National

ఉత్తరాఖండ్‌లో సొరంగం (Tunnel)లో చిక్కుకున్న కార్మికుల(Workers)ను రక్షించేందుకు అధికారులు సహాయక చర్యలు చేపట్టారు. సొరంగంలోకి నీటిని సరఫరా చేసందుకు వేసిన పైపుల ద్వారా కార్మికుల ఆక్సిజన్ సరఫరా చేస్తున్నారు. అదే పైపుల ద్వారా వారికి తాగునీరు, ఆహారపదార్థాలను అధికారులు సరఫరా చేస్తున్నారు.

ప్రస్తుతం సొరంగంలో చిక్కుకున్న కార్మికులంతా సురక్షితంగానే ఉన్నట్టు అధికారులు వెల్లడించారు. ఉత్తరకాశిలో బ్రహ్మఖల్- యమునోత్రి జాతీయ రహదారి విస్తరణ పనులు చేపట్టారు. అందులో భాగంగా సిల్కియారా నుంచి దండల్ గావ్ వరకు ఒక సొరంగ మార్గాన్ని నిర్మిస్తున్నారు.

శనివారం సొరంగం ఒక్కసారిగా కూలిపోయింది. ఆ సమయంలో 40 మంది కార్మికులు అందులోనే చిక్కుకుపోయారు. సొరంగమార్గం ప్రవేశ ద్వారం వద్ద భారీగా శిథిలాలు పడతంతో వారికి బయటికి వచ్చే మార్గం లేకుండా అయింది. సమాచారం అందుకున్న జాతీయ, రాష్ట్ర విపత్తు ప్రతిస్పందన బృందాలు ఘటనా స్థలానికి చేరుకున్నాయి.

వెంటనే సహాయక చర్యలు మొదలు పెట్టారు. శిథిలాలను తొలగించేందుకు 48 గంటలుగా డిజాస్టర్ టీమ్స్ శ్రమిస్తున్నాయి. మొత్తం శిథిలాలను తొలగించేందుకు మరో రెండు నుంచి మూడు రోజులు పట్టే అవకాశం ఉందని అధికారులు అంటున్నారు. ఈ ఘటనలో ఇప్పటి వరకు ఎవరూ గాయపడలేదన్నారు.

దీపావళి రోజు దేశ రాజధాని ఢిల్లీ (Delhi)లో భారీ సంఖ్యలో అగ్ని ప్రమాదాలు (Fire Accidents) చోటు చేసుకున్నాయి. అగ్నిప్రమాదాలకు సంబంధించి సుమారు 200కు పైగా కాల్స్ వచ్చినట్టు అగ్ని మాపక శాఖ అధికారులు తెలిపారు. అగ్ని ప్రమాదాలకు సంబంధించి తమకు 208 కాల్స్ వచ్చినట్టు అధికారులు వెల్లడించారు.

అందులో 22 కాల్స్ బాణా సంచా దుకాణాల్లో అగ్ని ప్రమాదాలకు సంబంధించినవని చెప్పారు. ఆదివారం తూర్పు కైలాష్ లోని సదర్ బజార్, తిలక్ నగర్ ప్రాంతంలో భారీ అగ్ని ప్రమాదాలు చోటు చేసుకున్నట్టు తెలిపారు. ఈ ప్రమాదాల్లో ఎవరూ గాయపడలేదని, ఎలాంటి ప్రాణ నష్టం జరగలేదని తెలిపారు.

సెంట్రల్ ఢిల్లీలోని సదర్ బజార్‌ డిప్యూటీ గంజ్‌ లోని ఓ గోడౌన్‌లో భారీ అగ్నిప్రమాదం జరిగిందన్నారు. మంటలను అదుపు చేసేందుకు ఇరవై రెండు అగ్నిమాపక యంత్రాలను ఉపయోగించామన్నారు. సుమారు రెండు గంటల సమయం శ్రమించి మంటలను అదుపులోకి తీసుకు వచ్చామన్నారు.

పశ్చిమ ఢిల్లీలోని తిలక్ నగర్‌ మార్కెట్‌లో అగ్నిప్రమాదం జరగడంతో అరడజను దుకాణాలు దగ్ధమయ్యాయని పేర్కొన్నారు. మరోవైపు ఔటర్ ఢిల్లీలోని సుల్తాన్‌పురిలో అగ్ని ప్రమాదం చోటు చేసుకుందన్నారు. దీపావళి నేపథ్యంలో ఢిల్లీలో మరోసారి వాయు కాలుష్యం పెరిగిపోయిందని సఫర్ వెల్లడించింది.

కాంగ్రెస్ నేత కమల్ నాథ్ (Kamalnath) పై మధ్యప్రదేశ్ సీఎం శివరాజ్ సింగ్ చౌహాన్ (Shivaraj Singh Chouhan) తీవ్ర స్థాయిలో విరుచుకు పడ్డారు. కమల్ నాథ్ మధ్యప్రదేశ్ కు చెందిన వ్యక్తి కాదని, ఆయన్ని నమ్మలేమని విమర్శించారు. ప్రతిపక్ష కాంగ్రెస్ ప్రజల్లో గందరగోళం సృష్టిస్తోందని, తప్పుడు వాగ్దానాలు చేస్తుందని మండిపడ్డారు.

భోపాల్ జిల్లాలోని బెరాసియా అసెంబ్లీ స్థానంలో నిర్వహించిన ర్యాలీలో చౌహాన్ ప్రసంగించారు. కాంగ్రెస్ తన వాగ్దానాలు నెరవేర్చలేదని వెల్లడించారు. కమల్ నాథ్ మధ్యప్రదేశ్ కు చెందిన వారు కాదన్నారు. తాము ఇక్కడే పుట్టామని చెప్పారు. ఆయన ఎక్కడ జన్మించారో వెల్లడించాలని డిమాండ్ చేశారు.

హిందీ సినిమాలోని పాటను ప్రస్తావిస్తూ… కమల్ నాథ్ మనకు అపరిచితుడని అన్నారు. ఆయన మనతో ఉండడని చెప్పారు. కమల్ నాథ్ ముఖ్యమంత్రిగా ఉన్న సమయంలో అభివృద్ధి పనులకు డబ్బుల కొరత ఏర్పడిందని వెల్లడించారు. బీజేపీ ప్రభుత్వంలో రాష్ట్రం అభివృద్ధి చెందుతోందన్నారు.

అభివృద్ధి పనులకు తమ దగ్గర డబ్బుల కొరత లేదని చౌహాన్‌ తెలిపారు. రాష్ట్రలో అన్ని రకాల అభివృద్ది పనులను చేపడతానని ప్రజలకు హామీ ఇచ్చారు. అంతకు ముందు సాగర్ జిల్లాలోని కురై నియోజక వర్గం, రాజ్ ఘర్ జిల్లాలోని సారంగ్ పూర్ జిల్లాల్లో నిర్వహించిన ఎన్నికల ర్యాలీల్లో ఆయన పాల్గొన్నారు.

యూపీ(UP)లో భారీ అగ్ని ప్రమాదం చోటు చేసుకుంది. మధుర (Madhura) లో మొత్తం ఏడు దుకాణాల్లో మంటలు వ్యాపించాయి. ఈ ఘటనలో పది మందికి తీవ్ర గాయాలయ్యాయి. 10 మోటర్ సైకిల్స్ అగ్నికి ఆహుతయ్యాయి. సమాచారం అందుకున్న అగ్నిమాపక సిబ్బంది ఘటనా స్థలానికి చేరుకున్నారు.

దీపావళి సందర్బంగా గోపాల్ బాగ్ లోని రయా ప్రాంతంలో బాణాసంచా దుకాణాలను ఏర్పాటు చేశారు. ఓ బాణాసంచా దుకాణంలో మంటలు చెలరేగినట్టు ఎస్ఐ అజయ్ కిషోర్ తెలిపారు. చూస్తుండగానే మిగిలిన దుకాణాలకు కూడా మంటలు వ్యాపించాయన్నారు. షార్ట్ సర్క్యూట్ కారణంగా మంటలు చెలరేగి వుంటాయని అంచనా వేస్తున్నామన్నారు.

ఈ ఘటనలో తొమ్మిది మందికి తీవ్ర గాయాలయ్యాయని చెప్పారు. క్షతగాత్రులను ఎస్ఎన్ మెడికల్ కాలేజీకి తరలించారు. మిగతా వారిని మదురా జిల్లా ఆస్పత్రిలో చికిత్స పొందుతున్నట్టు వెల్లడించారు. మంటలను ఆర్పేందుకు ప్రయత్నించిన అగ్నిమాపక శాఖ అధికారి చంద్రశేఖర్ కు కూడా గాయాలయ్యాయన్నారు.

దుకాణానికి సమీపంలో ఉన్న 10 మోటార్ సైకిల్స్ కూడా పూర్తిగా కాలిపోయాయన్నారు. ఆస్తినష్టాన్ని అంచనా వేస్తున్నామన్నారు. ఈ ఘటనలో ఎలాంటి ప్రాణనష్టం జరగలేదన్నారు. కేసు నమోదు చేసి దర్యాప్తు చేస్తున్నామని పేర్కొన్నారు.

బీజేపీపై రాజస్థాన్ ముఖ్యమంత్రి అశోక్ గెహ్లాట్ (Ashok Gehlot) సంచలన ఆరోపణలు చేశారు. టైలర్ కన్నయ్యలాల్ (Kanhaiya Lal) హత్య కేసు నిందితులకు బీజేపీతో సంబంధాలు ఉన్నాయని ఆరోపించారు. ఈ నెల 25న ఎన్నికల నేపథ్యంలో రాష్ట్రంలో మత విద్వేషాలను రెచ్చగొట్టేందుకు బీజేపీ ప్రయత్నాలు చేస్తోందని ఆరోపణలు గుప్పించారు.

కన్నయ్యలాల్ హత్య గురించి తెలియగానే తన కార్యక్రమాలన్నింటినీ వెంటనే రద్దు చేసుకున్నానని చెప్పారు. వెంటనే ఉదయ్ పూర్ వెళ్లి ఘటన గురించి తెలుసుకున్నానన్నారు. కానీ బీజేపీ నేతలు మాత్రం విషయం గురించి తెలిసినప్పటికీ కఉదయ్ పూర్ వెళ్లకుండా హైదరాబాద్ లోని ఓ కార్యక్రమానికి హాజరయ్యేందుకు వెళ్లారన్నారు.

ఘటన జరిగిన వెంటనే జాతీయ దర్యాప్తు సంస్థ (NIA)దర్యాప్తు మొదలు పెట్టిందన్నారు. ఇప్పటి వరకు ఎన్ఐఏ ఎలాంటి చర్యలు తీసుకుందో ఎవరికీ తెలియదన్నారు. ఎన్ఐఏ బదులు రాష్ట్రానికి చెందిన ఎస్ఓజీ పోలీసులు దర్యాప్తు చేపట్టి ఉంటే ఇప్పటికే నిందితులకు శిక్షలు పడేవన్నారు.

నిందితులకు బీజేపీతో సంబంధాలు ఉన్నాయని ఆయన ఆరోపించారు. కన్నయ్యలాల్ హత్యకు ముందు నిందితులు మరో కేసులో అరెస్టయ్యారని చెప్పారు. దీంతో నిందితులను ఆ కేసులో విడిపించేందుకు బీజేపీ నేతలు పోలీసు స్టేషన్ కు వెళ్లారన్నారు. చివరకు నిందితులను పోలీసు స్టేషన్ నుంచి విడిపించారన్నారు.

గతేడాది బీజేపీ నేత నుపుర్ శర్మ వివాదాస్పద వ్యాఖ్యలు చేశారు. మహ్మద్ ప్రవక్త గురించి ఆమె వివాదాస్పద వ్యాఖ్యలు చేయడంతో తీవ్ర ఉద్రిక్తతలు నెలకొన్నాయి. ఈ నేపథ్యంలో ఆమె వ్యాఖ్యలకు మద్దతు తెలిపారన్న ఆరోపణలపై ఉదయ్ పూర్ లోని టైలర్ కన్నయ్యలాల్ ను ఇద్దరు వ్యక్తులు హత్య చేశారు. అప్పట్లో ఈ హత్య సంచలనం రేపింది.

ప్రధాని మోడీ (PM Modi) ఆర్మీ జవాన్లతో కలిసి దీపావళి (Deepavali) జరుపుకున్నారు. హిమాచల్ ప్రదేశ్ లోని లెప్చా ప్రాంతంలో సైన్యంతో కలిసి ఆయన దీపావళి సంబురాల్లో పాల్గొన్నారు. జవాన్లకు ప్రధాని మోడీ స్వీట్లు పంపిణీ చేశారు. వారితో చాలా సేపు ముచ్చటించారు. దీనికి సంబంధించిన ఫోటోలను ప్రధాని మోడీ షేర్ చేశారు.

లెప్చాలో సైనికులను ఉద్దేశించి ప్రధాని మోడీ ప్రసంగించారు. దేశ సరిహద్దుల్లో హిమాలయాల మాదిరిగా ధృడంగా నిలబడినంత కాలం భారత్ సురక్షితంగా ఉంటుందని అన్నారు. దేశంలో శాంతిని సృష్టించేందుకు తాము కృషి చేస్తున్నామన్నారు. అందులో సైనికుల పాత్ర అత్యంత ప్రధానమైందన్నారు.

500 మందికి పైగా మహిళా అధికారులకు పర్మినెంట్ కమీషన్ ఇచ్చామన్నారు. నేడు మహిళా పైలట్లు రాఫెల్ లాంటి యుద్ధ విమానాలను నడుపుతున్నారని వెల్లడించారు. రాముడు ఉండే చోట అయోధ్య అని చెబుతారని… కానీ తనకు భారత ఆర్మీ సిబ్బంది ఉన్న ప్రదేశం దేవాలయం కంటే ఎక్కువ అన్నారు.

దేశానికి స్వాతంత్ర్యం వచ్చాక మన సైన్యం ఎన్నో యుద్దాలు చేసిందన్నారు. ఆ యుద్దాల్లో సైన్యం దేశ హృదయాలను గెలుచుకుందన్నారు. అంతర్జాతీయ శాంతి మిషన్ లో మన సైన్యం వల్లే భారత గ్లోబల్ ఇమేజ్ పెరిగిందన్నారు. అంతకు ముందు ప్రజలకు ప్రధాని మోడీ దీపావళి శుభాకాంక్షలు తెలిపారు.

మధ్యప్రదేశ్ ముఖ్యమంత్రి శివరాజ్ సింగ్ చౌహాన్ (Shivaraj Singh Chouhan) పై ఆ రాష్ట్ర కాంగ్రెస్ చీఫ్ కమల్ నాథ్ (Kamalnath) తీవ్ర స్థాయిలో విరుచుకు పడ్డారు. రాబోయే ఎన్నికల్లో శివరాజ్ సింగ్ చౌహాన్ ప్రభుత్వానికి ప్రజలు వీడ్కోలు పలుకుతారని అన్నారు. కానీ శివరాజ్ సింగ్ చౌహాన్ మంచి నటుడని అందుకే ఆయన రాజకీయ నిరుద్యోగిగా ఉండరన్నారు.

సాగర్ జిల్లాలోని రెల్హి అసెంబ్లీ నియోజక వర్గంలో నిర్వహించిన ఎన్నికల ర్యాలీలో ఆయన పాల్గొన్నారు. ఈ ర్యాలీలో ఆయన మాట్లాడుతూ…. పోలీసులు, డబ్బు, పరిపాలనతో నడిచే బీజేపీ ప్రభుత్వానికి ఇంకా కేవలం నాలుగు రోజులు మాత్రమే మిగిలి ఉన్నాయని కమల్ నాథ్ చెప్పారు.

ఎన్నికల అనంతరం శివరాజ్ సింగ్ చౌహాన్ సీఎం పదవి కోల్పోతారన్నారు. అయినప్పటికీ ఆయన నిరుద్యోగిగా మారడన్నారు. శివరాజ్ సింగ్ మంచి నటుడని అన్నారు. నటనా వృత్తిని కొనసాగించేందుకు, మధ్యప్రదేశ్ కు కీర్తిని తీసుకు వచ్చేందుకు శివరాజ్ సింగ్ ముంబైకి వెళ్తారంటూ ఎద్దేవా చేశారు.

రాష్ట్రంలో యువతకు లక్ష ఉద్యోగాలు కల్పిస్తామని శివరాజ్ సింగ్ గతంలో హామీ ఇచ్చాడన్నారు. కానీ ఉద్యోగాల భర్తీ చేయలేదన్నారు. ఆ విషయాన్ని పక్కన పెడితే కనీసం బ్యాక్ లాగ్ పోస్టులనైనా ఆ ప్రభుత్వం భర్తీ చేయాల్సిందన్నారు. చౌహాన్ ప్రభుత్వ ఉద్దేశమేంటో ప్రజలు అర్థం చేసుకోవాలన్నారు.