Breaking News

ఈ సంవత్సరం రాజకీయ నాయకులకు అంతగా కలిసి వస్తలేనట్టు ఉంది. నేతలకు ప్రమాదాలు, వారి పై దాడులు ఎన్నికలు మొదలైనప్పటి నుంచి జరగడం కనిపిస్తుంది. ప్రస్తుతం బీఎస్పీ (BSP) తెలంగాణ (Telangana) అధ్యక్షుడు ఆర్ఎస్ ప్రవీణ్ కుమార్‌ (RS Praveen Kumar)కి తృటిలో పెద్ద ప్రమాదం తప్పింది. ప్రవీణ్ కుమార్‌ ఎన్నికల ప్రచారానికి వెళ్తుండగా ఈ ప్రమాదం జరిగినట్లు తెలుస్తోంది.

కాగా ప్రవీణ్ కుమార్‌ ప్రయాణిస్తున్న కారుని వెనక నుంచి లారీ ఢీకొట్టినట్టు సమాచారం. ఈ ప్రమాదంలో ప్రవీణ్ కుమార్‌ తో పాటు ఎవరికి ఎటువంటి గాయాలు కాలేదని తెలుస్తుంది. మరోవైపు ప్రమాద సమాచారం అందుకున్న పోలీసులు లారీ డ్రైవర్‌ని అరెస్ట్ చేసి పోలీస్ స్టేషన్‌కి తరలించారు. ఈ ఘటనకు సంబంధించి పూర్తి వివరాలు తెలియాల్సి ఉంది.

మరోవైపు ఆర్ఎస్ ప్రవీణ్ కుమార్‌ పలు గ్రామాల్లో ఎన్నికల ప్రచారం నిర్వహిస్తున్నారు. ఈ క్రమంలో బీఆర్ఎస్ (BRS) పాలనపై తీవ్ర వ్యతిరేకతను వెల్లడిస్తున్న విషయం తెలిసిందే. బీఆర్ఎస్ పాలనలో రాష్ట్రం నాశనం అయ్యిందన్న ప్రవీణ్ కుమార్‌.. బీఆర్ఎస్, బీజేపీ (BJP) కూటమి కుట్రల నుంచి తెలంగాణను కాపాడతానని శపథం చేశారు.

మరోవైపు ఎమ్మెల్యే వాహనం నుంచి తాను రూ. 25 వేలు దొంగిలించానని కోనప్ప డ్రైవర్ ఫిర్యాదు చేయడం సిగ్గుచేటని అన్నారు. 26 ఏళ్లు ఎటువంటి మచ్చలేకుండా సేవ చేసిన ఓ రిటైర్డ్ ఐపీఎస్ అధికారి రూ. 25 వేలు దొంగతనం చేస్తాడా? అని ప్రశ్నించారు. కేసీఆర్ దుష్పరిపాలనకు ఇదో మచ్చుతునక అని విమర్శించారు. ఇలాంటి తప్పుడు కేసులు తనను భయపెట్టలేవని ప్రవీణ్ కుమార్ వెల్లడించారు..

అసెంబ్లీ ఎన్నికల (Assembly elections) నేపథ్యంలో నేతల మాటలు కోటలు దాటుతున్నాయని అనుకుంటున్నారు. బరిలో ఉన్న అభ్యర్థులు నోటికి పనిచెబుతుంటే.. అనుచరగణం చేతులకు పని చెప్పడం కనిపిస్తుంది. ఈ క్రమంలో పలుచోట్ల గొడవలు కూడా జరుగుతున్నాయి. అయితే తాజాగా కొడంగల్ (Kodangal)లో కాంగ్రెస్ (Congress) బీఆర్ఎస్ (BRS) నేతల మధ్య వార్ మొదలవడంతో హైటెన్షన్ వాతావరణం నెలకొంది.

ఉప్పల్ (Uppal)కు చెందిన బీఆర్ఎస్ నేత సోమశేఖర్ రెడ్డి 100 మంది అనుచరులతో కలిసి కోస్గి మండల పరిధిలోని సర్జఖాన్ పేట్ గ్రామంలో కాంగ్రెస్ నేతలపై దాడికి దిగినట్టు సమాచారం. దీంతో అక్కడ ఉద్రిక్తత పరిస్థితులు నెలకొన్నాయి. మరోవైపు విషయం తెలుసుకుని సర్జఖాన్ పేట గ్రామానికి పెద్ద ఎత్తున కాంగ్రెస్ నేతలు తరలిరావడంతో వారిని చూసిన సోమశేఖర్ రెడ్డి, అతని అనుచరులు పారిపోయారని తెలుస్తుంది.

ఇక ఎన్నికలకు సమయం అతి తక్కువ ఉండటంతో ముఖ్య నేతలంతా ప్రచారంలో నిమగ్నం అయ్యారు.. ఎన్నికలు అయ్యే వరకు విమర్శలు చేసుకుంటున్న నేతలు అనంతరం ఎవరి దారి వారు చూసుకుంటారని తెలిసిందే.. మరి కార్యకర్తలు మధ్యలో ఎందుకు తన్నుకు చావడం అని ఇప్పటి రాజకీయ పరిస్థితులను అవగతం చేసుకున్న వారు అనుకుంటున్నారు.

– బీఆర్ఎస్ హ్యాట్రిక్ పక్కా
– ఒకప్పుడు తెలంగాణ ఎలా ఉండేది?
– ఇప్పుడు రాష్ట్ర ఏ తీరుగా ఉంది?
– జనం ఆలోచన చేయాలి
– కాంగ్రెస్ గెలిస్తే మళ్లీ కష్టాలే
– ధరణి ఉంటేనే రైతు బంధు, రైతు బీమా
– కాంగ్రెస్ అధికారంలోకి వస్తే మళ్లీ దళారులదే రాజ్యం
– పాలకుర్తి, హాలియా, ఇబ్రహీంపట్నంలో కేసీఆర్ సభలు

బీఆర్ఎస్ (BRS) హ్యాట్రిక్ కొట్టడం ఖాయమని ధీమా వ్యక్తం చేశారు సీఎం కేసీఆర్ (CM KCR). ఎన్నికల ప్రచారంలో భాగంగా పాలకుర్తి, హాలియా, ఇబ్రహీంపట్నంలో బీఆర్ఎస్ ప్ర‌జా ఆశీర్వాద స‌భ‌లు జరిగాయి. వీటిలో పాల్గొని ప్రసంగించారు సీఎం. ఎన్నికలు అనగానే ఎందరో వస్తున్నారు.. ఏవేవో మాట్లాడుతున్నారని ఆగమాగం కావొద్దని ప్రజలకు సూచించారు. ఓటు వేసేముందు అన్నీ ఆలోచించి వేయాలని చెప్పారు. మంది మాటలు విని ఆగమైతే ఐదేళ్లపాటు కష్టాల పాలవుతారని అన్నారు. నిజానిజాలు గమనించి ఓటు వేయాలని కోరారు.

బీఆర్ఎస్ పుట్టింది తెలంగాణ కోసమని, తెలంగాణ ప్రజల కోసమేనని కేసీఆర్ తెలిపారు. మళ్లీ అధికారంలోకి రాగానే రైతుబంధు రూ.16 వేలు ఇస్తామని చెప్పారు. కాంగ్రెస్ (Congress) ప్రభుత్వం ఉన్నప్పుడు తెలంగాణ ఎలా ఉందో.. బీఆర్ఎస్ ప్రభుత్వంలో పాలన ఎలా ఉందో ఆలోచించాలని పేర్కొన్నారు. 50 ఏళ్లు కాంగ్రెస్ అధికారంలో ఉండే ఏం చేసిందో ప్రజలకు తెలుసన్నారు. ఈ ఎన్నికల్లో ఆ పార్టీ గెలిస్తే రైతుబంధు మాయమవుతుందని.. 3 గంటల కరెంట్ చాలని రేవంత్ రెడ్డి (Revanth Reddy) అంటున్నారని మండిపడ్డారు. కాంగ్రెస్ గెలిస్తే 24 గంటల కరెంట్ ఉంటుందా? అని ప్రశ్నించారు.

‘‘నాక‌న్న దొడ్డుగా, ఎత్తుగా ఉన్న‌వారు ముఖ్య‌మంత్రులు అయ్యారు. పెద్ద పెద్ద మాట‌లు మాట్లాడితే స‌రిపోదు. క‌నీసం మంచినీళ్లు ఎందుకు ఇవ్వ‌లేదు. కృష్ణా, గోదావ‌రి న‌దుల మ‌ధ్య ఉన్న ఈ ప్రాంతానికి నీళ్లు ఇచ్చిన పాపాన పోలేదు. లంబాడీ బిడ్డ‌లు మా తండాలో మా రాజ్యం కావాలంటే ప‌ట్టించుకోలేదు. పాలకుర్తి నియోజకవర్గంలో 49 తండాల‌ను పంచాయ‌తీలుగా ఏర్పాటు చేశాం. అదే విధంగా గిరిజ‌న రిజ‌ర్వేష‌న్లు 10 శాతం పెంచుకున్నాం. ద‌ళిత‌బంధు మాదిరిగానే గిరిజ‌న బిడ్డ‌లు కూడా భూమి, ఉద్యోగం లేకుండా ఉంటే వారికి కూడా గిరిజ‌న బంధు ఇస్తామ‌ని చెప్పాం. త‌ప్ప‌కుండా అమ‌లు చేస్తాం. ఈ దేశంలో ఏ ప్ర‌ధాని అయినా, ముఖ్య‌మంత్రి అయినా, ఏ పార్టీ అయినా ద‌ళితుల గురించి ఆలోచించారా? ఓటు బ్యాంకుగా వాడుకున్నారు. కానీ, మేము ద‌ళిత‌బంధు ప‌థ‌కాన్ని పుట్టించాం. విడ‌త‌ల పథకం అమలవుతుంది’’ అని తెలిపారు కేసీఆర్.

బీఆర్ఎస్ పాలనలో రాష్ట్రం అభివృద్ధి పథంలో దూసుకెళ్లిందని.. ఇక్కడి సదుపాయాలన్నీ ఏ రాష్ట్రంలో కూడా లేవన్నారు సీఎం. తాము తెచ్చినవన్నీ కాంగ్రెస్ వాళ్లు తీసివేస్తామని చెబుతున్నారని.. అందుకే ఆలోచించి ఓటు వేయాలని, ఓడగొట్టుకుంటే తాను ఏమీ చేయలేనని అన్నారు. ఇవన్నీ కూడా వారు చాటుగా చెప్పడం లేదని, ఓపెన్‌ గానే చెబుతున్నారని.. ధరణి తీసి బంగాళాఖాతంలో వేస్తామని చెబుతున్నారని, అది ఎందుకోసం పెట్టామో అందరూ ఆలోచన చేయాలని, ఈ విషయాలపై చర్చ చేయాలని కోరారు.

బీఆర్ఎస్ గెలుపును ఎవరూ ఆపలేరన్నారు కేసీఆర్. కంటి వెలుగు పథకాన్ని గతంలో ఎవరైనా ఆలోచించారా..? అని ప్రశ్నించారు. పొరపాటున కాంగ్రెస్ వస్తే కరెంటు పోవడం ఖాయమన్నారు. చరిత్రలో ఎవరూ చేయనన్ని అభివృద్ధి కార్యక్రమాలు, సంక్షేమ పథకాలను తీసుకొచ్చామని.. ధరణి ఉంటేనే రైతు బంధు, రైతు బీమా వస్తుందని చెప్పారు. తీసేస్తే ఎలా అని ప్రశ్నించారు. కాంగ్రెస్ అధికారంలోకి వస్తే మళ్లీ దళారుల రాజ్యం వస్తుందని ఆరోపించారు. తాము అధికారంలోకి వచ్చిన తర్వాతే పెన్షన్లు పెంచామన్నారు. ఎవరు మంచి చేస్తారో.. ఎవరు చెడు చేస్తారో ప్రజలందరూ ఆలోచన చేయాలని పిలుపునిచ్చారు సీఎం.

ఈ భూమి మీద ఏది శాశ్వతం కాదు అన్న సత్యం తెలియని వారు ఉండరు.. కానీ రాజకీయ నేతలు ఈ మాట అసలు డిక్షనరీలో ఉందా! అనేటట్టుగా ప్రవర్తిస్తున్నారని జనం అనుకుంటున్నారు. ఆవినీతిగా సంపాదించడానికి బీఆర్ఎస్ (BRS) పార్టీ అడ్డాగా మారిందని జనం ఆగ్రహిస్తున్నారు.. ఈ క్రమంలో ఎన్నికల ప్రచారానికి వెళ్ళిన నేతలకు చుక్కలు చూపిస్తున్నారు ఓటర్లు.

తాజాగా కాగజ్‌ నగర్‌ ఎమ్మెల్యే కోనేరు కోనప్ప (MLA Koneru Konappa) ఎన్నికల ప్రచారంలో భాగంగా కొమరం భీం (Komaram Bheem) ఆసిఫాబాద్ (Asifabad) జిల్లా దహేగం మండలం తెనుగుపల్లి గ్రామం వెళ్లారు.. అక్కడి స్థానికులు గ్రామానికి రోడ్డు వేయలేదని ఎమ్మెల్యేను అడ్డుకున్నారు. మా గ్రామానికి రోడ్డు వేస్తానని హామీ ఇచ్చిన నాయకులు 15 సంవత్సరాలుగా రోడ్డు వేయడం లేదని ఆరోపించారు.

అభివృద్థి చేయడం చేతకాని నాయకులు ఓట్ల కోసం రావద్దంటూ ఎదురు తిరిగారు. మరోవైపు 15 సంవత్సరాలుగా కోనప్ప ఎమ్మెల్యే పదవి వెలగబెట్టి ఏం సాధించావని, భీమిని మండలం చిన్నగుడిపేట గ్రామస్తులు సైతం ప్రశ్నించారు. ఇదిలా ఉండగా రంగారెడ్డి (Rangareddy) జిల్లా, గండిపేట్ మండలం, వట్టినాగులపల్లి (Vattinagula Palli)లో బీఆర్ఎస్ నేతల ప్రచారాన్ని గ్రామస్తులు అడ్డుకున్నారు.

విప్రోలో భూములు కోల్పోయిన వారికి న్యాయం చేయలేని.. బీఆర్ఎస్ నాయకులు ఏ మొహం పెట్టుకొని ప్రచారానికి వస్తున్నారని స్థానిక ప్రజలు నిలదీశారు. డబుల్ బెడ్ రూమ్, దళితబంధు రాలేదని ఆగ్రహం వ్యక్తం చేశారు. బీఆర్ఎస్ నేతలు మా గ్రామంలో అడుగుపెట్ట వద్దని ఎమ్మెల్యే ప్రకాష్ గౌడ్‌కు వ్యతిరేకంగా నినాదాలు చేశారు. చూశారా ఇది బీఆర్ఎస్ ముఖచిత్రం.. కానీ ఏదో సాధించినట్టు.. బీఆర్ఎస్ లేకుంటే తెలంగాణ లేదని ప్రచారాలు చేసుకుంటున్న వారికి సిగ్గు ఉండాలని అవస్థలు పడుతున్న జనం శాపనార్థాలు పెడుతున్నారు..

బీఆర్ఎస్ (BRS) నేతలు గల్లీల్లో తిరుగుతుంటే జనమే నిలదీస్తున్నారన్నారు బీజేపీ జాతీయ ప్రధాన కార్యదర్శి బండి సంజయ్ (Bandi Sanjay). కరీంనగర్ (Karimnagar) లోని రామచంద్రాపూర్ కాలనీలో ఎన్నికల ప్రచారం నిర్వహించారు. ఈ సందర్భంగా మాట్లాడుతూ.. గులాబీ నేతలు ఓటుకు రూ.10 వేలు పంచేందుకు సిద్ధమయ్యారని ఆరోపించారు. అబద్ధాలు చెప్పడంలో గంగుల కమలాకర్ (Gangula Kamalakar) ఎక్స్ పర్ట్ అని విమర్శించారు.

తాను గెలవకుండా ఉండేందుకు కుట్రలు చేస్తున్నారని అన్నారు సంజయ్. 3వ తారీఖున కేసీఆర్ మాజీ ముఖ్యమంత్రి కావడం ఖాయమని హెచ్చరించారు. రాబోయేది పేదల ప్రభుత్వమని.. బీజేపీ అధికారంలోకి వస్తుందని ధీమా వ్యక్తం చేశారు. కరీంనగర్ కు 196 కోట్ల రూపాయలు తీసుకొచ్చి అభివృద్ధి చేశానన్నారు. నగరంలోని రోడ్లన్నీ మోడీ (Modi) సర్కార్ వేయించినవేనని తెలిపారు. నిధులు తీసుకొచ్చేది తాను అయితే.. కేసీఆర్, గంగుల వాళ్ల ఫోటోలు పెట్టుకుని ఫోజులు ఇస్తున్నారని విమర్శించారు.

కేంద్ర ప్రభుత్వం నిధులు ఇస్తేనే రాష్ట్రంలో అభివృద్ధి జరిగిందన్న బండి.. డబుల్ బెడ్రూం ఇళ్లను ఇస్తానని ప్రజలను కేసీఆర్ మోసం చేశారని ఆరోపించారు. ఓటు వేసే ముందు కరీంనగర్ ప్రజలు, యువత.. బీఆర్ఎస్ ప్రభుత్వం ఏం చేసిందో ఒక్కసారి ఆలోచించాలన్నారు. భారీ మెజార్టీతో బీజేపీని గెలిపిస్తే అన్ని విధాలుగా అండగా ఉంటామని పేర్కొన్నారు. కమలం పార్టీ బీసీలకు పెద్దపీట వేస్తోందని.. రాష్ట్ర జనాభాలో సగ భాగం ఉన్న బీసీ అభ్యర్థిని ముఖ్యమంత్రిని చేస్తామని తెలిపారు.

కాంగ్రెస్​, బీఆర్​ఎస్​ లు బీసీ వ్యక్తిని ముఖ్యమంత్రిని చేస్తామంటే ఓర్వలేకపోతున్నాయని మండిపడ్డారు బండి. గులాబీ పాలనలో నిరుద్యోగుల బతుకులు ఆగమయ్యాయని.. రాష్ట్రం అప్పులకుప్పగా మారిందని.. ప్రభుత్వ ఉద్యోగులకు, పెన్షన్​ దారులకు ఒకటో తారీఖున జీతాలు వచ్చే పరిస్థితి లేదన్నారు. బీఆర్ఎస్, కాంగ్రెస్ నేతలది భూకబ్జాలు, అవినీతి లొల్లి అని విమర్శించారు. ఇసుక కుప్పలు కన్పిస్తే డబ్బులు వసూలు చేస్తున్నారని.. ఖాళీ జాగాలు కన్పిస్తే కబ్జాలు చేస్తున్నారన్నారు. యువతను మంత్రి గంగుల కమలాకర్ గంజాయి మత్తులో ముంచుతున్నారని సంచలన ఆరోపణలు చేశారు. గంగుల ఓటమి ఖాయమని.. అందుకే, ఒవైసీ వద్ద మోకరిల్లి పచ్చజెండా పట్టుకున్నారని విమర్శించారు బండి సంజయ్.

పిల్లి కళ్ళు మూసుకుని పాలుతాగుతూ తనని ఎవరు చూడటం లేదని భావిస్తుంది. అలాగే రాజకీయనేతలు కూడా వివిధ మార్గాలలో పార్టీ ఫండ్ సేకరించుకుంటూ ఇంత కాలం గడిపారని అనుకుంటున్నారు.. కానీ ఆ పప్పులు ఉడకనీయకుండా చేయడానికి ఎలక్షన్ కమిషన్ (Election Commission) రంగంలోకి దిగింది. ఇప్పటి వరకు ఎలక్టోరల్ బాండ్ల (Electoral bonds) ద్వారా పార్టీలకు అందుతున్న విరాళాల వివరాలన్నీ గోప్యంగానే ఉండిపోయాయి.

తాజాగా సుప్రీంకోర్టు (Supreme Court) అసోసియేషన్ ఆఫ్ డెమొక్రటిక్ (Association of Democrats) రిఫామ్స్ దాఖలు చేసిన పిటిషన్‌ను విచారించిన అనంతరం ఎలక్షన్ కమిషన్ ను రంగంలోకి దిగాలని ఆదేశాలు ఇచ్చింది. సుప్రీంకోర్టు ఆదేశాలతో రంగంలోకి దిగిన ఈసీ.. ఈ నెల 3న దేశంలో గుర్తింపు పొందిన అన్ని రాజకీయ పార్టీలకు అందిన డోనర్ల వివరాలను, వారు విరాళంగా ఇచ్చిన మొత్తాన్ని సీల్డ్ కవర్‌లో సమర్పించాలంటూ లేఖలు రాసింది.

పూర్తి వివరాలను నవంబరు 15వ తేదీ వరకు అందజేయాలని ఆదేశించింది. ఈ వివరాలు లీక్ కాకుండా ఉండేందుకు డబుల్ సీల్డ్ కవర్‌లో సమర్పించాలన్న ఈసీ.. కవర్ మీద కాన్ఫిడెన్షియల్ –ఎలక్టోరల్ బాండ్ అని పేర్కొనాలని వెల్లడించింది. మరోవైపు ఎవరి నుంచి ఏ పార్టీకి ఎంత అందిందనేది ఈసీ నిర్ణయంతో వెలుగులోకి రానున్నదని తెలుస్తుంది. ఇదే జరిగితే ఏ పార్టీ అకౌంట్ లో ఎంత జమైందో అనే విషయాలు పబ్లిక్‌కు తెలిసేలా బహిర్గతమవుతాయనే చర్చ సాగుతుంది.