National

Azad: దేశం లోని ముస్లింలలో చాలామంది హిందూ మతం నుంచి ఇస్లాం స్వీకరించిన వారేనని డెమాక్రటిక్ ప్రోగ్రెసివ్ ఆజాద్ పార్టీ అధినేత గులాం నబీ ఆజాద్ అన్నారు. ఇందుకు కశ్మీర్ లోయలోని కశ్మీరీ పండిట్లే ఉదాహరణ అని వ్యాఖ్యానించారు. శుక్రవారం దోడాజిల్లాలో జరిగిన కార్యక్రమంలో మాట్లాడుతూ ఆయన… ఈ పండిట్లు కూడా పెద్ద ఎత్తున ఇస్లాం మతం లోకి మారిపోయారని పేర్కొన్నారు. 600 సంవత్సరాల క్రితం కశ్మీర్ లో ఒక్క ముస్లిం కూడా లేరు.. వీరిలో చాలామంది ఆ తరువాత ముస్లిములుగా మారిపోయారని అన్నారు. .. భారత్ లో పుట్టిన వారంతా మొదట హిందువులే నన్నారు. .ఇస్లాం ఈ దేశానికి కొన్నేళ్ల క్రితమే వచ్చిందని, కానీ హిందూ మతం చాలా పురాతనమైనదని చెప్పారు. .

రాజకీయ ప్రయోజనాల కోసం మతాన్ని వినియోగించుకోరాదని, దీన్ని అడ్డు పెట్టుకుని రాజకీయాలు చేసేవారంతా బలహీనులే నన్నారు. భారత దేశంలోని ముస్లిములంతా బయట నుంచి వచ్చిన వారేనని అంటారని, కానీ ఇక్కడ ఎవరూ బయటి నుంచి వచ్చిన వారు లేరని పేర్కొన్నారు. 1500 ఏళ్ళ క్రితమే ఇస్లాం మతం ఉందని, కానీ హిందూ మతం మాత్రం చాలా పురాతనమైనదన్నారు. దేశంలో బయటి నుంచి వచ్చిన ముస్లిములు 10 నుంచి 20 శాతం ఉంటారని. వారిలో కొందరు మొఘల్ సైన్యంలో పని చేశారని కాంగ్రెస్ మాజీ నేత కూడా అయిన ఆజాద్ చెప్పారు.

ఇతర ముస్లిములంతా హిందూయిజం నుంచి మారినవారే .. అందుకు కశ్మీరీ పండిట్లేఉదాహరణ అన్నారు. అంతా ఇక్కడ పుట్టినవారేనని వ్యాఖ్యానించారు. హిందువులు మరణించినప్పుడు మృతదేహాలను దహనం చేస్తారు.. వేర్వేరు చోట్ల ఇలా జరుగుతుంది.. వారి బూడిదను నదిలో కలిపేస్తారు.. మనం ఆ నీటిని తాగుతున్నాం .. ఆ నీటిలో బూడిద ఉందని ఎవరు చూస్తారు .. ప్రజలు ఆ నీటినే తాగుతున్నారు అని వివాదాస్పద వ్యాఖ్యలు చేశారు ఆజాద్.

అలాగే ముస్లిముల మృతదేహాల ఎముకలు ఈ దేశ గడ్డలో భాగమవుతాయని, చెప్పిన ఆయన.. ఈ భూమిలో హిందువులు, ముస్లిములు కలిసిపోయారని, వీరి మధ్య భేదం ఏముందని ప్రశ్నించారు. రాజకీయాల్లో మతాన్ని అడ్డు పెట్టుకుని ఓటు బ్యాంక్ కోసం తహతహలాడరాదన్నారు. ఆజాద్ చేసిన ఈ వ్యాఖ్యలు పెను దుమారాన్ని రేపవచ్చునని భావిస్తున్నారు.

Himachal Pradesh : హిమాచల్ ప్రదేశ్ రాష్ట్రాన్ని భారీ వర్షాలు, వరదలు ఉక్కిరిబిక్కిరి చేస్తున్నాయి. వారం రోజులుగా ఏకధాటిగా కురుస్తున్న వర్షాలకారణంగా నదులు ఉప్పొంగి ప్రవహిస్తున్నాయి. వరద ప్రవాహానికి వంతెనలు, రోడ్లు కొట్టుకుపోతుండగా కొండ చరియలు విరిగి పడడంతో అనేక చోట్ల జాతీయ రహదారులను మూసివేశారు. ఈ ప్రకృతి విపత్తుకు ఇప్పటివరకు 74 మంది మరణించారని అధికారులు తెలిపారు. అనేకమంది గాయపడగా పలువురు గల్లంతయ్యారని వారు చెప్పారు. ఈ బీభత్సం వల్ల దాదాపు 10 వేల కోట్ల నష్టం వాటిల్లిందని పేర్కొన్నారు.

ఒక్క ప్రజా పనుల శాఖకే 2,491 కోట్ల నష్టం కలిగింది. నేషనల్ హైవేస్ అథారిటీ ఆఫ్ ఇండియాకు వెయ్యి కోట్ల నష్టం వాటిల్లినట్టు తేలింది. తమ రాష్ట్రాన్ని మళ్ళీ అన్నివిధాలా పునరుధ్ధరించేందుకు ఏడాది సమయం పడుతుందని హిమాచల్ సీఎం సుఖ్విందర్ సింగ్ సుక్కు తెలిపారు. సిమ్లా లోని సమ్మర్ హిల్ ప్రాంతంలో గత సోమవారం కొండచరియలు విరిగిపడడంతో దాదాపు 21 మంది మృతి చెందారు.

శిథిలాల్లో చిక్కుకున్నవారిని రక్షించేందుకు సహాయక బృందాలు నిర్విరామంగా శ్రమిస్తున్నాయి. ఈ రాష్ట్రానికి టూరిజం ద్వారా రావలసిన ఆదాయానికి గండం ఏర్పడింది. స్థానిక ట్యాక్సీ డ్రైవర్లు తాము గతంలో రోజుకు సుమారు రెండు వేలు సంపాదించే వారమని కానీ ఇప్పుడు రోజుకు 200 రూపాయలైనా రావడం లేదని వాపోతున్నారు.

హిమాచల్ లోని అనేక ప్రాంతాల్లో చిక్కుకుపోయిన వారిని సురక్షిత ప్రాంతానికి తరలించేందుకు ప్రభుత్వం నానా పాట్లు పడుతోంది. ఈ నెల 17 న సుమారు వెయ్యి మందిని తరలించారు.

Manipur : అసలే కొన్ని నెలల పాటు హింసతో అట్టుడికిన మణిపూర్ లో అల్లర్లను రెచ్చగొట్టేలా, హిందువులకు వ్యతిరేకంగా ప్రచారం చేస్తున్న విదేశీయుడి నిర్వాకం వెలుగులోకి వచ్చింది. అమెరికా నుంచి టూరిస్టు వీసాపై ఇండియాకు వచ్చి మత సంబంధ కార్యకలాపాలలో పాల్గొంటూ చడీ చప్పుడు లేకుండా హిందూ మత వ్యతిరేక ప్రచారం చేస్తున్న డేనియల్ కర్నీ అనే ఇతని చరిత్ర కూడా తక్కువైనదేమీ కాదు. ఇతడ్ని లోగడ ఇండియా నుంచి బ్లాక్ లిస్టులో పెట్టారు. అమెరికన్ ఇవాంజెలిస్ట్ అయిన ఈయన మణిపూర్ లో హిందువుల పట్ల ద్వేషం కలిగేలా ప్రచారం చేస్తున్నాడని బీజేపీ ఆరోపిస్తోంది. సామాజిక సేవ చేస్తున్నాననే నెపంపై .. ప్రజలకు దుప్పట్లు వగైరా పంపిణి చేస్తూ క్రిస్టియానిటీని ప్రోత్సహిస్తున్న వైనం బయట పడింది.

2017 లో టూరిస్టు వీసాపై ఇండియాకు వచ్చిన డేనియల్.. మణిపూర్ లో ప్రజలకు బైబిల్ పపుస్తకాలు ఇస్తున్నాడని, కరపత్రాలు పంచుతున్నాడని తెలిసింది. బీజేపీ ప్రభుత్వానికి వ్యతిరేకంగా ఉపన్యాసాలు ఇస్తున్నట్టు కూడా వెల్లడైంది. ఆగస్టు 5 న ఇతగాడు మణిపూర్ నుంచి ఓ లైవ్ వీడియోను పోస్ట్ చేస్తూ.. ఈ రాష్ట్రంలో క్రైస్తవులను వేధిస్తున్నారని, కావాలనే వారిని టార్గెట్ చేస్తున్నారని ఆరోపించాడు. ఇక్కడ మెయితీలు, కుకీల మధ్య ఘర్షణ వాతావరణం నెలకొందని, కుకీలు గిరిజన క్రైస్తవులని, వారిపైనే పథకం ప్రకారం దాడులు జరుగుతున్నాయని పేర్కొన్నాడు. వారు భయంతో ఇళ్ళ నుంచి పారిపోతున్నారు.. వారుంటున్న గ్రామాలను తగులబెడుతున్నారు. ఇదంతా వారు క్రైస్తవులనే జరుగుతోంది. ఇంత జరుగుతున్నా బీజేపీ ప్రభుత్వం ఉదాసీనంగా వ్యవహరిస్తోంది అంటూ తన ప్రసంగంలో హిందూ వ్యతిరేక ప్రచారం చేశాడు.

ప్రభుత్వాన్ని ‘ర్యాడికల్ హిందూ ప్రభుత్వం’ గా ఆరోపించాడు. ఈశాన్య రాష్ట్రంలో ఎన్నో చర్చిలు ఉన్నాయని, ఇన్నింటిని తన జీవితంలో ఎప్పుడూ చూడలేదని, కానీ వాటిపై దాడులు జరుగుతున్నాయన్నాడు. క్రిస్టియానిటీ పెరుగుదలకు అడ్డుకట్ట వేయడానికి పథకం ప్రకారం యత్నాలు జరుగుతున్నాయని డేనియల్ పేర్కొన్నాడు. కుకీ గిరిజనులను ప్రశంసిస్తూ మెయితీలను దుయ్యబట్టే రీతిలో మాట్లాడాడు. కుకీలను చూసి మెయితీల్లో అసూయ పెరుగుతోందని అన్నాడు.

భారత రాజ్యాంగాన్ని ఉల్లంఘించేందుకు బీజేపీ ప్రభుత్వం యత్నిస్తోందని పేర్కొన్న ఆయన.. బాబా సాహెబ్ అంబేద్కర్ బుద్ధిజం బదులు క్రైస్తవ మతంలోకి మారి ఉంటే బాగుండేదని అన్నాడు. జీసస్ గురించి బోధనలు చేస్తున్నందుకు తనను చంపాలని హిందువులు ఎన్నో ప్రయత్నాలు చేశారని ఆరోపించాడు. జై శ్రీరామ్ అనాలని తనపై ఒత్తిడి తెచ్చారని, కర్రలు, రాడ్లతో తనను కొట్టారని అన్నాడు. తెలంగాణ లోని లీగల్ రైట్స్ ప్రొటెక్షన్ ఫోరం ఇతనిపై హోమ్ మంత్రిత్వ శాఖకు లేఖ రాస్తూ ఇతనిపై కఠిన చర్యలు తీసుకోవాలని కోరింది. డేనియల్ నేపాల్ నుంచి ఇండియాకు చేరుకొని హిందూ మత వ్యతిరేక ప్రచారం చేస్తున్నాడని తన లేఖలో పేర్కొంది.

Himachal Pradesh : తమ రాష్ట్రంలో సంభవించిన ప్రకృతి విపత్తుకు ఇతర రాష్ట్రాల నుంచి వచ్చిన మేస్త్రీలు, కార్మికులే బాధ్యులని హిమాచల్ ప్రదేశ్ సీఎం సుఖ్విందర్ సింగ్ సుక్కు ఆరోపించారు. ముఖ్యంగా భారీ వర్షాలు, వరదలకు సిమ్లా లోని పటిష్టమైన ఇళ్ళు, షాపులు కొట్టుకుపోయాయని, వారు చేబట్టిన నిర్మాణాల్లో శాస్త్రీయ పధ్దతులు పాటించలేదని ఆయన వివాదాస్పద వ్యాఖ్యలు చేశారు. తమకు స్థానిక మేస్త్రీలు లేరని, బీహారీ ఆర్కిటెక్ట్ గా తాను పేర్కొనే వలస మేస్త్రీలు ఇక్కడకు వచ్చి అంతస్తులపై అంతస్తులు నిర్మించారని,కానీ అవన్నీ నాసిరకంగా ఉన్నాయని ఆయన ఓ ఇంటర్వ్యూలో చెప్పారు.

కానీ అంతలోనే తానలా అనలేదని, బీహారీలు కూడా ఇక్కడ చిక్కుకుపోగా వారిని హెలీకాఫ్టర్ ద్వారా తరలించామని సర్ది చెప్పుకున్నారు. బీహారీలు మా సోదరుల వంటి వారు.. వారు కేవలం కూలీలు.. స్ట్రక్చరల్ ఇంజనీరింగ్ లో లోపాలు ఉన్నాయి అని వ్యాఖ్యానించారు. ఇప్పుడు కూలిపోతున్న ఇళ్ళు స్ట్రక్చరల్ ఇంజనీరింగ్ ప్రమాణాలకు అనువుగా లేవని పేర్కొన్నారు. విచక్షణా రహితంగా నిర్మాణాలు జరిగాయని, దీని ప్రభావం కొండ ప్రాంతాలపై పడిందని, సిమ్లా లోని అనేక చోట్ల కొత్తగా నిర్మించిన బిల్డింగుల్లోశాస్త్రీయ ప్రమాణాలు లోపించాయని ఆయన చెప్పారు. డ్రైనేజీ సిస్టం కూడా ఇలాగే ఉందన్నారు.

ఇక హిమాచల్,ఉత్తరాఖండ్, పంజాబ్ రాష్ట్రాల్లో ఆకస్మిక వరదలు సంభవించాయి. భారీ వర్షాలు, వరదల కారణంగా 80 మంది మృతి చెందారు. ఈ మూడు రాష్ట్రాల్లోదాదాపు 10 వేలమందిని సురక్షిత ప్రాంతాలకు తరలించారు. హిమాచల్ లో కొండ చరియలు విరిగి పడుతూనే ఉన్నాయి. ఆదివారం రాత్రి నుంచి 57 కు పైగా మృత దేహాలను కనుగొన్నామని హిమాచల్ ప్రిన్సిపల్ సెక్రటరీ ఓంకార్ చంద్ శర్మ తెలిపారు.

సిమ్లా, సమ్మర్ హిల్స్, కృష్ణ నగర్ వంటి ప్రాంతాలు భారీ వర్షాలకు అతలాకుతలమయ్యాయని ఆయన చెప్పారు. ఇక పంజాబ్ లో ముఖ్యంగా గురుదాస్ పూర్ జిల్లాలో భారీవర్షాల కారణంగా ఈ నెల 17, 18 తేదీల్లో స్కూళ్ళు, అంగన్ వాడీ సెంటర్లను మూసివేస్తున్నట్టు అధికారులు ప్రకటించారు. భ్రాక్రా, పొంగ్ డ్యాముల్లో నీటి మట్ఠం పెరిగిందని, పరిస్థితిని జాగ్రత్తగా మదింపు చేస్తున్నామని సీఎం భగవంత్ మాన్ చెప్పారు.

Chandrayaan-3: చంద్రునికి అతి వేగంగా చేరువవుతోంది చంద్రయాన్-3. గురువారం మధ్యాహ్నం ఒంటి గంట ప్రాంతంలో ఈ వ్యోమ నౌక నుంచి విక్రమ్ ల్యాండర్ విజయవంతంగా విడిపోయింది. ప్రొపల్షన్ మాడ్యూల్ నుంచి ల్యాండర్ వేరైనట్టు ఇస్రో (Isro ) వర్గాలు ప్రకటించాయి. దీంతో చంద్రయాన్-3 ప్రాజెక్టులో కీలక ఘట్టం విజయవంతంగా ముగిసింది,. ఇస్రో శాస్త్రవేత్తలు ఒకరికొకరు అభినందనలు తెలుపుకుంటూ సంబరాల్లో మునిగిపోయారు. వ్యోమనౌక నుంచి విక్రమ్ ల్యాండర్ వేరైనట్టు ఇస్రో తన సోషల్ మీడియా అకౌంట్లో స్పష్టం చేసింది. శుక్రవారం సాయంత్రం నాలుగు గంటల ప్రాంతంలో విక్రమ్ ల్యాండర్ చంద్రుని ఉపరితలానికి మరింత చేరువ కానున్నట్టు పేర్కొంది. దీన్ని చంద్రుని చుట్టూ కక్ష్యలో ప్రవేశ పెట్టనున్నారు.

ప్రగ్యాన్ రోవర్ తో కూడిన ఈ ల్యాండర్ ప్రొపల్షన్ మాడ్యూల్ నుంచి వేరు చేయడమన్నది ఈ మిషన్ లో అతి ముఖ్యమైన ఘట్టమని ఇస్రో వర్గాలు వెల్లడించాయి. ప్రస్తుతం వ్యోమనౌక చంద్రుని చుట్టూ 153కి.మీ. x 163 కిలోమీటర్ల ఆర్బిట్ లో ఉందని, ఇక తదుపరి చర్య ల్యాండింగ్ సైట్ ను ఎంపిక చేయవలసి ఉందని ఈ వర్గాలు పేర్కొన్నాయి. ఈ నేపథ్యంలో ఇస్రో చంద్రయాన్-2 సందర్భంగా ఎంపిక చేసిన 500 చదరపు మీటర్ల బదులు 4 కి.మీ. x 2.4 కిలోమీటర్లతో కూడిన స్పాట్ ను ఎంపిక చేసిందని తెలుస్తోంది. అంటే ల్యాండింగ్ ఏరియాను విస్తృతం చేస్తున్నట్టు ఈ వర్గాలు వివరించాయి. చంద్రుని దక్షిణ ధృవం పై ఐస్ కారణంగా ఇది అతి దుర్భేద్య మైనప్పటికీ ఈ ధృవం వద్దకు దీన్ని చేర్చడం
శాస్త్రవేత్తలకు పెద్ద సవాలే !

విక్రమ్ ల్యాండర్, ప్రగ్యాన్ రోవర్ ఈ నెల 23 న చంద్రుని ఉపరితలంపై ‘అడుగు పెట్టవచ్చునని’ భావిస్తున్నారు. అయితే రష్యా ప్రయోగించిన లూనా-25 మిషన్ నుంచి వీటికి గట్టి పోటీ ఏర్పడబోతోంది. సమయం దాదాపు ఒకేలా ఉన్నప్పటికీ రెండు మిషన్లూ వేర్వేరు ల్యాండింగ్ ఏరియాలను ఎంపిక చేసుకున్న దృష్ట్యా ఇవి ఒకదానికొకటి ఢీకొనే అవకాశాలు లేవని భావిస్తున్నారు. ఇక స్పేస్ క్రాఫ్ట్ ను చంద్రునికి అతి దగ్గరి ప్రదేశమైన పెరిలూన్ ..(చంద్రుని ఉపరితలం నుంచి 30 కి.మీ. దూరం) నుంచి క్రమంగా అపోలూన్ (జాబిల్లి ఉపరితలం నుంచి 100 కి.మీ. దూరం) కక్ష్యలోకి ప్రవేశపెట్టనున్నారు. ఆ తరువాత అడ్డుగా ఉన్న వ్యోమనౌకను నిలువుగా మార్చే ప్రక్రియను చేపడతారు. ఇదంతా దీని వేగాన్ని తగ్గిస్తూ జాగ్రత్తగా చేబట్టవలసి ఉంటుందని శాస్త్రవేత్తలు పేర్కొంటున్నారు. అనంతరం ఇదే కక్ష్య నుంచి ఈ నెల 23 న సాఫ్ట్ ల్యాండింగ్ చేయవలసి ఉంటుంది.

చంద్రయాన్-3 చివరి ల్యూనార్ కక్ష్య తగ్గింపు సక్సెస్ కావడంపై ఇస్రో మాజీ చైర్మన్ కె. శివన్ హర్షం వ్యక్తం చేశారు. చంద్రయాన్-2 ప్రయోగ సమయంలో ఇస్రో చైర్మన్ గా ఉన్న ఆయన.. ఆగస్టు 23 న చంద్రయాన్-3 చంద్రుని ఉపరితలాన్ని తాకే అద్భుతమైన క్షణం కోసం ఆతృతగా ఎదురు చూస్తున్నానని తెలిపారు. లోగడ ఎదుర్కొన్న వైఫల్యాల నుంచి పాఠాలు నేర్చుకుని ఈ సారి అన్ని జాగ్రత్తలూ తీసుకోవడం హర్షించదగిన విషయమని ఆయన వ్యాఖ్యానించారు.