Breaking News

దేశ రాజధాని ఢిల్లీలో వాయు నాణ్యత (AQI) మరోసారి క్షీణించింది (deteriorate). ఢిల్లీలోని పలు ప్రాంతాల్లో వాయు నాణ్యత తీవ్ర స్థాయికి పడిపోయింది. ఢిల్లీలో వాయు నాణ్యత అత్యంత పేలవమైన (Very Poor) స్థాయికి చేరినట్టు అధికారుల తెలిపారు. పలు ప్రాంతాల్లో వాయు నాణ్యత మరోసారి 400 దాటిందని కేంద్ర కాలుష్య నియంత్రణ బోర్డు తెలిపింది.

అశోక్ విహార్‌లో ఏక్యూఐ 405కు చేరుకుందని పేర్కొంది. భవానాలో ఏక్యూఐ 447కు నమోదైనట్టు వెల్లడించింది. ఇక ద్వారకాలో ఏక్యూఐ 405, జహంగిరి పురిలో 429గా ఉన్నట్టు తెలిపింది. మరోవైపు ఆనంద్ విహార్‌లో 378, బురారీ క్రాసింగ్‌లో 374, లోధి రోడ్‌లో 392 గా ఏక్యూఐ నమోదైనట్టు పేర్కొంది. ఢిల్లీలో కనిష్ట ఉష్ణోగ్రత 10.6 డిగ్రీల సెల్సియస్‌గా నమోదైంది.

అదే సమయంలో సాపేక్ష ఆర్ద్రత ఉదయం 8:30 గంటలకు 76 శాతంగా నమోదైనట్టు అధికారులు తెలిపారు. నగరంలో గడిచిన 24 గంటల్లో సగటు ఏక్యూఐ దారుణంగా పడిపోయింది. నగరంలో సోమవారం ఉదయం 348గా నమోదు అయింది. మంగళవారం అది 372కు చేరుకుంది. అంతకు ముందు ఆదివారం సరాసరి ఏక్యూఐ 301, శనివారం 319, శుక్రవారం 405, గురువారం 419గా నమోదైనట్టు అధికారులు చెప్పారు.

ఇది ఇలా వుంటే ఢిల్లీలో కాలుష్యాన్ని నియంత్రించేందుకు అధికారులు తీసుకుంటున్న చర్యలపై జాతీయ హరిత ట్రైబ్యునల్ తీవ్ర అసంతృప్తిని వ్యక్తం చేసింది. నగరంలో వాయు నాణ్యతను మెరుగు పరిచేందుకు కావాల్సిన అన్ని చర్యలను తీసుకోవాలని అధికారులను ఆదేశించింది. ఏక్యూఐకి సంబంధించి నివేదికను అందించాలని ఆదేశాలు జారీ చేసింది.

ఉత్తరాఖండ్‌ (Uttarakhand) టన్నెల్‌ (Tunnel)లో చిక్కుకున్న 41 మంది కార్మికులను కాపాడేందుకు అధికారులు తీవ్రంగా ప్రయత్నిస్తున్నారు. నిన్న ఎండో స్కోపి కెమెరా ద్వారా కార్మికుల వీడియోలను అధికారులు రికార్డు చేశారు. దీంతో వారంతా క్షేమంగా ఉన్నట్టు అధికారులు స్పష్టం చేశారు. తాజాగా టన్నెల్‌లో చిక్కుకున్న కార్మికులతో వారి కుటుంబ సభ్యులను వీడియో ద్వారా మాట్లాడించారు.

మరోవైపు సీఎం పుష్కర్ సింగ్ ధామీకి ప్రధాని మోడీ ఫోన్ కాల్ చేశారు. రెస్క్యూ ఆపరేషన్ గురించి సీఎంను ప్రధాని మోడీ ఆరా తీశారు. కార్మికులకు ఆహారం, ఔషధాలు, ఇతర అవసరమైన వస్తువులను అందిస్తున్నామని ప్రధానికి వివరించామన్నారు. సొరంగం ఉన్న కొండ పై భాగం నుంచి నిలువుగా డ్రిల్లింగ్ చేసి మరో పైపును పంపించి కూలీలను బయటకు తీసుకు రావాలని అధికారులు ప్రయత్నిస్తున్నారు.

తాజాగా ఆ ప్రయత్నాలకు ఆటంకం ఏర్పడింది. సొరంగ పై డ్రిల్ చేస్తుండగా పెద్ద గట్టి బండ రాయి అడ్డు తగిలింది. ఈ క్రమంలో సొరంగం పై నుంచి కాంకుడా సొరంగంలో కూలిన శిథిలాలకు ఒక చివరి నుంచి మరో చివరికి డ్రిల్లింగ్ చేయాలని జాతీయ విపత్తు నిర్వహణ సంస్థ ప్రయత్నాలు చేస్తోంది. మరోవైపు సొరంగం వద్దకు డాక్టర్లు చేరుకున్నారు. కార్మికులకు పలు జాగ్రత్తలు చెబుతున్నారు.

ఇది ఇలా వుంటే సిల్క్యారా టన్నెల్ కూలిన ఘటన నేపథ్యంలో జాతీయ రహదారుల ప్రాధికార సంస్థ కీలక నిర్ణయం తీసుకుంది. దేశ వ్యాప్తంగా ప్రస్తుతం నిర్మాణంలో ఉన్న 29 టన్నెల్స్‌లో సెక్యూరిటీ ఆడిట్ నిర్వహించాలని నిర్ణయించింది. వీలైనంత త్వరగా సెక్యూరిటీ ఆడిట్ ను పూర్తి చేయాలని అధికారులను ఎన్‌హెచ్ఏఐ చైర్మన్ సంతోష్ యాదవ్ ఆదేశించారు.

యోగా గురువు, పతంజలి (Pathanjali) ఆయుర్వేద్ సహ వ్యవస్థాపకుడు రామ్ దేవ్ బాబా (Ram Dev Baba)ను సుప్రీం కోర్టు తీవ్రంగా మందలించింది. ప్రజలను తప్పుదోవ పట్టించే అడ్వర్ టైజ్ మెంట్లను ఆపి వేయాలని ఆయనకు సూచించింది. అలాంటి అసత్య, తప్పుదోవ పట్టించే అడ్వర్ టైజ్ మెంట్లను వెంటనే నిలిపి వేయాలని రామ్ దేవ్ బాబాను సర్వోన్నత న్యాయస్థానం ఆదేశించింది.

అలాంటి ఉల్లంఘనను న్యాయస్థానం చాలా తీవ్రంగా పరిగణిస్తుందని పేర్కొంది. ఒక నిర్ధిష్టమైన వ్యాధిని నయం చేయగలదని తప్పుడు ప్రచారం చేస్తున్న ప్రతి హెర్బల్ ఉత్పత్తిపై రూ. 1 కోటి జరిమానా విధించే అంశాన్ని కూడా పరిశీలిస్తామని హెచ్చరించింది. వ్యాక్సిన్ డ్రైవ్, ఆధునిక ఔషధాలకు వ్యతిరేకంగా రామ్ దేవ్ బాబా అసత్య ప్రచారాలు చేస్తున్నారని ఆరోపిస్తూ గతేడాది అగస్టులో ఐఎంఏ పిటిషన్ దాఖలు చేసింది.

తాజాగా ఈ పిటిషన్ పై జస్టిస్ అసనుద్దీన్ అమానుల్లా, ప్రశాంత్ కుమార్ మిశ్రా ధర్మాసనం విచారణ జరిపింది. తాము ఈ సమస్యను అల్లోపతి వర్సెస్ ఆయుర్వేదగా మార్చాలని అనుకోవడం లేదని ధర్మాసనం వ్యాఖ్యానించింది. ప్రజలను తప్పుదోవ పట్టించే అడ్వర్ టైజ్ మెంట్ల వల్ల కలిగే సమస్యకు సరైన పరిష్కారం కనుగోవాలన్నదే తమ ఉద్దేశమన్నారు.

ఈ సమస్యను తాము సీరియస్‌గా తీసుకున్నామని ధర్మాసనం వెల్లడించింది. ఈ సమస్యను పరిష్కరించేందుకు కేంద్రం ఆచరణీయమైన ఓ పరిష్కర మార్గాన్ని కనుగోవాలని అడిషనల్ సాలిసిటర్ జనరల్ కేఎం నటరాజ్ కు ధర్మాసనం సూచించింది. అన్ని వర్గాలతో సంప్రదింపులు జరిపిన తర్వాత తగిన ప్రతిపాదనలు చేయాలని కోరింది. అనంతరం కేసును ఫిబ్రవరి 5, 2024కు వాయిదా వేసింది.

ప్రధాని మోడీ (PM Modi ) పై కాంగ్రెస్ అగ్రనేత రాహుల్ గాంధీ (Rahul Gandhi) తీవ్ర స్థాయిలో విరుచుకు పడ్డారు. ఫైనల్ మ్యాచ్ కు ప్రధాని మోడీ హాజరు కావడం వల్లే భారత జట్టు ఓడి పోయిందని విమర్శలు చేశారు. పీఎం అంటే పనౌతి (చెడు శకునం) మోడీ అంటూ తీవ్ర వ్యాఖ్యలు చేశారు. ప్రజల సొమ్మును అదానీ కాజేస్తుంటే దాని నుంచి ప్రజల దృష్టిని ప్రధాని మోడీ మరలుస్తున్నారంటూ ఆరోపించారు.

రాజస్థాన్‌లోని బాడ్​మేర్​ జిల్లాలో నిర్వహించిన బహిరంగ సభలో రాహుల్‌ గాంధీ పాల్గొన్నారు. ఈ సందర్బంగా ఆయన మాట్లాడుతూ…. ప్రధాని మోడీ ఒక చెడు శకునమని విమర్శలు గుప్పించారు. ఆయన హాజరు కావడం వల్లే ఓడిపోయామంటూ ఎద్దేవా చేశారు. ప్రజల జేబులను కొల్ల గొట్టడమే అదానీ పని అంటూ తీవ్ర విమర్శలు చేశారు.

ఈ వ్యాఖ్యలపై దుమారం రేగింది. రాహుల్‌ వ్యాఖ్యలపై బీజేపీ నేతలు నిప్పులు చెరిగారు. ప్రధాని గురించి కాంగ్రెస్ అగ్రనేత రాహుల్ గాంధీ అలాంటి వ్యాఖ్యలు చేయడం సరికాదని బీజేపీ ఆగ్రహం వ్యక్తం చేసింది. రాహుల్​ ఉపయోగించిన పదాలు చాలా అవమానకరంగా ఉన్నాయని తీవ్ర స్థాయిలో మండిపడింది. వెంటనే ప్రధాని మోడీకి రాహుల్ గాంధీ క్షమాపణ చెప్పాలని డిమాండ్ చేసింది.

గౌరవమైన ప్రధాని పదవిలో ఉన్న మోడీపై ఇలాంటి పదాలా..? అంటూ తీవ్రంగా విరుచుకు పడింది. మన ప్రధానిని ప్రపంచ దేశాలు గౌరవిస్తున్నాయని తెలిపింది. మరి రాహుల్‌గాంధీకి ఏమైంది…? అని ప్రశ్నించింది. ఆయన తల్లి గుజరాత్‌లో మౌత్‌ కా సౌదాఘర్‌ అని గతంలో తీవ్ర వ్యాఖ్యలు చేశారని బీజేపీ సీనియర్ నేత రవిశంకర్ ప్రసాద్ అన్నారు. ఈ సారైనా రాహుల్​ క్షమాపణ చెప్తారని ఆశిస్తున్నామన్నారు. కానీ ఆయన చెప్పరు కదా…? అని తెలిపారు. గతంలో సుప్రీం కోర్టులో కూడా క్షమాపణలు చెప్పేందుకు నిరాకరించారన్నారు. దేశప్రజలు రాహుల్ గాంధీకి గట్టి సమాధానం చెబుతారని పేర్కొన్నారు.