Politics

ఎన్నికల నిబంధన ప్రకారం స్థానికేతరులు ఎవరూ ఈనెల 28 నుంచి స్థానికంగా ఉండరాదనే నిబంధనలు ఉన్నాయి. ఈ నేపథ్యంలో కామారెడ్డి బరిలో ఉన్న టీపీసీసీ చీఫ్ రేవంత్ రెడ్డి (TPCC Chief Revanth reddy) సోదరుడు కొండల్‌రెడ్డిని (Kondal Reddy) ఇండిపెండెంట్ అభ్యర్థికి పోలింగ్ ఏజెంట్‌గా తప్పుడు పత్రాలు సృష్టించి కామారెడ్డిలోనే ఉన్నారని బీఆర్ఎస్ నాయకులు ఆరోపించారు.

ఈ మేరకు బీఆర్‌ఎస్ నేతలు కొండల్‌రెడ్డిని అడ్డుకుంటున్నారు. కొండల్‌రెడ్డి స్థానికేతరుడని గులాబీ శ్రేణులు అభ్యంతరం వ్యక్తం చేస్తున్నారు. పోలీసులు కూడా బీఆర్‌ఎస్ నేతలకు సహకరిస్తున్నారని ఆరోపించారు. పోలింగ్ కేంద్రం వద్ద రోడ్డుపై బైఠాయించి బీఆర్‌ఎస్ శ్రేణులు ధర్నాకు దిగాయి. ఈ క్రమంలో బీఆర్ఎస్‌, కాంగ్రెస్ నేతల మధ్య తోపులాట ఉద్రిక్తతకు దారి తీసింది. పోలీసులు రంగంలోకి దిగి పరిస్థితిని అదుపుచేసేందుకు యత్నిస్తున్నారు.

కొండల్ రెడ్డి ఇండిపెండెంట్ అభ్యర్థికి పోలింగ్ ఏజెంట్‌గా తప్పుడు పత్రాలు సృష్టించి మూడు కార్ల కాన్వాయ్‌లో కొండల్‌రెడ్డి కామారెడ్డిలో తిరుగుతున్నారని బీఆర్ఎస్ నాయకులు ఆరోపించారు. నిబంధనలు ఉల్లంఘిస్తూ రేవంత్ రెడ్డి సోదరుడు కొండల్ రెడ్డి దౌర్జన్యాలకు పాల్పడుతున్నాడని విమర్శించారు. కామారెడ్డి మున్సిపల్ కార్యాలయంలోని పోలింగ్ బూత్‌తో పాటు బాలుర ఉన్నత పాఠశాల పోలింగ్ బూత్‌లోకి వెళ్లడం పట్ల ఆగ్రహం వ్యక్తం చేశారు.

ఇంత జరుగుతున్నా ఎన్నికల అధికారులు, పోలీసుల తీరుపై బీఆర్ఎస్ నేతలు అసహనం వ్యక్తంచేశారు. కొండల్ రెడ్డికి స్థానిక కాంగ్రెస్ నాయకులు గడ్డం చంద్రశేఖర్‌రెడ్డి, గోనె శ్రీనివాస్ తదితరులు మద్దతు తెలపడం పట్ల నిరసనకు దిగారు. దీంతో చేసేది లేక కొండలరెడ్డి పీఏ ను పోలీసులు అరెస్టు చేశారు. అయితే, ఉదయం నుంచి బీఆర్‌ఎస్ నేతలు తనను వెంబడించి దాడి చేసే ప్రయత్నం చేస్తున్నారని కొండల్‌రెడ్డి ఆరోపించారు.

ఐదు సంవత్సరాలు నిన్ను ఆడించే నేతలను నువ్వు ఆడించే రోజు ఏదైనా ఉందంటే.. అవి ఎన్నికల రోజులు మాత్రమే అంటున్నారు.. ఎన్నికల్లో ఓటు అనే ఆయుధంతో.. నీ ఐదు సంవత్సరాల జీవితాన్ని నువ్వు నిర్ణయించుకోవచ్చని ఓటు విలువ తెలియచేస్తున్నారు కొందరు.. అవినీతి ఆసురుల నుంచి రక్షించుకోవాలంటే ఓటును అస్త్రంగా ప్రయోగించాలని తెలుపుతున్నారు. కొందరు ఈ మాటలను అక్షరాల పాటిస్తూ.. ఓటు హక్కును ఉపయోగించుకుంటున్నారు.

ఈ నేపథ్యంలో హైదరాబాద్‌ (Hyderabad) గచ్చిబౌలి (Gachibowli)కి చెందిన 75 ఏళ్ల శేషయ్య ఓటు విలువ తెలియచెప్పి వార్తల్లో నిలిచారు. ఇప్పటికే తీవ్రమైన లివర్‌ సిరోసిస్‌తో బాధపడుతున్న శేషయ్య.. ఆక్సిజన్ సిలిండర్‌తో పోలింగ్‌ కేంద్రానికి రావడం పలువురిని ఆశ్చర్యానికి గురిచేసింది. తనకున్న అనారోగ్యాన్ని లెక్కచేయకుండా.. ఓటు హక్కును ఉపయోగించుకుని పలువురికి ఆదర్శంగా నిలిచారు శేషయ్య.. గచ్చిబౌలి జీపీఆర్‌ఏ (GPRA) క్వార్టర్స్‌లోని పోలింగ్‌ కేంద్రంలో శేషయ్య తన ఓటు హక్కు వినియోగించుకున్నారు.

ఈ సందర్భంగా శేషయ్య మాట్లాడుతూ.. ఓటు వేయడం పౌరుడిగా తన బాధ్యతని తెలిపారు. తాను 1966 నుంచి మిస్‌ అవ్వకుండా ఓటు వేస్తున్నానని వెల్లడించారు. మరోవైపు ముషీరాబాద్‌లో కూడా ఇలాంటి ఘటన వెలుగుచూసింది. గాంధీనగర్‌ ఎస్బీఐ కాలనీకి చెందిన ఆస్తమా రోగి లక్ష్మీ శ్యాంసుందర్‌ ఓటు హక్కు వినియోగించుకున్నారు. ఘంటసాల గ్రౌండ్‌లోని 83వ నంబర్‌ పోలింగ్‌ కేంద్రంలో ఆమె ఓటు వేసి అందరికీ స్ఫూర్తిగా నిలిచారు.

ఇక తెలంగాణ లో ఎన్నికల (Telangana Elections) పోలింగ్‌ విజయవంతంగా కొనసాగుతోంది. యువత, మహిళలతో పాటు వృద్ధులు ఓటు హక్కును వినియోగించుకుంటున్నారు. అనారోగ్యంతో బాధపడుతున్న రోగులు సైతం పోలింగ్‌ కేంద్రాలకు వచ్చి ఓటు వేస్తూ అందరికీ ఆదర్శంగా నిలుస్తున్నారు..

తెలంగాణ అసెంబ్లీ ఎన్నికల పోలింగ్(TS Election Polling) షురూ అయింది. ఓటర్లు తెలంగాణ ఐదేళ్ల భవిష్యత్తును ఈ రోజే నిర్ణయిస్తున్నారు. ఉదయం 7గంటల నుంచి తమ వజ్రాయుధం(ఓటు)ను వినియోగించుకుంటున్నారు. ఈ నేపథ్యంలో కొన్ని పోలింగ్ కేంద్రాల్లో ఉద్రిక్తత వాతావరణం చోటుచేసుకుంది.

నిర్మల్ జిల్లా ముధోల్లోని ముక్తదేవి గల్లీలో ఏర్పాటు చేసిన పోలింగ్ కేంద్రాల్లో ఇద్దరు ఓటర్లు కండువాలతో రావడం కలకలం రేపింది. ఈ ఘటనతో వెంటనే అప్రమత్తమైన అధికారులు ఆ ఓటర్లను అడ్డుకున్నారు. కండువాలతో వచ్చి ఓటు వేయడానికి రావద్దని వారికి సూచించారు. ఈ క్రమంలో 100 మీటర్ల దూరంలో రెండు పార్టీల కార్యకర్తల మధ్య స్వల్ప ఉద్రిక్తత చోటుచేసుకుంది.

కండువాలు ఎందుకు వేసుకుని వెళ్తున్నారని ఓ పార్టీ కార్యకర్తలు అడగడంతో వివాదం తలెత్తింది. తాము పార్టీ కండువా వేసుకోలేదని, ఆ కలర్ కర్చీఫ్ మాత్రమే వేసుకున్నామని వేరొక పార్టీ కార్యకర్తలు బదులిచ్చారు. అదేవిధంగా, నాగర్ కర్నూల్ జిల్లా అమ్రాబాద్ మండలం మన్ననూర్ గ్రామంలోని పోలింగ్ కేంద్రం వద్ద బీఆర్‌ఎస్, కాంగ్రెస్ పార్టీల మధ్య వాగ్వాదం చోటుచేసుకుంది.

మన్ననూర్ పోలింగ్ కేంద్రం వద్ద ఓటర్లను ప్రభావితం చేస్తున్న క్రమంలో ఇరు పార్టీల నేతల మధ్య గొడవ జరిగింది. దీంతో అమ్రాబాద్ సీఐ ఆదిరెడ్డి రంగంలోకి దిగి లాఠీచార్జ్ చేశారు. జనగామ రైల్వే స్టేషన్ సమీపంలోని పోలింగ్ బూత్ వద్ద ఉద్రిక్తత చోటుచేసుకుంది. కాంగ్రెస్- బీఆర్ఎస్ కార్యకర్తల మధ్య తోపులాట జరిగింది. పల్లా రాజేశ్వర్ రెడ్డి ఎక్కువ సేపు పోలింగ్ బూత్ దగ్గరే ఉంటున్నారని కాంగ్రెస్ నేతలు అభ్యంతరం వ్యక్తం చేశారు.

తెలంగాణ (Telangana) వ్యాప్తంగా అసెంబ్లీ ఎన్నికల పోలింగ్ ప్రశాంతంగా కొనసాగుతోంది. కానీ అక్కడక్కడ మాత్రం కొన్ని ఉద్రిక్త ఘటనలు చోట చేసుకుంటున్నట్టు వార్తలు వస్తున్నాయి. మరోవైపు ఎన్నికల సందర్భంగా జోరుగా నగదు పంపిణీ జరుగుతున్నట్టు ప్రచారం జరుగుతుంది. ఇదిలా ఉండగా.. పోలింగ్ వేళ వికారాబాద్ (Vikarabad) జిల్లా తాండూర్ ( Tandoor) మండలంలో నగదు పంపిణీ కలకలం రేపింది.

కరన్‌కట్‌లోని కోటవీధి పోలింగ్ కేంద్రం వద్ద నగదు పంపిణీ జరగుతున్న విషయం తెలియడంతో పోలీసులు హుటాహుటిన అక్కడకు చేరుకున్నారు. ఈ క్రమంలో పోలీసుల రాకను గమనించిన యువకులు డబ్బులను అక్కడే వదిలేసి పారిపోయారు. కాగా పట్టుబడిన నగదు రూ.7.45 లక్షలు ఉన్నట్లు పోలీసులు నిర్ధారించారు. ఇలాంటి ఘటనలు చూస్తుంటే ఎన్నికల కోడ్ అమలవుతుందా? అనే అనుమానాలు వస్తున్నాయని పలువురు అంటున్నారు..

మరోవైపు రాష్ట్ర వ్యాప్తంగా కొన్ని పోలింగ్ స్టేషన్ల వద్ద కూడా ఇలాంటి ఘటనలు చోటుచేసుకుంటున్నట్టు ఆరోపణలు వస్తున్నాయి. ఈ క్రమంలో అధికార పార్టీకి చెందిన వారు డబ్బులు పంచడమే కాకుండా బీఆర్ఎస్ (BRS)కు ఓటు వేయాలని చెబుతున్న ఘటనలు వెలుగులోకి వస్తున్నాయి. అధికారమే ధ్యేయంగా నేతలు ఇలా ప్రవర్తించడం పలు విమర్శలకు దారితీస్తుంది.

అధికారులు ఎన్ని కట్టుదిట్టమైన చర్యలు తీసుకుంటున్న రాష్ట్రంలో జోరుగా నగదు పంపిణీ జరుగుతున్న ఘటనలు వెలుగులోకి వస్తున్నాయి. ఎన్నికల సంఘం ఇప్పటికే ఎన్నికల రూల్స్ కట్టుదిట్టం చేసిన విషయం తెలిసిందే. అయినా అధికార పార్టీ విచ్చలవిడిగా ప్రవర్తిస్తున్న తీరుపై ఈసీ ఎలాంటి చర్యలు తీసుకుంటుందో అనే ఆసక్తి రాష్ట్రంలో మొదలైంది.