Breaking News

ఉత్తరాఖండ్‌ (Uttarakhand) లో టెన్నెల్ (Tunnel) కూలడంతో 41 మంది కార్మికులు అందులో చిక్కుకు పోయారు. వారిని రక్షించేందుకు గత పది రోజులుగా అధికారులు తీవ్ర ప్రయత్నాలు చేస్తున్నారు. ఈ క్రమంలో తాజాగా ఉత్తరాఖండ్ సీఎం పుష్కర్ సింగ్ ధామీకి ప్రధాని నరేంద్ర మోడీ ఫోన్ కాల్ చేశారు. రెస్క్యూ ఆపరేషన్ గురించి సీఎంను ఆయన ఆరా తీశారు.

ఈ మేరకు విషయాన్ని సీఎం కార్యాలయం వెల్లడించింది. రెస్క్యూ ఆపరేషన్ జరుగుతున్న విధానం గురించి సీఎంను అడిగి ప్రధాని తెలుసుకున్నారని చెప్పింది. సహాయక చర్యల కోసం కావాల్సిన అత్యవసరమైన యంత్రాలు, వనరులను కేంద్రం అందిస్తోందని ఈ సందర్బంగా ప్రధాని చెప్పారని తెలిపింది. కేంద్ర, రాష్ట్ర ప్రభుత్వాల మధ్య సమన్వయంతో కార్మికులను సురక్షితంగా టన్నెల్ నుంచి బయటకు తీసుకు వస్తామని ప్రధాని మోడీ భరోసా ఇచ్చారని పేర్కొంది.

కార్మికులు మనోధైర్యంతో ఉండాలని ప్రధాని మోడీ సూచించారని ప్రకటనలో వివరించింది. ఈ నెల 12న ఉత్తర కాశీలో నిర్మాణంలో ఉన్న టన్నెల్ కూలి పోయింది. ఆ సమయంలో 41 మంది కార్మికులు ఆ సొరంగంలో చిక్కుకు పోయారు. సమాచారం అందుకున్న అధికారులు అక్కడకు చేరుకున్నారు. వెంటనే సహాయక చర్యలు ప్రారంభించారు. ఆ తర్వాత టన్నెల్ మరోసారి కూలడం, భారీగా కొండ చరియలు, రాళ్లు పడటంతో సహాయక చర్యలు ఆలస్యం అవుతోంది.

టన్నెల్ లోని కార్మికులకు ఓ పైపు ద్వారా ఆహార పదార్థాలు, తాగునీటిని, ఆక్సిజన్ ను పంపిస్తున్నారు. రెస్క్యూ ఆపరేషన్ కోసం విదేశాల నుంచి ప్రత్యేకమైన డ్రిల్లింగ్ మిషన్లు కూడా తెప్పిచారు. తాజాగా కార్మికులను రక్షించేందుకు ఐదు ప్రణాళికలు రచించినట్టు అధికారులు తెలిపారు. ఈ కార్యాచరణ ప్రణాళికలను ఐదు ఏజెన్సీలు అమలు చేస్తాయని పేర్కొన్నారు.

అసెంబ్లీ (Assembly) ఆమోదించిన బిల్లులకు క్లియరెన్స్ ఇవ్వడంలో జరిగిన జాప్యంపై తమిళనాడు గవర్నర్ ఆర్ఎన్ రవి (RN Ravi)కి సుప్రీం కోర్టు (Supreme Court) పలు ప్రశ్నలు సంధించింది. బిల్లులకు 2020లో అసెంబ్లీ ఆమోదం తెలిపిందని తెలిపింది. ఈ మూడేండ్ల కాలంలో బిల్లులను ఆమోదించకుండా గవర్నర్ ఏం చేస్తున్నారంటూ సర్వోన్నత న్యాయ స్థానం ప్రశ్నించింది.

కేరళ, పంజాబ్ ప్రభుత్వాలు కూడా ఇలాంటి పిటిషన్లు దాఖలు చేయగా వాటిపై సుప్రీం కోర్టు విచారణ జరుపుతోంది. ఈ నేపథ్యంలో గవర్న్‌కు పలు ప్రశ్నలు వేసింది. ఒక బిల్లును అసెంబ్లీకి తిరిగి పంపకుండా గవర్నర్ ఆమోదాన్ని నిలిపివేయగలరా?” అనే అంశాన్ని సుప్రీం కోర్టు లేవనెత్తింది. ఇది ఇలా వుంటే తమిళనాడు అసెంబ్లీ ఆమోదించిన పది బిల్లులను గవర్నర్ తిప్పి పంపారు.

ఈ క్రమంలో మళ్లీ అవే బిల్లులను అసెంబ్లీ యథాతథంగా ఆమోదించింది పంపింది. రాజ్యాంగం ప్రకారం గవర్నర్ తిప్పి పంపిన బిల్లును అసెంబ్లీ మళ్లీ యతాథంగా ఆమోదించి పంపితే ఆ బిల్లును గవర్నర్ తప్పకుండా ఆమోదించాల్సి వుంటుంది. దీంతో ఇప్పుడు గవర్నర్ ఏం చేయబోతున్నారనే దానిపై ఆసక్తి నెలకొంది.

సర్వోన్నత న్యాయస్థానం కూడా ఇదే వ్యాఖ్యలు చేసింది. ఆ బిల్లులను అసెంబ్లీ మళ్లీ ఆమోదించి పంపిందని తెలిపింది. ఒక బిల్లును మరోసారి ఆమోదిస్తే దానికి ఆర్థిక బిల్లులతో సమానంగా అవకాశాలు ఉంటాయని చెప్పింది. ఇప్పుడు గవర్నర్ ఎలాంటి చర్యలు తీసుకుంటారో చూద్దామని సుప్రీం కోర్టు వ్యాఖ్యానించింది. అనంతరం తదుపరి విచారణను వచ్చే నెల 1కి వాయిదా వేస్తున్నట్టు ధర్మాసనం వెల్లడించింది.

అయోధ్య (Ayodhya) రామ మందిరంలో ‘రామ్ లల్లా’ (Ram Lalla) విగ్రహ ప్రాణ ప్రతిష్టకు ముహూర్తం ఖరారైంది. వచ్చే ఏడాది జనవరి 22న మధ్యాహ్నం 12.20 గంటలకు ‘రామ్ లల్లా’ విగ్రహానికి ప్రాణ ప్రతిష్ట చేయనున్నారు. మృగశిర నక్షత్రం అభిజిత్ ముహూర్తంలో ప్రధాని మంత్రి చేతుల మీదుగా ప్రాణ ప్రతిష్టను నిర్వహించనున్నారు. ఈ కార్యక్రమానికి అంతర్జాతీయ స్థాయిలో ప్రచారం కల్పించాలని విశ్వహిందూ పరిషత్ నేతలు నిర్ణయించారు.

సాకేత్ నిలయంలో నిర్వహించిన సమావేశంలో ఈ మేరకు నిర్ణయాన్ని తీసుకున్నారు. అయోధ్య ఆలయానికి సంబంధించి తొలి విడత ప్రచారాన్ని ఆదివారం నుంచి ప్రారంభించారు. వచ్చే నెల 20 వరకు ఈ ప్రచారాన్ని నిర్వహించనున్నారు. ఈ కార్యక్రమం కోసం స్టీరింగ్ కమిటీలను ఏర్పాటు చేయనున్నారు. జిల్లా, బ్లాక్ స్థాయిల్లో కమిటీలను ఏర్పాటు చేసి ఈ కార్యక్రమానికి ఎలాంటి ఇబ్బందులు ఎదురు కాకుండా చూస్తామని వీహెచ్ పీ నేతలు వెల్లడించారు.

జిల్లా, బ్లాక్ స్థాయి కమిటీలో అయోధ్య రామ మందిర ఉద్యమానికి సంబంధించిన కరసేవకులు కూడా ఉన్నారు. ఈ కమిటీలు మొత్తం 250 ప్రాంతాల్లో సమావేశాలు నిర్వహించనున్నాయి. వీలైనంత ఎక్కువ మంది ఆలయ ప్రారంభ వేడుకల్లో పాల్గొనేలా ఈ కమిటీలు చూస్తాయని వీహెచ్ పీ నేతలు పేర్కొన్నారు. ఇక రెండవ దశ ప్రచారాన్ని జనవరి 1 నుంచి ప్రారంభించనున్నారు.

ఇందులో భాగంగా డోర్ టు డోర్ ప్రచారాన్ని చేపట్టనున్నారు. ప్రతి ఇంటికి రామ్ లల్లా చిత్ర పటాన్ని, కరపత్రాలను అందించనున్నారు. ఆలయ ప్రారంభోత్సవరం రోజు దీపోత్సవం జరుపుకోవాలని ఈ దశలో ప్రచారం చేయనున్నారు. ఇక మూడవ దశ ప్రచారాన్ని జనవరి 26 నుంచి ఫిబ్రవరి 22 వరకు నిర్వహించనున్నారు. అవధ్ ప్రావిన్స్ లోని కార్మికులకు జనవరి 31 నుంచి ఫిబ్రవరి 1 తేదీల్లో దర్శనం కల్పించాలని యోచిస్తున్నారు.

ఉత్తరాఖండ్‌లో సొరంగం (Tunnel)లో రెస్క్యూ ఆపరేషరేషన్ (Rescue Operation) కొనసాగుతోంది. తాజాగా కార్మికులను రక్షించేందుకు ఐదు ఎంపికల కార్యాచరణ ప్రణాళికను ఖరారు చేసినట్టు కేంద్రం తెలిపింది. ఈ ఐదు ప్రత్యామ్నాయాలపై ఐదు ప్రత్యేక ఏజెన్సీలు పని చేస్తాయని రవాణా, జాతీయ రహదారుల శాఖ కార్యదర్శి అనురాగ్ జైన్ వెల్లడించారు.

సొరంగంలో చిక్కుకున్న 41 మంది కార్మికుల విలువైన ప్రాణాలను రక్షించేందుకు అన్ని రకాలుగా కృషి చేయాలని కేంద్ర ప్రభుత్వం నిర్ణయించినట్టు ఆయన తెలిపారు. నిపుణుల సలహా మేరకు వివిధ ఎంపికలను పరిశీలించిన తర్వాత ఉన్నత స్థాయి సమావేశంలో ఈ మేరకు నిర్ణయం తీసుకున్నట్టు వివరించారు.

ఓఎన్‌జీసీ, ఎస్జీవీఎన్ఎల్, ఆర్‌వీఎన్ఎల్, ఎన్ హెచ్ఐడీసీఎల్, టీహెచ్ డీసీఎల్ లు ఈ పనులను నిర్వహిస్తాయని తెలిపారు. ఈ సంస్థలకు బోర్డర్ రోడ్ ఆర్గనైజేషన్, ఇండియన్ ఆర్మీ సహాయ సహకారాలు అందిస్తాయన్నారు. బోర్డర్ రోడ్స్ ఆర్గనైజేషన్ అప్రోచ్ రోడ్‌ను పూర్తి చేసిన తర్వాత కార్మికులకు అత్యవసరమైన వస్తువుల సరఫరా కోసం ఆర్వీఎన్ఎల్ మరొక వర్టికల్ పైప్‌లైన్ పనిని ప్రారంభించిందని అధికార వర్గాలు వెల్లడించాయి.

ఎన్‌హెచ్ఐడీసీఎల్ భద్రతా ఏర్పాట్లను పూర్తి చేసిన తర్వాత సిల్క్యారా చివరి నుంచి డ్రిల్గింగ్‌ను కొనసాగిస్తుందన్నాయి. తెహ్రీ హైడ్రో ఎలక్ట్రిక్ డెవలప్‌మెంట్ కార్పొరేషన్ (టీహెచ్ డీసీ) బార్కోట్ నుండి మైక్రో టన్నెలింగ్‌పై పని చేస్తుందన్నాయి. దీని కోసం భారీ యంత్రాలను ఇప్పటికే సమీకరించారని చెప్పాయి.

సట్లెజ్ జల్ విద్యుత్ నిగమ్ లిమిటెడ్ (ఎస్‌జేవీఎన్ఎల్) టన్నెల్ లో చిక్కుకున్న కార్మికులను రక్షించడానికి సొరంగం పై నుండి నిలువుగా డ్రిల్లింగ్ చేస్తుందని పేర్కొన్నాయి. ఇక డీప్ డ్రిల్లింగ్‌లో నైపుణ్యం ఉన్న ఓఎన్ జీసీ సంస్థ బార్కోట్ టన్నెల్ చివరి ప్రాంతం నుంచి వర్టికల్ డ్రిల్లింగ్ కోసం ఇప్పటికే పనులు కూడా ప్రారంభించిందని వెల్లడించాయి.

వరల్డ్ కప్‌ (World Cup)లో వరుస విజయాలతో దూసుకు పోతున్న టీమిండియా (Team India)కు ఫైనల్ మ్యాచ్‌లో ఘోర పరాజయం ఎదురైంది. తుది మ్యాచ్‌లో కంగారుల చేతిలో భారత జట్టు ఓటమి పాలైంది. దీంతో అభిమానులు నిరాశకు గురయ్యారు. ఈ సారి కప్ టీమిండియాదే అనుకున్న అభిమానులు ఈ పరాజయాన్ని జీర్ణించుకోలేక పోతున్నారు.

అటు టీమిండియా ఆటగాళ్లు సైతం తీవ్రమైన బాధలో ఉన్నారు. సగటు భారత అభిమానుల ఆశను నెరవేర్చ లేకపోయినందుకు తీవ్రంగా బాధపడుతున్నారు. ఆటలో గెలుపు ఓటములు సహజం అనే విషయం తెలిసినప్పటికీ ఓటమిని జీర్ణించుకో లేక పోతున్నారు. అంతకు ముందు మ్యాచ్‌ల్లో కనిపించిన ఉత్సహం ఇప్పుడు వాళ్ల టీమ్ ఇండియా సభ్యుల్లో కనిపించడం లేదు.

ఈ క్రమంలో ప్రధాని మోడీ ఓ ట్వీట్ చేశారు. భారత క్రీడాకారుల టాలెంట్ గొప్పదని అని ఆయన అభినందించారు. వరల్డ్ కప్ పోరులో మీరు చూపించిన మీరు చూపించిన చిత్త శుద్ది నిజంగా అత్యంత విశిష్టమైనదని ఆయన కొనియాడారు. మీరంతా ఒక గొప్ప స్ఫూర్తితో ఆడారని ప్రధాని అన్నారు.

మీరు చూపించిన గొప్ప స్ఫూర్తి దేశానికి గొప్ప గౌరవాన్ని కలిగించిందన్నారు. కేవలం ఈ రోజు మాత్రమే కాదు… ప్రతీ సారి మీకు మద్దతుగా మేము నిలబడతామని వారిలో స్ఫూర్తిని నింపే ప్రయత్నం చేశారు. దీంతో ప్రధాని మోడీ ట్వీట్ పై నెటిజన్లు స్పందిస్తున్నారు. గెలుపులో కాదు ఓటమిలో కూడా అండగా నిలిచే వారే అసలైన నాయకులు అని కొనియాడుతున్నారు.