Politics

ఎంపీ కొత్త ప్రభాకర్ రెడ్డి (Kotha Prabhakar Reddy) పై హత్యాయత్నం కేసు చుట్టూ మాటల యుద్ధం కొనసాగుతోంది. నిందితుడు ఎవరి కోసం ఇదంతా చేశాడు? అనే చర్చ జరుగుతుండగా.. కొన్ని ఫోటోలు బయటకొచ్చాయి. ఈ క్రమంలోనే మంత్రి కేటీఆర్ (KTR).. కాంగ్రెస్ (Congress) ను టార్గెట్ చేశారు.

ప్రభాకర్ రెడ్డిపై హత్యాయత్నం కాంగ్రెస్ గూండా పనేనని ఆరోపించారు. మంగళవారం ట్విట్టర్ (ఎక్స్) లో నిందితుడు గట్టని రాజు (Raju) కాంగ్రెస్ కండువాతో ఉన్న ఫోటోను షేర్ చేశారు కేటీఆర్. ఇతను కాంగ్రెస్ వ్యక్తే అనడానికి ఇంతకంటే రుజువు కావాలా అని రాహుల్ గాంధీ (Rahul Gandhi) ని ప్రశ్నించారు.

ఇక, యశోదా ఆసుపత్రిలో చికిత్స పొందుతున్న ప్రభాకర్ రెడ్డిని కేటీఆర్ పరామర్శించారు. ఈ సందర్భంగా ప్రభాకర్ రెడ్డి ఆరోగ్య పరిస్థితి గురించి వైద్యులను అడిగి తెలుసుకున్నారు. అనంతరం కుటుంబ సభ్యులను పరామర్శించి ధైర్యం చెప్పారు. ఇటు, నిందితుడు ఎందుకు హత్యాయత్నానికి పాల్పడ్డాడు అనేదానిపై పోలీసుల దర్యాప్తు కొనసాగుతోంది.

కేసు నమోదు చేసుకున్న పోలీసులు హత్యాయత్నం పక్కా ప్లాన్ ప్రకారం జరిగిందా? నిందితుడు ఎంపీ పర్యటన వివరాలు తెలుసుకుని మాటు వేసి కత్తితో దాడి చేశాడా? బీఆర్ఎస్ నాయకులను రాజు ఎంపీ ప్రచార షెడ్యూల్ ఎందుకు అడిగాడు? మూడు రోజులుగా ఎందుకు ఫాలో అవుతున్నాడు? ఈ దాడి వ్యక్తిగత గొడవలా? లేదా రాజకీయ కుట్ర కోణం ఉందా? ఇలా అనేక కోణాల్లో దర్యాప్తు చేస్తున్నారు.

బాన్సువాడ (Banswada)లో బీఆర్ఎస్ ఆధ్వర్యంలో నిర్వహించిన ప్రజా ఆశీర్వాద సభలో ఎంపీ కొత్త ప్రభాకర్ రెడ్డి (Kotha Prabhakar Reddy)పై ఈ దాడి జరిగిన విషయం తెలిసిందే.. దాడి ఘటన పై ఇప్పటికే మంత్రి హరీష్ రావు (Harish Rao) సీఎం కేసీఆర్ (CM KCR) స్పందించారు. తీవ్రస్థాయిలో విమర్శలు కూడా గుప్పించారు.

మరోవైపు ప్రభాకర్ రెడ్డి పై జరిగిన దాడి ప్రతిపక్షాల పని అని సీఎం కేసీఆర్ కూడా ఆరోపించిన విషయం తెలిసిందే. అయితే ఎంపీ పై దాడి విషయంలో టీపీసీసీ అధ్యక్షుడు రేవంత్ రెడ్డి (Revanth Reddy)స్పందించారు. హింసను ఎప్పుడూ కాంగ్రెస్ పార్టీ నమ్ముకొదని, అహింసా మూల సిద్ధాంతంగా పని చేస్తున్నది కాంగ్రెస్ పార్టీ అని ఓ ప్రకటన విడుదల చేశారు. ఎంపీ పై దాడికి పాల్పడిన వ్యక్తి ఎవరన్నా కానీ అతని పై కేసు నమోదు చేసి విచారణ జరపాలని కోరారు.

కాగా ఈ ఘటనను కాంగ్రెస్ పార్టీ కూడా తీవ్రంగా ఖండిస్తుందని రేవంత్ రెడ్డి పేర్కొన్నారు. ప్రభాకర్ రెడ్డి పై దాడి విషయంలో తక్షణమే పూర్తి స్థాయిలో విచారణ జరిపి నిజానిజాలు బయటపెట్టాలని రేవంత్ రెడ్డి డిమాండ్ చేశారు. మరోవైపు కొత్త ప్రభాకర్ రెడ్డి దాడి వెనుక రాజకీయ కోణం ఉందని మంత్రి హరీష్ రావు విమర్శించిన విషయం విదితమే..

బీజేపీ (BJP) లో టికెట్ల పంచాయితీ కొనసాగుతోంది. తమ నాయకుడికి టికెట్ ఎందుకివ్వరంటూ కార్యకర్తలు, అభిమానులు నిరసనలకు దిగుతున్నారు. తాజాగా నర్సాపూర్ (Narsapur) అభ్యర్థి మురళి యాదవ్ కి టికెట్ ఇవ్వడంపై సొంత పార్టీ వర్గాలు తీవ్ర అభ్యంతరం వ్యక్తం చేస్తున్నాయి. టికెట్ మార్చాలంటూ బీజేపీ ఆఫీస్ ముందు కార్యకర్తలు ధర్నాకు దిగారు. గోపికి కాకుండా మురళి యాదవ్ కి టికెట్ ఇవ్వడంపై మండిపడ్డారు.

నర్సాపూర్ బీజేపీని కాపాడాలి అంటూ ప్లకార్డ్స్ కూడా ప్రదర్శించారు కార్యకర్తలు. తాను 27 ఏళ్లుగా బీజేపీలోనే ఉంటున్నామని, గతంలో ఆర్ఎస్ఎస్​ లోనూ పని చేశానన్నారు గోపి. భూ కబ్జాదారుడికి నర్సాపూర్ బీజేపీ టికెట్ ఎలా ఇస్తారని ప్రశ్నించారు. కొంతమంది పెద్దలు కాంగ్రెస్ కి ఏజెంట్లుగా వ్యవహరిస్తున్నారని ఆయన ఆరోపించారు. తెలంగాణ బీజేపీని కాపాడుకోవాల్సిన బాధ్యత తమపై ఉందన్నారు. ఎంతో బాధతోనే పార్టీ కార్యాలయం ముందు నిరసనకు దిగాల్సి వచ్చిందని చెప్పుకొచ్చారు.

మరోవైపు, కూకట్‌ పల్లి (Kukatpalli) కార్యకర్తలు కూడా ఆందోళనకు దిగారు. కూకట్ పల్లి సీటును జనసేనకు కేటాయించొచ్చని ప్రచారం నేపథ్యంలో అలా చేయొద్దని డిమాండ్ చేశారు. బీజేపీ కార్యాలయంలోకి చొచ్చుకెళ్లేందుకు యత్నించారు. ఇంకా సీట్లు ఖరారు కాలేదని, ఎవరూ ఆవేశపడొద్దని అక్కడున్న బీజేపీ నేతలు వారితో చెప్పారు. అయినా కార్యకర్తలు మాత్రం ఆ సీటును బీజేపీకి ఇవ్వాల్సిందేనని పట్టుబట్టారు. జనసేనకు ఇస్తే తాము ఊరుకోమంటూ హెచ్చరించారు.

తెలంగాణలో బీజేపీ, జనసేన కలిసి ఎన్నికలకు వెళ్లే యోచనలో ఉన్నాయి. ఈ మేరకు చర్చలు జరుగుతున్నాయి. అధికారికంగా పొత్తు ఖరారు కాకపోయినా, కొన్ని చోట్ల సీట్ల విషయంలో గొడవలు మొదలయ్యాయి. ప్రముఖంగా శేరిలింగంపల్లి, కూకట్‌ పల్లి లాంటి బలమైన స్థానాలను జనసేనకు ఇచ్చేందుకు బీజేపీ కార్యకర్తలు ఒప్పుకోవడం లేదు. ఈమధ్య శేరిలింగంపల్లికి చెందిన బీజేపీ శ్రేణులు టికెట్ గజ్జల యోగానంద్ కు ఇవ్వాలని పార్టీ కార్యాలయానికి వెళ్లి వినతిపత్రం అందించారు. ఇప్పుడు కూకట్ పల్లికి చెందిన పార్టీ శ్రేణులు ఆందోళనకు దిగారు.

– రైతు బీమా చేశాం
– వారం రోజుల్లో రూ.5 లక్షలు అందిస్తాం
– 2 దఫాలుగా రూ.37 వేల కోట్ల రుణమాఫీ చేశాం
– కాంగ్రెస్ ఈసీకి ఫిర్యాదు చేయడంతో రైతు బంధు ఆపాం
– ఎన్నికలు అవ్వగానే అకౌంట్లలో నగదు వేస్తాం
– దళిత బంధుతో దళితుల జీవితాల్లో వెలుగులు నింపాం
– మంచీ చెడు చూసి ఆలోచించి ఓటెయ్యండి
– జుక్కల్ సభలో సీఎం కేసీఆర్

రైతు బంధు దుబారా అంటున్న వారికి బుద్ది చెప్పాలన్నారు సీఎం కేసీఆర్ (CM KCR). ఎన్నికల ప్రచారంలో భాగంగా జుక్కల్ (Jukkal) నియోజకవర్గంలో జరిగిన ప్రజా ఆశీర్వాద సభలో పాల్గొని ప్రసంగించారు. మహారాష్ట్రలో పెద్ద మొత్తంలో ఆదాయం ఉన్నప్పటికీ.. సంక్షేమం లేదన్నారు. అలాగే, కర్ణాటక (Karnataka) లో సరిగ్గా కరెంట్ ఇవ్వడం లేదని ఆరోపించారు. కేవలం 5 గంటల కరెంట్‌ కే గొప్ప అంటున్నారని.. అదే, తెలంగాణలో 24 గంటలు ఇస్తున్నామని చెప్పారు. రైతు బీమా చేశామని, బాధితులకు వారం రోజుల్లో రూ.5 లక్షలు అందిస్తున్నామని, అదేవిధంగా రెండు దఫాలుగా రూ.37 వేల కోట్ల రుణ మాఫీ చేశామని వివరించారు.

కరువు కాటకాలతో అల్లాడిన జుక్కల్‌ నియోజకవర్గం తెలంగాణ ఏర్పడిన తర్వాత శరవేగంగా అభివృద్ధి చెందుతున్నదని కేసీఆర్‌ అన్నారు. నియోజకవర్గానికి లెండి ప్రాజెక్టు రావాల్సి ఉన్నదని, ఎన్నికల తర్వాత మహారాష్ట్ర వాళ్లతో మాట్లాడి దాని సంగతి తేలుస్తానని హామీ ఇచ్చారు. నాగమడుగు లిఫ్ట్‌ ఇరిగేషన్‌ స్కీమ్‌ ను షిండే పట్టుబట్టి మంజూరు చేయించుకున్నారని, దాని ద్వారా వచ్చే వర్షాకాలానికి జుక్కల్‌ లో 40 వేల ఎకరాలకు సాగు నీళ్లు వస్తాయని తెలిపారు. ‘జుక్కల్‌ నియోజకవర్గంలో 25 తండాలను గ్రామ పంచాయతీలుగా చేసుకున్నం. ఇప్పుడు తండాలు అద్భుతంగా అభివృద్ధి చెందుతున్నాయి. నియోజకవర్గంలో కొత్తగా మూడు మండలాలను ఏర్పాటు చేయాల్సి ఉంది. ఎన్నికల తర్వాత ఆ పని కూడా పూర్తి చేస్తం’’ అని సీఎం హామీ ఇచ్చారు.

గతంలో కరెంట్, నీళ్ళు లేక ఎన్నో బాధలు పడ్డామని, ఇప్పుడా బాధలు లేవని, 2004లో కాంగ్రెస్ పార్టీ తెలంగాణ ఇస్తే మనం ఇంకా చాలా బాగా ఉండే వాళ్ళమని తెలిపారు సీఎం. మంచి నీళ్ళ కోసం ఎన్నో బాధలు పడ్డామని, ఇప్పుడు మిషన్ భగీరథతో ఆ సమస్య లేకుండా సరఫరా చేస్తున్నామని చెప్పారు. మంచీ.. చెడును చూసి ఆలోచించి ఓటెయ్యాలని సూచించారు. దేశంలో దళిత బంధు పథకాన్ని సృష్టించిందే బీఆర్‌ఎస్‌ సర్కార్ అని.. ఆ పథకంతో దళితుల జీవితాల్లో వెలుగులు నింపుతున్నామని తెలిపారు. రైతులు స్వయం ఉపాధితో తమ కాళ్లపై తాము నిలబడేందుకు ఇది తోడ్పాటును అందిస్తున్నదని చెప్పారు.

కాంగ్రెస్ నేతలు ఈసీకి ఫిర్యాదు చేయడంతో రైతు బంధు ఆపామని, ఎన్నికలు అవ్వగానే అకౌంట్లలో నగదు వేస్తామని కేసీఆర్ అన్నారు. గతంలో జుక్కల్‌కు పిల్లనివ్వలంటే భయ పడేవారని, ఇప్పుడా పరిస్థితి లేదని తెలిపారు. తెలంగాణ తలసరి ఆదాయం 3 లక్షల 18 వేలతో అభివృద్ధిలో ముందున్నామన్నారు. తలసరి విద్యుత్ వినియోగం 22 వందల యూనిట్లతో నెంబర్ వన్‌ లో ఉన్నామని వ్యాఖ్యానించారు సీఎం కేసీఆర్.