Politics

బీఆర్ఎస్ (BRS) ఎమ్మెల్యే (MLA) రేగా కాంతారావు (Rega Kantha Rao) పై కాంగ్రెస్ (Congress) ఎమ్మెల్యే పోదెం వీరయ్య (Podem Veeraiah) కీలక వ్యాఖ్యలు చేశారు. తన పై చేసిన విమర్శలకు ఘాటుగా సమాధానాలు ఇచ్చారు. కాంగ్రెస్ పార్టీలో గెలిచి డబ్బులకి అమ్ముడు పోయిన నువ్వా నన్ను విమర్శించేదంటూ మండిపడ్డారు. భద్రాచలానికి నువ్వు కానీ, నీ ముఖ్యమంత్రి గాని, నీ పార్టీ గాని ఏం చేశారని ప్రశ్నించారు.

ఐదు పంచాయతీల విషయంలో ఏం పోరాడారని పోదెం వీరయ్య దుయ్యబట్టారు. కన్నతల్లి లాంటి కాంగ్రెస్ పార్టీని విమర్శించడానికి సిగ్గు లేదా అంటూ ఆగ్రహం వ్యక్తం చేశారు. రాష్ట్రంలో కాంగ్రెస్ పార్టీ అధికారంలోకి రాబోతుందని, అప్పుడు నీ అక్రమ సంపాదన, భూదందాల సంగతి చూస్తామని హెచ్చరించారు. కేసీఆర్ డబ్బులకి కక్కుర్తి పడి పార్టీ మారిన రేగా కాంతారావు, రోజుకు ఒక పార్టీ మారే తెల్ల వెంకట్రావు.. వీరు నన్ను ఓడిస్తారా.. మీకు డబ్బుంటే నాకు ప్రజాబలం ఉందని వ్యాఖ్యానించారు పోదెం వీరయ్య.

ఇదే క్రమంలో మంత్రి పువ్వాడ అజయ్ పై కూడా ఘాటు వ్యాఖ్యలు చేశారు. కేవలం నీ నియోజకవర్గానికి మాత్రమే నిధులు తెచ్చుకుని అభివృద్ధి చేసుకుంటున్న నువ్వు ఒక మంత్రివా అంటూ ఆగ్రహం వ్యక్తం చేశారు.. భద్రాచలం గాలికి వదిలేసిన మీరు ఏ మొహం పెట్టుకొని భద్రాచలం వస్తున్నారని మండిపడ్డారు. ఈ సందర్భంగా తెల్లం వెంకటరమణ ప్రశ్నిస్తూ.. గత ఎన్నికల్లో ఓడిపోయిన మీరు ఈ ప్రాంత అభివృద్ధి కోసం ఒక్కసారైనా ముఖ్యమంత్రిని కలిసి నిధులు అడిగారా అని ప్రశ్నించారు.

తెలంగాణ (Telangana)లో రాజకీయ నేతల మాటలు వార్నింగ్ ఇచ్చుకునే వరకు వెళుతున్నాయి. ఇక విమర్శల గురించి ప్రత్యేకంగా చెప్పవలసిన అవసరం లేదు. నువ్వు దొంగ అంటే నువ్వు దొంగ అని ఒకరినొకరు తీవ్ర పదజాలంతో విమర్శించుకోవడం కనిపిస్తూనే ఉంది. మరి రాజకీయాల్లో అందరూ దొంగలే అయితే నీతివంతులు లేనట్టేనా? అనే అనుమానం ఈ సందర్భంగా సామాన్య ప్రజలకు వస్తోంది.

అయితే ఇప్పటికే పలువురు నేతలు తెలంగాణ సీఎం (CM) కేసీఆర్ (KCR) పై విమర్శల పర్వానికి తెరలేపారు. కాగా ఇప్పుడు కాంగ్రెస్ (Congress) సీనియర్ నేత రేణుకా చౌదరి (Renuka Chaudhary) కూడా విరుచుకు పడ్డారు. తెలంగాణ బిడ్డ ప్రవల్లిక ఆత్మహత్య ప్రభుత్వ హత్యేనని.. ఖబడ్దార్ జాగ్రత్తగా ఉండాలంటూ కేసీఆర్ కు వార్నింగ్ ఇచ్చారు. కేసీఆర్ పార్టీ పేరు మార్చి తన జాతకం, గోత్రం మార్చుకున్నారని ధ్వజమెత్తారు. మాటలకి జీఎస్టీ (GST) లేదు.. చేతల్లో దమ్ము లేదు.. అందుకే కేసీఆర్ నోటికి పనిచెప్పి ఇష్టం వచ్చినట్టు మాట్లాడుతున్నారని రేణుకా చౌదరి మండిపడ్డారు.

తల్లిదండ్రులు అప్పులు చేసి పిల్లలను చదివిస్తున్నా తానే ఉచితంగా చదిస్తున్నట్టు కేసీఆర్ సొల్లు మాటలు మాట్లాడుతున్నారని విమర్శించారు. ఐటీ కింగ్ అంటున్న కేటీఆర్.. పేపర్ల లీకేజీకి బాధ్యత వహించకుండా విద్యార్ధులను మభ్య పెడుతున్నాడని, బంగారు తెలంగాణ అంటూ పిల్లల బతుకులు తండ్రి, కొడుకు కలిసి ఆగం చేస్తున్నారని మండిపడ్డారు. టీఎస్పీఎస్సీపై సీబీఐ విచారణ జరిపించాలని రేణుకా చౌదరి డిమాండ్ చేశారు.

ములుగు(Mulugu) మండలం జంగాలపల్లిలో పార్టీ జిల్లా అధ్యక్షుడు పైడాకుల అశోక్‌ అధ్యక్షతన నిర్వహించిన కార్యకర్తల సమావేశంలో పాల్గొన్న సీతక్క (Sitakka) పలు కీలక వ్యాఖ్యలు చేశారు. నేను గెలిచాను కాబట్టే ములుగును జిల్లా చేశారని, పోరాటం చేసినందుకే అభివృద్ధి నిధులు ఇచ్చారని ఎమ్మెల్యే (MLA) సీతక్క వెల్లడించారు.

నా గెలుపు వల్ల ములుగు జిల్లా అయిందని, నేను అడిగితేనే ములుగులో సమీకృత కలెక్టరేట్‌, హెల్త్‌ ప్రొఫైల్‌, మెడికల్‌ కళాశాల, మల్లంపల్లి మండలం, ఏటూరునాగారం (Eturunagaram) రెవెన్యూ డివిజన్‌ అయిందని, పోడు భూములకు పట్టాల జారీ జరిగిందని సీతక్క అన్నారు.

రాబోయే ఎన్నికల్లో కాంగ్రెస్‌ పార్టీ అధికారంలోకి వస్తే ములుగు జిల్లాను మరింత అభివృద్ధి చేసి చూపిస్తానని సీతక్క అన్నారు. గోదావరి జలాలను జిల్లాలోని చెరువులకు మళ్లించి సాగునీటి కష్టాలను తొలగిస్తానని పేర్కొన్నారు. ఒక ప్రతిపక్ష ఎమ్మెల్యేగా ప్రజల పక్షాన ఉంటూ పోరాడుతున్న నన్ను చూసి ఓర్చుకోలేని బీఆర్‌ఎస్‌ నాయకులు నాపై దుష్ప్రచారాలు చేస్తున్నారని సీతక్క తెలిపారు.. ఈ సమావేశంలో పలువురు కాంగ్రెస్‌ ముఖ్య నేతలు, కార్యకర్తలు పాల్గొన్నారు.

తెలంగాణ (Telangana)లో ఎన్నికలు సమీపిస్తున్న సమయంలో కాంగ్రెస్ (Congress) కు షాక్ తగిలింది. పార్టీ వీడుతున్నట్టు మాజీ మంత్రి పొన్నాల లక్ష్మయ్య (Ponnala Lakshmaiah) ప్రకటనతో కాంగ్రెస్ లో అంతర్గతంగా ఉన్న విభేదాలు మరోసారి బయటపడ్డాయి. మరోవైపు మంత్రి పొన్నాల పై రేవంత్ రెడ్డి (Revanth Reddy) చేసిన ఘాటు వాఖ్యలు తీవ్ర దుమారం రేపాయి. ఈ నేపధ్యంలో టీపీసీసీ చీఫ్ రేవంత్ రెడ్డి పై, మాజీ మంత్రి పొన్నాల లక్ష్మయ్య ఫైర్ అయ్యారు.

మంత్రి కేటీఆర్‌తో భేటీ అనంతరం.. కాంగ్రెస్ పార్టీని రేవంత్ రెడ్డి భ్రష్టు పట్టిస్తున్నాడని ధ్వజమెత్తారు. తన రాజీనామాపై రేవంత్ రెడ్డి మాట్లాడిన మాటలు సిగ్గు ఉండేవారు మాట్లాడేవేనా అని సీరియస్ అయ్యారు. ఐకమత్యమే పార్టీ బలమన్న విషయాన్ని మరచిన రేవంత్ రెడ్డి.. తనను అసెంబ్లీ ఎన్నికలో ఓడిపోయారని అనడం హాస్యాస్పదం అన్నారు.

కాంగ్రెస్ ఎమ్మెల్యేగా కూడా గెలవని రేవంత్, జీహెచ్ఎంసీ ఎన్నికల్లో.. తన పార్లమెంట్ మల్కాజిగిరి పరిధిలో ఎన్ని సీట్లు గెలిచారని ప్రశ్నించారు. . కొడంగల్‌లో కూడా ఓడిపోయిన రేవంత్ రెడ్డి నా గెలుపు గురించి మాట్లాడటం విడ్డూరమని అన్నారు. మరోవైపు బీఆర్ఎస్ పార్టీలోకి రావాలని ఆహ్వానించిన మంత్రి కేటీఆర్, సీఎం కేసీఆర్‌ను కలిసేందుకు రావాలని కోరినట్టు పొన్నాల తెలిపారు. రేపు సీఎం కేసీఆర్‌ను కలిసిన తర్వాత పూర్తి వివరాలు తెలియజేస్తానని చెప్పారు. కాగా కాంగ్రెస్ వీడిన తర్వాత పొన్నాల, రేవంత్ రెడ్డి పై ఫైర్ అవడం పొలిటికల్ సర్కిల్లో చర్చకు దారితీసింది.