Politics

– భూపాలపల్లి కలెక్టరేట్ ప్రారంభం
– ఎమ్మెల్సీ మధుసూదనాచారితో కలిసి..
– ప్రారంభించిన మంత్రి కేటీఆర్
– తలసరి ఆదాయంలో తెలంగాణ నెంబర్ వన్‌
– పల్లె ప్రగతిలో దేశంలో 30 శాతం అవార్డులు మనవే
– దేశానికి ఆర్థిక చేయూత అందించడంలో
– 4వ స్థానంలో ఉన్నామన్న కేటీఆర్

భూపాలపల్లి (Bhupalpally) జిల్లాలో పర్యటించారు మంత్రి కేటీఆర్ (KTR). జిల్లా కేంద్రంలో నిర్మించిన సమీకృత కలెక్టరేట్ కార్యాలయాన్న, ఎస్పీ కార్యాలయాన్ని ప్రారంభించారు. ఎమ్మెల్సీ మధుసూదనాచారి (Madhusudanachari), ఎమ్మెల్యే గండ్ర వెంకటరమణారెడ్డి (Venkata Ramana Reddy), ఇతర ప్రజాప్రతినిధులు, అధికారులు ఇందులో పాల్గొన్నారు. ఈ సందర్భంగా మాట్లాడిన కేటీఆర్ తెలంగాణ (Telangana) అభివృద్ధి గురించి వివరించారు.

తలసరి ఆదాయంలో తెలంగాణ నెంబర్ వన్‌ గా ఉందన్నారు. అలాగే, ఐటీ, అగ్రికల్చర్‌ లో అగ్ర భాగంలో ఉన్నామని చెప్పారు. పల్లె ప్రగతిలో దేశంలో 30 శాతం అవార్డులు తెలంగాణ గెలుచుకోవడం గర్వకారణమన్న ఆయన.. వేరే రాష్ట్రాలలో సెక్రేరియట్లు కనీసం మన జిల్లా కలెక్టర్ కార్యాలయాల మాదిరి కూడా లేవని ఎద్దేవ చేశారు. దేశంలో భౌగోళికంగా 11వ పెద్ద రాష్ట్రం, జనాభా పరంగా 12వ రాష్ట్రంగా తెలంగాణ ఉందని పేర్కొన్నారు.

దేశానికి ఆర్థిక చేయూతను అందించడంలో తెలంగాణ 4వ స్థానంలో ఉందన్న కేటీఆర్.. ఉమ్మడి రాష్ట్రంలో ఉన్నప్పుడు 10వ స్థానంలో కూడా లేదని గుర్తు చేశారు. రాష్ట్రం వేగంగా అభివృద్ధి చెందుతోందని తెలిపారు.

మరోవైపు, కలెక్టరేట్ ప్రారంభోత్సవంలో ఉద్రిక్తత పరిస్థితులు నెలకొన్నాయి. బీఆర్ఎస్ రాష్ట్ర యువజన నాయకుడు సిరికొండ ప్రశాంత్ అభిమానులకు, పోలీసులకు మధ్య వాగ్వాదం జరిగింది. కలెక్టరేట్ ఛాంబర్ లోకి ప్రశాంత్ ని వెళ్లకుండా పోలీసులు అడ్డుకోవడంతో ఇరు వర్గాల మధ్య గొడవ జరిగింది. నియోజకవర్గానికి సంబంధం లేని వారిని కలెక్టరేట్ లోకి రానిస్తున్నారు కానీ.. కలెక్టరేట్ కోసం పోరాడిన వారిని ఎందుకు రానివ్వడం లేదని ఆగ్రహం వ్యక్తం చేశారు ప్రశాంత్ అభిమానులు.

టీఎస్ ఆర్టీసీ (TS RTC) చైర్మన్ గా జనగామ ఎమ్మెల్యే ముత్తిరెడ్డి యాదగిరిరెడ్డి (Muthireddy Yadagiri Reddy) బాధ్యతలు చేపట్టారు. బస్ భవన్ లో జరిగిన ఈ కార్యక్రమంలో ఆర్టీసీ ఎండీ సజ్జనార్ (Sajjanar), ఇతర ఉన్నతాధికారులు పాల్గొన్నారు. జనగామను మంత్రి కేటీఆర్ (KTR) డైరెక్షన్‌ లో దేశంలోనే టాప్ 3 మున్సిపాలిటీగా తీర్చిదిద్దానని పేర్కొన్నారు. ఒకప్పుడు తెలంగాణ (Telangana) ఎక్కడుంది అనేవాళ్లకు.. గ్లోబల్ సిటీగా మార్చి కేసీఆర్ (KCR) బుద్ధి చెప్పారని అన్నారు.

ఉద్యోగులు, కార్మికులకు లాభం చేకూరేలా ప్రభుత్వంతో చర్చించి అన్ని సానుకూల నిర్ణయాలు తీసుకుంటామని ముత్తిరెడ్డి తెలిపారు. కేసీఆర్, కేటీఆర్ నాయకత్వంలో టీఎస్ ఆర్టీసీ సంస్థ అగ్రగామిగా ఎదిగిందని… తన మీద నమ్మకంతో ఈ బాధ్యతలు అప్పగించినందుకు ధన్యవాదాలు తెలిపారు. సంస్థ అభివృద్ధికి కృషి చేస్తానని… ఉద్యోగులతో సమన్వయంగా కలిసి పని చేస్తానని అన్నారు.

ఎండీ సజ్జనార్, ప్రిన్సిపల్ సెక్రటరీ ఆధ్వర్యంలో ఆర్టీసీని మరింత ముందుకు తీసుకెళ్లేందుకు కృషి చేస్తానని పేర్కొన్నారు ముత్తిరెడ్డి. రాష్ట్రంపై పూర్తి అవగాహన కలిగిన ముఖ్యమంత్రిగా కేసీఆర్.. తెలంగాణను కాపాడే క్రమంలో అనేక సంస్కరణలు చేశారని గుర్తు చేశారు. అన్ని విభాగాలను అభివృద్ధి చేశారని కొనియాడారు.

ఇప్పటివరకు టీఎస్‌ ఆర్టీసీ చైర్మన్‌ గా బాజిరెడ్డి గోవర్థన్‌ రెడ్డి కొనసాగారు. ఆయన స్థానంలో ఇప్పుడు ముత్తిరెడ్డి బాధ్యతలు తీసుకునున్నారు. ఈ పదవిలో రెండేళ్ల పాటు కొనసాగనున్నారు ముత్తిరెడ్డి. వచ్చే ఎన్నికల్లో ఈయనకు టికెట్ కేటాయించలేదు కేసీఆర్. ప్రస్తుతం ఎమ్మెల్యేగా ఉన్న జనగామ నియోజకవర్గ అభ్యర్థి ప్రకటనను పెండింగ్ లో పెట్టారు. ఈ స్థానం నుంచి ఎమ్మెల్సీ పల్లా రాజేశ్వర్ రెడ్డి పోటీ చేస్తారని ప్రచారం జరుగుతోంది.

తెలంగాణ (Telangana) అభివృద్ధికి కేంద్రం కట్టుబడి ఉందన్నారు కేంద్రమంత్రి, బీజేపీ రాష్ట్ర అధ్యక్షుడు కిషన్ రెడ్డి (Kishan Reddy). సికింద్రాబాద్, అంబర్ పేట పరిధిలో పలు కార్యక్రమాల్లో ఆయన పాల్గొన్నారు. లాలాపేట్ – సత్యనగర్ అప్రొచ్ రోడ్డును ప్రారంభించారు. సత్యనగర్, ఇందిరానగర్, శ్రీపురి కాలనీ, లక్ష్మి నగర్, కృష్ణా నగర్, చంద్రబాబు నగర్ ప్రజలు ఏర్పాటు చేసిన అభినందన సభలో పాల్గొన్నారు. పార్లమెంట్ ఎన్నికల ప్రచారంలో ప్రజల అభ్యర్థన మేరకు ఇచ్చిన హామీని నెరవేర్చానని చెప్పారు.

హైదరాబాద్‌ (Hyderabad) వాసుల సమస్యలు పరిష్కరించడంలో రాష్ట్ర ప్రభుత్వం పూర్తిగా విఫలమైందని ధ్వజమెత్తారు కిషన్ రెడ్డి. వేల కాలనీల్లో సరైన రోడ్లు, పారిశుద్ధ్యం, తాగునీరు, ఇతర వసతులు లేవన్నారు. రోడ్ల మీద ఫ్లైఓవర్లు కడుతూ హైదరాబాద్‌.. సింగపూర్‌, డల్లాస్‌ అయినట్లు మభ్యపెడుతోందని విమర్శలు గుప్పించారు. సంక్షేమ పథకాలు బీఆర్ఎస్ కార్యకర్తలకు తప్ప.. ఇంకెవరికీ అందడం లేదని ఆరోపించారు. పేదలు రేషన్ కార్డులు లేక నానా ఇబ్బందులు పడుతున్నారని ఆవేదన చెందారు.

రైల్వే ఆస్తుల పరిధిలో ఉన్న రోడ్లు, దేవాలయాల అభివృద్ధి అంత సులభం కాదని.. కానీ ఆ శాఖతో మాట్లాడి పనులు పూర్తి చేశామన్నారు. ప్రతీ కుల వృత్తులకు కేంద్ర ప్రభుత్వం అండగా ఉందని.. లోన్‌ కూడా మంజూరు చేశారని చెప్పారు. హైదరాబాద్‌ చుట్టూ ట్రిపుల్‌ ఆర్‌ రోడ్డును రూ.26 వేల కోట్లతో మంజూరు చేశామని.. ఇప్పుడు ఆ రోడ్డు చుట్టూ రిజినల్‌ రైలు లైన్‌ కూడా మంజూరైందన్నారు. ఈ నిర్మాణం పూర్తయితే పేదలకు ఇంటి వసతి.. ఉపాధి అవకాశాలు పెరుగుతాయని తెలిపారు. రాష్ట్ర ప్రభుత్వం ఏ మాత్రం ఆలస్యం చేయకుండా హైదరాబాద్‌ అభివృద్ధిని దృష్టిలో ఉంచుకొని భూసేకరణ త్వరగా చేపట్టి మోడీ ప్రభుత్వానికి సహకరించాలని కోరారు. అభివృద్ధి విషయంలో కేంద్ర ప్రభుత్వానికి రాష్ట్ర ప్రభుత్వం సహకరించలేదని ఆరోపించారు.

ఇక, అంబర్ పేటలో సేవా భారతి ఆధ్వర్యంలో ఏర్పాటు చేసిన మెగా మెడికల్ క్యాంపును కిషన్ రెడ్డి ప్రారంభించారు. ఈ సందర్భంగా మాట్లాడుతూ.. రాష్ట్ర ప్రభుత్వం నగరానికి మూడు వైపులా హాస్పిటల్స్​ కడుతామని హామీ ఇచ్చిందని.. కొత్త వాటి సంగతి దేవుడెరుగు.. ఉస్మానియా ఆస్పత్రిలో కనీస వసతులు లేవని మండిపడ్డారు. వర్షం వస్తే మూసీ నీరు హాస్పిటల్​ లోపలికి వస్తోందని.. ఇలా రాష్ట్ర ప్రభుత్వం వైద్య రంగాన్ని నిర్లక్ష్యం చేస్తోందని ఆరోపించారు. ప్రజలకు వైద్య సాయం అందించే విషయంలో కేంద్రం అన్ని రకాల చర్యలు తీసుకుంటున్నదని అన్నారు. ఆయుష్మాన్​ భారత్​ కింద నచ్చిన హాస్పిటల్ ​లో పేదలు చికిత్స చేయించుకునే అవకాశం ఏర్పరించిందని వివరించారు.