Politics

ఇంకొద్ది రోజుల్లో తెలంగాణ (Telangana) లో ఎన్నికలు ఉన్నాయి. ఈ నేపథ్యంలో ఎన్నికల సంఘం కీలక నిర్ణయం తీసుకుంది. ఐఏఎస్ (IAS), ఐపీఎస్ (IPS) ల బదిలీలు చేపట్టింది. ఈ క్రమంలోనే ముగ్గురు పోలీస్ కమిషనర్లు, 10 మంది జిల్లా ఎస్పీ‌లతో పాటు ఐఏఎస్, సీనియర్ అధికారులను బదిలీ చేసింది. వారి స్థానంలో కొత్తవారిని నియమించాలని, వారి నియామకం కోసం ఒక్కో పోస్టుకు ముగ్గురు చొప్పన అధికారుల పేర్లతో అవసరమైన జాబితాను అందించాలని ప్రభుత్వాన్ని ఆదేశించింది.

బదిలీ అయినవారి స్థానంలో ఇంచార్జిలను నియమిస్తూ డీజీపీ అంజనీ కుమార్‌ ఉత్తర్వులు జారీ చేశారు. హైదరాబాద్‌ సీపీగా విక్రమ్‌ సింగ్‌ మాన్‌ ను నియమించారు. ఇప్పటిదాకా ఈ స్థానంలో సీవీ ఆనంద్ ఉన్నారు. వరంగల్‌ సీపీగా మురళీధర్‌, నిజామాబాద్‌ సీపీగా జయరాంను నియమించారు. మహబూబ్‌ నగర్‌ ఎస్పీగా అందె రాములు, నాగర్‌ కర్నూల్‌ ఎస్పీగా రామేశ్వర్‌, గద్వాల ఎస్పీగా ఎన్‌ వి, సూర్యాపేట ఎస్పీగా నాగేశ్వర్‌ రావు, సంగారెడ్డి ఎస్పీగా అశోక్‌, కామారెడ్డి ఎస్పీగా నరసింహారెడ్డి, జగిత్యాల ఎస్పీగా ప్రభాకర్‌రావు, మహబూబాబాద్‌ ఎస్పీగా చెన్నయ్య, నారాయణ్‌ పేట ఎస్పీగా సత్యనారాయణ, భూపాలపల్లి ఎస్పీగా రాములును నియమించారు.

ఎన్నికల సమయంలో సీనియర్ అధికారుల బదిలీపై రాష్ట్రవ్యాప్తంగా చర్చ జరుగుతోంది. ఈ క్రమంలోనే వివాదాలు తెరపైకి వస్తున్నాయి. అందుకే వారిని మార్చి ఉంటారని అంటున్నారు. ఎమ్మెల్యేల కొనుగోలు వ్యవహారంలో సిట్ ఇంచార్జిగా ఉన్న సీవీ ఆనంద్ పై అనేక విమర్శలు వచ్చాయి. బీజేపీ అగ్రనేత బీఎల్ సంతోష్ కు నోటీసులు ఇవ్వడం, దీని వెనుక ప్రభుత్వ ఒత్తిడి ఉండడం వంటి ఆరోపణల నేపథ్యంలో ఇప్పుడు వేటు పడిందని అనుకుంటున్నారు. అలాగే, టెన్త్ పరీక్షా పత్రాల లీకేజీ కేసులో బండి సంజయ్‌ ను అనుమానితుడిగా చేర్చడంతో వరంగల్ సీపీ రంగనాథ్ రాజకీయ విమర్శలకు కేంద్ర బిందువు అయ్యారు. దాని ఫలితమే ఇప్పుడు బదిలీ వేటు పడేలా చేసిందనే టాక్ వినిపిస్తోంది.

ఇక, కరీంనగర్ సీపీగా ఉన్నప్పుడు సత్యనారాయణపై అనేక ఫిర్యాదులు అందాయి. బండి సంజయ్ నిరసన దీక్షను భగ్నం చేసే సమయంలో తలుపులు పగుల గొట్టి ఎంపీని అదుపులోకి తీసుకోవడంపై అభ్యంతరాలు వ్యక్తం అయ్యాయి. ఇదే క్రమంలో అధికార పార్టీకి పోలీసులు అనుకూలంగా వ్యవహరిస్తున్నారనే విమర్శలు ఎదుర్కొన్నారు. ఈ నేపథ్యంలో ఎన్నికల సంఘం కొందర్ని సెలెక్ట్ చేసి బదిలీ వేటు వేసిందనే చర్చ జరుగుతోంది.

తెలంగాణ (Telangana) సీఎం కేసీఆర్ (CM KCR) చాలా రోజులుగా ప్రగతి భవన్ (Pragathi Bhavan) కే పరిమితం అయ్యారు. ముందు వైరల్ ఫీవర్ బారిన పడిన ఆయన తర్వాత ఛాతిలో ఇన్ ఫెక్షన్ తో బాధపడ్డారు. బ్యాక్టీరియల్ ఇన్‌‌ ఫెక్షన్ కావడంతో కోలుకోవడానికి అనుకున్న దానికంటే ఎక్కువ సమయం పట్టే అవకాశం ఉందని కేటీఆర్ (KTR) ఆమధ్య ప్రకటించారు. పత్యేక వైద్యుల బృందం సీఎం కు చికిత్స అందిస్తూ వస్తోంది. అయితే.. ఆయన కోలుకున్నట్టు తెలుస్తోంది.

ఎన్నికల షెడ్యూల్ వచ్చిన తర్వాత తొలిసారి ప్రగతి భవన్‌ లో కేసీఆర్ కీలక సమావేశం నిర్వహించారు. మంత్రులు కేటీఆర్, హరీష్ రావు (Harish Rao) లతో అత్యవసరంగా భేటీ అయ్యారు. ఎన్నికల ప్రచారం, మేనిఫెస్టోపై ఈ సమావేశంలో చర్చించినట్టు సమాచారం. అలాగే, అధికారుల బదిలీ విషయంలో ఈసీ నిర్ణయంపై సమాలోచన చేశారు. పెండింగ్ స్థానాలకు అభ్యర్థులను ప్రకటించే అవకాశం ఉందంటున్నారు.

ఇప్పటికే 115 మంది అభ్యర్థులను బీఆర్ఎస్ ప్రకటించింది. మిగిలిన సీట్లలో పోటీ చేసే అభ్యర్థుల విషయంలో ఓ క్లారిటీకొచ్చిన బీఆర్ఎస్ బాస్.. రెండో జాబితాను కూడా విడుదల చేస్తారని బీఆర్ఎస్ వర్గాలు చెబుతున్నాయి. జనగామ నుంచి పల్లా రాజేశ్వర్ రెడ్డి బరిలోకి దిగుతున్నారని ఇప్పటికే మంత్రి కేటీఆర్ ఓ క్లారిటీ ఇవ్వగా… మిగిలిన స్థానాలైన నర్సాపూర్ సునీతా లక్ష్మారెడ్డి, నాంపల్లి నుంచి ఆనంద్ గౌడ్, గోషామహల్ నుంచి గోవింద్ రాటే, మల్కాజిగిరి నుంచి మర్రి రాజశేఖర్ రెడ్డిల పేర్లను ప్రకటించే అవకాశం ఉందంటున్నారు.

ఇక, కేసీఆర్ ఎలక్షన్ క్యాంపెయిన్ షెడ్యూల్ కూడా ఫిక్స్ అయింది. 15 నుంచి ఆయన రంగంలోకి దిగుతున్నారు. అదే రోజున ఎన్నికల మేనిఫెస్టో విడుదల చేయనున్నారు. ఆరోజు నుంచి వరుసగా జిల్లాల బాట పట్టనున్నారు కేసీఆర్. ఇప్పటికే మంత్రులు కేటీఆర్, హరీష్ రావు తెలంగాణ వ్యాప్తంగా ప్రచారంలో పాల్గొంటున్నారు.

ఈసారి బీజేపీ (BJP) గెలుపు ఖాయమని ఆపార్టీ నేతలు ధీమాగా చెబుతున్నారు. అభ్యర్థులే లేరంటూ బీఆర్ఎస్ (BRS), కాంగ్రెస్ (Congress) విమర్శలు చేస్తున్నా.. సైలెంట్ ఓటింగ్ జరగబోతోందని.. ఆ రెండు పార్టీలకు జనం బుద్ధి చెప్పడం ఖాయమని చెబుతున్నారు. ఓవైపు అభ్యర్థుల ఎంపికపై కసరత్తులు జరుగుతుండగా.. ఇంకోవైపు సమావేశాలు కొనసాగుతున్నాయి. ఇవాళ బీజేపీ కార్యాలయంలో యువమోర్చా ఆఫీస్ బేరర్స్ సమావేశం జరగనుంది. దీనికి బీజేవైఎం (BJYM) జాతీయ అధ్యక్షుడు తేజస్వీ సూర్య హాజరుకానున్నారు.

ఈ సమావేశానికి యువమోర్చా జిల్లాల అధ్యక్షులు, ఇంచార్జ్ లు, సోషల్ మీడియా కన్వీనర్లు, యువమోర్చా కార్యకర్తలు హాజరుకానున్నారు. టికెట్ల కేటాయింపులో యువమోర్చాకు ప్రాధాన్యత ఇవ్వాలని నేతలు అంటున్నారు. కనీసం పది టికెట్లు కోరుతున్నారు. తేజస్వీ సూర్య ముందు ఈ ప్రతిపాదన పెట్టనును పెట్టనున్నారు యువమోర్చా నేతలు.

మరోవైపు, పార్టీలో చేరికల సందడి కొనసాగుతోంది. మానకొండూరు మాజీ ఎమ్మెల్యే ఆరేపల్లి మోహన్ బీజేపీలో చేరనున్నారు. ఇటీవలే ఈయన బీఆర్ఎస్ కు రాజీనామా చేశారు. అలాగే, రామగుండం నియోజకవర్గానికి చెందిన జెడ్పీటీసీ కందుల సంధ్యారాణి కూడా బీజేపీలో చేరే అవకాశం ఉంది. డీకే అరుణ, లక్ష్మణ్ లను కలిసిన సంధ్యారాణి.. చేరికపై చర్చలు జరిపారు.

రెండు మూడు రోజుల్లో బీజేపీ అభ్యర్థుల మొదటి జాబితా విడుదల కానుంది. అధిష్టానం పిలుపుతో నిన్న హుటాహుటిన ఢిల్లీ వెళ్లారు కిషన్ రెడ్డి. ఈ నెల 15 లేదా 16న బీజేపీ అభ్యర్థుల తొలి జాబితా విడుదలయ్యే అవకాశం ఉంది. అభ్యర్థుల లిస్టుపై అధిష్టానంతో కిషన్ రెడ్డి చర్చలు జరుపుతున్నారు. సుమారు 40 మందితో ఫస్ట్ లిస్ట్ వెలువడుతుందని అంటున్నారు.