ఒకప్పుడు ప్రపంచ దేశాలకు భారత అంతరిక్ష పరిశోధన (Indian Space Research) సంస్థ అంటే ఒక భావం ఉండేది. దీనికి తగ్గట్టుగానే పరిశోధనల్లో భారత్ (Bharath) కాస్త వెనకే ఉండేది. కానీ ఈ మధ్య కాలంలో పలు పరిశోధనలకు కేంద్ర బిందువుగా మారి, ప్రపంచంలో భారత కీర్తి సుస్థిరం చేసే దిశగా అడుగులు వేస్తోంది. చంద్రయాన్-3 (Chandrayaan-3) ప్రయోగించాక ప్రపంచ దేశాల దృష్టిని తన వైపు తిప్పుకొన్న ఇస్రో మరో కొత్త ప్రయోగం మొదలు పెట్టింది.
మానవసహిత అంతరిక్ష యాత్రకు శ్రీకారం చుట్టింది. అంతరిక్షంలోకి వ్యోమగాములను పంపే ఈ ప్రాజెక్టులో కీలకమైన టెస్ట్ వెహికల్ అబోర్ట్ మిష‌న్-1 టెస్ట్ ఫ్లైట్ అక్టోబర్ 21న ఉదయం 7 నుంచి 9 గంటల మధ్య నిర్వహించనున్నట్టు సోమవారం ప్రకటించింది. మరోవైపు టెస్ట్ మాడ్యూల్‌కు చెందిన ఫోటోలను ఇస్రో తన ట్విట్ట‌ర్‌ ఖాతాలో పోస్టు చేసింది.
నేషనల్ స్పేస్ ఏజెన్సీ ప్రకారం.. టీవీ-డీ1 (TV-D1) టెస్ట్ ఫ్లైట్ శ్రీహరి కోటలోని సతీష్ ధావన్ స్పేస్ సెంటర్లో నిర్వహించనున్నారు. ఇక అంతరిక్షంలోకి వ్యోమ‌గాముల్ని పంపేందుకు ఇస్రో ప్రయత్నాలు చేస్తున్న విషయం తెలిసిందే. దీని కోసం గగన్యాన్ (Gaganyaan) ప్రాజెక్టును చేప‌ట్టింది. ఈ ప్రాజెక్టులో కీలకమైన క్రూ మాడ్యూల్ ( Crew Module)ప‌రీక్ష‌కు ఇస్రో సిద్ద‌మైంది.
ఈ టెస్టింగ్‌లో భాగంగా మాడ్యూల్‌ను నింగిలోకి పంపి, మ‌ళ్లీ సురక్షితంగా భూమిపైకి చేరేలా ఏర్పాట్లు చేస్తున్నారు. ఇందులో భాగంగా క్రూ మాడ్యూల్ బంగాళాఖాతంలో ల్యాండ్ చేయనున్నారు. కాగా పారాచూట్ల సాయంతో టీవీ-డీ1 శ్రీహ‌రికోట నుంచి 10 కిలోమీట‌ర్ల దూరంలో ఉన్న స‌ముద్ర జలాల్లో ల్యాండ్ కానుంది. మరోవైపు టీవీ-డి1 టెస్ట్ ఫ్లైట్ తర్వాత మరో మూడు టెస్ట్ వెహికల్ మిషన్లు నిర్వహిస్తామని, గతంలో ఇస్రో ఛైర్మన్ ఎస్ సోమనాథ్ తెలిపారు.
