంత్రం 6.10 గంటలకు హోటల్ క్షత్రియకు వెళ్తారు. అక్కడి నుంచి బీజేపీ ఎన్నికల మేనిఫెస్టోను ఆయన విడుదల చేయనున్నారని తెలిపింది. అనంతరం ఎంఆర్పీఎస్ నాయకులతో ఆయన భేటీ అవుతారని, సాయంత్రం 7:55 కి బేగంపేట విమానాశ్రయం నుంచి షా అహ్మదాబాద్ వెళ్తారని వివరించింది.

బీఆర్ఎస్‌ (BRS)పై బీజేపీ (BJP) రాష్ట్ర ఎన్నికల ఇన్ ఛార్జి, కేంద్ర మాజీ మంత్రి ప్రకాశ్ జవదేకర్ (Prakash Javadekar) తీవ్ర స్థాయిలో ఫైర్ అయ్యారు. ధరణి (Dharani)లో చాలా లోపాలు ఉన్నాయని ధ్వజమెత్తారు. అసలు ధరణి పోర్టల్ అతి పెద్ద స్కామ్ అని మండిపడ్డారు.

బీజేపీ తెలంగాణ చీఫ్ కిషన్ రెడ్డి, రాజ్యసభ ఎంపీ కే.లక్ష్మణ్‌తో కలిసి ప్రకాష్ జవదేకర్ మీడియా సమావేశాన్ని నిర్వహించారు. ఈ సందర్భంగా ఆయన మాట్లాడుతూ….. ధరణి పోర్టల్ నిర్వహణ ప్రైవేట్ కంపెనీకి ఎందుకు ఇచ్చారని ఆయన ప్రశ్నించారు. ధరణి నిర్వహణ బాధ్యతను తొలుత టీసీఎస్ ఇచ్చారని గుర్తు చేశారు.

కానీ ఆ తర్వాత ఆ బాధ్యతను ఐఎల్ఎఫ్ఎస్‌కు అప్పగించారని అన్నారు. వ్యక్తుల వ్యక్తిగత వివరాలను ప్రైవేట్ సంస్థ టెర్రాస్ సీఐఎస్ చేతిలోకి చేరిందని తీవ్ర ఆగ్రహం వ్యక్తం చేశారు. ధరణలో తలెత్తిన లోపాలపై ఎలాంటి ఫిర్యాదులు తీసుకోవడం లేదన్నారు. ఈ విషయంలో ధరణి బాధితుల నుంచి వాట్సాప్ ద్వారా ఫిర్యాదులు స్వీకరిస్తున్నామని చెప్పారు.

బాధితులుbjp@gmail.com,dharanicomplaints.bjp@gmail.com లేదా 9391936262, 7330861919నంబర్లకు వాట్సాప్‌ల ద్వారా ఫిర్యాదు చేయాలని కోరారు. బీజేపీ సర్కార్ వచ్చాక వారికి న్యాయం చేసేలా చర్యలు తీసుకుంటామని హామీ ఇచ్చారు. రాబోయే ఎన్నికల్లో తెలంగాణలో బీజేపీ అధికారంలోకి రాబోతోందన్నారు.

సినీ నటి, బీజేపీ (BJP) నేత విజయ శాంతి (Vijaya Shanthi) కాంగ్రెస్ తీర్థం పుచ్చుకున్నారు. ఆమెకు ఏఐసీసీ అధ్యక్షుడు మల్లికార్జున ఖర్గే (Mallikarjuna Kharge) కాంగ్రెస్ కండువా కప్పి పార్టీలోకి ఆహ్వానించారు. గత కొంత కాలంగా ఆమె బీజేపీపై అసంతృప్తితో ఉన్నారు. ఈ క్రమంలో ఈ నెల 15న ఆమె బీజేపీని వీడారు. తాజాగా ఆమె చేరికతో కాంగ్రెస్ మరింత బలోపేతం అవుతుందని కాంగ్రెస్ నేతలు వెల్లడించారు.

గతంలో ఆమె కాంగ్రెస్ నుంచి కాషాయ పార్టీలోకి వెళ్లారు. ఆ తర్వాత ఆ పార్టీలో ఆమె కీలక నేతగా వ్యవహరించారు. అనంతరం జరిగిన పరిణామాల నేపథ్యంలో ఆమె బీజేపీలో అంటీ ముట్టనట్టుగా వ్యవహరించారు. ఇటీవల ప్రధాని మోడీ, ఇతర జాతీయ నేతల సభలకు కూడా ఆమె గైర్హాజరు అవుతూ వచ్చారు.

ఈ క్రమంలో ఆమె పార్టీ మారతారంటూ వార్తలు వచ్చాయి. అయితే తాను పార్టీ మారడం లేదని గత కొన్ని రోజలుగా చెబుతూ వచ్చారు. ఇటీవల బీజేపీ-జనసేన మధ్య పొత్తులు కుదిరిన నేపథ్యంలో ఆమె బీజేపీకి రాజీనామా చేశారు. అనంతరం కేవలం రెండు రోజుల్లోనే ఆమె కాంగ్రెస్ తీర్థం పుచ్చుకోవం గమనార్హం.

కేసీఆర్ ను ఢీ కొట్టే సత్తా కేవలం కాంగ్రెస్ పార్టీకే ఉందని నమ్మడంతో ఆమె కాంగ్రెస్ లో చేరారు. ఆమెకు మెదక్ ఎంపీ సీటును కాంగ్రెస్ ఆఫర్ చేసినట్టు తెలుస్తోంది. దీంతో పాటు పార్టీలో సముచిత స్థానం ఇస్తామంటూ కాంగ్రెస్ అధిష్టానం నుంచి హామీ రావడంతో ఆమె కాంగ్రెస్ లోకి వెళ్లినట్టు తెలుస్తోంది.

తెలంగాణ (Telangana) ప్రజలను 58 ఏండ్ల పాటు కాంగ్రెస్ (Congress) ఇబ్బంది పెట్టిందని సీఎం కేసీఆర్ (CM KCR) అన్నారు. తెలంగాణను ఏపీలో కలిపింది కాంగ్రెస్సేనని తీవ్ర స్థాయిలో విరుచుకు పడ్డారు. బీజేపీకి మత పిచ్చి తప్ప మరేమీ లేదని మండిపడ్డారు. దేశంలో 157 వైద్య కళాశాలలను పెడితే అందులో తెలంగాణలో ఒక్కటి కూడా ఏర్పాటు చేయలేదని మండిపడ్డారు.

కరీంనగర్‌లో నిర్వహించిన ప్రజా ఆశీర్వాద సభలో సీఎం కేసీఆర్ పాల్గొని మాట్లాడారు. సుమారు ఆరు దశాబ్దాల పాటు తెలంగాణ ప్రజలను కాంగ్రెస్ ఇబ్బంది పెట్టిందన్నారు. 1969లో తెలంగాణ ఉద్యమకారులను అప్పటి కాంగ్రెస్‌ సర్కార్ పిట్టల్లాగా కాల్చి చంపిందని ఫైర్ అయ్యారు. కాంగ్రెస్ హయాంలో రాష్ట్రంలో పింఛన్ రూ. 200 ఉండేదన్నారు.

తమ ప్రభుత్వం వచ్చాక వందల్లో ఉన్న పింఛన్‌ను వేలల్లోకి పెంచామన్నారు. కంటి వెలుగు కార్యక్రమాన్ని చేపడుతారని ఎవరైనా ఊహించారా ? అని అడిగారు. కంటి వెలుగులో భాగంగా రాష్ట్రవ్యాప్తంగా కంటి పరీక్షలు ఉచితంగా నిర్వహించామన్నారు. 80 లక్షల మందికి అద్దాలు పంపిణీ చేశామని సీఎం గుర్తు చేశారు.

తెలంగాణ ఏర్పడిన సమయంలో తలసరి ఆదాయంలో దేశంలో మనం 19వ స్థానంలో ఉన్నామన్నారు. కానీ ఇప్పుడు తెలంగాణ ప్రథమస్థానంలో ఉందన్నారు. అటు తలసరి విద్యుత్‌ వినియోగంలోనూ మన రాష్ట్రం అగ్రస్థానంలో ఉందన్నారు. సాగునీటిపై గతంలో పన్ను ఉండేదన్నారు. కానీ తెలంగాణ ఏర్పాటయ్యాక దాన్ని రద్దు చేశామన్నారు.

ధరణి పోర్టల్‌ ద్వారా అద్భుతమైన ఫలితాలు వచ్చాయ పేర్కొన్నారు. ధరణి వచ్చాక దళారులు లేకుండా పోయారని వెల్లడించారు. ధరణి వల్ల రైతులు గడపదాటకుండానే వారి ఖాతాల్లో నగదు జమ అవుతోందన్నారు. ధరణిని బంగాళాఖాతంలో వేస్తామని రాహుల్‌ గాంధీ అంటున్నారని తీవ్ర స్థాయిలో విరుచుకు పడ్డారు.

ధరణిని తీసేస్తే రైతుబీమా, రైతుబంధు, ధాన్యం డబ్బులు ఎలా వస్తాయంటూ ఆయన ప్రశ్నించారు. ప్రజాస్వామ్య ప్రక్రియలో అనుకున్న స్థాయిలో పరిణితి రాలేదన్నారు. ప్రజాస్వామ్య ప్రక్రియలో పరిణితి వస్తేనే అభివృద్ధి జరుగుతుందన్నారు. అభ్యర్థుల గుణగణాలను విచారించిన తర్వాతే ఓటు వేయాలని సూచించారు.

గతంలో లోయర్‌ మానేరు డ్యామ్‌ ఎలా ఉండేదని ఆయన ప్రశ్నించారు. డ్యామ్‌ ఉన్నా తాగేందుకు నీళ్లు ఉండేవి కాదన్నారు. తెలంగాణ ఏర్పడ్డాక ఎల్‌ఎండీకి ప్రత్యేక నిధులు కేటాయించామన్నారు. కేంద్రం ఇవ్వకున్నా ఉమ్మడి కరీంనగర్‌ జిల్లాలో 4 వైద్య కళాశాలలను తమ ప్రభుత్వం ఏర్పాటు చేసిందన్నారు. చట్టం ప్రకారం ప్రతి జిల్లాలో ఒక నవోదయ పాఠశాల ఏర్పాటు చేయాలన్నారు. కానీ చట్టాలు ఉన్నప్పటికీ తెలంగాణకు ఒక్క నవోదయ పాఠశాల ఇవ్వలేదన్నారు.

రాబోయే రోజుల్లో రాష్ట్రంలో 24 గంట‌ల న‌ల్లా నీళ్లు అందేలా స్కీం ఏర్పాటు చేస్తున్నామన్నారు. గంగుల క‌మ‌లాక‌ర్ నేతృత్వంలో క‌రీంన‌గ‌ర్ ప‌ట్ట‌ణం చాలా సుంద‌రంగా మారిందన్నారు. ఇప్పుడు క‌రీంన‌గ‌ర్‌ ను నగరం అని పిలవాలని అనిపిస్తోందన్నారు. గంగుల క‌మ‌లాక‌ర్ చాలా మొండి మ‌నిషి, ఆయన ప‌ట్టిన ప‌ట్టు అసలు విడ‌వ‌డన్నారు. అందుకే ఆ మానేరు రివ‌ర్ పంట్ర్ క‌ట్టిస్తున్నాడు.

తెలంగాణలో 24 గంటల కరెంట్ కేవలం కేసీఆర్ ఇంట్లో మాత్రమే వస్తోందని కాంగ్రెస్ అగ్రనేత రాహుల్ గాంధీ అన్నారు. పదేండ్లుగా తెలంగాణను కేసీఆర్ కుటుంబం దోచుకుందని తీవ్రంగా మండిపడ్డారు. కాళేశ్వరం ప్రాజెక్టు పేరుతో లక్ష కోట్లను దోచుకున్నారని ఆయన ఆరోపించారు. ఇప్పుడు ఆ దోపిడీకి అంతం పలికే రోజు వచ్చిందన్నారు.

పినపాకలో ఎన్నికల ప్రచారంలో రాహుల్ గాంధీ పాల్గొన్నారు. ఈ సందర్బంగా ఆయన మాట్లాడుతూ…. కాంగ్రెస్ అధికారంలోకి వచ్చాక మహిళలు ఆర్టీసీ బస్సుల్లో ఉచితంగా ప్రయాణించ వచ్చని కాంగ్రెస్ అగ్రనేత రాహుల్ గాంధీ అన్నారు. తమ ప్రభుత్వం వస్తే రూ. 500లకే గ్యాస్ సిలిండర్ ఇస్తామని హామీ ఇచ్చారు. ప్రతి నెలా మహిళల అకౌంట్లలో రూ. 2,500 జమచేస్తామన్నారు.

కాళేశ్వరం పరిస్థితి ఎలా ఉందో తానే స్వయంగా వెళ్లి చూశానన్నారు. ప్రాజెక్టు పేరిట లక్ష కోట్లు దోచుకున్నారంటూ ఆరోపణలు గుప్పించారు. కేసీఆర్ అవినీతిని ప్రజలు అర్థం చేసుకున్నారని అన్నారు. రాష్ట్రానికి కాంగ్రెస్ ఏం చేసిందని కేసీఆర్, కేటీఆర్ అడుగుతున్నారని చెప్పారు. మీరు చదివిన స్కూల్, నడిచే రోడ్డు కూడా కాంగ్రెస్ వేసిందేనన్నారు. కేసీఆర్ ఎన్ని లక్షల కోట్ల అవినీతి చేశారో ఆ మొత్తాన్ని ప్రజల అకౌంట్లలో వేస్తామన్నారు.

తెలంగాణలో కాంగ్రెస్‌ తుపాన్‌ మొదలైందన్నారు. ఆ విషయం సీఎం కేసీఆర్‌కు అర్థమైందన్నారు. కాంగ్రెస్‌ తుపాన్‌లో కేసీఆర్‌, బీఆర్‌ఎస్‌ కొట్టుకుపోతుందన్నారు. తెలంగాణ రాష్ట్రం కేవలం ఒక కుటుంబం కోసమే ఏర్పడలేదన్నారు. బీఆర్‌ఎస్‌, బీజేపీ, ఎంఐఎం.. మూడు పార్టీలు ఒక్కటేనన్నారు. ఎక్కడ కాంగ్రెస్‌, బీజేపీ పోటీ ఉంటుందో అక్కడ కాంగ్రెస్‌ ఓట్లను చీల్చేందుకు ఎంఐఎం వస్తుందన్నారు.

బీఆర్ఎస్ రాకముందే హైదరాబాద్ ను ఐటీ క్యాపిటల్ గా కాంగ్రెస్ చేసిందన్నారు. ఇది దొరల తెలంగాణ, ప్రజల తెలంగాణకు మధ్య పోరాటం అన్నారు. అసలు తెలంగాణ రాష్ట్రాన్ని ఇచ్చిందే తమ పార్టీ అని తెలిపారు. తమ ప్రభుత్వం అధికారంలోకి రాగానే ఆరు గ్యారెంటీలను అమలు చేస్తామన్నారు. తెలంగాణ ప్రజల ఆకాంక్షను తమ ప్రభుత్వం నెరవేరుస్తుందన్నారు.

కాంగ్రెస్‌ అంటే కుటుంబ పాలన కాదని స్పష్టం చేశారు. తమది ప్రజా ప్రభుత్వమన్నారు. ధరణి పేరుతో 20 లక్షల మంది రైతులను కేసీఆర్ మోసం చేశారంటూ ఫైర్ అయ్యారు. ధరణితో మోసపోయిన రైతులకు వాళ్ల భూములు వాళ్లకు ఇప్పిస్తామన్నారు. తెలంగాణలో కులగణనను జరిపిస్తామన్నారు. స్థానిక సంస్థల్లోనూ బీసీల రిజర్వేషన్లు పెంచుతామన్నారు.