Politics

చంద్రబాబు (Chandrababu) అరెస్ట్, లోకేష్ విచారణ నేపథ్యంలో టీడీపీ, వైసీపీ (YCP) నేతల మధ్య మాటల యుద్ధం జరుగుతోంది. ఈ క్రమంలో మంత్రి అంబటి రాంబాబు (Ambati Rambabu) స్పందించారు. చంద్రబాబు రాజకీయ జీవితం ఖతం అయిపోయిందని అన్నారు. ఆయనకు రాజకీయ భవిష్యత్ లేదని, మరోసారి ముఖ్యమంత్రి కావడం అసంభవం అని చెప్పారు. చంద్రబాబుపై కేసులు బలంగా ఉన్నాయని, ఎట్టి పరిస్థితుల్లో బెయిల్ రాదన్నారు. అసలు ప్రజల్లో కూడా ఆయనపై సింపతీ లేదన్నారు.

బాబు జైలుకెళ్లిన తర్వాత సింపతీ వస్తుందని టీడీపీ వాళ్లు భావించారని.. కానీ, అది రివర్స్ అయిందని విమర్శించారు రాంబాబు. ప్రజా ధనాన్ని దుర్వినియోగం చేసినవారిని, దోచుకున్నవారిని జైలులో పెడితే సింపతీ రాదని సెటైర్లు వేశారు. ఆయన తప్పు చేశారని ప్రజలు నమ్ముతున్నారని.. లోయర్ కోర్టు, హైకోర్టు, సుప్రీంకోర్టుల్లో కూడా బెయిల్ పిటిషన్లు డిస్మిస్ అవుతున్నాయని.. అంటే ఆధారాలు పక్కాగా ఉన్నాయని తేలిపోయిందన్నారు. చంద్రబాబు, లోకేష్‌ వాగుడుతోనే పరిస్థితి ఇక్కడి దాకా తెచ్చుకున్నారని వివరించారు.

వైఎస్ రాజశేఖర్ రెడ్డే ఏం చేయలేకపోయాడు.. జగన్ ఎంత? అంటూ చంద్రబాబు మాటలకు సమాధానం వచ్చిందన్నారు అంబటి. రెండు పీకి రాజమండ్రి సెంట్రల్ జైలుకు పంపారంటూ కౌంటర్‌ ఇచ్చారు. టీడీపీ పాలనలో చేసిన దోపిడీ బయట పడిందని.. ఇంత జరిగినా కక్ష సాధింపు అని మాట్లాడుతున్నారని మండిపడ్డారు. కక్ష సాధింపు చేయాలంటే మొదటి సంవత్సరమే లెక్క చూసేవాళ్లమని అన్నారు.

టీడీపీ పని అయిపోయిందని గతంలో పవన్ కళ్యాణ్‌ చేసిన వ్యాఖ్యలు ప్రజలు అర్థం చేసుకోవాలన్నారు రాంబాబు. పిల్లిని చంకన పెట్టుకుని పెళ్లికి వెళ్లినట్లు.. టీడీపీ.. జనసేనను కలుపుకుని ఎన్నికలకు వెళ్తోందని సెటైర్లు వేశారు. సీఐడీ విచారణ తర్వాత బయటకొచ్చి నీతి నిజాయితీ గురించి లోకేష్ మాట్లాడటం హాస్యాస్పదంగా అనిపించిందని అన్నారు. తండ్రి అరెస్ట్ అయితే లోకేష్ డైపర్ వేసుకుని ఢిల్లీకి పారిపోయారని చురకలంటించారు అంబటి రాంబాబు.

అమరావతి (Amaravthi) ఇన్నర్ రింగ్‌ రోడ్డు కేసుపై సీఐడీ (CID) విచారణ కొనసాగుతోంది. మాజీ మంత్రి నారా లోకేష్ (Nara Lokesh) ను రెండోరోజు కూడా విచారిస్తోంది. ఉదయం 10 గంటలకు ఆయన తాడేపల్లిలోని సీఐడీ కార్యాలయానికి చేరుకున్నారు. తొలిరోజు పలు ప్రశ్నలు వేసిన అధికారులు.. లోకేష్ నుంచి సమాచారం సేకరించారు. విచారణ పూర్తయిన తర్వాత 41ఏ నోటీసులు ఇచ్చి ఇవాళ కూడా రమ్మని చెప్పారు.

తొలిరోజు 50 ప్రశ్నలు సంధించిన సీఐడీ.. ఇన్నర్ రింగ్ రోడ్ అలైన్మెంట్ విషయంలో హెరిటేజ్ సంస్థలకు లోకేష్ లబ్ధి చేకూరేలా వ్యవహరిచారని ఆరోపిస్తోంది. ఈ కోణంలోనే విచారణ కొనసాగిస్తోంది. హెరిటేజ్, లింగమనేని భూముల కోసం ఇన్నర్ రింగ్ రోడ్ అలైన్మెంట్ మార్చాలని సీఆర్డీఏపై ఒత్తిడి తెచ్చారనే విషయాలపై ప్రశ్నిస్తోంది. అయితే, లోకేష్ తొలిరోజు విచారణకు సహకరించలేదని సీఐడీ వర్గాలు చెబుతుంటే.. ఆయన మాత్రం తనకు తెలిసింది మొత్తం చెప్పానని అంటున్నారు.

ఇన్నర్ రింగ్ రోడ్డుతో సంబంధం లేని ఎన్నో ప్రశ్నలు తనను అడిగారని చెబుతున్నారు లోకేష్. హెరిటేజ్ గురించే ఎక్కువ ఆడిగిందని తెలిపారు. మిగిలిన ప్రశ్నలకు కూడా తొలిరోజే సమాధానం చెప్తానన్నా కూడా సీఐడీ అంగీకరించలేదన్నారు. తన అంగీకారంతోనే 5 గంటల తర్వాత కూడా విచారణ కొనసాగించామని కోర్టుకు తెలియజేయొచ్చు కదా అని కోరితే.. ప్రశ్నలు తయారు చేసుకోవాల్సి ఉన్నందున రెండోరోజు కూడా విచారణకు రావాలని చెప్పినట్టు తెలిపారు.

న్యాయవాది గింజుపల్లి సుబ్బారావుతో కలిసి రెండోరోజు సీఐడీ విచారణకు హాజరయ్యారు లోకేష్. ఉదయం 10 గంటల నుంచి సాయంత్రం 5 గంటల వరకు ఈ విచారణ కొనసాగుతుంది.