Breaking News

బీజేపీ (BJP) ఓటమి లక్ష్యంగా ఏర్పడిన ఇండియా కూటమి ప్రస్తుతం డ్యామేజ్ స్థితిలో ఉన్నదని తెలుస్తోంది. ఇప్పట్లో కొలుకునేలా లేకుండా ఒకదాని తర్వాత ఒకటి ఎదురుదెబ్బలు తగులుతున్నాయి. లోక్‌సభ స్థానాల పరంగా పశ్చిమ బెంగాల్ (West Bengal), బీహార్ (Bihar) తర్వాత దేశంలోనే అతిపెద్ద రాష్ట్రమైన ఉత్తరప్రదేశ్‌ (Uttar Pradesh)లో ప్రతిపక్ష కూటమికి షాక్ తగిలింది. కాంగ్రెస్, సమాజ్‌వాదీ పార్టీ మధ్య పొత్తు చర్చలు విఫలమయ్యాయి.

ఉత్త‌ర‌ప్ర‌దేశ్‌లో ప‌ట్టు కోసం తంటాలు ప‌డుతున్న కాంగ్రెస్‌ (Congress)కు స‌మాజ్‌వాదీ పార్టీ అధ్య‌క్షుడు అఖిలేష్ యాద‌వ్ ఝ‌ల‌క్ ఇచ్చారు. 80 లోక్‌స‌భ స్థానాలున్న యూపీలో కాంగ్రెస్‌కు 17 సీట్లిస్తామ‌ని ప్ర‌క‌టించారు. దానికి ఓకే అంటేనే కాంగ్రెస్ అగ్రనేత రాహుల్ గాంధీతో క‌లిసి త‌మ రాష్ట్రంలో భార‌త్ న్యాయ్ యాత్ర‌లో పాల్గొంటాన‌ని స్ప‌ష్టం చేశారు. మరోవైపు నిన్న జరిగిన చర్చలు అర్థాంతరంగానే ముగిసాయి.

మొరాదాబాద్ డివిజన్‌లో కీలకమైన మూడు సీట్ల విషయంలో రెండు పార్టీలు మాకంటే మాకు అన్నట్లుగా వ్యవహరించాయి. దీంతో కాంగ్రెస్, సమాజ్‌వాదీ పార్టీ మధ్య పొత్తు ఉండదని సన్నిహిత వర్గాలు అప్పుడే ప్రచారం మొదలుపెట్టాయి. అయితే ఈ విషయాన్ని రెండు పార్టీలు అధికారికంగా ప్రకటించలేదు. ఇక గ‌త లోక్‌స‌భ ఎన్నిక‌ల్లో కాంగ్రెస్‌ యూపీలో ఘోర ప‌రాభవం ఎదుర్కొంది. 80 స్థానాల‌కు గాను ఒక్క‌చోట మాత్ర‌మే గెలిచింది.

అది కూడా సోనియా నిల‌బ‌డిన రాయ్‌బ‌రేలిలో మాత్ర‌మే. రాహుల్ గాంధీ స‌హా మ‌హామహులంతా ఎన్నికల్లో ఓడిపోయారు. దీంతో ఈసారి ఎస్పీ, బీఎస్పీల‌తో క‌లిసి ఎన్నిక‌లకు వెళ్లాల‌న్న కాంగ్రెస్ ఆశ‌లు అడియాసలుగా మారేలా కనిపిస్తున్నాయని అంటున్నారు. అయితే పొత్తులో భాగంగా రాష్ట్రంలో 17 లోక్ సభ సీట్లను కాంగ్రెస్‌కు ఇచ్చేందుకు ఎస్‌పీ నిన్న ప్రతిపాదన చేసింది. అయితే కాంగ్రెస్ మాత్రం కనీసం 20 సీట్లు కావాలని పట్టుబట్టింది.

కాంగ్రెస్‌ (Congress) అగ్రనేత రాహుల్‌ గాంధీ (Rahul Gandhi)కి ఉత్తరప్రదేశ్‌ (Uttar Pradesh) న్యాయస్థానంలో ఊరట లభించింది. 2018 పరువు నష్టం కేసులో రాహుల్‌కు సుల్తాన్‌పూర్‌ ప్రత్యేక కోర్టు మంగళవారం షరతులతో కూడిన బెయిల్‌ మంజూరు చేసింది. పరువు నష్టం కేసులో ఆరోపణలు ఎదుర్కొంటున్న రాహుల్ గాంధీ, కోర్టులో సరెండర్ అయ్యారు. అనంతరం 45 నిమిషాల కస్టడీ తర్వాత కోర్టు బెయిల్ ఇచ్చింది.

మరోవైపు కర్ణాటక ఎన్నికల సమయంలో బెంగళూరులో 2018 మే 8న జరిగిన విలేకరుల సమావేశంలో రాహుల్ గాంధీ.. హోం మంత్రి అమిత్ షా (Amit Shah)పై అభ్యంతరకర వ్యాఖ్యలు చేశారంటూ బీజేపీ నాయకుడు విజయ్‌​ మిశ్రా అనే వ్యక్తి అదే ఏడాది ఆగస్టు 4న పరువు నష్టం కేసు వేశాడు. మరో పక్క ఓ హత్య కేసులో నిందితుడిగా ఉన్న వ్యక్తి ఆ పార్టీకి అధ్యక్షుడిగా ఉన్నారంటూ రాహుల్‌ వ్యాఖ్యానించడం సంచలనం సృష్టించింది.

అయితే రాహుల్‌ వ్యాఖ్యలు చేసిన సమయంలో అమిత్‌ షా బీజేపీ జాతీయ అధ్యక్షుడి పదవిలో కొనసాగుతున్నారు. ఈ కామెంట్స్ పై బీజేపీ నేత విజయ్ మిశ్రా, సుల్తాన్ పూర్ కోర్టును ఆశ్రయించారు. ప్రస్తుతం సుల్తాన్ పూర్ కోర్టు రాహుల్ గాంధీకి బెయిల్ మంజూరు చేసింది. ఈ సందర్భంగా రాహుల్‌ న్యాయవాది సంతోష్ పాండే విలేకరులతో మాట్లాడుతూ.. పరువు నష్టం కేసులో రాహుల్‌ నేడు కోర్టుకు హాజరైనట్లు తెలిపారు.

ఆ తర్వాత కోర్టు ఒక్కొక్కరికి 25 వేల రూపాయల భద్రత, 25 వేల రూపాయల పూచీకత్తుపై బెయిల్ మంజూరు చేసిందని వెల్లడించారు. అయితే తదుపవరి విచారణ తేదీని ఇంకా ప్రకటించలేదని, ఈ కేసులో రాహుల్‌ నిర్దోషి అని, పరువు నష్టం కలిగించే విధంగా ఆయన ఎలాంటి ప్రకటన చేయలేదని పేర్కొన్నారు. కాగా రాహుల్‌ చేపట్టిన భారత్‌జోడో న్యాయ యాత్ర ప్రస్తుతం ఉత్తరప్రదేశ్‌లో కొనసాగుతుంది. నేటి ఉదయం ఆయన కోర్టుకు హాజరు కావడంతో యాత్రను తాత్కాలికంగా నిలిపివేశారు.

ఢిల్లీ (Delhi) సీఎం అరవింద్‌ కేజ్రీవాల్‌ (Arvind Kejriwal) మరోసారి ఈడీ విచారణకు గైర్హాజరయ్యారు. మద్యం కుంభకోణం కేసులో ఆరోపణలు ఎదుర్కొంటున్న ఆయన.. సోమవారం విచారణకు హాజరు కావాలసి ఉంది. ఇప్పటికే ఎన్‌ఫోర్స్‌మెంట్ డైరెక్టరేట్ (ED) అధికారులు ఆరోసారి నోటీసులు కూడా జారీ చేశారు. అయితే ఈ విచారణకు కేజ్రీవాల్ హాజరుకావడం లేదని ఆమ్ ఆద్మీ పార్టీ (AAP) వర్గాలు వెల్లడించాయి.

అధికారులు పంపిన సమన్లు చట్ట వ్యతిరేకమని, ఈడీ సమన్ల చట్టబద్ధతపై కోర్టులో కేసు నడుస్తోందని ఆప్ వర్గాలు మండిపడ్డాయి. అంతే కాకుండా కేజ్రీవాల్‌ను ఇబ్బంది పెట్టే ఉద్దేశ్యంతో పదే పదే ఈడీ సమన్లు పంపుతోందని ఆగ్రహం వ్యక్తంచేస్తున్నారు. కోర్టు నిర్ణయం వచ్చేవరకు ఈడీ ఆగాల్సిందేనని స్పష్టం చేశారు. మరోవైపు ఐదు సార్లు ఈడీ విచారణకు గైర్హాజరైన కేజ్రీవాల్‌.. ఈ నెల 17న వీడియో కాన్ఫరెన్స్‌ ద్వారా ఈడీ కోర్టు విచారణకు హాజరయ్యారు.

రాష్ట్ర బడ్జెట్‌, విశ్వాస తీర్మానం కారణంగా తాను ప్రత్యక్షంగా కోర్టుకు రాలేకపోయానని వివరించారు. మార్చి 16న జరిగే విచారణకు వ్యక్తిగతంగా హాజరవుతానని తెలిపారు. ఇదిలా ఉండగా లోక్‌సభ ఎన్నికలు వస్తున్న క్రమంలో కేజ్రీవాల్‌కు ఈడీ నుంచి నోటీసులు వస్తుండటంపై ఆప్ వర్గాలు మండిపడుతున్నాయి. పార్లమెంట్ ఎన్నికల్లో ప్రచారం చేయనీయకుండా చేసేందుకు ఇలా నోటీసులు ఇస్తున్నారని ఆరోపిస్తున్నారు.

ఇప్పటికే ఈడీ ఢిల్లీ లిక్కర్ స్కాంలో అనేకమందిని అరెస్ట్ చేసింది. ఈ కేసులో కేజ్రీవాల్‌పై కూడా ఆరోపణలు రావడంతో.. ఈడీ నవంబర్ 1వ తేదీన తొలిసారి నోటీసులు ఇచ్చింది. ఆ తర్వాత డిసెంబర్ 21న మళ్లీ సమన్లు జారీ చేసింది. అయినా కేజ్రీవాల్ విచారణకు రాకపోవడంతో ఈ ఏడాది జనవరి 3, జనవరి 18, ఫిబ్రవరి 2న నోటీసులు జారీ చేసింది. ఎన్నిసార్లు నోటీసులు జారీ చేసినా కేజ్రీవాల్ పట్టించుకోవడం లేదు. ఇలా విచారణకు హాజరుకాకుండా డుమ్మా కొడుతున్నారు. కానీ పట్టువదలక ఈడీ నోటీసులు పంపిస్తూనే ఉంది. అయితే కేజ్రీవాల్‌పై ఇప్పటివరకు ఎలాంటి చర్యలు తీసుకోకపోవడం ఆసక్తికరంగా మారింది.