Politics

టీడీపీ అధినేత చంద్రబాబు (Chandrababu) అరెస్టు, ఆరోగ్య సమస్యల నేపథ్యంలో ఐటీ ఉద్యోగులు హైదరాబాద్ (Hyderabad) లో లెట్స్​ మెట్రో ఫర్​ సీబీఎన్​ కార్యక్రమాన్ని నిర్వహించారు. నల్ల టీ షర్ట్​ లను ధరించి.. మియాపూర్​ నుంచి ఎల్బీనగర్​ వరకు ప్రయాణం చేసి నిరసన తెలిపారు. చంద్రబాబుకు సంఘీభావంగా ఐటీ ఉద్యోగులతోపాటు పలువురు రాజకీయ నాయకులు కూడా ఇందులో పాల్గొన్నారు. బీజేపీ (BJP) శేరిలింగంపల్లి నాయకులు గజ్జల యోగానంద్ (Gajjala Yoganand) పాల్గొని.. చంద్రబాబు అరెస్టును ఖండించారు. ఆయనకు మద్దతుగా మెట్రో (Metro) ప్రయాణం చేశారు.

ఈ సందర్భంగా యోగానంద్ మాట్లాడుతూ.. చంద్రబాబు అరెస్టు బాధాకరమన్నారు. కేవలం రాజకీయ కుట్రలో భాగంగా, కక్ష పూరితంగా ఆయన్ను అరెస్టు చేశారని తెలిపారు. హైదరాబాద్ నగర అభివృద్ధిలో చంద్రబాబు క్రియాశీలక పాత్ర పోషించారని గుర్తు చేశారు. విజన్-2020 లో భాగంగా ఎన్నో అభివృద్ధి పనులు చేశారని అన్నారు. అయితే.. చంద్రబాబు చేసిన అభివృద్ధిని బీఆర్ఎస్ వాళ్లు తామే చేశామని ప్రగల్భాలు పలుకుతున్నారని మండిపడ్డారు.

సుపరిపాలనను రాజకీయాలకు అతీతంగా అభినందించాలని తెలిపారు యోగానంద్. మెట్రో రైలులో చంద్రబాబుకి సంఘీభావం తెలపడం తన వ్యక్తిగతమని.. ఎలాంటి రాజకీయాలకు తావు లేకుండా కేవలం నగర అభివృద్ధిలో ఎవరి పాత్ర ఎంత ఉందని తెలియజేయడమే తన ఉద్దేశమని అన్నారు.

తనకు న్యాయ వ్యవస్థపై పూర్తిగా నమ్మకం ఉందని.. చంద్రబాబుకు తప్పకుండా న్యాయం లభిస్తుందని ఆశాభావం వ్యక్తం చేశారు యోగానంద్. ఈ కార్యక్రమంలో చంద్రబాబు అభిమానులు, బీజేపీ కార్యకర్తలు, ఇతరులు పెద్ద సంఖ్యలో పాల్గొన్నారు.

ప్రజలకు నిరసన తెలిపే హక్కును కూడా ప్రభుత్వం హరిస్తోందని టీజేఎస్ (TJS) అధినేత కోదండరాం (Kodanda Ram) మండిపడ్డారు. టీఎస్పీఎస్సీ (TSPSC) ని రద్దు చేయాలని సడక్ బంద్ కు అఖిలపక్ష నేతలు పిలుపునిచ్చారు. ఈ నేపథ్యంలో కోదండరాం సహా ఇతర నేతలను పోలీసులు హౌస్ అరెస్ట్ చేశారు. ఈ నేపథ్యంలో ప్రభుత్వ తీరును తీవ్రంగా ఖండించారు కోదండరాం. వరుసగా పరీక్షల్లో వైఫల్యం చెందిన టీఎస్పీఎస్సీ బోర్డును రద్దు చేసి, కమిటీ సభ్యులను తొలగించాలని డిమాండ్ చేశారు. నూతన బోర్డును ఏర్పాటు చేయాలని.. డీఎస్సీ పోస్టుల సంఖ్యను కూడా పెంచాలన్నారు.

పరీక్షల రద్దు వల్ల ఎంతోమంది నిరుద్యోగ విద్యార్థులు నష్టపోయారని, వారందరికీ పరిహారంగా 3 లక్షలు చెల్లించాలని ప్రభుత్వాన్ని కోదండరాం డిమాండ్ చేశారు. నిరుద్యోగులను ప్రభుత్వం అభద్రతా భావంలోకి నెట్టేసిందని, వారికి న్యాయం చేయాలని చెప్పి తాము బయలుదేరితే ఆపేశారని మండిపడ్డారు. వెంటనే విద్యార్థులు, నిరుద్యోగుల డిమాండ్లను నెరవేర్చాలని డిమాండ్ చేశారు.

ప్రవళ్లిక ఆత్మహత్య నిరుద్యోగుల సమస్యకు అద్దం పడుతోందన్నారు కోదండరాం. ఆమె ప్రభుత్వ నౌకరీ కోసం ప్రయత్నిస్తోందని, ఆ పరీక్షలు వాయిదా పడడంతో ఆత్మహత్య చేసుకున్నదని తెలిపారు. ఇప్పటికే 200 మంది నిరుద్యోగులు ఆత్మహత్య చేసుకున్నారని, అందులో కొందరు నిరుద్యోగమే ప్రధాన అంశం అని సూసైడ్ నోట్ రాశారని గుర్తు చేశారు. అయినా ప్రభుత్వం స్పందించడం లేదని మండిపడ్డారు.

ఖమ్మంలో అఖిలపక్ష నేతలు రోడ్డెక్కారు. టీఎస్పీఎస్సీ బోర్డును రద్దు చేయాలని.. నిబంధనల ప్రకారం కొత్త సభ్యులను నియమించాలని డిమాండ్ చేశారు. కేసీఆర్ డౌన్ డౌన్ అంటూ ప్రభుత్వానికి వ్యతిరేకంగా పెద్ద ఎత్తున నినాదాలు చేశారు. రాపర్తి నగర్ బైసాస్ పై ధర్నా చేపట్టడంతో అక్కడ భారీగా ట్రాఫిక్ జామ్ ఏర్పడింది. దీంతో పోలీసులు ఆందోళనకారులను అడ్డుకున్నారు. ఈ క్రమంలో తోపులాట జరిగింది. తర్వాత నిరసనకారులను పోలీసులు అరెస్ట్ చేశారు.

తెలంగాణ (Telangana) సీఎం కేసీఆర్ (CM KCR) హుస్నాబాద్ వేదికగా ఎన్నికల శంఖారావం పూరించనున్నారు. ఆదివారం హుస్నాబాద్ (Husnabad) లోని సబ్ స్టేషన్ పక్కన గల మైదానంలో జరిగే ఈ బహిరంగ సభకు సంబంధించిన ఏర్పాట్లు చురగ్గా జరుగుతున్నాయి. ఈ నేపథ్యంలో కాంగ్రెస్ నేత పొన్నం ప్రభాకర్ (Ponnam Prabhakar) స్పందించారు. సిద్దిపేట, గజ్వేల్, సిరిసిల్ల లాగా హుస్నాబాద్‌ ను ఇన్నాళ్లూ ఎందుకు అభివృద్ధి చేయలేదో సీఎం కేసీఆర్ చెప్పాలని డిమాండ్ చేశారు.

బీఆర్ఎస్ (BRS), బీజేపీ (BJP) తమ వైఫల్యాలను కప్పిపుచ్చుకొని ప్రజలను మభ్యపెట్టడానికి ఒకరిపై ఒకరు విమర్శలు చేసుకుంటూ రాజకీయ నాటకాలు ఆడుతున్నాయని మండిపడ్డారు పొన్నం. తమ మేనిఫెస్టో దిమ్మ తిరిగేలా ఉంటుందంటున్న బీఆర్ఎస్‌.. ఇదివరకు ఇచ్చిన హామీలు అమలు చేయకపోవడంతో ప్రజలే దిమ్మ తిరిగే తీర్పిస్తారని సెటైర్లు వేశారు. బీఆర్ఎస్ తాయిలాలు తీసుకొని ఎన్నికల్లో కాంగ్రెస్ కు పట్టం కట్టాలని కోరారు.

ఎన్నికల సెంటిమెంట్ కోసం హుస్నాబాద్‌ ను వాడుకుంటున్న కేసీఆర్ అభివృద్ధి విషయంలో ఎందుకు నిర్లక్ష్యం చేశారని అడిగారు పొన్నం. 2014కు ముందే 70శాతం పూర్తయిన గౌరవెల్లి ప్రాజెక్టును కూర్చీ వేసుకుని పూర్తి చేస్తానన్న కేసీఆర్.. ఇంతవరకు ఎందుకు పూర్తి చేయలేదో బహిరంగ సభలో చెప్పాలని డిమాండ్ చేశారు. పోలీసుల నిర్బంధాల మధ్య భూ నిర్వాసితులను అణిచివేసి కూడా గౌరవెల్లి ప్రాజెక్టును పూర్తి చేయలేదన్నారు.

నిరుద్యోగి ప్రవళ్లిక ఆత్మహత్య టీఆర్ఎస్ ప్రభుత్వ హత్యేనని పొన్నం ప్రభాకర్ విమర్శలు చేశారు. పొత్తుల్లో భాగంగా గత ఎన్నికల్లో హుస్నాబాద్ అసెంబ్లీ స్థానం సీపీఐకి కేటాయించామని.. ఈ ఎన్నికల్లో మాత్రం కాంగ్రెస్‌ కు వదిలిపెట్టాలన్నారు.

ప్రవళ్లిక మరణంపై కాంగ్రెస్ అగ్రనేత రాహుల్ గాంధీ (Rahul gandhi) స్పందించారు. ట్విట్టర్ (ఎక్స్)లో దీనిపై మాట్లాడిన ఆయన.. తెలంగాణ (Telangana) నిరుద్యోగులకు కీలక హామీ ప్రకటించారు. హైదరాబాద్‌ (Hyderabad) లో నిరుద్యోగ యువతి ఆత్మహత్య అత్యంత బాధాకరమన్నారు రాహుల్. ఇది ఆత్మహత్యగా చూడవద్దని.. నిరుద్యోగ యువత కలలు, ఆశలను ప్రభుత్వం హత్య చేసినట్టుగా ఉందని పేర్కొన్నారు.

త్వరలో తెలంగాణలో కాంగ్రెస్ (Congress) ప్రభుత్వం రాబోతోందని… నిరుద్యోగ యువత ఆశలను నిలబెడుతుందన్నారు రాహుల్ గాంధీ. నెల రోజుల్లో యూపీఎస్సీ తరహాలో టీఎస్పీఎస్సీ (TSPSC) ని ప్రక్షాళన చేస్తామని హామీ ఇచ్చారు. అలాగే, ఏడాదిలోనే 2 లక్షల ఉద్యోగాలను భర్తీ చేస్తామన్నారు. ఇది తమ గ్యారెంటీ అంటూ ట్వీట్ చేశారు. తెలంగాణ యువత ఉద్యోగాలు లేక విలవిలలాడుతోందన్నారు.

యువత కలలు, ఆశలను ప్రభుత్వం కూల్చేస్తోందని.. బీజేపీ (BJP), బీఆర్ఎస్ (BRS) కలిసి తమ అసమర్థతతో రాష్ట్రాన్ని నాశనం చేశాయని ఆరోపించారు రాహుల్. కాంగ్రెస్ హయాంలో ఉద్యోగాల క్యాలెండర్ ను విడుదల చేస్తామని తెలిపారు. ఈ ఘటనపై టీపీసీసీ చీఫ్ రేవంత్ రెడ్డి కూడా స్పందించారు. రాక్షస పాలనలో హత్యలు, ఆత్మహత్యలు, అత్యాచారాలు తప్ప యువతకు భవిత లేదని విమర్శించారు. ప్రవళ్లిక ఆత్మహత్యపై ప్రభుత్వం స్పందించాలని.. కేసును పక్కదోవ పట్టించే ప్రయత్నం చేస్తే పరిణామాలు తీవ్రంగా ఉంటాయని హెచ్చరించారు.

శుక్రవారం రాత్రి హైదరాబాద్ అశోక్‌ నగర్‌ లో ప్రవళ్లిక అనే గ్రూప్ -2 అభ్యర్థి ఆత్మహత్య చేసుకుంది. హాస్టల్‌ లో ఉరి వేసుకుని చనిపోయింది. ఈ ఘటనతో విద్యార్థి, నిరుద్యోగ సంఘాలు రగిలిపోతున్నారు. ప్రభుత్వానికి వ్యతిరేకంగా ధర్నాలు చేస్తున్నారు.