Politics

కాళేశ్వరం ప్రాజెక్ట్.. ఈ పేరు తెలంగాణ రాజకీయాలను ఓ కుదుపు కుదిపిందని జనం అనుకుంటున్నారు. కాళేశ్వరం కట్టడంలో జరిగిన అవినీతి పై ఇప్పటికే కాంగ్రెస్ పోరాటం చేస్తుండగా.. బీజేపీ మాత్రం ఎరువులపై కొట్టే మందులా అప్పుడప్పుడు విమర్శలని చిలకరిస్తుందని ఎద్దేవా చేస్తున్నారు రాష్ట్ర జనం.. అవినీతిని అంతం చేయాలంటే ఒకరి పర్మిషన్ అవసరం లేదని, తగిన ఋజువులు ఉంటే చాలన్న విషయం అందరికీ తెలుసు.. మరి బీజేపీ కళ్ళకు బీఆర్ఎస్ చేస్తున్న స్కామ్ లు కనపడటం లేదా ? అని కామన్ మ్యాన్ తనలో తాను ప్రశ్నించుకుంటున్నాడు.

మరోవైపు కాళేశ్వరం అవినీతి పై ఆరోపణలు చేసిన తెలంగాణ బీజేపీ (Telangana BJP) అధ్యక్షులు కిషన్‌రెడ్డి (Chief Kishan Reddy)..తాజాగా సీఎం కేసీఆర్‌ (CM KCR) అంగీకరిస్తే రెండు గంటల్లో కాళేశ్వరం (Kaleshwaram) అవినీతి పై సీబీఐ (CBI) విచారణ జరుపుతుందంటూ ప్రకటన చేసిన విషయం తెలిసిందే. కాగా ఈ ప్రకటనపై సీబీఐ మాజీ డైరెక్టర్( (Former CBI Director) నాగేశ్వరరావు (Nageswara Rao) స్పందించారు.

కాళేశ్వరం ప్రాజెక్టుపై ఎలాంటి అభ్యంతరం లేకుండా సీబీఐ విచారణ జరపొచ్చని.. ఇందుకు తెలంగాణ ప్రభుత్వ (Telangana Government) అనుమతి అవసరం లేదని కిషన్‌రెడ్డికి సూచించారు. అంతేకాదు ఈ విషయంలో సీబీఐకి ఎవరి అనుమతి అవసరం లేదన్న నాగేశ్వరరావు.. ప్రాజెక్ట్ లో అవినీతి జరిగినట్టు అనుమానం వస్తే డైరెక్ట్ గా కేంద్ర జలశక్తి శాఖ సీబీఐ విచారణకు ఆదేశించవచ్చని అన్నారు.

మరోవైపు కాళేశ్వరానికి అనుమతులిచ్చింది కేంద్రానికి చెందిన 10 ఏజెన్సీలే అని వెల్లడించారు. అందువల్ల కేంద్రం కూడా సీబీఐ విచారణ కోరవచ్చని మాజీ డైరెక్టర్ తెలిపారు. ఒకవేళ రాష్ట్ర ప్రభుత్వ అధికారులు సీబీఐ విచారణలో నిందితులుగా తేలితే మాత్రం అవినీతి నిరోధక చట్టంలో ఉన్న సెక్షన్ 19 ప్రకారం రాష్ట్ర ప్రభుత్వం అనుమతి తీసుకోవలసిన అవసరం ఉంటుందని నాగేశ్వరరావు పేర్కొన్నారు.. ఇక ఈయన వివరణ చూసిన జనం కాళేశ్వరం ప్రాజెక్టుపై బీజేపీ డ్రామాలు ఆడుతుందని అనుకుంటున్నారు.

– కాంగ్రెస్ పై తప్పుడు ప్రచారం చేస్తున్నారు
– అబద్ధాల్లో కేసీఆర్, కేటీఆర్ కు అవార్డ్ ఇవ్వాలి
– ధరణిని బంగాళాఖాతంలో కలిపేస్తాం
– దాని స్థానంలో మంచి పోర్టల్ తీసుకొస్తాం
– ఎవరికీ నష్టం జరగకుండా చూస్తాం
– ధరణి పేరుతో కేసీఆర్ కుటుంబం భూముల్ని దోచేసింది
– కాళేశ్వరం అంటూ లక్ష కోట్లు దిగమింగారు
– ఎన్నికల ప్రచారంలో రేవంత్ రెడ్డి

కేసీఆర్ (KCR), కేటీఆర్ (KTR) కు అబద్ధాలు చెప్పడంలో ప్రైజ్ ఇవ్వాలన్నారు టీపీసీసీ చీఫ్ రేవంత్ రెడ్డి (Revanth Reddy). ఎన్నికల ప్రచారంలో భాగంగా ఖానాపూర్, ఆదిలాబాద్ లో నిర్వహించిన కాంగ్రెస్ (Congress) విజయభేరి సభల్లో పాల్గొన్నారు. ఈ సందర్భంగా మాట్లాడుతూ.. కాంగ్రెస్ అధికారంలోకి వస్తే రైతు బంధు రాదని తప్పుడు ప్రచారం చేస్తున్నారంటూ ఆగ్రహం వ్యక్తం చేశారు. మతి ఉండే మాట్లాడుతున్నారా? అని ప్రశ్నించారు. రైతుబంధును 2018లో ప్రవేశపెట్టారని, ధరణి పోర్టల్ ను 2020లో తీసుకొచ్చారని, మరి.. ఆ రెండేళ్లు లబ్ధిదారులకు రైతుబంధు ఎలా ఇచ్చారని ప్రశ్నించారు.

పేదల భూములను కంప్యూటరీకరణ చేయాలని కాంగ్రెస్ పార్టీ నిర్ణయించిందన్నారు రేవంత్. ఈ దేశంలోకి కాంగ్రెస్ పార్టీనే కంప్యూటర్ తెచ్చిందని తెలిపారు. బీఆర్ఎస్ ప్రభుత్వం రైతులను నిండా ముంచుతోందని మండిపడ్డారు. ఆదివాసీలను, లంబాడీలను కాపాడే బాధ్యత తమదని.. ఇరు తెగల మధ్య ఉన్న సమస్యలను పరిష్కరిస్తామన్నారు. సోనియా గాంధీ ప్రకటించిన ఆరు గ్యారెంటీ హామీలను.. అధికారంలోకి రాగానే అమలు చేస్తామని స్పష్టం చేశారు. సోనియా గాంధీ తెలంగాణ ఇవ్వకపోతే కేసీఆర్ కుటుంబం బిచ్చ మెత్తుకునేదన్నారు.

‘‘24 గంటల కరెంట్ ఇస్తున్నావా? సబ్ స్టేషన్ కు పోదాం. 24 గంటల కరెంట్ ఇస్తే మేము పోటీ చేయం’’ అంటూ కేసిఆర్ కు సవాల్ విసిరారు. ఈ సవాల్ కు ఒప్పుకుంటారా? లేదంటే ఇంద్రవెల్లిలో ముక్కు నేలకు రాస్తారా? అని ఛాలెంజ్ చేశారు రేవంత్. ధరణి స్థానంలో మంచి పోర్టల్ తీసుకొస్తామన్నారు. ఎవరికీ నష్టం జరగకుండా చూస్తామని హామీ ఇచ్చారు. ఇందిరమ్మ హయంలో ఇచ్చిన భూములకు పట్టాలు ఇస్తామని, వాటిని అమ్ముకునే సౌకర్యం కూడా కల్పిస్తామని చెప్పారు. బరాబర్ ధరణి పోర్టల్ ని బంగాళాఖాతంలో కలుపుతామన్నారు. భూముల మీద హక్కులు కల్పిస్తామని చెప్పారు.

ధరణి ముసుగులో కేసీఆర్ కుటుంబం హైదరాబాద్ పరిసర భూములను కబ్జా చేసిందని ఆరోపించారు రేవంత్ రెడ్డి. కాంగ్రెస్ టికెట్లు అమ్ముకుంటున్నారని తప్పుడు ప్రచారం చేస్తున్నారని మండిపడ్డారు. కోట్ల రూపాయలు ఉన్నోళ్లకే బీఆర్ఎస్ – బీజేపీ టికెట్లు ఇస్తే, ఓట్లున్న వారికే కాంగ్రెస్ ఇచ్చిందని చెప్పుకొచ్చారు. కాంగ్రెస్ ప్రారంభించిన ప్రాణహిత ప్రాజెక్టును కేసీఆర్ దెబ్బ తీశారన్నారు. కాళేశ్వరం పేరిట లక్ష కోట్లు దిగ మింగారని ఆరోపించారు. కేసీఆర్ ధన దాహనికి ప్రాణహిత ప్రాజెక్టు బలైందని.. కాంగ్రెస్ కట్టిన కడెం, సదర్‌ మాట్ ప్రాజెక్టులను పట్టించు కోలేదని వ్యాఖ్యానించారు.

కాంగ్రెస్ ఐటీడీఏ ప్రాజెక్టులు ప్రారంభించిందని.. ధరణి తీసుకువచ్చి అసైన్డ్ భూములను రాష్ట్ర ప్రభుత్వం లాక్కుంటోందని ఆరోపించారు. దొరల తెలంగాణ కావాలా? ప్రజల తెలంగాణ కావాలా? అని ప్రశ్నించారు. బీఆర్ఎస్ దగ్గర నోట్లు ఉంటే.. తమ అభ్యర్థుల దగ్గర ఓట్లు ఉన్నాయని చెప్పారు. ఉమ్మడి ఆదిలాబాద్ జిల్లాను దత్తత తీసుకొని అభివృద్ది చేయించే బాధ్యత తానే తీసుకుంటానని హామీ ఇచ్చారు. ఇంద్రవెల్లి కాల్పుల్లో చనిపోయిన వారి కుటుంబాలకు న్యాయం చేస్తానని, ఆ బాధ్యత కూడా తనదే అని తెలిపారు రేవంత్ రెడ్డి.

– కాంగ్రెస్ పాలనలో ఎన్నో కష్టాలు పడ్డాం
– ఓసారి అవన్నీ గుర్తు చేసుకోండి
– పదేళ్లలో రాష్ట్రం ఎలా మారిందో చూడండి
– ఆ పాలనను మా పాలనను పోల్చి చూడండి
– ఎన్నికలొచ్చాయని ఆగం కావొద్దు
– ఆలోచించి ఓట్లు వేయండి
– తెలంగాణ ప్ర‌జ‌ల కోసం పుట్టింది బీఆర్ఎస్
– ఎన్నికల ప్రచారంలో సీఎం కేసీఆర్

తెలంగాణ‌ (Telangana) కు కాంగ్రెస్ (Congress) పార్టీ తీవ్ర అన్యాయం చేసింద‌ని అన్నారు సీఎం కేసీఆర్ (CM KCR). ఎన్నికల ప్రచారంలో భాగంగా సిర్పూర్ కాగ‌జ్‌ న‌గ‌ర్ నియోజ‌క‌వ‌ర్గంలో ప్ర‌జా ఆశీర్వాద స‌భ‌కు హాజరయ్యారు. ఈ సందర్భంగా మాట్లాడుతూ.. కాంగ్రెస్ పార్టీ తీరుతో 58 ఏండ్లు గోస‌ప‌డ్డామన్నారు. చాలా బాధ‌ప‌డ్డామని గుర్తు చేశారు. తెలంగాణ‌ను ఆ పార్టీ నిలువునా మోసం చేసింద‌ని ఆగ్ర‌హం వ్య‌క్తం చేశారు. ఆఖరికి తెలంగాణ ఉద్యమాన్ని అణిచివేసిందని ఆరోపించారు.

కాంగ్రెస్ అనేది ఢోకా పార్టీ అని మండిపడ్డారు సీఎం. ఐదేళ్ల వరకు తలరాతలను మార్చేది ఓటు హక్కేనని, బీఆర్ఎస్‌ ను మూడోసారి ఆశీర్వదించాలని కోరారు. 24 గంటలపాటు కరెంట్ ఇచ్చే రాష్ట్రం తెలంగాణ మాత్రమేనని తెలిపారు. దేశంలో ఎక్కడా 24 గంటల విద్యుత్ లేదని పేర్కొన్నారు. బీఆర్​ఎస్​ పోరాటానికి భయపడే కాంగ్రెస్ ప్రత్యేక తెలంగాణ ఇచ్చిందని తెలిపారు. తెలంగాణ వచ్చుడో.. కేసీఆర్​ సచ్చుడో అన్నట్లు తాను పోరాడానన్నారు. తెలంగాణ ప్ర‌జ‌ల కోసం, హ‌క్కుల కోసం బీఆర్ఎస్ పుట్టిందని తెలిపారు.

‘‘ప‌దేండ్ల నుంచి ప్ర‌భుత్వం న‌డుపుతున్నాం. గ‌త ప్ర‌భుత్వాల‌కు బీఆర్ఎస్ కు తేడా ఆలోచించాలి. అభివృద్ధి మీ కండ్ల‌ ముందుంది. 50 ఏండ్లు కాంగ్రెస్ పార్టీకి అవ‌కాశం ఇచ్చారు. ఉన్న రాష్ట్రాన్ని బ‌ల‌వంతంగా తీసుకెళ్లి ఏపీలో క‌లిపారు. దాంతో 58 ఏండ్లు గోస ప‌డ్డం. న‌ష్ట‌పోయాం. బాధ‌ప‌డ్డాం’’ అని కేసీఆర్ పేర్కొన్నారు. 2004లో పొత్తు పెట్టుకుని కాంగ్రెస్ తెలంగాణ ఇస్తామ‌ని చెప్పిందని.. అధికారంలోకి వచ్చినా తెలంగాణ ఇవ్వ‌లేదని గుర్తు చేశారు. ఏడాది, రెండేండ్ల‌కు కూడా ఇవ్వ‌లేదన్నారు. అంతేకాకుండా, బీఆర్ఎస్ పార్టీని చీల్చే కుట్ర చేసిందని ఆరోపించారు.

దేశానికి స్వాతంత్ర్యం వ‌చ్చి 75 ఏండ్లు అయినా.. ఇప్ప‌టి వ‌ర‌కు ప్ర‌జాస్వామ్య ప్ర‌క్రియ రావాల్సిన ప‌రిణితి రాలేదన్నారు కేసీఆర్. ఏ దేశాల్లో అయితే ప్ర‌జాస్వామ్యంలో ప‌రిణితి వ‌చ్చిందో అవి చాలా బాగా ముందుకు పోతున్నాయని తెలిపారు. మ‌న దేశంలో ఇంకా ఆ ప‌రిస్థితి లేదన్నారు. ‘‘ఎల‌క్ష‌న్లు వ‌స్తాయి పోతాయి. ఎన్నిక‌ల్లో ఎవ‌రో ఒక‌రు గెలుస్తారు. మీరు చాలా సార్లు ఓట్లేశారు. ఇప్పుడు ఎన్నిక‌లు వ‌చ్చాయి. ప్ర‌తి పార్టీ త‌ర‌పున ఒక‌రు నిల‌బడుతారు. 30న ఓట్లు ప‌డుతాయి. 3న లెక్కింపు అయిపోత‌ది. ఎన్నిక‌లు వ‌చ్చిన‌ప్పుడు ఆగ‌మాగం కాకుండా.. ఎవ‌రు గెలిస్తే మంచిదో నిర్ణ‌యించి ఓటేయాలి. ఆషామాషీగా, అల‌వోక‌గా ఓటు వేయొద్దు’’ అని ముఖ్య‌మంత్రి సూచించారు.

బీఆర్​ఎస్​ చేసిన అభివృద్ధిపై గ్రామాల్లో చర్చలు జరపండని సీఎం ప్రజలకు సూచించారు. పదేళ్లలో రాష్ట్రంలో ఎక్కడా కర్ఫ్యూ లేదని చెప్పారు. కాంగ్రెస్​ హయాంలో మైనారిటీలకు రూ.900 కోట్లు కేటాయించారని.. అదే బీఆర్​ఎస్​ హయాంలో మైనారిటీలకు రూ.12వేల కోట్లు కేటాయించామని వివరించారు. రాష్ట్రంలో 93 లక్షల కుటుంబాలకు తెల్ల రేషన్​ కార్డులు ఉన్నాయని చెప్పారు. వచ్చే ఏడాది నుంచి రేషన్​ కార్డు ఉన్నవారందరికీ సన్నబియ్యం ఇస్తామని హామీ ఇచ్చారు.

ఈమధ్య తెలంగాణ (Telangana) సీఎం కేసీఆర్ (CM KCR) హెలికాప్టర్ లో సాంకిత సమస్య తలెత్తడంతో ఆయన ఎన్నికల ప్రచార షెడ్యూల్ లో మార్పులు జరిగాయి. తాజాగా మరోసారి సీఎం హెలికాప్టర్ మొరాయించింది. ఆసిఫాబాద్‌ (Asifabad) లో జరిగే ప్రజా ఆశీర్వాద సభకు బయల్దేరి వెళ్తుండగా హెలికాప్టర్ టేకాఫ్ కాలేదు. సాంకేతిక సమస్య తలెత్తడంతో పైలట్ వెంటనే నిలిపివేశాడు.

రెండు రోజుల క్రితం ఉమ్మడి పాలమూరు జిల్లాలో సభల కోసం వెళ్తుండగా ఇలాగే జరిగింది. దేవరకద్రలో ఎన్నికల ప్రచారానికి వెళ్తుండగా సాంకేతిక సమస్యను పైలట్ గుర్తించి అప్రమత్తమయ్యారు. వెంటనే హెలికాప్టర్‌ ను తిరిగి వెనక్కి మళ్లించి ఎర్రవల్లిలోని కేసీఆర్ వ్యవసాయ క్షేత్రంలో ల్యాండ్ చేశారు. తర్వాత మరో హెలికాప్టర్ లో వెళ్లి.. కేసీఆర్ ప్రచారాన్ని ముగించారు.

ఇప్పుడు మరోసారి హెలికాప్టర్‌ లో సాంకేతిక లోపం తలెత్తింది. సిర్పూర్ కాగజ్‌ నగర్‌ లో సీఎం హెలికాప్టర్ టేకాఫ్ కాలేదు. ఎన్నికల ప్రచారంలో భాగంగా కాగజ్ నగర్‌ లో ప్రజా ఆశీర్వాద సభలో కేసీఆర్ పాల్గొన్నారు. తిరిగి బయలు దేరే సమయంలో ఈ ఘటన చోటు చేసుకుంది. హెలికాప్టర్‌ లో సాంకేతిక లోపం కారణంగా రోడ్డు మార్గాన ఆసిఫాబాద్‌ కు సీఎం బయలుదేరి వెళ్లారు.