Breaking News

కాళేశ్వరం (Kaleswaram) ఎత్తిపోతల ప్రాజెక్టులో భాగంగా నిర్మించిన మేడిగడ్డ (Medigadda) లక్ష్మీ బ్యారేజీ (Lakshmi Barrage) పిల్లర్లు కుంగడం స్థానికంగా కలకలం రేపింది. రాజకీయాల్లో తీవ్ర చర్చకు దారి తీసింది. ప్రతిపక్షాలకు ఈ ఘటన బలమైన ఆయుధంగా మారింది. మరోవైపు లక్ష్మీ బ్యారేజీ పై స్పందించిన కేంద్రం రంగంలోకి దిగి ఓ కమిటీని మేడిగడ్డ లక్ష్మీ బ్యారేజీ పరిశీలనకు పంపింది.

కాగా నేషనల్‌ డ్యామ్‌ సేఫ్టీ అథారిటీ ఛైర్మన్‌ అనిల్‌ జైన్‌ నేతృత్వంలో ఏర్పాటైన ఈ కమిటీ.. రాష్ట్ర నీటిపారుదల శాఖ ఇంజినీర్లతో బుధవారం భేటీ అయింది. మేడిగడ్డ ఆనకట్ట కుంగిన వ్యవహారంపై కేంద్ర బృందం ఇంజినీర్లతో చర్చించింది. ఆనకట్టకు సంబంధించిన సాంకేతిక అంశాలపై విస్తృతంగా చర్చించింది. ఈ సమావేశంలో తెలంగాణ (Telangana) ఈఎన్‌సీలు మురళీధర్‌, నాగేంద్రరావు, వెంకటేశ్వర్లు, ఓఎస్‌డీ శ్రీధర్ దేశపాండే, ఎల్ అండ్‌ టీ ప్రతినిధులు భేటీలో పాల్గొన్నారు..

ఇక సమావేశం అనంతరం తెలంగాణ ఇంజినీర్‌ ఇన్‌ చీఫ్‌ మురళీధర్‌ కీలక విషయాన్ని వెల్లడించారు. మేడిగడ్డ ఆనకట్ట నిర్మాణంలో లోపాలు లేవని తెలిపారు.. ఏడో బ్లాక్‌లో సమస్య వల్ల సెంటర్‌ పియర్‌ కుంగిందని అన్నారు.. ఈ సమస్య ఎక్కడ జరిగిందో తెలుసుకోవడానికి కాపర్‌ డ్యామ్‌కు వరద తగ్గాక నవంబర్‌ చివరలో ఘటనపై సమగ్ర పరిశీలన చేస్తాం అని మురళీధర్‌పేర్కొన్నారు.

క్వాలిటీ ఆఫ్ సాండ్, క్వాలిటీ ఆఫ్ కన్‌స్ట్ర‌క్ష‌న్‌పై అనుమతులు ఉన్నాయి. అయినా ఇసుక‌ వల్ల సమస్య వచ్చిందని అనుకుంటున్నాం అని వెల్లడించారు. మరోవైపు పిల్ల‌ర్ కుంగుబాటు వ‌ల్ల కాళేశ్వ‌రం ఆయ‌క‌ట్టుకు ఎలాంటి ఢోకా లేద‌ని, య‌థావిధిగా సాగునీటిని అందించే అవ‌కాశం ఉన్న‌ద‌ని ఇరిగేష‌న్ శాఖ ఉన్న‌తాధికారులు ఇప్పటికే తెలిపారు..

తెలంగాణ (Telangana) రాష్ట్రాన్ని అభివృద్ధి చేశామని అధికార పార్టీ ఒకవైపు.. అసలు అభివృద్ధి జరగలేదని ప్రతిపక్షాలు మరోవైపు వాదించుకుంటున్నాయి. మా అభివృద్ధి చూసి ప్రజలు మాకే ఓటు వేస్తారని బీఆర్ఎస్ నేతలు ధీమాగా ఉన్నారు..మరి ప్రచారానికి వెళ్ళిన వారికి నిరసనలు ఎందుకు ఎదురవుతున్నాయో..! అనే అనుమానాలు కొందరిలో కలుగుతున్నాయి.

మరోవైపు నిర్మల్ (Nirmal)జిల్లా లోకేశ్వరం (Lokeswaram) మండలంలో ముధోల్ ఎమ్మెల్యే (Mudhol MLA)కు ప్రజలు ఊహించని షాక్ ఇచ్చారు. ప్రచారానికి వచ్చిన వీరిని పొలిమెరలో అడ్డుకుని దాదాపు మూడు గంటలకు పైగా రోడ్డుపైనే నిలబెట్టి తిప్పి పంపించారు. తొమ్మిదేళ్లలో మీరు చేసిన అభివృద్ధి ఏదో చూపించాలని నిలదీశారు. ముధోల్ ఎమ్మెల్యే విట్టల్ రెడ్డి (Vitthal Reddy) అర్హులైన పేదలకు దళిత బంధు, బీసీ బంధు ఇవ్వకుండా అనుచరులకు ఇచ్చారని ఆగ్రహం వ్యక్తం చేశారు.

మరోవైపు వారి సమస్యలపై స్పందించిన ఎమ్మెల్యే.. గ్రామస్తులను బుజ్జగించేందుకు ప్రయత్నించారు. ఎడ్దూర్, పొట్‌పెల్లి గ్రామస్తులు సహకరించాలని కోరారు. అయినా గ్రామస్తులు శాంతింకపోవడంతో ఎమ్మెల్యేతో పాటు నాయకులు వెనుదిరిగి వెళ్లిపోయారు. మనలో మన మాట.. ప్రజల కోసం ఆలోచించి.. పనిచేసే నాయకుడు వస్తే హారతులు పట్టి స్వాగతం పలకాలి గాని ఇలా ఎదురు తిరుగుతూ ఉన్నారంటే అర్ధం ఏంటి ? అని కొందరు బుర్ర పగిలేలా ఆలోచిస్తున్నారు..

తెలంగాణలో రాజకీయాలన్నీ రాష్ట్ర అభివృద్ధి చుట్టే తిరుగుతున్నాయని అనుకుంటున్నారు. ప్రచారాల్లో నేతలు కూడా ఈ విషయాన్నే ప్రస్తావిస్తూ ప్రచారాలు నిర్వహిస్తున్నారని కొందరు అంటున్నారు. మరోవైపు మంత్రి గంగుల కమలాకర్ (Gangula Kamalakar) కరీంనగర్ (Karimnagar)లోని బొమ్మకల్ (Bommakal)నుంచి ఎన్నికల ప్రచారం ప్రారంభించారు. ఈ సందర్భంగా పలు కీలక వ్యాఖ్యలు చేశారు..

తెలంగాణ రాష్ట్రం రాకముందు అభివృద్ధి శూన్యం.. కరెంటు నీళ్లు లేక రైతులు అష్ట కష్టాలు పడేవారు.. కరెంటు ఎప్పుడు వస్తుందని కళ్ళల్లో వత్తులేసుకొని కాపలా కాసే వారు.. సరైన ఉపాధి లేక కరువు కాటకాలతో రైతులంతా దుబాయ్ కి వలసలు వెళ్లారు అని మంత్రి గంగుల కమలాకర్ తెలిపారు. అలాంటి రాష్ట్రాన్ని అన్నీ రంగాలలో కేసీఆర్ అభివృద్ధి చేశారని గుర్తు చేశారు..

కరీంనగర్ ప్రజలు 2009లో నన్ను గెలిపించి ఆశీర్వాదం అందించారు.. కరీంనగర్ చరిత్రలో ఎవరికి లేని అదృష్టం నాకే దక్కించారు.. మూడోసారి కూడా నన్ను అత్యధిక మెజార్టీతో గెలిపించారు.. ఈ సారి కూడా నా గెలుపు మీ చేతుల్లో పెడుతున్నా అని గంగుల అన్నారు. ఇక మొదటి ప్రచారం బొమ్మకల్ నుండి చేయడం ఆనవాయితీ.. అందుకే కాలువ నరసయ్య ఇంట్లో నుంచి ప్రచారం మొదలు పెట్టానని గంగుల కమలాకర్ తెలిపారు..

మరోవైపు బీజేపీ, కాంగ్రెస్ చేతులలో తెలంగాణ పెడితే అభివృద్ధి కుంటుపడుతుంది అని విమర్శించారు.. ఈ ఎన్నికల్లో ఢిల్లీ పార్టీలకు బుద్ధి చెప్పాలి అని గంగుల కోరారు. అయితే ఈ ప్రచారంలో గంగుల మరోసారి పదవిని అలంకరించాలనే ఆశపడుతున్నట్టు తెలుస్తుందని బయట గుసగుసలు వినిపిస్తున్నాయి..

తెలంగాణ (Telangana)లో కాంగ్రెస్ (Congress) బీఆర్ఎస్ (BRS) పార్టీల మధ్య కత్తులు లేకుండా యుద్ధం నడుస్తుంది. ఈ పొలిటికల్ వార్ లో నేతల మాటలు పదునైన ఆయుధంగా మారుతున్నాయి అనడానికి ఎన్నికల ప్రచారాల్లో వినిపిస్తున్న విమర్శలు చాలు.. ఈ పార్టీల్లోని ముఖ్య నేతలంతా ఒకరిపై ఒకరు సెన్సార్ కటింగ్ లేకుండా దూషించుకుంటున్నారు.

మరోవైపు కాంగ్రెస్ నేత జీవన్ రెడ్డి (Jeevan Reddy) తనదైన స్టైల్లో పంచులు వేశారు.. అధికార పార్టీని ఉద్దేశిస్తూ.. రాష్ట్ర ప్రభుత్వం వీఆర్ఏ(VRA) వీఆర్వో (VRO)లను ఎందుకు రద్దు చేసిందో తెలియడం లేదన్నారు. ప్రభత్వం తీసుకొన్న అనాలోచిత నిర్ణయాలతో రాష్ట్రంలో ధరణి వల్ల భూ సమస్యలు ఉత్పన్నమయ్యాయని..ధరణి సమస్యలు లేని గ్రామమే లేదన్నారు జీవన్ రెడ్డి..

బీఆర్ఎస్ ప్రభుత్వం అన్ని రిజిస్ట్రేషన్ లకు ఫీజులు భారీగా వసూలు చేస్తున్నారని మండిపడ్డారు.. పట్టా మార్పిడి రుసుం పేరుతో ప్రతి ఎకరాకు రూ. 2500 కట్టించుకొంటున్న కేసీఆర్ మీకు చిత్త శుద్ది ఉంటే పట్టా మార్పిడి ఫీజు రద్దు చేయాలని జీవన్ రెడ్డి డిమాండ్ చేశారు. ధరణిలో నమోదు కానీ డాక్యుమెంట్స్ వేలల్లో ఉన్నాయని పేర్కొన్నారు.. మరోవైపు కాంగ్రెస్ అధికారంలోకి వచ్చాక వీఆర్ఏ, వీఆర్వో వ్యవస్థలను పునరుద్దరిస్తామని జీవన్ రెడ్డి తెలిపారు..

రెవెన్యూ ట్రిబ్యునల్ ఏర్పాటు చేసి నాలుగు నెలల్లో ధరణి సమస్యలను పరిష్కరిస్తామని జీవన్ రెడ్డి హామీ ఇచ్చారు. ఇక మంత్రి హరీష్ రావు నోరు అబద్దాల పుట్ట అని విమర్శించిన జీవన్ రెడ్డి.. కాంగ్రెస్ అధికారంలోకి వస్తే పటేల్ పట్వారీ వ్యవస్థ మొదలవుతుందనడం ప్రజలను భయపెడుతున్నట్టు ఉంది అని మండిపట్టారు.

అసలు పటేల్ పట్వారీ వ్యవస్థకు, ధరణికి ఏం సంబంధం అని జీవన్ రెడ్డి ప్రశ్నించారు. పటేల్ పట్వారీ వ్యవస్థ కేసీఆర్ ఎమ్మెల్యే కాకముందే రద్దయిందని జీవన్ రెడ్డి గుర్తు చేశారు. రాష్ట్రంలో 30వేల నిరుద్యోగుల కొత్త ఉద్యోగాలను కొల్లగొట్టిన కేసీఆర్.. అసలు తెలంగాణ రాష్ట్రం ఏర్పాటు చేసింది కొలువులను ఇవ్వడానికా..? లేక తీయడానికా అని నిలదీశారు. మళ్ళీ తెలంగాణలో దొరల పాలనకు బోణి కొట్టింది మీరని జీవన్ రెడ్డి బీఆర్ఎస్ పై మండిపడ్డారు..