Featured

– లోక్ సభ ఎన్నికలపై పార్టీల ఫోకస్
– మెదక్ విషయంలో బీఆర్ఎస్ వర్సెస్ కాంగ్రెస్
– కేసీఆర్ బరిలో ఉంటారని ప్రచారం
– కాంగ్రెస్ నుంచి సోనియా, విజయశాంతి పేర్లు
– 2004 నుంచి బీఆర్ఎస్ కు కంచుకోటగా మెదక్
– అసెంబ్లీ ఎన్నికల్లో 7 సీట్లలో 6 గెలుపు

తెలంగాణ (Telangana) లో లోక్ సభ ఎన్నికలకు పార్టీలు సమయాత్తం అవుతున్నాయి. అసెంబ్లీ ఎలక్షన్స్ లో సత్తా చాటిన కాంగ్రెస్ (Congress).. అదే స్ట్రాటజీతో ముందుకు వెళ్లాలని చూస్తోంది. ఈసారన్నా పరువు నిలుపుకోవాలని బీఆర్ఎస్ (BRS) భావిస్తుంటే… పెరిగిన ఓట్ షేర్ ని మరింత పెంచుకోవాలని బీజేపీ (BJP) ప్లాన్ చేస్తోంది. మూడు ప్రధాన పార్టీలు 10 స్థానాల దాకా గెలవాలని పట్టుదలతో ఉన్నాయి. అయితే.. మెదక్ (Medak) స్థానం విషయంలో ఎక్కువ ఫోకస్ పెట్టినట్టు కనిపిస్తోంది. ముఖ్యంగా.. కాంగ్రెస్, బీఆర్ఎస్ మధ్య పోటీ తీవ్రంగా ఉండే ఛాన్స్ కనిపిస్తోంది. ఈ పార్టీల నుంచి హేమాహేమీలు బరిలోకి దిగుతారనే ప్రచారం జరుగుతోంది.

గత 20 ఏండ్లుగా తెలంగాణ అంటే కేసీఆర్.. కేసీఆర్ అంటే తెలంగాణ అనేలా రాజకీయాలు నడిచాయి. ఉద్యమకారుడిగా, సీఎంగా ఆయన పాత్ర ఎవరూ మరిచిపోలేనిది. కానీ, అసెంబ్లీ ఎన్నికల్లో ఓటమి తర్వాత ఆయన సైలెంట్ అయిపోయారు. కొద్ది రోజులు ఫాంహౌస్ లో ఉన్న కేసీఆర్.. తర్వాత గాయం కారణంగా హాస్పిటల్.. అనంతరం హైదరాబాద్ ఇంట్లో రెస్ట్ లో ఉన్నారు. అయితే.. మూడు నెలల్లో రానున్న పార్లమెంట్ ఎన్నికల్లో ఆయన పోటీ చేస్తారనే ప్రచారం జరుగుతోంది. అది కూడా మెదక్ స్థానం నుంచి.

ఈ ఎన్నికలు బీఆర్ఎస్ కు కీలకం కాగా.. ఎక్కువ సీట్లు సాధిస్తేనే క్యాడర్, నేతలు ఇతర పార్టీలకు జంప్ కాకుండా ఉంటారు. ఒకవేళ సత్తా చాటకుంటే జాతీయ పార్టీల ధాటికి తట్టుకోవడం కష్టమే. అందుకే, కేసీఆరే స్వయంగా రంగంలోకి దిగుతునట్టు తెలుస్తోంది. మెదక్ స్థానం 2004 నుంచి బీఆర్ఎస్ కు కంచుకోటగా ఉంది. అప్పట్లో ఆలే నరేంద్ర గెలిచారు. 2009లో విజయశాంతి, తర్వాత కేసీఆర్, కొత్త ప్రభాకర్ రెడ్డి విజయం సాధించారు. మొన్నటి అసెంబ్లీ ఎన్నికల్లో మెదక్ పరిధిలోని 7 అసెంబ్లీ స్థానాల్లో 6 గెలిచింది బీఆర్ఎస్. ఈ నేపథ్యంలో ఈ లోక్ సభ స్థానంలో కచ్చితంగా విజయం సాధిస్తామనే ధీమాతో కేసీఆర్ బరిలోకి దిగుతున్నట్టు తెలుస్తోంది.

కాంగ్రెస్ కూడా మెదక్ స్థానం విషయంలో గట్టి పట్టుదలతో ఉంది. పార్టీ అగ్రనేత సోనియా గాంధీని ఈసారి తెలంగాణలో పోటీకి నిలపాలని మెదక్, మల్కాజ్ గిరి స్థానాలను ఆప్షన్ గా ఉంచింది రాష్ట్ర నాయకత్వం. సోనియా గాంధీ నుంచి గ్రీన్ సిగ్నల్ వస్తే మెదక్ నుంచే పోటీ చేస్తారని ఎక్కువ మంది అనుకుంటున్నారు. ఎందుకంటే గతంలో ఇందిరా గాంధీ మెదక్ నుంచి పోటీ చేసి గెలిచారు. కానీ, ఇప్పుడు కాంగ్రెస్ కు అంతగా బలం లేదు. సిద్దిపేటలో బీఆర్ఎస్ కు వచ్చే భారీ మెజార్టీ పార్లమెంట్ ఎన్నికలపై ప్రతీసారి ప్రభావం చూపుతోంది.

మరోవైపు, సోనియా గాంధీ కాదంటే.. మెదక్ నుంచి కాంగ్రెస్ అభ్యర్థిగా విజయశాంతి బరిలోకి దిగే ఛాన్స్ ఉంది. బీజేపీ నుంచి కాంగ్రెస్ లో చేరిన సమయంలోనే ఈ మేరకు హామీ ఇచ్చారు హస్తం నేతలు. 2009 ఎన్నికల్లో టీఆర్ఎస్ నుంచి పోటీచేసి ఎంపీగా గెలిచారు ఈమె. ఆ సమయంలో టీఆర్ఎస్ నుంచి కేసీఆర్, విజయశాంతి ఇద్దరే ఎంపీలుగా ఉన్నారు. తరువాత జరిగిన పరిణామాల్లో విజయశాంతి పార్టీలు మారారు. ఇప్పుడు బీఆర్ఎస్ నుంచి కేసీఆర్ బరిలో ఉంటే.. కాంగ్రెస్ నుంచి విజయశాంతి ఢీ కొట్టే అవకాశం ఉంటుంది.

తెలంగాణ (Telangana) అసెంబ్లీ ఎన్నికల ఫలితాల నేపథ్యంలో బీజేపీ (BJP)లో అంతర్మథనం మొదలైంది. ఈ ఫలితాలపై బీజేపీ అధిష్టానం తీవ్ర అసంతృప్తితో ఉన్నట్టు కనిపిస్తోంది. ఓ దశలో రాష్ట్రంలో తిరుగులేని శక్తి ఉన్న పార్టీ తిరోగమనం చెందడంపై అగ్రనేతలు అసహనం వ్యక్తం చేస్తున్నట్టు తెలుస్తోంది. ముఖ్యంగా క్రమ శిక్షణకు పెట్టింది పేరుగా ఉన్న పార్టీలో గ్రూపు రాజకీయాలపై అగ్రనేతలు ఆగ్రహంగా ఉన్నట్టు సమాచారం.

తాజాగా తెలంగాణ పర్యటనలో భాగంగా నగరంలోని నోవాటెల్ హోటల్ లో జరిగిన పార్టీ శ్రేణుల సమావేశంలో అమిత్​ షా పాల్గొన్నారు. తాజా పర్యటనలో బీజేపీ నేతలకు అమిత్ షా క్లాస్ పీకారు. చేజేతులా తెలంగాణలో అధికారాన్ని వదులుకున్నామని రాష్ట్ర నేతలపై ఆయన సీరియస్ అయినట్టు సమాచారం. అనుకున్న స్థాయిలో అసెంబ్లీ స్థానాల్లో విజయం సాధించకపోవడంపై ఆయన తీవ్ర అసహనం వ్యక్తం చేశారు.

వర్గ విభేదాలే కొంప ముంచాయని తెలిపారు. పార్టీలో గ్రూపు రాజకీయాలను సహించబోమని ఆయన వార్నింగ్ ఇచ్చారు. గత ఎన్నికలతో పోలిస్తే ఈ సారి పార్టీకి ఓటింగ్ శాతం పెరగడంపై ఆయన హర్షం వ్యక్తం చేశారు. లోక్ సభ సార్వత్రిక ఎన్నికలను దృష్టిలో పెట్టుకుని నేతలంతా సమన్వయంతో పని చేయాలని బీజేపీ శ్రేణులకు షా దిశా నిర్దేశం చేశారు. రాష్ట్రంలో అత్యదిక ఎంపీ సీట్లలో విజయమే టార్గెట్‌గా పార్టీ శ్రేణులు సమిష్టింగా పని చేయాలని సూచించారు.

ప్రతి బీజేపీ కార్యకర్త కష్టపడి పనిచేస్తే 400 పైగా సీట్లు గెలుస్తామని పార్టీ శ్రేణుల్లో జోష్ నింపారు. గత ఎన్నికల్లో పార్టీకి కేవలం ఒక్క సీటు మాత్రమే వచ్చిందని, కానీ ఈ సారి 8 సీట్లు వచ్చాయని వెల్లడించారు. కార్యకర్తలంతా సమిష్టిగా పని చేస్తే వచ్చే అసెంబ్లీ ఎన్నికల్లో రాష్ట్రంలో బీజేపీ అధికారంలోకి వస్తామన్నారు. రాష్ట్రంలో 64 నుంచి 95 వరకు సీట్లు రావచ్చన్నారు.

ఈసారి అభ్యర్థులను ముందుగానే ప్రకటిస్తామన్నారు. సిట్టింగ్‌లకు మరోసారి అవకాశం ఇస్తామని షా స్పష్టం చేశారు. మిగిలిన చోట్ల సర్వే నిర్వహించి బలమైన అభ్యర్థులకు టికెట్లు కేటాయిస్తామన్నారు. సమావేశం అనంతరం అమిత్ షా చార్మినార్ భాగ్యలక్ష్మీ అమ్మవారి ఆలయానికి వెళ్లారు. అక్కడ ఆయన ప్రత్యేక పూజలు చేశారు. అనంతరం రంగారెడ్డి జిల్లా కొంగర కలాన్​లోని శ్లోక కన్వెక్షన్​లో జరిగే బీజేపీ విస్తృతస్థాయి సమావేశంలో పాల్గొంటారు.

రంగారెడ్డి జిల్లా ఇబ్రహీంపట్నంలోని కొంగర కలాన్​లో శ్లోక కన్వెక్షన్​లో బీజేపీ రాష్ట్ర విస్తృత స్థాయి సమావేశాన్ని నిర్వహించారు. ఈ సమావేశానికి ముఖ్య అతిథిగా అమిత్​ షా హాజరయ్యారు. రాబోయే ఎన్నికల్లో 25 శాతానికి పైగా ఓట్లు 10కి పైగా ఎంపీ సీట్లే లక్ష్యంగా పని చేయాలని పార్టీ శ్రేణులకు ఆయన పిలుపునిచ్చారు. ప్రతి కార్యకర్త పార్టీ తని అని భావించి పనిచేయాలన్నారు.

గత కేసీఆర్ సర్కార్ పెద్ద ఎత్తున అవినీతికి పాల్పడిందని ఆరోపణలు గుప్పించారు. మాదిగ సమాజానికి న్యాయం చేస్తున్న ఏకైక పార్టీ బీజేపీనే అని పేర్కొన్నారు. ముందుగా సమావేశంలో రాజకీయ తీర్మానాన్ని డీకే అరుణ ప్రవేశపెట్టారు. రాబోయే ఎన్నికల్లో మోడీ విజయం చారిత్రక అవసరమనే తీర్మానాన్ని ప్రవేశపెట్టగా దాన్ని పార్టీ ఏకగీవ్రంగా ఆమోదించింది.

తెలంగాణ (Telangana) ప్రజల ఆశీర్వాదం, నిరుద్యోగుల పోరాటం వల్లే రాష్ట్రంలో కాంగ్రెస్ (Congress) అధికారంలోకి వచ్చిందన్నారు ముఖ్యమంత్రి రేవంత్ రెడ్డి (Revanth Reddy). హైదరాబాద్‌ లోని బీఆర్‌ అంబేద్కర్‌ కళాశాలలో స్నాతకోత్సవ కార్యక్రమాన్ని ఏర్పాటు చేశారు. దీనికి ముఖ్య అతిథిగా రేవంత్‌ రెడ్డి హాజరయ్యారు. నిర్దిష్టమైన లక్ష్యాన్ని పెట్టుకుని ఆ దిశగా పని చేస్తే కచ్చితంగా గమ్యాన్ని చేరుకోవచ్చు అని విద్యార్థులకు సూచించారు.

డబ్బులుంటేనే రాజకీయాలు అనే ఆలోచన పక్కన పెట్టాలని చెప్పారు రేవంత్. ప్రజల్లోకి వెళ్లి సేవ చేస్తే తప్పకుండా ఆదరిస్తారని అన్నారు. దేశంలో గాంధీ కుటుంబంలా, రాష్ట్రంలో కాకా కుటుంబం.. పార్టీకి అండగా ఉంటుందని తెలిపారు. ఈ క్రమంలోనే విద్యార్థుల ఉజ్వల భవిష్యత్‌ కు అండగా ఉంటామని హామీ ఇచ్చారు. కఠోర దీక్షతో తెలంగాణను దేశంలోనే ఆదర్శంగా తీర్చిదిద్దే ప్రయత్నం చేస్తున్నామని తెలిపారు.

అంతకుముందు, కాలేజీలో కాకా విగ్రహాన్ని ఆవిష్కరించారు సీఎం. పూలమాల వేసి నివాళి అర్పించారు. ఈ కార్యక్రమంలో అంబేద్కర్ ఇనిస్టిట్యూషన్ కరస్పాండెంట్ సరోజా వివేక్, వంశీకృష్ణ పాల్గొన్నారు. తెలంగాణ ఉద్యమంలో కాకా ఫ్యామిలీ ముందుందని గుర్తు చేశారు రేవంత్. ఢిల్లీలోని కాంగ్రెస్ ఆఫీస్ కూడా కాకా పేరునే ఉందని తెలిపారు. దేశ నిర్మాణంలో కూడా ఆయన పాత్ర ఉందన్నారు.

వివేక్, వినోద్ లవకుశులని కొనియాడారు సీఎం. ఎలాంటి లాభాపేక్ష లేకుండా విద్యార్థులకు, విద్యను అందిస్తున్న ఘనత కాకా కుటుంబానిదని కొనియాడారు. ఈ కార్యక్రమంలో మంత్రులు పొన్నం ప్రభాకర్, శ్రీధర్ బాబు, ఎమ్మెల్యేలు వివేక్, వినోద్ పాల్గొన్నారు. ఎమ్మెల్యే వివేక్ మాట్లాడుతూ.. కాకా ఒక్క డ్రీమ్ ఉన్న నాయకుడన్నారు. రాష్ట్రపతి కావాలన్న ఒక్క కోరిక ఆయనకు నెరవేరలేదని తెలిపారు. కాకా సూచనలతో పేదలకు మెరుగైన విద్య అందిస్తున్నామన్నారు.

– వివాదాస్పదంగా తబ్లిఘీ జమాత్ సమ్మేళనం
– ముస్లింల మత కార్యక్రమానికి ప్రభుత్వ నిధులు
– ఆర్థిక కష్టాలు అని చెప్పుకుంటూ డబ్బులెలా ఇస్తారు?
– ఉగ్రవాదులతో సంబంధాలున్న సంస్థను ప్రోత్సహిస్తారా?
– హస్తాన్ని ప్రశ్నిస్తున్న కాషాయ నేతలు
– వచ్చే నెల 6న పరిగిలో తబ్లిఘీ జమాత్ సమావేశం
– లోక్ సభ ఎన్నికల్లో ఓట్ల కేసమే ఈ ప్లాన్ వేశారా?

దుబారా ఖర్చులుండవు.. క్యాంప్ ఆఫీస్ చిన్న షెడ్డు చాలు.. కేసీఆర్ (KCR) చేసిన తప్పుల్ని చేయం అంటూ సీఎం రేవంత్ రెడ్డి (CM Revanth Reddy) అధికారం చేపట్టినప్పటి నుంచి తెగ గప్పాలు కొడుతున్నారు. కానీ, చేతల్లో మాత్రం తప్పటడుగులు వేస్తున్నారనే అపవాదును మూటగట్టుకుంటున్నారు. అభివృద్ధే తమ లక్ష్యం అంటూ చెప్పుకుంటున్న కాంగ్రెస్ (Congress) ప్రభుత్వం.. ముస్లింలకు సంబంధించిన సొంత సమావేశానికి నిధులు కేటాయించడం వివాదాస్పదమైంది. పైగా, ఆ సంస్థకు ఉగ్రవాదులతో లింకులున్నాయనే ఆరోపణలు కూడా ఉన్నాయి.

6న తబ్లిఘీ జమాత్ సమ్మేళనం

వికారాబాద్ (Vikarabad) జిల్లాలోని పరిగి మండలం న్యామత్‌ నగర్‌ గ్రామంలో వచ్చే నెల 6వ తేదీ నుంచి 3 రోజుల పాటు తబ్లిఘీ జమాత్ (Tablighi Jamaat) సమ్మేళనం జరగనుంది. ఇది ముస్లింలకు సంబంధించిన ప్రచార కార్యక్రమం. పాకిస్తాన్‌, బంగ్లాదేశ్‌, ఏషియా దేశాలకు చెందిన వారు, దేశంలోని అన్ని రాష్ట్రాల నుంచి దీనికి హాజరయ్యే అవకాశం ఉంది. ఈ సమ్మేళనానికి భారీ ఎత్తున ముస్లిం మత పెద్దలు ఏర్పాట్లు చేస్తున్నారు. సుమారు 300 ఎకరాల్లో సభా ప్రాంగణం, పార్కింగ్‌ కోసం ఏర్పాట్లు జరుగుతున్నాయి. దాదాపు ఐదు లక్షల మంది హాజరవుతారని నిర్వాహకులు చెబుతున్నారు.

ప్రభుత్వ నిధుల విడుదల

తబ్లిఘీ జమాత్ సమ్మేళనం కార్యక్రమానికి తెలంగాణలో కొత్తగా కొలువుదీరిన కాంగ్రెస్ ప్రభుత్వం నిధులు విడుదల చేసింది. అక్షరాలా 2 కోట్ల 45 లక్షల 93 వేల 847 రూపాయలు మంజూరు చేసింది. దీనికి సంబంధించిన ఉత్తర్వులు కూడా జారీ అయ్యాయి. నిధులు కేటాయించిన సీఎం రేవంత్‌ రెడ్డికి, ప్రభుత్వానికి నిర్వాహకులు సైతం ప్రత్యేక ధన్యవాదాలు తెలిపారు. ప్రభుత్వ నిధులతో భారీ స్థాయిలో ఈ సమ్మేళనానికి ఏర్పాట్లు జరుగుతున్నాయి.

కాషాయ నేతల అభ్యంతరం

ముస్లింల సమ్మేళనానికి నిధులు కేటాయించడంపై బీజేపీ మండిపడుతోంది. మతపరమైన కార్యక్రమానికి నిధులు ఎలా కేటాయిస్తారు అంటూ ఆగ్రహం వ్యక్తం చేస్తున్నారు కాషాయ నేతలు. ఇలాంటి సమ్మేళనాలను ఇస్లాం మత బోధనల కోసమే నిర్వహిస్తూ ఉంటారని.. ముస్లిం మతానికి చెందినవారు మాత్రమే వ్యక్తిగతంగా ఖర్చు పెడుతుంటారని చెబుతున్నారు. అలాంటి కార్యక్రమానికి ప్రభుత్వం నిధులు కేటాయించడం సరికాదంటూ మండిపడుతున్నారు. రాష్ట్రం దివాళా తీసిందని.. వడ్డీలు కట్టడానికే ఖజానా సరిపోవడం లేదని చెబుతున్న కాంగ్రెస్ ప్రభుత్వం.. ఈ కార్యక్రమానికి నిధులివ్వడమేంటని ఎంపీ బండి సంజయ్ ప్రశ్నించారు. తుక్టే గ్యాంగ్ తో రేవంత్ రెడ్డి రాష్ట్రాన్ని ఏం చేయాలనుకుంటున్నారని నిలదీశారు. ఎమ్మెల్యే రాజాసింగ్ స్పందిస్తూ.. ఇరాన్, ఉబ్జెకిస్తాన్, తజికిస్తాన్, కజికిస్తాన్, రష్యా, సౌదీ అరేబియా సహా అనేక దేశాలలో ఈ సంస్థపై నిషేధం కొనసాగుతోందని అటువంటి తబ్లిఘీ జమాత్ కు రేవంత్ రెడ్డి ప్రభుత్వం నిధులు ఎందుకు విడుదల చేసిందని ప్రశ్నించారు. తీవ్రవాద సిద్ధాంతం కలిగిన సంస్థకు కాంగ్రెస్ ప్రభుత్వం రెడ్ కార్పెట్‌ తో స్వాగతం పలుకుతోందని మండిపడ్డారు. ఈ సంస్థను ప్రోత్సహిస్తే ఉగ్రవాదాన్ని ప్రోత్సహించినట్లే అవుతుందన్నారు.

లోక్ సభ ఎన్నికల ప్లానేనా..?

త్వరలో లోక్ సభ ఎన్నికలు ఉన్నాయి. పదేళ్ల బీజేపీ సర్కార్ ను కూల్చేందుకు విపక్ష నేతలు కూటమిగా ఏర్పడ్డారు. ఈ నేపథ్యంలోనే ముస్లింలను మచ్చిక చేసుకునేందుకు రేవంత్ రెడ్డి నిధులు కేటాయించినట్టుగా చెప్పుకుంటున్నారు. అసెంబ్లీ ఎన్నికల సమయంలో తబ్లిఘీ జమాత్ మత పెద్దలు కాంగ్రెస్‌ పార్టీకి మద్దతు తెలుపుతూ తీర్మానాలు కూడా చేశారు. దానికి ప్రతిఫలంగా ఈ సమ్మేళనానికి నిధులు కేటాయించినట్టుగా మాట్లాడుకుంటున్నారు. అయితే.. ఈ కార్యక్రమానికి ఎలాంటి ఆటంకం కలిగించినా పార్లమెంట్ ఎన్నికల్లో ముస్లిం ఓట్లు ప్రభావం చూపే అవకాశం ఉంది.

అసలేంటీ తబ్లిఘీ జమాత్..?

1927లో హర్యానాలోని మేవాట్ లో ప్రారంభమైంది ఈ సంస్థ. ప్రపంచ వ్యాప్తంగా ఇస్లాం మత బోధనలు, ప్రచారం చేయటమే దీని లక్ష్యం. మైలానా ఇలియాస్ కాంద్లావి దీని వ్యవస్థాపకుడిగా చెబుతుంటారు. 213 దేశాల్లో ఈ సంస్థ విస్తరించింది. ప్రపంచ వ్యాప్తంగా 25 కోట్ల మంది దీన్ని ఫాలో అవుతారు. అయితే.. ఈ సంస్థ మీద అనేక ఆరోపణలు ఉన్నాయి. 2011లో వికిలీక్స్ తబ్లిఘీ జమాత్ మీద సంచలన ఆరోపణలు చేసింది. కరడుగట్టిన ఉగ్రవాద సంస్థ అల్ ఖైదాతో దీనికి సంబంధం ఉందని పేర్కొంది. కానీ, ఆ సంస్థ మాత్రం దీన్ని ఖండిస్తూ వస్తోంది. అలాగే, 2020లో కరోనా వ్యాప్తి సమయంలో ఈ సంస్థ పేరు మార్మోగింది. ఆ ఏడాది మార్చిలో ఢిల్లీలోని నిజాముద్దీన్ ప్రాంతంలో జరిగిన తబ్లిఘీ జమాత్ సమావేశం వల్ల చాలా మందికి కరోనా వైరస్ వ్యాప్తి చెందిందని కేంద్ర హోంశాఖే ప్రకటన చేసింది. ఢిల్లీ పోలీసులు 233 మంది తబ్లిఘీ జమాత్ సభ్యులను అరెస్టు కూడా చేశారు.