Breaking News

2001 డిసెంబ‌ర్ 13.. పార్ల‌మెంట్‌ (Parliament) పై దాడి జరిగిన రోజు. సరిగ్గా ఇదే రోజున ఇద్దరు వ్యక్తులు లోక్ సభ (Lok Sabha) లో నానా రచ్చ చేశారు. విజిట‌ర్స్ గ్యాల‌రీ నుంచి ఇద్ద‌రు ఆగంత‌కులు కింద‌కు దూకి గ్యాస్‌ ను వ‌ద‌లడం కల‌క‌లం రేపింది. సెక్యూరిటీ (Security) సిబ్బంది వారిని పట్టుకుని విచారించగా.. వారు నీలం, అమోల్ షిండే అని తేలింది. ఇద్దర్నీ అదుపులోకి తీసుకున్నారు. జీరో అవర్ సమయంలో ఈ ఘటన జరిగింది.

ఇద్దరు వ్యక్తులు నియంతృత్వం పని చేయదు అంటూ నినాదాలు చేశారని ప్రతిపక్ష నేతలు చెబుతున్నారు. ఈ ఘ‌ట‌న‌పై కాంగ్రెస్ ఎంపీ కార్తీ చిదంబరం (Karthi Chidambaram) స్పందించారు. స‌భ జ‌రుగుతుండ‌గా అనూహ్యంగా ఇద్ద‌రు వ్య‌క్తులు విజిట‌ర్స్ గ్యాల‌రీ నుంచి స‌భ‌లోకి దూకి ప‌సుపు రంగు గ్యాస్‌ ను వ‌దిలార‌ని చెప్పారు. వారు కొన్ని నినాదాలు చేశార‌ని, వారు వ‌దిలిన గ్యాస్ విష వాయువు కావ‌చ్చ‌ని, ఇది తీవ్ర భ‌ద్ర‌తా వైఫ‌ల్య‌మ‌ని పేర్కొన్నారు.

శివ‌సేన (యూబీటీ) ఎంపీ అర‌వింద్ సావంత్ (Aravind Sawanth) స్పందిస్తూ.. ఆగంత‌కుల దుశ్చ‌ర్య‌తో స‌భ‌లో క‌ల‌కలం రేగిందన్నారు. ఈ ఘ‌ట‌న‌లో ఎవ‌రూ గాయ‌ప‌డ‌లేద‌ని చెప్పారు. ఇద్దరు వ్యక్తులు పైనుంచి కింద‌కు దూకిన‌ప్పుడు చివ‌రి బెంచీల్లో స‌భ్యులు ఎవ‌రూ లేక‌పోవ‌డంతో వారిని సుల‌భంగా ప‌ట్టుకున్నార‌ని అన్నారు.

ఈ అనుభవం చాలా భయానకంగా ఉందని ఎంపీ సుదీప్ బందోపాధ్యాయ తెలిపారు. ఇద్దరు వ్యక్తులు పట్టుబడ్డారని సస్పెండ్ అయిన బీఎస్పీ ఎంపీ డానిష్ అలీ చెప్పారు. ‘‘సంఘటన చాలా తీవ్రమైనది ఎందుకంటే పార్లమెంట్‌ పై ఉగ్రదాడి జరిగి 22 ఏళ్లు అవుతోంది. అదే రోజు ఇటువంటి భద్రతా లోపం బట్టబయలు కావడం ఆశ్చర్యకరం’’ అని అన్నారు.

ఎంపీ రాజేంద్ర అగర్వాల్ మాట్లాడుతూ.. ఓ వ్యక్తి గ్యాలరీ నుంచి దూకినప్పుడు కిందపడిపోయినట్లు అనిపించిందని అన్నారు. దీని తర్వాత మరొక వ్యక్తి దూకినప్పుడు, ఇది ఉద్దేశపూర్వకంగా చేసినట్లు తేలిందని చెప్పారు. ఒక వ్యక్తి టియర్ గ్యాస్ విడుదల చేయగా మరొకరు బెంచ్ ను కొట్టారు. వీరి ఉద్దేశం ఏమిటో స్పష్టంగా తెలియ లేదని, అయితే వారు ఏదో ఆలోచనతో వచ్చారని అన్నారు.

పార్లమెంట్ బయట కూడా ఇద్దరు వ్యక్తులను పట్టుకున్నారు. ఒక పురుషుడు, మహిళ నినాదాలు చేస్తూ కనిపించారు. పోలీసులు వారిద్దరినీ అక్కడి నుంచి తీసుకెళ్లారు. వీళ్లు టపాసులు కాల్చుతూ నినాదాలు చేశారు. ప్రస్తుతం పోలీసులు వారిద్దరినీ సంసద్ మార్గ్ పోలీస్ స్టేషన్‌ కు తరలించి విచారిస్తున్నారు.

పార్లమెంట్ (Parliament) పై ఉగ్రదాడికి నేటితో 22 ఏండ్లు పూర్తయింది. ఆ పాత గాయాలను ఈ రోజు నెమరు వేసుకుంటున్న తరుణంలో మరో ఆందోళనకర ఘటన చోటు చేసుకుంది. పార్లమెంట్‌లో మరోసారి భద్రతా వైఫల్యం కనిపించింది. లోక్ సభ (Loke Sabha)లోకి ఇద్దరు ఆగాంతకులు ప్రవేశించి గందరగోళం సృష్టించారు.

ఈ ఘటనతో అందరూ ఒక్క సారిగా గందరగోళానికి గురయ్యారు. ఈ రోజు మధ్యాహ్నం 12 గంటల తర్వాత లోక్ సభ సందర్శకుల గ్యాలరీ నుంచి ఇద్దరు వ్యక్తులు అకస్మాత్తుగా లోక్ సభలోకి దూసుకు వచ్చారు. నేరుగా స్పీకర్ పోడియం వద్దకు వెళ్లి అక్కడ గ్యాస్ సిలిండర్లను ఓపెన్ చేశారు. అనంతరం అక్కడ సభలో అటు ఇటు తిరిగారు.

సభలో సభ్యులు కూర్చునే బెంచీలపై అటు ఇటు ఎగిరి దూకారు. వెంటనే విషయం తెలుసుకున్న భద్రతా సిబ్బంది లోక్ సభలోకి ప్రవేశించి దుండగులను పట్టుకున్నారు. ఇది ఇలా వుంటే పార్లమెంట్‌లో భద్రతా పరమైన లోపాలు తలెత్తడంపై కేంద్రం సీరియస్ అయింది. దీనిపై దర్యాప్తు జరుప్తు జరుపుతున్నట్టు తెలుస్తోంది.

మరోవైపు పార్లమెంట్ లో భద్రతా లోపాలపై ప్రతిపక్షాలు ఆందోళన వ్యక్తం చేస్తున్నాయి. ముఖ్యంగా సందర్శకుల గ్యాలరీలోకి అనుమతుల విషయంలో భద్రతా సిబ్బంది సరైన చర్యలు తీసుకోలేదని విమర్శలు వస్తున్నాయి. ఇది ఇలా వుంటే ఈ ఘటన నేపథ్యంలో సభలో గందర గోళం నెలకొనడంతో లోక్ సభను వాయిదా వేశారు.

పార్లమెంట్ (Parliament) పై ఉగ్రదాడికి నేటితో 22 ఏండ్లు పూర్తయింది. ఈ దాడిలో 9 మంది వీర జవాన్లు అమరులయ్యారు. వారికి దేశం మొత్తం ఈ రోజు నివాళి అర్పిస్తోంది. పార్లమెంట్ ప్రాంగణంలో ఏర్పాటు చేసిన కార్యక్రమంలో అమర జవాన్లకు ఉపరాష్ట్రపతి జగదీప్ ధన్ ఖడ్‌తో పాటు ప్రధాని మోడీ (PM Modi), లోక్ సభ స్పీకర్ ఓం బిర్లా ఘన నివాళులర్పించారు.

 

అమరుల త్యాగాలను గుర్తు చేస్తూ రాష్ట్రపతి ద్రౌపది ముర్ము ట్వీట్ చేశారు. మరోవైపు కాంగ్రెస్ మాజీ అధినేత్రి సోనియాగాంధీ, ఆ పార్టీ జాతీయ అధ్యక్షుడు మల్లికార్జున ఖర్గే, కేంద్ర హోం మంత్రి అమిత్ షా, పార్లమెంటరీ వ్యవహారాల శాఖ మంత్రి ప్రహ్లాద్ జోషి, కేంద్ర మంత్రులు జితేంద్ర సింగ్‌లు అమర జవాన్లకు పుష్పాంజలి ఘటించారు.

అమర వీరుల కుటుంబ సభ్యులతో ప్రధాని మోడీ ఈ సందర్బంగా ముచ్చటించారు. 2001లో మన పార్లమెంట్‌పై దాడి సమయంలో తమ ప్రాణాలను అర్పించిన సాహసోపేతమైన భద్రతా సిబ్బందిని స్మరించుకుంటున్నామని ఉప రాష్ట్రపతి జగదీప్ ధన్ ఖడ్ ట్వీట్ లో తెలిపారు. వారి అత్యున్నత త్యాగానికి భారత్ ఎప్పటికీ రుణపడి ఉంటుందని అన్నారు.

ఉగ్రవాదం అనేది ప్రపంచ వ్యాప్తంగా మానవాళికి ముప్పుగా మారిందని ఆందోళన వ్యక్తం చేశారు. ప్రపంచ శాంతికి అడ్డంకిగా మారిన ఉగ్రవాదాన్ని నిర్మూలించడంలో దేశాలన్నీ ఐక్యంగా పోరాటం చేయాలన్నారు. అంతకు ముందు అమర జవాన్లకు ఘన నివాళులు అర్పిస్తున్నామని ప్రధాని మోడీ ట్వీట్ చేశారు. ఆపద సమయంలో వారు చూపిన ధైర్యం, వారి త్యాగం దేశంలో పౌరుల మనస్సులో చిరస్థాయిగా నిలిచిపోతుందన్నారు.

13 డిసెంబర్ 2001న ఏం జరిగింది…!

2001 డిసెంబర్ 13న పార్లమెంట్‌లో శీతాకాల సమావేశాలు జరిగాయి. ఆ రోజు ఉదయం 11.30 గంటల సమయంలో ఓ తెల్లరంగు అంబాసిడర్ కారులో ఐదుగురు ఉగ్రవాదులు గేట్ నంబర్ 12 నుంచి దూసుకు వచ్చారు. ఆ విషయాన్ని గమనించిన సెక్యూరిటీ గార్డు వెంటనే కారు వెనకాలే పరుగెత్తాడు. చూస్తుండగానే ఉపరాష్ట్రపతి వాహనాన్ని ఆ కారు ఢీ కొట్టింది.

వెంటనే ఉగ్రవాదులు విచక్షణా రహితంగా కాల్పులు జరిపారు. ఈ కాల్పుల్లో నిరాయుధులైన సెక్యూరిటీ గార్డులు మరణించారు. కాల్పుల శబ్దం విన్న సీఆర్పీఎఫ్ పోలీసులు వెంటనే ఘటనా స్థలానికి చేరుకున్నాయి. బీజేపీ అగ్రనేత ఎల్ కే అద్వానీ, ప్రమోద్ మహాజన్ లాంటి ప్రముఖ నేతలంతా అప్పుడు పార్లమెంట్ లోనే ఉన్నారు. ఇంతలో ఓ ఉగ్రవాది గేట్ నంబర్ 1 నుంచి లోపలికి ప్రవేశించేందుకు యత్నించాడు.

ఉగ్రవాదిని గమనించి భద్రతా బలగాలు అతన్ని మట్టుపెట్టాయి. మిగతా నలుగురు ఉగ్రవాదులు గేట్ నంబర్ 4 నుంచి లోపలికి వెళ్లేందుకు ప్రయత్నించారు. అలర్ట్ అయిన భద్రతా దళాలు నలుగురు ఉగ్రవాదులపై బుల్లెట్ల వర్షం కురిపించాయి. దీంతో వారు అక్కడికక్కడే మరణించారు. ఈ కేసులో అఫ్జల్ గురు మరణశిక్ష విధించారు. 2013న తీహార్ జైలులో అఫ్జల్ గురును ఉరితీశారు.

తక్షణ మానవత సాయం కోసం గాజా (Gaza)లో ఇజ్రాయెల్-హమాస్ మధ్య కాల్పుల విరమణ (Cease Fire) పాటించాలని, ఇరు పక్షాల చేతుల్లో బందీలు(Hostages)గా ఉన్న వారిని వెంటనే విడుదల చేయాలని డిమాండ్ చేస్తూ ఐక్యరాజ్య సమితి జనరల్ అసెంబ్లీలో ముసాయిదా తీర్మానాన్ని ప్రవేశపెట్టారు.

ఈ తీర్మానానికి అనుకూలంగా భారత్ ఓటు వేసింది. ఐరాస తీర్మానంపై బహ్రెయిన్, అల్జీరియా, కువైట్, ఒమన్, ఇరాక్, సౌదీ అరేబియా, ఖతార్, యూఏఈ, పాలస్తీనాతోపాటు పలు దేశాలు సంతకాలు చేశాయి. అగ్రదేశం అమెరికాతో పాటు ఇజ్రాయెల్ సహా మొత్తం పది దేశాలు ఈ తీర్మానానికి వ్యతిరేకంగా ఓటు వేశాయి.

మరోవైపు 23 దేశాలు ఈ తీర్మానంపై ఓటింగ్ కు దూరంగా ఉన్నాయి. జనరల్ అసెంబ్లీ నుంచి పంపిన శక్తివంతమైన సందేశం పరంగా ఇది చారిత్రాత్మకమైన రోజు అని ఐక్యరాజ్యసమితిలో పాలస్తీనా రాయబారి రియాద్ మన్సూర్ అన్నారు. ముసాయిదా తీర్మానంలో హమాస్ పేరు ప్రస్తావించకపోవడంపై అమెరికా, ఇజ్రాయెల్ తో పాటు పలు దేశాలు తప్పుపట్టాయి.

ముసాయిదా తీర్మానంలో సవరణ చేపట్టాలని ఆయా దేశాలు డిమాండ్ చేశాయి. ఈ తీర్మానానికి అనుకూలంగా భారత్ ఓటు వేసిందని ఐరాసలో భారత శాశ్వత ప్రతినిధి రుచిరా కాంబోజ్ వెల్లడించారు. ఇరు దేశాల మధ్య దీర్ఘకాలంగా నెలకొన్న సమస్యకు శాంతియుతమైన, ఇరు పక్షాలకు ఆమోదయోగ్యమైన పరిష్కారాన్ని కనుగొనే ప్రయత్నాలు చేయాలన్నారు.

– వివాదాస్పద మత స్థలాలన్నీ హిందువులవే
– ముస్లింలు హిందూ సమాజానికి అప్పగించాలి
– మతాల మధ్య సంఘర్షణకు ముగింపు పలకాలి
– అయోధ్య రామ మందిరం జాతీయ ఆలయం
– ఆర్ఎస్ఎస్ నేత ఇంద్రేష్ కుమార్ కీలక వ్యాఖ్యలు

ఆర్ఎస్ఎస్ సీనియర్ నేత ఇంద్రేష్ కుమార్ ఆసక్తికర వ్యాఖ్యలు చేశారు. ముస్లిం, ఇతర మతాలకు చెందిన వ్యక్తులు వివాదాస్పద మత స్థలాలన్నింటినీ స్వచ్ఛందంగా హిందూ సమాజానికి అప్పగించాలని అన్నారు. ప్రతీ మసీదులో శివలింగాన్ని కనుగొనాల్సిన అవసరం లేదని ఆర్ఎస్ఎస్ చీఫ్ మోహన్ భగవత్ అన్నారని ఆయన గుర్తు చేశారు.

మతాల మధ్య పరస్పర సంఘర్షణకు ముగింపు పలకడమే లక్ష్యంగా ఆర్ఎస్ఎస్ చీఫ్ ఆ ప్రకటన చేశారని తెలిపారు. ఈ లక్ష్యాన్ని చేరినప్పుడే సమాజం హింస, ద్వేషం నుంచి విముక్తి పొందే దిశగా ఆలోచిస్తుందన్నారు. సనాతన ధర్మ అనుచరులకు చెందిన ఆలయాలను విదేశీ ఆక్రమణదారులు కూల్చివేశారని చెప్పారు.

ఈ విషయాన్ని మోహన్ భగవత్ స్పష్టం చేశారన్నారు. ఇప్పుడు సత్యం గురించి వెతకాల్సిన పని లేదని అన్నారని తెలిపారు. సత్యం అనేది అందరి ముందు స్పష్టంగా కనిపిస్తోందని, దాన్ని అందరూ అంగీకరించాలని కోరారు. అందువల్ల, ముస్లింలు, ఇతర మతాలకు చెందిన వారు ముందుకు వచ్చి హిందువుల వివాదాస్పద మత స్థలాలను అప్పగించాలని విన్నవించారు.

అయోధ్యలో రామ మందిర నిర్మాణంతో దేశంలోనే కాకుండా ప్రపంచ వ్యాప్తంగా సంతోషకరమైన వాతావరణం నెలకొందన్నారు ఇంద్రేష్ కుమార్. అయోధ్య జాతీయ దేవాలయమని.. రాముడు అందరిలోనూ ఉన్నాడని తెలిపారు. భారత్ అన్ని మతాలను అంగీకరించే, గౌరవించే దేశమన్న ఆయన.. రామ మందిరాన్ని జాతీయ ఆలయం అని పిలవడం సరైందన్నారు.

‘మహదేవ్’ బెట్టింగ్ యాప్ (Mahadev Betting App) యజమానుల్లో ఒకరైన రవి ఉప్పల్‌( Ravi Uppal)ను దుబాయ్ పోలీసులు అరెస్టు చేశారు. ఈడీ ఆదేశాల మేరకు ఇంటర్ పోల్ జారీ చేసిన రెడ్ కార్నర్ నోటీసు ఆధారంగా రవి ఉప్పల్‌ను దుబాయ్ పోలీసులు అరెస్టు చేసినట్టు అధికార వర్గాలు వెల్లడించాయి. ఆయన్ని భారత్ కు రప్పించేందుకు దుబాయ్ పోలీసులతో ఈడీ అధికారులు సంప్రదింపులు జరుపుతున్నారు.

ఉప్పల్ రవిని అటు ఛత్తీస్ గఢ్, ఇటు ముంబై పోలీసులతో పాటు అక్రమ బెట్టింగ్ కు సంబంధించిన మనీలాండరింగ్ కేసులో ఈడీ కూడా విచారిస్తోంది. ఈ ఏడాది అక్టోబర్‌లో మహదేవ్ బెట్టింగ్ యాప్ యజమాని ఉప్పల్ రవితోపాటు మరో ప్రమోటర్ సౌరవ్ చంద్రశేఖర్‌లపై పీఎంఎల్ఏ కోర్టులో మనీలాండరింగ్ కేసులో ఈడీ ఛార్జ్ షీట్ దాఖలు చేసింది.

ఈ క్రమంలో రవి ఉప్పల్ పరారీలో ఉన్నారు. దీంతో రెడ్ కార్నర్ నోటీసులు జారీ చేయాలని ఇంటర్ పోల్‌ను ఈడీ కోరింది. ఈ నేపథ్యంలో ఈడీ విజ్ఞప్తి మేరకు ఇంటర్ పోల్ రెడ్ కార్నర్ నోటీసులు జారీ చేసింది. ఉప్పల్ రవి వనౌతు దేశం నుంచి పాసుపోర్టును పొందారని కోర్టుకు ఈడీ వెల్లడించింది. మహదేవ్ బెట్టింగ్ యాప్ ద్వారా అక్రమ మార్గాల్లో ఆ సంస్థ భారీగా సంపదను సృష్టించిందని ఆరోపించింది.

ఆ డబ్బును అక్రమంగా దాచి పెట్టిందని, చంద్ర భూషణ్ వర్మ ద్వారా ఛత్తీస్‌గఢ్‌లోని అధికారులు, రాజకీయ నాయకులకు ఆ డబ్బును బట్వాడా చేసేలా రవి ఉప్పల్ చూస్తున్నారని ఈడీ అభియోగాలు నమోదు చేసింది. ఛత్తీస్ గడ్ ఎన్నికలకు ముందు నవంబర్‌లో మహదేవ్ బెట్టింగ్ యాప్ ప్రమోటర్లు సీఎం భూపేశ్ భాఘేల్ కు రూ. 500 కోట్లు అందజేసినట్టు ఫోరెన్సిక్ విశ్లేషణలో, అసిమ్ దాస్ అనే క్యాష్ కొరియర్ స్టేట్ మెంట్ ద్వారా తెలిసిందని వెల్లడించింది.

ఒడిశా ఎంపీ ధీరజ్ ప్రసాద్ సాహూ సంస్థల్లో భారీగా నగదు పట్టుబడిన ఘటనపై ప్రధాని మోడీ (PM Modi) స్పందించారు. కాంగ్రెస్ సమర్పించు డబ్బు దోపిడీ అంటూ బీజేపీ చేసి వీడియోపై మోడీ స్పందిస్తూ….. ఈ పట్టుబడిన నగదును ప్రముఖ వెబ్ సిరీస్ మనీ హీస్ట్‌ (Money Heist)తో ప్రధాని పోల్చారు. ‘మనీ హీస్ట్’అనేది బ్యాంక్ దోపిడీల నేపథ్యంలో థ్రిల్లింగ్‌గా సాగే వెబ్‌సిరీస్.

దేశంలో కాంగ్రెస్ ఉండగా కల్పితమైన, ఊహాజనితమైన మనీ హీస్ట్‌ వెబ్‌ సిరీస్‌ ఎందుకంటూ తీవ్ర వ్యాఖ్యలు చేశారు. 70 ఏండ్లుగా ఆ దొంగలు దోచుకుంటూనే ఉన్నారని మండిపడ్డారు. అంతకు ముందు కూడా సాహూ వ్యవహారంపై ప్రధాని మోడీ స్పందించారు. ప్రజల నుంచి దోచుకున్న ప్రతి పైసాను వెనక్కి రప్పిస్తామన్నారు. ఇది మోడీ ఇస్తున్న హామీ అంటూ ట్వీట్ చేశారు.

ఈ ట్వీట్ పై అటు కాంగ్రెస్ ఘాటుగా స్పందించింది. స్వతంత్ర్యం వచ్చిన తర్వాత భారత్​లో జరిగిన అతి పెద్ద డబ్బు దోపిడీ గురించి ఈ దేశ ప్రజలకు ప్రధాని మోడీ వివరించాలని కోరింది. అదానీ గ్రూప్​-హిండెన్​బర్గ్​ వ్యవహారాన్ని గుర్తు చేస్తు ఈ మేరకు విమర్శలు గుప్పించింది. కాషాయ పార్టీ నుంచి అదానీ గ్రూప్ పెద్ద ఎత్తున లబ్ది పొందిందని ఆరోపించింది.

అదానీ గ్రూప్ వ్యవహారం నుంచి ప్రజల దృష్టిని మళ్లించేందుకే ప్రధాని మోడీ ఇలాంటి ట్వీట్లు చేస్తున్నారంటూ కాంగ్రెస్ ప్రధాన కార్యదర్శి జైరామ్ రమేశ్ ఆరోపణలు గుప్పించారు. ఇది ఇలా వుంటే సాహు కంపెనీలో భారీ నగదు పట్టుబడిన నేపథ్యంలో దీనిపై వివరణ ఇవ్వాలని సాహును కాంగ్రెస్ ఆదేశించింది. అది ఆయన ప్రైవేట్ వ్యవహారమని, దానికి పార్టీతో సంబంధం లేదని వెల్లడించింది.